اطلب اى وصفه على بالك .. تلاقيها قدامك

[Folana]

صباح شريف نزلاء مطبخ عمران

لامؤاخذة ياجماعة ..اصل لسانى اتعوج ونسيت العربى خالص ..معلش بقى اصلى بقيت استنبولية مأصلة...

وحشتونى جدا كلاتكم .....

انا قلت ادخل اقرا كلامكم الجميل واصبح عليكم كلكم نفر نفر ..وبعدين ابقى اشارك معاكم ..

على فكرة ..جدى الباشا محمد على بيسلم عليكم ...وخالتى ام ابراهيم ..شرحه ..بتبعت لكم الف مليون سلام ..

اوشا ..السخينة دى انا عارفاها ...متهيالى كده ان صحتت الذاكرة ...عبارة عن عيش بيتحمر فى السمن وتدلقى عليه عسل ..او ميه بسكر لحد مايشربها ..وممكن تضيفى عليه جوز هند ..

بس دى اكلة صعبة جدا ..هى مش اكلة ..هى لكمة ..ايه اللى فكرك بها ياترى ياهل ترى ؟ :D ..اوعى تكون سرقة العربية اثرت على الميزانية ولا حاجة ...

ربنا يعوض عليكم انشاء الله ..قدر الله وماشاء فعل ....

ولنا عودة انشاء الله ......صباحكم جميل ........ :D

تم تعديل 15 سبتمبر 2005 بواسطة folana

[Folana]

يعنى مافيش سلامات ولا طيبون ولا كيف الاحوال!!!!!!!...معلش يازهر ماهو الغايب مالوش نايب...... :D :D

اوشا

انا قريت كلامك عن السخينة تانى ..اعتقد ممكن بقى بعد ماتحمرى العيش فى السمن تسقيه بالحلبة المتحلية بالعسل الاسود..لحد مايشربها ويبقى طرى ..تصورى مش قادرة اكتب الوصفة..دى اكلة تقيلة جدا.... :

بالنسبة للشعرية باللبن ..فاعتقد برضه ان دى لها شعرية خصوصى ..شعرية فلاحى بتكون سميكة وملعبكة فى بعضها ..بتتباع فى السوبر ماركت دلوقتى ...برضه متهيالى ..(اصل مقضية نص حياتى تهيؤات)انك تسلقيها نص سلقة وبعدين تصفيها وبعدين تدلقى عليها اللبن الساخن والمحلى بالسكر ومكسرات بقى لو عايزة ....

او تحمريها فى السمن وتدلقى عليها اللبن كما سبق فى طاجن وتدخليها الفرن وبعدين تحطى حتة قشطة فوق الوش زى مامت على كده ..وتسيبها لحد ماوشها يحمر...وان لم تتوافر الشعرية الفلاحى يبقى تحمرى الشعرية العادية وتكملى .....بس ايه الحكاية ..انتى خسيتى للدرجة دى وعايزة تعوضى ولا ايه ..دى اكلات تودى فى داهية ....

شاعر الرومانسية..بالنسبة للقلقاس فماذا اقول بعد كل ما قيل ..

انا لى تحفظ واحد بس سعادتك...وهو فى غسيل القلقاس ..فعلا بعد غلى الميه نحط القلقاس ونسيبه شوية صغننة ..بس من غير ملح..وبعدين تفضلى بقى تدعكى فيه بايدك وتدلقى الميه ...وتشطفى تانى وتدعكى بايدك وتدلقى الميه ..كذا مرة لحد ماالميه تبقى ميه خفيفة ..يعنى مافيش فيها حاجة وبعدين تشطفيه بميه ساقعة وتسوى زى ماقال شاعرنا العظيم ...اهم حاجة غسيل القلقاس علشن تعرفى تاكليه ...

بالنسبة لغسيله على الناشف انا سمعت الحكاية دى بس اللى قالى عليها حذرنى من ان تطوله نقطة ميه واحدة ..انا الحقيقة ماحبتش اجربها قلت الغسيل اامن ......وشكرا...

[Reham]

مساء الفل ياشباب المحاورات

حمدالله عالسلامه يافولانه والله انا سألت عليكي من فتره لاني لقيت انك اختفيتي فجأه

اهلا بك مره اخري

يابوداااااااااااااااااااااااااا

ارحمني الحاجات السريعه اللي بين الوجبات دي فعلا تودي في داهيه

وبما ان العيال عندي مساميم بعيد عنك فانا اللي هقوم بالواجب :D

وبما انك بتسأل علي الطلبات فأنا عايزه طريقة عمل الفراخ الفاهيتا لاني أدمنتها لما كنت في مصر وللأسف مش لاقبه حد بيعملها هنا.....انابقول يمكن ليها اسم تاني !!!!مش عارفه

المهم عايزه كده كمان شوية ساندوتشات منوعه اقدر اعملها بالكتير في ساعه لان الجو عندنا بدأ يتحسن واحنا احيانا يطق في دماغنا نطلع علي الكورنيش ونتعشي هناك وانا زهقت من كل الاكلات اللي هناالمحصوره في الشاورمات والبروست والكنتاكي والبيتزا والمعجنات...........الخ

يعني عايزه حاجه جديده كده وتنفع عشاء ومش مهم لو كانت دسمه بس تكون ساندوتشات

ويدوم عزك

[aynad]

اناااااااااااااااااااا جيييييييييييييييييييييييييييييت

وحشتنووووووووووووووووووووني مووووووووووووووووت

و ايه يا عم شاعر الرومانسية فتحت نفسي علي القلقاس تسلم ايدك يا رب :D

و ازيك يا بودا و ايه اخبار المطبخ ماك انا بقالي شهر بالظبط مدخلتش مطبخ اصلي بعيد عنك كنت اجازة في مصر :D ...

ازيك يا اوشتي يا حبيبة قلبي وحشتيييني موووووووت :)

[Osha]

سلامات شريفات فولانات هانم

كيف احوال في آسيتانة ستو هانم

شوجوزال شوجوزال

السخينة دي انا اكلتها زمااااااااااااااااان قوي قوي عند ناس في مصر وبمرور الزمن لم أعد أتذكر سوى اسمها

واذا كان يعني فيها حلبة يبقى الأحسن اني انسى كمان اسمها وبلاش وجع دماغ

ريهام

بتروحي الكورنيش لوحدي ياخاينة? عامة بلاش كوبري الخليج منعا للمشاكل

ايناد

انا كنت خلاص يئست من دخولك المطبخ تاني وقلت البنت دي بقت بريمو مطبخ وماعدتش محتاجة لنا خلاص ومش بعيد تكون راحت منتدى تاني عملت فيه طباخة بريمو بقى ومحدش قدها

انت كمان وحشتيني - فين أسئلتك

[Osha]

اسف مشاركة خاطئة من حساب رشا

حسام

تم تعديل 16 سبتمبر 2005 بواسطة Osha

[Fencer]

و الله زمان يا مطبخ

الواحد شايف قلقاس و سخينة و سندوتشات و كورنيش و ناس راجعة من الاجازات سخنة و ناس جاية من الاستانة و هيصة

يجعله عامر

انا لي بعض الاستفسارات للاخ العزيز بودا اولهم هل من طريقة لطهي الكات فيش و هل الكات فيش هي القرموط اللي عندنا في مصر?

و عايز اعرف رأيك في مدى امان مياه المجاري المعالجة و التي يعاد صبها في الانهار الجارية و هل تسبب تلوث المياه و من ثم السمك? و الا ده شيئ متعارف عليه و الا ايه الحكاية لحسن مستقبل الصيد هيضيع و يضيع معاه المحصول اللي بيطلع

انا عايز اجابة شافية من متخصص

تشكرات تشكرات

[bodda]

مع احترامى لاسئلة الحبايب كلهم

لكن بما ان فيه سؤال عن الصيد والسمك

:wub:

فماقدرش اسيبه .... :D

العزيز الغالى حسام

الكات فش من نفس عائلة القراميط وان اختلفت السلالة

وبالتالى فلحمه هوه هوه واحسن حاجه له الطواجن بالبصل

;)

أما موضوع مياه المجارى المعامله وعلاقتها بالسمك

فعبقرية السمك او بالاصح اللى خلقه انه يفلتر اى شئ ضار

ويحجز فى الكبد..

وبالتالى استبعاد الكبد من السمكه المشكوك فى مصدرها كفايه

ايه رايك ؟؟؟ سهله .. مش كده ؟؟

وبالف هنا وشفا واوعى تبعد عن الصيد انا بجهز نفسى اهو

:D

[Fencer]

العزيز الغالي بودا

الله أكبر و سبحان الله يعني السمك لا يتأثر و ان كانت المياه فيها شيئ ، ده كلام جميل و مطمئن و ربنا يعمر بيتك ، لكن اللي انا مستغرب له ان فيه ناس بتمتنع عن اكل السمك اللي بيصطادوه بحجة انه ملوث و هل التلوث الكيميائي كمان نفس الشيئ و الا ده هيقضي على السمك من اصله و لو انت عارف نوعية المواد الملقاة في المياه هل على اساسها ممكن تحدد تاكل و الا ترمي??!!! :wub:

الموضوع ده ليس بعيد عن المطبخ في اعتقادي بل دي ثقافة مطبخية متقدمة لتجنب الشك و الوسوسة ناحية الاكل

ايه رأيك طالما فتحنا في الموضوع ده تدينا نبذة عن مظاهر فساد او تلوث اللحوم و الاسماك و الواحد و هو بيشتري سمك او لحمة ازاي يعرف ان السمك طازة و الا مجمد و متسيح و اللحمة اذا كانت تمام و الا لا

ده موضوع مهم و يهم اي واحد فينا قبل ان يبدأ عمليات الطهي

و متنساش السؤال السمكي اللي في اول الموضوع :D

[bodda]

العزيز الغالى حسام

العناصر الموجوده فى مياه المجارة اساسا هى عناصر ثقيلة

يعنى زئبق و كادميوم و الرصاص وغيرها ودى كلها تروح على الكبد

يعنى لحم الاسماك لا يضار منها

لكن الصرف الكيميائى زى مخلفات المصانع والمدابغ

فده غير آمن طبعا لأن منه مواد تبقى فى العضلات للاسماك

بس متهيألى عندكم موضوع القاء كيماويات ده صعب شويه !!!!!

أما مظاهر فساد الأسماك

فأول شئ عدم لمعان العين

ثانيا وقوع قشور السمكه حولها

ثالثا لمسه بالاصبع على الجسم تعلم بحفره

لان السمك الطازج تضغط عليه يرد تانى على طول

وعامة السمكة الفاسده مفضوحه زى ما بنقول هنا فى السواحل

يعنى فاضحه نفسها

لونها مطفى ومافيش لمعان وتمسكها تلاقيها طريه تحت صوابعك

أما المجمد ومتسيح فلو كان اتجمد طازه فلا يبان لانه يحتفظ بطزاجته

والعكس صحيح :D

مساء الفل

:wub:

[Osha]

ياسلام سلم :D

هي التفرقة العنصرية وصلت لغاية هنا :D

طيب يا عم بودا انت وحسام ليكم حساب :wub:

ازاي تطنش القوارير الرقيقة وتتفرغ للرد على حسام ;)

ماشي حسام مالوش صيد سمك لمدة شهر من تاريخه قابل للتجديد :)

وريني بقى حيطبق كلامك على ايه :)

ودمتم جميعا بخير يا كل رواد المطبخ حريم اولا ثم الرجال :)

[Fencer]

العزيز بودا

نسيت اقولك اني مشغول الفترة اللي جاية و غالبا مش هاقدر اصطاد قيمة أد شهر كده عشان عندي شغلانة مطولة فاهمني انت

صباحه جميل :wub: :D

تم تعديل 16 سبتمبر 2005 بواسطة Fencer

[شاعرالرومانسية]

العزيز بودا

نسيت اقولك اني مشغول الفترة اللي جاية و غالبا مش هاقدر اصطاد قيمة أد شهر كده عشان عندي شغلانة مطولة فاهمني انت

صباحه جميل :D  :)

<{POST_SNAPBACK}>

ولايهمك يا عزيزنا فنسر ...

اطلع انت بالشغلانة اللى عندك .. واحنا نجيبلك البحر لحد عندك... :D

عشان تصـطـــــــــــ :) ـــــــــــــــاد براحتك ومن غير ما تزعل ............. صاحب الشغلانة :wub:

الاخت اوشا :

ان شاء الله حتلاقى القلقاس فى الاسمو اية دة اللى حتروحية وعلش لجل القلقاس نمشى نمشى مع الناس.. ;)

الاخت اينــــاد...

بالهنا والشفا يا استاذتنا..

الاخت ...

الكريمة ...

العائدة بعد غيبة ...

من بلاد البشاوات .. ايفات ايفات

ومن عند جدها الثامن عشر ... محمد على الكبير ... كبير

فولالالالالالالانــــــــــــة هانم،،،

حمدالله على السلامة افنظم...نورتى المحروسة

اما بخصوص .. غسيل القلقاس ففعلا اياكى لو مش حتغسلية كويس وتكتفى بالتنشيف انكى تجيبى ناحيته مية... وبالنسبة لطريقة غسيلك فطبعا كويسة بس مشكلتها الوحيدة ....انها " بتربى عضلات.. :) "

[bodda]

العزيز حسام

ربنا ما يحكم فيك مفتريه .... ولا يمنع من بيتكم الصياديه

ويبعد عنك شر اليد الفولاذية ..... اللى مانعه السمك ومشغله المهلبية

**************

فاكره انها بتعاكسنا المستبده ..... مع ان السمك أحلى من السمن والزبده

ياكله الراجل الصعيدى أبو لبده..... ويتفشخر الباشا ويقول ده أفيد من الكبده

**************

ليها يوم هيه واللى معاها..... يبان الحق وينصر الرجاله وبهاها

تتهزم هيه والستات اياها..... ويعيش الرجاله حرين تحت سماها

**************

صباح الفل

:)

[bentmasria]

شيف بودااااااااا

من فضلك موش عاوزين لخبطة فى التخصصات

الشعر والزجل مكانه فى القسم بتاعنا

موش جنب المحمر والمشمر واطباقكم الطعمة

المهم

انا وصلتنى وصفة جربتها طلعت حلوة قلت احطها عشان اخلى بودا يكتب لنا 15 نوع كمان ولا حاجة كده

ده نوع بيتزا بيقولوا مكسيكى وعجبت ابنى قلت لو الشيف يظبطهالنا اكيد حتكون فله ويسعد صباحكم يارب

البيتزا المكسيكية

هنا نوع العجين يختلف وهذا هو العجين الخاص بالبيتزا السميكة لذلك لا نضغط عليه كثير عند الفرد، وأي بيتزا مكسيكية غالبا ماتعمل بهذه العجينة.

المقادير

العجينة

كوبان من الدقيق المنخول

4 ملاعق طعام زبدة

1 ملعقة طعام زيت ذرة

1 ملعقة طعام خميرة

1 ملعقة صغيرة سكر

3/4 كوب ماء دافئ

ملح

الحشوة

1 كوب صلصة البيتزا

1 فلفل رومي أخضر مقطع وفلفل حار (حسب الرغبة)

2/1 كوب فطر مقطع (مشروم)

2/1 كوب جبن تشادر مفروم ( او موتزاريللا)

طبقة الوسط عبارة عن كوبين من كلاً من (خسّ ، قطع طماطم ، قطع زيتون أسود ، وقطع جبن تشادر)

الطريقة

تذوب الخميرة والسكر في الماء الدافىء وتغطى وتترك فى مكان دافىء حتى تخمر. .1

يخلط الدقيق بعد نخله مع الملح والزبدة ويفرك بأصابع اليد حتى تختفي الزبدة في الدقيق. .2

يعجن بالماء المذاب فيه الخميرة حتى تتكون عجينة ملساء وناعمة. .3

تغطى وتترك فى مكان دافىء لمدة 3/4 ساعة حتى يتضاعف حجمها. .4

يسخن الفرن. يدهن القالب المجوف من المنتصف بالزيت. .5

تدمج الصلصة بالفطر والفلفل بنوعيه. تفرد العجينة في القالب بحيث ترتفع الأطراف من الأعلى وتسكب الخلطة وترش بقليل من الجبن ثم تغلق الحواف على بعضها جيداً، وبواسطة السكين نقوم بعمل فتحات مع ملاحظة ان لاتكون كثيرة وكبيرة حتى لا تخرج الحشوة للخارج، ترش من الخارج بباقي الجبن. .6

تخبز لـمدة 30 إلى 35 دقيقة أو حتى تنضج. .7

نخرجها من القالب بحرص ونملئ المنتصف بالخضار المعد وتقدم. .8

ممكن حشو الأطراف بالجبن شيدر وتكون بذلك مايسمى ( ستفت كرست) وبالهناء والعافية. .9

انا مستنية التعديلات :) :unsure:

مادا ومانا

[Osha]

ماشي - حلو قوي الكلام دا ياعمنا

وكمان تناصره شعريا

طيب خلي بالك من نفسك من هنا ورايح

وبعدين دي منافسة رسمي للأخ حسن وانت عارف انه شراني

الا الفرق ولو مافيهاش جهل مني بين الفيتوتشيني والمكرونة العادية

اصلي باشوفه عليه صوص ابيض ومش عارفة هو بشاميل والا ايه

ياسلام لو عرفنا الفرق دامت مائدتكم عامرة بالف خير

[bodda]

العزيز حسام

ربنا ما يحكم فيك مفتريه .... ولا يمنع من بيتكم الصياديه

ويبعد عنك شر اليد الفولاذية ..... اللى مانعه السمك ومشغله المهلبية

**************

:)

فاكره انها بتعاكسنا المستبده ..... مع ان السمك أحلى من السمن والزبده

ياكله الراجل الصعيدى أبو لبده..... ويتفشخر الباشا ويقول ده أفيد من الكبده

**************

:unsure:

ليها يوم هيه واللى معاها..... يبان الحق وينصر الرجاله وبهاها

تتهزم هيه والستات اياها..... ويعيش الرجاله حرين تحت سماها

**************

:unsure:

صباح الفل

:blink:

تم تعديل 18 سبتمبر 2005 بواسطة bodda

[bodda]

العزيزه بنت مصرية

لعلمك انا عن نفسى باحب المكسيكية عن الامريكية

وهيه فى الحقيقه اقرب للفطيره عن البيتسا

بس الذ الذ الذ

وطبعا الحشوه ممكن تتغير بالف شكل تانى

من لحوم لفراخ لتونه لبسطرمة بالفلفل الاخضر وغيرها .. وغيرها

تسلم ايدك

مساء الفل

:D

[Fencer]

العزيز بودا

السمك يا جماله بيعوم في النهر

و انا ناوي اغيب عنه يجي شهر

و الشهر في عرف الصيادين دهر

ده الصيد عروسة يندفعلها من الغالي مهر

دلني يا صاحبي اخلص ازاي من ده القهر

[bodda]

والله يا حسام ما بايدينا خلقنا تعساء

ربنا رزقنا باللى يحرم الهواء قبل الماء

يكرهوا الابتسامه ويكشروا من الصباح للمساء

ولو الحاجه عجباهم يقولوا عالطعميه شواء

ولو مش عاجباهم يقولوا عالديك الرومى ماء

يجرى ايه لو الدنيا فضيت منهم :D

غير انه هايفضل كل حاجه حلوه من الارض للسماء

:) :) :D

صباح الفل