اطلب اى وصفه على بالك .. تلاقيها قدامك

[محمد شلبى]

الاخ الفاضل محمد شلبى

يمكن الاسم بتاع البطاطس فيه لخبطه

فياريت توصفلى شكل البطاطس كان ايه ؟؟؟

:)

<{POST_SNAPBACK}>

لا حرام :angry2:

ده انا مستنيك من الصبح

هى اسمها فرسكس فعلا

بس اوصفها ازاى؟

هى زى ما قلتلك كده متحمرة عادى بس بتقرمش قوى وعليها حاجة زى الفيجيتار :blush:

[se_ Elsyed]

فعلا الجوع كافر:)

انت مش قلت انا مش معتب هنا تانى؟

لأ ده أنا بس جاي أشقر عليكوا وأقولكوا أقعدوا بالعافية .. أصلي معزوم النهاردة عقبال عندك عزومه ملوكي من بتوع علية القوم :angry2: ... مش عايز حاجة يا محمد من هناك ؟

[bodda]

لمحبى البطاطس

بطاطس يخنى أو يخنة البطاطس

بصلتين وكيلو لحم فلتو مقطع صغير

نقطع البصل ونحمره في الزيت قليلا ثم نضع فوقه اللحمة

نحط عليهم تلات كوبايات ميه

والملح والبهارات وورق اللاورو والزنجبيل والحبهان و الفلفل

ونسيب اللحم عالنار لغاية ما تستوى خالص

في هذه الاثناء نقطع البطاطس إلى مكعبات متوسطة و نقليها

نجيب اربع طماطمايات ونخرطهم فى الخلاط مع الضرب المبرح

نحط فى الطاجن البطاطس المحمره وفوقها عصير الطماطم السابق ومعلقة صلصة

نحط عليهم اللحمه وكوبايتين شوربة

ندق تلات اربع فصوص توم كبار مع معلقة كسبرة ناشفة ونشوحهم فى الزيت

ونصبهم عالطاجن ويدخلوا الفرن عشر دقايق بس

مع رز ابيض .... واوعى وشك

رمضان كريم

:angry2:

[محمد شلبى]

فعلا الجوع كافر:blush:

انت مش قلت انا مش معتب هنا تانى؟

لأ ده أنا بس جاي أشقر عليكوا وأقولكوا أقعدوا بالعافية .. أصلي معزوم النهاردة عقبال عندك عزومه ملوكي من بتوع علية القوم :) ... مش عايز حاجة يا محمد من هناك ؟

<{POST_SNAPBACK}>

الله يخليك يا باشا

خير ربنا كتير والحمد لله :angry2:

قال علية القوم قال، ده آخرها عزومة على بطة جايالهم من مصر :blush:

[Osha]

بـــــــــــــــــــــودا

بقى فرحان اوي ان حسام رد من حساب المتمردة زوجته المصون اللي هي انا ...

طيب ابقى وريني حتنفعه ازاي بقى لماانفذ كل القرارات

تصدق بالله

انا كنت عارفة انك حتقول ديك رومي !!!

اصلا انا ماعرفش ايه حب الناس في البتاع ده - والله لحم الصدر بتاعه مش بيتبلع ومفتل

أذواااااااااااق

حاضر

علم وينفذ حتى عشان حسام ينبسط

"شفت انا زوجة مستكينة ازاي"

بلاش بقى تطليع سمعة عليا هوا مش ناقص

بالمرة كده

اسمها ايه اللحمة الفلتو هنا ?

وكمان عشان قابلت واحدة دكتورة في جامعة ايموري حتموت على وصفات اكل ميديترينينان - تقدر تبعت لي كام وصفة بالعنجليزي من اللي وصى عليهم الحكيم لقمان

عشان محسوبتك مرة حاولت توصفلها حاجة الست فهمت حاجة تانية خالص عشان اختلاف المسميات سيادتك

حســــــــــام

بتأمن على كلامه في شهر مفترج - الله يسامحك

"الفطار بره النهارده عقابا لك على ما اقترفت تجاه زوجتك"

حســــــــن

بلاش حكاية يسقط الاستبداد دي عشان لو المدام قريتها حتبقى مشكلة بالنسبة لسيادتكم

فولانة العزيزة

البط بالبرتقال - انا الحقيقة لا اكل البط ولا اتعاطاه ولكن كنت سمعت ان فيه فخذة خروف بتتعمل وبيتصب عليها عصير برتقال قرب السوا - فهل هذه هي نفس الطريقة ? وان كنت اعرف ان اصل عصير البرتقال هو النبيذ ولكن لاننا مسلمين موحدين فقد استبدلناه بعصير البرتقال الحلال

سي السيد

بقى انا برضه اللي عاوزة ابوظ اخلاق حظرتكم?? الله يسامحك !!اللهم اني صائمة

بقى يا سيدي انا آخر عهدي بالسعودية كان عام 2000 وغالبا الحاجات دي تطورت من انها بتتعمل في البيت لانها تتعمل في المحلات

لاننا كنا بنروح نشتري الحلويات من بره وعمري ماشفتها

وبعدين اديك قلت في النهاية انها بتتعمل في الزيت مقلية - يعني زي ما انا قلت

بطل بقى صرف فلوسك لوسمحت واعملها في البيت زي ما باقولك ولو ماطلعتش هي يبقى اديني رقم حسابك احولك عليه ال80 ريال

تم تعديل 9 أكتوبر 2005 بواسطة Osha

[شاعرالرومانسية]

طاجن البطاطس دة شكلة يجنن يا شيف ... تسلم الايادى :angry2:

واستكمالا لطرق البطاطس اللوزعية .. انا عملت انهاردة طاجن بطاطس بالاعشاب العطرية انما مالوش حل برضة

بصل شرائح مع كام فص توم مفرى ويتقلبوا فى تلت معالق زيت ومعاهم قرن فلفل اخضر بارد وواحد تانى احمر ( حامى او بارد برضة ) ولما الفلفل البصل والفلفل يدبلوا نحط ربع كوب روز مارى ( حصى لبان )اخضر ومفروم (وممكن زعتر اخضر ) ونقلب نضيف كوب عصير طماطم وملح وفلفل .. ونديه معلقة صلصة مدوبة فى نص كوب ماء وبعد الغليان نضيف مكعبات البطاطس ونقلب شوية ونحط البطاطس فى طاجن وندخلها الفرن وبعد السوى نضيف ربع كوب بقدونس مفروم ونقلب ... ومعاها رز محمر ( رزة ورزة ) طريقته موجودة هنا فى الصفحات الاولى من ايد شيفنا العزيز بودا :)

واشفكوا بعد الفاصل ...

قصدى بعد ما كمل اكل الطاجن :blush:

[Osha]

السلام عليكم ورحمة الله .............

اوشا....خفى عن الجدع شوية ..مش كده انا ملاحظة ان الموضوع فيه اضطهاد جامد جدا ...هو علشان بعيد عن اهله يعنى بتستفردى به ؟.....ده مش عارف يتبحبح بكلمتين على بعض :angry2:...فكرتنى بايام صلاح نصر واللى منه ...

(جدعة ياأوشتى ابعت لى الوصفة اللى بتستخدميها معاه ربنا يسترك)

اضطهاد ايه يا بنتي

انت حتنضمي لقافلة الأعداء والخونة

دا انا غلبانة غلب ولا ليا في اساليب التعذيب بتاعة المخابرات والا اي حاجة

دي سمعة طلعها عليا المغرضون

"الوصفة السرية : احرقي الأكل كل يوم وعيطي جنبه ..آل يعني غصب عنك"

وبكده تبقى ضيعتي فلوسه وكمان ما أكلش ويمكن يجيب اكل من بره"

[bodda]

طاجن بطاطس خطير يا بو على

تسلم ايدك بجد ... بس مافيش معاه فص لحمه ولا ورك فرخه ؟؟

ياخواتى صايم وراجل شقيان وحسن عايز يجوعنى حتى فى رمضان

:blush:

يا ست اوشا هانم

انا عمرى ما حبيت الديك الرومى

ودايما اقول دكر البط برقبته

لكن انتى بتقولى عازمه ناس ومش عايزه تصرفى :angry2:

ولا انتى اللى هاتاكلى العزومه ؟؟؟ :)

وبطلى وصفاتك الزوجية والوعظ اللى يودى فى داهيه ده

وابقى اكتبى تحت الخط الصغنن ( ترجمة انيس عبيد )

رمضان كريم

:blush:

[Fencer]

السلام عليكم من حسابي المرة دي

العزيز جدا بودا

طاجن البطاطس رهيب و الله رهيب و اعتقد ان ده هايكون من الصفات التي ستحتل المرتبه الاولى في الايام الرمضانية المفترجة ، بس ادعي لي ان الاشكيف يسهى عني شوية عشان آخد نفسي شويه

العزيز جدا شاعرنا الرومانسي

ايه حكاية البطاطس معاكم قاعدين تقرروا فيها انما طاجن ما يقلش عن طاجن بودا في الحلاوة و سيجرب و هانكيد العوازل يا لمونة

فلانه

حسبي الله عليكم يالستات تفرحوا في المصايب و كمان عايزة الوصفة اللي بتعملها معايا ، طب اشربي يا فلانة و اراهنك ان عملتي الوصفة بتاعتها هاتغيري اسمك لعلانة ،انما سيبك انتي شوربة السبانخ دي عجب برافو

رشا

هه هه هه هه اعلنها من ابواب المنتدى المطبخية ، مقاومة شعبية لكل لنواع التصرفات المفترية و الطبيخ من هنا و رايح عليا

(يظهر بدل ما اثور اتورطت)

[Salwa]

ايه ده ؟؟

ياشاعر الرومانسية .....

هو الايميل اللى انا ارسلته لاختى وصل عندك بالغلط ؟؟

والله العظيم امبارح عملت طاجن البطاطس ده وكتبت لاختى عليه واقول لها اعمليه ده تغيير لذيذ وخصوصا انه مفيهوش كالامار ...

ده غير طاجن الكالامار او السبيط التقليدى اللى بيكون فيه جزر وكسبرة ..زيادة .

لكن انا لا اضع روز مارى ...

يعنى طبيعى انا بعمله كدة واضيف له كلامار بعد تحمير البصل ...

استغربت جدا جدا جدا ...لأنى كتبت لها بالحرف الواحد اقول لها يجب ان تضعى البقدونس فى الآخر بعد ما تستوى وتاخديها تقليبتين بس ...

نفس الكلام اللى حضرتك قلته ..

يظهر المجموعة هنا ميولها المطبخية واحدة ...

بس انا مش بحب الاكل التايلندى ولا الصينى ....

اما حكاية عصير البرتقال على الفخدة .........

دى بتاعتى انا بقى ....

وكنت من سنتين او تلاتة كتبت هنا طريقة عمل فخدة فى الفرن وبرضه بعصير البرتقال ..

لأن عصير البرتقال يجعل اللحم الضانى سهل الهضم والذ فى الطعم ...وليس له اى علاقة بالنبيذ ..

يعنى مش حكاية ده بدل ده ....لالالالا...

لأن ممكن بدل النبيذ تضع ليمون او خل ...لكن عصير البرتقال يجعل طعم اللحم وكأنك وضعت عليه نوع معين من الاعشاب اللذيذة ..

سلام كبير قوى ....

[Salwa]

على فكرة ......

حكاية طاجن البطاطس بالفلفل الاخضر والفلفل الاحمر ....

(( اقتبستها )) ........زماننننننننن...

من اكلة مشهورة هنا ...

هى نفس الطريقة لكن بدل البطاطس ..كوسة .

آهو بنقول لكم (( كوسة )) ....علشان تعرفوا انى بنكلمكم بطريقة القاهرييين مش بطريقتنا ...والا كنت قلت لكم (( قرع )) ...

جربوها وهى جميلة جدا جدا وعلى الاقل تضمنوا ان الاولاد ياكلوا الكوسة بالطريقة دى لانها بتبقى حلوة ...

سلام...

[bodda]

العزيزه سلوى

توارد الخواطر المطبخيه جائز شرعا واكلا

:angry2:

انا مش فاهم ايه علاقة عصير البرتقال بالنبيت ؟؟؟

يا جماعه النبيذ يصنع من عصير العنب وليس البرتقال

ولو استعملتوا عصير العنب العادى هايدى طعم يجنن

بس مع اللحوم زى الاستيك

اللحم بعصير العنب

لحم فلتو أو بتلو يقطع مكعبات صغيرة او شرائح خفيفة

يتشوح مع بصله حلقات وملح وفلفل ومبشور جوزة الطيب

ونسيبه على نار هادية لغاية ما ينزل ميته

نصفى الميه ونحط مكانها كوباية عصير عنب ويكمل سوى

او كوباية عصير رمان مصفى

:)

جربوا الاتنين ومش هاتندموا ابدا

و رمضان كريم

:blush:

[شاعرالرومانسية]

العزيزة ،، اوشا

استبداد اية بس يا ستى .. دا انا كنت بسترجع مشاهد من افلام وطنية ...بمناسبة شهر أكتوبر المجيد :D

وحمدالله على السلامة يا أشكيف .. قصدى يا اوشا كييف :blush:

عزيزى بودا... دة بعض من عندكوا يا شيف،، وبعدين يا عم اية التهم دى ..هو انا حرمتك من حاجة ..انا قلت الطاجن .. وانت عليك صوانى اللحمة :P

وعموما ياعم ممكن يتعمل جنبها كباب حلة بالبصل والتوم وارز ملون ( زى انا ماعملت جنبها :) )

فنسر الغالى

بالهنا يا باشا لما تجربة .. بس بلاش حكاية اليمونة دى احيات ابوك.. الاكلة دة مافيهاش ليمون ..وبعدين بطل تتكلام فى السياسة

" مش عارف اية حكاية الخط الصغير دى .. الظاهر انها موضة :D "

الاخت العزيزة .. سلوى

شرف لى سيدتى ان تتوارد خواطرنا المطبخية ... بس والله العظيم انا كنت عامل الطاجن دة فى نفس اليوم ولم اسطو على صندوق بريدك... اى والله :)

بودا تاااااااااااااانى

حجرب عصير العنب ياريس....بس اوعى بعد ما يخلص ويتاكل مانعرفش باب الشقة من الشباك :wub:

[bodda]

العزيز ابو على الخطير

جرب عصير العنب وعلى ضمانتى :D

وجرب برضه عصير الرمان بيدى طعم مزز ولذيذ للحم

رمضان كريم

:D

[شاعرالرومانسية]

ماشى يا عزيزى.. لازم طبعا اجربها ..مدام على ضمانتك :D

انهاردة بقى انا حقول وصفة سهلة جدا لفيلية بتلو(وممكن كندوز صغير) بعمله بصوص التوم ومعاه شوربة فطر ..مشروم يعنى ومعاه سلطة خضرا بس بطريقة حلوة

الفيلية بصوص التوم

نجيب كام شريحة من الفيليةونتبلة بالملح والفلفل ونسيبة قد ساعة كدة .. وبعدين نحط معلقتين سمن ونحط الفيلية ( وياريت نشقة من النص عشان ما يقوس ) ونحمرة من الوشين كويس ونرصة فى صنية .. ونحط معلقتين تلاتة توم مفروم فى بقية السمن اللى فاضل من تحمير الفيلية مع معلقتين بقدونس مفروم ونقلب تلت اربع دقايق على النار ونحط الخلطة دى على وش الفيلية ونحطة على النار ونضيف معلقتين عصير ليمون ونظبط التتبيل ( ملح وفلفل فقط )

لما يبدأ السائل فى الغليان نضيف كوباية مية سخنو ونوطى النار لحد ما الفيلية يستوى ..وممكن نزود مية حسب الحاجة...

شفتوا سهلة ازاى :D

شوربة المشروم

نجيب بصلاية مبشورة ومعاها تلت فصوص توم مفرى ونقلبهم فى معلقتين سمن معاه فص مستكة لحد ما البصل يبدأ فى الاصفرار نضيف كرفس مقطع ومكعبات جزر ونقلب وبعد كدة المشروم ( معلب او طازة مسلوق خفيف ) ونكمل تقليب وبعد كدة نضيف كوبايتين مرق وسيبة على النار عشر دقائق يغلى

فى طاسة تانية نقلب معلقة دقيق فى السمن لحد ما يصفر الدقيق وناخد كوباية مرق من اللى بيغلى دة ونقلب كويس لحد ما يبقى سائل تخين . ونروح مصفيين المزيج دة على حلة الشوربة بمصفاة سلك ونقلب كويس وفى الاخر نضيف معلقتين بقدونس مفروم قبل التقديم على طوووووول :wub:

سلطة خضرا بالفاصوليا

معش جربوها وبعدين قولو رأيكوا .. نجيب بصل وفلفل الوان ( احمر واصفر واخضر ) كل دة شرايح طولية .. وفاصوليا خاضرا مسلوقة ( نحطها فى المية بعد تسخينها ومانغطيهاش ..عشان تفضل خضرا :blush: ) ونخلط كله مع بعضة

ونجيب معلقة مستردة مع معلقة مايونيز ومعلقة زيت زيتون وملح وفلفل وعصير ليمون ونعمل درسينج من كل دة ونحطة على السلطة ...

واشوفكوا بعد ما تجربوها :)

[bodda]

الوصفتين ممتازين اوى يا ابو على

واضح ان وصفة الفيلية هتكون هايله باللحم البتلو افضل

:D

اما موضوع احتفاظ الفاصوليا الخضرا بلونها

فممكن زى ما انت قلت بعدم التغطية

وممكن باستعمال ربع معلقة شاى كربونات صوديوم من عند العطار

و رمضان كرييييييييييم

:D

[Osha]

أتدرون يا سادة يا كرام?

لقد قررنا يوم الأحد الخروج لشراء سمك والافطار به حيث أننا ليست عندنا نفس القناعة المصرية العتيدة بعدم أكل السمك في رمضان

ولكن تأتي الرياح بما لا تشتهي السفن

فقد وجدنا نوع السمك اللي عليه العين كله مجمد وليس صابحا

المهم اننا قررنا أكل فول نظرا لضيق الوقت المتاح

وقد كان ان نفذت وصفة عمنا الشيف بودا بتاعة دقة التوم وكان الفول افتراء ودمار شامل وحرب نووية عالمية ثالثه

هذا للعلم والاحاطة

حسن اعتقد اني قلت سابقا اني لا احب المشروم ولو ماكنتش قلت اديني باقول

يبقى هل يمكن الاستغناء عن المشروم في وصفةاللحمة او استبداله طبعا

بودا

لم تجبني بخصوص اسم اللحم الفلتو هنا ايه?

الزهايمر شكله اشتغل تاااااااااني

عاوزين بقى حاجات حلوة سهلة خفيفة عشان النأنأة بعد الفطار

[شاعرالرومانسية]

حسن اعتقد اني قلت سابقا اني لا احب المشروم ولو ماكنتش قلت اديني باقول

يبقى هل يمكن الاستغناء عن المشروم في وصفةاللحمة او استبداله طبعا

عاوزين بقى حاجات حلوة سهلة خفيفة عشان النأنأة بعد الفطار

<{POST_SNAPBACK}>

ستنا الحاجة ....

طريقة اللحمة مكنش فيها مشروم اساسا... دى كانت الشوربة :D

رمضان كريييييييييييييييييييييييييييييم :D

[bodda]

العزيزه اوشا

والله ما هو الزهايمر ( مع انى باستمتع به جدا )

هوه مجرد زى ما تقولى حضرتك كده يعنى ...

طبعا واضح ... :P

المهم الفلتو بالعنجليزى هو : FILLET

واى اوامر من ابو العيال

:blush:

رمضان كريم

:wub:

تم تعديل 12 أكتوبر 2005 بواسطة bodda

[Folana]

السلام عليكم ورحمة الله ياقوم........

أبا الحاج رجع بالسلامة ياجماعة (صورة زغرودة).....أبا الحاج الكمبيوتر رجع ياولاد.......بس ايه بقى ....كل مايفتح صفحة على النت يشحر منى بعدها وهات ياكحة ..ويقولى الحقينى بدوا الربو يابنتى ...الحقنى بدوا المفاصل ياضنايا ..وافضل اعالج فيه لاخر اليوم ...انا باقول يمكن من الصيام :blush: ...يالا هانت ...المهم انى عرفت ادخل هنا تانى ...والله اكلاتكم كلها تفرح ..انا داخلة اسلم عليكم بس علشان مااتقَلش على ابا الحاج ولنا عودة انشاء الله .....

صباحكم جميل ..وفطاركم اجمل والز..(انا عارفة ان الز.. بالزال ..بس كل مااكتبها تطلع كده >....مشوها زين لحد مااعرف ايه اللى جرى لابويا الحاج ..يظهر سنانه وقعت).......... :wub: