اطلب اى وصفه على بالك .. تلاقيها قدامك

[Osha]

والنبي يا حسن ماتفولش في وشي حكاية الريجيم واللي تخسه ترجعه تاني - انا لسه باقول يا هادي

اتجدعن انت بس وهات اسماء الأعشاب بالعنجليزي - مش مهم الانجليزي لو حيضايقك

بالنسبة لأهل نيبال - بيسلموا عليك ويبوسوا ايديك ومشيها فراخ ولا تزعل نفسك

بودا

وازاي الواحد يعرف السمكة اللي شوكها منتشر في لحمها !! دي زي مغارة على بابا كده!!

ياعم خدنا جنبك - احنا لسه بنحسس في المطبخ

لله يا محسنين لله !!! معلومة قليلة تمنع بلاوي كتير !!

فولانة القوية العزيزة

التروت انا سمعت عنه لكن لم اراه الا لما جيت هنا الحقيقة - بس مع اعطاء كلمة بودا الأولوية - انا شايفة انه اقرب الى البوري في الشكل العام!! بس اللي لاحظناه انا وحسام ان السمكة عفية يعني بتشد في السنارة بمنتهي العنف وبتقاوم وهي بتطلع كأنك مطلعة حوت!! بس بصراحة حكاية النوم اللي قال عليها بودا دي - صح ميه في الميه - الواحد ياكلها من هنا ويغط في سبات عميق !!! احنا رايحين السبت نصطاد - حاديلك الحصيلة بدل ما اديها للغرب ياختي

بالنسبة لنيبال - اللي اعرفه عن صديقتي انها لا تأكل اللحوم الحمراء بكافة أشكالها - فقط الطيور ....والخنزير - شفتي القرف

يعني بتستحرم البقرة وتاكل الخنزير - وعجبت لك يا زمن

بالنسبة للخط - الحقيقة زي ما انت شايفة - اني باكتب زيك بالضبط والسبب قلت لك عليه في رسالتي وبلاش فضايح

مافيش وصفة اكل تخلي العيال يسمعوا الكلام ويذاكروا من غير مشاكل!!

[bodda]

بالنسبة للخط

بعد ما تخلصى الكتابه تحطى الكيرسور على اول كلمة مع ضغطة شمال عالماوس

وتسودى كل الكتابه المطلوب تغيير شكلها

لحد كده حلو ..؟؟؟؟؟ نقول حلو

تبصى بقى فوق مربع الرد هاتلاقى مكتوب لون الخط وحجم الخط والمحازاة

افتحى ونقى اللى يعجبك عادى

بس المهم اكون محدد النص اللى عايز اتعامل معاه الاول زى ما شرحنا

كابيتو ؟؟؟؟؟

صباح الفل

:ninja:

[Folana]

[ ايه ...اكل يعنى مثلا ولا....)size=8]كابيتو ياخواجة بودا ...كابيتو .....(كابيتو دى تطلع ايه ؟؟..........محشى يعنى ولا لحوم ولا

انا عملت زى ماقلت اهو اما اشوف بقى حتطلع ايه

[Folana]

بص بقى ...مش كابيتو لأ..مش كابيتوو خالص بصراحة ..مافيش حاجة اتغيرت بس الرسالة اتلخبطت زى ماانت شايف ...شوف لى وصفة تانية اسهل الله يكرمك ..ده انا لسه طالعة افراج من عزومة ..ومش عايزة افكر فى حاجة خالص. : :excl:

[شاعرالرومانسية]

والنبي يا حسن ماتفولش في وشي حكاية الريجيم واللي تخسه ترجعه تاني - انا لسه باقول يا هادي

اتجدعن انت بس وهات اسماء الأعشاب بالعنجليزي - مش مهم الانجليزي لو حيضايقك

<{POST_SNAPBACK}>

ماشى ياستى الكل انا جبتلك بعضها اهو وحشوف الباقى ان شاء الله. :excl:

رجل الأسد*Alchemilla Valgaris

الشمر*"Fennel

- السنامكي (العشرق)*Cassia Angustifolia

البابونج*Chamomile

quote=Osha,Aug 5 2005, 02:51 AM]

بالنسبة لأهل نيبال - بيسلموا عليك ويبوسوا ايديك ومشيها فراخ ولا تزعل نفسك

<{POST_SNAPBACK}>

لاء مدام بيسلموا عليا وبيبوسوا ... ايديا كمان :excl:

يبقى نمشيها فراخ يا ست الكل ولا تزعلى ولايزعلوا هما كمان

وبلغيهم سلامى الحاااااااااااار :excl:

[bodda]

العزيزه اوشا

اذا كنتى مش عارفة صنف السمك اللى بلا شوك

ممكن تسألى فى السوبر ماركت عندك عن الصنف اللى بيعملوا منه الفيليه

وده هايكون اسهل .. وعليه ... تشترى سمكة كامله من الصنف ده

سهله ؟؟؟

بالهنا والشفا

صباح الفل

:excl:

[Folana]

[مساء الخير...بودا العزيز ..متشكرة جدا على وصفتك ..كانت سهلة جدا بس الحقيقة الوصفة اتحرقت منى ..ممكن وصفة تانية ؟

تم تعديل 6 أغسطس 2005 بواسطة folana

[bodda]

طب دى وصفه جميله وعالبارد منعا للحرائق

:lol:

البسطرمة

يفضل استعمال قطعة لحم مستطيله حوالى كيلو من أى قطعية ولكن بدون دهون

تقلب فى نص كيلو ملح وتوضع فى مصفاه لمدة 24 ساعه

تشطف جيدا وتترك فى المصفاه 3 ساعات

تستعمل العجينة التالية:

كوب فصوص توم + نص كوب حلبة مطحونه

+ نص كوب فلفل أرناؤطى ناعم بارد( من عند العطار )

تضرب المقادير السابقة فى الكبه أو تدق فى الهون جيدا

وتنعم اوى مع ملعقة ملح صغيرة

تبلل بقليل من الماء وتعجن بحيث يسهل فردها

يعمل فتحه فى الجزء العلوى من اللحم وتمرر منه دوباره

ثم نغطى بالعجينه اللحم تماما بدون أى فتحه يدخل منها الهواء

ولتسهيل التغطيه تبلل اليد بالماء أثناء فرد العجينه ( تلييس )

ثم تعلق فى مكان هاوى مظلل لمدة أسبوع :blush:

ثم تقطع مره واحده وتعبأ فى أطباق أو أكياس محكمه فى الثلاجه

وبالف هنا وشفا

صباح الفل

:wub:

[Folana]

[ALIGN=center] السلام عليكم ورحمة الله وبركاته ................

العزيز بودا ...دى فعلا وصفة سهلة قوى قوى ..ومش حتعمل حرايق.......بس اكيد يعنى اللحمة مش حتفسد؟.....انت ماقلتش برضه اعمل تورتة السيمون ازاى ؟ولا تفتكر شراها حيكون افضل ؟.......[/ALIGN]

طلب تانى لو ممكن ...أنا باعمل حوواشى جميل جدا بشهادة كل الاكيلة ..بس نفسى اعرف ازاى اعمل العجينة نفسها واحشيها باللحمة ..مش عارفة سؤالى واضح ولا ايه ...بمعنى انى مش عايزة استخدم العيش البلدى يعنى جاهز ..عايزة احشى اللحمة فى عجينة العيش اللى هى حتكون من صنعى ..واخله الفرن يستوى مع بعض ...ازاى اعمل كده بقى هه......؟

تم تعديل 7 أغسطس 2005 بواسطة folana

[bodda]

العزيزة فلانة

موضوع تورتة السيمون سهل طبعا

بس بيعتمد على استعمال لبابة العيش التوست الكبير قبل تقطيعه

وده بنجيبه ونقشره بسكين حاد من كل الاجزاء المستوية اللى لونها بنى

ونقطع اللباب الطرى شرائح بالراحة

والتورته تاخدلها ييجى قالبين توست كبير طازة

بعد كده موضوع رص طبقات متبادلة بطريقة معينة ماعرفش اوصفها بالكلام

علشان تمسك نفسها من اللباب والسيمون والمايونيز الخفيف

بس بالتجربه هاتوصلى لنتائج حلوه :lol:

اما موضوع الحواوشى فلازم باستعمال عيش بلدى عادى مستوى

ما ينفعش نحط خلطة اللحم فى عجين.. هاتطلع حلوه بس فطير

وعلى العموم عندك هنا وصفة العيش البلدى برضه

بس مش فاكر انهى صفحة :blush:

مع تحيات جمعية الزهايمر

مساء الفل

:wub:

[شاعرالرومانسية]

اية دة يا ست فلانة ... عمالة تقولة استاذة حوواشى بشهادة الكل .. طب مش لازم احنا برضة نمضى على الشهادة دى .... يلا مستنين وصفة الحوواشى اللى محصلشى :sad:

بودااااااااااااااااااااا،،،،،،،،،،، اية دة يازعيم.. بسطرمة :lol: .....وبيتى كمان :o

حجربها ياريس .لانى بموت فى البسطرمة ويسلام عيها بالبيض عيون

نجيب البسطرمة ونفرشها فى طاسة مع الزبدة ونفرقع البيض عليها من غير ما نحركة ، بس لازم الزبدة تبقى مغطيى البيض عشان يستوى ورشة جريئة من الفلفل الاسمر ... والملح خفيف ( لان اللحمة او البسطرمة مملحة طبعا طبقا لطريقة العزيز بودا :wub: ) لما بيستوى على فكرة ممكن نطلعة شبه خرط لان البسطرمة بتلزق فى البيض .. وأهو تجديد :blush:

[Folana]

السلام عليكم ورحمة اله وبركاته.........

بعد كده موضوع رص طبقات متبادلة بطريقة معينة ماعرفش اوصفها بالكلام.................

خلاص يااستاذ بودا..اذا كنت مش حتعرف توصف بالكلام ..فأنا وزوجى العزيز اتفقنا اننا نقبل منك تورتة موصوفة جاهزة ولما ناكلها حنفهم الطريقة :D :D :D ..

على فكرة انا فعلا جربت مرة اعمل العجينة وجواها اللحمة ..بس طبعا كانت انصاف ..ماعرفتش اعمل الرغيف كامل ..وزى مابتقول كانت فطيرة ..واللحمة فصلت عن العيش...هو ماكانش عيش قوى يعنى ...هو كان حاجة كده جواها لحمة ...مش عارفة ايه هى ...بس الحقيقة كنا مرة بنتعشى فى مطعم لبنانى ..وقدموا لنا لقم عيش كده (صغننة صغننة يعنى ..بس المفروض انها رغيف)...جوزى قالى ده حوواشى بيتعمل منه فيه كده ..ومن يومها ياحضرات واانا باحاول اعمله مع بعض مش ممكن ابداااااااا..فقلت اسال اهل الخبرة ....

[Folana]

اية دة يا ست فلانة ... عمالة تقولة استاذة حوواشى بشهادة الكل .. طب مش لازم احنا برضة نمضى على الشهادة دى .... يلا مستنين وصفة الحوواشى اللى محصلشى :D

صباح الفل ياشيف الرومانسية ...عود محمود .....(حتقولى مين محمود ..حاقولك ده اخو احمد ..ماهم بيعودوا مع بعض دايما :D )........يعنى هو الواحد مايعرفش يتبحبح بكلمتين كده ..خصوصا مع الناس اللى مش بيتاكل من اكله ؟......ماتسيبنى اتمنظر شوية. :D

طب زى بعضه ...

شوف ياسيدى الفاضل ..انت تجيب الحوواشى وتحشى به العيش ..بس ..وتلزق ورقة مكتوب عليها حوواشى علشان الطعم لو تاه منك ..الناس تعرف هى بتاكل ايه ..وخلاص على كده ..ايه رايك بقى ؟.... :D

طبعا انا مااعرفش اقول مقادير ..انا حاقول وكل واحد يستخدم المقادير حسب الكميات اللى حيستخدمها .....

طبعا بتحضروا اللحمة المفرومة ..ويفضل انها تكون فيها نسبة دهون ....وممكن يتفرم معاها جزء من لية الخروف ....بس انا الحقيقة باعملها حمرا جدا لاننا مش بنحب الدهون خالص........لكن يفضل طبعا انها تكون سمينة شوية او شويتين زى ماتحبوا .......

بتفرموا معاها بصل ..زيادة شوية ..يعنى البصل يكون كتير (وكل ماتكون اللحمة قليلة نظرا للظروف الاقتصادية الطاحنة اللى بتمر بها البلد ) تزودوا فى البصل مش حيخسر ........بعد كده بقى تفرموا كمان كام قرن فلفل ..وده اما حامى او رومى حسب الرغبة طبعا ...وممكن فصين تلاتة ثوم ..بس مش كتير لانه بيضفى نكهة بس المهم مايغيرش الطعم ..(.وممكن تستغنى عنه يااوشا لانى لاحظت ان سيرة الثوم بتستفزك )

وبعدين تجيبوا الكرات ...كرات ايوه مش عارفينه ؟...وده برضه اختيارى ....تغسلوه كويس جدا فى شوية خل طبعا وتشيلوا الجزء اللى تحت ده اللى قافل على بعضه ..وتساوى الحروف اللى فوق ..يعنى تحلقوا له حلقة محترمه ..ويتخرط رفيع بس مش قوى ويتضاف للخليط ....وممكن برضه وده اختيارى جدا ..انكم تفرموا كام ورقة نعناع اخضر مع الخليط ...وتحطوا بقى الملح والفلفل الاسود والبهار ...وفيه انواع بهار كتير جدا للظروف اللى زى دى ....

ممكن ينضاف شوية بابريكا ...ودى اختيارى برضه ....الحقيقة انا فى موضوع التوابل باحط كل اللى ايدى تطوله .....(يعنى الاساس هو وجود اللحمة والبصل والملح والفلف وبعد كده بقى يتضاف اللى تحبوه)

وتقلبوا الخليط ..وتكونوا طبعا محضرين العيش البلدى ...المحسن علشان يتفتح معاكم ومش يلزق فى بعضه .....وتحشوا الخليط بقى وتفردوا بايدكم علشان يتساوى ...وتملوا الحروف لان اللحمة بتكش شوية وبتلا قوا الحروف فاضية ...وتدخلوا الفرن ..اما والعيش مش متغطى ..او تلفوه فى ورق فويل بس ده مش صحى طبعا ...او يتسوى عند الرجل بتاع الحوواشى فى الفرن بتاعه مع جوز جنيهات كده ...وتعملوا جنبه بادنجان مخلل و.بالهنا والشفا........................ :D

تم تعديل 8 أغسطس 2005 بواسطة folana

[Folana]

نجيب البسطرمة ونفرشها فى طاسة مع الزبدة ونفرقع البيض عليها من غير ما نحركة ، بس لازم الزبدة تبقى مغطيى البيض عشان يستوى ورشة جريئة من الفلفل الاسمر ... والملح خفيف ( لان اللحمة او البسطرمة مملحة طبعا طبقا لطريقة العزيز بودا :D ) لما بيستوى على فكرة ممكن نطلعة شبه خرط لان البسطرمة بتلزق فى البيض .. وأهو تجديد :D

<{POST_SNAPBACK}>

العزيز شاعر الرومانسية ....ممكن كمان البيض بالبسطرمة يتعمل من غير عيون ....يعنى تقلب البسطرمة شوية كده فى السمن ..بس مش كتير (على اساس انها لحمة برضه ولازم تستوى شوية )...وبعدين ترب البيض ومعاه الملح والفلف وتيضيفه على البسطرمة ...وتسوى فى قلاية الاومليت اللى هى نصين دى ..يعنى بتسوى على جنبن وبعدين تقلب القلاية الناحية التانية ..ياترى عارف الاختراع ده :D ...اللى بيحصل ان القرص ده وبيكون شكله زى نص القمر ..او بلغة المطبخية على شكل نص رغيف ...بيكون هاش جدا ..زى العجة كده ..وسميك برضه ممكن يتخرط ..وبعد ماتحطه فى الطبق ترش عليه زعتر ناشق ..وممكن ريحان ناشف برضه ...ويبقى بيض بالبسطرمة منمق بالاعشاب العطرة -بلغة الفنادق-........بالمناسبة ..البسطرمة دى عندنا محرمة دوليا ..يعنى جوزى مش ممكن يدخلها البيت ابدبا لاسباب امنية ...بس كان من فترة بيبتاع بسطرمة نعام فى السوبر ماركت ..ومش لاقينها دلوقت خالص ...:مان فيه بسطرمة جملى ...وجوزى بيقول انها اامن شوية من البسطرمة التانية ...على اى حال انا حاجرب البسطرمة البيتى ولو اختفيت تعرفوا بقى اللى جرى لى ............

[bodda]

جربيها يا فلانه هانم

وعلى الاقل هاتبقى عارفة نوع اللحمه اللى استعملتيها

وعلى ضمانتى وسلميلى على الامان الحيوى

مساء الفل

:D

[Osha]

يا صباح الفل والورد عليكم كلكم

طبعا عارفة اني صنفت خلاص ضمن مجرمي الحرب عشان مش بادخل كثير

انا متابعة كل حاجة بس كل ما اجي أشارك الاقي حاجة طلعت لي من تحت الأرض عطلتني او حد دخل على المسنجر واتلهيت في الرغي - معلش اصل الرغي دا مزاج يا باشاوات

فولانة

انا باحب الثوم جدا جدا جدا - لكن حسن ابو علي بيطلع عليا اشاعات مغرضة الهدف منها تشوية صورتي كواحدة من مشجعات الثوم!!! بس زي ما قلت ان الأصل في الحواوشي هو البصل قبل اللحمة - الثوم اصله نكهته قوية جدا وممكن تظهر بشكل اكثر من المطلوب

النصيحة اللي حاقولها دلوقت لمحبي الحواوشي ارجو ان محدش يجربها نظرا لانها غير صحية بالمرة - لكن على الأقل يبقى بيدي لا بيد عمرو

النصيحة هي ورق جرايد يتلف فيه الحواوشي !! خاصة الجمهورية ليها مذاق جميل جدا اكثر من الأهرام والأخبار !!

مش عاوزة حد يرمي طماطم ولا بيض فاسد لو سمحتم - انا نبهت محدش يجربها لكن انا عن نفسي لما كنت باعمل حواوشي كنت باعملها!!

دلوقت يا حضرات اكتشفت ولع جميع من حولي بالباذنجان!! يمكن لانهم باذنجان أصلا!! وقد سمعت عن وجود مسقعة بالمكسرات

ياريت بقى نسمع احلى وصفة مسقعة بالمكسرات وياسلام كده لو فيها باشاميل

وياسلام لو اختراع اتنين ثلاثة باذنجاني شديد اللهجة - نبقى متشكرين جوي جوي

[شاعرالرومانسية]

ياصباح البتنجان... قصدى يا صباح الفل :o

بصى يا ست اوشا ...بما ان سيادتك خطوتك عزيزة :D ... يبقى واجب علينا نلبى طلباتك

وعندك واحد مسقعة وصاية ....

بصى يا ستى ... انتى تجيبى التجان وتقطعية حلقات وتسبية فى مية وملح وتقلية كالمعتاد ..

وتبدأى تعملى العصاج بالطريقة المعتادة .. ( تحمير بصل وعلية اللحم مع اضافة مكسرات مع تحمير البصل ونتبلها ونسيبها لحد ميتها ما تنشف )

نجيب صنية او قالب كبير ونرص حلقات البتجان بالتبادل مع اللحم المفروم بالمكسرات ونختم بطبقة بتنجان طبعا.. ونكون محضرين خليط من عصير الطماطم غليظ القوام ومعاه فصين توم مفريين وملح وفلفل ونصب من جنب القالب لحد ما يغطى البانجان ونقطع حلقات طماطم ونحطها على الوش ونحطها فى الفرن بعد مدة مش طويلة ( بمجرد انه تتشرب وحلقات الطماطم تحمر )....ودى حاجة اولى :D

بصى بقى يا ست الكل ... ممكن بدل حلقات الطماطم تكونى محضرة صلصة بشاميل كالمعتاد وتحطيها على الوش وتحطيها فى الفرن .........دى حاجة تانية ;)

وممكن تكونى مقطعة حلقات بطاطس وقاليها فى الزيت ورصاها مع البتجان واللحم وبعدين الباقى زى ما قلنا ( حلقات طماطم او بشاميل ) ..... ودى حاجة تالتة :blink:

وبكدة يا ستى نبقى قلنالك تلت طرق للبتنجان ،،، ولا حرمنكيش من حاجة :blink:

واى خدمة :D

تم تعديل 9 أغسطس 2005 بواسطة شاعرالرومانسية

[bodda]

الله ينور عليك يا بو على يا جامد :D

وممكن اشارك بصينية بتنجان بالمكسرات اخرى

طبعا تقطيع الباذنجان وتنشيفه بالماء المالح والتحمير ..هوه هواه

يعنى عادى زى ما وصف شاعرنا الجميل

الفرق عندى فى عمل العصاج لوحده :D

واستعمال البندق واللوز وعين الجمل مجروشين انصاف واربع فقط

يعنى بدون تنعيم المكسرات.... تكون واضحه وتحمر فى معلقتين سمن بلدى

وبعد تنزيلهم من على النار مباشرة تضاف كبشة زبيب محترمة وتقلب معاهم

بعد كده موضوع الطبقات المتبادله عادى برضه ثم البشاميل عالوش

وبالف هنا

مساء الفل

;)

تم تعديل 9 أغسطس 2005 بواسطة bodda

[Folana]

جميلة جدا كل طرق الباذنجان دى

بودا..ممكن طريقة عمل الفطير المشلتت؟

بس عايزة طريقة تخليه زى المشلتت الاصلى

:P

[Osha]

عمار يا مطبخنا العزيز

شكرا يا كلكم على الوصفات بتاعة الباذنجان - والله لم اكن اعتقد ان هذا الشئ يمكن ان يتكون منه 3 اصناف

حسن - أثبت كفاءة ياريس

شكرا يا بودا على تفسير قصة المسكرات لاني كنت حافرمها

فولانة - افضل طريقة للفطير المشلتت - برج المنوفية او واحة عمر!!! انا شفت صديقة لي من المنوفية بتعمله وكان جميل وكل حاجة لكن غلبة ومحتاج قنطار سمن بلدي وصبر ايوووووب