فخ الثمانينيات رؤية أولادنا فينا

[عادل أبوزيد]

JANUARY 19, 2014

فخ التمانينات

الموضوع ابتدي , علي حسب تقديري, في منتصف الستينات. منتصف الستينات هي اللحظة اللي الفجوة الزمنية بين الزمن في مصر والزمن في العالم ابتدت في الظهور, وان ماكنتش باينة قوي ساعتها, عشان كنا متأخرين عن باقي العالم بتاع سنة سنتين, بس بعديها على طول الموضوع ابتدي يوسع مننا. لما العالم دخل السبعينات, كنا لسه كبلد ومجتمع في اواخر الستينات, ولما العالم دخل التمانينات, كنا لسه في اواخر السبعينات (زي مابتبينلناموضة الافلام والمغنيين في المرحلة ديه وحتي وجود واستمرار الديسكو حتي منتصف التمانينات في مصر), حتي اخيرا دخلنا التمانينات, و لم نخرج منها لمدة تلاتين سنة تقريبا.

اثبات الموضوع ده سهل, و ممكن نبتدي بالفن الاستهلاكي: تلاتين سنة عمرو دياب. تلاتين سنةعادل امام ويسرا. تلاتين سنة وحيد حامد واسامة انور عكاشة. حتي إنجازات البلد في المرحلة الزمنية ديه, كلها بلا استثناء تقريبا, إنجازات حققها معظم العالم في التمانينات: قطاعات صناعية واقتصادية متعدده..تمانينات. كبري ومحور ودائري وانفاق… تمانينات. أمن وأمان فوق الطبيعي بالنسبة لأي حته في العالم… تمانينات. مدن جديدة وقري سياحية وشرم والساحل وملاعب جولف… تمانينات. ماكدونالدز وشيليز وكارفور وغيرها من مظاهر العولمة, برضه عند معظم العالم حصلت في التمانينات. وفي وسط كل ده, اتولد وكبر جيل في مصر في التمانينات طول عمره, لا يعرف غيرها, وحاسس إن فيه حاجة غلط بس مش عارف يحط صباعه عليها, واهله, الجيل اللي دخل التمانينات في شبابه, في حالة سعادة ورضا عن النفس غير طبيعية, اللهم ألا لما بيشتكوا من غلاء اسعار بعض المنتجات الاستهلاكية. لحد ماحصلت الغلطة اللي بوظت كل حاجة, ودخل النت مصرنا العزيزة. النت أكد لهؤلاء الشباب إن فيه عالم تاني برة مصر, ويواكب التطور الطبيعي للزمن, وان فيه بلاد مجتمعها بيتطور, وفعلا عايشة في القرن الواحد والعشرين. وده الجيل اللي عمل ثورة يناير أو شارك فيها, كمحاولة يائسة انه ينط بالبلد تلاتين سنة لقدام إلى القرن الواحد والعشرين. والثورة نجحت, وأطاحت بالرئيس التمانيناتي, وعمت الفرحة في أوساط هذا الجيل اللي ماخدش باله من الفخ اللي وقع فيه: هو فعلا نط بالبلد قدام زمنيا, بس لقى نفسه لسه في التمانينات.

أعراض الموضوع ده ابتدت بمطالبه من الدولة, اللي هو ماخدش باله إنها مطالب غير واقعية مش لأي سبب غير ان الدولة المصرية آخر قدراتها أداء تمانيناتي, مع ان أي زيارة لمجمع التحرير كافية لإثبات ده له (المجمع وطريقة إدارته حتي الأن كبسولة زمنية مبهرة للتمانينات). بس لو عدينا النقطة ديه, مش حنقدر نعدي رموزه الثورية الحقوقية المتقدمة من نشطاء جيل السبعينات اللي صلاحيتهم الفكرية اصلا تمانينات ( وأي مقارنة بينهم وشغلهم, وشغل حد زي حسام بهجت, المولود في التمانينات تبين بسهولة ليه هم فعلا خارج هذا الزمن وليه حسام في القرن الواحد والعشرين). طب بلاش الحقوقيين, الرموز السياسية؟ عمرو موسي.. تمانينات. عبد المنعم أبوالفتوح.. تمانينات. حمدين صباحي..اخره التمانينات. طب مكتسبات الثورة الثقافية والفنية؟ الجرافيتي؟ عصره الذهبي كان التمانينات. الموسيقي البديله والمستقله؟ تمانينات. السينما المستقلة؟ برضه تمانينات. حتي تطور الاحداث السياسية كلها كانت تطور تمانيناتي. فكرة الحكم الاسلامي.. تمانينات فشخ. الانقلاب العسكري.. تمانينات. فكرة الثورة اصلا: تمانينات.

………………………………

طب ليه كده؟ إزاي ده حصل؟ الاجابة السهلة والسريعة ان فيه صراع اجيال, وان فيه جيل متمسك جدا بالتمانينات تمسك المتصابي بشبابه, وده نفس جيل اهالينا. جيل الازدواجية و الستر. جيل الفياجرا والبوتكس. جيل يعرف كويس قوي يعيش في التمانينات, ويتعامل بالوسايط والمحسوبية, وما يعرفش يعمل حاجة تانية وبقاله تلاتين سنة بيحاول يقنعنا ان هي الدنيا كده, ومافيش بديل تاني ونرضي باللي احنا فيه وخلاص. هو جيل مش شرير, عشان هو جيل اهالينا واهالينا مش ناس شريرة, بس فيه قصتين فيهم درسين ممكن احكيهم يشرحوا الخلل حصل فين بالظبط.

أول قصة ليها دعوة بفودافون حاليا: حاتم دويدار, رئيس فودافون الحالي, حاليا بيتشال من منصبه في مصر ورايح منصب تاني. فودافون ماشاليتهوش عشان هو مقصر في شغلة أو عشان ابلة فاهيتا: الراجل ادي دوره وزيادة وحقق نجاحات وإنجازات كتيرة في فترته; فودافون شالته عشان ديه سياسة ادارة فودافون: بيجيبوا رئيس شركة جديد بأفكار جديدة تبتدي تحقق نمو عالي للشركة, وبعد ماالنمو يبتدي يستقر سنتين تلاتة يقوموا مغيرينه وجايبين حد جديد, بافكار جديدة عشان يبتدي يحقق نمو عالي تاني للشركة وكده. ومن هنا نفهم درس معظم البلد مش راضية تفهمه: الاستقرار مش انجاز ولا غاية في حد ذاته. الاستقرار مفروض يتبني عليه, مش يتحافظ عليه وبس, عشان لو مااتبناش عليه بيتحول من تلقاء نفسه الي ركود.

تاني قصة بتحكي عن سوبر ماركت صغير مملوك لرجل كبير في السن في مصر الجديدة. السوبر ماركت كان كويس وإدارته حلوة, لحد ماجيه اليوم اللي صاحب السوبر ماركت باعه لمجموعة من الشباب. الشباب غيروا شكل السوبر ماركت, جابوا بضاعة جديدة, وابتدوا يشتروا المحلات اللي جنبهم ويوسعوا السوبر ماركت ويبقى فيه قسم خضار وفاكهة ولحوم. وده الفرق الأساسي بين الشخص اللي اتعامل مع السوبر ماركت كمشروع معاشه, واللي اتعامل معاه كمشروع مستقبله.

………………………………………..

مصر بتدار ومتسيطر عليها بقالها تلاتين سنة كمشروع معاش جيل كامل على حساب مستقبل الجيل اللي بعديه. احنا وقعنا في فخ التمانينات وواجهنا وبنواجه مقاومة أسطورية للخروج منه عشان السبب ده وبس. بسبب أنانية جيل كامل مش قادر يواجه انه السبب الأساسي ان البلد ديه تواجه مستقبل مظلم هم غالبا مش حيعيشوا معظمه وبيحاولوا يلومونا ويلوموا يناير عليها, مع ان اللي احنا فيه ده بكل قواعد العقل والحساب لا يمكن القاء اللوم فيه على احداث التلت سنين اللي فاتوا. و اللطيف أن حصاد جيلهم واضح: مصر في قائمة أسوأ عشر دول على مستوي العالم في كل حاجة: تعليم, صحة, سيادة القانون والعدالة, عنصرية, تلوث, فساد, ختان الإناث والتحرش الجنسي, سلامة طرق, معاملة المرأه, معاملة الأقليات الدينية, حبس الصحفيين, حقوق المواطنة, الخ الخ. وهم غير مهتمين إطلاقا بأي حاجة من الحاجات ديه. مصر ام الدنيا وقد الدنيا وموتوا بغيظكم. انفصال عن ورفض تام لمواجهة الواقع لدرجة فعلا مأساوية.

مصر بتواجه مأساه جيل كامل غير قادر أو مهيّأ للتعامل مع مأساته, مع ان كل الشواهد قدام عنيه كل يوم. بصوا ليسرا والفوتو شوب في صورها في مجلة انيجما عشان لسه برضه عاوزة تفضل البرنسيسة وهي في الستين. بصوا لمغنين اغنية تسلم الايادي, كلهم عفي عليهم الزمن ومقدموش أي حاجة فنية ذات قيمة في اخر عشر سنين وسعادتهم لتقديم اغنية مشهورة تعرض على التلفزيون مجددا. بصوا للجنة الخمسين وفهلوتها في اعلان ان حرية العقيدة مطلقة بس هم التلت ديانات السماوية برضه اللي معترفين بيهم وبس, كأن العالم اهبل ومش فاهم. بصوا لاحتفالية حرب اكتوبر باستعراضاتها, أو بإعادة كتابتها للتاريخ بذكر عبد الناصر والسادات وبعديهم على طول ثورة يناير كأن ماكانش فيه تلاتين سنة مبارك ولا الضربة الجوية اللي جابتلنا الحرية وكأن الثورة قامت على السادات مثلا (ملحوظة جانبية: زمنيا ده بيخلي ثورة يناير في التمانينات). بصوا إزاي كل مايتزنقوا يجيبوا الجنزوري رئيس وزراء- اللي هو تمانيناتي السن بقي وبيجبوه عشان هو الوحيد اللي بيحسسهم انهم لسه صغيرين- كأنه رجله مش في القبر وكأن مجاش الوقت اللي نسأل فيه فين جانزوريين المستقبل. مش مقتنعين؟ طب تاني مرة وانتم ماشيين على الكوبري بصوا لصورة عمرو دياب عشان تقدروا المأساه صح. مطرب الشباب اللي عنده 52 سنة. حتحس بـحزن عميق تجاهه.

والنكتة إن التمانينات ماشية عشان هي أكترحاجة تقدمية قدمتها أي من القوي السياسية في مصر. لو مش عاجباك التمانينات عندك الناصريين, ودول نفسهم يرجعوك الستينات, أو الاشتراكيين الثوريين, اللي فعلا عقليا عايشين في بدايات القرن العشرين, أو عندك المشروع الاسلامي, اللي نفسه يمشيك على قواعد مجتمع بدوي من القرن السابع الميلادي. مافيش حد حتي حاول يدخلك التسعينات, ناهيك عن القرن الواحد والعشرين. مانعرفش احنا الحاجات ديه, ولا مستعدين ندفع تمنها. معلش, قصدي إن هم مش مستعدين يدفعوا تمنها. ليه يبقى فيه عالم من غير واسطة؟ ليه يبقى عندك شرطة بتشتغل بالتحقيقات والفحص الجنائي؟ ليه أي حاجة في قباحة مشروعات بورتو تفلس من أول مشروع وتبطل تلوثها البصري والبيئي؟ ليه نبص أكتر من خمسة سنتي ابعد من مناخيرنا؟

اكتئابنا جي من معرفتنا ان انتم مش حتصلحوا حاجة, وكل ماحتتزنقوا حتقولوا معندناش بديل, بس برضه عاوزين تفضلوا تاخدوا القرارات المصيرية. حتشفقوا علينا وحتعملولنا لجان شباب في احزابكم, وممكن كوتة في مجلس الشعب خمسة في المية مثلا لفصيل يمثل سبعين في المية من البلد, وحتهنوا نفسكم علي انكم اديتم الشباب فرصتة ومش حتفهمو الشباب متضايق ليه غير لو الشباب عرض ان بدل كل ده نعمل لجنة عواجيز في الأحزاب وكوتة عواجيز في مجلس الشعب للي فوق الستين, وتبقي خمسة في المية زي نسبتكم الحقيقية في المجتمع. تحب تدخل لجنة العواجيز؟ اسمها لطيف صح؟ زي لجنة الشباب كده.

في كل الاحوال, هنيئا لجيلكم هذه البلد, علي رضاكم الذاتي و راحتكم النفسية قدام اعلامكم ودولتكم في الوقت اللي فيه شبابكم بيخبط راسه في الحيطة, علي محاولتكم اليائسة لارجاع تثبيت التمانينات تاني, وناسف لابلاغكم إن التمانينات مش راجعة, ولا الأمن حيرجع فعلا, ولا حيبقي فيه اقتصاد مش معتمد علي منشطات اقتصادية جاية من الخليج, وحتموتوا وتسيبوهالنا خرابة فيها شباب بيقتل في شباب عشان انتم معرفتوش تواجهوا مشاكلكم التمانينية صح في وقتها وورثتوهالنا. عزائنا الوحيد ان ايقاع الزمن بقي اسرع, وكده ممكن ندخل التسعينات قريب, ومين عارف, احتمال نشوف القرن الواحد والعشرين قبل مانموت. احنا بنعترف بارتباطنا العاطفي بيكم, وبعجزنا قدام عجزكم, وبنحيي القلة المندسه اللي في جيلكم اللي فعلا شايفة الحقيقة وبتساعدنا ومستمرة في دفاعها عنا. واطمنوا, احنا مش عاوزين نقتلكم زي ماانتم مصممين تقتلونا وموافقين على قتلنا بقالكم تلت سنين, ولا حتي حنعترض على ان قيادات الوطني والإخوان اللي في سنكم لما بيتحبسوا بيتحبسوا في عنابر خمس نجوم والشباب في عنابر مش بيعرف يقعد فيها من كتر ماهي زحمة. خالص, احنا بس مش حنتعاون بعد كده. مش حنمشي وراكم, ولا حنسمع كلامكم ولا حنصدقكم لما تقولوا انكم عاوزين مصلحتنا في أي حاجة. شفتم الاستفتاء؟ اخدتم بالكم إزاي الشباب مانزلوش؟ ديه مجرد البداية,مجرد نبذه من اللي جاي. افرحوا “بانتصاركم” وجهزوا نفسكم, عشان وقت الطبطبة عليكم خلص.

6:48AM | URL: http://tmblr.co/Zl-_vx14m5AWj

(Notes: 166)

ghadanihilism likes this

kikiest reblogged this from sandmonkeyness

metwallies reblogged this from sandmonkeyness

mrabie4 reblogged this from sandmonkeyness

mrabie4 likes this

mustafa-ahmed150 reblogged this from sandmonkeyness

mustafa-ahmed150 likes this

mgemmy reblogged this from mgemmy

mgemmy likes this

akrum-megahead94 reblogged this from sandmonkeyness

akrum-megahead94 likes this

akrumyat reblogged this from sandmonkeyness

fksoliman likes this

aessam reblogged this from sandmonkeyness

iii3bdallah likes this

bashmohandes reblogged this from sandmonkeyness

bashmohandes likes this

modevx likes this

mmtalib70 likes this

rashamzroa reblogged this from sandmonkeyness

hrbi likes this

sumaya-rabie reblogged this from sandmonkeyness

mshady likes this

pumpheart reblogged this from sandmonkeyness

pumpheart likes this

islamkhedr reblogged this from sandmonkeyness and added:

should reading

islamkhedr likes this

3atftnor likes this

ab3admakan reblogged this from sandmonkeyness

ab3admakan likes this

wlhvm reblogged this from sandmonkeyness

wlhvm likes this

aeon-ray likes this

beshx likes this

salahmah reblogged this from sandmonkeyness

abdobarakat likes this

medic200 likes this

heba-salah reblogged this from sandmonkeyness

heba-salah likes this

nadinkujuk reblogged this from sandmonkeyness

nadinkujuk likes this

osamahashemamna likes this

rushadd reblogged this from sandmonkeyness

we2am13 likes this

iyafawi reblogged this from sandmonkeyness and added:

اروع واجمل ما قرأت عن تشخيص الحالة المصرية

iyafawi likes this

akramrefaat likes this

samekkk likes this

nourayman reblogged this from sandmonkeyness

mreslammohamed reblogged this from sandmonkeyness and added:

يحدث فى مصر ومازال…

Show more notes

RSS feed: http://sandmonkeyness.tumblr.com/rssNEXT POST

Theme is The Atlantic by Peter Vidani for Tumblr.

[عادل أبوزيد]

منذ أتيت لندن و أنا في حوار مستمر مع أبنائي هم غير راضين عن ما يحدث في مصر لأنهم يرونه نوع من التخلف و أنا فعلا معهم و لكن على مهل

ما سبق كان إستهلالا لابد منه

اليوم أرسل إبني لي رابط و طلب مني أن أقرأه و قرأته و وجدته كلام صحيح أو تقريبا صحيح ، و رأيت أن أعرض عليكم هذه الرؤية. و لنتحاور حولها

[عطر الجنة]

السلام عليكم و رحمة الله و بركاته

بالبداية اتمنى لحضرتك اوقات سعيدة بلندن

و بعد اتفق كثيرا مع بعض ما جاء من تحليلات و اختلف ببعضها

رغم ان النتيجة واحدة

و اسمحلى ساسردها فى عدة مداخلات لانى كتبت كثيرا ثم فصل اللاب توب و ضاع ما كتبته

تحياتى

[عطر الجنة]

تبدأ حقبة التمنينات بحكم مبارك و هو فى قمة عنفوانه و عطائه لذا سترى تلك الحقبة ذا ايقاع سريع

بعدها بدأ هذا النشاط يخبو و بالتالى لكى يحافظ على ملكه اتى بمعاونين و وزراء اقل كفاءة حتى لا تصير مقارنات بينه و بينهم

و مقارنة اى شعب يستخدم راسه

و ابتدأ يقضى على اى رمز من الممكن ان يلتف حوله الشعب و يرى فيه خلاصه

و ليس ما حدث للمشير ابوغزالة ببعيد

ثم زاد وهن مبارك فأتى بكوارث تعاونه لانه فى تلك الفئة العمرية لن يلاحق تطور فكر الشباب

الى ان بدأت مشاركات جمال مبارك

هنا راينا وزراء شباب مثل وزارة الاتصالات

و ايضا تغيرت دماء الحزب الوطنى فاصبح هناك الحرس القديم و الحرس الجديد

و نكمل

[عطر الجنة]

طبعا كل عام يزداد الامر رتابة و لا تولد كوادر مدربة

فرئاسة اى مكان لا تتغير و يتم قتل المبدعين بها

و بالتالى حدث ندرة فى الخبرات فى كل المجالات التى بيدها يقع عاتق التقدم

انظروا لرئاسة الوزارة الحالية و كيف تم عرضها على اكثر من شخصية و ابوها و رفضوها

مع ان الدولة كانت تحتاج الى قيادة اكثر ايقاعا لتواكب ايقاع السيسى

و ايقاع الشباب

فعدم خروج الشباب ليس رفضا لمواد الدستور لكن رفضا لايقاع الحكومة البطئ

[عبير يونس]

الجيل الحالي يلقي اللوم على العواجيز

و أنا عندي قناعة أنه منذ بدء الخليقة نجد كل جيل يتحسر على الماضي الجميل و يرى الأجيال التي تليه لا يعرفون شيئا و لا يصلحون لشيء

هذا أمر طبيعي جدا في كافة أنحاء المعمورة

السؤال

***********************************************************

كيف نجحت الأجيال السابقة من الافلات من سيطرة العواجيز ؟؟؟

و لماذا لم يسمحوا أن يحبطهم العواجيز؟؟

*********************************************************

عذرا على استعمالي لفظ " العواجيز " إنما هو رد على صاحب المقال

فأنا لا أعترف اطلاقا أن " العَجَز " له أي علاقة بالتقدم في السن

فالشيخوخة الحقيقية هي شيخوخة الفكر و التشبع بالسلبيات

[herohero]

ينصر دينك !!!!

صح لسانك !!!

كفيت ووفيت :110: :110:

حضرتك قولت الخلاصة

جيل الجرامافون لن يحكم بسهولة جيل الايفون

[herohero]

الجيل الحالي يلقي اللوم على العواجيز

و أنا عندي قناعة أنه منذ بدء الخليقة نجد كل جيل يتحسر على الماضي الجميل و يرى الأجيال التي تليه لا يعرفون شيئا و لا يصلحون لشيء

هذا أمر طبيعي جدا في كافة أنحاء المعمورة

السؤال

***********************************************************

كيف نجحت الأجيال السابقة من الافلات من سيطرة العواجيز ؟؟؟

و لماذا لم يسمحوا أن يحبطهم العواجيز؟؟

*********************************************************

عذرا على استعمالي لفظ " العواجيز " إنما هو رد على صاحب المقال

فأنا لا أعترف اطلاقا أن " العَجَز " له أي علاقة بالتقدم في السن

فالشيخوخة الحقيقية هي شيخوخة الفكر و التشبع بالسلبيات

استاذه عبير مش عارف حضرتك ف مصر تعاملت مع القايدات الاكبر ف السن وياسلام لو عسكريين

لو تعاملت هيكون لك رأي اخر تعاملي وبعدين ابقى اعرف رايك