اطلب اى وصفه على بالك .. تلاقيها قدامك

[Fencer]

اعزائي الطباخين

تحياتي و احتراماتي لكل وصفاتكم الجميلة و انا شايف الاكلات بتتحدف شمال و يمين و اشي بسطرمة و اشي قرع عسل و الحالة فل

انما انا عايز الحبيب بودا يوصف لي وصفة سوبر للباذنجان المخلل المحبش، و انا واحد من الناس باحب الاكل و بحبه في كامل هيئته سواء من شكل او طعم او رائحة

المطلوب وصفة سوبر للبتنجان المخلل و تكون حراقة شوية و انا مستني

[Folana]

والله ياأوشا عندك حق فى موضوع الفطير ...بس سيبك من برج المنوفيه ...وخشى على قرية الاسد او واحة عمر ...بس انا فيه حاجات كده باحب اعملها لاول واخر مرة ...يعنى وصفة المرة الواحدة ..ومش باكررها تانى ابداااااا حتى اخر العمر.....

[align=center]الباذنجان المخلل[/align]

برضه من غير مقادير ..سامحونى ...المطلوب باذنجان عروس ...وده طبعا معروف ويتغسل ويتسلق بالعرف بتاعه ..او ديله ده الاخضر ..مش عارفه اسمه الحقيقة ....

بعد كده بنشيل العرف ده ونشق الباذنجان بالطول ...خفيف يعنى لانه بيكون مستوى ....

بنحضر الخلطة وهى عبارة عن ثوم وفلفل اخضر حامى ومعاه فلفل احمر احمى منه ...وملح وليمون وشوية خل نونو ..وممكن نضيف كرفس وده اختيارى ...وممكن برضه نبشر واحدة طمام وده اختيارى جدا ..بس نبشرها علشان ماتبقاش عصير ....اما لو الطعم ماكانش حراق بالدرجة المطلوبة يبقى نضيف شوية شطة بقى ...

نحشى الباذنجان ونرصه فى طبق اوسلطانية ...وبعدين باقى الخلطة نقلبها فى شوية عصير ليمون وندلقها على الوش ونحرك شوية كده علشان توصل لتحت ..وممكن ناخد شوية ميه سليق يادوب فنجان يعنى نقلب به باقى الخلطة وندلقهاعلى الطبق ...

ممكن الباذنجان يتقلى بدل السليق ..بس انا مش باحبه مقلى ..يبقى لزمن ..حتما ولابد ..الكل ياكله مسلوق ....

وممكن بالخلطة دى لو كانت كتير ..نحشى بها طماطم ..يعنى نقطع الطماطم اربع ترباع ونحشيها بالخلطة ..وممكن تقطع خيار برضه فى الخلطة دىى ....

اما الوصفة السوبر فانا حاستنى الاخ العزيز بودا علشان اسمعها منه برضه ....انا قلت الحقكم بس لغاية بودا مايرد ......

فيه كمان الباذنجان المحشى عين جمل ...ياريت يابودا تقول على وصفته ...انت عارف انا ماعنديش اكتر من الجمال وعيونها ............. :)

[Fencer]

الاخت العزيزة فلانة

وصفتك جميلة للمخلل و انا باعمل كده تقريبا يعني ساعات اضيف كرفس و ساعات بقدونس لاني احيانا باحس ان الكرفس بيخللي المخلل مايع

لكن ما اريد الاستفسار عنه هو انك قلتي نضيف حبة خل نونو طب ازاي و هو مخلل?? انا باغرق البتنجان في الخل هو ده الفرق بين وصفتك و اللي انا باعمله و كمان انا بافرم الطماطم و يظهر ان ده غلط لانه فعلا بالاقي الخلطة مليانة مية :)

اشكرك على الوصفة الجميلة و هاجرب اني لا افرم الطماطم مع باقي الخلطة

[شاعرالرومانسية]

اية دة ياشباب ..انتوا جيتوا على الالم ..

دة احلى نوع مخلل انا بحبة ( خصوصا جنب البامية والملوخية الخضراء )

بصوا يا حبايبى،،، ;)

الوصفة بتاعة العزيز فنسر والعزيزة فولانة .. بس انا بغير فيها حاجة صغننه وهى ....

انى بحمر البازنجان خفيف خفيف فى الزيت بدلا من سلقة ( مابحبش طعم السليق فى المخللات :D ) بحمر بعد نزع الاعناق لحد ما الاقية عمل شق جدا وفرقع من جنبه :D

ااقوم مطلعه وشقه بالطول ومستقبلة بعصير ليمون واسيبة يتشربة

وبعدين احشية بنفس الحشوة اللى قلتوا عليها وممكن نضيف لها بقدونس مفروم لو حد مش بيحب طعم الكرفس واتوصى بالشطة وطبعا برضة بحط احشيخل زيادة شوية يا عم فنسر ;) ...ولو فضل شوية حشو بعمل بيهم طماطم برضة زى فولانة ( غاغوى تقليد بقى تقولوا اية ... B) )

على فكرة ..فى طريقة تانية هايلة بس تعملوها قبل ما تحبوا تكلوا المخلال بيجى اسبوعين

نجيب البازنجان ( وهنا ممكن نستخدم بازنجان مدور بس نقطعة ترنشات )

المهم .. بعد ما نقطعة ترنشات او لو عروس نشقة بالطول ونرش علية حفنة ملح ونسيبة فى طبق غويط فخار او بايركس ودة لمدة تلت اربع ساعات

ونجيب لتر ميه مع نصف لتر خل ونغلية على النار ..وبعدين نصفى البازنجان من الملح فى المياة بالخل ونسيبة فيها عشر دقائق كدة

ونكون محضرين شرائح فلفل حامى وراس توم مفرية ونحشية بالخلطة ونرصة فى برطمان زجاج ونحط علية شوية من المياه بالخل ونسيبة يتخلل زى الخيار كدة .... وبيطلع يجنن وطعمة كله متبل " مش مكان الحشو بس ..."

وعلى فكرة لوكان ترنشان نرصها فى البرطمان طبقات وبينهم ترنشات الفلفل الحامى وفصوص

توم سليمة

وكدة برضة عندنا تلت انواع باتنجان مخلل ( مسلوق - محمر - مخلل نى )

الحمد لله لسة محافظين على الرقم البازنجانى ;)

وبالهنا والشفا

[Folana]

والله جميلة وجديدة طريقة الباتنجان المخلل دى ياشيف الرومانسية .....المفروض بقى يبقى اسمه بتنجان ثلاثى التخليل ..لان بيطبخ ويتخلل بالتلاتة .....بس برضه ماعرفناش طريقة الباذنجان بالمكسرات ...متهيالى اسمه مكدوس ...مكبوس ..منفوش ..حاجة كده ....هو فعل يعنى بس مش فاكرة اسمه ...انتم عارفين الزهايمر والسن بقى ...

اوشا الحبيبة ......انا قريت رسالتك بس عايزة ارد عليها بضمير وروقان ..مش مطنشة يعنى ...سلامى الحار مؤقتا..... :D

[Folana]

لكن ما اريد الاستفسار عنه هو انك قلتي نضيف حبة خل نونو طب ازاي و هو مخلل?? انا باغرق البتنجان في الخل

السلام عليكم يااخ فنسر ...بالنسبة للخل ...لما بيكون كتير بيدى طعم لاذع ومش لذيذ ..ممكن تستعيض عنه بالليمون ...وبلاش نسميه مخلل .علشان الخل مايرفعش قضية نسب ..ممكن فى الحالة دى نسميه ململن ... :D

[Fencer]

[السلام عليكم يااخ فنسر ...بالنسبة للخل ...لما بيكون كتير بيدى طعم لاذع ومش لذيذ

<{POST_SNAPBACK}>

الاعزاء شاعرنا الرومانسي و اختنا فلانة

واحد قال الخل مع الميه و قالت الاخرى الخل نونو ،كده الرأيين دول لا يدعوا مجالا للشك ان طريقتي اللي هي تغريق الباذنجان في الخل الخالص غلط لان فعلا طعمه لاذع يا فلانة ما اقدرش انكر ، ما هي في رأيكم الطريقة الوسط للحصول على احسن طعم بدون ميمية الخل و لا لملنة البتنجان ;) :D

[Osha]

دي حاجة عظيمة جدا

الأخ حسن أثبت كفاءة باذنجانية لا حدود لها !!

ايه يابني كنت شغال في معمل تخليل !! بس حلوة فكرة الباذنجان اللي جوه البرطمان دا زي الخيار -شكلها كده تستحق التجربة!

فولانة العزيزة

أضحكتني بحكاية الخل النونو وبعده وصف الملمن - صباح الروقان

بس انا قلت لحسام وشهدت معاك ان الخل الكتير بيعمل طعم لاذع - شكل الراجل ده عاوز يحرق قلبي ...بيحط كميات خل عائلية على الباذنجان المقدس بتاعه وبيرفض تماما تدخلي في عملية التخليل بدعوى انه المحترف الأول والأخير

على فكرة الباذنجان المكدوس دا نوع من المقبلات الشامي - ومش بيبقى حلو - بيبقى حاجة في النص طعمه لا محصل باذنجان ولا محصل بقلاوة ..كأنه غراب لبس ريش طاووس

بس الفضول برضه انا كمان عاوزة اعرف بيتعمل ازاي

بودا

ترجع بالسلامة ومستنيين الفيصل في القصة دي

سؤال كمان

هل يمكن عمل رقائق الرقاق في البيت?

نفسي هفتني عليه بقالي كتير ماكلتوش - أصلي كنت معتمدة على ماما عشان هي الي بتعمله - بس عندي معلومة ان فيه ناس بتعمل الرقائق نفسها في البيت

برجاء العلم واتخاذ اللازم والافادة

ودمتم جميعا بود - أعضاء المطبخ الكرام

[Folana]

صباح الفل ياجماعة (لحين عودة بودا بالسلامة)............ :P

واضح جدا اننا كلنا فى المخلل عباسية ..._مع الاعتذار لعبد الوارث عصب-وكلنا فى الباذنجان بتنجان ..........

طبعا مافيش شك ان الخل كتير بيبوظ الطعم ..احنا نحط شوية فى المعقول كده ونكمل ليمون ..الا اذا كان فيه اسباب سياسية ورا استخدامه بشدة ...وفى الحالة دى خدى بالك يااوشا ......

بالنسبة لرقائق الرقاق المرقرقة ..فطبعا ده موضوع صعب للغاية ...ده انتى مش عايزانى اعمل فطير مشلتت تقومى تعملى رقائق الرقاق ...هو هنا على فكرة بيتباع جاهز ..معبأ منه المدور والمربع ....انا باشتريه دلوقت ..مش عارفة ممكن يكون بيتباع عندك فى السوبر ماركت ولا لأ....على اى حال لو عرفتى تجيبيه قولى لى وانا اقولك على طريقته ........ :blink:

[bodda]

يا نهار أبيض ؟؟؟

كل ده بتنجان ؟؟؟؟؟؟؟؟

:P :lol: :blink:

بقى اسيبكم يومين الاقى الموقع قلب بتنجان ؟؟؟

بس بجد الله ينور على الوصفات والاضافات

وماعنديش اللى اضيفه غير ان التوم اساسى فى التخليل

وطبعا كمية الخل او عصير الليمون تكون بالمعقول

يعنى لا نونو خالص يا فلانه

ولا نغرقها خل يا حسام

خير الامور الخل الوسط :D

صباح الفل

:P

[bodda]

المكدوس احد روائع المطبخ السورى الحبيب

وهو بيتعمل اساسا للخزين والاستعمال طول السنة

المكدوس

نستعمل باذنجان عروسى اسود صغير جدا

يعنى اصغر مقاس يمكن نلاقيه فى السوق

ولازم نجيب كمية حوالى 3-4 كيلو لان عمايله طويله

ويتشق الباذنجان من الجانب ونحط رشة ملح بسيطة جواه

ونحطة فى مصفاه كبيرة طبقات على بعض وعليهم طبق وتقل علية

تانى يوم يكون صفى الميه اللى فيه ( 24 ساعه على الاقل )

نيجى بقى نحضر خلطة من كيلو عين جمل مفرى وربع كيلو فصوص توم

وملح وفلفل وعصير 10 ليمونات مصفى

ونحشى الواحدات بالخلطة دى ونرص فى برطمان تخليل كبير بفتحة واسعة

المهم نرص بضغط طبقة ورا طبقة مع رشة زيت زيتون بين الطبقات

لغاية ما نخلص الكمية عند فتحة البرطمان

ونحط تقل على الباذنجان ونسيبه يوم تانى

ونصفى المية اللى هاتنزل منه

ونصب زيت زيتون بالراحة لغاية ما يغطى المكدوس

ونكشف عليه بعد 3 ايام ونكمل الزيت

وغالبا يمكن نحتاج مره تانيه بعد اسبوع لغاية ما نلاقى الزيت لا ينقص

ونقفل عليه ويتخزن وممكن يستعمل بعد شهر من عمايله

بس بصراحة يستاهل التعب

وبالف هنا

صباح الفل

:P

[Folana]

السلام عليكم ورحمة الله وبركاته

ايوه كده يابودا نورت المطبخ ...لا اقفل الله لك مطبخا......

انت عارف بقى المثل بيقول ان غاب الشيف اتخلل يابتنجان

متشكرة على طريقة المكدوس انا حاقوم حالا اجربه

الاخ العزيز فنسر......انا متهيالى انت عايز يكون فى البتنجان شوية مرقة للسأسأة مش كده ؟...اعتقد ان دى ممكن تتوفر عن طريق جزء من مية السليق وتضيف لها جزء من الخلطة ..مع عصير ليمون وممكن تبشر الطماطم فوق الوش ..بدل ماتضيفها للخلطة ..وارحم فؤاد المسكينة اوشا من الخل..انا عرفت يااوشا انت دمك حامى ليه ..من كتر شرب الخل اللى فى البتنجان ...وبكده بقى نبقى استوفينا موضوع البتنجان حقه ..ومادام بودا عاد سالما غانما نسمع باقى الوصفات الحلوة ........

اوشا الحبيبة انا رديت على رسالتك بوضوع انشا كده طويل شوية ارجو انه يكون وصل .............. :P

[Fencer]

الاخت الكريمة فلانة

اشكرك على حرصك الشديد على صحة مراة حظرتنا و اوعدك ان شاء الله اني اعمل بنصيحتك في حكاية مية السليق و الليمون و الخل برضه

و سأوافيكي بالنتيجة ان شاء الله

[Osha]

بسم الله الرحمن الرحيم

اخواني في الباذنجان ...قصدي في المطبخ

أولا - شكرا لك يا فولانة على خوفك عليا واديك عرفت اللي فيها لوحدك - كل يوم خل وتوم في الباذنجان لما بقى دمي حامي وقلبي اتحرق

ثانيا - لم تصلني رسالة زي ما قلت - يبدو انها ضلت طريقها في غمرة الخل والثوم

ثالثا - قررت انا اعمل الباذنجان حرصا على صحتي العامة وحرقة قلبي

رابعا - بودا انا شميت ريحة طناش واضح ومتعمد وشديد اللهجة لرقائق الرقاق!!!

[bodda]

العزيزه اوشا

طبعا ولا طناش ولا حاجه

بس طلبك سهل الشرح صعب التوضيح نظريا

انما نحاول :)

الرقاق

كيلو دقيق مع معلقة صغيرة خميرة جافة فى شوية ميه بسكر

مع 3 معالق كبار سمن و معلقة صغيرة ملح

ونعجن بماء دافى بسيط لغاية العجينة ما تسيب الايد

لغاية هنا عادى وهاتبقى عجينه وشها مزيت يعنى بتلمع

نقطعها حتت قد كورة التنس ونرصها فى صينية ونسيبها ساعتين

بعد كده .... وهنا المشكله :)

يكون عندنا سطح املس سخن جدا للخبيز

وهاقولك على اللى كنت باعمله فى امريكا من غير ما تضحكى

جبت قصعة حديد من بتوع المونه ( الاسمنت والرمل وخلافه )

وقلبتها على العين الكبيرة فى البوتاجاز بس محمل أطرافها على خشبتين

وطبعا كنت غسلت القبه بتاعتها كويس

متخيله ... يعنى بقت زى قبة الجامع فوق البوتاجاز

بعد كده نفرد حتة العجينة بالنشابه ( العصايه المدورة) على رخامه مدهونة زيت

ونفرد على قد ما نقدر علشان تكون رقيقة بقدر الامكان

ونشيل الرقاقة دى ونرميها عالقصعة السخنه

هاتستوى فى اقل من دقيقة ونقلبها بخفة ودلع مره واحده

واللى بعدها ... وهكذا ;)

كده بقى عندك رقاق 100%

وبألف هنا وشفا

مساء الفل

:wub:

[wagdi]

بسم الله الرحمن الرحيم...

الأخوة الأعزاء...

قررت حكومتنا الرشيدة العودة للمطبخ بعد مقاطعة دامت شهرين من يوم سد الحنك... وقد قررت أن تستهل عودتها الميمونة بحاجة إسمها الكمونية...ولأن المشكلة الأبدية هي أنها لا تعرف وصفتها...فأنا قلت أسألكوا يا أهل الخير تدلوني على وصفة المدعوة "كمونية"...

بس لو كانت من عينة سد الحنك..مش عايزها... :)

[Osha]

العزيز بودا

شكرا على التوضيح - بالنسبة للسطح الساخن اللي عامل زي القبة - فأنا وجدت هنا في المحل الهندي حاجة عاملة زي المسطح المدور الكبير قوي بدون جوانب عالية - يعني مجرد سطح مستوي ولكنه مقعر قليلا جدا وليس مثل الحلل او طاسات القلية - وقد عرفت من صديقتي النيباليه انهم يستخدموه في عمل بعض الرقائق وبيطلقوا عليها عيش - هي مش عيش لكن هي زي العيش البوري بتاع تكا انما مش منفوش

أعتقد دي تصلح - عامة حين أجربها سوف أواليك بالنتيجة - انا طبعا حاقلبها على وشها عشان تاخد الشكل المحدب

بمناسبة عيش تكا - عندك فكرة بيتعمل ازاي??

الأخ وجدي

انا باعمل كمونية حلوة - لكن حاستنى لما ييجي بودا عشان اخد الوصفة التمام وماحرجش روحي

[شاعرالرومانسية]

اهلا بيك يا استاذ وجدى ،،،

بص يا سيدى انا اعرف كمونيتين ..( يعنى اتنين كمونية :) )

هما الاتنين قريبين من بعض ...

انت تجيب نص كيلو لحم ضانى وخمس ست فصوص توم مفرىيين ومعلقتين كمون ناعم

ونجيب معلقتين سمنه ونحط فص مستكة ونشوح قطع اللحم خفيف ونضيف التوم المفروم ونقلب لحد التوم ما يصفر وبعدين نضيف الكمون ونقلب الخليط وبعدين نضيف كوبيتين شوربة ونتبل الخليط ونسيبة على النار حتى الغليان وبعدين نوطى النار حتى نضج اللحمة ..حوالى ساعة

بص ياعم الشباب .. دى طريقة ، اما الطريقة التانية انك تعمل تخديعة عادية بالتوم زى اى خضار نجيب معلقتين سمن ونحمر فيهم التوم حتى الاصفرار ونحط عليهم طماطم مبشورة لحد ما تتسبك وبعد كدة نضيف اللحم بعد تشويحة فى السمن ونحط الكمون ونضيف الشوربة ونكمل عادى

وممكن بدل اللحم الضانى لحم بتلو .. وممكن كمان فشة ( رئة العجل ) بس نسلقها الاول

ومع ارز ابيض وسلطة خضراء و... بالهنا :)

[bodda]

العزيز وجدى

ابسط يا عم كمونيتين عجب من شاعرنا الهمام

بس فعلا باللحم الضانى تفرق كتييييير

:blush:

العزيزة اوشا

العيش البورى بتاع تكا ده مقلى فى الزيت وبيبقى تقيل فى الهضم اوى

بس طبعا هايل للرجيم العكسى

:lol:

صباح الفل

:wub:

[Folana]

السلام عليكم ورحمة الله .........

اوشا العزيزة ..متهيالى القبة اللى بتقولى عليها دى ..بيتعمل عليها عيش اسمه تمييز ...زى اللى فى السعودية والله اعلم .......بس وحياتك تجربى موضوع الرقاق وتقولى لنا عليه ......(ياترى المكتوب وصلك ولا لسه ...ده انا كاتبة فيه كتابة ....)........

الاخ العزيز بودا .........نورت المنطقة ...انا قلت اوفر غاز ومونة لغاية ماترجع بالسلامة ..يعنى قفلت باب المطبخ لحين عودتك .....كنت عايزة اعرف طريقة عمل السليزونات ....وعندك كمان واحد طلب عن طريقة عمل الايس كريم باكيكة السخنة ...وصلحه ....انا عارفة اسمها بس صدقنى الذاكرة عندى مش ولابد شوية .....انا اكلتها بره هى حتة كيكة مدورة سخنة وعليها بولة ايس كريم ...عرفتها؟.....

عندك كمان واحد طلب عن طريقة عمل النجرسكو ..بس ازاى تطلع زى اللى بناكلها بره وندفع فيها كل نفيس وغالى ؟....يعنى بتكون سايحة كده ومش زى المكرونة بالبشمايل ...ازاى بقى هه..هه؟............... :blush: