اطلب اى وصفه على بالك .. تلاقيها قدامك

[shawshank]

س س

ازاي اكتب اسم الراجل Bodda تحرفه انت و تقولني كلام ماقلتوش و تخليه Booda

فين الأمانة العلمية في الاقتبااااااااااس :)

[bodda]

يا خبر ابيض :)

بقى اغيب ليلة اجى الاقى كل الطلبات والتعليقات دى ؟؟

على العموم ولا يهمكم بس هاخدها بالترتيب

وحسب الوقت المتاح لاخوكم الغلبان فى المطبخ الجنان

وهابدأ بأسئلة أبو السيد الصعبة

1- أُذكر طريقة للكنافة غير بتاعتنا في مصر؟؟؟؟؟؟

الكنافه الحادقه مش واردة خالص لسبب بسيط

وهو ان طبيعتها الشعرية لا يمسكها الا العسل

ومش معقول هانحشيها حادق ونسقيها عسل

ولكن....

بالنسبة للقطايف ممكن طبعا تتحشى اى شئ يعجبك ومش محتاجه العسل

ممكن سبانخ مسلوقة بالملح والفلفل ومتصفيه+مبشور جبن رومى

وممكن عصاج ( لحم مفروم وبصل وتوابل )

يعنى اى حشو يعجبك وبعد كده تتحمر وتؤكل ساخنة زى السمبوسك

2- ليه الكفته المصرية كل ما أكلها تحصلي حموضه فظيعة وبتبقى في نار جايده في صدري ؟؟؟؟؟؟

طبعا رد البنت المصرية سبقنى و 100% وهو كثرة التوم وحساسيتك له ، ثانيا اضافة البقدونس بكثرة للخلطة تقلل ده اوى ثالثا : التحمير فى محلات كنتاكى وما شابه يعتمد الان على الزيت الجاف ( بيكون بودره ولما يتسخن يسيح وهو عبارة عن زيوت مهدرجة ) وطبعا يسبب حموضه وبلاوى تانيه كتير

3- أذكر طريقة عمل سلطة الكرنب المشهور بها كنتاكي ؟؟؟؟

سلطة الكول سلو عبارة عن قلب الكرنب الكروى ( الجزء الابيض )

نص قلب كرنبايه كروية مدكوكة وتبشرها ناعم بالسكين

مبشور نص جزرايه حلوه

الصلصة:

1 كوباية صغيرة مايونيز ( كتبت طريقته هنا ..)

ملعقة صغيرة سكر

3 ملاعق كبيرة خل

1 ملعقة صغيرة ملح

ربع ملعقة صغيرة فلفل ابيض

تخلط الصلصة كويس اوى وتدلقها عالكرنب والجزر وتتقلب كويس

ونحط الخليط فى التلاجة ساعتين قبل الاكل

وبالهنا والشفا

ووالله مانا اسامه ولا رمزى ولا نورماندى تو

صباح الفل

[bodda]

نيجى بقى للصديق حسام

الرز المعمر الحادق

ده يا عم حسام لا يؤكل جنبه حاجه لانه متكامل ومفترى

طبعا لازم برام فخار وتعاير حجمه بالكوباية

فمثلا لو هوه ياخد 4 كوبايات ميه

يبقى نستعمل كوباية ونص رز

وكوباية ونص لبن

وربع كيلو سمن

ونص كيلو لحم بتلو مسلوق مع بصل وملح عادى

أو جوزين حمام متنضفين ومسلوقين ومتقطعين اربع

نجيب الرز ونغسله ونحطه فى حله ومعاه السمن وكوباية لبن

ونغسل ايدينا كويس :)

وندعكهم مع بعض كويس قوى

بعد كده نحط نص الرز فى البرام وعليه اللحم او الحمام المسلوق

وبعدين نحط باقى الرز

ونحدق باقى اللبن بالملح والفلفل ومعاه نص كوباية شوربة وندلقه عليهم

ويدخل الفرن لغاية السوى .. حوالى نص ساعه

وبعدين نخرج البرام ونحط على وشه حتة قشطة محترمه متوزعه

ويدخل الفرن تانى لغاية ما يتحمر :D

وبألف هنا وشفا

تم تعديل 25 مايو 2005 بواسطة bodda

[bodda]

العزيزه بنت مصرية

طبعا انا موافق على الفكرة الاستثمارية الجبارة دى

:D :ph34r: :blink:

وانا كتبت شوية سلطات والمايونيز ولسه هاكمل

بس يظهر انك ماشوفتيهمش لسه :)

والف شكر لذوقك وتشجيعك

وسلامى لمحمد العزيز

وصباح الفل

[bodda]

العزيزه اوشا

انا برضه اللى نسيت السلاطات ؟؟؟

انا كتبتهم بس واضح انك ماشفتهمش زى بنت مصرية

وادى وصفة الطعمية تانى للعزيز شاوشانك :

الطعمية

كيلو فول مدشوش

حزمة كرات أو بصل اخضر

راس توم محترمه مفصصه أو نص كوب توم مفرى

ملعقة كبيره كسبره ناشفه

2 ملعقة صغيرة ملح

نص ملعقة صغيرة شطه :D

--- الطريقة ----

ننقع الفول المدشوش 24 ساعه أو فول صحيح يومين ويتفصص

بعد كده نفرم الفول مع باقى المكونات( عدا الملح ) مرتين تلاته

او نضربه فى الكبه حتى يكون ناعم

واخر شئ نضيفه الملح فى اخر فرمه

ممكن العجينه دى تستعمل فى الحال مع اضافة بيضه وخلطها قبل القلى

وممكن توضع فى اكياس فى الفريزر وتخزن

ولكن فى حالة العجينة المجمدة لما نطلعها وتفك نحط نص ملعقة بيكربونات صوديوم

لان من غيرها هاتطلع طعميه مبلطه ومش حلوه :)

وصباح الفل

تم تعديل 25 مايو 2005 بواسطة bodda

[se_ Elsyed]

شكراً يا بودا يا عسل ..

طب أنا عندي إقتراح حيوي وفعال ومفيد للجميع خصوصاً العزابية منهم ( سامع يا ياسو إنت وأبو خليل )

سعادتك ليه م ما تفتحش توبيك للمبتدئين الغلابة وتعلمهم فيه مباديء الطبيخ ... عندك مثلاً الطبيخ أبو دمعه ( صلصة باللغة الفُصحى ) لا تفرق فيه البسلة عن السبانخ ولا الكوسة .. إلخ ... فأحنا نعطي لأودلانا دول عصارة خبراتنا ومعانا أختانا بنت مصر وأوشه ( يعني لو عندنا ندر وهانفرق رز بلبن معجن وكده هانحتاجها :) ) على كيفية عمل الشوربة اللي هي أساسي في معظم الطبخات ... على شوية ألكات تيك آوي سريع سريع زي بتوع السيما

وعلى فكرة ممكن نعمل التوبيك ده بفلوس .. يعني نحط باسورد واللي يدخل يجيب معاه بضاية ، رغيف محمص ، ربع كيلو لحمه .. ونلم بقى يا ريس ونعدي ونقب على وش الدنيا .... فكر وقولي رأيك ..

دي نقطة ...

النقطة الثانية .. خالتك أم عمر ( حرمنا المصون ) تُقرءك السلام وبتسألك عن مكونات التشيس كيك فلو سمحت إلفحني واحد تسيش كيك من فوق القفص ... أنا مبدئياً أدليت بلدويي وقولتلها دي وصفة سهلة .. دي وصفه هايلة ... بما إنك محترفه في عمل الكيك .. فممكن بعد الكيكاية ما تخلص نجيب شوية تشيس ونضربهم في الخلاط مع بعض وتبقى تشيس كيك .. عايز أسمع رأيك العلمي في المعادلة دي ؟

وفي نفس الوقت وإنت تعمل التشيس كيك بإيد عايزك بالإيد التانية ( مش تضربني .. لأ ) تقولي بها وصفات سلطة تكون مكوناتها التونة لإني ما بحبش التونة لوحدها ..

[bodda]

ارحمنى يا سى السيد

يعنى ما قولتش رايك فى طلباتك السابقة

وجاى تطلب جديد ؟؟؟؟؟

طيب خد السلاطه دى ليك ولاوشا ولكل الاصدقاء

سلطة المكرونة بالتونة و الخضار

مكرونة حجم صغيرمسلوقة و ربع كيلو فاصوليا مسلوقة

وربع حمص مسلوق وربع جزر مبشور

و علبة ذرة صفراء مسلوقة و علبة تونة مفتتة

خيارتين مقشرين ونقطعهم مكعبات صغيرة

كوباية صغيرة مايونيز وملح وعصير ليمونتين ومعلقتين خل عنب

ومعلقة زيت ذرة كبيرة

حط كل اللى فات فى حاجه غويطه

وكالعادة نقلبهم بخفة ودلع

وعالتلاجة ساعه وبالف هنا وشفا

مساء الفل

تم تعديل 25 مايو 2005 بواسطة bodda

[bodda]

الفتوش

نص خساية كابوتشى مكببة ومحترمة

ثلاث خيارات متوسطة و أربع حبات طماطم تقطع مكعبات صغيرة

نخرط أربع عيدان بصل أخضر

و ورق اربع عيدان نعناع أخضر جميل

و راسين فجل أحمروعصير ليمونتين كبار وملح وزيت زيتون

رغيفين عيش شامى ابيض نفتحهم وننشفهم فى الفرن

ويتكسروا حتت كبيره

ونحط العيش على خلطة الخضروات السابقة

يخلط زيت الزيتون مع الملح وعصير الليمون ويضرب كويس

ندلق الصوص على الخضروات والعيش

ونقلب بخفة ودلع :)

والف هنا وشفا

مساء الفل

[bodda]

تشيز كيك CHEESECAKE

أهم مكون هو الجبن الكريمى cream cheese

وده لازم تشتريه فى الشكل الصلب وليس المخفوق

وده مهم جدا جدا

تانى حاجه يتم خبز الشيز كيك فى صينية مزدوجه

ويوضع فى الخارجية ماء مغلى قبل دخول الفرن فورا

وتلف الداخليه بالمونيوم فويل بحافه عاليه لمنع وصول الماء للكيكه

ويوضع بين الصينيتين طبق مسطح صينى لمنع وصول الحرارة المباشرة للكيكة

الكميات او المقادير :ph34r:

نص كيلو جبن كريمى يتم تنعيمه أوى بالمضرب السلك مع قليل من اللبن للتسهيل

حوالى 150 جرام سكر ابيض

معلقة صغيرة فانيليا ندوبها فى معلقة ماء كبيرة

بيضه واحده وصفار بيضه تانيه :)

معلقتين كبار دقيق ابيض

كوب صغير لبن و تلات ملاعق زبده

نضرب البيض والفانيليا والدقيق واللبن والزبد مع بعض

ونخلطه مع الجبن الكريمى

عبوة ربع كيلو graham cracker crust

والبديل لها هو بسكويت مارى بدون سكر أو عجينة الميلفى الجاهزه ( مخبوزه)

يتم تكسير البسكويت أو اى بديل بوضعه فى كيس بلاستيك وتكسيره بزجاجه بالراحه

وتتم بوضع الزجاجه افقيا ودحرجتها عليه تحت ضغط لغاية مايتم تكسيرة لقطع صغيرة

يوضع فى وعاء وعليه تلات معالق سكر ويخلط جيدا

ثم يعجن مع ما سبق حتى يصير عجينه متماسكه ومتجانسه

ويخبز كما ذكرت فى البدايه :blink:

ويطلع عالتلاجه ويقدم بعد قلبه فى طبق تقديم

وبالهنا والشفا :D

صباح الفل

تم تعديل 25 مايو 2005 بواسطة bodda

[Salwa]

اول شئ....

اهلا ومرحبا بك معنا .يا Bodda...وبجد بجد كلنا سعداء بوجودك ..

وتعرف احلى حاجة فى موضوعك ايه ؟؟؟

انك بتكتب وتوصف زى ما بتتكلم ودى احلى حاجة بحبها ...

يعنى كأنى معاك فى المطبخ ...

مثلا انا لا اطيق انى اقرأ وصفة فيها ارقام ومقادير ومتاهات ....بحس انى زهقت وتهت معرفش ازاى ؟؟...يمكن لأنى بحب المطبخ وبحب الشرح السهل اللى فى متناول يدى ..

يعنى لو القيت نظرة على (( شوية )) الطرق اللى كتبتها لطريقة عمل.... كذا وكذا وكذا ....حاتلاقينى برضه بشرح كدة بالبركة والحاجات بتطلع تحفة ..

ثانى شئ...

بمناسبة يوم (( الاستفتاء العظيم ))....

وبدون اخد رأى ..(( اى عضو ))...

اتضح ان نتيجة الاستفتاء ....99.9 % ....وكل المنتدى يبايعك ..

الأب (( الروحى )) لباب المطبخ ...

ثالث شئ...

انا اقدر مجهودات البنت المصرية فى هذا الباب ...ولكننا يجب علينا ان نترك الفرصة متاحة للشباب ..

وكلمة فى سرك . يابنت يامصرية ..(( خليه يكتب كل الوصفات وفى الآخر سوف تكونى انتى مسئولة فعلية .((..مش روحية بس ..))..عن كل شئ ..

تمام زى ما بيحصل فى كل الوزارات ...آت ..آت ..آت ..

الى الأمام ياشباب المحاورات ...

رابع شئ ...

تم تدشين هذا الباب الجديد تحت رعاية السيدة الاولى ...والراعية (( مش راعية غنم ..لالالا...اقصد حامية ...لالا مش شطة ..اقصد التى تدافع ...لالالا..مش ماسكة مدفع ...افهموها انتم بقى ))..الاولى لكل الاطفال والشباب ..(( مفيش شيوخ لأن الشباب ماتوا بدرى بدرى من الحسرة ))..

خامس شئ ...

تفضلوا بقبول خالص شكرى وتقديرى ...وربنا يخللى لنا كل (( الاسرة السعيدة التى ترفرف علينا بجوانحها الأربعة ))..

الفقيرة لله تعالى ...

سلوى ..

[bodda]

العزيزة سلوى

الف شكر للكلام الجميل ده واللى اكتر من حقى بكتييييير

وبعدين مين قالك انى عايز اشيل اى مسئولية هنا ؟؟؟ mfb:

لا ياستى انا لا اب روحى ولا عيل روحى حتى :D

انا بحب الهواية دى ويمكن علشان كده باحكى براحتى معاكم

والبنت مصرية متواجده على طول ولا استغناء عنها

ولا عايزه تعملى استفتاء وتغيرى الدستور ؟؟ :ninja:

لكن بجد سعيد بوجودك معانا

بس ليه رجاء

انا مافهمش فى مواضيع البرامج والذى منه

هل ممكن احط فى الموضوع ده وسيله سهله للبحث عن وصفه معينه

او ارشيف مثلا

طبعا انا شاكر جدا لاى مساعده للاصدقاء مقدما

وعلى فكره انا مش شباب خالص لانى عديت العشرين

ييجى من عشرين :D :ph34r: :ph34r: :o

مساء الفل

[bentmasria]

مدام سلوى عندها حق الاب الروحى موجود

افتحوا انتو الباب بس واحنا نقسمه اشى شامى واشى مغربى الخ الخ

طبعا انا عليا الاخراج الفنى وبودا الاخراج المطبخى

وبما اننا زمايل فى الاربعينات فالتفاهم حيكون سهل جدا

ومحمد بيسلم عليكو وبيقولكوا عاوز دولما شامى موش مصرى ممكن

ام محمد

[Osha]

ما شاء الله

دا انا لسه كاتبة ردي مابقاليش كام ساعة آجي ألاقي كل ده ورايا!!

وبعدين يا بودا انت مابتحرمش?

تاااااني بتسأل علىأرشيف??!!!! :o :D

يا سيدي اللي عاوز يعمل بحث ممكن يعمل بحث داخل الموضوع بالكلمة

وكمان أنامؤيدة تماما للي بيكرهوا عجينةالطعمية الشامي !!! أصلي بأحس اني باكل حاجة مقلية في زيت سمك ومابتتبلعش حتى لو بلعتها بمية ناااار mfb:

وللعزيز سي السيد : لو عندكم ندر وفرقتوا فيه رز بلبن من بتاعي - ان شاء الله الناس بدل ما تدعلي لكم حتدعي عليكم - الطيب أحسن :D :D

وبعدين يا ام محمد - محمد اللي عندي بيسلم على محمد اللي عندك وبيقولك الضلمة الشامي طعهما مش قد كده - بعد اذن بودا طبعا - مافيهاش خضرة وباللحمة المفرومة وكمان بزيت زيتون بدل السمن أو زيت الذرة

أنا عزمت جماعة هنا وكانوا أكلوا قبل كده ورق عنب شامي عند ناس - بس لما عملت لهم بتاعنا أبو خضرة ومن غير لحمة غيروا رأيهم فيه وعجبهم المصري - طبعا - أكثر من الشامي !!!

:ninja:

بودا

الطيب أحسن معايا ودور علىالسلطة المكسيكي اللي سألتك عليها بدل ماأحطك في الأرشيف وانت عارف الباقي!!! استبينا :ph34r: :ph34r: :

[bodda]

العزيزه اوشا

ايه الهجوم الجوى البرمائى ده ؟؟؟ :ph34r:

ياشيخه بالراحه عليه هوه انا ملاحق ؟؟؟

بس برضه حاضر... وفكرتك كويسه عن البحث العادى

صلصة مكسيكى

معلقتين كبار زيت

3 فصوص ثوم كبار مهروسين و بصلاية مفرومة

فلفلاية خضرا بارده مفرومه :ninja: و 4 قرون فلفل حار مفروم mfb:

3 طماطمايات مقشرين ومفرومين و 3 ملاعق كبيرة صلصة طماطم

ملعقة صغيرة فلفل اسود و ملعقة صغيرة بابريكا :o

ملعقة صغيرة ملح ومعلقتين كسبرة ناشفه

و نص كوباية بقدونس مفروم

حطى الزيت فى الحله و عليه البصل وتقليب سريع لما يدبل

تروحى حطة التوم تقليبتين بسرعه ووراه الفلفل تشويح سريع

ثم باقى المكونات ونص كوباية ميه بس المهم التوم ما يصفرش

وتسيبيها عالنار حوالى 10 دقايق ثم نحط البقدونس اخر حاجه

تقليبتين لما يدبل يبقى كله فى التمام ونحط معلقتين خل

ولما تبرد وتبقى دافيه ندلق ده كله فى الخلاط مع الضرب المبرح

وممكن تتصفى من مصفاه سلك واسعه او تستعمل كما هى :ph34r:

ونار يا حبيبى نار

تم تعديل 25 مايو 2005 بواسطة bodda

[Osha]

حضرلك الخير يا أمير

وشكرا على السلطة المكسيكي - شكلها من دلوقتي بيقول حاجات كتيييير

بيقول اني بس اللي حاكلها عشان حسام مش بيحب الحراق :ph34r:

وبعدين خلاص انا أمرت قوات الهجوم بالانسحاب لانك استمعت لصوت العقل - وبلاش الكلام الخطر بتاع الأرشيف - يجعل كلامنا خفيف عليهم!! :ph34r:

ثم انت لم تذكر بوضوح لماأضرب الخلطة في الخلاط ضربا مبرحا - لم تذكر حتى الاستغاثة - وألا ضرب المخبرين العادي!!! mfb:

يعني ضرب عادة والا سوبر :ninja:

ويجعله عااااااااامر

تم تعديل 25 مايو 2005 بواسطة Osha

[شاعرالرومانسية]

اية دة بقة دة بقة دة بقة دة بقة

اية دة بقة دة بقة دة بقة دة بقة :ph34r:

يوووووووووووووووة

اولا ... السلام والتحية على كل الحاضرين والغائبين

معلش اصلى لسة داخل المنتدى ومسجل وقلت ادخل اشوف القسم بتاع المطبخ ( اصلها هوايتى ) ولسة بحط رجلى .. وخير الله ما اجعلة خير الا والاقى ..فى وشى...وبدون مقدمات ... ولا انذارات .. ولا .... خلاص خلاص بدل ماحد يقول عليا خنيقة :o

الاقى ....

الشيف العزيز بودا ( وكالعادة نصب النصبة وولع الولعة وابتدا تدبير شئون المطبخ بتاعة ... ومن غير الصبى بتاعة ( اللى هو انا ... :ph34r: )

اصلى بعيد عنكوا برضة هاوى مطبخ....

بس ايةدة يا معلمى ..دا انت نزلت كل المنيو بتاعتك من اولها كدة ...

لاء واية ( اللهم مالا حسد ) الطلبات نازلة ترف...

وكمان الاخت اوشا موجودة وزوجها العزيز ...

دا كل الاخوة الصعايدة ...( قصدى الاكيلة ) موجودين هنا

دا احنا حنطبخ للصبح :D

عموما يا استاذى وملاذى ..وشيفنا الهمام بودا ...

اوعى تكون جبت صبى غيرى يا باشا .. انا موجود وتحت الطلب ( لاء عقلكوا ما يرحش لبعيد.. طلب اعهداد الاكلات وليس شىء اخر mfb:

واخيرا

للجميع اطيب المنى وارق تحياتى :ninja:

[aynad]

ياااااااااااااااااه اخيرا جييييييت

اولا اشكر اوشا اوي اوي اوي علشان عرفتني المنتدي دة

و انا جاية هنا مخصوص علشان بودا اللي سابنا و مشي

اخي العزيز بودا انا فرحانة جدا جدا بالموضوع دة

ممكن تقولي بأة طريقة عمل الشوكولات موس لاني حتجنن حقيقي و اعرفها

وبس خلاص

خلصت حاجتي من جارتي ههههههههه :D :blink:

[se_ Elsyed]

ممكن تقولي بأة طريقة عمل الشوكولات موس  :D  :blink:

<{POST_SNAPBACK}>

إيه الأكلات اللي تعور دي ؟

يعني الواحد يبقى اعد ياكل شوكلاته في أمان الله يلاقي في قلب الطبق موس حلاقه ؟

يالا أهو الموس ينفع برضوا لو الواحد إتخانق مع مشرف ولا حاجة ..

مرحباً بشاعر الرومانسية وبالزميلة عناد .... بودا جه وجاب الخير معاه ( إنتواجايين من أنهي محافظة ؟ )

[Osha]

اهلا شاعر الرومانسية من زمان الواحد ماشافكش

كنت مستريحة من خنقتك :sad:

قصدي محرومة من طلعتك!! :D

بودا الظاهر هرب بعد ما لقاك وصلت

وكمان نودا هنا - مرحب وكويس انك وصلت - ماتقلقيش أنا حاوقل لبودا اني حاحبس شاعر الرومانسية ومش حاخليه ييجي تاني هنا

بودا انت اختفيت تاااااني!!!

عاوزين موس الشيكولاتة عشان سي السيد يحلق دقنه بعد ما ياكل :lol: :D

[bodda]

اولا خلونى ارحب بالاخ العزيز جدا شاعر الرومانسية

وماتصدقوش كلامه لانه مش صبى ولا حاجه

ده شيف وعلى تقيل كمان :sad:

منور يا شاعرنا الجميل

وثانيا اجمل شئ هو وصول العزيزه ايناد

وخلوا بالكم من نشاطها الملحوظ

وهيه اضافة حقيقية للمكان

فشكرا لاوشا العزيزه جهودها لتجميع الناس الحلوة

مساء الفل

:lol: