اطلب اى وصفه على بالك .. تلاقيها قدامك

[Fencer]

العزيز جدا شاعرنا الرومانسي ابو علي

كل عام و انت بالف صحة و خير و أسأل الله ان يوفقنا في رمضان لما فيه الخير و يصلح احوالنا و يجعلنا من العتقاء من النار

اختك رشا بتعمل الفول في حاجة زي القدرة و لم تأتي بالدماسة من مصر خوفا من اللي انت قلته ده و انما مافيش فرق بين الاختراع اللي هي بتعمل فيه الفول و الدماسة ، و الفول بيطلع مية مية و مش ناقص غير عربية صغيرة و نقف بيها في اي شارع هنا في اتلانتا و شوية عيش بلدي يقولنا على و صفته عمنا بودا و شوية سلطة و بصل اخضر و بصل احمر مع الدقة اللي بودا قال عليها و شوية زيت حار و حلو و المطافي هنا بتيجي في خلال دقائق و مافيش مشاكل يا باشا وأحلى اصطباحة

[Osha]

بـــــــــــــــــــــودا

زوجي العزيز مش بيحب الفول في الخلاط - لكن انا حاقوله ان كلام عمو بودا لازم يمشي في الأكل علينا كلنا ..

غالبا السحور حيبقى الوصفة الطحن اللي انت قلت عليها وربنا يستر نكمل صيام اول يوم

طبعا الأخ زوجي تكرم مشكور وقام بافشاء سر البانكيك قبل ما اسألك

طيب اكيد انت فاكر الشرائح المجمدة اللي بتتحط 3 دقائق في الميكرويف - هي دي اللي قصدي عليها - اصلها شكلهاوريحتها زي القطايف بالضبط

انااصلا كنت حاسالك لكن حسام قرر المبادرة

حسام

خلي بالك من روحك رمضان داخل وانت راجل شقيان وممكن تجوع فعلا

حســــــــــــــــــــن

ادي حسام رد عليك في قصة الدماسة!!وان كان بابا ان شاء الله ناوي ييجي وقلت له يجيب دماسة في ايده وهو ونصيبه بقى في المطار.

لكن ياخويا الفول دا اصله مزاج

وعلى راي صباح يسيب الأكل كله ويمسك طبق الفول

يعني لو حطيته على السفرة مع اي شئ مهما كان متميز الفول بيمسحه منعلى وش السفرة مسح

سبحان الله

وللجميــــــــــــــــــــــــــع

كل عام وانتم بخير

[bodda]

الاعزاء الغاليين

اوشا وحسام وحسن ابو على

منورين والله

اما بالنسبة للفول ابو دقه اياه ... فحرام يكون فى السحور

مش عايز اشيل ذنب حد من اول يوم صيام

;)

اما موضوع البانكيك فطبعا لا يا اوشا

هوه هايطلع شبه القطايف لكن طعم تانى خالص

لسبب بسيط ان فى تركيبته لبن وسكر وبيض

:blink: :angry: :blink:

وانا نزلتلك مخصوص عجينة القطايف هنا

وهيه مجرد ميه ودقيق وخميره و ذرة ملح

الموضوع بسيط وبلاش كسل وشمرى اكمامك واديها

;)

مساء الفل

:wub:

[se_ Elsyed]

عزيزي الشيف أبو البدابيد

أكتب إليك رسالة من رحم المعاناة ..

وهي تتلخص في إني تعودت هنا وتحديداً في الرياض أشتري كل رمضان من عند الحلواني حاجة كده عاملة زي القطايف بس صغيرة - ممكن تكون عجينة زي الجلاش .. بس مش جلاش لإنها كذا راق ) وجواها جبنة ومنقوعة في عسل .. بس سبحان الله لا يوجد أي تعارض بين طعم الجبنة اللي المفروض يبقى حادق وبين طعم العسل المسكر ..

فيا ترى يا هل ترى هل حضرتك عندك فكرة عن البتاعة دي ولا أتجرأ وأبقى اسأل الحلواني إيه نوع الجبنة اللي بيحطوها في الحشو ؟

ولك جزيل الشكر .

[Salwa]

صباح الخير عليكم كلكم وكل عام وانتم بخير وكل رمضان ان شاء الله واحنا هنا كلنا متجمعين مع بعض حتى ولو كان كل واحد فينا فى بلد تختلف عن التانى .

ممكن اقولك ياسى السيد على قد معرفتى ايه هى دى ؟؟

وطبعا استاذنا الشيف بودا حايقولك بالضبط بالضبط ايه دى ...

اعتقد ياسيدى دى حاجة زى السمبوسك بيعملها الاخوة السوريون وهى معروفة ...لكن بتحشيها جبنة ريكوتا ( آهى دى بقى اسمها كدة فى مصر ) ..او بمعنى آخر جبنة من غير ملح ..وبرضه بعدها بتنقعها شوية فى العسل ( بالضبط زى عسل الكنافة ) بس دى بيبقى فيها شوية ماء زهر ...

لكن دى مش بتتقلى زى القطايف لكنها بتوضع فى الفرن ...

بس خلاص.

وفى الحقيقة انا ايضا تعجبنى جدا جدا ..

على فكرة ..

شكرا جزيلا يافلانة انك جربتى وصفة الارز بالمكسرات الخاصة بى ..والحمدلله انها عجبتك ..

صباح سعيد ان شاء الله ...

[se_ Elsyed]

لكن دى مش بتتقلى زى القطايف لكنها بتوضع فى الفرن ...

بس خلاص.

<{POST_SNAPBACK}>

شكراً يا مدام سلوى ..

جزاكي الله كل خير

فعلاً ممكن تكون بتتعمل في الفرن ..

لكن سؤال بقى تاني معليش ..

هي العجينة بتاعتها شبه إيه كد ؟

يعني زي عجينة المعجنات ولا الجلاش ولا البيتزا ؟

[Salwa]

بالضبط كدة زى عجينة الجلاش ..

جرب بس... وبالهنا والشفا.

[bodda]

تسلم ايدك يا سلوى هانم على وصفة السمبوسك

ويارب دايما منورين احلى مطبخ لاحلى مجموعة اكيلة :wub:

فتمام زى ما قولتى

الحشو بالجبنه الريكوتا واللى ممكن تتعمل بسهوله

ولسه منزل وصفتها فى الصفحه اللى فاتت تقريبا

والعجينه زى الجلاش وممكن بطريقة الفطير المشلتت

يعنى عجين ومسحة سمن ويتلم ويتفرد مع سمن تانى وهكذا

فتتكون طبقات رقيقة ويتقطع حتت وتتحشى كما وصف العزيز سى السيد

وبالف هنا وشفا

وكل سنه وانتم طيبين

:wub:

[Folana]

السلام عليكم ورحمة الله ..............

فين ياجماعة المينو بتاعة كل يوم ؟؟....ايه يابودا مش قلنا كل يوم حتنزل لنا مينو كاملة متكاملة ...وممكن من غير وصفات الا اذا كانت اكلة جديدة ....ياريت كل واحد يجرب ينزل مينو فى يوم ...يعنى زى ماحيعمل او عمل ....بس نشجع بعض فى الافكار ...

ولى طلب لو سمحت يااستاذنا العزيز....انا باعمل شوربة سبانخ جميلة ..بس عايزة اعرف وصفتها منك والافتكاسات بتاعتك ...كمان المقلوبة ...لازم تتعمل بلحمة ولا ممكن نختزلها ..ونطنش موضوع اللحمة ده ............

...............رمضان كريم ............. :wub:

[Osha]

في السعودية بيعملوا حاجة اسمها اصابع العروس

دي عبارة عن رقائق السمبوسك وبتتحشي بجبنة كيري مش لافاش كيري عشان الملح وتتلف زي السيجارة وبعدين تتقلي في الزيت ومنها على العسل - الشيرة - عدل واناكنت بصراحة باموت فيها

هذا ما اعلمه والله اعلم

[bodda]

فلانه هانم

انا بصراحه محتاج منك حكاية شوربة السبانخ دى

:blush:

اما المقلوبة فممكن باللحمه او صدور الفراخ

وممكن كدابه بالبتنجان أو شرائح القرنبيط بس

:wub:

اوشا هانم

اما وصفة اوشا للصوابع فطبعا ممكن الحشو بأشكال كتير

وهيه واضح مش عايزه تقول وصفتها بالتفصيل ;)

بلاش كده يا اوشا ومش عايزين اسرار مطبخية هنا

mfb:

وخلاص من بكره ننزل وصفات بس نشارك كلنا

و رمضان كريم

:wub:

[bentmasria]

مكرونه الايطاليه بالسبانخ

المقادير :

كيس واحد مكرونه أي نوع تفضليه مسلوق بالماء والزيت وقليل من الملح ومصفي

2 بصل متوسط مفروم – 3 ثوم فروم – 3 صدر دجاج مكعبات – 2 فلفل احمر شرائح-3 طماطم مفرومه – 2 صرة سبانخ مفرومه – مكعب ماجي – نصف ملعقة صغيره فلفل اسود – كوب جبن شيدار – كوب جبن موتزاريللا – قليل من الزيت

الطريقة

يسخن الزيت بوعاء ثم يضاف عليه البصل حتى يشقر و الثوم المفروم ويحرك جيدا ثم يضاف مكعبات الدجاج ويكون على نار قويه حتى يتغير لون الدجاج يقلب جيدا وبعدها الفلفل الاحمر ويحرك مع بعض ثم مكعب الماجي والفلفل الاسود وبعدها الطماطم ويخلط مع بعض ثم السبانخ ويقلب ويترك على النار لمدة ربع ساعة حتى ينزل العصير منه وتنضج جميع الخضار مع الدجاج وبعدها يضاف الجبن بنوعيه ويقلب جيدا ويرفع من النار يكون الخليط مطاطي

بوعاء اخر يوضع نصف مقدار المعكرونه ونصف مقدار الدجاج ويقلب مع بعض ثم يسكب باقي المقدارين ويخلط جيدا ويكون متجانس يسكب بوعاء التقديم

ممكن اضافه مشروم والوان من الفلفل الاخضر والاصفر يكون الطبق ملون وبالهناء والشفاء

[se_ Elsyed]

دي عبارة عن رقائق السمبوسك وبتتحشي بجبنة كيري مش لافاش كيري عشان الملح وتتلف زي السيجارة

<{POST_SNAPBACK}>

يا سلام بقى بعد الفطار والواحد خرمان يقوم ضارب صواعين من دول ... وتبقى دماغه في العلالي :wub:

[se_ Elsyed]

بالضبط كدة زى عجينة الجلاش ..

جرب بس... وبالهنا والشفا.

<{POST_SNAPBACK}>

طب معليش سؤال تاني عشان نحسم الجدل البيزنطي الدائر بيني وبين الست حرمنا ..

هي ممكن تنفع بعجينة البيف باستري برضوا ؟

[Salwa]

ياسى السيد ..

مش عم بودا قال لك تنفع بعجينة الجلاش او بعجينة الفطير المشلتت ؟؟

اعمل انت العجينة فى البيت ...

جرب زى مانت عاوز وشوف ...

و.

بالهنا والشفا ..

[Salwa]

بالنسبة للمينو ...

1 - صينية سمك بالبطاطس والطماطم .

ارز صيادية ...

بابا غنوج .

الحلو : كنافة او قطايف او بلح باللبن ...او ارز باللبن بالمكسرات ..او خشاف او قمر الدين .

2 - كفتة بالبطاطس ..

ارز بالشعرية ..

سلطة خضراء ...

الحلو : اى حاجة تحبوها ....او مثل المينو الأول .

3 - صدور دجاج بانيه .

عجة ...

شوربة خضار او شوربة لسان العصفور ..

الحلو : كريم كراميل ..او عيش سرايا ..

4 - كباب ..

سلطة مشوية ( بدنجان وفلفل احمر واصفر ...)

شوربة عدس اصفر ..

الحلو : فاكهة ....اى نوع ..

5 - ارز باللحم والمكسرات .

مسقعة .

الحلو : عصير فواكه..

6 - فخدة او كتف فى الفرن بالبطاطس.

ارز ابيض بالشعرية .

سلطة طحينة ..

الحلو : كنافة ...

حد تانى يقول حاجة تانية ...

سلام.

[bodda]

العزيزه سلوى هانم

المنيو هايل بس فين الوصفه ؟؟؟؟

:wub:

الناس هنا عايزين وصفه كامله

انتى مش شايفه الجدل حتى على اسم العجينة ؟؟؟

ربنا يخليكى لينا وتنورى احلى مطبخ دايما

وللعزيز سى السيد

اى باسترى عجينه تنفع بس ترقها شويه وتقطعها حتت

على قد المطلوب لفه

يعنى ممكن قطع قد علبة السجاير مادام انت كييف

وتتلف بالطول والحشو زى ما تحب

ورمضان كريم

:blush:

تم تعديل 6 أكتوبر 2005 بواسطة bodda

[bodda]

صينية لحم بالبطاطس والبسلة

نقول حوالى كيلو لحم من السمانه أو الفلتو

يتقطع حتت صغيرة مكعبات قد مكعب ماجى مثلا

ونسلق اللحم ده مع بصل وحبهان ولاورو وبهار لحم وملح وفلفل

ونجيب نص كيلو بطاطس وتتقطع مكعبات نفس المقاس تقريبا

وكيس بسله جاهزه برضه نص كيلو

وبصله محترمه تتقطع برضه صغير

ونلخبط ده كله فى حله واسعه مع اللحم المسلوق ونضيف ملح وتوابل

ونصبه فى صينية فرن او برام كبير

ونصب عليه حوالى كوبايتين من الشوربه اللى طلعت من اللحمه

ونقطع طماطمايتين ترانشات ونرصها على الوش

ونحدفها عالفرن الحار قبل المدفع بحوالى 45 دقيقه

وتطلع نفرتكها حتتك بتتك مع رز بالشعرية

والحلو على مدام سلوى العزيزه

رمضان كريم

:wub:

[Fencer]

العزيزة سلوى

يا سلام يا مدام سلوى قائمة طعام تجري الريق خاصة صينية السمك بالبطاطس بس المشكلة اننا عايزينك تقعدي لنا شوية و تقولي لنا الوصفات خاصة السمك بالبطاطس و شكلك كده من اسكندرية ان لم اكن غلطان لان اهل القاهرة نادرا ما ياكلوا سمك في رمضان ، انا كييف سمك و ياريت توصفي لنا كام اكلة سمكية

العزيز بودا

انا عايز طاجن ، الاكل من هنا و رايح طواجن انا زهقت من الحلل و اكلها انا عايز طاجن البامية دلوقتي

ينفع الوصفة اللي انت كاتبها عن البسلة و اللحمة و البطاطس تبقى طاجن??

[Osha]

رشا جائت من تحت الأنقاض

بالنسبة لأصابع العروس والله مش حكاية مش عاوزة اقول الوصفة - انااصلا دخلت في السريع عشان ارد على سي السيد

رقائق السمبوسك الجاهزة اللي كانت بتتباع في السوبر ماركت ياعم روح العزيزيه والا اليورمارشيه وانت تلاقيها

وجبنه كيري عاديه خالص بدون اي اضافات

وتتلف فعلا زي السيجارة - اتريق براحتك يا سي السيد - وبعدين في آخر اللفة بنكون محضرين حبة دقيق مبلولين ميه عشان نثبت بيهم الطرف

تقلى في الزيت

ثم تغطس في العسل عادي جدا وتصفى وتقدم

وانا اكلتها كتير عند الأخوة الفلسطينيين خاصة ثم السعوديين

ممكن صينية البطاطس البيوريه باللحم المفروم لو سمحت وتكرمت

ولو قلت لي انها مكتوبة قبل كده حاعيط