اطلب اى وصفه على بالك .. تلاقيها قدامك

[Folana]

السلام عليكم ورحمة الله ............

ياجماعة ال..T-bone دى لاهى خمر ولا شامبو ولا اى حاجة ..دى فوار مهضم بعد الاكل .....

لا الحقيقة طبعا كلكم عارفين الريش بتاعة الخروف او البتلو اللى بنشويها كباب دى ....اهى المذكورة اعلاه دى عبارة عن ريشة بس بروحين ....او تقدروا تقولوا ريشة توأم ملتصقة من عند الرأس ....او تقدروا تقولوا ريشة مخاوية ...

بجد بقى ..هى عضمة على شكل حرف T وفيها اللحم من الناحيتين وحجمها كبير ...انا اكلتها فى احد المطاعم ..بس ماعنديش الجرأة طبعا انى اروح للجزار اقوله ادينى اتنين كيلو T-bones يااونكل جزار ..والا... .انتم عارفين الباقى بقى .... :)

المهم..بقى انا طول شهر رمضان المبارك بأكر وأفر وأحاور علشان ماعزمش حد حدانا ..لكن وقع المحذور وجوزى افندى تبرع بتوجبه الدعوة لناس معرفة .....انا ناوية اقلبها عزومة بحرية بقى واخلص ...فارجو من السيد بودا..انه يتفرغ شوية ويقدح زناد فكره ويقولى اعمل ايه وازاى ..والدعوة مفتوحة للجميع فى المشاركة ..مش على الفطار ولكن المشاركة فى كتب افكارهم :D

[Salwa]

صباح الخير ..

كيف حالكم ياجماعة الخير ؟؟ ارجو ان تكونوا بخير ..

على فكرة يافولانة مداخلتك ضحكتنى قوى قوى ...خصوصا (( انه مش خايف عليكم لكن خايف على نفسه ))..

فكرتينى بحاجة كان زوجى دائما يعملها مع الأولاد ...

وهم صغار قبل نزولهم للذهاب للمدرسة كان يتأكد من احكام القبعة والكوفيه والجوانيات عليهم...وقبل ده وده ...يضع لهم كريم على وجوههم حتى لا يشقق البرد جلدهم ....وحاجات كدة يعنى .

كانوا (( بيتغاظوا )) من هذه الروتينيات ....وكان هو يردد ..انا اتولدت جنب البحر وعارف يعنى ايه النزول بدرى فى ديسمبر فى عز البرد ؟؟

وكانوا يقولوا ....بابا بفعل هذا ...كأنه خايف الا هو يبرد وياخد برد دلوقت ..بيحمى نفسه فينا !!!...مش قادرين نتحرك ..(( مع ان درجة الحرارة بتكون احيانا اتنين تحت الصفر ))..

على فكرة ...هم كبروا .

بيعملوا نفس الشئ (( بدون شعور ....يعنى تلقائى ..وبيشكروا هذا لوالدهم ))..

بالنسبة للستيك بالجبنة الزرقاء ..

انا اعمل فلتو ..

يعنى مثلا نحضر شرائح اللحم ونحمرها او نشويها ...يعنى ممكن تتعمل بطريقتين

انا بعملها بزيت الزيتون ...وممكن وضع حبات من الفلفل الاسود صحيحة حتى تعطيه مذاق خاص ...

نضع ملعقتين زيت نتركها بضع دقائق على كل من الوجهين ..

بالنسبة للصلصة ..

نحضر 100 جرام جبنة روكفور ..ونحضر كريمة للطهى ....بتتباع فى كل مكان وممكن كريمة لبانى ..

ناخد على كل 100 جرام جبنة اربع ملاعق كريمة ..

نضعها على نار هادئة لمدة عشر دقائق ..

ثم نضيف لها ملح وبقدونس مفروم ....

نضع الصلصة فوق اللحم فى طبق التقديم ..

على فكرة الطبق ده لازم يتقدم سخن ...

يعنى يفضل عمل الصلصة وقت الاكل افضل ..

وبالهنا والشفا ..

[Osha]

ITS NOT ME WHO WROTE THESE THINGS, HE WAS HOSSAM JUST FORGOT TO SIGN OUT FROM MY ACCOUNT :) :D :D :D

Rip-eye

T-bone

:D

:D

I think these are kind of toothpaste :D

[bodda]

ياسلام... غالى والطلب عزيز هههههه

طاجن سبيط ( كالامارى / سبيا )

كيلو سبيط منظف جيدا

ولازم يكون طازه اوى ويتعرف بان لونه يكون ابيض جدا

واى شبهه لون اصفر تدل على انه مش طازه ....اوك؟؟؟

نستعمل فى الطاجن ده لحم السبيط اما الراس والأذرع فلها استعمال اخر

نحضر ميه بتغلى فيها معلقتين ملح ونسقط فيها السبيط ياخد غلوه واحده

ونرمى الميه دى هاتاخد كل الزفاره معاها ...

نسيب اللحم يبرد شويه وبعدين نقطعه مربعات او اصابع حسب الرغبه

ونحضر الخلطة..

بطاطسايه وسط نقشرها ونقطعها مكعبلات ( مكعبات :D )

بصلايه كبيره تقطع ترانشات ونفركها مع ذرة ملح

أربع فصوص توم صينى كبير ندقهم مع معلقة ملح وكمون وشطة

حزمة شبت وبقدونس وكسبرة نفرمهم او نخرطهم رفيع

فلفلايه كبيره تقطع رفيع وجزرايه نبشرها فى العيون الواسعه للمبشره

نقلب الخلطة دى كلها مع بعضها ونضبط ملحها :)

نضيف عليها السبيط المقطع وندلقهم فى طاجن مع نص كوباية ميه

طماطمايه وسط نقطعها مكعبات صغيره اوى ونفرفطها عالوش

و نحط معلقتين زيت ذره كبار ونغطى بالفويل وعالفرن الحار جدا

:D

بعد نص ساعه نشيل الفويل ونسيبها وشها يتحمر ويتحرق اطراف الطماطم

ونقابلها وهيه خاجه من الفرن بعصير تلات لامونات حلوين

وبالف هنا وشفا

مساء الفل

:D

تم تعديل 27 أكتوبر 2005 بواسطة bodda

[bodda]

وده بيكون سلطه بس برضه صنف تحفه

جمبرى بالمايونيز

اتنين كيلو جمبرى وسط بدون راس

نغسلهم كويس ونحطهم فى حله مع بصله وفصين توم وملح وكمون

وعليهم نص كوباية ميه ونحطهم عالنار ونقلب بعد عشر دقايق لغاية ما يحمر

نصفيه من الميه ونسيبه يبرد... وبعدين نفصصه

وماينفعش هنا نجيب جمبرى مفصص جاهز ... مختلف خالص

نعمل المايونيز

فى العجانه بالمضرب السلك نحط صفار تلات بيضات ونضربهم 3 دقايق

وكوباية زيت ذره نضيفها بعد كده بمعلقة صغيرة ... مش دلق :)

لما يخلص الزيت هاتلاقى المايونيز تخين .. نضيف ربع كوباية خل

وملح وفلفل ابيض..... و ممكن لو عندك ربع معلقة صغيرة خردل

ونقدر نخفف المايونيز زى ما نحب باضافة الخل

بس اى تخفيف للمايونيز ماينفعش نتخنه تانى ...خطوه غير عكسية

:D

نكون محضرين كوباية بسله مسلوقه ونص كوباية جزر مكعبات صغيرة مسلوق

نلخبط كله مع الجمبرى و المايونيز بخفه ودلع

وندلقه فى سيرفيس التقديم ويجمل بالزيتون الاسود فى الجنب وقرن شطه اخضر

و رمضان كريم

:D

[Folana]

انشالله انشالله انشالله مااعدمك

شاكرين افضال معاليك ...هى العزومة يوم السبت ..انا حاعمل بجانب اللى انت وصيت به كمان شوربة فواكه البحر...وحاعمل كابوريا وجمبرى مشوى ..وحاقلى فيليه ..وحاعمل مكرونة بالجمبرى والسلاطات ..كده كويس ولا اضيف حاجة ولا اشيل حاجة ؟....

انا مشكلتى فى العزايم انى مااعرفش اطنش ..طالما وقفت فى المطبخ باقف وقفة ردالة (رجالة)....نفسى اعمل زى الناس اللى بيعزمونا ..هم صنفين تلاتة وخلاص على كده ....

العزيزة سلوى ...تسلم ايديك على الوصفة الهايلة ...انا حاجربها بكرة ..باين عليها سهلة وخفيفة ...

هاتى ودنك ...انا جوزى بيخاف على نفسه بجد وبيحصنا من اجل سلامته هو شخصيا ..اول مااقول اه بس الاقى شنطة الدوا اتفتحت وبدا يكشف على ويشخص حالتى ويعالجنى ..وبالمناسبة هو مش دكتور بس واخدها هواية :D ..باقوله انت بتفكرنى بعبد السلام النابلسى فى فيلم يوم من عمرى ...بس نقول ايه ...رجااااااالة :)

لكم جميعا تحياتى ... :D

اوشا ...المسامح كريم ...احنا فى ايام مفترجة ....حسام ..اجمد ..ربنا موجود ..ماتخافش احنا فى ايام عتق من النار ...بس ابقى خلى بالك المرة الجاية وماتكتبش من حساب رشا احسن باين عليها زعلانة خالص وانت عارف زعلها وحش زى ماكلنا عارفين .....ربنا معاك ............ :D

[bodda]

كده ممتاز و ربنا معاكى

بس انا عادة فى عزومات السمك ماحبش اكتر من صنفين مع الشوربة

والا هاتدوقى يادوب لقمه من كل حاجه وتلاقيكى شبعتى وتدبسى فى البواقى

:angry:

وخللى بالك الكابوريا الدكور الايام دى فيها لحم اكتر من النتايات

وابقى ادهنى الجمبرى بسلطة زيت وليمون قبل الشوى

وانشاء الله تطلع عزومه يتحدث بها الركبان .... والماشيين كمان

صباح الفل

:angry:

[se_ Elsyed]

وطبعا ممكن بدل الحشو باللحم يكون بالمكسرات

وبدل ما نسقى بالشوربه و الملح والفلفل  ..نسقيها بالشربات

يعنى تبقى جلاش حلو

وبالف هنا وشفا

رمضان كريم

:angry:

<{POST_SNAPBACK}>

سؤال من واحد جلاشاوي غشيم

يعني الجلاش الحلو .. نقوم ساقيينه شاربات ( على رأي الإسكنادرانية ) وبعدين نقوم مدخلين الصينية الفرن تاني ؟

[se_ Elsyed]

رسالة مستعجلة إلى الشيف العزيز بودا

- بهذا أفيدكم بإنني قد قررت الإقدام على خطوة مصيرية في حياتي ... فلقد سافرت زوجتي لأداء العُمرة مع إخوتها ولم اتمكن أنا من أداءها بسبب ظروف العمل ... وبالتالي هما راجعين النهاردة بالليل .. لذا فقد فكرت وقررت إني أعمل لهم مفاجأة وأعزمهم بكره كلهم على الفطار وأطبخ لهم بإيدي لإنهم هايرجعوا هلكانين ..

وسوف يكون إفطار الغد مُكون من :

- بطة بلدي مُفترية وارد مصر الحبيبة ( بس حاف من غير حشو أنا مش فاضي ) بس هاحاول أسويها في حلة الضغط عشان تستوي قوام قوام ..

- صينية جلاش حسب الطرية البودية .... ( هاتبقى زعلي بيني وبينك يا بودا لو الإستخراع ده طلع مش ولابد )

- صينية بطاطس بالفرن ( دي بقى أنا مُحترف فيها وبأنطلق بأقصى قوتي وبأستخدم عصارة خبرتي في صناعتها )

- ملوخية ( أمريكانا من المجمدة وأقلب ... أصل ما عندناش مخرطة :angry: )

- أما الحلو فدي المفاجأة بقى ( هأشترية جاهز :angry: )

وأمانة عليكو .. لو ما ظهرتش خلال 48 ساعة تدوروا عليه وما تقولوش سين سين وراح .. لإن هايبقى هناك إحتمال من تلاتة :

1- يا إما الجماعة أكلوا الأكل وأكلوني وراه من حلاوته .

2- يا إما برضوا أكلوا الأكل ونزلوا فيه ضرب من النوع اللي بيفضي إلى موت .

3- يا إما الأهلي بقى يتغلب بكره ( بعد الشر ) من النجم الساحلي التونسي وبالتالي هاختفي يومين تلاتة من أثر صدمة الأكل والماتش ..

دعواتكم .

