اطلب اى وصفه على بالك .. تلاقيها قدامك

[Folana]

النهاردة المطبخ اجازة ياجماعة .......علشان فيه مناسبة وطنية عزيزة علينا ..الا وهى عيد ميلاد الاخت الحبيبة المختفية ....

اوشـــــــــــــــــــــــــــــا

كـــــــــــل سنة وانت طيبـــــــــــــــــــــــــــــــــــــــة يا اوش اوش

:angry2: :blush: :ph34r: (وش على شكل تورتاية كبيرة)

[شاعرالرومانسية]

عيد ميلاد سعيد يا ست الكل،،،

وعقبال يارب مائة سنة كلها صحة وستر ان شاء الله :angry2:

وماتنسيش زى ما قلتلك ... نصيبى فى التورتاية :blush:

وكل عام وجميع افراد الاسرة الكريمة فى اسعد حال ،،،

[Osha]

انا متشكرة ليكم والله - انا بجد حاسة اني بين اهلي وسعيدة جدا بكده

والله انا مش مختفية - المدارس دخلت هنا الاثنين اللي فات - وطبعا مش حافسر واقول ماذا تعني كلمة المدارس - ماهو انتم كلكم لسه اكثر من شهر على دخول المدارس عندكم - ياااااااااااااااابختكم

انا باقول نستنى بودا يعمل لنا تورتاية بالمناسبة الحلوة دي

واهو يبقى زيتنا في دقيقنا ولا الحوجة للمحلات

:angry2: :blush: :ph34r:

[bodda]

العزيزه الغاليه بالدولار والاسترلينى أوشا

كل سنه وانتى اوشا

كل سنه وانتى وسطينا

كل سنه وانتى منورة بيتك

وسنة حلوه يا جميل ... بعد اذنك يا حسام النهارده عيد

:angry2: :blush: :ph34r:

اما التورته فاهقول لكم على وصفة سهله جدا

عندكم وصفة الكيكة الاسفنجية

استبدلوا نص الدقيق ببودرة عين الجمل

يعنى نطحن عين جمل ويتهز من الغربال علشان يخلط بالدقيق

وهاتدعولى

صباح الفل

:excl:

[Osha]

وانت طيب يا استاذنا

بس

بس

بس

انا مش باحب عين الجمل - اعمل ايه ??

عارفة انك زهقت مني - لكن انا قلت لك سلفا اني مش باحب عبن الجمل

اتصرف شوف لي حل تاني

[bodda]

العزيزه اوشا

اللى مش ممكن ازهق منها ولا من جوزها ولا عيالها .. فيه حد تانى ؟؟؟

بلاها عين جمل

استعملى لوز محمص مفروم بعد تقشيره

-

-

-

-

-

-

-

-

-

-

-

-

-

-بس ابقى حطى ريحة عين الجمل

:angry: :angry: :blink:

صباح الفل

:blink:

[Reham]

عوده مره اخري من الاراضي السعوديه لمواصلة الارسال

بعد التحيه والسلام واللذي منه

احب اقولك يا بودا وانصحك نصيحه لوجه الله تعالي

وانت طبعا حررررررررر

عايزه اقولك ان البت اوشا دي متعبه في كل حاجه يعني ان طاوعتها مش هتخلص من زنها

يعني في حد في العالم ما بيحبش الموز؟؟؟؟؟؟؟؟؟؟؟؟؟؟

العزيزه ازشا مابتحبوش تصوروا معايا

المهم دلوقتي انا عايزه حد ينصحني

اعمل ايه في الملابس الجديده الملونه اللي بتبهت علي بعضها من اول غسله

مع اني مش بغسلها في ميه ساخنه ولا حاجه

بس مش عارفه ليه الالوان كلها بتيجي علي بعضها ولما اغسلها تاني بتثبت

حاجه مزعجه جدا

افيدوني افادكم الله

[Osha]

عوده مره اخري من الاراضي السعوديه لمواصلة الارسال

بعد التحيه والسلام واللذي منه

احب اقولك يا بودا وانصحك نصيحه لوجه الله تعالي

وانت طبعا حررررررررر

عايزه اقولك ان البت اوشا دي متعبه في كل حاجه يعني ان طاوعتها مش هتخلص من زنها

يعني في حد في العالم ما بيحبش الموز؟؟؟؟؟؟؟؟؟؟؟؟؟؟

العزيزه ازشا مابتحبوش تصوروا معايا

المهم دلوقتي انا عايزه حد ينصحني

اعمل ايه في الملابس الجديده الملونه اللي بتبهت علي بعضها من اول غسله

مع اني مش بغسلها في ميه ساخنه ولا حاجه

بس مش عارفه ليه الالوان كلها بتيجي علي بعضها ولما اغسلها تاني بتثبت

حاجه مزعجه جدا

افيدوني افادكم الله

<{POST_SNAPBACK}>

الله يكسفك يا ريهام - هو لازم الفضايح

لعلمك بودا عارف اني مش باحب نصف الحاجة وباشاور عقلي في النص التاني

وبعدين انا مش باحب الفاكهة عشان باكل شيكولاتة ومدمنة وكل المدمنين مش الأكيلة بتوع الشيكولاتة عندهم نفس المشكلة - لا فاكهة ولاشاي ولا قهوة

بالنسبة للملابس الملونة - تاريخك فيها اسود يا رورو وبلاش فضايح - انا مش حاعمل زيك

ممكن تأجري حد يغسل لك كل حتة لوحدها عشان اللون يثبت الأول وبعدين ابقي اغسليهم مع بعضيهم

أو ممكن تشتري للعيال هدوم كلها لون واحد وخلاص على كده

أو ريحي نفسك ولبسيهم بيجامات كستور على طول وبلاش وجع دماغ

حسام بيقولك اشتري ماركات عدلة وبلاش استخسار

انا ماليش دعوة - منك ليه

[bodda]

:closedeyes: :angry2: :D

:wub:

[Folana]

الاخ العزيز بودا.............مش فاهمة!!!!!!!!!!!!!!!!!!!!

انت حالف ماترد علينا :angry2: ....وبعدين الاخت العزيزة ريهام رجعت بالسلامة ..مافيش حتى كل سنة وانت طيبة علة سلامة الوصول ...!....

الاخت العزيزة ريهام ....حمدلله على سلامة الوصول ومرحبا بعودتك مرة اخرى ...انا سمعت عنك كل خير من الاخت اوشا وكنت مستنية انضمامك لنا من جديد...بس الحقيقة موضوع بهتان الهدوم ده اول مرة اعرفه عنك ... :closedeyes:

شوفى ياستى ..اذا الهدوم بهتت منك من اول غسلة ..ومنها فيها ..يعنى بدون تدخل كيمائى منك ..يبقى لازم ترجعيها المحل فورا ..وحتدخلى طبعا فى مناقشات معاهم وهم يقولوا محدش اشتكى غيرك بس تصرى على موقفك ....والاخ حسام عنده حق بنسبة كبيرة بس والله فيه برضه ملابس غالية وبتتعرض للبهتان كده ...يظهر يااوشا انكم ماجربتوش الملابس المصرية .....

انا بالنسبة لى ...الحقيقة جوزى اشترى نفسه وربنا نجده منى وبقى يغسل هدومه بره فى اللوندرى ..حيث انى متخصصة برضه فى تبهيت الهدوم ..اما ولادى فمرة يلاقوا البنطلون الابيض بقى بنفسجى ..اقولهم ومالواكانى اشتريت لكم واحد جديد ..وهكذا ..مشى حالك ........... :D

[bodda]

اولا الف حمدا لله على عودتك بالسلامه يا ريهام :D

ده اولا وبكل وضوح يا فلانه هانم وبلاش شغل تهدية النفوس دى

:)

ايه اللى حصل ؟؟؟؟

انا داخل عالمطبخ لقيته قلب غسيل وعصر ونشر ..

:lol:

طبعا حسام صح بالاضافة لان مفروض تغسل الالوان المتشابهه مع بعضها

متهيألى دى أ ب الموضوع

وبلاش افتى اكتر من كده احسن يظهر الجهل والتعمية فى المسألة الغسيلية

:wub:

ومش ناسى الساليزونات يا فلانه هانم والله

صباح الفل

:wub:

[bodda]

انا عمال ادور على طريقة اشرح بيها عمل عجينة الساليزون

لانها من أصعب المخبوزات لطول فترة الاعدد وهد الحيل

لكن هاحاول :)

عجينة الساليزون

2 ونص كيلو دقيق

3 كوبايات ماء

نص كيلو زبده

3 معالق كبيره ملح

8 بيضات

كل ده يتحط فى العجانه ويتعجن مع بعضه كويس

هايدى عجينة متماسكة حوالى 3 كيلو

نقسمها نصين

كل نص نفرده كويس ونحط وسطه نص كيلو زبده تانى

بس الزبده لازم تكون متماسكه من التلاجة وتفرد لوحدها وبعدين نحطها

ونطبق على الزبده أطراف العجين من الاركان

وتفرد تانى ( كل ده باستعمال النشابه والعضلات :lol: )

نكرر تلات مرات التطبيق والفرد

ثم توضع بالتلاجة لتانى يوم ويكرر الفرد والتطبيق 3 مرات برضه

وتعاد للتلاجة لليوم التالى وهكذا

يعنى تاخد 3 ايام للانتهاء منها

بعد كده تقسم لاى اشكال قبل الخبز وتوضع الاضافات

ومنها اضافات تدخل الفرن واضافات تانيه بعد الخروج من الفرن

واذا كان الموضوع لغاية كده ممكن تعمليه قولى ونكمل وصف الاضافات

:wub:

صباح الفل

:wub:

تم تعديل 21 أغسطس 2005 بواسطة bodda

[Folana]

السلام عليكم ورحمة الله وبركاته .....

حمدلله على السلامة يااخ بودا .........مادام انت مش موجود ومافيش وصفات حنقلبها غسيل طبعا امال نعمل ايه بقى ........

الاخ العزيز شاعر الرومانسية ...بقالك كتير ماشرفتش المطبخ ..عايزين نطمئن عليك......

اوشا الحبوبة ........وحشتينا ...بس ربنا يقويك .........

الاخ العزيز بودا ..........

شكرا على طريقة الساليزون ...اللى وصفتها بعد ماجت لى حالة نفسية وحسيت بالاضطهاد منك لانك طنشت كل الطلبات بتاعتى ...... :wub:

هى فعلا طريقة صعبة بس طبعا حاعملها .....وحاقولك على اللى جرى بعد كده ...

بالنسبة للسينابون ....انا عملته بالطريقة بتاعتك ..بس حصل شىء لاتحمد عقباه .....سيادتك قلت نسيبه فى الفرن 25 دقيقة ..بس بعد المدة دى كان له ابيض زى ماهو ...فانا تطوعت باضافة عشر دقايق كمان ...فتحول الى اللون البنى :D...بمعنى انه كان حيتحرق ...بس لحقته ...المشكلة ايه بقى ....انه كان لازق فى بعضه يعنى اللفة نفسها مش منفصلة عن بعضها بيسموها تقريبا مش مورقة ....ومش عارفة ايه السبب ...هل العجينة تكون فشلت حيث انى اضفت عليها زبادى ولا الخميرة قليلة ولا انا السبب ...

هو طعمه كان سينابون طبعا ..ولو ان اولادى كان لهم رأى تانى خالص..بس انا قلت لهم مش فيه طعم القرفة ..قالوا وهم بيرتعدوا ايوه يامامى ..قلت لهم خلاص يبقى سينابون :wub: :) :lol:

ياريت تدلنى على الطريقة المثلى اللى تخليه ينجح احسن شكلى بقى وحش خالص.........

[bodda]

العزيزه فلانه هانم

بزمتك انا قلت زبادى فى السينابون ؟؟؟

اتحملى نتيجة اختراعاتك

ثانيا : لازم تكون الخميره طازه

وتتساب مع مية دافية وسكر مش اقل من نص ساعه

ومتهيألى الباقى واضح

لان لزقها وعدم انتفاشها بيكون بسبب اما الخميره وحشه( كانت مخزونه غلط)

وممكن واسلم تستعملى خميرة بيره بتاعة المخبز بس ضعف كمية الجافة

او إما ما أخدتش وقت كفايه فى السكر والمية الدافيه لتنشيطها

جربى ومستنى طبق مع كوباية شاى

صباح الفل

:)

[bodda]

فلانه هانم

يعنى فضحتينا فى التاخير بالوصفه

ولما اتكتبت لا حس ولا خبر :wub:

وبالمره لو شوفتى اوشا ابقى سلمى عليها وقوليلها زورونا ولو مره

صباح الفل

:)

[Folana]

السلام عليكم ورحمة الله وبركاته ....

تشكرات ..تشكرات ...حضرة بودا افنظم ....انا طبعت الوصفة طبعا ..بس مستنية كده شوية على ماتفرج وابدأ العجن تانى ... :wub:

بس انت ناسى النجرسكو ..معلش انا طماعة شوية ..حتقولى يعنى هى حتفرج على النجرسكو ..حاقولك انشاء الله ..اصل انا شفت من يومين جوز فراخ بيتمشوا عند جارتى ..ومحتاريين مش عارفين يروحوا فين ....وانت عارف بقى الجيران لبعضها :) :)

الاخت العزيزة اوشا ...انطبق عليها المثل اللى بيقول من لقى احبابه نسى طباخينه ..وهى مش ساعة مااتلم شملها على حبيبتها ريهام ..ماحدش شافها ..اللهم لا حسد ..بس نظرة ياست يعنى مش كده .....

ولا استغنيتى عن وصفاتنا ..ولا حرمتى تعمليها :D

[se_ Elsyed]

أحب ألفت إنتباه الأخوة مرتادي المطبخ إنهم كده مخرمين على أوضة الغسيل .. وأنا شايف من بعيد بودا رابط الجلابية حوالين وسطه وحاطط مشابك غسيل في بؤه وقاعد على طشت الغسيل في حين إن أوراق تعيينه وسيرته الذاتية بتقول إنه طباخ مش غسالة بالكهربا ...

[Folana]

[

الحقيقة يااخ س-س ..احنا بناخد فومين كده على بال الاكل مايستوى :wub: ...وبعدين بودا مظلوم فى الموضوع ده ...الاخت ريهام هى اللى فتحت الغسالة ومشيت ماحدش سمع عنها حاجة تانى .....والصراحة احنا مستنين نشترى لحمة وبعدين نرجع نطبخ تانى ..السماح بقى ......... :)

[Osha]

وماله يعني لما ناخد الغسيل فومين لغاية لما تيجي فلوس نشتري لحمة??

على فكرة انا موجودة ومتابعة كل حاجة - والله المدرسة طلعت روحي وكمان العيال لازقين في الاجازة ومش مقتنعين بانهم دخلوا المدرسة !!! عيال خونة

احم احم احم

العزيز بودا

برجاء الاحاطة بأنه قد نما الى علمنا وقد جربنا بأنفسنا فطير السبانخ عند الأخوة الفلسطينين وقد أعجبتني جدا

أعلم جيدا الفطير وطريقة عمله - ولكن الحشو نفسه بيتعمل ازاي

أعلم ان السماق يستخدم فيه - لكن ازاي ???ماعرفش

وكمان أريد معرفة هل يستخدم السماق في تتبيل الفراخ للشوي وماهي يمكن أن تكون استخداماته الأخرى

برجاء العلم والاحاطة واتخاذ اللازم والافادة

*معلش أصل شغل البنوك وحشني

[se_ Elsyed]

برجاء الاحاطة بأنه قد نما الى علمنا وقد جربنا بأنفسنا فطير السبانخ عند الأخوة الفلسطينين وقد أعجبتني جدا

أعلم جيدا الفطير وطريقة عمله - ولكن الحشو نفسه بيتعمل ازاي

هل تقصدين بذلك المعجنات المحشيه ومنها السبانخ ؟

بصراحة زوجتي إتعملت من الأخوه الشواك طريقة عمل المعجنات من ساعة ما جت السعودية وأصبحت مدمن .. وخصوصاً السبانخ لإني أساساً بأحبها - السبانخ طبعاً - ويا سلام بقى لما بيتعصر عليها ليمون وإحنا بنحضر الحشو وبيبقى طعمها فيها مزازه لذيذة وإنتي بتهبري الفطيرة .... أممممممممممممممم