اطلب اى وصفه على بالك .. تلاقيها قدامك

[bodda]

أبا الحاج عمره الافتراضى عدى من زمااااااااااااان

وارحمى عزيز قومٍ ... كبر فى السن فياريت ترحميه

اكلتيه لحم من زمان... ودلوقت مش عاجبك وعايزه تشغليه

:blush:

كان بيلف بيكى الدنيا ... دلوقت عايزه تجيبى العالم عليه وتضحكيه

يا ما سهر عشانك ليالى ... دلوقت مستخسره الحنيه فيه

:wub:

وعجبى

رمضان كريم

:P

[bodda]

من تسالى ما بعد الفطار

طبق قمر الدين (الكداب)

وده ينفع حبايبنا فى الغربة اللى ماعندهمش قمر الدين

وبنعمله بمسلوق نص كيلو جزر

وعصير كيلو برتقال

ونضربهم مع بعض فى الخلاط ضربا مبرحا

:blush:

بعد كده ندلق فى الحله ونضيف السكر ونغلى عالنار

ثم اضافة النشا كما فى عمل المهلبية او قمر الدين العادى

ونغرف فى اطباق عميقة ونزوق بجوز الهند والزبيب

والف هنا ومش هايفرق الطعم خالص عن قمر الدين

ورمضان كريم

:wub:

[Salwa]

شكرا ياجماعة على مراعاة شعور ( ناس الغربة ) ..

فعلا عصير البرتقال مع عصير الجزر بيعطى طعم مشابه لقمر الدين ..

واحيانا استعمل عصير المشمش ..

ولو انى مرة جربت انى اضع عصير المشمش فى الفرن ....يعنى دهنت صاج الفرن بالزيت ثم قلبت العصير سمك واحد سنتيمتر على درجة حرارة عالية ..

هو طبعا طلع قمر الدين بيتى (( خصوصا فى الغربة )) ..يعنى عصير مشمش له مذاق قمر الدين اللاسع بعض الشئ ثم نضيف له الماء ونضربه فى الخلاط ..

ياما الواحد جرب حاجات هنا .....بس جابت نتائج هايلة .

يكفى اننا نأكل خبز بلدى ( بيتى ) ..من آن لآخر ..

على فكرة بالأمس عملت محشى البصل وطلع تحفة .....اللى بيحب البصل يجرب .

تم عمل المحشى على طريقتين ..

الاولى :

بصل كبير الحجم ..نقسم البصلة لاتنين نقطع بالطول ..

نضع البصل فى ماء مملح للسلق مدة عشر دقائق تقريبا ثم نبرده بماء برد ونفكك دوائر البصل واحدة واحدة ..

نكون محضرين خلطة عبارة عن لحم مفروم متحمر شوية فى الزبدة نضيف له بصل مبشور و البقدونس المفروموطماطم مقشورة ومقطعة صغير جدا وممكن بعض الارز ..

نحشى الدوائر واحدة واحدة ....نلفها باعتناء .ونرصها بحرص .ونصب عليها عصير طماطم او شوربة يكون افضل ..يادوب تغطيها .ونضعها على النار وعندما تبدا فى الغليان نهدى النار جدا الى ان ينضج المحشى .

الثانية :

بصل متوسط ويتم سلقه بنفس الطريقة الاولى وايضا يتم تبريده بماء بارد ..

ثم نزيل قلب البصل بحرص يحيث اننا لا نفتح البصل من الناحية الاخرى ..

نحشيها بنفس الحشو ...وايضا نضع عليها كوب من عصير الطماطم مع ملعقة زبدة ..

لكن هذه المرة نضع عليها جبنة مبشورة ممكن تكون موتزاريللا او اى نوع آخر .

وندخلها الفرن ...

وبالهنا والشفا...

[bodda]

الله يا سلوى على محشى البصل

شكله تحفه .. تسلم ايدك

بس علشان خاطرى حطى معاه شوية شبت وشطة

علشان ريقى جرى ومش عارف احصله

:blush: :wub: :P

رمضان كريم

:wub:

[Osha]

الحمد لله

احنا في الغربة ايوه

لكن عندنا قمر الدين وقراصيا ومشمشية وتين وكل حاجة والا كانت راحت فيها رقاب - طبعا رقبتي انا

الأخت سلوى

لم افهم يعني ايه نفك الدوائر - يعني يبقى زي ورق العنب يتلف وبعدين يترص?

اخونا بودا

رأيت فيما يرى النائم اني قد سألتك على حاجة حلوة تكون خفيفة وظريفة

عشان نأنأة بعد الافطار ? هل كان حلم تفتكر والا حصل وانت طنشت

فولانة

الحمد لله على السلامة - وياستي حلي الكيس وهاتي جهاز جديد

حسن

نأسف على الخطأ - صيام بقى وحول ربنا مايكتبها عليك يا خويا

[مصرية الهوى]

أنا نفسي أدوق الخشاف ...

عشان كده عايزه أعرف يتعمل ازاي ؟؟!!

:wub: :wub:

[bodda]

العزيزه اوشا

انا كتبت قمر الدين للنأنأه بعد الفطار

الا اذا كنتى عايزه حاجه تانيه ياريت توضحى

:wub:

العزيزه جى جى

الخشــــــــــــــــــــاف

كبشتين بلح ناشف يعنى يتكسر ومايكونش طرى

ونكسره حتت كبيره او انصاف

وكبشة تين جاف يتقطع اربع

وكبشة قراصيا حلوه وكبيره

وكبشة مشمش جاف يتقطع انصاف

و كبشة زبيب

وكبشة لوز مقشر

كل ده يتحط مع بعضه فى حاجه بايركس عميقه وشفافه

ونحط عليه ميه مغليه تغطيه

ونسيبه ساعتين

بعد كده يدخل التلاجه ساعتين تلاته قبل الاستعمال

وبالف هنا وشفا

رمضان كريم

:wub:

[شاعرالرومانسية]

اختنا الغالية ...مدام سلوى

تسلم ايدك على محشى البصل ... بس انا منتظر ردك على استفسار العزيزة اوشا ... (معلش تجارة زى بعض بقى وفهمنا واحد :wub: )

ضيفتنا العزيزة مصرية ..الهوى

اهلا بيك،،، وحقوللك طريقة كمان للخشاف بحب اعملها .. (يمكن تخليكى صاحبة بيت مش ضيفة طيارى :wub: )

انا بحب انقع البلح قبلها بيوم فى .. لبن

وممكن نضيف نفس المكونات اللى قالها عزيزنا الشيف

وممكن بقى بعد البلح ما يتنقع فى البلح واللبن يلون كدة ..وبدل ما ناكلة صحيح

نحطة فى الخلاط ونهرية خلط :wub: لحد ما يبقى مزيج كدة مالوش حل ..نصفية بمصفاة سلك ونديها فيتامين هـ

[شاعرالرومانسية]

فطاحل واباطرة مطبخنا الكريم...

انا عندى عزومة يوم الاحد القادم - ان شاء المولى -

وكنت ناوى اعمل شوية حاجات كدة

- عرق لحم رستو

- صينية جلاش باللحمة المفرومة

- كباب حلة

- شوية سلاطات

واسيب الباقى للمودام تتسلى فية :wub:

ياريت بقى يا خوانا اللى عندة طرق افتكاسية جديدة للأصناف السابقة ... يدلى بدلوه

[Salwa]

صباح الخير ..

الاعزاء اوشا وشاعر الرومانسية ..

طبعا احنا لما نقسم البصلة الكبيرة بالنصف الطولى ونسلقها بسيط ونبردها ..

البصل بيكون طبقات طبقات ....احنا نأخذ طبقة طبقة بحرص ونحشيها ونلفها زى ورق العنب او يعنى اصابع ..

حكاية القراصيا والتين والمشمشية ...دول موجودين عندنا لكن قمر الدين ..لالالالالا....

صباح سعيد...

[Salwa]

صباح الخير ...

اخونا الفاضل شاعر الرومانسية ..

سوف اقول لك طريقتى فى عمل الروستو ....

طبعا كما سبق وقلت انى لا اطبخ بطريقة تقليدية اى اننى اضيف او لا اضيف اى مكونات حسب مزاجى وقت الوقوف فى المطبخ ..

بس بجد بجد .....جرب وعلى ضمانتى .

ممكن عمل الروستو بعدة طرق طبعا ...

ممكن عمل روستو من صدر ديك رومى او من لحم بتلو او من فخدة ضانى او من عرق لحم قريب من الفخد من اللحم الشمبرى .

فى كل الحالات يستحسن لف الروستو بالدوبار ..

لو اردنا حشو الروستو ممكن نعمل قطع طولى ونحشيه زيتون مخلى من البذر او توم ..

نضع ملعقة زبدة ونحمر الروستو من كل الجهات جيدا ثم نضيف له حوالى اتنين كوب ماء ونتركه ينضج ( عند الغليان دائما نهدى النار ) ...وكلما احتاج لمياه ممكن نزودها .شوية شوية .

فى كسرولة اخرى نحمر يصلة مقطعة صغير جدا وعندما يكون لونها ذهبى نحمر ثوم مدقوق ثم نضيف ملعقة دقيق واحدة ونقلب جيدا ثم نضيف الحساء ويغلى لمدة عشر دقائق ........ثم نضرب الصلصة بالخلاط حتى تتجانس ولا تظهر اى اثار للبصل ....

لا تنسوا الملح والفلفل الاسود ...

بعد ما نترك الروستو الناضج فى طبق على جنب ..

نقطع الروستوبسكين حامى ترنشات ونرصه فى طبق التقديم وممكن يكون عبارة عن برام تقديم شبه الصينية ..( ممكن تقديمه على السفرة ...يعنى من الفرن على السفرة على طول )..

ثم نضيف له الصلصة ...

ممكن نحتفظ به فى فرن دافئ لحين التقديم ..

او قبل التقديم نضعه فى الفرن خمس دقائق فقط ..

او من يفضل اللحم بارد ...يتركه كما هو ...

ممكن ايضا يتم تحمير اللحم ثم اضافة المياه وعندما يقترب من النضج نضيف جزر وبطاطس وبصل ..

ثم يقطع اللحم ترنشات بعد النضج ونجمل الطبق بالخضروات ..

دائما سر نجاح الروستو هو وضع قليل من الماء للنضج ..اى وضع مياه بالتدريج ..

وبالهنا والشفا..

[مصرية الهوى]

bodda الله يخليك بالراحة .. وحده .. وحده .. عشان أفهم !!

كبشتين .. ايه ده ..

أنا عايزه مقادير مضبوطة .. يعني كوباية .. معلقة .. والا اشيل في ايدي اي مقدار واتكل على الله :D

حاجه تانية البلح .. أجيب ناشف منين ؟؟!! ... ينفع أحط البلح العادي في الشمس عشان ينشف :D

قراصيا :wub:

ايه ده بقى ده !!!! :D

ده يتجاب من فين ؟؟!! .. من سوق الخضار والا من البقال والا من الترزي ...والا من فين بالضبط ...!!

وريني شكله الله يخليك ..

بيتهيألي لما أعمل خشاف .. مش هيبقى خشاف ..

ده هيبقى سلاح نووي ... :D

ونصيحة لوجه الله ..

اما اطلب منكو وصفة بلاش تدوني اياها ...

عشان ميفقدش المطبخ المصري

رونقه :wub: :wub:

[bodda]

العزيزه جى جى

كبشه يعنى حوالى كوبايه وسط :wub:

وبعدين السعوديه فيها كل انواع البلح والتمر

منه اللى يصلح للاكل مباشرة يعنى طرى شويه

ومنه الناشف اللى بقول عليه وممكن طبعا تنشفيه فى فرن مطفى ويبرد

اما القراصيا فهى نوع من البرقوق المجفف بيكون لونه اسود بيلمع

وطعمه معسل ويجنن ( اصلى بحبه اوى وممنوع منه ) :wub:

:wub:

متهيالى كده ممكن تطلعى خشاف تمام

وبالف هنا وشفا

ورمضان كريم

:D

[bodda]

العزيزه سلوى

الروستو يجنن وعندك حق الاضافات دى بمزاج فى المطبخ

والطباخ الشاطر مايطلعش نفس الصنف بنفس الطعم مرتين

التغيير فى المكونات والاضافات فن جميل

تسلم ايدك

رمضان كريم

:wub:

[bodda]

العزيز حسن

انا بعمل عمله مجنينى فى صينيى الرقاق جربها

وهى انى بافرم زيتون اخضر واخلطه مع العصاج لما يبرد شويه

وبعد كده عادى ...بس بيفرق اوى

رمضان كريم

:wub:

[Salwa]

مساء الخير ...

اخونا الفاضل بودا ..

بما ان الحكاية فيها اضافات ...

انا فى بعض الأوقات اضيف مع العصاج لحشو الجلاش طماطم مقطعة صغير جدا مع بقدونس مفروم.

وفى اوقات اعمل خلطة الحشو من التونة مع الطماطم والبقدونس ...

اما بقى اجمل حاجة .خلطة تانية مختلفة .....نفرم صدر الفراخ او نقطعه صغيرجدا ونعصجه كما اللحم ونضيف له طماطم وبقدونس ونضع له بهارات اللحم ..

فى كل الحالات نضع على وجه الجلاش بيضة مخفوقة بملح وفلفل ...

.... ياجماعة بيتهيألى بعد كل اختراعاتنا فى المطبخ بريادة الشيف بودا اذن مطبخ المحاورات يستحق جائزة

(( نوفل )) ..

تعريب لجائزة (( نوبل ))..

سلام كبير ..

[bodda]

العزيزه سلوى

برضه جربى فى الحشو مره الزيتون المفروم ومره الشبت

اما البيض فانا اضرب صفار بيضتين مع كوباية لبن واسقى بيهم الجلاش بعد السوى

وادخله تانى الفرن لتحمير الوش وده يخليه طرى ولذيذ

اما جايزة نوفل فاعتقد نتشارك فيها كلنا للهواية والصداقة الجميلة

رمضان كريم

:wub:

تم تعديل 14 أكتوبر 2005 بواسطة Salwa

[شاعرالرومانسية]

شكرا شكرا لتحالف قوى المطبخ والمتمثلة لاأخوة الاعزاء .. مدام سلوى و شيفنا الغالى بودا... :wub:

حجرب موضوع الزيتون ( طبقا لرأى بودا .. ) والبقدونس ( طبقا لرأى مدام سلوى ...)عشان ابقى رضيت جميع الاطراف :D

بس لية مركزين فى الرستو والجلاش ... فين افكار كباب الحلة والسلطات :wub:

وبعدين فين افكار احبابنا الباقين .. اوشا وفولانة وكل الشيفات والشيفين :wub:

[Osha]

انا حاقول كام حاجة في السريع عشان ورايا عزومة وديك رومي لازم يستوي

العصاج:

بعد السواء بأبشر بصلة صغيرة مع واحدة فلفة رومي وأخلطهم معاه بيبقى جميل اوي

كباب الحلة اناماليش فيه وانما باحب الكمونية جدا

وبأعملها بقطع لحمة يحمر معها ثوم مقطع شرائح وكمون وكزبرة ناشفة وفلفل اسود - تتحمر عادي جدا في السمن وبعدين تسقى بالماء

الفكرة هنا ان الكمون والكزبرة مش رشة زي باقي الأكل وانما على الأقل ملعقة كاملة وذلك على أساس عدد او كمية قطع اللحم

السلطات بقى

العادية جدا سلطة خضراء وبابا غنوج وطحينة وسلطة زبادي بالتوم بس باحط فيها رشة زيت ذرة عشان التوم

باعمل سلطة بطاطس احيانا

بطاطس مسلوق يهرس جيدا ويقلب فيه فصيت توم مفري وملح وفلفل وكمون وكزبرة ناشفة وبعدين اقدح معلقتين زيت واحطهم فوق الوش

القدح هنا بيقلل من الحموضة اللي بتعملها السلطة دي

أقوم بقى اشوف الديك ساح والا لأ

المنيو عندي النهادره

خشاف منقوع في قمر الدين - جربوه حتلاقوه أحلى من الخشاف اللي في ميه

ديك رومي - مع اني مش باحبه انما عشان اخواناالأمريكان

كوسة بالبشاميل

محشي ورق عنب

محشي كوسة - قلت اكتر القرع برضه عشان لايق عليهم

ملوخية

صينية بطاطس باللحمة

كمونية

رز بالخلطة

[bodda]

ربنا معاكى يا اوشا ويعينك عالديك والامريكان

وحلوه وصفة الكمونية طبعا

وكمان الخشاف مع قمر الدين اكيد طعم تانى

وعايزين نعرف اخبار الموقعة.. قصدى العزومة بعد النتهاء منها

رمضان كريم

:lol: