اطلب اى وصفه على بالك .. تلاقيها قدامك

[bodda]

ايه يا عم سى السيد !!!

هوه انت خرمت على السطوح و حبل الغسيل ؟؟؟

يظهر ان عندك ميول تنظيفية قوية

لان من زمان ماسمعناش صوتك الا لما العالم هنا جابوا الطشت

:wub: :wub: :D

أما موضوع الليمون فى السبانخ فطبعا لذيذ

لكن لو جربت السماق بيدى نفس مزازة الليمون بس بطعم احلى بكتير

:D

منوره يا اوشا وربنا يقويكى على حبايبنا الحلوين

بس برضه بلاش الطناش ده

اما فلانه هانم افنظم اوغلو أغا :D

مافيش طناش بالمره لان النجرسكو مكتوبه هنا قبل كده

بس طبعا مش عارف فين .. ولو مش لاقاياها اكتبهالك تانى

موضوع الفطير المحشى سبانخ ده لذيذ جدا

وطالما عارفة العجينة كنتى كتبتيها للاصدقاء

انما الحشو عبارة عن سبانخ مسلوقه مع بصل وملح وفلفل وتتصفى

ويترش عليها السماق وده بيدى لون احمر شويه ومزازة تشبه لليمون

ويستعمل فى تتبيل الفراخ للشوى ولعمل لحمه تشبه الكباب حله المصرى

بس بيبقى لونه بنى محمر شويه ;) والطعم مختلف

بس المشكله انك تلاقى فى مصر سماق طازة لقلة الطلب عليه

انا عن نفسى باوصى عليه اصدقائى من سوريا لاحضاره معاهم

لانه هناك اساسى فى المطبخ وله شكلين بلونين مختلفين

وصباح الفل

:D

تم تعديل 23 أغسطس 2005 بواسطة bodda

[se_ Elsyed]

ايه يا عم سى السيد !!!

أما موضوع الليمون فى السبانخ فطبعا لذيذ

لكن لو جربت السماق بيدى نفس مزازة الليمون بس بطعم احلى بكتير

:wub:

:D

<{POST_SNAPBACK}>

بيحصل يا باشا ... السماق متوافر هنا بكثرة وبأنواع جيده جداً .. حاكم أخوك كان بيشيل حديد زمان فتلاقيني غاوي أكل أي حاجة فيها حديد ..

على فكرة .. في ناس كثير جداً ما بتحبش أكل السبانخ .. فتلاقيني لما أعرف المعلومة دي عن إنسان بأقوم حطه في البلاك ليست على طول ... كله إلا السبانخ والمناجه والحواوشي ( ده أنا ضربت كمية حواوشي في الإجازة ... إوعى وشك ...

[bodda]

بس خللى بالك ان بالرغم من ان السبانخ غنيه بالحديد

ولكن فى صوره لا يمكن امتصاصها للجسم البشرى

معلومه عالماشى واتاكد منها بسهولة على النت

واذا كنت عايز حديد سهل الامتصاص ففى الطماطم والفلفل

صباح الفل

:D

[شاعرالرومانسية]

اهلا بالشبيبة :D

se_ Elsyed ،،،العائد من بعد غيبة

اشجعك على المانجة والحوواشى ... بس السباااااااااانخ يععععععععع انا كنت متضايق انى مش بحبها عشان الحديد اللى فيها .. اخونا بودا ا :wub: هو قاللنا معلومة جنان تخلينى مازعلشى :D

وبعدين ياعم مش كنت تقول انك نازل مصر ... كنت عرفتك على واحد بيعمل حوواوشى مالوش حل فى مصرالجديدة... ومش حتوعى وشك بس بقى .. حتوعى صواااااااابعك :D

عزيزى بودا .. احيات ابوك توصيلى على شوية سماق معاك من سوريا :wub:

[bodda]

اى أوامر يا ابو على

اى سماق هايوصل من عند الحبايب هايكون بالنص

صباح الفل

:)

[Folana]

