يوميات أبو لامعه في بلاط صاحبة الجلالة - مذكرات أبو لامعه سنة 2002

[أسد]

[b:post_uid2]يوميات أبو لامعه في بلاط صاحبة الجلالة (1)

شوف بقى يا خواجة

تصدق بإيه

مش أنا أول واحد إخترع القرطاس

أيوه القرطاس (الأرطاس) إللي بيحطوا فيه الترمس

حاقولك إزاي يا خواجه

أنا زي مانت عارف شغال صحفي

ولما بديت أكتب كنت باكتب شوية أخبار بسيطة كده وابيع

الخبر بربع جنية

المهم ماطولش عليك قول طول

رحت مكبر الأخبار وبقت بعد كده أخبار كبيرة ووصلت

معايا لخمسة وسبعين قرش للخبر أحيانا

قلت ما بدهاش بقى لازم أتوسع في نشاطي

فبدأت أكتب تحليل اخباري وحاجات زي كده

وكتبت مقالات وكتب

ولما ربنا فتحها علي رحت كاتب في مجلة إسمها إيه

إسمها إيه إسمها إيه إسمها إيه

أيوه إسمها سبتمبر

رحت كاتب مقاله واحده وعاديك

الدنيا إتقلبت

وبقيت أبعت لهم كل أسبوع مقال وما ينشروهاش

أبعت مقالات ما ينشروهاش

وأنا أشتري المجلة على إن فيها المقال بتاعي ألاقي مفيش فيها حاجة

المهم ما طولش عليك قول طول

كنت بامسك المجلة وأقطع الصفحات بتاعتها من غيظي

وأنا قاعد في مرة باقطع المجلة لقيت نفسي ماسك الورقة وبابرم فيها

لقيتها شكلها ينفع نعبي فيها الورق اللي أنا قطعته

وقعدت أصرخ وجدتها وجدتها

رحت واخد الإختراع بتاعي ورايح بيه على عم اسماعيل بتاع الغلال إللي على

أول الحارة وقلت له إدين كيلو عدس وحطه لي في البتاع ده

قاللي إيه ده حد يحط العدس في بتاع ورق كده

إنت حتقرطسني ولا إيه

وقعدت أصرخ ياخواجه واتمرمغ في الأرض واصرخ واقول وجدتها تاني

وجدتها تاني وجدتها تاني

وقلت لعمك إسماعيل تشتري مني الإختراع ده حتى أنا سميته القرطاس

لما إنت ألهمتني بالإسم ده ياجمالك ياعم اسماعيل ياحلاوتك

وانت بتشخط في وتقوللي إنت حتقرطسني

ياحلاوتك ياجمالك خليت للحلوين إيه

المهم خد مني البتاع (القرطاس) وحط لي العدس ما اتكبش ولا إدلق ولا وقع مني ولا منه

قمت قلت له ما تسجلي الإختراع ده يا عم اسماعيل

قام قاللي وماله

وأخدني عن عم بدوي القهوجي وطلعنا على الكراسي علشان نقرب من التسجيل إللي كان بيشغل عليه

أغنية لشعبان عبد الرحيم

وسجلنا براءة الإختراع

وقال

إن أبو لامعه إخترع القرطاس المصنوع من مجلة سبتمبر إللي هاري نفسه

كتابة مقالات ومابينشروهاش   ..... ير حابطل سجاير واشيل حديد وانا بحب الحمار

طبعاً الباقي كان أغنية شعبان عبد الرحيم

أصل عم إسماعيل سجل على شريط شعبان عبد الرحيم وعم بدوي طلع يجري وراه بإزازة الشيشة والخرطوم

وطلعت أجري أنا كمان بس الحمد لله يارب كنت سجلت الإختراع بتاعي بمعرفة عم اسماعيل

على تسجيل عمك بدوي ولما طلعنا نجري

خدت العدس ومادفعتش الفلوس

واعتبرت ده أو مبلغ أقبضه من إختراعاتي

وخلاص ياخواجه

بكره أبو لامعه في قسم البوليس

ترقبوها

:cheesy: [/b:post_uid2]

[أسد]

[b:post_uid2]أبو لامعه في بلاط صاحبة الجلالة (2)

- وبعدين يا خبيبي

- وبعدين إيه ياخواجة

-  طلعتوا تجروا !!!!

- أيواااااه

طلعت أجري وأنا فرحان بقرطاس العدس القرطاس إختراعي والعدس ثمن بيع براءة الإختراع من عم اسماعيل

- وبعدين

- ما انا جايلك آهو ف يالكلام ياخواجة

أنا كنت خايف من عم بدوي علشان بوظنا له شريط شعبان عبد الرحيم

وقعدت أجري لما نفسي  إتقطع وجريت جريت لما وصلت أسيوط

- أسيوط - ياخبر اسود

- أيوه ياخواجة أمال إيه إحنا كنا بنجري زمان أكتر من كده بكتير

المهم فضلت أجري لغاية ما وصلت بولاق أبو العلا

- بولاق أبو العلا - إنت مش بتقول إنك وصلت أسيوط

- معلش فوت دي ياخواجه - لقيت عمارة قلت أدخل واستخبى فيها دخلت لقيت السلم في وشي

طلعت على طول لغاية ما وصلت السطوح لقيت نفسي في عمارة على الكورنيش مكتوب عليها يافطه مجلة سبتمبر

المهم ما اطولش عليك قول طول

قعدت القط نفسي شويتين لقيت مقالاتي منشورة بالمشابك على الحبل في السطوح

وتاني قعدت اصرخ واقول وجدتها .. وجدتها .. وجدتها تاني

- إيه هي اللي وجدتها دي يا خبيبي

- المقالات بتاعتي ياخواجة لقيتها منشورة بس على حبل الغسيل

- ياخرااااااااااابي

- أي واللله ياخواجة ، وعليها رحت واخدها وقلت أفرجها لاصحابي

ولسه باحط إيدي عليها

لقيت الولية أم فتحي الغسالة بترقع بالصوت الحياني

حرامي حرامي حرامي حرامي الغسيل

وعاديك ماتعرفش الناس دي كلها جت منين

ومسكوني وودوني القسم

- وبعدين

- أنا ماسكتش

أنا جبت محامي  علشان يترافع عني قدام الصول في القسم

أصل أنا أعرف محامين كتير من أيام التلمذه

هو أنا ما قولتلكش

ما أطولش عليك قول طول

قعدت الولية ام فتحي الغسالة تصرخ وتقول للصول الواد ده سرق الغسيل بتاعي

وانا أقول له لأ دي المقالات بتاعتي ونشروها على السطح رحت واخدها علشان أوري لأصحابي واخويا الغلباوي

إني باكتب في مجلة سبتمبر

وقعد المحامي يترافع قدام الصول وصوته جاب آخر الدنيا وقعد يقول

ياحضرات الصواليل والشواشيش

وكلام من اللي إنت عارفه

المهم أقنع الصول

قام الصول قايم من على مكتبه وراح على الولية ام فتحي الغسالة

وراح شايل الفيشة  -- راحت ساكته على طول

أصلها غسالة بالكهرباء

وخرجت الحمد لله من القسم اللي في المهندسين

- ياخرابي

غنت مش كنت في بولاق يابو لامعه

- هو انا ماقلتلكش ياخواجة

مش احنا في عصر الذره

- ازاي ياخبيبي

حاقولك طبعاً على عصر الذرة واليورانيوم المخضب

بس إنت عايز تعرف كل حاجة مرة واحده

بعد بكره علشان بكره الجمعة اجازة

- إنتظروا أبو لامعه في عصر الذره

غـــــــــــــــــــداً

:D [/b:post_uid2]

[Ashraf]

ابو لمعة:كنت فين يا خواجة مشفتكش من كام يوم

الخواجة:اصلي كنت في اثينا

ابو لمعة:تعرف الحاج برعى

الخواجة:يطلع مين الحاج برعي دي

ابو لمعة:حد ميعرفشى الحاج برعي ابن عمي ياد ساكن في اثينا البلد

الخواجة:لا ياخبيبى انا مبيعرفش الحاج برعي دي اصلي ساكن في اثينا المخطه

الخواجه:وانا هناك في اثينالاقيت يافطة كبيرة متعلقة على باب السيرك تعرف السرك?

ابولمعه:اه السيرك اللي بيروضوا فيه الوحوش اه عارفه كمل ايه اللي حصل

الخواجه:اليافطة دي مكتوب عليها مطلوب مروضين للوحوش

ابو لمعه:اه وبعدين

الخواجه:اتقدمت للشغلانة دي

ابولمعه:وبعدين

الخواجه:دخلت القفص اللي فيه الاسود

ابو لمعة:وايه اللي حصل

الخواجه:قعدت مع لاسود نص ساعه

ابو لمعه:ها وبعدين

لخواجه:خلاص

ابولمعه:خلاص ايه يا خواجه

الخواجه:خلاص الفشره خلصت على كده

ابو لمعة:خللي بالكـ الحكاية دي حصلت قبل كده

الخواجه:إزاي

ابو لمعه:وانا هناك في اثينا بزور ابن عمي لاقيت اليافطة دي

الخواجه:اليافطه اللي مكتوب عليهامطلوب مروضين للوحوش?

ابو لمعه:ايو مطلوب مروضين للوحوش

ابو لمعة:اتقدمت  للوظيفه دي ودخلوني على قفص فيه كدا يجي مييت اسد

الخواجه:وبعدين

ابو لمعه:تصدق بايه? تاني يوم شالو اليافطه دي وحطو يافطه جديدة

الخواجه:وكتبو ايه?

ابو لمعه:مطووووب وحووووووووووش

  :D

[أسد]

أبو لامعه في عصر الذره (3)

- وبعدين ياخبيبي

حافوت دي

خرجب من القسم في المهندسين

- أبداً وغلاوتك ياخواجة ، خطوتين وبقيت في الجرنال اللي باكتب فيه

هو مش جرنال مصري

إنما بتاع بلد من حبايبنا واخواتنا اسمها هبلستان

وقعدت أقرأ الجرنال بتاع النهاره

طبعاً مش الجرنال بتاعنا باقرا الجرنال بتاع ناس تانيين

ما علينا طبعاً أنا كنت باجري كتير زي ما انت عارف من ساعة مارححت لعمك اسماعيل واخدني ورحنا لعمك بدوي

اللي قعد يجري ورانا لحد ما طلعت العمارة وصرخت في وشي الولية ام فتحي الغسالة لحد مارحنا القسم واكلت العلقة المتينة والمحامي اترافع والصول شال الفيشة وخرجت بالسلامه

لقيت ياخويا كل ما واحد يقرب مني يهرب ويبعد بعيد استغربت الحكاية دي

وقعدت اكمل  قراية في الجرنال وبعدين قالولي المدير عايزك

دخلت له لقيته بيبتسم لي وقاللي يابولامعه إنت عظيم انت هايل انت ما حصلتش

راحت الجلالة واخداني ورحت مقرب عليه علشان اتقبل منه تهانيه وياخدني بالحضن

وعاديك ياد ياخواجه أول ماقربت عليه لقيته اتاخد والكلام بدأ يتحشر في زوره ومبقاش عارف يكلم الكلام

المهم قعدت في المكتب عنده لقيته بص لي بقرف شديد وقاللي إيه ده

ده انت اتنقلت نقلة كبيره قوي ده انت اتنقلت لعصر الذره

قلت له ابدا ابدا دي حاجة بسيطه ........ اي خدمه

انا عملت اتصالاتي وعرفت كل التفاصيل عن الموضوع ده من المصادر السرية الخاصة بتاعتي واتأكدت

وبدأت أعمل ابحاثي في الموضوع ده

قال لي وهو كاتم نفسه ... واضح واضح

المهم انا لقيت القعده دمها تقيل والراجل المدير بتاعنا عمال يكتم نفسه قلت ما بدهاش

وقلت له بعد اذنك اقوم اشوف شغلي

قاللي : يااااااااريييييييييييييييت

قلت ياسلام

للدرجة دي عاوزني اكمل ابحاثي في الموضوع ده

المهم قمت وانا الدنيا مش سايعاني من الفرحة

انا اتنقلت نقله كبيره قوي وبقيت عالم ببواطن الأمور ومتخصص في الذره وابحاثها

وقعدت افكر .. ايه رأيك يابو لامعه تسيبك من الجرنال ده بتاع هبلستان وتروح تشتغل في مجلة علمية متخصصة في علوم وابحاث الذره

ما هو انت بقيت خبير في علوم الذره

مشيت في المكتب وبقيت ابص على الزملاء لقيتهم معظمهم دايخين

وبصيت على الباب لقيت اول ما واحد يدخل من الباب

حاجة تلقائية كده يحط ايده على مناخيره

ما خدتش واديت انا مش حاسس بحاجة غير اني سعيد ومبسوط ( والدنيا مش سايعاني)

قعدت علىمكتبي لقيت الصحفيين اللي معايا في المكتب قالولي هو انت حاتكتب تاني في مجلة سبتمبر

قلت لهم : أمااااااااااااااال ، ده حتى رئيس التحرير قريبي

حتى اقروا اسمه .. لامعه المعمارجي (يعني اللي بيبني)

قالوا وماله واتنطروا واقفين كلهم مع بعض وقالوا احنا اكيد لو خرجنا الشارع ممكن نبعد عن جو الأبحاث بتاعتك دي

ونلاقي موضوع مثير نكتب عنه

وخرجوا جري

المهم قعد أفكر وانا طبعاً عمال اعمل ابحاثي في الموضوع بتاعي اللي بقيت خبير فيه

وهو الذره .. لقيت الجو اتخنق في المكتب واصبح لا يطاق مش عارف ليه

قمت قلت لنفسي ياواد يابو لامعه اخرج روح يمكن يجيلك فكره احسن من كده في البيت

المهم ركبت ميكروباص وانا قاعد افكر لقيت السواق اتجنن وقال لموا الأجره يافنديه وطلع طلعه أمريكاني وطار بالميكروباص زي الصاروخ وقعد يبرطم ويقول امال فين وزارة البيئة دي اللي بيقولوا عليها ده كده حرام

قلت اكيد قصده السحابة السوده

ما علينا نزلت من الميكروباص لقيت صاحبي قاعد في المحل بتاعه قلت اما اقعد معاه شوية

ولسه حاقعد لقيته اتاخد وشكله اتغير

قلت له انا اليومين دول باكتب في موضوع مهم عن الذره وابحاث الذره وعمال اشتغل على الموضوع ده طول الوقت

ومحقق نجاح كبير قوي والدنيا مش سايعاني

قام وقف من على الكرسي وقعد يبص لي قوي وقالي

تساعك الدنيا ازاي .. هه .. تساعك ازاي حرام عليك حرام عليك

انت مش بقيت صحفي في شئون الذره

انت فاهم الموضوع غلط .. انت بقيت عالم ذرررررات

ذرات .. فاهم .. ذرات

وعمال على بطال يقول ياخي حرام عليك

وتقولي الدنيا مش سايعاك طبعا متساعاكش

وحتساعك ازاي يا اخي حرام

ده وانت في عصر الذره حاجة لا تطاق

ارحمنا بقي وروح خد لك حاجة من الصيدلية تخرجك من عصر الذره ده اللي انت قارفنا بيه

وروح اكتب لك مقال عن (((اسهال))) التصريحات والاخبار اللي بيقولوه في قناه البريزه اللي بتطلع من زفتستان دي

ولا اقولك بلاش زفتستان لحسن احنا مش ناقصين كفاية علم الذرات اللي دوخنا ده

وابتسمت وتنتي قاعد اسمع الكلام

لقيته وشه بدأ يزرق وقاللي قوم ... قووووووووووم حرام عليك روح الصيدلية

قلت له صحيح اقوم علشان عندي لقاء مهم لازم البس البدلة البني والقميص الازرق والكرافته الكحلي واروحه

وقمت وقلت اوده بمقالتين عن الذره ورحت مديله اتنين

وخرجت , وانا خارج سمعته بيصرخ وبعدين وقع على الأرض وهو بيقول

أف

وبس يا خواجه .. الله انت رحت فين ياخواجه

F..  F..  F..  F..  F..  F..  F..

ده الخواجه اللي بيقول

:D

[أسد]

[b:post_uid2]أبو لامعه بدأت أخباره تنزل في نشرات منظمة الصحة العالمية وحقوق الإنسان  (4)

إيه ده ماكانش العشم ياخواجة

تسيبني وتجري كده وتقعد ترطن بالإنجليزي وjقول F..  F..  F..  F..  F..  F..  F..

إنت عارف اني دراستي فيومي وماعرفش انجليزي بحكم اني درست في البرازيل

- ياخرابي في البرازيل بيدرسوا بالفيومي

- أمال ايه ياخواجه وعلشان كده بقيت خبير في الشئون العربية

- إزاي بقى ياخبيبي

- أقولك إزاي .. أنا بعد ماخرجت من عند صاحبي رحت للصيدلية وقلت له أنا عاوز الدواء إللي بيخليني أنسى الذره وعلومها ، دخل الصيدلي جوه وجاب لي برشام فحم وشامبو وصابونة وليفه ومعطر جو

وقاللي إنت تاخد البرشام الفحم ده ، قلت له ليه قال لي علشان ترجه للعصور القديمة أيام ما كانوا بيطبخوا على الفحم وبعد كده حتنسى موضوع الذرة ده نهائي

قلت له وإيه ده كمان ، قاللي بعد ماتاخد البرشام حتدخل الحمام ، تعمل زي الناس ، وتستحمى الليفة والصابونة دي كويس ، وتغسل شعرك كويس بالشامبو وبعد كده ترش الحمام بالدواء ده ، قلت له ده معطر جو مش دواء

قال لي إنت حتعرف أحسن مني ، ده مش علشانك

ده علشان صحة الناس اللي معاك في البيت الواد لامعه الصغير ، وأمه

قلت له ياسلام ده الطب اتقدم قوي

قاللي إنت مش حاسس بنفسك ولا إيه ، ماهو إنت خبير في شئون الذرات

قلت له ماشي وأخدت الدواء ومشيت رحت على البيت

دخلت البيت لقيت الواد لامعه قاعد بيلعب باللعبة المشهورة (عنتر)

وأمه قاعده تذاكر ، أول ما دخلت لقيت التليفون بيرن (المحمول طبعاً)

لقيت مكالمة مهمه قعدت أتكلم وأنا ماسك التليفون بإيدي اليمين وباهرش في دماغي بإيدي الشمال وعمال ألف في البيت كله

المهم قعدت أتكلم وأحكي للواد لامعه اللي حصل وباحكي لأمه كمان

لقيتها بتقوللي طب ياللا ......

قلت لها حاضر وقعدت أكمل كلامي وهي كل خمس ثواني تقوللي ياللا ...

الحقيقة استغرب لأنها قالتللي ياللا حوالي سبعة وتسعين مرة لحد دلوقت

قلت لها ياللا إيه

قالتلي ياللا خد العلاج واعمل اللي قاللك عليه الصيدلي

قلت لها زي بعضه ولو إني كنت عاوز أكتب لي كام مقاله كده عن الذرة وأنا في المود علشان مطلوبين مني لوكالات الأنباء العالمية

قالتلي لأ . . إنت خد العلاج الأول ربنا يخليك ويخلي لك لامعه ويعمي عنك حزب الخضر وما يعملوش مظاهرة ضدك

قلت لها ليه قالتلي علشان ريحتك

قلت لها ريحة إيه

قالتلي قصدي إن ريحتك فاحت ، قصدي أخبارك إتعرفت إنك مهتم بالذرة والذرات وإنت عارف هم بيكرهو الأسلحة الفتاكة دي

قلت لها معاكي حق

المهم خدت العلاج ودخلت الحمام عملت زي الناس

والواد لامعه لقيته بيغني على باب الحمام بيقول (ماما بابا دح دح .. بابا إي إيح)

وبعد كده إستحميت بالليفة والصابونة

وغسلت راسي بالشامبو

ورشيت الحمام زي ما الصيدلي قاللي

وبعد كده خرجت قعدت مع الواد لامع وأمه

لقيت الواد لامعه مبسوط قوي

وقعدنا نتكلم وأقرا الجرايد وأهرش في شعري

بعد ساعة كده لقيت الواد لامعه همدان ومدروخ وكذلك أمه

قلت لهم مالكم قالوا تعبانين خالص

قلت لهم إنتوا أكيد كلتوا حاجة وحشة

ونزلت جري للصيدلي أقول له

قاللي لأ إحكيلي من بعد ما خرجت من عندي عملت إيه

قلت له اللي حصل بالتفصيل الممل

قاللي ورشيت الدواء الأخير فين ، قلت له في الحمام زي ما قلت لي قاللي لأ ده إنت لازم كنت ترشه في البيت كله

روح إعمل كده بسرعة ، وافتح الشبابيك على آخرها

قلت له حاضر ورحت

عملت زي ما قللي وبدأت صحة الواد لامعه وأمه تتحسن

ما علينا المهم حسيت إني عندي رغبة كبيرة في الكتابة

قعدت على المكتب مسكت الورق والقلم وقعدت أهرش في شعري وأفلي نفسي وأقول تكتب إيه يابولامعه تكتب إيه ...؟ المهم قررت أكتب عن تجربتي مع علوم الذرات

وكتبت إللي حصل بالضبط في شكل قصة ممزوجة بأسلوب التقارير العلمية والأخبار

ما علينا

كان عندي موعد علشان عندي لقاء في تليفزيون دولة عبطستان

رحت لابس القميص الأزرق والكرافته الكحلي والبدلة البني وبقيت آخر شياكه

وخدت معايا الموضوع الأخير إللي كتبته ورحت على الحتة إللي حيكلموني فيها كخبير في الشئون العربية ، أمال

خبير ، من خبره

قابلت واحد صاحبي من زمان ماشفتوش قلت له فينك وفين أيامك

قاللي أنا أجرت دكان صغير كده وحاعمله منظمة لحقوق الإنسان

قلت له مبروك

قاللي وانت أخبارك إيه

قلت له عن أخباري ووريته بالأمارة آخر مقالاتي

خدها وقاللي هاتها ..

قلت له ليه

قال لي حنعمل بيها شغل كبير قوي

قلت له إزاي

قال لي حابعتها ينشروها في تقرير المنظمة (حقوق الإنسان) علشان يفهموا ويعرفوا كيف يكون ظلم الإنسان لأخيه الإنسان

وإن الظلم مش بس عن طريق الحبس والجلد ، لأ ده ممكن يكون عن طريق (الأنف)

قلت له إزاي عن طريق الأنف

قاللي حاقولك (آنفاً) يعني لاحقاً

وبرضه ممكن ننشر التجربة المثيرة دي في نشرة منظمة الصحة العالمية كتجربة رائده للتخلص من علم الذرات والعودة إلى الفحم

قلت له وإنت إيه إللي كان جايبك هنا

قاللي أنا إستضافوني كخبير

قلت له ياسلام ده أنا كمان خبير

قاللي إنت خبير وأنا خبير وكلنا خبرا

إيه الحلاوة دي

وبعدين ندهوا علي قاللولي ياللا علشان هما بدأوا في تليفزيون عبطستان النشرة

ويادوب تعرف حتقول إيه لما يسألوك

قلت له عن إذنك

ودخلت الأوضة إللي حيسألوني فيها

وحطوا جنبي الشجرة علشان نعمل منظر وقعدت أقرأ الأسئلة إللي حيسألوني فيها

والإجابات إللي لازم أقولها

مش باقولك خبير!!!!!!!

:D [/b:post_uid2]

[أسد]

[b:post_uid2]مقالات أبو لامعة

المقال الأول :

بصفتي خبير في الشئون العربية .. أؤكد ..

هذا رأيي .. ولن أتنازل عنه !!!

وأعرف ما يرمون إليه !! ..

وها أنا ذا أعود لأكتب لكم من جديد على صفحات مجلة سبتمبر.

هذا بعد أن هراني أحد الأشخاص ويدعى أبو كرش ، وقال إني أكتب العديد من المقالات ، ولكنهم في مجلة سبتمبر يضطهدونني ولا ينشرون لي أي شئ. أو أنني أقول فقط كلام (أفشر يعني) ، والرسالة التي أريد أن أوصلها لهذا الشخص (أبو كرش) هو أنني لست كما يدعي ، وها أنا ذا بالصورة والبنط العريض على غلاف مجلتنا المحبوبة (سبتمبر).

وبعد تلك المقدمة التي كانت ضرورية بعد أن تلقيت العديد من الإستفسارات التي وصلتني سواء بالبريد أو الفاكس أو على بريدي الإلكتروني Abulama@fashr.com.net.www وأيضاً من صديقي العزيز (الخواجة بيجو) ، حتمت علي المسئولية تجاه قرائي الأعزاء على سطوح العقار القاطن على كورنيش النيل بجوار مبنى التليفزيون ، والمزين بيافطة كبيرة لمجلة سبتمبر ، والذين يستمتعون بمقالاتي المثيرة للكثير من الجدل والنقاش بين (أم فتحي) ، وبين الكثير من الغسالات الآئي يقمن بنشر جميع مقالاتي بعد دعكها ببرسيل.

وبعد .. في إحدى المرات التي أثناء إستضافتي على شاشة تليفزيون عبطستان ، لأخذ رأيي في بعض القضايا والموضوعات الهامة بصفتي خبير في الشئون العربية.

قال لي مسئول مكتب تليفزيون عبطستان بالقاهرة ، "خذ هذه الورقة فيها جميع الأسئلة التي سيسألك فيها مذيع البرنامج على الهواء مباشرة. وفيها كل التعليمات المطلوبة منك ، وأهم حاجة مش زي كل مرة أول ماتشوف الكاميرا تقعد تاخد بوزات وتبتسم وتترسم علشان صورتك تطلع حلوة." ، وطبعاً تلقيت الورقة منه بأطراف أصابعي ، وبعد ذلك أمسكت بها وبدأت أقرأ فيها وأحاول التركيز حتى لا أنسى أي كلمة ، وفي تلك اللحظة وجدت الشخص إياه يصرخ في ، ويقول شيل إيدك من دماااااااغك ، واكتشفت أنني كالعادة أهرش في شعري ، وطبعاً هذا الشئ سيتسبب في نكش شعري والصورة لن تكون جيدة. المهم مررت يدي على شعري من الأمام للخلف لإعادة كل شئ مكانه ، ورجعت الثلاث قملات الائي قد إنتقيتهم من شعري ، وعدت إلى قراءة الأوراق.

ثم استوقفتني إحدى العبارات ....

وناديت على الشخص المسئول وقلت له ، إن هذا السؤال يتحدث عن دور أغنية المطرب (شكمان عبد الرحيم) ، "أنا باكره إسرائيل" ، ودورها في تنمية الوعي العربي وتنشيط ذاكرة العرب تجاه أن هناك ما ينبغي أن نكرهه. وليس فقط أن نتجاهله أو نتركه ، بل يجب أن نجتهد نحن كعرب في أن نكره إسرائيل. وإجابتي كما إقترحها المسئولون عن البرنامج أن أقول في مطلع إجابتي (بالتأكيد ... وأكمل الإجابة) ، ولكني أرى أن حسي القومي العربي وخبرتي في الشئون العربية بصفتي خبير في الشئون العربية هو أن أستهل إجابتي بأن أقول (في الحقيقة .. أو الواقع .. كما يقولون .. أنني أؤكد ....) . ودب خلاف كبير بيني وبين الشخص المسئول وتمسكت بموقفي باعتباري أنا الخبير وليس هو. واضطر بعد أن عرف من زملاؤه عما يمكن أن أفعله إذا غضبت ، وذكروا له العديد من القصص عني ، فاقتنع بوجهة نظري وقال لي سعادتك تقول إللي تحب تقوله. وقد كان.

ومن هذا المنبر العظيم (مجلة سبتمبر) أؤكد لكم مرة أخرى أن أهم شئ لدعم قضايانا في الوطن العربي هو أن نبدأ بقول (في الحقيقة .. أو الواقع ..) وليموتوا بغيظهم.

:blush: [/b:post_uid2]

[Mohamed Abdellah]

:D كل ده صحافة؟ وبعدين مفيش مجلة اسمها سبتمبر، فيه مجلة اسمها اكتوبر وجريدة اسمها مايو، الحقيقة إن الصحافة هي كده، شئ صعب.

[أسد]

[b:post_uid2]سلسلة مقالات أبو لامعة

المقال الثاني :

المسئولية تحتم علي ...

أن أسطر السطر الخطير .. الذرات ..

مضطر أن أرد عليهم ... بكل قوة !!

سدوا أنوفكم !! ..

إنها المسئولية القومية العربية ..

إنها مسألة ضمير تحكمني ..

بل هي لب وأساس العلاقة بيني وبينكم .. قرائي الأعزاء ..

مضطر أن أعود ..

مضطر أن أعود إلى ابحائي وتجاربي مرة أخرة ..

في علم الذرات ..

هيا .. أصرخوا معي .. إرفعوا أصواتكم .. أوصلوا نداءاتكم واستغاثاتكم .. إلى كل من يتحدث العربية .. إلى كل بقعة على وجه الكرة الأرضية تصلها مجلة سبتمبر .. إصرخوا معي ..

يا إخواني ..

سدوا أنوفكم !!..

اسمحوا لي في البداية أن أوضح لكم ما حدث ، فبعد الإهتمام الكبير الذي يستحوذه البرنــامج النووي الذي تتبناه الدولة العبرية بداية من مفاعل ديمونه. وبعد كل هذا الدعم والميزانيات الضخمة المخخصة له من قبل الحكومة الصهيونية.

يجب علينا أن نتوخى الحذر وأن نفيق  ونستفيق كعرب ، ونستغل كل قدراتنا ومهاراتنا ومواهبنا التي حبينا بها.

والجدير بالذكر أننا كعرب لدينا مواهب ومهارات إختصصنا بها عن سائر البشر. وهي أننا بطبيعتنا وبفطرتنا لا نفكر ، وعندما يسأل أحد الكبار عن سبب التقدم العلمي الموجود لدى الصهاينة فيتقول ، وطبعا بعد أن يقول : في الحقيقة .. او الواقع ويضع  رجل فوق الأخرى وهو جالس على الطرف الأمامي من الكرسي. أن الإسرائيليون هم عبارة عن مهاجرون جاءوا من دول أخرى. ياسلام .. ما هذه البلاغة أيها الفصيح ، فعلا معه كل الحق فلو كانوا عرباً لما استطاعوا أن يكونوا هكذا فالعرب لا يفكرون.

والعرب يأكلون كثيراً .. ويتكلمون كثيراً كثيراً كثيراً ، وكسالى بطبيعة الحال. وعندما كنت أتحدث إلى أحد أصدقائي العلماء ومن خبراتي وأبحائي إكتشفت التالي ، أننا لو جمعنا كل تلك المهارات فسوف ندمرهم ، نعم ندمرهم. فعندما تتوقف عن التفكير ويقدم لك الطعام فبطبيعة الحال ستأكل كثيراً ، وعندما تتكلم كثيراً وأنت تأكل كثيراً فسيتسرب الهواء إلى معدتك طبعاً وتتكون الغازات وبما أنك كسلان لا تتحرك فستكون أمعاءك الغليظة هي تلك البيئة الصالحة لتكون كل تلك الغازات. وأنت بدون شك كسلان ، فستتجمع كل تلك الغازات داخل أمعاءك إلى أن تصبح ذات أثر عظيم عند خروجها. ناهيك عن كل تلك الإنفجارات التي تحدثها.

وبحسبة بسيطة ، فلو كانوا بدءوا بمفاعل ديمونه ، فنستطيع نحن العرب أن نبدأ بمئات الملايين من المفاعلات في يوم واحد. فأنشط ما فينا يشجب ويستنكر ، وأقصى ما يمكننا عمله هو أن نقول ما هو كلام حلو أهه - واحنا بنسمع شكمان عبد الرحيم - أمال بيقولوا عليه إسفاف ليه. وبهذا يمككنا أن نتفوق عليهم ذرياً وندمرهم ونطفشهم من أرضنا التي إغتصبوها. هذا هو السطر الأخير ، والأكثر خطورة ضد الصهاينة.

:D

[/b:post_uid2]

[أسد]

[b:post_uid2]مقالات أبو لامعة

المقال الثالث :

لن أسكت .. ولن أرضخ ...

فأنا مواكب لكل تقنيات العصر ..

الذرات ليست كل شئ ..

فأنا هاكر أيضــاً !! ..

في مقالي العدد السابق تطرقت إلى التقدم في مجال الأسلحة النووية لدى الأعداء.

ولكني وبعد أن تحدثت في تلك المقال على ما يمكن أن نقوم به نحن العرب تجاه تلك القضية ، ومساهمة كل مواطن عربي في الكفاح ضد هؤلاء الشراذم الذين أتوا إلى أراضينا من كل دول العالم المتقدم. تلقيت العديد من التحذيرات والتهديدات.

ولكني أعلنها الآن علانية ، لن أسكت وسأدمر كل المواقع التي يتحركون من خلالها.

فأنا ولا فخر .. هاكر .. هاكر .. فاهمين يعني إيه هاكر.

سأقص لكم روايتي الشهيرة مع أحد المواقع الشهيرة والتي قمت بتدميرها بالكامل. وكانت الخسارة فادحة.

وأود أن أوجه كلامي في هذه القصة إلى الخواجة بيجو ، لأنه هو اللي دايما يجاريني ويسمعني ، فكما تعرفون أن الفهلوية كثيرون ، وعندما أقص أحد تلك البطولات العظيـمـةعليهم أجدهم (بجهلهم) يتغامزون ويبتسمون إبتسامات صفراء (لأنهم لا يغسلون أسنانهم) ويقولون ياسلام .. شوف إزاي.

فاسمع بقى ياخواجة .. ياناصفني إنت ومصدقني على طول.

ذات مرة وأنا أتصفح المواقع على الإنترلت ، وجدتني أمام موقع هام جداً للأعداء ، ووجدت فيه كلام أبيح ومش عاجبني . فقلت لا بقى يابو لامعة. إنت مش لازم تسيبهم يبرطعوا كده على كيفهم في الإنترلت. ولازم توقفهم عند حدودهم. بس كانت المشكلة الرئيسية هي الحدود.

فقد احترت علشان أوقفهم عند حدودهم أرجع لأي مرجع. 1948 ، ولا 1967 ، ولا أوسلو ، ولا قبل 8 سبتمبر 2000.

إحترت واحتار دليلي ، قلت ما بدهاش ، أحسن حل إني بدل ما أوجع دماغي وألخبط نفسي أكتر ما أنا متلخبط ، كفاية اللخبطة إللي العالم فيها ، قلت أنا أرجعهم لسلة المحذوفات عدل ، وهو ده أحسن حل ليهم أوديـهم على سلة المحذوفات.

فوجدت نفسي في حيرة أكبر ، لأن الدولة العثمانية الله يخرب بيوتهم هي السبب ، سابت كام شعب كده من غير دول. واتبهدلوا من بعدهم ، أنا كان غرضي أرجع الوضع إلى ما كان عليه من الأول ، فوجدت إن برضه مفيش فايدة ، الوضع الأولاني برضه زفت. المهم بصفتي هاكر قراري وقديم وعتيد في الهكروانية ، رحت قايل لنفسي ياواد يابو لامعه أحسن حاجة إنك تحط علامة × عليهم ، قعدت أدور لقيت علامة كده في زاوية الشاشة عليها × ، رحت دايس عليها ، راح مكتوب لي (قطع الإتصال) رحت مختار موافق على طول.

مش باقولكم هاكر قديم وقراري ، أحسن حل إني أعمل كده ، أحط علهم علامة × ولا من شاف ولا من دري.

ومش كده وبس ، لأ ده كل يوم من ده. حادخل على الموقع بتاعهم ده ، ومواقع تانية كتير ، واحتار أعمل إيه ، وبعد كده أختار ×.

بلا وجع دماغ.

:D

[/b:post_uid2]