اطلب اى وصفه على بالك .. تلاقيها قدامك

[bodda]

كفتة الرز

1 كيلو لحم (ملبس) يعنى مايكونش احمر تمام لاهمية وجود نسبة دهون للطعم الجيد

نص كوب ارز منقوع ساعتين فى الميه لسهولة الفرم

حزمة شبت

حزمة كسبرة خضرا

حزمة بقدونس

بصله كبيرة

10 فصوص توم

ملح وفلفل وبهارات لحم

تفرم اللحم اولا

ثم يفرم مره تانيه مع باقى المكونات

ويمكن اعادة الفرم مره تالته / المهم تبقى عجينة ناعمه متجانسه

وبعدين نجيب طبق زيت ونبل ايدنا منه ونعمل من العجينه صوابع ونرصها فى اى صينيه

ولما نخلص تصبيع الكفته كلها نبدأ نقليها فى زيت غزير

وأهم حاجه نكون محضرين الدمعه ... عارفاها ؟؟

اللى هيه صلصة طماطم بس بالتوم.... مش بالبصل

وتخرج الكفته من القلى الخفيف الى الدمعه

ولما نخلص الكميه نولع على الدمعه بالكفته لغاية ماتستوى للدرجة المطلوبه

وبالف هنا وشفا

صباح الفل

تم تعديل 20 مايو 2005 بواسطة bodda

[ابو خليل]

اي وصفة علي بالي ألاقيها قدامي !!

دي مصباح علاء الدين !؟؟؟

عموما بصفتي مخضرم في العزوبية ..

وطباخ ماهر ..

فصعب الاقي طبخة مش بعرف أعملها ..

عموما علشان نساعدك...

هاطلب ..

أطلب يا ستي ..

أطلب يا ستي ..

استني لما افكر ..

أطلب طريقة عمل : المكرونة بالبشاميل !

[Osha]

العزيز جدا بودا "أصله معرفة قديمة" :D

شكرا اوي اوي على القرنبيط وعلى اعادة كفتة الرز وكمان الكانيلوني فوق البيعة :D

أماالأخ أبو خليل فأقول له بودا صعب المافسة ولكن أناشايفة برضه اننا ممكن نستغل قصة المنافسة ونسألكم انتم الاثنين واحنا في النهاية المستفيدين!! :D :D

بس بجد انت فعلا مش عارف طريقة المكرونة بالبشاميل ?? دي سهلة اوي وليها طريقة بالخضار برضه لطيفة وخفيفة ممكن أبقى أقول لك عليها لو تحب. :angry:

[bodda]

شكرا للعزيزه أوشا ودعونا نطبخ فى صمت

وبلاش تخبيط فى الحلل :rolleyes: ;)

أما العزيز ابو خليل فبيقول :

أطلب يا ستي ..

أطلب يا ستي ..

استني لما افكر ..

يا عمنا انا مصلحه :rolleyes: ;) ههههههههههه

واهلا بيك منافس لاحلى اكلات ... ايوه كده عايزين المطبخ ينور

والمكرونه بالباشميل على راى اوشا سهله

واحنا عايزين التجديد يعنى مستنيين وصفتها بالخضار برضه

المكرونه بالباشميل

يفضل استعمال عدة انواع من المكرونه

يعنى أقلام مع صغيره مع اسباجيتى مكسره

وطبعا تتسلق مع ملح عادى

ونعمل عصاج للحشو ( لحم مفروم وبصل وملح وفلفل وبهارات )

ونحضر الباشاميل

معلقتين دقيق كبار يتشوحوا فى معلقتين سمن عالنار

وبعدين نكون محضرين كوبايتين لبن مضروب فيهم بيضه

وننزل الدقيق والسمن من على النار ونبدأ نضيف اللبن

مع التقليب السريع بمضرب سلك حتى التخانه المطلوبة

ونحط نص المكرونه فى الصينية ثم العصاج ثم النص التانى

وبعد كده نصب الباشاميل عالوش

وانا افضل اخلط ربع كمية الباشاميل مع المكرونه من البداية

والباقى هوه اللى احطه عالوش مع مسحة صلصة

وعالفرن الحامى 250 م حوالى 30-40 دقيقة

وبالف هنا وشفا B)

صباح الفل

[mb14]

الأخ الفاضل / شيف bodda

اهلا بيك فى المحاورات والله نورت وشرفت وانا ارتحت لك من اول طبخة :rolleyes:

هو احلى حاجة فى وصفاتك انك بتجيب حاجات موجودة عند الناس الغلابة اللى زيينا مش حاجات ندور عليها فى الصيدليات .

