اطلب اى وصفه على بالك .. تلاقيها قدامك

[bodda]

العزيزه البنت المصرية

فينك من زمان ؟؟؟

وحشتينا بجد

:blush:

بخصوص طلب موضوع خاص لاكل الاطفال

فمش عارف والله اقدر عليه ولا لأ !!!

لأنى مش شايف فرق كبير فى نوعية الأكل

واللى لازم يهمك هو حيوية الطفل ونشاطه بغض النظر عن كمية الأكل

فأكتر حاجه تخوفنى هو زيادة وزن الطفل

لكن معاكى طبعا فى ان الشيبسى واخواته هو أسوأ أنواع الغذاء

ويمكن أنا بطبيعتى منحاز للأسماك

فأيه اخبار السمك مع أولادك ؟؟؟؟؟

لو بيحبوه تأكدى أنه أحسن غذاء فى الدنيا ووقاية وعلاج لكل شئ

:wub: :sad: :wub:

وهافكر فى الموضوع بس برضه ساعدونى بالأفكار

صباح الفل

:wub:

[شاعرالرومانسية]

الاخت الغااااااااااااااااااااااااااااااالية،،،،اوشا

.................

لاتعليق :D

الاخت فلانة ..... واضح انك كنتى مستعجلة لما دخلتى ( لية ها لية... :D ) لدرجة انك ماشفتيش وصفة الارز بالخلطة .. موووووووووووووش مهم

المهم تكون عدت على خير ( واضح طبعا انها عدت على خير لدرجة انك لحد دلوقتى ماظهرتيش :D " السبت بعد منتصف الليل "..... بنا يستر )

العزيز بودا .... ازيك يا شيف واحشنى كتير ..

على فكرة ... فكرة الاخت بنت مصرية حلوة قوى .. اكيد حيبقى فية وصفات حلوة ومغذية وأأأأأأأأأأأأمنه لأطفالناالاعزاء ... مخمخ ياريس واحنا معاك :D

الغائب الحاضر ... الاخ حسام

ياعم غايب عننا لية ... خلينا دوبارة فى صنارتك وطل علينا ;)

العزيزة اوشا موصللنا كل اخبار رحلات الصيد الناجحة ..وكمان جالنا جواب شكوى من عمدة الولاية اللى انتوا فيها ...بيقول السمك اللى فى البحيرة اشتكى :D :D :D

عموما ربنا يقويك يا عزيزى ...بس تخلى المودام هى اللى تنظف السمك ;)

[Fencer]

الغائب الحاضر ... الاخ حسام

ياعم غايب عننا لية ... خلينا دوبارة فى صنارتك وطل علينا :D

العزيزة اوشا موصللنا كل اخبار رحلات الصيد الناجحة ..وكمان جالنا جواب شكوى من عمدة الولاية اللى انتوا فيها ...بيقول السمك اللى فى البحيرة اشتكى :D  :D  :D

عموما ربنا يقويك يا عزيزى ...بس تخلى المودام هى اللى تنظف السمك :D

<{POST_SNAPBACK}>

شاعرنا الرومانسي ابو علي

اسعدتني بتعليقك خفيف الدم و انا فعلا غبت شوية عن المنتدى بسبب الشغل فقد كنت اعمل من 9-4 و من 6-10 لحد ما ركبي اتخلعت ربنا ما يوريك

اما عن صيد السمك فهو احلى حاجة في الحياة ممكن تعملها، حتى لو ما طلعتش سمك و اسأل الصيادين يقولولك ، يغسل الهموم و يذهب الضيق و لو كان في سمك بيطلع يبقى متعة ما بعدها

دوبارة ايه في الصنارة يا باشا انت تيجي تشرفنا و نجيبلك احلى سمك لحد عندك و تاكله بالهنا و الشفا

انا النهارده لسة راجع حالا من النهر العزيز تشاتاهوتشي (اسمه كده)و هو اسم هندي طبعا و جايب معايا 11 سمكة من اللي قلبك يحبهم و ناوي اعملهم زي ما بودا قال - مقلي- سامعني يا بودا? مقلي و اياك يبوظوا!! :D

[bentmasria]

الاخ العزيز بودا

انا معنديش اى مشكله فى وزن الاطفال هو اصلا طفل واحد والباقى اولاد اخواتى وطفلى ربنا يحميه مفترى جدا ما بياكلش اصلا بمعنى ان عمره سنة ونص ووزنه 8 كيلو مع العلم ان عنده اسنان وممكن ياكل اى حاجة وطبعا انا نفذت له البطاطس وعجبته جدا بس زهق منها بعد مرتين وطبعا اكلنا احنا بيكون دسم عليهم وهو كره السوتيه من كثر ما قعد فى المستشفيات وموش معقوله الحياه حلويات ده لو رضى ياكلها اصلا

اتمنى تفكر بجديه ف موضوع اكلات او وصفات خفيفه لصحة الطفل وحيويته والله موش عاوزاه يتخن بس ياناس ياكل

ربنا يكرمك ارجوك تحاول وانا حدور فى الكتب القديمة يمكن وصفات امى تكون مساعدة برضه ارجوك يا استاذى العزيز ابنى جلد على عضم وحاسه انه نفسه ف حاجة بس المشكله موش عارف يعبر عن ذاته

ادوه فرصه ياجماعه يمكن اكله تعجبه :D :D

ربنا يسعدكم يارب

[bodda]

العزيزة بنت مصرية

من الأكلات اللى الولاد يحبوها عادة الكفتة

وهاوصفلك طريقة كفتة الفراخ بس ماتعمليش كتير

لان قلة الاكل المعروض للطفل تحفزه انه ياكل .. والعكس صحيح

وبدون الحاح منك انتم تاكلوا قدامه بشهيه وخليه يمد ايده لوحده

كفتة الفراخ

نص كيلو صدور مشفية ونفرمها مع حزمة بقدونس

بصله حلوه كده ونبشرها ناعم

معلقتين دقيق وملح وفلفل وبهارات ( حسب الرغبة )

بيضتين نربهم قوى مع نص معلقة دقيق ونصفيهم من الكلاكيع

:D

نخلط الفراخ المفرومة مع باقى المكونات عدا البيض

نعمل كفته صوابع أو أقراص

نغمسها فى البيض ونقلبها فى البقسماط الناعم ونرصها فى صينية

نسيبها بعد كده فى التلاجة ساعه على الأقل

ونحمرها فى زيت غزير وبعدها نحمر شوية بطاطس صوابع

مع الكاتشب تبقى 100% وتشبه اكل الشوارع اللى العيال بتحبه

وممكن تعملى الكاتشب فى البيت طبعا وأرخص

:D

وبالهنا والشفا

:D

[bodda]

الكاتشاب

كوباية صلصة طماطم تخفف بـكوبايتين ميه

ملعقة نشا كبيرة

معلقة ونص كبار سكر

نص كوباية خل

ملعقة صغيرة ثوم مهروس ناعم أوى ( عصير )

:D

تضاف جميع المقادير و تقلب على البارد ما عدا الخل

و يوضع على النار حتى يغلى و تهدأ النار حتى يذوب النشا

ثم ينزل من على النار ثم يضاف الخل

وبس ... :D

مساء الفل

:D

تم تعديل 31 يوليو 2005 بواسطة bodda

[Fencer]

الحبيب العزيز بودا

لقد جربت السمك التراوت مقلي و كان اكثر من رائع و طلع رأيك صح،تسلم لنا و تسلم وصفاتك

انا قابلت السمك بخلطة التوم و الخل و الكون و اللمون و الملح و الفلفل و معاهم كرافس و بقدونس و كله في الخلاط و علهم طمطماية كمان و اللي يطلع من القلي ادلق عليه الخلطة

حاجة جميلة جدا و الجميل في الموضوع ان الشوك الرفيع مابقاش مشكلة في السمكة المقلية غير السمكة اللي بتتعمل في الصينية

الا قولي ايه اوميجا 3 اللي في التراوت و فايدتها ايه??!!

[bodda]

العزيز فنسر

الاوميجا 3 هو نوع من الدهون الغير مشبعة

وهو حيوى جدا لتنشيط الخلايا الحيوانية ( اللى احنا منهم لامؤاخذة )

:rolleyes:

ويطلق علية أكسير الحياة لانه ينشط خلايا الجسم ويعيد لها الشباب

وله تأثير واضح على الذاكرة والوظائف الحيوية للجسم خاصة للرجل

وتأثيره واضح للنساء خاصة بعد سن الاربعين

وطبعا عمرهم ما بيوصلوا للسن ده

:mellow:

وتلاقيه فى زيت كبد الحوت وبعض الاسماك الصغيره

وأهمها التراوت وثعبان البحر ( الحنشان ) والسردين والماكريل

وتعرف انه موجود فى السمكه من انك بعد ما تاكلها يجيلك نوم بشدة

وهو ده علامة الاوميجا 3 لانك بعد النومه دى هاتحس بنشاط مختلف تماما

فتاكل السمك من هنا وتستسلم لاحلى نومه وسيب الاوميجا 3 يشتغل براحته

والف هنا وشفا للسمك المقلى المحبش

صباح الفل

:blink:

[شاعرالرومانسية]

بالهنا والشفا السمك يا عم حسام .. مطرح ما يسرى يمرى يا باشا mfb: ( ايوة كدة كلوا انتوا السمك بالهنا والشفا وسيبكوا من نيبال وغير نيبال mfb: )

اية المعلومة دى يا عم بودا ... ومخبيها عليا ياراجل .. مش كنت تقول من زمان ياجدع .. :o

بيان هاااااااااااام

" كان ياما كان ... فى سالف العصر والاوان ... لينا زميلة عزيزة اسمها الاخت " فولانة " وياعينى جاتلها ........ بعيد عنا وعنكم وعن السامعين .. عزومة كبيرة

ومن ساعتها واختنا العزيزة ولاحس ولا خبر... يارب يكون المانع خيرا

وربنا يحوش عنا العزايم :)

[Folana]

اس ..اس ..السلام عليكم . :) mfb: .

mfb: وكمان اس ..ااااس السلام عليكم .....

انا مش باغنى على فكرة ...ده بعيد عن السامعين جالى دور عبط كده على الماشى ...بس باتعالج ....

اتاخرت عليكم معلش ..السماح السماح يااهل السماح ...كنت باغسل المواعين ...ومن يومها ياحضرات واانا اللى جالى جالى .....اما انا بدعت بدع ..مش قادرة اقولكم .....عملت كل الوصفات الموجودة وغيرالموجودة ....

بس تصوروا نزلوا على الاكل فين يوجعك ...ومشيوا وماحدش سالنى عن اسمى .....انا فهمت بقى ان حفلة تعارف دى سيم بينهم ...يعنى عايزين نتعشى ..وكل زبون جديد مايجى يقولوا له حفلة تعارف ..والباقى القدام فاهمين طبعا .....ويدبس المسكين اللى هو انا ...فى عشوة محترمة علشان يكون على المستوى يعنى ومايشطبوش اسمه من حفلات التعارف الجاية ..ماتيجيوا تسكنوا عندنا ياجماعة احسن انا جعانة جدا وعايزة اتعرف :D ...

انا حاقولكم طبعا البوفيه كان بيحتوى على ايه ....بس اديونى فرصة انشف دموعى الاول وانسى ....مبدئيا انا عملت الحفلة اياها :D -وانتم عارفين قصدى - فى الهواء الطلق ...علشان ياكلوا ويجروا ..

الاخ العزيز شاعر الرومانسية ..والله لولا بيانك الهام اللى ذعته ده ماكانوش افرجوا عنى ....على فكرة انا عملت 3 اطباق من وصفاتك ..اتجننوا عليها ....

اوشا الحبيبة ..انا رديت عليك ..يارب الرسالة تكون وصلت ..وحاقولك على الاطباق والزباين اللى لهفوا الاطباق نفر نفر ..بس مش النهاردة .... vmp:

بودا ..مش عارفة اشكرك ازاى على وصفاتك اللى طولت رقبتى بين الهكسوس ..وافتكرونى احمس ...لى رجعة معاك علشان اقولك بالتفصيل .....

والله ياجماعة حمد لله على سلامتى واانا سعيدة برجوعى بينكم تانى .....ونلتقى بعد الفاصل ..مش انتم بتقولوا كده برضه :o ...............

[Osha]

اولا - اسمحوا لي احيي الجميع بمناسبة اننا في اغسطس ودا معناه ان عيد ميلادي قرب -يوم 18 ومحدش ينسى وكمان محدش ييجي وايده فاضية

سامعني ياللي انت عارف نفسك

فوفه العزيزة

حلوة اوي حكاية الاشتغالة بتاعة كل واحد ييجي يدبسوه في عزومة وبعدين يمشوا - عزائك الوحيد انك تعتبري حاليا من حقك ان تتعزمي عند اي جار جديد

اتمنى من الله ولايكثر على الله ان الحي بتاعكم يتملي سكان جدد وساعتها محدش حيشوفك لانك كل يوم حتبقى معزومة عند ضحية جديدة- قصدي ساكن جديد

طبعا لو بوداعزل عندكم حتبقى عزومة يتحدث عنها الحي كله ومش بعيد 6 اكتوبر كلها

وطبعا باعتبارنا عشرة قديمة من ايام القهر والاستبداد يبقى اكيد مش حيهون عليه يعمل العزومة الا لما نيجي مصر انا وحسام - او أسهل ييجي هو هنا

انا بقى جالي ادمان صينية البطاطس بالسمك في الفرن - فعلا مالهاش حل

وعملتها امبارح وحاكل بقيتها بعد شوية

دلوقت انا لازم اعزم صديقاتي وازواجهن على الغذاء لان دا دوري - ومش عارفة اعمل ايه جديد

هم جربوا صينية البطاطس والمكرونة والكوسة بشاميل - وكمونية ومحشي

والنبي عاوزين مينيو يحلفوا بيها - سامعني يا عم حسن - دول اصلهم من نيبال واناعارفة ان الناس بتوع نيبال عزاز عليك اوي

غششيني يا فولانة ينوبك ثواب فيا - دا انا غلبانة ومقهورة ومهيضة الجناح

[شاعرالرومانسية]

اولا - اسمحوا لي احيي الجميع بمناسبة اننا في اغسطس ودا معناه ان عيد ميلادي قرب -يوم 18 ومحدش ينسى وكمان محدش ييجي وايده فاضية

سامعني ياللي انت عارف نفسك

<{POST_SNAPBACK}>

سامع يا عم حسام :) :o mfb:

والنبي عاوزين مينيو يحلفوا بيها - سامعني يا عم حسن - دول اصلهم من نيبال واناعارفة ان الناس بتوع نيبال عزاز عليك اوي

<{POST_SNAPBACK}>

كل دة ولسة عاوزة مينيو .. ياشيخة حرررررام عليكى :D

وبعدين لو عملتى صنف من بتوعى .. داقوة الاخوة اللى من نيبال.. ياريت تبقى تعرفيهم مين اللى قايلك علية لو سمحتى mfb:

جربتى اللحمة الباردة اللى كنت كتبتها هنا .. اعمليها حتعجبك وعندك كمان سلطة البطاطس بالمايونيز والارز بالخلطة .. وتبقى وجبة متكاملة ... بس اتوصى باللحمة لأخونا فى نيباااااااااااااااااااااااااااااااااااااال :wub:

على فكرة حتلاقيهم فى صفحتين ورا قبل دى تقريبا ( قبا موضوع السمك ... :D )

يلا ياستى .. وبالهنا اكلة السمك الجديدة اللى جبها العزيز حسام ..

[bodda]

العزيزه فلانه

الف حمدالله عالسلامه من معركة العزومه الخلوية

:)

وبعدين زعلانه ليه انهم ماسألوش عن اسمك ؟؟؟

هاتلاقيهم وهمه ماشيين سألوا بعض

هيه الست اللى أكلتنا دى اسمها ايه ؟؟؟

هايردوا على بعض ويقولوا ... أهى فلانه والسلام

:D

يبقى عرفوا اسمك من نفسهم

mfb: :D mfb:

المهم ان اسمك بقى فى اللستة وابقى قابلينى لو حد جديد سكن عندكم

لان سمعتكم بقت عالهوا والانترنت

واى واحد هايفكر ميت مره قبل ما ييجى يسكن

هايعمل حساب تمن الارض والمبانى ..... والعزومة

:o

صباح الفل

:wub:

[bodda]

العزيزه أوشا

منورة المطبخ وضواحيه وما حوله

ايه حكاية بتوع نيبال دى ؟؟؟ حاسس انك هاتخطبى لحد صاحبى قريب

:)

على العموم همه من أكلة الأسماك زى حالاتى

وهاقولك على وصفة سمك عزايم هاتعجبك

وهيه هاتكون باستعمال سمكة لاتقل عن 3 كيلو

بس هانعملها تبان ولا لو كانت 8 كيلو

السمكة الكدابة

قولنا سمكه حوالى 3 كيلو

وتقطعى الراس والديل ويتسلقوا فى ميه مغلية ببصلة لمدة دقيقة فقط

لان اكتر من كده هاتستوى وتتهرى .. واحنا عايزينهم يفضلوا بشكلهم

وناخد باقى السمكة ونسلقها فى مية مغلية مع بصل وكرفس وملح وفلفل

نطلعها ونفصصها لحم صافى مفرفط حتت

ونوضب خلطة من المايونيز والبطاطس المسلوقه مكعبات صغيرة جدا

وجزر زيها وبسلة وحزمة كسبرة خضرا مفرية

ونص كيلو لحم جمبرى ( الجمبرى يتسوى عالبخار فى مصفاه )

كده بقى عندنا خلطة قد لحم السمك 3-4 مرات

نخلطهم مع السمك ونظبط الملح

نيجى بقى عالسفره ( لان ماعندكيش طبق سرفيس يساع الهلمة دى )

هاندلق الخلطة على حوالى متر المونيوم فويل ونشكلها على شكل جسم السمكة

ونلزق الراس والديل من الناحيتين

وباستعمال قشر الخيار نعمل أشكال الزعانف للبطن والضهر

وحباية كريز مكان العين

و سطر بسلة مسلوقة فوق سلسلة السمكة وممكن نحدد بيها حوالين السمكة

المهم محتاجه فن تشكيلى بالراحة وباستعمال ايدك وتكون مدهونة زيت ذره

هاتبقى تحفة ... يتحدث عنها الركبان .. والماشيين كمان

mfb:

وطمنينى

mfb:

تم تعديل 3 أغسطس 2005 بواسطة bodda

[Folana]

السلام عليكم ورحمة الله وبركاته ..........

اوشا الحبيبة...ده انت طلعتى بلديات جوزى على كده ..هو كمان من مواليد اغسطس ..وبرج الاسد برضه ..ومسجل خطر ماكولات بحرية برضه .....كل سنة وانت طيبة ..انا اول واحدة هنيتك اهو ....

شوفتى اللوحة السريالية الجميلة اللى قال لك عليها الاخ بودا؟......انا لو عملتها مش حاخلى حد يمد ايده عليها ........

الوصفات اللى قال عليك شاعر الرومانسية جميلة جدا وانا عملتها على فكرة من ضمن الحاجات الكتير اللى اتكلت عندى ...واللحمة الباردة انا باغرس فيها فستق ..وبعدين اقطعها على ماكينة البسطرمة تقوم ترمى معايا لحم ...وطبعا ياشاعرالرومانسية انا قلت ان انت اللى غششتنى بس ماعنديش حد من نيبال يعنى والله كنت خدمتك ....هم سالونى .....

من اين لك بتلك الوصفات الشهية ....بالله عليك اخبرينا وقولى صدقا ياصبية ....تلفت حولى وقلت على استحياء انها وارد شيف الرومانسية :blush:

بودا العزيز ...انا عملت لهم كمان الشركسية ..علشان يعرفوا انى اصلا اصلا من عيلة كبيرة جدا فى السن من ايام المللك يعنىى ...وعملت معاها رز ابيض....كمان بيكاتا بالشامبليون والبشاميل ...طبعا عملتها عادى ودلقت عليها كوزين بشاميل خفيفة وعلى الفرن ..وعملت الفخدة البتلو زى ماوصيت بالضبط...

كمان فيه عند الجزار حاجة اسمها فرخة ضانى ..ودى عبارة عن الزند بتاع الخروف ..بيتخلى او يتشفى يعنى ماعدا حتة العضم اللى فوق دى اللى بيتمسك منها الزند مااعرفش اسمها ....وبيلف الزند حوالين العضمة دى وبتكون شبه راس الفرخة ورقينتها ..ويلف بق بالخيط ..بتكون شبه الفرخة او البطة مش عارفة ..المهم يعنى عملت كذا واحدة ..باسلقهم وبعدين ادخلهم الفرن يحمروا ..وارص حوايهم خضار سويته ..واللى ضفت له الصلصة اللى قلت عليها برضه ...

عملت كمان محشى ورق عنب وكوسة ..باقسم الكوساية نصين علشان تبقى صغيرة ..وبعد مااقور واحشى بارضها فى صينية وارش على الوش جزر مبشور واسويها فى الفرن ..كمان حشيت جزر ..ماحدش يضحك ..بس جربوه والله بيبقى جميل ..باختار الجزر الرفيع ..او اقسمه نصيين برضه ..واقور لحد اخر حتة ممكن يوصل لها المقوار واحشى ..كمان حشيت فلفل مش رومى ومش حامى ..هو شكل الفلفل الحامى بس حجمه اكبر ...عملت كوسة باللحمة المفرومة ..مطبوخة يعنى عادى بس باحط لحمة مفرومة ...وحمص طبيخ ..وشوية نعناع فى الاخر .واولع فحمة فيها ..بتكون لها ريحة زكيه....وكمان عملت مسقعة ..دى بقى لى انا لانى فقر جدا فى اكلى واموت فى الاكلات دى ....والسلاطات بجميع الاشكال والالوان وربنا يخلينا بودا والشيف رومانسية ....وركن الحلويات برضه كان مشرف ..والعصائر ...نسيت اقولك يابودا انى بالنسبة للسيمون فيميه ..عملت حركة مش قد كده ..وهى انى اشتريت تورتة سيمون فيميه جاهزة من عند لو كرنفال..وده محل حلويات ضارب فى العالى فى المهندسين جنبت كورتيجيانو لزم ...بس عملت شغل عالى جدا ..الحقيقة انا مااعرفش طعهما ايه ولا ايه مكوناتها كل اللى افتكره منها شكلها وهى متغطية كلها بشرائح السيمون فيميه ..لو عندك وصفة لها ياريت تدلنا عليها ..لانى مش حاشتريها تانى بعد مااتدمرت فى معركة القبائل ..........

اكمل لكم بعدين بقى احسن افتكرت اليوم ده وحابدا اعيط من جديد .......... mfb:

[Osha]

شكرا يا فولانة :P محدش غيرك قالي كل سنة وانت طيبة !!! :angry:

وسلامي لزوج العزيز بلدياتي الأغسطسي الأسدي :D

حسن الرومانسية

للأسف ولأشد الأسف ان بتوع نيبال مش بياكلوا لحمة !!! وانت كده مش حلو عشانك انك ماتبقاش عارف المعلومة دي

أصلهم أصلا تقريبا بيعبدوا البقرة !! وعلى رأي حسام زوجي انهم عيب عليهم يأكلوا الاله بتاعهم !! :blush:

بودا المفتري

حرام عليك السمكة الجبارة اللي انت قلت عليها دي - بجد يعني افترا :P

وبعدين دي عاوزة مايكل انجلو يعملها يا عم !!! :P

انا بصراحة لو جربتها حاجربها في العائلة المسكينة الأول وبعدين ابقى اجربها في الضيوف.

المشكلة يا صديقي نوع السمكة نفسه - اصلي باروح السوبر ماركت الاقي علىالأقل 8 أنواع سمك صحيح كبير - معلش نتقل عليك يا بيه وتعمل لنا وصاية على النوع - انت عارف مشكلتي مع حرفية التعليمات. :blink:

وكمان عاوزة خدمة قوية قوية من التسوس محمية - وصفات الأعشاب بتاعة حسن - عاوزة اساميها بالعنجليزي عشان انا ماضية قدما في الريجيم. mfb:

تم تعديل 3 أغسطس 2005 بواسطة Osha

[شاعرالرومانسية]

بودا يا غالى ... سمكة اية دى اللى كدابة ... ياعمنا دى سمكة بنت سمكة ومن طهر...... سمكة(الا مذكر سمكة اية .... :angry: ).........تسلم ايدك وخيالك الواسع يا عم الشباب :P وعلى فكرة صحيح : هو مين اللى حيخطب دة :blush: ياريت تنصحة ما يتهورش ... عشان ما يتعورش

العزيزة فولانة ..... كفاااااااااااااااااااااارة يا فندم .. وعود أحمد( حتقوليلى مين أحمد ..حقوللك دة اللى كان فى العزومة ... "ماهو اكيد كان فية واحد اسمه احمد :D ")

شكرا يا ست الكل على الدعاية الحلوة دى .. دلوقتى الشيخ زايد كلها مهيأة ان الواحد ينزل بتقله يفتحلة محل هناك .... :P

وبعدين يا ستى مش لازم يكون عندك حد من نيبال " احنا برضة بنشجع الصناعة الوطنية ... mfb: )

بس بجد تسلم ايدك ... كان نفسى اكون معزوم :blink: .... مش على الاكل .. انما انى اشارك فى اعداد الحاجات الجميلة دى كلها

اوشا العنيدة ...قصدى العزيزة ( مش عارف لية يا أخى الحروف بتدخل فى بعضها كدة ... )

ياستى خليها اسماك والا فراخ " والا بيعبودهم هما كمان ...وبعدين انتى بتتلككى انا قلت لحمة وخلاص ..فممكن تبقى لحمة فراخ ..رومى .. طيور .. ماقلتش لحم بقرى يعنى :D )

اما بخصوص الرجيم ..فربنا يقويك .. ( على فكرة انا اللى خسيته رجعته تاااااااااااانى... :P ..دة بس لزوم التشجيع ورفع الروح المعدنية :D ).. عموما انا ححاول اجيبلك اسامى الاعشاب بالفنجريزى واهو اخو العنجليزى برضة " يعنى من ام واحدة واب واحد "

[Folana]

السلام عليكم ورحمة الله وبركاته ...............

انا قلت افتح الدكان بدرى النهاردة ..ادور لى على طبخة كده ..من غير اى لحوم ولا تكاليف ..ماانا حأقضى باقى الشهر كده وأنتم طبعا عارفين السبب.......

أوشا الحبيبة ....كنت عايزة اسالك سؤالين كده بس مكسوفة الحقيقة ..لكن احنا خلاص بقى بقينا عشرة قديمة ...أول هام ..هم فعلا فى نيبال بيعبدوا البقرة...؟.......واذا كانت الاجابة بنعم ..طب البقرة دى مالهاش اسرة يعنى ثور محترم كده وكام نفر بتلو ..ياترى بيعبدوها هى واسرتها ولا هى بس ؟..

تانى هام ...ايه سمك التروات ده ..يعنى هو له اسم تانى ؟...معروف يعنى للجميع وانا اللى مش فاهمة ولا ايه ..ده انا حتى سألت استاذ سمكاوى جوزى مش عرفه ..واتكسف منى غاية الانكساف ..لانه دايما بيفهمنى انه عنده جميع الاجابات وخصوصا اذا كانت تتعلق بعالم مافى اعماق البحار .......هو اختصر وقالى مافيش حاجة اسمها كده ابقى اقرى صح او تعالى اغير لك النضارة .. :angry: ..تفتكروا يقصد حاجة تزعل؟ :huh:

مافكرتيش تعملى بصارة يااوشا ؟...انا فكرت بس مش باعرف ..معايا يابودا؟...مش باعرررررررررف ..يعنى لو ممكن نجربها كده يبقى كتر خيرك ..وماتنساش طريقة عمل تورتة السيمون فيميه ....هو الرجل قالى انها كيكة محشية سيمون ومتغطية طبعا بالسيمون ..بس صدقنى مالحقتش حتى اطمئن عليها ..اهو يعنى برضه نطلب البصارة وجنبها سيمون فيميه احسن تفتكروا ان الحالةالمالية اتدهورت واصبح ميئوس منها ...

كانت حماتى دايما تشحتنى طبق وبعدين قلت اتعلم بقى اعملها ..ماحدش ضامن عمر حماته ... ;)

شيف الرومانسية ...ده انت تنور والله ..بس حكاية فتح المحل دى صعبة شوية ..احنا ناس لها مبادىء ..زى مبادىء الثورة كده ..يعنى لازم نتعرف عليك كويس جدا الاول لحد مانشبع وبعدين ننظر فى موضوع المحل ده ... : :ninja: بمناسبة المحلات ..انا جوزى كل مااعمل اكل يعجبه يفكر جديا فى فتح مطعم ...بس طبعا انا اللى حاطبخ وهو اللى حيقبض ..علشان كده كل مرة برضه بالغى المشروع :D ...على فكرة انا قريت لك اكتر من قصيدة ...شىء جميل جدا ...انا عارفة ان مش مجال الرد هنا طبعا .... :)

الاخت العزيزة بنت مصرية ...ربنا يخلى لك ابنك ...فكرتنى بايام ولادى لما كانوا صغيرين كده ... :) ..مش مهم على فكرة الاولاد ياكلوا كتير قد ماهو مهم انك تركزى فى نوعية الاكل ...يعنى طالما بياخد احتياجاته اليومية ماتقلقيش خالص...ويفضل طبعا انك تقللى الدليفرى وان كان من الاحسن منعه ..لانه مساوئه اكتر من ....من ايه؟الحقيقة مش لاقيه له حاجة خالص امدحه فيها ....اولا ماحدش عارف بيتعمل ازاى ولا مين اللى بيعمله ..وثانيا ..انا عن نفسى عشت تجربة مع بنتى بادعى ربنا ان ماحدش يعيشها خالص بسبب الدليفرىى ده ..والحمد لله رب العالمين ..عدت على خير ..انا شايفة ان كل الوصفات موجودة هنا والاخ بودا مش بيبخل بحاجة جزاه الله خيرا ..

طبيعى انك تهتمى اكتر بشكل الطبق ..مش الطبق يعنى لوحده اقصد بشكل الاكل الموجود فيه ..يعنى كترى من الالوان الزاهية شوية ..حتة طماطم على خس ..انشالله حاجات للزينة بس ..يعنى شدى انتباهه لشكل الاكل الاول وهو حيقبل عليه ......

ويوم سعيد للجميع .........

ملحوظة هامة ...العزيز بودا انا مستنية وصفة البصارة ومش عايزة اوضح بقى الاسباب هه!!!!

حاجة كمان قبل ماامشى ..انا مش عارفة لا اكبر الخط ولا احسنه ولا الونه ..اصحاب الخبرة يدلونى...... :wub:

[bodda]

للعزيزه فلانه هانم

طبعا فيه سمك اسمه التراوت أو التروت

بس مش موجود فى مصر ولا يوجد له شبيه

هوه شكله يشبه شوية القاروص مع اختلاف الشوك ونسبة الدهن

وهو من اسماك المية الحلوه فى اوروبا وأمريكا

البصارة

نص كيلو فول مدشوش يتنقع فى الميه من بالليل لتانى يوم الضهر

نيجى بقى شايلينه من الميه ونصفيه ونفرم عليه ربطتين شبت

على ربطة كسبرة خضرا وربطة بقدونس

و4 -5 فصوص توم كبار وطماطماية متخرطة وبصلاية

ملح وفلفل وربع معلقة صغيرة كمون

نحط كل ده فى حلة ومعاهم مية سخنة يادوب تغطيهم ونسيبها تغلى

لغاية سوى الفول تماما

ننزله من على النار ونسيبه يبرد شويه وعالخلاط مع الضرب المبرح

حتى الاستغاثة :ninja:

ونقلب من الخلاط على مصفاه واسعه على الحله تانى ونار هاديه

نجيب بصلايه كبيرة ونخرطها ناعم ونحمرها فى زيت للون الذهبى

وقبل ما ننزلها من على النار نضيف معلقة كبيرة كسبرة ناشفه مطحونه

وننشل البصل بالكسبره من الزيت ونسيبه يبرد لتزيين الاطباق

نحط الزيت المتبقى من البصل والكسبرة على الحله ونقلب

وكمان معلقة سمن بلدى محترمه ... هاتلاقى الخلطة بقت فى تخانة المهلبية

بعد كده نغرف البصارة فى أطباق مسطحة ونزين الوش بالبصل المحمر

وبالف هنا وشفا

:angry:

تم تعديل 4 أغسطس 2005 بواسطة bodda

[bodda]

العزيز شاعر الرومانسية

يا عم دى سمكة عزايم بس جربها على ضمانتى

وهيه كدابه لانها بتظهر أضعاف حجمها الاصلى

العزيزة اوشا هانم

ممكن تستعملى اى سمكه كبيره لها راس وديل كبار واضحين

علشان هانستعملهم فى العرض الدرامى

بس بشرط ماتكونش سمكه فيها شوك منتشر فىاللحم ويصعب ازالته

وجربيها فى العزومه وعلى ضمانتى

بس خلاص

:ninja: