اطلب اى وصفه على بالك .. تلاقيها قدامك

[شاعرالرومانسية]

" اللهم تقبل منا صيامنا .. وتقبل منا قيامنا .. وتقبل منا ذكاتنا .. وبلغنا رمضان القادم على خير وفى رضاك ..

اللهم امين

اللهم امين

اللهم امين "

عيد مبارك وسعيد عليكم جميعا اخواتى واخوانى الكرام ...

بودا .. شيفنا الكبير :

كل عام وانت كبير القعدة وصاحب اكبر ريكورد فى الوصفات اللذيذة الشهية :blush:

أوشا .. الغائبة الحاضرة :

( لظروف عرفنها وعازرنها طبعا :wub: )

كل عام وانتى وأسباب انشغالك الصغيرين بخير .. والعام القادم ان شاء الله مايبقوش مزعجين ليكى خالص خالص ويساهموا معانا هنا فى مطبخنا الكبير والف حمدالله على سلامة الوالد :wub:

فنسر .. أبو العيال :

كل عام وانت سعيد بزوجتك الرائعة اوشا وبكتاكيتك الجمال وانت فى اسعد حال واتم صحة ان شاء الله :)

فولانة .. اختى الكبيرة :

( بس مش كبيرة قوى يعنى ;) )

كل عام وانتى وزوجك الكريم وابناءك الاعزاء فى اسعد حال .. وربنا يكتب الخير لابنتنا الجميلة فى الا IGCE اللى هى اختارتة وان شاء الله بالنجاح دائما :D

مدام سلوى..البركة :

كل عام وانتى منورانا دائما بحضورك ومشاركاتك المتميزة واحساسك الجميل بوطنك المحاوراتى ووطنك الاكبر مصر :angry:

سى السيد .. البيج بوس :

كل سنة وانت معانا منورنا ومشرفنا وواكل أكلنا ( قصدى واكل من أكلنا :D ) وجرب وصفاتنا .. وان شاء الله العام القادم تبقى اسطى شيف قد الدنيا ونتعلم احنا منك .. كل عام وجميع افراد اسرتك بخير :D

جميع الاخوة أعضاء المطبخ وأعضاء المنتدى :

كل عام وانتم جميعا .... أعضاء فى المنتدى

وربنا لايحرمنا من تواجدكم ... ولا يحرمكن من المنتدى :wub:

عيـــــــــــــــــــــــــــد سعيـــــــــــــــــــــــــــد

تم تعديل 2 نوفمبر 2005 بواسطة شاعرالرومانسية

[bodda]

شاعر يا عالم

:blush:

شوفوا كتب ازاى ؟؟؟

بجد شاعر والشعور عليك غالب

ودايما فى افضل صحة واحسن حال

وانا جاهز معاك بدنيا ونفسيا ومش عزومة مراكبية

:wub:

وطبعا الاخت الجميله سلوى منورانا الفين مره

وحسها الوطنى لا تعليق عليه سوى ربنا يحقق امالك وآمالنا يارب

وكل سنه وانتم طيبين يا اهل الامن الغذائى

مساء الفل

:wub:

[Fencer]

السلام عليكم

كل عام و اسرة محاورات المصريين بخير خاصة الجزء المطبخي و اللي اثبت ان اعضائه كونوا علاقة من افضل العلاقات و انفعها في المنتدى

مدام سلوى - بودا - اوشا - الشاعر الجميل - فلانة خفيفة الظل - سي السيد ابو دم خفيف - ريهام الغائبة- و كل من يشارك

كل سنة و انتم طيبين

[se_ Elsyed]

يا جماعة إيه الكلام الكبير ده ...

ده أنا قبل ما أعرفكم وأزور مطبخكم .. كنت فاكر نفسي طباخ لا يُشق له غبار ... ولكن لما دوقت أكلكم ... وطبخت بسمنكم ... إكتشفت الحقيقة المُره .... وهو إني كنت منجد ... ومنجد بلدي كمان .. يعني كنب ومخدات ولحيفة سرير ....

كل سنة وإنتم طيبين ... وفي المطبخ منورين ...

وأقعدوا بالعافية ....

[se_ Elsyed]

خدوا الحتة دي بقى ...

أنا أخدت أجازة العيد يوم الثلاثاء الماضي ... يعني قبل العيد بيومين ... وعديكم على الإحساس بتاع أرباب المعاشات .... كنت قاعد في البيت زي خيبتها ويا باقرأ جرانين .. يا بتفرج على برامج ربات البيوت في التي في .... المهم إتكعبلت في برنامج عن الطبخ على قناة الإيه بي سي ... وكانوا جايبينه بمناسبة أعياد الهيموجلوبين .. اللي بيستخدموا فيها القرع العسلي وكده ... ولقيت الأبلة نظيرة الأمريكانية جايبه طريقة عمل كيكة القرع العسلي ... ما كدبتش خبر وروحت نازل جري على السوبر ماركت جايب قرعتين ... وبعدها بيوم عزمت الولا نسيبي وعيلته على شوية قرع يستاهلوا بؤكوا ..

فالطريقة سهلة جداً .. وهو إننا نجيب القرع ونسلقة بعد ما نقشره ( تصدقوا بالله إن من كثر جوموديت القشرة بتاعت القرع إيدي فأفأت ... الظاهر إني بقيت توتو قوي من كتر الرفاهية ) وبعدين نضربه ضرباً مبرحاً في الخلاط حتى يستغيث ( بس ست البيت الشاطرة دايماً بتاخد بالها وما تنساش تحط سكينة الخلاط عشان الجيران ما يضحكوش عليها ) وإحنا بقى بنضربه نقوم حطين السكر عشان يدوب معاه وبعدين نجيب أنجر فاضي ونحط على الكيلو القرع حوالي نص كيلو دقيق ومعلقتين نقول تلاتة زبده على بيضتين ( هاتلاقي البيت في رف التلاجة أول ما الواحد بيفتحها على طول ) وأنا روحت ضايف من عندي ملعقة صغيرة بيكنج باودر عشان الكيكاية تنفش وهي بتستوي ... ونقلب الخليط بملعقة مسطحة في إتجاه واحد وبعدين ندهن الصينيه التيفال بملعقه زبده ونضعه في الفرن لمدة نص ساعة ....

ولما نطلع الكيكاية نقوم قلبينها في صينية تاني للتقديم ..

وبالهنا والشفا ....

وإوعى حد يقولي ( قرع إيه يا عم إنت جاي تقرع علينا ؟ )

[bodda]

تسلم ايدك يا سى السيد

صينية القرع مضبوطه بس طبعا اختراعك بتاع البيكنج باودر ؟؟ :blush:

ما علينا

علشان تقشر القرع بسهوله

تقطعها نصين بحيث كل نص هايبقى عامل زى قبة الجامع

تحط النص ده على قورمة التقطيع ( خشب او بلاستيك )

وتجيب اكبر و اتقل سكينة فى بيتكم وتقشر بالايدتين من فوق لتحت

دى اسهل طريقة

ومنور المطبخ ومحل التنجيد

هوه انت فاكر التنجيد بالساهل ؟؟؟؟

:lol:

كل سنه وانت طيب

مساء الفل

:wub:

[se_ Elsyed]

طب بمناسبة القرع بقى يابو البدابيدب

ما ترزعنا كام وصفة من اللي ممكن نستخدم فيهم القرع

[Osha]

صباح الفل

سيبك انت من القرع وخلافه انت صراحة خليت يومي زي العسل

انا ضحكت لما قلت يا كفا على اعياد الهيموجلوبين دي !!!

انا باحب القرع العسلي جدا انما بصراحة ماعنديش الجرأة اني اعمله - خايفة يطلع وحش ويبوظ الطعم اللي ماما سايباه عندي

بس الهالويين هنا مسخرة اصلا والناس بتعمل عمايل عشان يفزعوا بعض ويتفننوا في حفر اشكال مرعبة على ثمار القرع المسكينة

صباحكم فل جميعا

بودا

الحقني بوجبات خفيفة خالية الدسم عشان بابا احسن مستقبلي حيضيع

[Folana]

السلام عليكم ورحمة الله .....

عيد سعيد يااخوانا وارجو انكم تكونوا قضيتم اجازة سعيدة...

حضرة الصولمحاسب ..فين الوصفات ولا محدش حيعرف يكلمك دلوقتى ياسيدى بعد الشريطة اللى اخدتها واصبحت عين اعيان مطبخ الشركة ....وتلاقيك بقيت بكباشى كمان ولا احنا دارين ....(وش ستى أطاطا)...

اخونا الفاضل س0 س ...جميلة وصفتك ..وحاعملها بس بعد التقاط الانفاس من رمضان ..خصوصا ان جوزى افندى بيعشق القرع ..العسلى ...وعندك حق فى ان تقشير القرعة اسوأ مافيها ...اسالنى انا مطيرة من الضوافر عشرة:D

ومتهيالى فيه هنا عدة وصفات لعمل القرع العسلى منها الحلو ومنها الحادق باللحمة المفرومة ودى طريقتى ..لو مش لقيتها ممكن نكتبها تانى ..بس طبعا ده مش حيعفى بودا انه يكتب لنا كام وصفة كده على الماشى لانه وحشتنا وصفاته وكفاية عليه راحة كده ...يشمر بقى ويجى يشقى معانا شوية ...

على اى حال ..انا كنت فى رمضان عملت شوربة قرع وطلعت جميلة حاكتب لك وصفتها بس من غير مقادير ..بودا بقى يبقى يمنتجها ويقدرها وهو كله نظر

شوربة القرع العسلى

انت حتحضر زبدة-بصلة مخرطة- جزرة مبشورة - كام عود كرفس مخرط - نص تفاحة مقشرة ومتشال قلبها -قشر برتقالة - ملح وفلفل -فصين توم مطحونين - بشر زنجبيل (اختيارى) - وطبعا القرع يكون مسلوق ومهروس ..بس خد نص القرعة مش كلها ...

الطريقة

حنضيف البصل على الزبدة ونقلبه لحد مالونه يبقى شفاف بس ومش يصفر وبعدين نضيف الجزر والكرفس والتفاح ونقلب لمدة صغيرة نقول خمس او عشر دقايق يعنى لما المكونات تهمد كده شوية :D ...بعد كده نضيف بشر البرتقال والقرع (اللى هو مسلوق جاهز)..وناخد المكونات تقلبتين ...وبعد كده نضربهم فى الخلاط ابو سكينة ماتنساش ..وبعد كده نفضى الخليط فى الحلة ..ونزود بقى بشوية شوربة ..او مية لو مافيش شوربة لحد التخانة المطلوبة وهى عادة بتكون سميكة ..واظبط الطعم بالملح والفلفل ...وبالف هنا .......

عايزة اقول برضه ان اللى فاض من القرعة ومش استخدمته فى الشوربة ...ضربته فى الخلاط مع مانجو طبعا كان مسلوق برضه ...واضفت عليه السكر وكان طعمه جميل ومغذى وممكن برضه يضرب مع عصير برتقال ....

ونلتقى بعد صلاة العشا انشاالله ....... mfb:

تم تعديل 6 نوفمبر 2005 بواسطة folana

[bodda]

الله ينور فلانه هانم

شوربة لذيذة على قد الوصفه ... نجرب ونقول

وممكن عمل القرع بطريقتك المملحة برضه بالحشو باللحم المفروم

بس المهم اضافة الدقيق وصفار بيضتين للخلطة للتماسك

وفيه وصفه تانيه باستعمال البطاطا

وعلى فكره البطاطا بتدى نفس نتائج القرع العسلى واحلى كمان

بالاضافة طبعا لسهولة التقشير بعد السلق

مع المحافظة على الضوافر اللى كانت جميله

:sad:

و صباح الفل

:sad:

[الرافعي]

أستاذ بودا

يعني ولا مؤاخذة، سؤال متأخر حبتين، لكم ممكن تتكرم علي بطريقة عمل كحك العيد (اللي جاي) وكل سنة وانتم جميعاً طيبين :sad:

[bodda]

يا عم حلاوة يا رايق

انت مش عارف ان بعد العيد ما يتفتلش كحك ؟؟؟؟

يحيينا ربنا لرمضان الجاى واى اوامر :sad:

متهيألى تستعد بقى لخروف العيد اللى جاى

:sad:

مساء الفل

:D

[الرافعي]

يا عم حلاوة يا رايق

انت مش عارف ان بعد العيد ما يتفتلش كحك ؟؟؟؟

يحيينا ربنا لرمضان الجاى واى اوامر :sad:

متهيألى تستعد بقى لخروف العيد اللى جاى

:sad:

مساء الفل

:D

<{POST_SNAPBACK}>

لا مؤاخذة يا باشا، بس إحنا بنعمل الكحك في العيد الكبير كمان، يعني عدم المؤاخذة إسمي بس هو اسم جزار ، لكن أنا غلبان _يعني بنغمس ريحة الكباب برغيف :D

[bodda]

وماله يا عم حلاوة

الحمد لله اننا لاقيين لسه الرغيف

:sad:

صباح الفل

:sad:

[Folana]

السلام عليكم ورحمة الله ..........

يافتاح ياعليم يارزاق ياكريم ...استعنا على الشقى بالله ..............

كفتة اللحم بالجبنة الموزاريلا

حنجيب لحم مفروم حسب الكمية المطلوبة ونضيف عليه بصلة مفرومة وفص توم مدقوق وملح وفلفل وممكن نخرط ورق بقدونس رفيع جدا ونضيف ملعقة صلصة طماطم(اختيارى)..ونقلب الخليط كويس ..وبعدين نعمل حفرة فى النص ونولع فحمة ونطفيها فى نص الخليط ده وطبعا الطريقة معروفة ..يعنى ممكن نحط قشرة بصل وعليها نص ملعقة سمن ونغطس فيها الفحمة الوالعة ونغطى المكونات كويس علشان ريحة الفحم تفضل فى اللحمة ....(قال يعنى مشوية على الفحم)

بعد شوية نفتح عليها ونبدأ نشكل اللحم ده على هيئة اقراص سمكية - بس مش قوى طبعا -..ونعمل حفرة بصباعنا فى وسط القرص ده ونضيف قطعة جبنة موزاريلا ..ونقفل عليها تانى ..وهكذا حتى انتهاء الكمية ...

ونسويها بقى باى طريقة ..اما تتشوى على الشواية ..او نسويها فى شوية زيت نونو ونقلبها على كل جنب شوية ..او نعملها بانية ...وتقدم ساخنة وتجمل بالبقدونس ....

انا قريت الطريقة دى فى كتاب وجربتها كانت جميلة ....

صباح الفل.......... :blink:

[Folana]

الدجاج المفروم مع البطاطس

المقادير............(مافيش مقادير :blink: )...حنحضر فراخ مخلية ومفرومة ..ونضيف عليها فلفل رومى مخرط رفيع جدا او واخد له لفة فى الخلاط..وعليهم حزمة كرات برضه مقطعة رفيع ..ولو مافيش كرات ممكن ناخد الجزء الاخضر فى البصل الاخضر او كرفس فرنساوى ..اتصرفوا يعنى ...وكمان فصين توم (اختيارى)..وممكن بصلة صغننة مبشورة ...وملح وفلفل وشوية بابريكا حلوة او حراقة حسب الرغبة وممكن شوية زنجبيل برضه اختيارى ...

حنقلب المكونات مع بعض فى شوية زبدة او زيت ذرة لو عايزين سعرات اقل ..لحد الفراخ ماتستوى وتتبخر المية اللى فيها .....ونقلب كويس علشان نمنع حدوث تكتلات فى لحم الفراخ ..مع مراعاة ان النار تبقى عالية علشان الفراخ تشرب ميتها بسرعة ...

بعد كده حنكون محضرين بطاطس مقطعه شرائح مدورة ..- طبعا فاهمين قصدى - وحنرص طبقة بطاطس فى قاع صينية وبعدين نضيف خليط الفراخ ده وبعدين نغطى بطبقة بطاطس تانية ..وندخلها الفرن شوية لما البطاطس تبدأتستوى نخرجها من الفرن ونرش عليها جبنة بارميزان مبشورة او شيدر او موزاريلا ..انشالله حتى مش مش مشكلة :D

وندخلها الفرن تانى لما وشها يحمر ..وبالف هنا ............

تم تعديل 8 نوفمبر 2005 بواسطة folana

[bodda]

حلوه الفراخ بالمش دى يا فلانه

:blink: :lol: :D

بس واضح انها حلوه .... بس بالجبن الاخرى طبعا

تسلم ايدك

وكده اوشا مالهاش حجة فى وصفتين خفاف لذاذ واخر طعامة

مساء الفل

:lol:

[Salwa]

مساء الفل ..

شوفى يافولانة ياعزيزتى .بكرة ان شاء الله حجرب الكفتة اللى بجبنة الموزاريللا ..بس تصدقى بقى وتآمنى بالله ؟؟

انتى فكرتينى بأكل امى .....وعلشان كدة حعمل الكفتة دى بكرة ...ان عشنا .

بس امى كانت بتعمل حكاية الفحم اللى فى قشرة البصل بعد ما تعمل الكفتة ( من غير جبنة ) ..يعنى ترص الكفتة وتترك فراغ فى المنتصف ثم فى الآخر خالص تعمل حكاية الفحم دى وتوزع السمن او الزبدة على الكفتة ..

بالمناسبة ..

فكرتينى بحاجات كانت بتعملها امى ...

كانت لما تحشى القرع ( الكوسة ) ...او البدنجان الاسود او الابيض ..كانت تضع الحلة مائلة ..

يمكن امى الوحيدة اللى شفتها بتعمل كدة ........

كانت ترص الكوسة فوق بعض وكانت تضع شرائح البصل والطماطم رأسية ولما تعدل الحلة تلاقى الكوسة واقفة مش متلخبطة ...وطبعا الشرائح موجودة تحت ...يعنى تلاقى منظرها شيك ..

برضه كانت لو قطعت ليمونة نصفين واستعملت نصف فقط .كانت تضع النصف الآخر مقلوب على الوجه فى طبق صغير ..تقوللى كدة الليمون ما ينشفش ..وممكن تفضل فى الثلاجة يومين وعند استعمالها تلاقيها كأنك لسة قاطعاها ..نفس الشئ مع الطماطم ...ومع البرتقال ..يعنى الوجه المعرض للهواء مقلوب ..

فكرتينى بكل ده ......

مساء سعيد ...

[bodda]

العزيزه سلوى

طبعا طريقة الوالده بوضع الفحم الوالع فى سمن بقشرة بصل بعد سوى الكفته افضل

لان الكفته بعد السوى وسيحان الدهون اللى فيها

هاتمتص الريحه اسرع وتحتفظ بيها اطول

;)

اما موضوع محشى الكوسه والباذنجان فيفضل رصها من البدايه واقفين على حيلهم

لان الرص النايم بيخرج جزء من الحشو

بالاضافه لان زى مانتى قلتى بيكون الشكل احلى بكتير

تسلم ايدك ومعلوماتك واضافاتك

مساء الفل

:blush:

[شاعرالرومانسية]

يمكن امى الوحيدة اللى شفتها بتعمل كدة ........

كانت ترص الكوسة فوق بعض وكانت تضع شرائح البصل والطماطم رأسية  ولما تعدل الحلة تلاقى الكوسة واقفة مش متلخبطة ...وطبعا الشرائح موجودة تحت ...يعنى تلاقى منظرها شيك ..

<{POST_SNAPBACK}>

بصراحة .. مفهمتهاش دى ;)

تسلم ايدك فولانة هانم على الكفتة والفراخ .. بصراحة طرق جديدة وشكلها حتبقى لذيذة ..وتستحق التجربة :blush:

اما بخصوص الوصفات فتحت امرك افنذم انا حشوف اية اللى مانزلتهوش هنا واقولة

انا فاكر انى قلت الكوردن بلو .. شوربة المشروم .. الارز البخارى ..طاجن البامية .. الستيك بالخل والثوم ..

والمكرونة بالبشامل كالعادة بس حطيت طبقة من عصير الطماطم المتبلة بالملح والفلفل والبهارات ..وحطيت على وش البشاميل كريمة لبانى وجبنة جودة او شيدر مبشورة

يبقى مفيش غير لفائف الفراخ بالخضار وسلطة الفاصوليا الخضرا وسلطة البسلة بالمايونيز...