اطلب اى وصفه على بالك .. تلاقيها قدامك

[shahd]

انا عايزة وصفة المندي وبنت الصحن ماليش دعوة لا تقولولي بنت الطبق ولا بنت الحلة هيا بنت الصحن

[bodda]

العزيزه شهد

غالى والطلب رخيص

بنت الصحن

3 كوبايات دقيق و 3 بيضات وبيضه رابعه للوش وحتة خميره بيره قد البندقة

ونحط الخميره مع شوية ميه صغيره ودافية والسكر ونسيبها تخمر

كوباية سمن و كوباية ميه و معلقة صغيرة سكر وزيها ملح ومعلقة حبة البركة

:blush:

اخلطي جميع المقادير واعجنيها جيدا لغاية ما تبقى رقيقة وناعمه

تقسم العجينه لكور متوسطه ونسيبها تخمر ساعه.

ناخد كل قطعه ونفردها إلى إن تصبح رقيقه جدا (مثل الورقه)

ناخد القطعه الأولى ونفردها في صينيه مدهونه اما بالسمن او الزبده

ندهن وجهها بالسمن او الزبده ونحط الطبقه الثانية وهكذا لغاية ما نخلص العجين

و ندهن الوش بالبيض ونرش عليها شوية حبة البركه

نقطعها بسكين حامى لاى شكل نحبه

ونحدفها على فرن متوسط الحراره !! :blush:

واول ما تستوى ونخرجها من الفرن نحطها فى طبق كبير ونصب عليها العسل

وبالف هنا وشفا

مساء الفل

:D

تم تعديل 29 أكتوبر 2005 بواسطة bodda

[shahd]

تشكراااااااااااات :blush:

[se_ Elsyed]

يا أهالي المُنتدى الكرام

سين سين رفع راسكم جدام الكفر كولاته ...

ومن هنا أحب أوجه الشكر لأخي بودا شيف الشيفات وصاحب الكرامات .... صينية الجلاش طلعت صاروخيه يا شقيق ... وبجد والله حاجة 100 % .. تسلم إيدك ...

الناس أكلوا وإنبسطوا وربنا بارك في الأكل كمان وفضل منه كتير ...

الحمد لله الذي قدرنا على إطعام الطعام ...

وشكراً لك من ساهم في هذه العزومة ولو بجنية واحد :D

[bodda]

العزيز سى السيد الكريم

دى عمايل ايديك وشئ يفرحنا انضمام شيف جديد لمطبخنا العامر

تسلم ايدك .. وجهز نفسك بعد كده لطلبات المعازيم

:D

هايقولوا لبعض وهاتلاقى الكفر كوليتو بيقول على جلاش سى السيد

والف هنا وشفا

رمضــــــــــــــــــــــــــــان كريــــــــــــــــــــــم

:wub:

تم تعديل 30 أكتوبر 2005 بواسطة bodda

[Osha]

يا باشا أكثر الله من أمثالك للمساكين أمثالي

أصل يا بودا البعد طول والواحد بقى يفتكر الأكل اللي كان بياكله في مصر والساندويتشات واللذي منه ويتحسر على حاله

:huh: :sad: :huh:

المهم

حاليا بقى كرات اللحم - الميت بول

انا باشوفها جاهزة في السوبر ماركت على الميكرويف عدل - وشكلها جميل اوي

لكن طبعا مش حاجيبها نظرا لقصة اللحم المذبوح والذي منه

:wub:

وبالتالي عاوزة طريقة صريحةمريحة تغني عن النظر الى ما في السوبر ماركت قبحه الله

:D :ph34r: :wub:

كان معكم رشا من اتلانتا - جورجيا

ونراكم في الطلب القادم ان شاء الله

[bodda]

لاوشا المعذبه فى اتلانتا

كرات اللحم

نجيب كيلو لحم مفروم ويخلط مع مبشور بصله كبيره وتلات تومات

والبهارات و تلات بيضات و معلقتين كبار بقسماط ناعم... و نعجن اوى

ونقسم لحتت صغيره ونعملها كور وندحرجها فى الدقيق للتغليف

:wub:

بعد كده نخلط الزبده مع قليل من الثوم وندهن بها الكرات

وتوضع الكرات فى صينيه مدهونه بالزبده ونحدفها عالفرن الحار

بس نكون مغطيين الصينية بالالمونيوم فويل

وتقدم مع الرز الابيض والسلطه او الرز بالزعفران ومزينه بالبقدونس

:D

وممكن عمل كميه كبيره من كرات اللحم

وتوضع كل كميه فى كيس نايلون مدهون بالزبده وتوضع فى الفريزر

وقبل عملها تستخرج من الفريزر وبعد نص ساعه تتحمر او تشوى عادى

مساء الفل

:ph34r:

[Osha]

من رشا المعذبة الى بودا الرايق في مطبخه العامر بالقاهرة

:D

كرات اللحم اللي باشوفها بتبقى في صوص احمر

:D :D :D

روجر ذات

:D

محدثتكم رشا من اتلانتا جورجيا

[bodda]

يبقى هانعمل الكور لغاية مرحلة التكوير والدقيق

ونحمرها فى زيت غزير

ونحضر دمعة توم

5-6 فصوص توم صينى ندقهم مع نص معلقة شاى كمون وكسبرة ناشفة

وملح وفلفل ونحطهم مع معلقتين سمن بلدى فى حله وعالنار

مع التقليب المستمر حتى اصفرار التوم

نكون محضرين عصير 4 كوبايات طماطم طازة ( طبعا تنفع الصلصة :D )

ونطش بالصلصة على تخديعة التوم وتاخد غلوتين معاها ..تبقى جاهزه

نيجى حاطين كور اللحم فى الصلصة وتاخد كمان غلوتين

وبالف هنا

طبعا هيه تشبه اوى كفتة اللحم بالدمعة ولكن التانيه نستعمل الرز مع اللحم

مساء الفل

من الجيزه لاتلانتا وضواحيها

:D

[شاعرالرومانسية]

زملائى ..اخوانى .. احبائى ..

فى اخر يوم عمل .. وهو غدا الثلاثاء - قبل اجازة عيد الفطر المبارك - اعادة الله علينا بالخير ..اللهم امين.. وكل سنة وانتم طيبين جميعا :wub:

سيحدث حدث جلل....

زملائى فى الشغل اتلموا وعملوا مؤتمر على مستوى القاعدة ... وفكروا فى مقلب على العبدلله يتعملة قبل العيد عدل ( قال يعنى عشان اعرف اعيد كويس :lol: )

وبمناسبة اننا بنفكر حنفطر فين كلنا زى كل عام .. وبنحط البدائل

قاموا مالوا عليا وبحسن نية ... ( وانا ادرى واحد بنيتهم :D ) قالوا يا ريس الوقت ضيق ومش حينفع نحجز فى اى مكان دلوقتى للأفطار الجماعى للشركة واحنا نعرف انك استاذ طبيخ وايدك تتلف فى حرير ( تقولش نشلت منهم حاجة قبل كدة :D ) فاحنا اتفقنا نوكل اليك بالمهمة وتقوم انت بالليلة ونعمل الافطار هنا فى الشركة..

بينى وبينكم انا اتحمقت ورحت قايل اخوكم سداد ....

(ودة لعلمى ان صاحب الشرمة مسافر وحيقضى العيد برا ومش حيبقى متواجد وقلت الموضوع حيقتصر على الاخوة الزملاء ...اهم منا ومفيش مشكلة...)

مفيش مشكلة كدة ...صح

مفيش ...

صح

لا فيـــــــــــــــــــــــــــــــــــــــــــــــــــــــــه

الخــــونـــــــــــــــــــــــــــة .... :lol:

كانوا عارفين ان صاحب الشركة اجل سفرة لأول يوم العيد...

يعنى البية حيبقى على رأس المائدة ... :D

عموما انا اتكلت على الله وعملت منيو .. وحضرت معاه استقالة " غير مسببة "

وبعد اللافطار ان شاء الله ... نشوف نقدمها والا ...... mfb:

واتكلت على الله وبدأت فعلا ... بس باخد راحة وقلت اخد راى الاخوة الاشاوس هنا:

حعمل طواجن البامية ..(بطريقتى اللى انتوا عارفينها )

مكرونة بالباشميل ... ( بطريقة بودا الرهيبة )

ارزة بخارى

ستيك بالخل والتوم

صدور فراخ ملفوفة بالخضار ( طريقة جديدة وبجربها ...)

كوردن بلو

والسلطات :

بسلة بالمايونيز - سلطة زبادى بالخيار - سلطة فاصوليا خضرا

اشوفكم على خير بقى ...

ممكن ابقى الاخ حسن الباشمحاسب ....

سابقا :excl:

دعواااااااااااااااااااااااااااااااااتكم

تم تعديل 31 أكتوبر 2005 بواسطة شاعرالرومانسية

[Folana]

شاعر الرومانسية ...

اوعى تخش العشة ياديك ..خدها نصيحة من الكتكوت ............

ده افطار مفخخ وناويين يخلصوا منك بدليل ان البيه المدير لغى سفره انتهازا للفرصة حتى يطيح بك ...انا رائى انك تعمل اكل وحش تحسبا للسنين القادمة والا حتفضل كل سنة تقوم انت بمهام العزومة طمعا فى شريطة زيادة علشان تبقى حضرة الصولمحاسب ..ومش حيحصل :D

على اى حال مادام الامر كذلك وطبيت فى المحظور يبقى لانملك الا ان نقول عفارم عليك ياابو على ...مينو جميلة بس ايه حكاية الستيك بالخل دى ...ازاى بالخل يعنى ..ماينفعش ليمون بدل الخل ؟

وبعدين مافيش حاجة هنا اسمها طريقة جديدة انت لازم توصف لنا كل الاكلات اللى حتعملها وصف مفصل ودقيق...احنا بينا معاهدة طنط ام دايفيد والتى تنص على تبادل وصفات الاكلات زى تبادل الاسرى كده ..ماذا والا ................ :excl: :D :D

[bodda]

:D

مطب محترم بس انت قده وقدود

بس الخوف زى ما قالت العزيزه فلانه انهم يثبتوك فى مطبخ الشركة

:excl:

وادى اخرة الطنطنة وكتر الكلام

مش قلنا دى هوايه سرية وليست علنية ؟؟؟؟

استحمل بقى يا حلو كل حفلات الشركه

النهارده فطار رمضان

و بكره عيد ميلاد بنت المدير

وبعدها مرات العضو المنتدب هاتولد ونفسها فى المحشى

و وبعدها نائب رئيس مجلس الاداره بيجوز بنته

وووو :D :D :lol:

ربنا معاك يا صاحبى

صباح الفل

:lol:

[Osha]

اضم صوتي اولا لفولانة اوغلو في انك لازم حتما ولابد طبقا لبنود كل الاتفاقيات المبرمة بيننا ان تشرح تفصيليا ما قد يبدو غامضا

وألا تنكث بوعدك ايها المحاسب الهمام

:D :lol:

واضم صوتي لبودا ثانيا في تنبيهك الى مغبة مثل هذه الخطوات الانتحارية التي قد يكون من جرائها التورط في عزومات ثانية وثالثه ورابعة

:excl:

ولكن نصيحتي ليك ان تستسلم فإن مجال المطبخ هو فن وعلم ومزاج وليس هناك الكثير يبرع فيه

واعتقد انك قد ضللت طريقك الى المحاسبة زي ناس ماضلوا طريقهم وراحوا على الطريق الزراعي !!!

mfb: :wub: :D

خدها نصيحة يا ابني صنعة في ايدك والا قعدة على مكتب

وفقك الله يا حسن وليطمئنا الله عليك في كل خطواتك المباركة بإذن الله

:D :lol: :D

[Folana]

السلام عليكم ورحمة الله ...

زملاء الكفاح ..الاخوة والاخوات الاحباء فى الله .....كل سنة وانتم طيبين ..وعيد سعيد انشاء الله عليكم وعلى كل فرد فى اسرتكم ....

بودا ..شيفنا المبجل ..كل سنة وانت طيب وكل سنة وانت قائد الحملة المطبخية وكل سنة وانت موجود بينا تقودنا دائما لنحرز نصر من وراء نصر فى المطبخ ....

شاعرنا الجميل شيف الرومانسية ..حضرة الصولمحاسب ..حسن ابو على ..كل سنة وانت طيب انت واسرتك الكريمة وانشاء الله ربنا يعدى بكرة على خير انا كنت بادعى ان بكره يكون العيد علشان تخلع من الموقف ده لكن يظهر سوء الحظ ملازمك ..معلش ..كلنا لها

أوشا حبيبتى ...الاخ العزيز فنسر ..عيد سعيد عليكم انشاء الله حتى وانتم فى بلاد العم سام ..وانشالله يكون السيد الوالد وصل بسلامة الله يااوشا وتقضوا عيد سعيد من غير دفع دولارات والا حاجى انا وولادى ناخد العيدية وبالمناسبة دى عايزة اشكرك انك دلتينى على المنتدى الجميل ده وكان لك الفضل فى انى اصبحت واحدة منكم :excl:

ريهام الغالية ..كل سنة وانت طيبة ونتمنى نشوفك بعد العيد بقى وتعوضى اللى فات ...

ومش ممكن انسى ابدا اختى الحبيبة الحبوبة سلوى اللى اضفت الكثير بتواجدها معانا فى المطبخ خلال شهر رمضان واسعدنا جميعا مشاركتها الجميلة معانا ودفئها اللى شعرنا به كلنا ...سلوى ..كل سنة وانت طيبة

سى السيد ...وجودك معانا هنا اضفى روح جميلة جدا وكان بيفتح نفسنا على الاكل ..,وكان مفروض نسمى المطبخ بالمطبخ الكوميدى لما اضفته من خفة دم ملحوظة كانت بتسعدنا جميعا ..كل سنة وانت وجميع افراد اسرتك بخير ..

ونتمنى ان يستمر وجودكم معانا بعد رمضان .....

الاخوة الافاضل ...............

كل عام وانتم بالف خير وصحة

تم تعديل 1 نوفمبر 2005 بواسطة folana

[bodda]

ايه الجمال ده ........

بجد احساس العيد وصل بكلامكم الجميل

اوشا وفلانه وشاعرنا و سى السي

ياريت تكونوا اشتريتوا كحك كويس :excl:

لان طبعا ولا واحد فيكم عمل كحك فى البيت

:D

وكل سنه وانتم طيبين

وعيد سعيد على الكل يارب

:D

[Osha]

فولانة العزيزة

كل سنة وانت طيبة ويارب متجمعين كلنا في الخير ان شاء الله

صدقيني لو قلت لك اني حاسة ان المنتدى دا كأن طول عمرك فيه ومش بس من ساعة الموقف اياه

احساسك بانه بيتك عالي جدا وربنا يديم علينا نعمة اللمة

بودا

يا مأكلنا ومشبعنا ورافع رايتنا وسط الناس - كل سنة وانت طيب

وبعدين بلاش حركات الذل وتتكلم على الكحك لانك عارف مستوايا في الخبيز مش اوي دا غير اني مش حلاقي هنا ريحة كحك

وان كان ولابد يعني تريح ضميرك من ناحيتي يبقى تبعت لي صينيتن تلاتة كحك من اللي وصى عليهم الحكيم لقمان

شاعر الرومانسية

كل سنة وانت بتخترع لنا اجمل افتكاسات وعلى فكرة احنا ذوقنا في الأكل متقارب جدا

ريهام

حتروحي مني فين ? حاجيبك حاجيبك بس ربنا يقرب البعيد وترجعي الى قواعدك سالمة بعد غزوة التتار

سي السيد

اول ما باشوف مشاركتك باضحك على طول قبل ما اقراها - كل سنة وانت طيب ويارب منورنا دايما

سلوى

كل سنة وانت بينا بطيبتك ومتابعتك لينا كل واحد

ووصفاتك السكندرية التمام

فينسر

ربنا يخليني ليك ياحسام وافضل منورة حياتك على طوووووول

شفتوا الدعوة المفترية دي في الأيام المفترجة

كل سنة وانت طيب

المهم يا اخوان ان الوالد وصل بالسلامة الحمد لله

ولما كانت معدةالوالد الكريمة لاتستطيع هضم اللحوم باشكالها الصحيحة وتفضل المفروم منها

فعلى كل منكم باعتباركم جميعا خلايا نشطة في الحركة المطبخية الثورية العظمى - على كل واحد ان ياتي بصنف لحم او دجاج او سمك مفروم طبقا لما يمليه عليه ضميره الثوري

وكل سنة والجميع بخير

[bodda]

كل سنه وانتى طيبه اوشا

كل سنه وحسام بخير

كل سنه والاولاد بخير ومخلصين منك حق حسام

كل سنه وانتى طيبة يا فلانه هانم

كل سنه وانتى جيرانك بيضحكوا عليكى وياكلوا عندك كتير

كل سنه واولادك بخير

كل سنه وانتم جميعا طيبين

مش ملاحظين ان ابو على من ساعة العزومة مختفى ؟؟؟

صباح الفل

:wub:

[bodda]

ده مخصوص للعزيز والد العزيزه اوشا

:blush:

صينية كفته بالطحينة

ببساطه هانجيب كيلو لحم مفروم وبصلايه محترمه مبشوره ناعم

وبطاطساية محترمه برضه مسلوقه ومهروسه

ومفروم شبت وبقدونس على ملح وفلفل ومبشور جوزة الطيب

نلخبط ده كله على بعضه ونعجنه كويس

ولو اللحم احمر اوى نضيف للخلطة معلقة كبيره سمن

ونحط العجينة دى فى صينية فرن واسعه بحيث سمك الخلطة يكون حوالى صباعين

ونحدفها عالفرن ونقوم نجهز الطحينه

عادى...طحينه وميه لغاية الكثافة المطلوبه وبعدين نخفها بالخل

ونحط لها دقة التوم والملح والفلفل ...بس نزود التوم شويتين

كده سلطة الطحينة جاهزه :wub:

اول ما تستوى صينية اللحم ( حوالى نص ساعه فرن حار)

نخرجها على سطح البوتاجاز ونقطعها بعدد افراد القبيله اللى هاتاكل

ونروح صابين عليها سلطانية الطحينه بالكامل

ونسيبها عشر دقايق تتشربها.. وندخلها الفرن تانى تاخد لسعة تحمير للوش

وبالف هنا وشفا

:wub:

تم تعديل 2 نوفمبر 2005 بواسطة bodda

[Salwa]

صباح الخير ...

شكرا جزيلا ياجماعة انكم افتكرتونى .

كل سنة وانتم طيبين جميعا وان شاء الله كل سنة برضه نحتفل سوا برمضان والعيد واحنا مع بعض فى بيتنا الكبير ..

كل سنة وكلكم طيبين ....كل باسمه ..

وشكرا جزيلا يافولانة انتى واوشا على كلماتكم الطيبة .

حمدلله على سلامة والدك يااوشا ..

بصراحة ياجماعة احنا كمان شعرنا انكم من اهل البيت من اول يوم لكم معانا ..وهذا ليس رياء ..

هنا فى المحاورات اغلبنا يعتبر المكان هو ...............مصر.

مصر اللى فى بالنا ....مصر زى ماكانت وزى ما احنا عاوزينها ترجع زى زمان ..وعلشان كدة بنحاول ساعات اننا نظهر العيوب الموجودة مش علشان احنا غاويين (( تقطيع فى الخلق )) لالالا........لكن علشان لو عرف الداء سهل الدواء ...

وبرضه علشان كدة انا بعتقد اننا عاملين زى المغناطيس اللى يستقطب (( الناس الجامدة ))

جامدة فى حبها لمصر ....جامدة فى دفاعها عن مصر ....

وعلشان كدة كلنا هنا متفقين مع بعض ...ببساطة ....لأننا زى بعض ...كلنا مصريين ..

بجد بجد مش اى كلام الكلام ده .

كل سنة وانتم طيبين ...

[شاعرالرومانسية]

فولانة : اوعى تخش العشة ياديك ..خدها نصيحة من الكتكوت ............

بودا : بس الخوف زى ما قالت العزيزه فلانه انهم يثبتوك فى مطبخ الشركة.....

اوشا : واضم صوتي لبودا ثانيا في تنبيهك الى مغبة مثل هذه الخطوات الانتحارية التي قد يكون من جرائها التورط في عزومات ثانية وثالثه ورابعة...

بسم الله ماشاء الله،،،

تقولوش كلكوا كدة مكشوف عنكوا الحجاب...

أهو حوصل يا فندم .. وثبتت خلاص وشكلنا كدة ادبسنا فى كل اللى جاى ... ربنا يستر :wub:

الحمد لله هى عدت على خير ... ولقيت صاحب الشركة (اللى هو واخد جائزة الجمهورية فى النحافة ...) مخلص اربع خرط مكرونة وقطعتين ستيك وقطعة فراخ ..دة غير شوية رز وشوية بامية وسلاطة حاف كدة على الماشى ..

المشكلة بقى بعد الافطار التفت ليا وهو نصف نائم وقالى فكرنى يا حسن الغى اوردر الحفلة بتاعة افتتاح المصنع الجديد واوصيلك على كام واحد كدة يكونوا معاك وتقوم انت بعزومة الافتتاح...

( اللى حتكون ل 250 فرد :blush: :wub: :) )

طبعا يا شباب الدعوة مفتوحة لاى حد يحب يساعد اخوة الغلبان ويساهم بالمجهود البدنى او الذهنى او المعنوى او ... الخ ( اى حاجة المهم يشارك وخلاص ... :D )

والدعوة عامــــــــــــــــــــــــــــــــــــــــــــــــــة :angry:

( وطبعا سوف يتم وصف جميع الوصفات بالتفصيل ... وكمان طريقة الاكل :D

بس بعد العيد .. ان شاء الله

تم تعديل 2 نوفمبر 2005 بواسطة شاعرالرومانسية