طيب بما انك بتلبى طلبات الأعضاء

والأصناف اللى اتقدمت كلها تفتح النفس

ياريتك تقلنا شوية على السلطات اللى تفتح النفس( مع اكل الجماعة اللى بالى بالك اللى اصبح روتينى اكتر من جرايد الحكومة ).

يعنى عن بباغنوك مثلا او اى حاجة تيجى على بالك .

[bodda]

العزيزه أو العزيز mb14

أسف لعدم معرفتى باخاطب مين !!!

سهولة الوصفات لانى باعملها بنفسى وفى مطبخ عادى

وماليش فى موضوعات النقل والمصطلحات الغريبه :rolleyes:

السلطة جاهزه اهى ومن غير صيدليات ;)

وألف شكر لثقتك وذوقك

بابا غنوج

طبعا الاساس باذنجان رومى ( الكروى ) مشوى أو مسلوق

المهم سواء انسلق او اتشوى لما يبقى زى المسلوق

نقشره ونفصل اللحم عن القشر

ولو فيه عروق بذور لازم تستبعد :rolleyes:

وبعدين نضرب اللحم فى الكبه او الخلاط لما ينعم خالص

وحوالى 2 كيلو باذنجان تحتاج كيلو طحينه بيضاء

الطحينه نحط عليها نص كوباية ميه ونقلبها هاتجمد

نحطها على الباذنجان المضروب

ومعاهم 7 فصوص توم كبيره وملعقتين ملح ونص كوباية خل

ونعجن ده كله مع بعض ونضبط التخانه بالميه B)

ويمكن تجميل الصحون بعد الغرف باوراق البقدونس او انصاف الزيتون الاسود

وبالف هنا وشفا

مساء الفل

تم تعديل 21 مايو 2005 بواسطة bodda

[Fencer]

العزيز جدا بودا

لما المدام قالتلي انك هنا فرحت جدا و جيت اتابع و اشارك و آكل و مش قادر اقولك انا مبسوط قد ايه انك هنا

انا مجهز لك لستة كبيرة و اولها صينية البطاطس في الفرن اللي بقالي كتير ماشفتهاش ، مشكلتها معايا اني باحب الطماطم على الوش بس باحرقها ،عموما انا عايز وصفة اصلية للبطاطس في الفرن

و تحياتي

Fencer

[se_ Elsyed]

يعنى عن بباغنوك مثلا

<{POST_SNAPBACK}>

لو سمحتم .. نقطة نظام ..

أنا دلوقت بأتكلم ببؤي .. بعد كده هاكل ببؤي .... مش عايزين تزوير في أكلات رسمية ..

أنا أخر مره سبت مصر من 8 شهور كان البتاع ده إسمه بابا غنوج .. فهل قام المدعو غنوج بتغير إسمه .. إلى غنوك ... تُرى ما هو السبب ... هل كانت الناس بتعايره بإسم غنوج ؟ :rolleyes:

معليش يا إم بي ثري مش قادر أمسك نفسي .. أصلك فكرتني بواحد حلاق من اللي شغالين في محلنا .. وأنا قاعد معاهم في امان الله قالوا نطلب فطار .. فراح بعت الواد الصبي وعمال يعد له ويقوله إشتري بقى فول وطعمية وجبنه وعشان أستاذ س س معانا ما تنساش المخلل والسلطات وخصوصاً بابا غنوم .... أنا سمعت غنوم من هنا وروحت واقع من فوق كرسي الحلاقة اللي فوقيه خشب ....

ما علينا أهو كله في الأخر بتنجان ..

[bodda]

الصديق العزيز والمحارب الجميل فنسر

يا عم انا اللى بادور عليكم فى اى مكان

وخللى بالك ... اى حاجه تعملها المدام يبقى تسلم ايدها

وانا يادوب بافكرها بحاجات هيه عارفاها :rolleyes:

صينية البطاطس فى الفرن

اول حاجه دى يلزمها لحمه ملبسه زى الموزه أو رقبة الضانى

يعنى حلاوتها فى لحم به نسبة دهن

يتسلق اللحم عادى مع البصل والحبهان والذى منه

بس فى كمية ميه قليله بقدر الامكان

ونشيل اللحم ونصفى الشوربه ونحط عليها معلقتين صلصه كبار

ونسيبها عالنار تتركز شويه

نقطع البطاطس ترانشات تخانة الصباع الصغير الحريمى :rolleyes:

نقطع البصل ترانشات تخانة الصباع الصغير للبيبى B)

ناخد ترانشات البصل وندعكها بالراحه مع ملح وفلفل تبقى حلقات

نقطع طماطمايه جامده مكعبات صغيرة

نخلط البطاطس والطماطم مع البصل المتبل ونحط نص الخلطة فى الصينية

ونرص اللحمه ونكمل باقى الخلطة

وهنا بقى نحط عالوش ترانشات طماطم علشان تاخد حرق الفرن للوش

وفى نفس الوقت تحافظ على طراوة البطاطس واللحم تحتها

ونصب ييجى كوبايه ونص من الشوربه المتبلة بالصلصة

واحدفها عالفرن ييجى نص ساعه تحت

ولما تستوى البطاطس نطلعها عالرف العلوى لتحمير الوش

وتكون مجهز شوية رز بالشعرية أو رزه و رزه ( عارفها ؟؟)

وبالف هنا وشفا

صباح الفل

[bodda]

العزيز سى السيد

منور المطبخ وما حوله

ومعلش سيبك من الغلطات المطبعية واختلاف اللهجات

مانتا عارف ان لهجات البلاد العربية تختلف كتير

وفيه بلاد تنطق الجيم = كاف

وفيه تنطق القاف = جيم ... زى حبايبنا فى الصعيد

المهم فى الاخر تاكل بالف هنا وشفا

صباح الفل

[mb14]

الأخ الفاضل /bodda

متشكرين قوى على الوصفات الجميلة وباين عليك حاتخلينى ارجع قريب وادخل المطبخ وارجع ايام العزوبية تانى واوريهم مهاراتى الطبيخية .

حقيقى والله حاجات جميلة تعلم اللى مايعرفش حاجة :D

العزيزه أو العزيز mb14

أسف لعدم معرفتى باخاطب مين !!!

محسوبك مصلحة بردوا والله يرحم ايام السوفت ووير القديم للمحاورات كان بيبين نوع الواحد المصلحة من غير المصلحة

أنا أخر مره سبت مصر من 8 شهور كان البتاع ده إسمه بابا غنوج .. فهل قام المدعو غنوج بتغير إسمه .. إلى غنوك ... تُرى ما هو السبب ... هل كانت الناس بتعايره بإسم غنوج

يا س س انا طول عمرى اعرفه كدى وبأكله كدى غنوك ما انتى عارف الصعايدة ساعات بيغيروا الكلام واحيانا الطبيخ كمان بس ما توصلش لغنوم دى .

ثانيا تعالى هنا انا مش طلبت منك تجيب التورته والجاتوة لعيد ميلاد ابو خليل سايبنا قاعدين مستنين هناك وما جبتش حاجة باين عليك عملت لنا By Pass وبعت له الحاجة بال DHL من الرياض لتبوك وسايبنا هنا احنا منتظرين .

طيب ابعت اى حاجة ان شاء الله بابا غنوم يا اخى :D

[yasovinas]

اخي العزيز بودي

انا شاب في الثانيه والاربعون من العمر واحيا حياة العزوبيه المتقطعه يعني كل 3 شهور ارجع للبيت

ما علينا بسمع كتير قوي عن النجرسكو والمدام اتحفتني بيه مرة ولا مرتين ولكن في ظروف الشفر والعوده السريعه لا استطيع طلبه لذلك ممكن لو سمحت عايز اجربه هنا لوحدي ولك الاجر والثواب

[bodda]

العزيز mb14

لازم ترجع للمطبخ ولاحلى هوايه

ومستنى منك وصفات جميله ... ياللا بسرعه

وللعزيز yasovinas

تحت أمرك أحلى نجرسكو وسهل جدا

مكرونه نجرسكو

تجيب نص كيلو صدور فراخ مخلية وتقطعها مكعبات

وتشوحهم عالنار مع معلقتين سمن أو زبده كبار

وبعدين تشيل الفراخ نص سوا

وتحط عالسمن معلقتين كبار دقيق وتتقلب بسرعه

مع ملح وفلفل ويا حبذا مبشور نص جوزة الطيب

وننزلها من عالنار

ونحط كوبايتين لبن حليب ونقلب بسرعه ( باشاميل يعنى )

ونحط قطع الفراخ ونقلب

المهم القوام يكون متوسط ونتحكم فيه باللبن والدقيق

ونجيب مكرونه سباجيتى او شرايط مسلوقه ومتصفيه

نقلبها مع الخلطة السابقة وندلقها فى صينيه فرن

وممكن نضرب بيضتين كويس ونمسح بيهم وش الصينية

ونرش على وشها تلات معالق كبيرة مبشور جبن رومى

ولما تطلع من الفرن اقفل الاوضه كويس قبل الاكل منعا للحسد

:D :excl: :D

وبالف هنا وشفا

مساء الفل

[Fencer]

وتكون مجهز شوية رز بالشعرية أو رزه و رزه ( عارفها ؟؟)

وبالف هنا وشفا

صباح الفل

<{POST_SNAPBACK}>

بودا

اما عن البطاطس فسوف نتبع الوصفة اللي شكلها حلو و هانعمل فيها شغل كويس ، انما ايه حكاية رزة ورزة دي? :D

يكونش قصدك اننا بدل ما نحمر شعرية نحمر بدالها رز و لونه يختلف عن بعضه? :D

رز مفلفل يعني

نرجو الافادة :excl:

[bodda]

الاخ الحبيب فنسر

طبعا

الرزه ورزه

هى تحمير ربع كمية الرز اللى انت هاتطبخه

بس ملحوظه هامه

وهى ان شوية الرز اللى هايتحمروا فى السمن يكونوا بدون غسيل

ودى تفرق كتير

وطبعا انت بتعمل غسيل الرز للتخلص من النشا العالق عليه

لكن فى التحمير لو مبلول بيغيب ويلزق

وبعد ماتحمره ويبقى لونه بنى فاتح تحط باقى الرز ويتقلب سوا

وبعدين نضيف مقدار الميه بس يكون بيغلى

وتحط الملح وتقليبه عالماشى وتسيبه يكمل عادى

وبألف هنا وشفا

مساء الفل

[Fencer]

ما هو ياعم الرز المفلفل

تم تعديل 22 مايو 2005 بواسطة Fencer

[bodda]

لا يا عمنا

الرز المفلفل ممكن يكون كده أو أبيض أو بالشعرية

الفلفل هو ان كل رزايه تكون سايبه أختها :D

يعنى مفرط ومش ملزق

علشان كده يقولوا الشطارة تفلفلى الرز وتفرجى الحارة

:D :excl: :angry:

يعنى مثلا مع السمك ماينفعش نعمل الرز مفلفل

لازم يكون سايح شوية :angry:

المهم يا عزيزى يكون فيه رز من اساسه

لانى ممكن اكل اى حاجه بس المهم يكون فيه رز

:wub: :D :D

واحلى صباح لفنسر العزيز

[yasovinas]

بس ملحوظه هامه

وهى ان شوية الرز اللى هايتحمروا فى السمن يكونوا بدون غسيل

ودى تفرق كتير

وطبعا انت بتعمل غسيل الرز للتخلص من النشا العالق عليه

لكن فى التحمير لو مبلول بيغيب ويلزق

جميله جداً المعلومه دي يا باشا والله كنت محتار في تحمير الرز فعلاً لاني كنت بحمرة بعد ما بغسله انت استاذ ورئيس قسم كمان

[se_ Elsyed]

الشيف العزيز بوذا

بعد التحية والسلام ...

ماما بتسلم عليك وبتقولك شاكرين ومقدرين جهودك لإثراء مطبخ المنتدى ، ولكن ( خد بالك من اللي جاي )

ولكن الشيف الحقيقي بيعيش يا حبيبي .. قصدي الشيف الحق وحقيق يدخل على التقيل .. سلطات .. أبيتايزر ... حلويات .... لأن تقريباً كلنا عارفين صينية البطاطس والمكرونة بالدندورمه والحاجات دي .. لكننا متعطشون لمعرفة أنواع سلطات غير اللي معدتنا نشفت منها وبناكلها كل يوم ( طماطم وخيار وكلام من ده )

الأسبوع اللي فات أخوك س س ماشي بالعربية في أمان الله وبأسمع إذاعة إم بي سي إف أم لقيتهم بيقدموا وصفة السلطة الروسي .. فقولت خير أهي تبقى وسيلة للتقارب بين الشعوب ( من ناحية السلطة بس .. سامعني يا ياسو ؟ يعني ماتنزلش الديره وتدور على الروس وتقولي أنا بأعمل تقارب بين الشعوب يا لئيم ) ما علينا روحت طالع جري على السوبر ماركو وشاري الآتي :

1- فاصوليا حمرا نص مسلوقة مُعلبه

2- بسله خضراء " " .

3- مايونيز

4- ذره صفرا معلبه برضوا مش أكواز درا

5- طماطم وخضار والذى منه

وأخلط كل ده بمقادير متناسبة .. وعيش يا ريس وتحيا جمهورية روسيا الإشتراكية وساباسيبو خاراشو ....

بالمناسبة عندنا مطعم هنا في الرياض إسمه " ستيك هاوس " المطعم ده بقى مجرم من مجرمي الحروب في السلطات .. يعني تتدخل تاكل تلاقي لا يقل عن 20 نوع من السلطة ما بين حادق وحلو .. وعلى ما توصل للمين ديش ما تلاقيش منفذ للأكل فتضطر تاخد الوجبة تيك آواي ...

[bodda]

العزيز yasovinas

ياسيدى انت بس تطلب اى اوامر

وبالهنا والشفا

مساء الفل

:D