اطلب اى وصفه على بالك .. تلاقيها قدامك

[bodda]

ليه بس يا اوشا ؟؟؟

اكيد ماحطتيش شوربه كفايه :D

أو ما قطعتيش الصينية بالسكين :D

او ماغطتيش الصينية بالفويل :D

او لو فى طاجن بايركس يبقى يتحط الغطا

لانه لازم يتغطى علشان سوى الرز ...عادى

هيه واحده من التلاتة

صباح الفل

:D

تم تعديل 15 يونيو 2005 بواسطة bodda

[Osha]

الثلاااااااااااااااااااثة

واااااااااااااء

والله انا كنت حأغطي الصينية بفويل - بس لما قريت التعليمات ولقيت ان مافيش فيها فويل تراجعت في التو واللحظة

شوربة الخرشوف احسن حسام أكلها عند واحد صاحبه وعجبته جدا - انامش حاعملها لكن من باب العلم بالشئ برضه

[wagdi]

يا أهل الخيروالكرم....

أنا اسمي وجدي...وكنت باشتري لازانيا باللحمة المفرومة من الي تتحط في الميكرويف تتطلع زي الفل....

مراتي...حلفت وصممت ولابد من الف بد ان هي الي تعملها...

المشكل ان هي ما بتعرفش تعملها...

:sad:

فلو حد يقوللي تتعمل ازاي...يقعد لكو فعافيتكوا قادر ياكريم..:

[bodda]

العزيز وجدى

معلش اتاخرت عليك لسفرى يومين

لازانيـــــــــــــا

مقادير العجينة

نص كيلو دقيق و أربع بيضات ومعلقة زيت و نص معلقة شاى ملح

نغربل الدقيق ونحطه في صحن غويط وعليه البيض والملح والزيت

نعجن كويس أوى لغاية العجينة المتماسكة

ونلف العجينه فى فوطه معصوره اوى ونسيبها نص ساعه

بعد كده نفرد العجينة لغاية ماتبقى رقيقة ( حوالى 3 مم ) مع رش الدقيق للتسهيل

نقطع العجينة بالسكين مربعات حسب الرغبه ( غالبا 7×7 سم )

نكون محضرين ماء يغلى ونسقط وحدات اللازانيا فيها واحده ورا التانية

غالبا تاخد 2-3 دقايق غليان للواحده

نجهز بقى الحشو :rolleyes:

نص ك لحم مفروم و معلقتين أكل زبده وبصلايه كبيره مخرطه ناعم

وجزرايه مبشوره و بقدونس مفرى وطماطم مبشوره

وفلفل اخضر مقطع صغير اوى وتلات معالق جبن رومى قديم مبشور وملح وفلفل

نشوح البصله ووراها الجزر والفلفل والبقدونس واللحم المفروم والملح و الفلفل

وبعد عشر دقايق عالنار والتقليب نضيف الطماطم كمان عشر دقايق

ندهن الصينية ونبدأ نرص وحدات اللازانيا ونحط عليها الحشو ونغطيها بواحده تانيه

أو ممكن نحط حشو قليل ونطبق الأطراف عليها :)

نحط الصينية في الفرن بدرجة حرارة 225 لغاية ما يلون بنى

ولا نستعجل في قص وتوزيع اللازانيا على الأطباق

وهي ساخنة فذلك لايساعد على تماسكها

ثم تقدم وبالهنا والشفا

مساء الفل

:)

[شاعرالرومانسية]

تسلم الايادى يا عزيزى....

على فكرة احنا عاوزين نعمل تنسيق بناتنا ( بينا يعنى مش بناتنا ولادنا ) لانى انا كمان مكنتش متواجد اليومين دول :rolleyes: .. بعدين الزباين تطفش يا معلمى :)

المهم .. انك رجعت بالسلامة واديت الوصفة التمام :)

ملحوظة :

" شوف ياعم ظروفك اية بكرة الاحد لو حتبقى فاضى على 6.30 كدة زى ما كنا متفقين وكلمنى "

[bodda]

منور يا شاعرنا الجميل

واهى وصفه تفوت ولا حد يموت

اصلى اخدت يومين سفر علشان انسى اللى عملته اوشا فى الكرنب

:rolleyes: :) :)

صباح الفل

:D

[wagdi]

العزيز بودا....

اشكرك اشكرك اشكرك...

أنت شلت السكينة من فوق رقبة البلد...:)

ولو فيها رزالة ممكن وصفة الزلابية المشهورة بلقمةالقاضي...

(مع العلم إن الخميرة هنا خميرة جافة نشطة مش خميرة بيرة) وأقطع دراعي لو كنت فاهم حاجة...

ولو مافيهاش رزالة..

احم..

والله مكسوف منكم...

حد يسمع عن حاجة اسمها سد الحنك؟؟

يعني لو حد يعرفها أفيدونا يرحمكم الله... ولو مش..فبرجاء امنعوا الضُحك والتعليقات حتى لا تصبح ليلتي بتنجان...

:rolleyes:

وكما قال المثل...الزوجة دائماً على حق...

[bodda]

العزيز وجدى

المهم تكون الوصفة عجبت الحكومة

:blink:

اما باقى طلباتك فحاضر طبعا وكلها معروفه وسهله

بس افضى 10 دقايق

مساء الفل

:)

[bodda]

لقمة القاضى أو الزلابية

دقيق وماء وخميره جافه وملعقة سكر

طبعا مافيش مقادير لان بنعجن الدقيق حسب الكميه المطلوبه

وان كان نص كيلو دقيق كافى لخمسة اشخاص

فى الاول بنحط الخميرة الجافه على نص كوباية ماء دافى

ومعاهم معلقة السكر لمدة نص ساعه علشان الخميره تشتغل

بعد كده نحطها على الدقيق والعجن يتم بماء فاتر للتخانه المعروفه

بتكون نصف سائله ( زى المهلبيه تقريبا عند الغرف )

ونتركها فى مكان دافى لمدة ساعه :blink:

لغاية ما نلاقى وش العجين ظهر عليه فقاقيع هواء

كده يبقى العجين تخمر واصبح جاهز للاستعمال

نحضر طاسه عميقه وزيت عميق ساخن جدا :)

ونبدأ ناخد حتة عجين بملعقة الشاى المبلله بالزيت ونسقطها فى الطاسه

ودى لازم تكون عملية سريعه علشان كل الكور تستوى مع بعض

ونكون محضرين محلول سكر (عسل) زى اللى بنصبه عالكنافه

ونطلع لقمة القاضى من التحمير ونطشها فى العسل علشان تشرب

وبالهنا والشفا

مساء الفل

:)

[bodda]

سد الحنك

نص كيلو سمن

دقيق كافى

نص كيلو سكر

يقدح السمن فى حله عميقه

وينزل من على النار ونبدأ فى رش الدقيق والتقليب السريع

لغاية ما تبقى عجينه لينه ثم يضاف نص السكر

ترفع على نار هاديه ويضاف باقى السكر والتقليب

ثم يضاف دقيق حتى درجة التماسك المطلوبه

ويقلب على النار لغاية ما نشم ريحة سوا الدقيق

وبالهنا والشفا

بس تحضر الفوار والمهضمات

:blink:

مساء الفل

:)

تم تعديل 19 يونيو 2005 بواسطة bodda

[Osha]

هو احنا رجعنا تاني للتفرقة العنصرية :)

مطنش طلبي ليه الخاص بشوربة الخرشوف!!

وبعدين فين حق الكرنبة والرز اللي باظت

أيوه صحيح انا اللي بوظتها - لكن انت اللي حتدفع

والا عندك مانع?? :blink:

[bodda]

العزيزه أوشا

طبعا تمن الكرنبه اللى انتى بوظتيها عندى

مع انك انتى السبب باعترافك

لكن كطبع حواء المفتريه .... ندفع احنا برضه

:blink: :) :)

نيجى بقى لطلبك المخصوص والعتب عالزهايمر

شوربة الخرشوف

حوالى 6 خرشوفات محترمين ( ماتكونش شايخه يعنى مليفه )

وطبعا تنظيف ونقع فى ميه فيها خل نص ساعه

ونقطع الخرشوف قطع صغيره حسب الرغبة

ونسلق الخرشوف فى كميه ميه بالملح يادوب تغطيها مع بصله صحيحة

ننشل الخرشوف ونستبعد البصله بعد السوى

معلقتين دقيق يتشوحوا فى معلقتين سمن بلدى محترم للون البيج

ننزل من على النار ونضيف مع التقليب السريع ( مضرب سلك ) كوباية لبن

يعنى كأنك بتعملى بشاميل بس من غير بيض :lol:

نضبط الشوربة بالملح والفلفل ونبدأ نصبها عالخلطة السابقة

مع التقليب السريع بمضرب سلك برضه

نرجع تانى قطع الخرشوف للشوربه السميكة الجديدة

ونوصلها لدرجة الغليان وبعدين نوطى عليها خالص 5 دقايق

وبألف هنا وشفا

صباح الفل

:D

[Osha]

بس الشوربة اللي شفتها هنا لونها أحمر!! :)

تفتكر ده ميكروكروم!!!!!!!! :)

لو سمحت تمن الكرنبة يوصلني بالويسترن يونيون على البنك بتاعي في سويسرا بأسرع وقت - أي تأخير عداد الفوايد حيعد :blink:

تم تعديل 20 يونيو 2005 بواسطة Osha

[bodda]

جرى ايه يا اوشا ؟؟؟

يعنى مش عارفه تضيفى معلقة صلصة ؟؟؟

:blink: :) :)

بس ادينى رقم الحساب السرى والبصمه

:D

مساء الفل

:lol:

[bodda]

اليومين دول المشمش مالى الدنيا ورخيص

ايه رايكم تعملوا شوية قمر الدين استعدادا لرمضان ؟؟

:blush: :wub: :D

قمر الدين فى التلاجة

نقول أربعة كيلو مشمش مستوى و كبير ونفصصه ... ونرمى البذر :wub:

وعلشان يبقى مزز وجميل نستعمل 2 كيلو بس سكر

نلخبط المشمش المفصص على السكر فى حله استانلس كبيره

ونسيبه 4 - 5 ساعات هاتلاقوه نزل ميه كتير

نشيله هيلا بيلا عالنار الهاديه للغليان

ونسيبه يغلى نص ساعه كفايه اوى مع التقليب كل شويه

هاتلاقوا المشمش بقى طرى خالص وسهل الفعص زى المهلبية

:lol:

واهم حاجه هاتلاقوا ريم كثيف يظهر ولازم نشيله نرميه

ننزله من على النار ونسيبه يبرد شويه يعنى حرارة تستحملها ايدك

:wub:

وعالخلاط شويه بشويه مع الضرب المبرح ونرجعه فى حله نضيفه

ونسيبه يبرد خالص ونعبيه فى أكياس وعالفريزر

مش قلت لكم سهله ؟؟؟؟؟ :wub:

صباح الفل

:wub:

تم تعديل 21 يونيو 2005 بواسطة bodda

[wagdi]

الأخ العزيز بودا...

انا كنت بحبك لحد الزلابية...

أما سد الحنك... :wub:

برجاء ملاحظة أن طلبى لبعض الوصفات يكون قسراً... :blush:

يعني لو شايف إن الوصفة فيها خطرعلى الصحة العامة إديني طناش...

:D

لأن الي حصل فيا من سد الحنك ده مايرضيش حد...

أه والله مايرضي حد.. :wub:

[Osha]

الأخ العزيز بودا...

انا كنت بحبك لحد الزلابية...

أما سد الحنك... :o

برجاء ملاحظة أن طلبى لبعض الوصفات يكون قسراً... :blink:

يعني لو شايف إن الوصفة فيها خطرعلى الصحة العامة إديني طناش...

:blink:

لأن الي حصل فيا من سد الحنك ده مايرضيش حد...

أه والله مايرضي حد.. :blink:

<{POST_SNAPBACK}>

لا لا لا لا

الا سد الحنك :P

دا حتى اكلة خفيفة وسريعة الهضم ولا بتكبس على المراوح و لا حاجة :blink:

وباين كده من اسمها :wub:

مالكش حق في انك تقول عليه كده :lol:

[شاعرالرومانسية]

يا هلا بروايح رمضان ... انت بدأت وصفات رمضان بدرى ياعم بودا ،،، :P

يلا على رأيك فرصة المشمش مغرق الدنيا السنة دى ;)

بس تسلم الايادى يا شيف :blink:

أية رأيكوا فى الكشرى يا شباب ... انا عارف ان الدنيا حر ومش وقت كشرى .. :blink:

بس اصلى كنت بتكلم مع صديق على محلات الكشرى وهو مصمم ان الكشرى البيتى مش زى المحل ..فعزمتة على كشرى فى البيت ..

والحمد لله خرج من عندى ............

وهو مصمم نعمل محل كشرى :lol:

عموما حقولكم علية ونشوف موضوع المحل دة بعدين،،،، :blink:

نعمل خلطة من التوم المفروم والكمون المطحون ..ونجيب معلقتين زيت ونحمرهم فيهم شوية ..نكون محضرين عدس بجبه مسلوق 3/4 سليق ونضيفة بميته على التوم ونضيف بعد كدة الارز المغسول وكمان شوية شعرية محمرة مسبقا فى معلقة زيت ذرة ونخلط كلة ببعضة ونقلب كويس ونزود المية طبعا ونوطى النار حتى تشرب العدس والارزز

نكون محضرين مكرونة مسلوقة عادى مشكلة ( مقصوصة وطويلة اسباجيتى )

طبعا فية لوزم جانبية لزوك طبق الكشرى المتين

الصلصة : بصل مقطع صغير يتحمر فة الزيت حتى الاصفرار ونضيف توم مفروم ونقلب شوية ونقوم ضايفين عصير الطماطم مع معلقتين صلصة ونسيبهم يتسبكوا .

الدقة : مخلوط من التوم والكمون والملح مع تلت معالق خل ويتسابو شوية من قبل الاستعمال

التقلية ( الورد على راى المحلات ) : بصل شرايح رفيعة جدا ويتحمر فى زيت غزير وسخن ..بحيث نحط البصل فى الزيت ونشيلة على طول قبل الاحمرار عشان يطلع مقرمش

الشطة : انا عن نفسى بطبخ شطة خصوصى .. بجيب فلفل احمر مولع وافرمه واحط معاه فص توم مفروم واحطة على النار مع ملعقتين صلصة وشوية مية ولما يتسبك اخففة بشوية خل واقطع علية طماطمية جامدة مكعبات بعد ما نشيلة من على النار ( احيانا بيبقى طبق جانبى جنب اى اكل مع رغيف طرى بلدى و......نمرة المطافى 123 :o )

حمص شام : حمص شام مسلوق مع بصلاية ومتبل بالملح والكمون .

وفى النهاية ..نجيب طبق غويييييييييييييط .. ونحط العدس والارز وفوق شوية مكرونة مسلوقة وبعدين الصلصة والدقة وعلى الوش البصل المحمر والحمص ( وممكن نكون مخليين شوية عدي من اللى سلقناهم فى الاول مع الارز ونضيفهم على الوش برضة )

بس ياريت بلاش نجرب الكشرى دة فى يومين الحر دول ونستنى لما الجو يتعدل شوية :blink: وياريت كمان بعد الاكلة دى نعمل الارز باللبن اللى وصفهولنا شيفنا بودا فى بداية الموضوع يهدى العملية شوية :wub:

وبالهناء والشفاء ;)

تم تعديل 21 يونيو 2005 بواسطة شاعرالرومانسية

[bodda]

ايه يا عم وجدى ؟؟؟

مش انت اللى طلبت سد الحنك ؟؟؟

وأنا حزرتك منه فى نهاية الوصفة ؟؟؟

يبقى الأكل مسئولية كل أكيل

:blink: :wub: :blink:

ومافيش أى تعليق على قمر الدين ؟؟؟

مش عاجبكم ؟؟؟ :lol:

وطبعا أوشا خبيرة سد حنك ...والعزيز فنسر هو الزبون

:P

اما شاعرنا الجميل

فموضوع الكشرى ده مش هايعدى كده بالساهل

خصوصا بعد الوصف التفصيلى اللى يجنن ده !!

:blink:

انا كييف محلات وعربيات و حلل كشرى

وطبعا جو المحلات الاصيله يختلف عن البيت

ولاثبات العكس كنت ندهتلى يوم العزومه اياها :blink:

وانا جاهز لاى كشرى بس يكون فى الطراوه بالليل

:o

صباح الفل

;)

تم تعديل 22 يونيو 2005 بواسطة bodda

[Osha]

حلوة قوي عزايم الكشري :blink:

فيها لا أخفيها وانت عارفين اني قوية ومفترية :blink:

وبعدين هو انت محتار تعمل عربيةايه والا ايه يا عم حسن :wub:

سجق والا كبده ? :blink:

اقولك

اعمل عربية مكس تقدم طبق مكس كشري على سجق على كبده زي الفشنكاح اللي على عربية من بتوع شارع جامعة الدول :P

وبعدين ياسي بودا

انا بحب قمر الدين جدا لكن زوجي العزيز بيكره اي شئ شبه المهلبية وبيعتبره من الموبقات ولذا فأنا سكت غيظا وكمدا !!! :blink:

ياسلام بقى يا متخصص كشري افندي على كشري عدس اصفر لو سمحت :lol:

على فكرة انا باحب احط شعرية مع الكشري العادي وعشان كده باصفي العدس واحتفظ بالمية بتاعته وبعدين بعد ما احمر الشعرية ادي الرز تشويحه وبعدين اسقيه مية العدس

عاوزة رأي السادة الخبراء في هذه الطريقة - والله انا عملتها من بنات أفكاري