اطلب اى وصفه على بالك .. تلاقيها قدامك

[شاعرالرومانسية]

ازيكوا ياشباب ...

كل عام وانتوا طيبين ..رمضان جانا :blush:

وان شاء الله يكون شهر كريم علينا وعليكوا بامر الله

ومحضرين لكوا اكلات ووصفات جديدة ولذيذة . يلا حضروا الورقة والقلم :wub:

اوشا العزيزة،،،

بخصوص موضوع الارز بالخلطة انا بضيف حاجة على طريقة شيفنا العزيز بودا

انا بعمل كراميل بملعقة سكر لكل كوب ارز واقلبة فى الحلة لحد مايسيح ويبقى لونه بنى (كراميل)واقوم حاطط المية.. ومكمل عادى باضافة الارز والتوابل ..بس ممكن ازود الملح شوية عشان طعم السكر اللى عملناه ..ودة حيدى ارز لون كهرمانى يجنن وطعم لزيز كمان ونكمل بقى تحمير المكسرات وحطها على الوش....وبالف هنا وشفا مع الديك :blush:

[Folana]

السلام عليكم ورحمة الله .......

خير ياجماعة ..انتم فين ....ولا علشان اخر الشهر يعنى والحالة جيم ؟...

اوشا ..ريهام ..وحشتونى ياجماعة ..عساكم طيبين ..الاخ فنسر ..متشكرة على توضيح موضوع الانبوبة ......بودا ..متشكرين على الوصفات الهايلة دى بس شد حيلك بقى فى رمضان وعايزين نصحى من النوم نلاقى المينو متحضرة ...وياريت تبقى اكل صحى ..خلينا نخس شوية ....

وكل سنة وانتم جميعا طيبين ..وصوما مقبولا انشاء الله

اخونا شاعر الرومانسية حسن بيه قصايد.. :blush:

معلش بالنسبة للرز ...مافيش داعى تكتر الملح الا لما تشوف ايه الموضوع ...انا باعمله برضه كده وباحرق له السكر زى ماوصفت بالظبط.. بس الملح عادى ....لذا لزم التنويه....

ولنا عودة انشاء الله........... :blush:

[Fencer]

وعليكم السلام

الناس واخدة هدنة عشان رمضان يظهر و لكن اول طلب رمضاني هيكون مني و هو كيفية عمل القطايف سواء من عجن و خبز لغاية ما تبقى قطايف نية و بعد كده انا هاتصرف :D

[Osha]

بسم الله الرحمن الرحيم

عذرا ليكم جميعا على التأخير

بودا

اشكرك على الوصفات والله ماخدتش بالي انها مكررة - معلش انت عارف الزهايمر والسن بقى يا خويا

شاعرنا العزيز

ِشكرا على وصفة الرز - بس بصراحة برضه مش بالعة قصة الكراميل دي على الرز مش عارفة ليه

فولانتي حبيبتي

ليه مش باشوفك على المسنجر - المذاكرة والعيال بقى - معلش حاولي برضه

على فكرة انا موقفك بتاع السكن عشته لمدة 3 سنوات جالي فيهم ضغط عالي

حسام فينسر زوجي العزيز

ارجوك حاول تبقى حنين في الطلبات عشان انا لو مشيت ورا الحاجات دي اشي ديك رومي على قطايف على مش عارفة ايه المرة الجاية

صدقني لو مشيت عليها حنِِشحت سوا عند الاشارة اياها

بس برضه فكرة حكاية القطايف دي مافيش مانع نجربها برضه

ودمتم بخير جميعا يا خلايا المطبخ الشرفاء الأحرار

[bodda]

الاخوة والأخوات حبايبنا فى مطبخنا اللذيذ

كل سنه وانتم طيبين ومتجمعين على خير باذن الله

طبعا عملية كرملة السكر لتلوين الرز بالخلطة صح 100%

وزى ما شاعرنا الجميل قالها بس انا مع فلانه فى انها لا تؤثر فى الملح

وماتخافيش منها يا اوشا هيه كده

:D

وللعزيز فنسر

القطايف

مكونات القطايف هى ميه ودقيق وخميرة وذرة ملح

وكيس خميرة جافة يتدوب فى نص كوباية ميه دافيه عليها معلقة سكر

ونسيبها نص ساعه للتفاعل فى مكان دافى

ونجيب كيلو دقيق فى حاجه غويطه وندلق عليه الخميرة بعد ما اشتغلت

ونستعمل ماء فاتر ونعجن لغاية مايبقى القوام زى ما بتشوفه عند بتاع القطايف

يعنى يمكن صبه بالمغرفه ...بس مش شوربه :sad:

ونرش على العجينه نص معلقة ملح ونقلب ونغطيها ونسيبها فى مكان دافى

مش اقل من ساعه

نيجى بقى لعملية الخبيز ودى انا عملتها فى امريكا والحاجه ام الاختراع

يا اما عندك عين نار طويله وتحط عليها صاجه تخينه ودى بصراحه صعبه

لان اى صاجه او صينيه رقيقه هاتلسع القطايف

والاسهل فى طاسة تيفال واسعه وتمسحها بقطعة قماش بالزيت بين كل واحده والتانيه

وتسخنها عالنار وتصب بالمغرفه عجين على قد حجم القطايف المطلوبه

يعنى عايزها كبيره او عصافيرى ... انت وشطارتك فى الصب

وانصحك تعمل الكلام ده بنص كيلو دقيق بس علشان ما تدعيش عليه

:D

والحشو بعد كده طبعا معروف يا اما بالمكسرات او المهلبية او الجبنه الريكوتا

وكل سنه وانتم طيبين

مساء الفل

:D

[bodda]

هانبدأ وصفات الاعداد لرمضان بدرى

الجبنه الريكوتا لحشو القطايف

تجيب كيلو لبن وتعصر عليه نص ليمونه

وتسيبه فى حته دافيه لغاية ما يقطع يعنى يحصل تجبن

وتجيب شاشه كبيره تفردها فى مصفاه وتدلق اللبن المتجبن فيها

وبعد شويه تلف الشاشه وتعملها صره

وتعلقها فوق الحوض :D او اى حته تصفى باقى الميه

وتروح دالقها فى طبق واسع وبالشوكه تعجنها فى بعضها كويس لغاية ما تنعمها اوى

وهيه دى الجبنه اللى تستعمل فى حشو القطايف او الكنافه

ويمكن حفظها فى التلاجه بالكتير يومين

وكل سنه وانتم طيبين

:D

[bodda]

ياريت نوضب لرمضان بعض الحاجات اللى تسهل الشغل

زى تجهيز برطمان كبير فيه عسل للكنافه والقطايف

بدل ما كل مره نعمل شويه .... ده اسهل بكتير

وطبعا عباره عن مقدار سكر : لمقدار ميه وبعد السوى على النار

عصير نص ليمونه :D

ولمعرفة سوى العسل نسقط نقطه منه فى كوباية ميه بارده

لو تشتت النقطه يبقى لسه شويه

وعلامة السوى هو سقوط النقطه متكوره فى الماء

الحاجه التانيه :D

هى تجهيز خلطة مكسرات متحمصه فى السمن البلدى

يعنى لوز وجوز وبندق مكسر مع زبيب ومتحمرين فى شوية سمن بلدى معتبر

ونملا بيهم علبه زجاج او برطمان فى التلاجه

ونسحب منهم عند عمل الكنافه او القطايف

برضه يسهل العمل

:D

وكل سنه وانتم طيبين

:sad:

[Salwa]

مساء الخير ياجماعة الخير ..

بجد بجد ربنا يكرمكم ...انا كنت بكلم نفسى واقول ياترى نظام الاكل السنة دى حايكون ازاى ؟؟؟ وخصوصا ان الولاد عاملين لى لستة عشرين صفحة ووضعوها فى الانترنت مع مستنداتى ...كل واحد كاتب طلباته من دلوقت ...بس هم متفقين ان اول يوم لابد من الشوربة وصينية الجلاش ...والكنافة باللوز فقط ....ده اساسى غير باقى اللستة .

ممكن ياسيد bodda اقول حاجة ؟؟ وقوللى رأيك ايه ...

بالنسبة لطريقة الأرز بالخلطة ....انا ايضا طريقتى تختلف بعض الشئ ..

لأنى اضيف للبهارات مبشور قشر البرتقال ...بشر صغير جدا لا يرى ..من اصغر عيون فى المبشرة ..ثم اعصر البرتقالة عصير عادى واحتفظ بها .

بالنسبة للبهارات فأنا استعمل بهارات خلطة اللحم ..اى..(( جوزة الطيب وورق لاورل وقرفة وحبهان وقرنفل وفلفل اسود ))..

نحمر جزء من الأرز فى الزبدة وعندما يصفر اللون بعض الشئ نحمر اللوز والصنوبر (( طبعا اللوز يكون مقشور .)) لا اضيف بندق او عين جمل ....ممكن اضافة زبيب .

ثم نضيف مبشور البرتقال ونقلب الخليط ثم نضع باقى الارز ونضيف كمية المياه بحيث ان يكون لكل كوب ارز كوب ونصف مياه ..ونضع الملح ...وعندما يبدأ فى تشرب المياه نضغه على نار هادئة ..ثم نضيف عصير البرتقال ...

ايضا فى بعض الاحيان بنكون جهزت اللحم حتى ينضج فى اناء آخر ...

ونعمل الارز بنفس الطريقة السابقة لكن قبل اضافة باقى الارز نضيف اللحم وعندما يتشرب المياه ...نهدى النار .

بجد بيكون تحفة ...

ايه رايكم ؟؟

[bodda]

العزيزه سلوى

طريقتك جميله طبعا وانا بحب استعمال بشر قشر البرتقال

بس بدون العصير ... لكن نجربها برضه :D

وكمان جربى مع اللوز المقشور شوية صنوبر محمرين خفيف

بيبقى تحفه ... بس اسعاره السنه دى مولعه شويه

لكن رمضان يحب التفليسه :D

وخليكى معانا وبلاش الغيبه .. رمضان يحب اللمه الجميلة

وكل سنه وانتى طيبه

:D

[Fencer]

الاخت سلوى

انا عن نفسي أحب طعم البرتقال في الاكل لانه له نكهة خاصة جميلة بس ماجربتش قبل كدة اضيفه للرز لكن هاجرب المرة دي

في الكيك نضيف قشر البرتقال فبيخللي طعم الكيكة جميلة ، لكن لي سؤال هل نضيف عصير البرتقال بعد ما نضع كوب و نص ماء لكل كوب رز .

الوصفة شكلها يشجع و خصوصا البرتقالي منها

لكن بلاش غيبة يا سلوى و خليكي معانا خاصة في رمضان

تحياتي :)

[Osha]

السلام عليكم

اكتب لكم ردي هذا وانااستعد لرمضان عشان طبعامافيش هنا اي اعتبارات للتوقيتات وميعاد الافطار والذي منه

ولذا فسأستغل الويك اند عشان اعمل الأكل نصف سوا واحطه في الفريزر بحيث يبقى جاهز على اكتمال السوا والرز والسلطة ودمتم

انا بس داخلة اقول كل سنة وانتم كلكم طيبين واحنا مع بعض في واحتنا الجميلة دي

وربنا يتقبل منا جميعا صيام النهار وقيام الليل والذكر

وكل عام وانتم بخير

والنبي يا عمنا

هو محشي ورق العنب ممكن يتحط في الفريزر زيه زي باقي الأكل?

لو أيوه يبقى يتسوي ازاي - يعني اطلعه يفك والا اسويه على طول

[Folana]

السلام عليكم ورحمة الله ..

كل عام وانتم جميعا بخيـــــــــــــر...

الاخ الاعز بودا..حمدلله على السلامة المطبخ نور .............كويس انك فكرتنى اجهز الشربات قبل رمضان بكام يوم ..لانى بابوظه يجى تلات اربع مرات لحد مايظبط معايا ..وكده يادوب الحق ابوظ لى كام مرة قبل رمضان ......

اوشا الحبيبة ....انا عن نفسى مااحبش اشيل محشى فى الفريزر خالص ...اللى اعرفه انه بيعجن بعد كده ..ومستنية رأى بودا فى الموضوع ده اهو استفاد برضه يمكن اعملها ....

الاخ فنسر ...اعمل الرز زى ماوصفته الاخت الفاضلة سلوى وقلبك جامد ..انا قريت الوصفةة النهاردة وقمت نفذتها ..بجد اكتر من رائعة

اختنا العزيزة الفاضلة سلوى ...تسلم ايدك ..الاسرة كلها بتشكرك على الوصفة الجميلة دى ....وياريت ماتبخليش علينا بوصفات جميلة كده وخصوصا فى رمضان

شاعر الرومانسية ....!!!!! كل سنة وانت طيب......!!

بودا.....بقى انا من كام يوم قلت اودع ايام الاكل قبل رمضان ورحنا اتعشينا فى احد الفنادق الكبرى ...وكانوا منزلين فى البوفيه رومى روست ومعاه صوص تفاح ..انا اخدت شريحة رومى ..وعليها صوص التفاح ده ومش قادرة اقولك ..كان نفسى ادخل المطبخ واقابل الشيف ..بس جوزى ربطنى فى الكرسى :))..قلت مافيش غير استاذنا العظيم اللى حيقولى صوص التفاح ده اخترعه ازاى .....وياريت تكلم لنا الاستاذ وجدى علشان يغششنا طريقة اللحمة اللى عملها وطلعت هايلة ...علشان اقوله وصفة تايلاندية...

[bodda]

العزيزه اوشا

محشى ورق العنب ممكن يتشال فى الفريزر بس بعد التسوية

لان زى ما قالوا الاصدقاء ممكن يعجن لو بدون

لكن بعد التسويه يتشال عادى جدا :)

ورمضان كريم

:D

[bodda]

العزيزه فلانه هانم اوغلو

صوص التفاح

كوباية عصير تفاح

تفاحه مقشره ومسلوقه ومضروبه فى الخلاط ومتصفيه

ذرة جنزبيل

نص معلقة نشا

معلقتين جيلى تفاح

هانخلط نص العصير مع تصفية التفاحة مع النشا عالبارد فى طبق غويط

هانسيح الجيلى مع باقى العصير على نار هادية ونقلب مع اضافة الجنزبيل

نضيف اللى فى الطبق الغويط للى على النار ونقلب حتى يغلظ القوام

يعنى هايبقى كثيف شويه بسيطة

ونتحكم فى الكثافه بالنشا ( نقلله او نكتره بحساب بس الزياده عالبارد)

وده بنسميه الصوص الحلو

وفيه صوص تانى باستعمال مهروس تفاحه مسلوقه

ومعلقة زبده عالنار ونخلط كويس ونضيف معلقة كارى هندى

ونقلب مع اضافة كوب عصير تفاح وذرة ملح وذرة جنزبيل

ورمضان كريم

:)

[Folana]

أستاذنا الهايل ..العزيز..الفاضل...العبقرى.بــــــــــــــــــــودا..اسمحى اقولك انك ماحصلتش .........اناا كنت باطلب الطلب ده ويأسة من الرد...بجد بجد كتر خيرك ..انت انقذتنى ..لان جوزى كان مراهنى انى لا حاعرف اعملها ولا حاعرف اجيب وصفتها طولت رقبتى فى المجتمع والله

...بس ياترى الروست بقى يتعمل ازاى ..

متقلة عليك انا معلش ...رمضان كريم........... :)

[bodda]

العزيزه فلانه هانم

كده بتحرجينى بذوقك الكتييييييييييييييييييييير اوى

ربنا يخليكى ويديم صحبة المطبخ الجميلة

روستو الديك الرومى

انا بفضل هنا استعمال صدر ديك رومى بس

وبيكون احسن من استعمال ديك كامل على الاقل بالنسبة للاسرة

نجيب صدر ديك رومى مخلى ( بيبقى حوالى 2 - 4 كيلو )

ونستعمل قطعة واحدة.

بصله محترمه مبشوره ناعم وعصير تفاحه و ربع معلقة قرفه

وملح وفلفل وبهارا وورق لاورو و معلقتين كبار كريمه لبانى

نخلط اللى فات ده كله مع بعضه للتتبيل

نجيب صدر الرومى ونغطيه كاملا بالخلطة

ونغطيه وندخله التلاجه ساعتين على الاقل بس فى رف تحتانى

نجيب ورق المونيوم فويل كبير ونحط الصدر فيه ونغطيه باللى فاضل من التتبيله

ونلفه باحكام بالفويل ونحطه فى صينية الفرن ونحط فى الصينية كوبايتين ميه

ونحدفه عالفرن ونبص عليه كل نص ساعه علشان نزود الميه بس تكون سخنه

نجهز فى حله كوباية عصير تفاح وعصير ليمونتين ومعلقة نشا صغيرة

وسنة جنزبيل ونغليهم عالنار 10 دقايق مع التقليب

او يمكن استعمال صوص التفاح اللى سبق وصفه ( طعم مختلف )

الصدر هاياخد فى الفرن حوالى تلات ساعات على الاقل

ولما يطلع نسيبه يبرد خالص وبعدين نفتح الفويل

ونحط الصدر على فرشه من شرايح التفاح وممكن كريز واناناس

ويقطع شرائح فى مكانه بسكين حاد جدا

وبعدين نصب عليه الصوص

وبالف هنا وشفا

ورمضان كريم

:)

[Osha]

ايه الكلام الكبير دا يا جدعان

صدور رومي وصوص تفاح وحاجات ومحتاجات وحبشتاكانات :)

يعني انا دلوقت بصراحة محرجة اسأل علىالحاجة اللي كنت عاوزة اسأل عليها :) :D

اعمل ايه

-_-

امري لله

:D

كنت باكل زمان في فلفلة - طبعا عارفينه - فول اسكندراني الدقة :D

نرجو شرح ماهي الدقة المقصود بيها B)

رمضان بقى وانت عارف مايحلاش فيه غير اكل الفول مهما تعددت صدور الرومي وعصير التفاح B)

الا صحيح هو فيه فخدة ضاني بعصير البرتقال ?? :P

[bodda]

حمدا لله عالسلامه اوشا هانم

اولا مين قال ان الرومى احلى من البلدى ؟؟؟

دى أوشاعت ماليه البلد وبس :angry:

دقة الفول

توم وكمون وشطة وملح وعصير ليمون

ومعاهم مبشور فلفل رومى احمر

نشوح التوم فى معلقتين زيت او زبده دقيقتين بالكتير

ونحط مبشور الفلفل وممكن كمان مبشور طماطمايه

وعليهم باقى التوابل ومعلقتين خل ونسيبهم على نار هاديه تلات دقايق

ونقابلهم بعصير ليمونتين

وياسلام لما يكون الفول المدمس مضروب فى الخلاط

ونقلب ده على ده مع الزيت المطلوب

وبالف هنا

ورمضان كريم

:blink:

[Fencer]

يا سلالام يا حاج بودا و لو ما كنتش حاج ربنا يكتبهالك يا رب ، ايه الجمال ده و الحلاوة بتاعة الدقة انت عارف هايحصل ايه? الحاجة رشا بتعمل فول مدمس عجب بتدمسه في البيت و مع هذه الخلطة مش هايكون ناقص غير ان الواحد يشمر و يتيخيل انه واقف على عربية فول و يدش بصلايه بقشرتها و الباقي انت عارفه بقى . و صباحك عسل .

اما الان فأنا سأصطدم بفتوى من المودام تجعلني لا انام أو استمتع بالصيام في اي من الايام

هي بتفت و تقول انها ناوية تعمل القطايف بالبان كيك الني اللي بيتعمل في الميكروويف و تحشه و تقليه كما القطايف .

يا اخواتي صايم و راجل شقيان و مراتي عايزة تجوعني حتى في رمضان.

[شاعرالرومانسية]

بودااااااااااااااااااااااا...

لاتعليق ;) :angry:

اوشا ... اعتقد بعد وصفة الدقة بتاعة العزيز بودا ... وبعد شهادة العزيز حسام بخصوص الفول المدمس " البيتى "

مش ناقص الا انك بعد ماتعملية ..تعلقى يافطة تقـــــــــول

" ان خلص الفول أنـــــــــــــــــــــــــــــــا مش مسئــــــــــــــــــــــــول "

الا صحيح ..سؤال على الماشى .. :

هو انتى كنتى واخدة الدماسة معاكى من هنا ؟.. وعديتى بيها من المطار ازااااااااااااااااى..ماقالوش عليها قنبلة ;)

الاخت العزيزة فولانة :

كل سنة وانتى طيبة يا ستى والاسرة كلها بخير ودايما كدة تشوفى الوصفات والاكلات بتاعة الخمس نجوم وتيجى تسخنينا عشان نشوف الطريقة اية

بعد كدة المطاعم دى حتقفل ان شاء الله :blink:

كل رواد مطبخنا العامر ..........

كل عــــــــــــــام وانتم بخيــــــــــــــــر :blink: