اطلب اى وصفه على بالك .. تلاقيها قدامك

[se_ Elsyed]

يا عم بودا أنا إرهابي في الطبيخ .. وبأطبخ كويس جداً لكن مشكلتي تتلخص في خمس أسباب :

1- إني ما بأعرفش أكل لوحدي ، يعني لازم لمه وشلة وكده عشان يفتحوا نفس الواحد .. وربنا واعدني بواحد صديق عازب زيي هنا .. عاديك وما تقولش لعدوك عليه .. إسمه هاندي كرافت بيكسلني أكثر من أنا كسول على كسلي وتلاقيه دايماً يا في الشغل يا في الحمام .. حاجة تفقع يعني

2- المطبخ والعفرته والكلام ده كان قبل الجواز .. لكن دلوقت لما أتجوزت وبقى دمي في رقبة إنسانة مسئولة عني .. جسمي تقل وبقيت كسول حتى على إني أعمل لنفسي كوباية ميه ساقعه .. وبكره تجرب لما تتجوز ويجري بك العمر ويبقى عندك 33 سنة زيي :blink: ستتذكر تلك الأيام الخوالي اللي كنت بتقعد فيها على حلة المحشي تقور الكوسة وتحشي البتنجان ولا أجدعها كماريره في القصور الملكية ...

هما دول الخمس أسباب

بالمناسبة أزف لك خبر هام جداً وهو إني بعد 5 سنين زواج إستطعت بعون الله وبعد محاولات مضنية وقهر لحالة الغسيل فوبيا إني أشغل الغسالة الفول توماتيكي لوحدي ... طول عمري واخد عن الغسالة دي إنطباع إني لو دوست عليها ودخلت برنامج غلط هاتفرقع في وشي وهاغرق رابسو وكلور وفعلاً والله كلمت ناس أصدقائي وقولت لهم أنا هافتح معاكوا هوت لاين لما أجي أغسل وإبقوا إسألوا لي مداماتكوا البتاعة دي بتشغتل إزاي ( وكمان عشان لو مت يبقوا يلحقوني بدري بدري قبل ما أموت ) .. لكن الحاجة أم الإختراع وطلعت فكرتي عنها غلط خالص وأنا اللي وسطي أتقطم طول السنين اللي فاتت دي لما المدام كانت بتنزل أجازة وتسيبني وكنت أقعدت على الطشت أمرش الغسيل لما قربت أبقى شبه نانسي عجرف في أنشودتها الخالدة أخاصمك آه ..

أسف للخروج عن الموضوع وتبقى واحده بواحده يا ريهام يا اللي الغسيل بيبهت منك والأصفر بيدخل على التريكواز ويبقى فوشيا

[bodda]

يعنى طباخ قرارى و 100%

وسايبنى اشرحلك ازاى تسلق الفرخة ؟؟؟

:blink:

اذا كان عالصحبة فى الاكل جرب التليفزيون

:lol:

واى اوامر يا صاحبى

بس لما بكره تكبر وتبقى قدى هاتكتشف حاجات تانية خالص

B) :D :D

صباح الفل

:wub:

[se_ Elsyed]

اذا كان عالصحبة فى الاكل جرب التليفزيون

عروستي !!!!!!!!!!

يعني لما أجيب أكل وأعزم المذيعين والمصوراتية بتوع التليفزيون ؟..

ولا أعمل زي بتوع ش ك ع وأعزم التليفزيون بدل القطر ؟

[Osha]

لقد زعلت منكم جميعا

ريهام

تفتكري اني لو عرفت طريقة الشعرية باللبن حاعملها والا برضه حاستنى ناكلها سوا

دي بس طلبات عشان المعلومات العامة

لكن اللي في القلب في القلب -_-

بودا العزيز

يعني تفتكر ازعل والا مازعلش لما ريهام تقولك ان السخينة طلبي وسيادتك تطنش :sad:

ماكنش العشم ابدا ابدا

اهئ اهئ :sad:

لقد زعلت :)

فولانة

اين انت :wub:

حسن باشا

اين اختفيت ياترى من كل الأمكنة mfb:

سي السيد

جرب تقعد قدام التليفزيون وتاكل حتلاقي نفسك فيل في خلال اسبوع :wub:

بلاش التلفزيون جرب مجلة ميكي او كتاب هاري بوتر :P

نسيت اقولك ان جوزي برضه فضل سنين مش مقتنع ان الغسالة الاتوماتيك دي مخلوق مسالم جدا واسال ريهام تحكي ليك :lol:

[bodda]

العزيزه اوشا

يمكن مشكلتى ان معلوماتى بسيطة فى الاكلات العربية

يمكن ده يريحك انك اخيرا لقيتى حاجه مش عارفها

-_-

والسخينه منهم....

بس ممكن لما افضى ادورلك عليها واجيبها

لكن هاتكون منقوله وبدون تجربه منى

اوك؟؟ :sad:

مساء الفل

:)

[Reham]

ايه ياعم بودا باشا !!!!!!!! فيه إيه بالضبط

انت متأصدني ليه

عملت لك ايه

زعلان ولا ايه :)

الف الف شكر علي القلقاس

اوعدك هعمله واقولك عالاخبار

بس اول الشهر لمل ننزل نشتري تموين البيت -_-

طلبي التاني والتالت راحوا فين ياسي بودا

انا طالبه سلطة توم والجمري المقلي...

حصل ايه ضاعوا في البوسطه ولا ايه

ماكانش العشم علي رأي رشا هانم :sad:

انتي فييييييييين يافولانه

رحتي استخبيتي فين ياتري

لعل تغيبك عنا خيرا

وحشتينا .....تررا ترررا تررررررا

صوتي حلو

:wub:

[bodda]

فلانه هانم بتصيف فى اسطنبول وبتصالح ابناء محمد على بك الكبير

وبعدين يا ريهام هانم .. انا باحاول على قد وقتى الضيق اعمل اى شئ

فحالا اهو طلباتك ;)

سلطة التوم

طبعا وصفنا قبل كده طريقة عمل المايونيز ؟؟؟

هانعمل بقى المايونيز بس بدون الخطوة الاخيرة اللى فيها اضافة الخل

ونستعمل كوباية مايونيز من ده :)

ونفرم فى الكبه 3 تومات ناعم اوى وناخد عصيره باستعمال شاشة

ونحط عصير التوم على المايونيز ومعاهم معلقة خل واحده وملح

ونقلب كويس ويتحط فى التلاجة ساعه قبل الاستعمال mfb:

ومع عيش ناشف ومحمص بالهنا والشفا

مساء الفل

:D

[bodda]

الجمبرى المقلى

طبعا لو جمبرى صغير يعنى طول الواحده بعد التقشير 3-5 سم

هانغسله كويس ونحط عليه ملح وكمون وعصير توم

ويتقلب كويس فى دقيق كتير وبعدين يتهز بالغربال لتنزيل الدقيق الزيادة

ونقلبه على زيت بيغلى وعميق لغاية اللون الذهبى

نيجى بقى للجمبرى الكبير المحترم

اللى الكيلو منه من 10- 20 واحده :)

ده هايتقشر بس بدون نزع الذيل

يعنى نسيب اخر عقله فى الديل بدون تقشير مع رشة ملح خفيفه اوى

:D

ونحضر عجينه مكونه من 3 بيضات مخفوقين كويس

ومعاهم كوباية دقيق وملح وفلفل وكمون وشطه

ونضبط سمك العجينه بالميه بالراحه لغاية ماتبقى زى المهلبية تقريبا

وده طبعا مع التقليب المستمر بالمضرب السلك

نيجى بقى على زيت عميق يغلى ونمسك الجمبرياية من ديلها

ونغطسها فى الخلطة وننزلها بالراحه فى الزيت المغلى

ودى عملية عايزه خفة يد وسرعه

لان الجمبرى مش هايحتاج اكتر من 3-4 دقايق فى التحمير

وبالتالى ممكن نحمر كل 8-10 واحدات فى المره

والا هاتلاقى اول واحده اتحرقت ;)

ونرص على فرشة بقدونس مفرى ونقابله بعصير ليمون خفيف

وبالف هنا وشفا

mfb:

[Reham]

الف الف الف شكرللعم بودا الخطير :D

وآسفه جدا علي زني الكتير :)

بس اصلي بحب اوضب هعمل ايه في عزايم رمضان

كل سنه وانتم جميعا طيبين

ربنا يبلغنا رمضان ويقدرنا علي صيامه وقيامه ويتقبل منا صالح الاعمال

آمين

جزاكم الله خيرا وآسفه علي الالحاح :)

[bodda]

كده ممكن ازعل منك بجد يا ريهام

:) :D :)

والله انا ببقى سعيد جدا بأى طلب اقدر اعمله هنا

بس ضيق الوقت هوه اللى ساعات بيمنعنى

وبعدين ولا يهمك من رمضان

ده هايبقاله شغل مخصوص انشاء الله

وهانفطر مع بعض كلنا هنا يوماتى

:D :D :P

وصباح الفل

:D

[Osha]

السخينة مش عربي خالص يا استاذنا

دي مصرية جدا

عامة برضه الفايدة اني عرفتلك حاجة مش عارفها

تصدق لما قلت وصفة القلقاس كان نفسي آكله

لكن لم يتم العثور عليه هنا نهائيا

تفتكر ممكن الاقيه في المجمد?

طبعا عرفت الطلب الجاي!!

اسمه ايه بالعنجليزي دام فضلكم

:D :D :D

[bodda]

ALOKASIA

[شاعرالرومانسية]

السلالالالالالالالالالالالالالالالالالالام عليكم ورحمة الله،،،،

والله يا جماعة وحشتونى ووحشتنى ريحة مطبخنا العامر...

انا كنت مسافر سفرية قصيرة كدة ولسة راجع ... لقيتكوا بتتكلموا على حبيب قلبى " القلقاس " ودة بقى من احب الاكلات لقلبى ...زى البامية كدة وأكتر

اوشا العزيزة ... انا عرفت موضوع العربية ..يلا قدرالله وماشاء فعل .. معلش ربنا يعوضكوا خير .. ابقى طمنينا على اخر الاخبار...

وسمعت كمان انك بتدورى على القلقاس عندكوا وطبعا كالعادة مش لقياه .. واهو شيفنا الهمام جبلك اسمه بالعنجليزى اهو ومبقاش ليكى حجة خاااااااااااااااالص

بصى يا ستى انا حقولك على طريقتى فى عمايل القلقاس ويبقى عندك طريقتين خشى المختبر بتاعك وجربى فية زى ما انتى عاوزة..

اهم حاجة ان القلقاس بيحتاج دسم يعنى شوربة الفراخ ما تصدش معاه.. يعنى تفكى الكيس وتعملية على شوربة لحمة ..وياحبذا لو كان معاها ماسورة ... "عظمة الساق يعنى" وتسلوقيها مع اللحم مع مستكة وحبهان وبصلاية مع فلفل اسود وتصفيها بعد كدة فى حلة فاضية وتسيبيها تغلى لحد ما توضبى القلقاس

نيجى بقى للمهم ..

تقطعى القلقاس زى عزيزنا بودا ما وصف وتخدى بالك انك اما بعد ماتقطعية تشطفية كذا مرة بميه دافية واخر شطفة بمياة باردة .. أو ماتخليش ماية توصله خالص يعنى تقطعية بسكينة ويبقى جنبك فوطة او منديل تمسحى بيه السكينة كل ما تتبل اثناء التقطيع وحتكون الشوربة غليت تعصرى عليها نصف ليمونة او ليمونة كاملة حسب الكمية وتقومى رامية القلقاس المقطع فيها لحد ما يستوى ... بعد كدة تكونى مخرطة السلق ( بمخرطة الملوخية وفى الحالة دى تصفى ميته الخضرا دى على الشوربة او تقطعي اوراقة زى الخس كدة ) وتخرطى معاه حزمة كسبرة خضرا .. بتدى طعم حلو

وتيجى لطاسة تحطى فيها كمية محترمة من السمن ( لان السلق غول سمن ) وتقلبية فى السمن ومعاه راس توم مفرى مع معلقة كسبرة ناشفة وتقلبية لحد ما لونى يسود كدة وينشف .. وكل ما يحتاج سمن اديلة وامرك لله..

بعد كدة تقومى دلقه التقلية دى على حلة القلقاس بعد ما يكون شبة استوى وتسبليه معاه غلوة

وياسلام بقى لما تكلى معاه قرن فلفل اخضر حامى............

بالهنا والشفا مقدما

[bodda]

ايه يا عم الشاعر

ده انت طلعت حُجه فى القلقاس

:blink:

بس مش عارف الناس راحت فين ؟؟؟

ولا بطلوا ياكلوا ؟؟؟

ولا استسهلوا المطاعم ؟؟؟

:D

فين الطلبات يا عالم ؟؟؟؟

صباح الفل

:blink:

[شاعرالرومانسية]

ايه يا عم الشاعر

ده انت طلعت حُجه فى القلقاس

:blink:

بس مش عارف الناس راحت فين ؟؟؟

ولا بطلوا ياكلوا ؟؟؟

ولا استسهلوا المطاعم ؟؟؟

:D

فين الطلبات يا عالم ؟؟؟؟

صباح الفل

:blink:

<{POST_SNAPBACK}>

ولا دة ولا دة يا عزيزى ،،،،

الناس...

بعيد عنك...

نفسها انسدت

[Osha]

ياعم حســــــــــــن حتسد نفسنا ليه بس :D

احنا اهو والله يا عزيزي بودا

ولو اني زعلانة منك عشان ماردتش عليا في الميل

لكن برضه سماح يااهل السماح وقلب الأم عمره مايعرف القساوة

وبعدين اول شهر في المدارس تلاقيه دوشة ولخبطة عمال على بطال

دا غير انك لازم تكون عرفت ان عربيتي اتسرقت من حوالي 12 يوم

وكنا وما زلنا في حالة لخبطة عشان التأمين والتقرير بتاع البوليس والله

عامة انا باطالبك بصفة رسمية ان تقوم باعطاء الأمهات قارئات هذاالباب الجميل مزيدا من الوصفات لما بين الوجبات حيث يحلو للعيال الخونة طلب الأكل عمال على بطال وكأنهم في مجاعة

عاوزين كام حاجة خفيفة وفي نفس الوقت صحية

اصل ابني النهارده قالي انه بيموت في الجانك فوود !!

على فكرة انا لقيت بيف برجر بتاع نباتيين وعندي فضول - كالعادة يعني - اعرف مكونات هذا الشئ وهل طعمه يمكن ان يكون زي العادي والا لأ

[bodda]

عندك حق يا بو على

:blink: :blink: :sad:

حمدالله عالسلامه يا اوشا

فعلا ماعرفش حكاية العربية دى

بس التأمين انشاء الله يساعدكم اوى فى امريكا

التأمين هنا فى مصر يقولك ربنا يعوض عليك

ولو قولتيله طب فين قيمة التأمين؟؟

يقولولك يعنى برضه هاتقبلى العوض؟؟؟؟

:) :D :lol:

أما موضوع الميل ده فأول مره اسمع

يظهر تاه مع البوسطجية :D

لكن الف سلامه للكل

أما الجانك فوود فده الشر الذى لا مفر منه مع العيال

وبالنسبة للبرجر النباتى فأساسه فول الصويا

يعنى بروتين نباتى وطعم اللحم وشوية توابل

يعنى غير ضار وله فايده بروتينية

طالما العيال مش عايزين الهُبر :lol:

وده طبيعى فى كل البيوت... فلا تقلقى

وحاضر لوصفات بين الوجبات

صباح الفل

:wub:

[Osha]

كل شيخ وله طريقة يا عمنا

انما في النهاية كل بتوع التأمين فيهم نفس الخصال

يعني هنا الكلام دا حصل يوم الجمعة علىما اخدنا العربية الايجار كان يوم الأربعاء !! وكمان لا حد بيرد على تليفون ولو حد عبرنا يبقى الوحيد اللي ممكن يحل المشكلة هو اول واحد رد عليك ودا للأسف مشغول مع اللي حصل بسبب الاعصار!!

وياسلام على الطلبات المستفزة

عاوزين آخر فاتورة غيار زيت

لو البوليس قبض على اللي سرق العربية حتقاضيه والا لأ

المهم

اناوالله باعته الميل بقالي ييجي 4 ايام واصلا لاني عارفة اني حولة في العناوين عملت ريبلاي من واحد من بتوعك

حسن

تسلم ايديك على القلقاس الجمييييل اوي اوي اوي

ادعي لي بس الاقي القلقاس نفسه في فارمرز ماركت حيث كل احلام الخضار والفاكهة ممكنة

بس مشواره علقه

في انتظار الجانك فوود الصحي

وكمان انا في طريقي اجيب لكم وصفات اكل من نيبااااال عشان الحبايب

[bodda]

العزيزه أوشا

بين الوجبات ... بس للنحيفات

:)

اهم حاجه للاكلات دى انها تكون سهله وسريعة التحضير

وفى نفس الوقت طعمه وتجرى اريق

تالت حاجه ماتعمليهاش بكميه كبيره والا هاتفقد بريقها مع العيال

العيش الشامى بيعتبر مثالى لمثل هذه الوجبات

فنشق الرغيف وشين ونتعامل مع كل وش على حدى......

مثلا ندهنه بالزبده ( سواء العادية او زبدة الفول السودانى لو بيحبوها )

وفوق الزبده ممكن مربه ونلفه ونبرمه وبالهنا

او نحط لحمه بارده بس نفرفطها مع ملح وفلفل وشوية زيتون مفصص

أو نحط تونه مفرفطه وزيتون ورشة مبشور جبن رومى

وفى كل الحالات نبرم وش الرغيف بعد فرد الحشو عليه بالكامل

وممكن جنب الساندوتش الملفوف ده شرايح خيار او صباع موز او شريحة طماطم

يعنى التنويع فى اللعبه دى سهل

خاصة لو محضرة علبتين تلاته فى التلاجه بحشوات مختلفه

بس الزبده تكون بره التلاجه لسهولة الفرد بسرعه

بس انا خايف عليكى تلعبى معاهم اللعبه دى وتدعى عليه

:D

صباح الفل

:ph34r:

[Folana]

اصفهان..احمران...كشجى قٌردان..سجص..صجعان حمدان بتنجان فالد..