[quote=

موضوع الفطير المحشى سبانخ ده لذيذ جدا

وطالما عارفة العجينة كنتى كتبتيها للاصدقاء

انما الحشو عبارة عن سبانخ مسلوقه مع بصل وملح وفلفل وتتصفى>>>

فعلا يااوشا عايزين نعرف العجينة ..بس بسرعة واانا حاطة الماجور كده ........بودا ...ياترى البصل اللى مع السبانخ ده بيكون صاحى ؟...يعنى اقصد مش نقلبه شوية على النار لحد مايهمد ؟...ومش ممكن كمان يتقطع حلقات ونبشر جزراية ..ونقلبهم على النار فى شوية سمن او زيت نونو لحد ماالروح تطلع منهم بس من غير ماياخدوا لون ..وبعد كده نقلبهم على السبانخ ..ونحشى ؟ ومش ممكن نضيف شوية صويا صوصو ..وتبقى فطائر صينى ..؟..ممكن ولا مش ممكن ؟؟

وممكن نحشى بها الجلاش صوابع ونقليها ..بالنسبة للسماق يااوشا اذا حتستخدميه ابقى خلى بالك من ظبطة الملح بقى علشان الطعم مايضربش معاك ...انا باحبه جدا وخصوصا على الزعتر ....وهو موجود طبعا فى البلاد العربية ...ماعدا مصر المنحوسة ...اقصد المحروسة ..بس انا متعشمة ان الصين تصنعه وتصدره لنا قريب من ضمن يعنى ..........

شاعر الرومانسية ..انت بتاكل حوواشى من السوق؟؟؟؟؟؟؟؟؟....انت مش عارف بيتعمل ازاى ؟..وبعدين هو باب النجار مخلع ولا ايه ....قلت لى اسمه ايه المحل ده ؟؟ :)

[Folana]

[ALIGN=center]يا خبر ابيض :blink

1- أُذكر طريقة للكنافة غير بتاعتنا في مصر؟؟؟؟؟؟

الكنافه الحادقه مش واردة خالص لسبب بسيط

وهو ان طبيعتها الشعرية لا يمسكها الا العسل

ومش معقول هانحشيها حادق ونسقيها عسل

السلام عليكم ورحمة الله ........

الاخ العزيز جدا ..بودا ..استاذنا وعمنا ماحدش يقدر يتكلم .....بقى انا كنت باعمل بوصيتك وبادور على طريقة النجرسكو ...ووقع فى ايدى موضوع الكنافة الحادقة ...واناا لى بس ملاحظة صغننه ..صغننه..نونو خالص..لو مش حيضايق سعادتك يعنى .....

الاخ الفاضل س- س ..

اسمع كلامى وانت تكسب ...ممكن تاكل كنافة حادقة زى ماانت عايز .........

اسمع ياسيدى ...انت حتجيب الكنافة وتقطعها حتت بايدك يعنى تنتشها كده ..وبعدين تقلبها على النار فى شوية سمن بلدى ...(وممكن تلغى الطريقة دى لو مش عايزها دسمة يعنى ..)..وبعدين ترص نصها فى الصينية عادى خالص وتكبس عليها بايدك لما تقطع النفس ..وبعدين ممكن تحشيها من النص لحمة مفرومة معصجة وتحط النص الباقى للكنافة ..وتضغط برضه عليها جامد وتساويها ..وبعدين شوف بقى انت بتسّويها فى الفرن ولا على النار من فوق ..واذا كان من فوق يبقى لازم تتقلب طبعا على الوش التانى ..خلاص كده؟...لما تستوى بقى ..يكون سعادتك سالق بطة محترمة ..او لحمة او فراخ حسب الامكانيات ..وتاخد الشوربة تسقى بها صينية الكنافة ..وكل وادعى لى ...

ولو عايز تحشيها جبنة ..يبقى مافيش غير الجبنة الريكوتا ..هى دى انسب حاجة ..وممكن تسيقها عسل خفيف وهى محشية بالريكوتا دى ...والحقيقة مش عارفة ممكن تتسقى شوربة ولا لأ على العموم رمضان قرب وجرب ..وكل سنة وانتم طيبيبن ...........

بودا العزيز ....

المقامات محفوظة سعادتك ..بس انا جربت الكنافة الحادقة ولما قريت الموضوع قلت اقول تجربتى يمكن تعجب...السماح بقى ..مش حاعمل كده تانى ......... :)

[Osha]

صباح الخير يا حلوين

ازيكم كلكم

شكرا على وصفات السماق - بس ايه هي اللحمة اللي شبه كباب الحلة? برضه للمعلومية يعني

شكرا يافولانة على حكاية تذكيري بضبطه الملح - اصلي يا اما ايدي فرطة او يطلع الاكل دلع ومالوش طعم

حسسسسسسسسن - حواوشي من الشارع يا حسن!!!

طيب اذا كان قصدك الراجل اللي في ميدان الجامع يبقى الجزار بتاع السجق ادامه على طول

اما لو كان الراجل اللي في الحجاز - ابقى ساعتها افتكرني لما تيجي تاكل!!!

عجينة فطير السبانخ زي عجينة البيتزا

3 كوب دقيق

وبعدين نحط في الخلاط - كوب ماء دافئ مع 3 ملاعق نيدو وملعقة خميرة بيرة جافة وبيضة - اختياري - وملح وفلفل وفتفوتة سكر عشان الخميرة - و3 ارباع كوب زيت ذرة

يضربوا في الخلاط ضربا مبرحا حتى الاستغاثة

ثم يصبوا بالتدريج على أكواب الدقيق حتى نحصل على العجينة متماسكة

ونسيبها تخمر وابقى ادعي لي

[Reham]

مسااااااااااااااااااء الخير علي احسن شباااااااااااااااااااب في مصر كلااااااااااااااتها

احب اقولكم جميعا انني زعلانه منكم جدا جدا

ومتهيألي مخرجتش من ملة المسلمين لما سألتكم علي بهتان الهدوم

ومفيش بيت فيكي يامصر مابهتتش فيه الهدوم

وده مالوش دعوه بسعر الهدوم لاني اكتشفت ان الهدوم الغاليه بتبهت والرخيصه لأ.....

كمان واضح من رأس الموضوع

[اطلب اي وصفه علي بالك تلاقيها قدامك

وانا طلبت طريقه للهدوم علشان ماتبهتش علي بعضها ....وكمان مش هقدر اغسل كل حته لوحدها زي ماقالت ستنا رشا ولا اروح ارجع الهدوم للمحل زي ماقالت فلاااانه

علي فكره انا برحب بيكي يافلفل لاني لم اتمكن من الترحيب بيكي كما يجب لاني كنت مقهوره جدا في مصرنا الغاليه مع انني كنت متابعاكم من بعيد لكن لم اتمكن من المشاركه

ولانني قد عدت بسلامة الله احب ارحب بيكي جداجدا في هذا المنتدي العظيم جداجداو

وانصحك نصيحه لوجه الله تعالي وهوانك ماتدخليش هنا كتير عشان بجد لو الواحد ساب نفسه يجرب كل الاكلات مش هتلاقي نفسك هتعرفي تخرجي من باب شقتك ويبقي العم بودا بقي ينفعك :D

اما بالنسبه لك بقي يابودا انا زعلانه منك كمان مره

وقرقرت مش هدخل المطبخ لمدة اسبوع كامل وتبقي تنفع ابوالعيال لما يموت من الجوع

وده قرار نهائى لا رجعة فيه :)

وبسسسسسسسسسسسسسس

[شاعرالرومانسية]

حسسسسسسسسن - حواوشي من الشارع يا حسن!!!

طيب اذا كان قصدك الراجل اللي في ميدان الجامع يبقى الجزار بتاع السجق ادامه على طول

اما لو كان الراجل اللي في الحجاز - ابقى ساعتها افتكرني لما تيجي تاكل!!!

<{POST_SNAPBACK}>

اية الحكاية ،،،، مش لازم نشجع الناس دى ..والا يقفلوا يعنى :D

وبعدين تعالى هنا ..انتى لفيتى عليهم كلهم والا اية ...

عموما ياستى انا جربت التنين ..

وحبقى اعدى على الجزار اشوف اخبار السجق بتاعة اية :D

فولانة... تسلم ايدك افنذم على الكنافة الحادقة .... حجربها اول الشهر

(عشان اكون قبضت وجبت بطاية حلوة كدة :D )

ريهااااااااااااااااام

حمدالله على السلامة ..... كفارة :D

اوعى تزعلى من بودا او من اى حد .... احنا ما نقدرش على زعلك يافندم :)

[Folana]

الاخت العزيزة ريهـــــــــــــــــــــــــــــــــام

ربنا يكرمك ويجازيك خير انشاء الله على رقتك وذوقك..متشكرة جدا على الترحيب الزائد ...والله انا كنت منتظرة رجوعك علشان اتعرف عليك لانى حبيتك من كتر اوشا مابتشكر فيك وبتحبك ..انشاء الله تكون معرفة خير ونلتقى فى حب الله دايما....

انت زعلانة ليه بس ماكلنا اسدينا لك النصيحة ..وفعلا كلنا بنبهت الهدوم ...انا عندى فردة شراب ملعونة دايما تتحشر بين الهدوم البيضة وتبهتها ..ماعرفش بتدخل الغسالة ازاى دى :blink: ..زى مايكون ملبوسة وعليها جان ...كل ماارميها الاقى الهدوم بتبهت برضه ..اقول هى فردة الشراب الحمرا مافيش غيرها ...ولايهمك بهتى الغسيل زى ماانت عايزة ... :angry2:

ماتخافيش على من دخول المنتدى وخصوصا المطبخ ..انا اصلا اقامتى محددة فى المطبخ ..باقضى فيه معظم اوقات فراغى ... mfb:

شاعر الرومانسية ...لو بطلت تشترى حوواشى من السوق حتعرف تجيب البطاية ....على فكرة القصيدة الاخيرة بتاعتك هايلة ..معلش انا بارد هنا لانى لسه ماعنديش الجرأة انى ارد عليك فى باب الشعر ..حاسة ان كلامى حيبقى ريحته بصل .. :)

عايزاكم تجربوا تورتة الجيلى دى ...كانت ام زميلتى فى الجامعة دايما تعملهالى مخصوص..وافتكرتها النهاردة الصبح قلت اعملها بس اقولكم عليها يمكن تعجبكم ويمكن تكونوا عارفينها اصلا ....

تورتة الجيلى

حنعمل كيكة اسفنجية عادية خالص..ومتهيالى انتم عارفين الطريقة من بودا ...وبعدين نجهز الجيلى ..اى نوع بتحبوه وليكن فراولة ...انا كنت باكلها عند صاحبتى دى كده .....وبعدين تنقصوا شوية جيلى وهو سائل فى طبق لوحده ...وتفضوا باقى الجيلى فى نفس الصينية اللى اتخبزت فيها الكيكة ..طبعا يكون لنص الصينية بس وبرضه حسب الارتفاع اللى تحبوه ....ثم تقطعوا فيه موز ..واللى حيطفو بدوره فوق السطح...وتدخلوا الصينية التلاجة علشان الجيلى يجمد (وممكن طبعا ترصوا الموز بطريقة فنية ..على شكل ورده مثلا او اى شكل متناسق ...

.....خلاص كده؟....

لما الجيلى يجمد بقى ..نخرجه من التلاجة ..وبعدين نحط الكيكة عليه فى نفس الصينية ..وبعدين نسقى الصينية بالجيلى السايح اللى حجزناه ..وندخل التلاجة تانى ....

بعد شوية ..لما الجيلى الجديد يجمد علشان بس يثبت الطبقتين فى بعض.......نخرج الصينية ..ونحطها فى شوية ميه سخنة بس بسرعةونحركها شوية علشان بس الجيلى يفك من الصينية.. وبعدين نقلبها على طبق التورتة ..او اى طبق مناسب يعنى ...وتدخل بقى التلاجة لحين التقديم...او تاكلوها بسرعة بسرعة من جمالها ...ممكن برضه نزين حواليها بكريم شانتيه....

جربوها وقولوا لى ..اعملها ولا ابقى اجدد العلاقات مع صاحبتى واروح اكلها عند مامتها........ :angry2:

ممكن كمان تتعمل بكيكة عادية ...على مااذكر واتذكر يعنى ....جربوها بس ومستنية رايكم ....

[Reham]

الاخت الغاليه ........فلانه

الف شكر وجزاكم الله خيرا علي رقتك معايا

...انتي حبوبه جدا ماشاء الله عليكي ربنا يخليكي لي ويجازيكي كل خير ....رشا دي اصلها عشرة عمر وهي الوحيده اللي طلعت بيها من غربتي وربنا يجمعنا دايما علي الخير

بقولك ايه يا فلانه اصل موضوع تورتة الجيلي ده شدني جدا اصلي بحبها وبمووووووووووت فيها وكل ماأعملها كل واحد بياخد حته وانا بقوم بالباقي...اصلها فعلا تجنننننننننن

بس انا لي اضافه صغيره لو جربتيها مره مش هتنسيها بالمره....

وهي انك لما تخبزي الكيكه ويستحسن تكون اسفنجيه طبعا وتسيبيها تبرد شويه تقومي ماسكاها وتشيلي وشها بسكين بس تطلعيه سليم وتبعدي شويه قد 1سم عن الاطراف وتخلي جنبها سليم (احنا هنشيل القلب بس )وتشيليه علي جنب هنعوزه بعد شويه ,,,,

وبعدين ياستي تمسكي الكيكه وتشيلي لبها وتفركيه علي جنب في طبق مع شوية كريم شانتيه....(بس اوعي توصلي لقاع الكيكه وتخرميها خدي بالك وانتي بتفرغي قلبها)

قولت هتمسكي اللب بتاع الكيكه وتفركيهاوتحطي عليه شوية كريم شانتيه وقطع من الموز او اي فاكهه علب ,,وترجعي تمسكي الحشوه دي وتفرغيها تاني في قلب الكيكه وتساويها وتحطي فوقها وشها اللي كنا شيلناه من شويه وتظبطيه كويس وبعدين تحطي الكيكه كلها فوق الصينيه اللي فيها الجيلي اللي كنا دخلناه الفريزر......وتسقيها بالجيلي برده وتدخليها التلاجه 3 ـ 4 ساعات وتخرجيها تسيحيها بالطريقه اللي قولتي عليها وتعملي فيها اللي انتي عايزاه بس هي كده اكتر من راائعه ولازم تجربيها بجد .....

بجد فظيعه انا ريقي جري :angry2: بس انا مش ناويه اعمل حلويات تاني لاني بحافظ علي وزني وبخاف اتخن وبصراحه مش بقدر اقاوم :excl:

وبألف هنا وشفا وماتنسينيش في حته كبيره شويه اصلي بموت في الحلويات........

:) :blink: mfb:

والف شكر ياشاعرنا ياكبير علي مجاملتك الرقيقهدي.... والهي يخليك لينا يارب وحسنه قليله تمنع بلاوي كتيره وهنيالك يافاعل الخير والثواب :angry2:

[Osha]

بسم الله الرحمن الرحيم

ريهام - انت كمان الوحيدة اللي طلعت بيكي من هناك وربنا يعلم

طيب انت يعني حطيت تورتة الجيلي عشان تجري شكل حسام - هو مفروس منك خلقة

بالنسبة للهدوم - يعني الواحد ما يتفكش معاك بكلمتين - اصل الغلاسة عليكي ليها مذاق تاني فريد من نوعه

حسن بيه

أكل الحواوشي من الشارع سلاح ذو حدين - اموت واعرف بيحطوا عليه ايه ? باقولك ايك ايه رايك في قسم خاص للحواوشي ضمن عربية الكبده والسجق?

فوفه العزيزة

مشكلة تورتة الجيلي اني لو عملتها حاكلها لوحدي!! اصل فيه جين وراثي في عيلة جوزي كلهم لا يطيقوا الجيلي ولا المهلبية ولا اي شئ له هذا القوام - وانا حاموت عليها

لما انزل مصر ابقى اعزميني - واهي فرصة اتعرف عليكي واشوف الأكل بتاعك الجميل - واهي يا ستي عزومة تفوت ولا حد يموووووووووووووووووت

[bodda]

الله عليكم يا احلى شلة

يعنى لازم اسافر يومين علشان تظهروا مواهبكم الجميله ؟؟؟

:angry2:

اولا طريقة الكنافة الحادقه شكلها جميل وتستحق التجربه

والله ينور عليكى .. ومش عارف ليه الاعتذار ؟؟؟

يا جماعه احنا هنا بنعك سوا فى اى حاجه

يعنى اللى عنده حاجه ومخبيها هادعى عليه دعوه تطلعه فوق

:blink:

ومش عارف ليه يا ريهام زعلانه منى ؟؟؟

هوه انا قصرت فى حاجه ؟؟؟

ده انتى واحشانا جدا والمطبخ من غيرك ناقصه حاجه

وتورتة الجيلى مضبوطه 100% بس من غير حمام الميه

ممكن تسخين عالسريع للاطراف والقاع عالنار

:angry2:

شاعرنا العظيم

طبعا الحواوشى من الشارع له طعم تانى زى الكشرى بالظبط

مع انى عارف مكوناته وبلاويه بس .....

:)

احلى مساء الفل يا حلوين

mfb:

[شاعرالرومانسية]

اخوانا الاعزاء،،،

انضم لمطبخنا العامر ..أكييل جديد وهو صديق عزيز بس قدر الله انه يسافر من الوطن ويسيب الاهل والاحباب ويروح بلاد الله خلق الله ... وبقاله ياولداه خمس اشهر عايش على البطااااااااااااااااااطس فقط..

ياريت بقى نقف جنبة ونديلة كام وصفة تمام تساعدة فى الايام الصعبة دى لحد ما ربنا يهدى الكفيل ويخلية يجيب المودام

بووووووووووووودااااااااااااااااااا ..الراجل دة صاحبك وحبيبك .. ايسوووووو

ماتبخلش علية بقى يا شيف،،،،

[شاعرالرومانسية]

اتفضل ياعم ايسسو ... اول وصفى على الماشى لزوم غدا بكرة

بس غدا خفيف كدة عشان معدتك تتعود تغير البطاطس...

كفته بانية،،،

تجيب نصف كيلو لحم مفروم ( بس كندوز ياريس مش ضانى ...) وتضيف عليهم صفار بيضتين وتسيبهم قد 20دقيقة وبعدين تضيف عصير بصلة متوسطة وملح وفلفل وممكن مفروم معلقتين كبار بقدونس

تجيب بياض البيضتين وتحط عليهم بيضة واحدة وتربهم وتجيب طبق تحط فية بقسماط مطحون وتعمل صواربع الكفته باخذ قطعة من اللحم وتعجنها بين صوابعك وتصبعها بالراحة وتحطها فى البيض وبعدين البقسماط وتحطها فى الزيت وتطلعها على فرشة من البقدونس المفروم وجنب بطاطس محمرة او مكرونة بالصلصة .. واديها يا زعيم بس ما تفتريش عشان معدتك ما تتقلبش عليك

على فكرة ،،، ممكن نحط بقسماط وبيض على اللحم ونعجنها كويس وناخد منها على رخامة المطبخ ونبططها بالراحة ونفردها على شكل بفتيك بسمك نصف سم .. بس نظبط القوام باضافة شوية بقسماط وعلى الزيت على طول

[bodda]

يا ألف اهلا وسهلا بالعزيز ايسو

منور مطبخنا العامر

بس نسيت يا شاعرنا الجميل حاجه

انت قلت له :

تجيب بياض البيضتين وتحط عليهم بيضة واحدة وتربهم وتجيب طبق تحط فية بقسماط مطحون وتعمل صواربع الكفته باخذ قطعة من اللحم وتعجنها بين صوابعك وتصبعها بالراحة وتحطها فى البيض وبعدين البقسماط وتحطها فى الزيت وتطلعها على فرشة من البقدونس

ونسيت تقوله يغلى الزيت الاول

:lol: :lol: :lol:

صباح الفل

:wub:

[esso]

الله الله

انا ريقى جرى

بس يا جدعان عاوزين حاجات سهله شويه يعنى انا مش فاهم موضوع صفار بيضتان احط عليهم بيضه دى يبقى ازاى يعنى

عاوزين حاجات سهله على غرار

"افتحلك علبة تونه او بولوبيف"

و صباحو اشطه و مستنى بقى كوبايه شاى بالنعناع من بتوع زمان

[bodda]

بص يا عم ايسو

انت ماينفعكش الا ........

قرص عجة عَزابى

3 بيضات تفقشهم فى طبق غويط

على حزمة بقدونس مخرطه وملح وفلفل

وتضربهم ضرب اسمه ايه فى مطلع :lol:

وتجيب طاسه ومعلقتين زيت وتحط عالزيت مبشور بصله صغيره

وتقلب البصل فى الزيت عالنار لغاية ما يصفر

وتروح قالب عليهم البيض باللى معاه

وتقليبتين وتوطى النار لغاية البيض ما يستوى

وكان الله بالسر عليم

وتحبس بكوباية شاى بنعناع على حسابى

والف هنا وشفا

صباح الفل

:lol:

[se_ Elsyed]

بما إني أعيش حالة من العزوبية هذه الأيام وأكلي كله في المطاعم وفي البيت فاكهة ونواشف ( أنا أتهريت نودلز يا جماعة لما بقيت أتكلم أندونيسي من كثر أكل الإندومي على العشا وده كله عشان بأكسل أنزل أتعشى في مطعم ) فلقد أتخذت قراراً أرجو أن تساعدوني فيه ..وهو إني أطبع الـ 29 صفحة بتوع الموضوع ده وأصنفهم الحلويات على جنب والحوادق على جنب وهكذا وأقعد كل يوم بالليل مع نفسي أجرب بقى الحاجات السهلة اللي الواحد بيسمع عنها سمع خير .. ولو أختفيت وما ظهرتش خلال أسبوع .. يبقى ذنبي في رقبة بودا صاحب الإمكانيات اللامحدودة ..

هذا والله أعلم

إبنكم المُعذب س س