هل لك أي تعليق يا شيفنا العزيز ؟

يعني حلة الشوربة بتاعت البطة دي .. هل ممكن أستفيد منها في حاجة ولا أدلقها ولا إيه العُبارة ؟

[bodda]

العزيز سى السيد

اشجعك بشدة وعنف على هذه الخطوة الجبارة منك

وبكره تشوف ان المطبخ ده لعبة بسيطة وهواية لذيذه

وهمه ( يجعل كلامنا خفيف عليهم) عاملينها حكاية كبيره

:angry:

وطبعا شوربة البطة تستعمل منها كوبايتين لكل كيس ملوخيه جاهزه

تغلى الشوربه وتصفيها وتضبط ملحها وتحط الملوخيه مع التقليب البسيط

واول ما تغلى تبعدها عن النار وتحط معلقتين سمن ومعلقتين زيت فى طاسه

وتحط عليهم معلقتين توم مفروم او مدقوق مع معلقة كسبره ناشفه

وتحط الطاسه عالنار مع التقليب لغاية التوم ما يصفر بسيط اوى

وتروح دالق الطاسه فوق الملوخيه وماتنساش تشهق شهقة خالتك زينات صدقى

:angry:

وتحطها عالنار تانى لغاية ما تغلى غلوه واحده وخلاص

شفت سهله ازاى ؟؟؟

وابقى طمنى عليك او ابعتلى رققم تليفون المستشفى والحجره

:angry: :angry: :angry:

مساء الفل

:angry:

[Folana]

السلام عليكم ورحمة الله .....

الشوربة يالينا.................

حد يدلق الشوربة برضه ياسى السيد ..الشوربة ......اولا...فين الرز ..انا ماسمعتش سيرة الرز فى الموضوع ....

انت تعمل رز محمر وتسيقه بشوربة البط بعد ماتصفيها علشان البصل يعنى ....يعنى تاخد شوية رز وتحمرها فى السمن وبعدين تضيف باقى الرز وتقلب وبعدين تضيف الشوربة وتسوى الرز عادى بس خلى بالك من الملح لان الشوربة حتكون مملحة طبيعى ....

وبعدين اعمل لهم شوية شوربة يعنى ..حمر شوية لسان العصفور ..وابشر عليه جزارية بعد مالسان العصفور يصفر وقلب تقلبتين وبعدين ادلق عليه الشوربة وسيبه على النار لحد مايستوى ....ادى الشوربة ياسيدى اتدمرت اهى ويمكن تستلف شوية شوربة كمان من الجيران

بالنسبة لطشة الملوخية انا الحقيقة بطلت اشهق ..لان مرة عملت كده روحى كانت حتطلع وشرقت ....انا باقرا الحقيقة سورة لايلاف قريش ..والاكل بيطلع هايل ..ابقى جرب الطريقة دى ...

,وربنا يرجعهم بالسلامة ويتقبل منهم ومن جميع المسلمين يارب وعقبالنا............

[Folana]

س,س.............اوعى تنسى البطة فى حلة الضغط احسن الليلة تبوظ ......اللهم بلغت اللهم فاشهد................

[Osha]

حرام عليكم جميعا ..........

شوربة بطة يا ناس ..... :angry: :angry: :angry:

أنا مرة أكلت بشاميل مسقي بشوربة بطة وكانت معركة دامية ..تقيلة اوي يا جماعة

عااااامة

أنا ليا اقتراح في الملوخية خاصةالمحفوظ منها حيث انه سهل جدا انك تشم في الجاهز ريحة المادة الحافظة

الاقتراح او الاختراع دا

تقدح السمن في الحلة وبعدين تحط التوم وبعد تقلبتين نضيف الكسبرة الناشفة

وبعدين نطشهم بالشوربة ونحط الملوخية في الآخر

الطريقة دي ماتخليش الواحد يحس بالمادة الحافظة أبدا

بس بلاش شوربة بطة عشان خاطر الناس اللي جايين من العمرة

فولانة

انا كلمتلك الجماعة وأقنعتهم انك مش حتاكلي الشغل تاني - قالوا معلش يبقى تاخد وزارة الكهرباء أحسن.. :angry:

بودا

زمااااان لما كنت في مصر المحروسة من ييجي سنة كده أكلت عند كويك اللي عند كلية البنات في الميرغني ساندويتش اسمه فراخ بالجبنة الموتزاريلا

تفتكر أجرؤ اني أسأل بتتعمل ازاي والا أستنى لما أبقى أنزل مصر في المشمش :angry:

حد شاف واحد اسمه حسن والا تفتكروا بيعمل المحك بقى ومشغول :angry:

[شاعرالرومانسية]

انا هنا يا ست اوشا .. ومتابع الكل والله ،،، من اول اختنا فولانة وعزومتها الجديدة ومرورا بوصفات عزيزنا بودا لللأكلات البحرية الجهنمية .. وانتهاءا بالاخ سى السيد ومحاولاتة الاولى لدخول عالم المطبخ وعمل الافطار الاخير ( على وزن العشاء الاخير :angry: ) بس ان شاء الله يا سيدى يطلع افطار حلو ومشجع على الاستمرار فى عالم المطبخ ... بس انت اظبط طشة الملوخية بطريقة العزيزة اوشا ... انا مجربها.. بالذات فى الملوخية المجمدة

ومدام فيها بط وارز وملوخية خضرا يبقى اوصيك بالبتنجان المخلل .. تيجى بعد اذان الظهر وتحمرللك كام واحدة وتشقة وترش جواه ليمون ولما يبرد تبقى محضر خلطة توم مفروم وكمون وملح وخل وبقدونس مفروم وممكن فلفل اخضر حامى وتحشى بيه البتنجان وتسيبة يتشرب لحد الفطار..و

بالهنا والشفا

وحمدالله على سلامة المدام،، ومتنساش تطمنا على النتيجة :angry:

اما بخصوص الغياب .. والله انا بقالى يومين عندى دور برد جامد شوية وعمال اعطس واكح واتنفض ..

ماتخافوش ماتخافوش مش انفلونزا الطيور ولا حاجة ... :angry:

(مع انى واكل فرخة من يومين ... وكان طعمها غريب حبتين :angry: )

بس الحمد لله وزيرنا الهمام بتاع الصحة اكد فى اكثر من بيان انه لاتوجد فى مصر اية حالات او صابات بانفلونزا الطيور..

بيــــــــــــــــــــــــان هام:

وردت معلومات عن ظهور بعض اعراض يشتبه انها اعراض انفلونزا الطيور وذلك فى احد افراد شعب المحروسة ..

ملحوظة : الشخص المذكور عضو بمنتدى محاورات مصرية.....!

[se_ Elsyed]

إيه حيلكوا حيلكوا .. رز إيه وبتنجان مخلل إيه ؟!!!!

أنا عملت اللي عليه خلاص ..

جيت إمبارح بعد صلاة العشاء .. ورحت مروق القناني .. ومظبط البطة .. وعملت صينية الجلاش باللحمة على الطريق البودية ... وصينية بطاطس على الطريقة السينسينية .. وخلص دوري كده .. لإن الجماعة رجعوا كلهم إمبارح وجايين يفطروا عندنا النهاردة ... ومراتي بقى تعمل الرز والبتنجان والشوربة .. أنا دوري إتنهى ..

بس اللي زعلان منه إن في عضو من أعضاء التجربة هرب مني النهاردة ... فنسيبي يادوب رجع إمبارح بالليل من العُمره .. راح مسافر النهاردة الصبح بدري على دُبي .. فالمتحولين نقصوا واحد ... بس مش مهم أنا هاجرب في الباقي .

[Folana]

السلام عليكم ورحمة الله......

كاك ..كاك يااخ حسن والله بجد...كاك كاك فعلا.....(يعنى الف لا باس عليك )...

ادى اخرة مصاحبة فراخ الجيران ..مش قلت لك بلاش !!

بس على فكرة صد ق الباشا وزير الصحة ...مصر خالية من انفلونزا الطيور كما هى خالية من جميع الاوبئة ..كما هى خالية من تلوث مياه الشرب ..واللى شفتها بعينى بعد ماربنا فتح علينا وركبنا فلتر والرجل عمل تحليل لشوية ميه نونو كده فى كوباية ..ولاقيتها نضيفة جدا .....يادوب لونها اتحول لتلات طبقات ..الطبقة الاولى عيارة عن رغاوى بنى ..تليها طبقة لونها ازرق - اى والله العظيم - تليها طبقة من الطحالب وحاجات غريبة كده بتسبح فى المية ..باختصار ميه المجارىى انضف منها ..وبالتالى باناشد جميع الاخوة بتركيب فلاتر فورا لاستخدامها فى الشرب والطبخ ....نرجع مرجعونا لخلو المحروسة من كل ما هو ضار ...اصل ياجماعة مصر دى محجبة ...عاملين لها تحويطة ان مافيش اى حاجة تلوثها حتى لو كان التلوث ده على مستوى العالم ..والله يرحم ايام المفاعل النووى بتاع الاتحاد السوفيتى ....

أوشا ...انت فاكرة انى حاخاف من انهم يديونى وزارة الكهربا ...وغلاوتك ده انا اكلها والعة ولا يهمنى ........

س.س......تحياتى لنسيبك ..ده ربنا كرمه اخر كرم ..عقبال المعزومين عندى النهاردة اما يفلسعوا برضه قبل العزومة........

الاخوة والاخوات ...ادعوا لى ...انا داخلة المطبخ حالا.......

صباحكم جميل :angry:

[se_ Elsyed]

إلحقني يا ريس بودا أبوس حللك التيفال ..

هو الواحد لما ييجي يسخن صينية الرقاق ممكن يزودها شوربة أو لبن لو لقاها ناشفة ؟

وأيهما أفضل ؟

[se_ Elsyed]

س.س......تحياتى لنسيبك ..ده ربنا كرمه اخر كرم ..عقبال المعزومين عندى النهاردة اما يفلسعوا برضه قبل العزومة........

طب والله ما هاتصدقي يا فلانه هانم

العزومة طلعت فشنك .. واحد سافر دبي .. والباقي قالوا إن إحنا راجعين من العُمره تعبانين ولو سمحت هات لنا الأكل على البيت .. فأعتذرت لهم لإني لسه ما جيبتش موتوسيكل توصيل الطلبات للمنازل ...

طبعاً الموضوع إتأزم .. والأكل ممكن يفضل إسبوع ندح فيه أنا والعيال ..

تفتق ذهني وروحت عازم زميلي المحارواتي اللطيف الباسمهندس " هاندي كرافت " وقولت أهو لما يحصل له حاجة بعد الأكل هاتبقى في بيتها .. والواحد إن ما كانش يأذي أصحابه يبقى هايإذي مين ؟

يقوم اللئيم يقولي إن النهاردة الشركة عامله لهم إفطار جماعي في أحد الفنادق وطبعاً مش هايضحي بالهُبر عشان سي سين سين .

برضوا ما يأستش ... وروحت مصطاد إتنين من زمايلي ومنهم واحد عنده سواق ( أهو ده اللي صعبان عليه ) فقولت له هاتوا معاك - وهاتبقى ليلة -

وعزمت أخويا الصغير برضوا - الأقربون أولى بالمعروف - بلقيته قافل الموبيل روحت باعت له رسالة عشان أول ما الشيطان يوزه ويفتح التليفون يلاقي الرسالة في وشه .

قطيعه ما حدش بيأكلها بالساهل

( وش عبد العال بتاع ريا وسِكينه )

[Osha]

مش عارفة ليه قلبي حاسس ان فيه حد من المنتدى سرب اخبار العزومة بتاعتك يا سين سين وبالتالي اتضربت بالشكل الغريب دا

فيه حد غريب بينا

أهم حاجة المدام والولاد بخير بعد شوربة البطة والذي منه

أنا حاعيد على بودا الطلب بتاعي لان خبرتي معاه بتقول انه بيقرا آخر صفحة غالبا وساعات يقول الزهايمر ومش عارف ايه

عاوزة طريقة ساندويتشات الفراخ بالجبنة الموتزاريلا والفلفل الرومي اللي كنت باكلها عند كويك في الميرغني

ولو مت قبل ما بودا يرد عليا ابقوت طلعوا على روحي من الفراخ دي

[bodda]

مش عارف ايه اللى حصل لعزومتك يا سى السيد ؟؟؟

غالبا السى ان ان سربت الخبر واعتبرت عزومتك ارهابية

:blush:

معلش ليهم لسه عمر ... والاعمار بيد الله .. لا تيأس

اما تسخين الجلاش فبيكون فى الفرن عادى 5-10 دقايق

وطبعا بدون اى اضافه والا هايعجن ويبقى مسخره

وبالهنا والشفا

اما العزيزه اوشا ... والله الزهايمر مع الصيام عامل عمايله

لكن طلبك جاهز

الفراخ بالجبن الموتزاريلا

نجيب الجبن الموتزاريلا المبشور ونخلطه بفلفل اخضر مقطع رفيع اوى

ونضيف ليهم التوابل والملح اللى نحبه ( فلفل اسود وبهار فراخ )

وهنا بقى فيه طريقتين

يا اما نحمر فيليه الفراخ بانيه عادى وبعدها نحط الخلطه عليه ويخش الفرن

او نفتح الفيليه بسكين حامى ونحشيه بالخلطةونقفل الفتحه بعود خله

وبعدها يتحمر بانيه عادى ولما يتحمر نشيل الخله بالراحه :blush:

وانا بفضل الطريقة التانيه اسهل واطعم

والف هنا وشفا

مساء الفل

:D