رباعيات هشام(الجزء الثااااااااااالث........)

[هشام الجنيدى]

صرصار صغير دخل من تحت عقب الباب

انا قلت اقوم اضربه على راسه بالقبقاب

وطيت اجيب فردته من جوه تحت السرير

ورجعت لجل اقتله كان فص ملح وداب........!

ماشى ولا بلتفت باصص لقدامى

غرقان فى بحر الحياه تايه فى احلامى

وانتا مصيرك كده دونن عن الصراصير

مكتوب عليك تتفعص وتموت باقدامى.......!

متقلش اروح اختفى واقفل عليه الشيش

مكتوب تموت هتموت مكتوب تعيش هتعيش

قدر عليه وعليك ولفين نروح منه

وهوه فوق الجبين مكتوب بخط افيش......!

سعات بتنزل دموعىلو شىء يحزّن حصل

وسعات بتنزل دموعى لفرح جانى ووصل

وسعات ما تنزل دموعى لفرح او احزان

لكن بتنزل دموعى لما بخرّط بصل........!

قاعد لوحدى حلمت انى بقيت عصفور

فقلت اطير للشمس واوصل لنبع النور

وطرت قد ما طرت معرفش كام ساعه

واخرت ما طرت وقعت قمت بجناح مكسور......!

نصحنى صاحبى وقاللى خد منى حكمه يا اتش

علشان تعيش مرتاح لازم تكون من كاوتش

انا قلت اجرب رجعت قلبت حتى المرايا

بصيت لصورتى لقيتها برضه متقلبتش........!

اتمنى ان تحوز اعجابكم ...............

وشكرااااااااااااااا.................................. :angry:

[عابر سبيل]

مش ناقص غير حاجة واحدة بس

وعجبي

والله فكرتني بالرائع صلاح جاهين

تحياتي لك ولقلمك المبدع

أحمد سلطان

[bentmasria]

::::::::::قاعد لوحدى حلمت انى بقيت عصفور

فقلت اطير للشمس واوصل لنبع النور

وطرت قد ما طرت معرفش كام ساعه

واخرت ما طرت وقعت قمت بجناح مكسور......!::::::::::

هشام جنيدى

لا الوقت وقتك ولا تقدر تكون عصفور

يحلم ببكره ويتمنى يشوف النور

كل الحكاية حلم جاك ف المنام

صحيت من الحلم على ...وهم اتولد مكسور

جميل يا هشام جدا اصبحت قليلة الحروف اللى بتتفهم وتتحس وانت شاطر جدا فى اقتحام الاحساس بحروفك

بس خذ بالك

ما تتكلمش ضد الحكومة :rolleyes: :rolleyes: B)

ام محمد

[هشام الجنيدى]

اشكركم جميعا على هذا الكلام الرقيق الذى اسعدنى

وبقولك يا بنت يا مصريه على راى نجاح الموجى فى مسرحيه المتزوجون (انا الشعب) :rolleyes:

واحيى فيكى حضورك الرائع وبقولك

انا بشر مش طير ولا ليه اى جناح

وحلم قلبى كبير يخرج لنور الصباح

محبوس فى ضلمه وليل وجوه زنزانه

قفلوها بالاقفال وضيعو المفتاح

[shawshank]

ما شاء الله ، ممتاز جدا جدا جدا

ايه رأيك بدل: " واخرت ما طرت وقعت قمت بجناح مكسور " تقول: " واخرت ما طرت وقعت و جناحي كان مكسور ". حاسس ان الموسيقى تكون احسن

و بدل: " علشان تعيش مرتاح لازم تكون من كاوتش" تقول: " علشان تعيش مرتاح غير لقلب كاوتش"

[هشام الجنيدى]

عزيزى shawshankاشكر لك مرورك الكريم واطلاعك على رباعياتى المتواضعه

اما بخصوص ما ذكرت من تعديلات .........

التعديل الاول : انا ارى ان قمت بجناح مكسور معبره اكتر شويه لان كسر الجناح كان نتيجه الوقعه

اما لو قلت وجناحى كان مكسور فانى اشير الى ان السقوط كان نتيجه كسر الجناح

ولو كان الجمله طويله شويه ممكن نخليها (اخرت ما طرت وقعت وجناحى صار مكسور)علشان اظهر السبب والنتيجه

وعموما انا لم الحظ ان الجمله بها اى قصور فى الموسيقى

التعديل الثانى:انا ارى ان رايك ممكن يكون صح لانى ايضا مستتقلها شويه

اشكرك مره اخرى على اهتمامك ومقترحاتك فانا هنا حتى اتعلم ولكى اتعلم لابد ان اخطىء

<_<

[daktara]

هشام انت رائع

مفيش ولا غلطه

[هشام الجنيدى]

اشكرك جدا يا دكتور خالد(دكترا) على اعجابك بما خطت يداى

واتمنى ان اقرا لك المزيد من تحفك الفنيه الرائعه

وشكرااااااااااااااااااااااا :D

[shahd]

سلمت اناملك

[شاعرالرومانسية]

الاخ الفاضل هشام ،،،

استمتعت جدا بقراءة رباعياتك وفكرتنى والله بالذى مضى :D

بس كدة بقى انا لازم ادور على الاجزاء السابقة كمان ..

واسمحلى بالمشاركة البسيطة دى:

اية لازمة انى انام لو انى مش ححلم

اغمض عنيا واعيش ..يمكن فى يوم افهم

ولو حلمى مرة نسينى ،، او جانى متأخر

صدقنى يا صاحبى ..عمرى ما يوم حندم

حلمك وباديك ،، تحلم وتتمنى

ولو حلمك حيتأخر حقك تصبر وتستنى

وفى اخر المشوار .. عمرك محاتحتار

وحتسيب فى يوم النار ،، وحتسكن الجنة

احلم وخليلى ياصاحبى فى حلمك دور

وافتح لنا سكة وضلاية وطاقة نور

ومعانا اصحابنا ،،،، وجيرانا وحبايبنا

مافى شىء حيمنعنا ،، ولا الف باب او سور

وتقبل خالص تحياتى :excl:

تم تعديل 29 مايو 2005 بواسطة شاعرالرومانسية

[هشام الجنيدى]

اهلا وسهلا بكم فى منتدانا الجميل يا اخت شهد ويا اخ شاعر الرومانسيه

وشكرا على مروركم الكريم واتمنى ان يعجبك الاجزاء الاول والثانى زى ده

واتمنى ايضا ان ارى اعمالكم قريبا

وشكراااااااااا :)

[رعد الاسكندرانى]

اهلا يا اخ هشام انا سعيد جدا بالجزء الثالث من رباعياتك الجميله ويبدو انك دائما تحس وتتامل فى ما حولك

فكرتنى فعلا بالراحل الكبير صلاح شاهين خاصه الجزء التالت حاسس انه بيفكرنى بيه وبتاملاته الغريبه وافكاره المفاجئه

دمت مبدعا ومنتظر الجزء الرابع والخامس والسادس و...........الخ :wub:

[amr_elnagi]

الاخ العزيز الغالى هشام

ما اجمل ما تتحفنا به من رباعيات ..

لكن لى تعليق بسيط

سعات بتنزل دموعىلو شىء يحزّن حصل

وسعات بتنزل دموعى لفرح جانى ووصل

وسعات ما تنزل دموعى لفرح او احزان

لكن بتنزل دموعى لما بخرّط بصل........!

لا ادرى اشعر ان هذه الوصلة قد تكلفت فيها الكثير لتظهرها بهذا المنظر ولم تكن مقتنع بها وانما حُشرت ولم

تفد الموضوع لانها لم تربط ما قبلها بما بعدها وشعرت بشىء من التشتيت الحسى ...

واعذرنى ان اخطئت فأنا ليس لدى خلفية كاملة عن كتابة الرباعيات

وهذا الاحساس الذى وصلنى لا يقلل بالطبع من الرباعية او من كاتبها

تحياتى وتقديرى

عمرو الناجى

[هشام الجنيدى]

اخى الكريم عمرو الناجى ..........

اشكر لك اطلاعك على هذا العمل المتواضع ........

اما بالنسبه للرباعيه اياها.........

فليس شرطا ان ترتبط الرباعيه بما قبلها من رباعيات لان اساس الرباعيات كما اظن ولست ادرى ان كان ظنى صحيح ام لا ان الرباعيات عباره عن مجموعه من الافكار التى قد تكون منفصله عن بعضها ويتم صياغه كل فكره على حده ليس شرطا ان تكون مترتبه على ما قبلها (راجع رباعيات جاهين ) لترى ما اقصد

واختلاف الراى لا يفسد للود قضيه.............

وكلنا نتعلم ............... :angry:

[amr_elnagi]

الاخ الغالى هشام

اولا اشكرك ولا يوجد اختلاف ولا حاجة

انا بكلمك عن احساس راودنى لا اكثر

فانت قد ربطت بين الفقرة الاولى والثانية والثالثة كذلك وكنت تتحدث عن قكرة بعينها ثم حدت عنها هذا ما اقصد

على العموم لا تؤاخذنى على قصر نظرى

تحياتى وتقديرى

عمرو الناجى