اطلب اى وصفه على بالك .. تلاقيها قدامك

[Folana]

السلام عليكم ورحمة الله وبركاته........

الاخوة الاعزاء زملاء الكفاح....أبنائنا المعذبون فى الخارج..............

احب ارحب بالضيف الجديد الاخ الفاضل ايسو(صح الاسم كده ولا ايه).......وبعدين ياجماعة الواضح انه مش عايز يتعلم الطبخ ..ده كل امله فى الحياة انه ياكل اكلة كويسة لحين وصول اسرته بالسلامة واللى بندعو الله فى هذه الايام المباركة انهم يوصلوا له بالسلامة ويتلم شملهم من جديد بالعند فى السيد الكفيل ....

..الاخ الفاضل ...قل لنا بس انت نفسك تاكل ايه ..واحنا نديك وصفة سهلة اوى..اوى....بالنسبة للكفتة البانية اللى وصى عليها اخونا شاعر الرومانسية ...ماتتعبش نفسك وتشيل فى البيض وتحط ...انت تجيب اللحمة المفرومة وتضرب عليها بصلة وشوية ملح وفلفل..وتبل نص رغيف فينو وتعصره من الميه كويس وتضيفه على اللحمة او تحط بقسماط مطحون ..وتخرط حزمة بقدونس رفيع بعد غسله جيدا طبعا ..وتكسر بيضة او اتنين على الخليط ده وتقلب كويس جدا وبعدين تصبع الكفتة او تعملها كوريرات ..جمع كورة يعنى ..وتدحرجها فى ابلقسماط المطحون وتكون حاطط الزيت على النار لحد مايسخن وترمى فيها الكفتة تتحمر وخلاص على كده ...واى بانية بقى على كده ..سواء فراخ او بفتيك تتبل وتكسر عليه البيض وتقلبه فى البقسماط وتقلى ...

ممكن تسلق فرخة بعد غسيلها طبعا بالدقيق كويس وسطفها..وبعد ماتتسلق تاخد الشوربة وممكن تعمل بها كذا حاجة ..مش وقت طبعا استعراض طرق بس عايزين نلحقك باى وجبة سخنة سريعة وسهلة ....

ممكن تحمر لسان العصفور ولما يصفر على النار تضيف عليه جزرة مبشورة (بعد ماتكحتها طبعا وتغسلها)وتقلب تقلبتين وترميهم على الشوربة ..لحد مالسان العصفور يستوى ..وممكن تطفى قبل مايستوى قوى وهو حيكمل السوى فى الشوربة السخنة علشان بس مايعجنش منك...

ممكن ترمى فى الشوربة برضه بطاطساية مقطعة مكعبات ..او اتنين يعنى حسب كمية الشوربة ..وتاخد غلوتين تلاتة وتروح رامى معاه سويت كورن ..اللى هو الذرة الحلوة ودىى طبعا معلبات فى السوبر ماركت ..وبعدين تجيبب علبة زبادى تقلب معاها ملعقتين دقيق لحد مالدقيق يسيح مع الزبادى وترمى على الشوربة وتقلب كويس جدا علشان ماتسيبش كلاكيع ..او تحمر ملعقتين دقيق فى شوية سمن وتقلب على الشوربة علشان تديك شوربة سميكة القوام اللى بيسموها الكريمة يعنى ....

متهيالى حاجات سهلة ومش عايز دبكة ...ممكن تشوى الطاطس فى الفرن ولما تستوىى تخرجها وتقمسها بالطول والعرض من فوق كده لحد ماتتفتح وتدلق جواها اى صوص من السوبر ماركت زى صوص الجبنة الزرقا مثلا او حتى مايونيز او حتى ملح وفلفل وتاكلها....

كمان هات العيش التوست ورب بيضتين بالملح والفلف واغمس كل شريحة توست فى البيض وش وضهر واقلى على النار ..جميلة وشهية ....هات علبة التونة..وادبحها ..قصدى افتحها ..وفضيها فى طبق غويط ..وقطع عليها بصل وفص توم مدقوق (ت

اختيارى)...وقطع فلفل رومى اخضر واحمر او اخضر بس ...واغسل خساية كويس وقطعها رفيع جدا على التونة برضه وحط مايونيز ..واعصر ليمون وشوية خل صغننة ..وقلب وكل ...وممكن تعمل الرنجة كده برضه ...لو عايز رز وطبيخ ..حنديك وصفات سهلة جدا برضه .....قبل مااقفل ..ياريت تحضر حلة ضغط اللى بيسموها البرستو علشان دى حتسهل عليك كتير جدا الطبخ ..ولنا عودة انشاء الله ...............

[Folana]

انا مش فاهم موضوع صفار بيضتان احط عليهم بيضه دى يبقى ازاى يعنى

الاخ ايسو

اسمح لى ارد بالنيابة عن بودا وحسن فى موضوع صفار البيض ده ..الشيف رومانسية يقصد انك تفصل البياض عن الصفار ...وحاقولك طريقة سهلة برضه لمجرد العلم بالشىء علشان لو حد سالك ولا حاجة ...

شوف ياسيدى ..انت تجيب طبق ..وبعدين تكسر البيضة من النص بالشويش علشان ماتتكسر منك خالص ..وتفتحها بالراحة فوق الطبق ..ماتفضيهاش فى الطبق ...وتبدا بقى لعبة جميلة جدا ..وهى انك تفضى الصفار من نص قشرة البيضة دى للنص التانى وهكذا ..رايح جاى وجاى رايح لحد مبتلاقى البياض كله بينزل فى الطبق ويفضل الصفار فى نص قشرة البيضة ..كده انت تبقى فصلت البياض عن الصفار..وتحط الصفار فى طبق لوحده ..وتشوف بقى حتعمل بيهم ايه ..وحسن يقصد انك تاخد صفار بيضيتين بالطريقة المذكورة اعلاه ..وتضيفهم على اللحمة ..والبياض اللى فاض من عملية الفصل دى ..بدل ماترميه ..لا..خليك مقتصد وضيف عليه بيضة كمان علشان تبقى بالصفار بتاعها ...بس كده ..يارب اكون قدرت اوصلك المعلومة ..ومرة اخرى مرحبا بك فى مطبخنا العامر بطبيخ الاخ العزيز بودا والاخ العزيز الشيف رومانسية ..اللى نفسهم معانا دايما .... <_<

[bodda]

الله ينور يا فلانه هانم

ومتهيألى سى السيد برضه هايستفيد من قعدته لوحده

والله يا جماعه المطبخ شغله لذيذ

واهم حاجه التجربه والخطا

وما فيش حد اتولد طباخ

بس لو جربتوها هاتلاقوها من احلى الهوايات

مساء الفل

<_<

[Folana]

الله ينور يا فلانه هانم

ومتهيألى سى السيد برضه هايستفيد من قعدته لوحده

والله يا جماعه المطبخ شغله لذيذ

واهم حاجه التجربه والخطا

وما فيش حد اتولد طباخ

بس لو جربتوها هاتلاقوها من احلى الهوايات

مساء الفل

<_<

<{POST_SNAPBACK}>

دى شهادة اعتز بها من جناب سعادة الباشا الوزير محافظ المطبخ ......

واذا انت محتاج اى وصفات سريعة قشر بس ..ماانا جاية ابيع الميه فى حارة السقايين ...واسمح اضيف لهم كل يوم وصفة خفيفة لحين عودتك الى ارض الوطن سالما غانما ....واسلمك العهدة لانى ناوية اسافر قبل دخول المدارس واروح الاستانة اطمئن على ابعاديات اجدادى الباشوات ...ماحدش عايز حاجة من الباب العالى ؟؟؟..اكتبوا لى تظلماتكم فى غضون اربع ايام من تاريخه قبل الرحيل ........

[شاعرالرومانسية]

ايسسسسسسسسسسسسو

فينك ياعم .. واية اخبارك ...

الشاهنشاه فولانة هانم اهى قالتلك كام وصفة يكفوك اسبوع بحاله..

عيش ياريس...( والا بلاش ريس دى لحسن بتكبلك ارتكريا)

وبعدين حضر المظالم بقى لاختك فولانة عشان الطيارة خلاص قربت تقوم ...

فووووووووووولانة

الاصحيح ..

انت باباكى..

كان قائد تابية...؟

[Osha]

مرحب بك اخي ايسو في مطبخنا العامر جدا

وطالما جاي من طرف شاعر الرومانسية العزيز يبقى حنحيوك اجدعها تحية بالصلاة على النبي

سي السيد

مالها الأندومي - دي اجمل اكلة بين اكلة واكلة

أناباشتريها بالصندوق والله

فولانة

أثبت مواهب فظيعة في الأكلات السريعة - حلوين الكام حتة والنصائح اللي فيهم لو سمحت لما تروحي استنبول ابقى طلي على العزبة بتاعة جدي الكبير وكمان ساندويتش شاورما من عند المحل الثالث من علي اليمين وانت رايحة على مضيق البسفور!!!

بوداااااااا

سمعت اختراعين في التونة - قلت ادي العيش لخبازه بدل العك

الأول سلطة التونة - ورأيت فيما يرى النائم ان عليها كرفس وكزبرة خضراء

الثاني المكرونة بالتونة - بيقولوا عليها حلوة

ولاني من مدمني المكرونة زي ما انت عارف واي معجنات بتتخن والسلام فأنا أطالبك وأناشدك طريقة عمل الصنفين دووووول

وخيرك سابق يا بيك

حسن

اخبار عربية السجق ايه ?

[Salwa]

اوشا ...مساء الخير .

على فكرة هنا فى المحاورات كنا كتبنا سلطة الأرز او المكرونة بالتونة وسوف اضع لك الوصلة وياريت تعجبك ...

http://www.egyptiantalks.org/invb/index.php?showtopic=9281

[Folana]

أوشا حبيبتى وحشتينى مووووت......

بودا حيتاخر شوية فى الرد ..فاسمحى لى اقولك انا باعمل المكرونة بالتونة ازاى ...شوفى سايتى انت تسلقى المكرونة عادى وتصفيها ...طبعا لو مكرونة فيونكات بتكون لذيذة او اى نوع بقى عندك المكرونة الملونة دى الاخضر والاحمر ...او اسباجتى ..يعنى المهم ..ممكن تحمرى فصين توم مش تحمير يعنى يادوب تقليبة واحدة فى نقطة زيت وتدلقى عليه المكرونة وتقلبى شوية ....بعد كده تصفى علبة التونة من الزيت ..او العلبتين يعنى حسب الكمية ...وتهرسيها بالشوكة ..وعليها بقى فلفل اخضر رومى مقطع قطع صغيرة وممكن فلفل رومى احمر واصفر ....وزيتون اسود منزوع النوى ..وارمى على المكرونة ..ممكن تلغى التوم خالص على فكرة او تدقيه نى على كل اللى فات حسب رغبتك يعنى ....ممكن تضيفى كمان مشروم...وتقلبى كويس ..وبعد كده ممكن تضيفى جبنة موتزريلا بس يفضل تضيفى الجبنة قبل الاكل على طول علشان انت عارفة لما بتبرد مش بتسخن ولا تمط تانى .....ممكن جبنة بارميزان ..ممكن مايونيز ..ممكن صوص جاهز من السوبر ماركت ..مخصوص للمكرونات ..بس صدقينى مش فاكره اسمه خالص دلوقت ....ولو بتحبى الشبت او البقدونس ممكن تخرطى حزمة رفيع على كل ده ....

الوصفة كمان بتاعة حبيبتنا مدام سلوى جميلة جدا وفعلا زى مااضافت انك ممكن تعمليها -اى المكرونة - بالجمبرى ..بتسوى الجمبرى لوحده كده مع فصين توم وتقلبى لحد مايستوى ..وتحطى باقى التوابل ..وتضيفى برضه الفلفل والبقدونس بس من غير زيتون اسود ..وممكن تضيفى طبعا كارى على الليلة دى ...والف هنا ...

اما سلطة التونة فاحسيبها لبودا ....

.....

بس على فكرة وصفة مدام سلوى هى المظبوطة تمام.....

الاخت الغالية ريهام فينك ...وحشتينا ..اوعى تكونى لسه زعلانة مننا .... :D

شاعر الرومانسية:.....ايفييت ..ايفييت ..انا شاهنشاه فعلا ..تعرف اناا برضه قلت انك بتفهم ...بس الغلطة الوحيدة ان ابويا مش كان قائد تابية دى ...حتى تلاحظ من اسمى ....فول ...انة

[Osha]

تشكر يا عسل على الوصفات الشديدة

انابقى عاوزة حاجة غريبة شوية ومش عاوزة تريقة يا ريهام لو سمحت

عاوزة شعرية حلوة باللبن

ريهام ربنا يجمعنا على خير تاني هي اللي كانت بتعملها دايما عشاني

كمان كنت اكلت مرة من زمان اوي اوي حاجة اسمها سخينة

مش عارفة فيه حد يفتكر حاجة بالاسم دا ??

مش عاوزة تريقة يا حسن لو سمحت

[Reham]

مساء الخير ....اعزائي شباب المنتدي العزيز

بنطوح التماسي علي اللي رايح واللي جاي....

.عزيزتي فلانه.....

الف شكر علي سؤالك عليا ...انا موجوده ومش مختفيه ولا حاجه ...انا بس ببص عليكم من بعيد لبعيد

يعني.... بطمئن علي الحال والاحوال واخرج من سكات

اصلي عندي حالة اكتئاب

اما بالنسبه لك يارشروشتي مش هقولك علي الطريقه بتاعة الشعريه باللبن

تعالي وانا اعملهالك

واعملك بودنج ....إياه...فاكراه

وأعملك ورق عنب وكنافه وكل اللي نفسك فيه

والكبسه اللي بيحبها حسام

وكل حاجه بس تعالي بقي

بوداااااااااااااااااااااااااااااااااااااااا

عايزه اطلب منك طلب لو سمحت جنابك......ممكن؟؟؟؟؟ :blush:

[Reham]

اذكر فيما اذكر ان السخينه دي شيء داخل في مكوناته حلبه :blush:

صح ....ولا انا بدات اخرف

وفيها عيش كده زي الفته وفيها كمان سمن كتيييييييييييير وعسل

يعني دي صنف حلو

صح يارشا

مش متذكره اوي

[bodda]

اخواتى الحلوات المقطقطات الشطورات

ايه الشغل الجميل ده؟؟

بجد كده انا اطمنت عليكم

واقدر اسافر وانا مطمن على زيادة وزنكم

:lol: :lol: :lol:

مع شطارة فلانه واعجاب اوشا بالمكرونه

واكتئاب ريرى وتحط همها فى الاكل

:blush:

بجد انا كده خايف عليكم

بس وصفة سلوى ممتازه وتحياتى وعتابى لها عالغياب :blush:

وفيه طريقة تانية

بس شرط لها ان نجيب تونة فى محلول مائى وليس زيت

ودى موجوده بس تدورى عليها شويه mfb:

مكرونه بالتونه

وبرضه سلق المكرونه عادى ونصفى التونه وناخد محلولها فى طبق عميق

( بنتكلم على 3 علب تونه ) :blush:

ونحط عالمحلول ده نص كوباية زيت ذره و معلقة زيت زيتون

وعصير نص ليمونه وملح وفلفل

ونحط كل ده فى العجانه ونسيبها على سرعه وسط 5 دقايق لامتزاج الاشياء

نحتاج بقى نص كيلو جمبرى يتسلق بقشره ..مع بصل وملح ..ويتقشر :blush:

ناخد الجمبرى المقشر ونحطه فى مخلوط المحاليل فى التلاجه ساعه

نكون خرطنا حزمة شبت على كسبرة خضرا وقلبناهم مع مفروم فصين توم

مع معلقتين زبده عالنار 5 دقايق للدبلان بس

ونطلع اللى فى التلاجه... ونكون مسخنين المكرونه اللى زمانها بردت

ونقلب كله على بعضه ( المكرونه مع المحاليل والجمبرى مع التوم والخضره)

ونقلب معاهم نص التونه المفتتة ونفرفط الباقى على وش طبق التقديم

وبالف هنا

مساء الفل

:wub:

[Reham]

بقي اقولك يابودااااااااااااااااااااااااااااا :blush:

عايزه اطلب من جنابك اكله تطنشني كده؟؟؟؟؟؟؟؟ :blush:

يعني اعمل فيك ايه ؟؟؟؟؟؟؟

تاني مره اتطنش عندك في المطبخ !!!!!!!

ماشي ياأستاذي العزيز :blush:

[bodda]

اكيد سؤ تفاهم ليس إلا

هل المطلوب السخينة ؟؟؟

:blush:

[Reham]

الله يخليك يامعلم........

مساء الفل...............

بعد إذن حضرتك انا عايزه اعمل قلقااااااااااااس بالخضره زي بتاع ماما... ومش عارفه

السنه اللي فاتت عملت قلقاس بطعم السبانخ!!!!!!!!!!!!!!!

يعني تشوفه تقول قلقاس :D

تدوقه لازم يكون سبانخ.... :)

ازاااااااااي :D

مش عارفه :D

حاجه تانيه بعد إذنك :blink:

عايزه طريق سلطة التوم

حاجه تالته بعد اذن حضرتك: :)

عايزه مقادير التتبيله بتاعة الجمبري المقلي وطريقته كلها ياريت .....

بس تكون زي بتاعة الفنادق اللي بيقدموها ...بتكون حلوه اوي وماسكه في نفسها

وتخينه كده زي ماتكون عجينه لفوا الجمبريايه فيهاحاولت افتكس فيها بس كانت دايما تسيب بعضها في القلايه

اما السخينه فدي طلب رشا

وجزاك الله خيرا

ودمتم سالمين

[bodda]

العزيزه ريهام

القلقاس بالخضرة

خضرة القلقاس هى السلق واحيانا يتم غشه بنباتات تانيه

ويمكن علشان كده بيطلع طعمه سبانخ

:blink:

فلو استعملنا 2 كيلو قلقاس تحتاج ربطتين سلق

يغسل وينظف ويخرط ناعم

نشوح مفروم تلات فصوص توم وكسبره ناشفه فى معلقتين سمن محترمين

ونحط عليهم السلق المتخرط وتقليب لما يدبل

وبعدها نحط الشوربه (أو ميه مع ماجى) مع بصله وملح وفلفل

ونسيبها تغلى للسوا التام أو الموت الزؤام

ننزلها من على النار وتبرد شويه ثم تضرب فى الخلاط وتصفى

نيجى بقى للقلقاس يتنضف ويتخرط مكعبات وتكون حلة ميه بتغلى عالنار

وندلق المكعبات فى الميه المغلية مع ملح لوقف ظهور المادة المخاطية نسبيا

لان لو حطينا القلقاس فى ميه بارده ثم الغليان هاتبقى مهلبية

بعد 10 دقائق غليان ندلق المية ونستبدلها بمحلول السلق الاخضر

ولو ناقصه نكملها بمية بتغلى

ونسيبها عالنار لغاية القلقاس ما يستوى تمام

وطبع ممكن نضيف اللحم المسلوق فى مرحلة خلط القلقاس بالسلق

ونقابلها بعصير 5-6 ليمونات مفتريين

وبالهنا والشفا

:)

[se_ Elsyed]

السيد الأستاذ الدكتور الشيف بــــــودا

السادة أعضاء المطبخ الموقر

هآنذا أضع بين أيديكم تجربة عملية عزابية معملية فذة لكي تستفيد منها الأجيال الحالية والقادمة .. فأنا يا سادة شخص متزوج مع إيقاف التنفيذ وأمر بظروف مطبخية صعبة .. فالفطار عندي مش مشكلة لإن كرواسوناية مع الشاي والعملية بتمشي .. في الغدا ربنا بيرزق كل يوم وأهي ماشيه ... نيجي للعشا اللي هو المشكلة المزمنة ... أنا مالي الثلاجة فضلت خيرك جبنه ومربى وحاجات من دي .. بس للأسف ما عنديش عيش بقى لي ييجي أكثر من أسبوع وكل يوم وأنا مروح أنسى أجيب عيش وما أفتكرش إلأا بعد ما أطلع الشقة .. ومحسوبك كسول الكسل اللي في الدنيا كلها .. فبقضي العشا يا إما فاكهة أو عصير وكده يعني .. إمبارح بقى كنت هاموت من الجوع وبرضوا ما فيش عيش ومكسل أنزل أركب العربية وأروح السوبر ماركت أجيب بريال عيش .. ومظبط نفسي عشان أتفرج على كام برنامج عن الإنتخابات كانوا شُداد وما عنديش وقت فاضي في الأجنده ..

قوم إيه طقت في دماغي أعيش في دور خالتك أم خيرية الفلاحة وأخبز العيش بنفسي في البيت ( أنا بأتكلم جد ) وقولت هي كلها شوية دقيق على ميه على خميرة وأولع الفرن وأدلق العجينة فيه تبقى عيش مفقع وسخن ولا الحوجة لوقفت الأفران ولا المسامير اللي بنلاقيها في العيش وبكده يبقى حققنا الإكتفاء الذاتي وطظ في المعونات الأمريكية ..

أدعبس يا عم هنا وهنا إني أعثر على الدقيق أو أعرف المدام شايلاه فين ... فين وفين لقيته في الثلاجة ( شوفت النصاحه ؟ ) ... جه دور الخميرة ودي مالقيتهاش أبداً .. بس لقيت بدلها بكنج بودر .. قولت حلو أهو كله لزوم التفقيع .. وأعجن أعجن أعجن ( كل ده وأنا بأستلهم الأغاني الوطنية القديمة زي الحلوه دي قامت تعجن في البدرية .. وقوم يا مصري مصري دايماً بتناديك ) وعجنت عجيني وما فيش مثيلي .. وقولت على ما أقوم أخد حمام وأروش المسائل العجين يكون خمر وأجيب بقى الماجور وأقعد أقرص العيش .. وبالفعل ولعت الفرن وحطيت العجينة فيه وقعد ييجي ربع ساعة .. وروحت مجهز الأكل والمخلل وما إلى ذلك .. وأجي يابني أدوق العيش ألاقيه ( علجم والله علجم ) طلعت حاجة كده ما بين سد الحنك وأم علي .. طبعاً قومت رميته في الزبالة قبل ما يستفحل ويتحول إلى كائن هلامي يلتهمني وأكلت الأكل حاف .. ونويت النهاردة أشتري بريال عيش يكفيني الأسبوع اللي فاضل في العزوبية ...

وتقبلوا تحياتي ،،،،

إمضاء

عازب في بلاد الغربة

[bodda]

العزيز الغالى المتشحطط فى الاعالى

سى السيد العزبنجى اللى محتاج طباخانجى

:blink:

والله فكرتنى بأيام زمان قبل ما تبقى هوايتى المطبخ

طبعا انت دخلت عالعيش وهو من أصعب الوصفات رغم سهولته

وتعاملت معه بالمنطق وعلشان كده طلع ماحطش منطق

طبعا الخميره بتعمل فقاقيع زى البيكنج باودر بس مع اختلاف المنتج

لان الخميره كائن حى يتكاثر فى العجين مع دفئ الجو ويزيد

بينما البيكنج باودر بينتج غاز يسبب الفقاقيع بس فى الكيك والحلوى

شوفت بقى انت عملت ايه ؟؟؟

وعلى فكرة انا كاتب فى الموضوع ده فى مكان ما طريقة عمل العيش

بص ياسيدى اسهل حاجه للعشا

خللى عندك دايما كيسين تلاته مكرونه باى شكل تحبه

وتولع على حلة ميه لما تغلى وتحط معلقة ملح وترمى المكرونه فيها

بشرط تبقى الميه كتير عن المكرونه اوىيعنى ضعفها على الاقل

وتسيبها تغلى حوالى ربع ساعه وتختبر واحده على المعلقة

لو استوت ... تحط مصفاه كبيره فى الحوض وتدلق فيها الحله

تتصفى الميه وتتبقى المكرونه

تاخد المكرونه فى طبق وممكن تحط عليها كاتشب

او اى صلصه جاهزه من السوبر ماركت ( صلصة مكرونه )

وممكن تحط عليها مبشور جبن رومى

وبس..

بس خللى بالك ان نص كيس كفايه اوى للفرد وزياده

مساء الفل

:lol:

[bodda]

خاص لسى السيد

سلق فرخه

تجيب فرخه من السوبر ماركت وتسيبها فى طبق لما يفك تجميدها

يعنى ممكن تطلعها من التلاجه مجمده الصبح لغاية ما ترجع من الشغل

وتغلى 6 كوبايات ميه وتحط معاها بصلايه مقطعه اربع حتت

ومعلقة صغيرة ملح ونص معلقة فلفل اسود ومكعب ماجى

وبعد الغليان تغسل الفرخه وخصوصا بطنها وتشيل اى حاجه جواها

لان واحد صاحبى مره سلقها وجواها كيس الكبده والقونصه

وتسيبها تغلة على الاقل 20 دقيقه

وتختبر سواها بمحاولة رفعها من الجناح

لما تلاقى الجناح هاينفصل منها عند رفعها تبقى استوت

كده الفرخه اتسلقت

ممكن تطلعها بره وتسيبها تبرد وتقطعها اربع أجزاء

وتحمر كل ربع لواحده فى طاسه ومعلقة سمن بس تغطيها بغطا حله

علشان السمن ما يطرطش عليك

وتشيل الباقى لبكره ... او تخلص عليها انت بقى ونفسك

ومساء الفل

:blink:

تم تعديل 4 سبتمبر 2005 بواسطة bodda

[bodda]

خاص لسى السيد

حفظ العيش

اشترى اى كمية عيش 20-30 رغيف بس من النوع الطرى

وحط كل رغيفين فى كيس وطبقه واقفله

وشيلهم فى الديب فريزر

وابقى طلع الكيس لما تحب تاكل وتسخن الرغيف او الاتنين عالنار وش وقفا

او تحطهم شقق فى فرن كهرباء 5 دقايق

هاتلاقى عيش طازه وسخن وكأنه مخبوز حالا

مساء الفل

:blink: