اطلب اى وصفه على بالك .. تلاقيها قدامك

[شاعرالرومانسية]

لفائف الفراخ بالخضروات

نجيب صدور فراخ مخلية ونقطعها زى البفتيك شرائح عريضة .. او نجيبها متقطعة كدة جاهزة من عند الفراخجى ونخلص :blush: -

ونتبلها بالملح والفلفل ومطحون الحبهان ونسبها على جنب

نتجيب طاسة تيفال ونحط فيها زيت زيتون زنبقى محضرين الخضار ( فلفل الوان " اخضر واصفر واحمر " / بصل 0 جزر ) شرائح رفيعة جدا طولية ونقلبهم فى الزيت ونتبلهم بالملح والفلفل واى نكهة نحبها من نكهات التوابل ( جوزة الطيب .. الحبهان .. القرنفل .. القرفة .. او خليط من التوابل المحببة لديكم ) ودة لحد ما الخضار يدبل

نجيب الشرائح ونفرد فيها جزء من الخضار دة طوليا ونلفها اسطوانيا ونشقفلها بخلة اسنان وهكذا لحد ما نخلص الكمية ..

فى نفس الطاسة التيفال نزود شوية زيت زيتون كمان ونحمر الفراخ الملفوفة دى لحد ماتحمر من جميع الجهات ونزود مياة حبة نونو ( على راى اختنا فولانة :blink: ) لحد ماتستوى

طبعا باقى الحشو ان بزود سواة واحطة فى السرفيس فى وسط الفراخ بيبقى شكلة حلو جدا ولذيذ جنب الارز المتبل

طبعا مش محتاجين انى اقولكم ان نفس الطريقة بتتعمل بشرائح اللحم ..خصوصا البتلو

وياسلام بقى لو معاها سلطة زبادى .. وبالهنا والشفا ;)

[Salwa]

صباح الخير ..

اخونا الفاضل بودا شكرا جزيلا لحضرتك .فهمت قصدى بدون توضيح بالصور .

ياشاعر الرومانسية السعيد...

سوف احاول الشرح بطريقة مبسطة ...

نقدر نقول ان الحلة وضعت افقية وليس رأسية ..او اقولك !!...قدر ان الحلة وضعت مثل عجلة السيارة ....بس مش وهى فى شنطة السيارة!!

يعنى كأنك ممكن ( تمرجح الحلة ) ...يعنى ليست فى الوضع الثابت ..

طيب اشرح ازاى بقى ؟؟ اقولك ؟؟ اتصل تليفونيا بأخونا بودا وهو يشرحلك ..

على فكرة الطريقة دى سهلة وسريعة وجميلة وكل شئ ..وبعد ما تكمل رص الحلة كلها ............(( وتعدل الحلة )) تضع الصلصة اللى بتحتاجها لسوا المحشى ..

على فكرة طريقة الفراخ جميلة جدا وان شاء الله برضه نجربها ...

وكنت افكر فى عمل نوع من المقبلات لذيذ وسهل بجانبها بدلا من اى نوع آخر ...

نحضر زيتون مملح مخلى من النواة ..

علبة انشوجة صغيرة ...

واحد فلفل احمر وواحد فلفل اصفر وواحد فلفل اخضر مشوى وننظفهم من القشر ونقطعهم شرائح طولية رفيعة .

نبدأ نفتح كل زيتونة بالطول من ناحية واحدة .....نضع فى كل زيتونة شريحة فلفل اصفر واخرى احمر واخرى اخضر ثم نضع واحدة انشوجة ونقفل بعود خلة ونرص فى الاطباق ..وهكذا حتى تنتهى ( علبة الانشوجة ) يعنى نقول حوالى عشرين واحدة ..

بتبقى جميلة جدا وشيك جدا ....ولا تأخذ اى وقت .

بالهنا والشفا ..

صباح الخير ..

[Folana]

السلام عليكم ورحمة الله ....

حضرة البكباشى ابو على ..حمدلله على سلامة الوصول الى ارضية مطبخنا العامر....برضه مش رديت على فى موضوع الخل ده ..ازاى يعنى خل ..يعنى اتبل اللحمة بخل ولا ايه ؟؟ولا انت واخد توكيل توزيع زجاجات الخل فى المنطقة :ninja: وده اعلان غير مدفوع الاجر...ارجو الرد سريعا لانى مجهزة الاستيك ومستنية الجواب ..

سلوى الحبيبة ..مرحبا بعودتك مرة اخرى ...انا يشرفنى طبعا انى اكون والدتك بس تقدرى تعتبرنى كده لانى باعمل كل اللى وصفتيه ..وبالنسبة للفحمة ممكن بعد ماتسوى الكفتة وممكن وهى اللحمة نية ..ريحتها مش بتروح يابودا انا مجربة :D

شاعرنا الجميل ....بص ياسيدى انت تمسك الحلة وتميلها على سنها ....يعنى توقفها على طرف من القاع كده ...وتبدأترص صوابع المحشى وهى واقفة ...صف ورا التانى ..اللى يتملى معاك بسهولة الاول وبعد كده ترجع الحلة لوضعها الاصلى وتكمل الناقص ..الفايدة ايه بقى ؟,,الفايدة انك حتتمكن من رص كل صوابع المحشى بطريقة رأسية ...فخمتو حاجة؟؟؟

وبمناسبة وجود والد اختنا أوشا حداها ..وتشريفه لها ولامريكا كلها طبعا ...ولان فيه طلب جامد على اللحم المفروم فانا حاكتب لكم وصفة تانية جربتها برضه وطلعت جميلة ...يالا بقى هاتوا ورقة وقلم ومرايااااا..وخلى بالكوا معاياااااااا...سمع ..هس...

الكوسة باللحمة المفرومة بالزبادى

المقادير...حنحتاج كوسة ..زى ماتحبوا ..يعنى كيلو اتنين والله مايخالف....لحمة مفرومة كمية مناسبة للكوسة ..بصل ..فصين او تلاتة توم ...اربع او خمس او ست كوبايات زبادى ..نعناع ناشف ...ملح وفلفل ..بقدونس مخرط رفيع ...صنوبر محمر للتجميل (اختيارى)بس باوصى به

الطريقة ....

حنكحت الكوسة على خفيف ونقطعها بالطول ..يعنى لو الكوسة صغيرة يبقى على نصين لو كبيرة تبقى على تلات شرائح طويلية ..

نحط شرائح الكوسة دى على النار وعليها ذرة ملح وذرة فلفل اسود او ابيض مطحون وشوية نعناع ناشف.. ونفضل نقلبها علشان نشوحها ..طبعا مش حنقلب الكوسة نفسها بملعقة او حاجةة احسن تتهرى مننا ..احنا حنقلب الحلة زى مابنسوى الكابوريا كده (واضح)...وفيه ناس تحب تاخدها وش فى الزيت يعنى نص تحميرة كده ...بس كده تبقى تقيلة ...الغرض النهائى اننا نتخلص من ميتها علشان لما نسويها ماتنزلش ميه كتير ...

- نعصج اللحمة بالطريقة المعروفة

- نرص الكوسة فى صينية فرن ويفضل تكون بيركس علشان حتتقدم بالصينية ...ونفرش عليها اللحمة المعصجة ..وممكن على فكرة نعصج اللحمة مع عصير طماطم علشان تبقى طرية ..او نرش كوب عصير طماطم على الصينية بعد اللحمة ...وندخل الصينية الفرن ..لما الخليط ده يشرب من بعضه والكوسة تستوى .

نخرج الصينية من الفرن ولما تهدأشوية نكون محضرين سلطة الزبادى بس من غير خيار طبعا وعليها النعناع الناشف ..حنغطى السطح كله بالزبادى وبعدين نرش الصنوبر فوق الوش ثم البقدونس نغطى به السطح .او البقدونس الاول وعليه الصنوبر زى ماتحبوا....وبالف هنا ...

تم تعديل 10 نوفمبر 2005 بواسطة folana

[bodda]

معقول كل ده ومش واصله الطريقة ؟؟

مش الحله قدامك عدله وفتحتها للسقف ؟؟؟

اقلبها تسعين درجه تبقى واقفه على سيفها ووشها ليك

ترص المحشى نايم على جدار الحله لغاية ما تملاها

وترجعها عدله تانى

تلاقى ايه ؟؟؟

تلاقى صوابع المحشى بقت واقفه راسيا ولا عساكر الدورية

وتكمل بقى بالصلصة والشوربه عادى

المكرونه بالتونه

نص كيلو مكرونه و نسلقها ونصفيها على راى الشاعر

( يفضل عدة اشكال سباجيتى مكسر على صغيرة على لسان عصفور)

علبتين تونه أو حوالى ربع كيلو ندلقهم فى حاجه غويطه

ونحط عليهم زيت وخل أو ليمون ( بس مجرد نقطتين) وملح وفلفل

نقلب فيهم حوالى ربع كيلو زيتون اسود مقطع صغير جدا

بدون البذر

وندلق ده كله على المكرونه السخنه ونقلب كويس اوى

ونغرف فى أطباق ونديها معاها عيش توست محمص

وجنبها كوباية تمر هندى متلجه

وبالف هنا وشفا

[شاعرالرومانسية]

اية يا جماعة بالراحة بالراحة ...

دة كان مجرد سؤال استفسارى ليس الا :D

حد قال انى مفهمتهاش من اول مرة ... اية حد قالكوا عليا انى فهمى تقيل والا حاجة :D

خلاص فهمنا الحلة مايلة نرص وبعد ين نعدل ...سهلة خالص

بس ...

نعدلها ازاى يعنى :wub:

خلاص .. خلاص

عموما ..

تشكرات اختنا الغالية مدام سلوى ...

وجربى الفراخ دى حتعجبك جدا -_-

بودا العزيز ...

زمان ..اول ما عرفت طريقة المكرونة بالتونة دى كنت حاسس انها حتطلع ...........

يعععععععععععع

بس جربتها طلعت تجنن ..

وكمان اكيد حتطلع احلى بكتير بطريقتك :ninja:

فلانة هانم .. بصى يا ستى وماسيدك الا ... الله

انتى تجيبى الستيك وتتبلية بالخل والتوم والفلفل الاسود

وتسبيه فترة على الاثل ساعتين

وتجيبى طاسة تيفال وتحطى فيها سمن وتوم (وممكن جزء من التوم اللى فى اللحم بعد ماتعصرية من الخل )..

وتشوحية شوية وبعدين ترصى اللحم على التوم وتحطى وتقلبى الستيك على الوشين لحد ماياخد لون وبعدين تزودى شوية مية على باقى الخل اللى فاضل من التتبيلة ومعاهم باقى التوم وتحطيهم على وش اللحمة .. يدوبك يغطيها وكل شوية تقلبيها على الوش التانى لحد ما تستوى .. وممكن تبقى تزودى مية حسب الحاجة

وتطلعيه على فرشة من البقدونس ..

ودة برضة يحب جنبة سلطة زبادى او بسلة بالمايونيز

على فكرة .. احيانا بستخدم زيت زيتون بدل السمن واحط روز مارى ناشف مع تتبيلة اللحم .. بتدى طعم مختلف ولذيذ ...

جربى وقوليلى النتيجة ...... وبالف هنا :ninja:

تم تعديل 10 نوفمبر 2005 بواسطة شاعرالرومانسية

[bodda]

طبعا سهله وواضحه وكلها حنيه

تسلم ايدك يا بو على بس بتستعمل الروز مارى مباشرة ولا ....

صباح الفل

:wub:

[شاعرالرومانسية]

طبعا سهله وواضحه وكلها حنيه

تسلم ايدك يا  بو على بس بتستعمل الروز مارى مباشرة ولا ....

صباح الفل

:wub:

<{POST_SNAPBACK}>

والله ياريس الروز مارى الناشف وزى ماانت عارف طبعا بيبقى عيدان رفيعة وقصيرة كدة فانا بكسرة او بفركة كدة يدوب واحطه على اللحم وهو مع السوا بيطرى وبيدى الطعم المطلوب

:)

[Osha]

السلام عليكم معشر المطبخ

طبعا كلكم عارفين اني مزنوقةمع السيد الوالد في مشترواته - وأكيد بينوبني من الحب جانب :D

بس عامة انا تقريبا متابعة في صمت كل ما يحدث انما مقدرتش اسكت لما قريت كل هذاالشرح عشان حكاية الحلة والكوسةلأخينا العزيز شاعر الرومانسية :D

وكان نفسي ادخل ارخم عليه لكن هو سبق وقال انه فهمها :D

ملحوقة - ندور على حاجة تانية :)

شكرا ليكي يا فولانة على الاكل بتاع بابا :wub:

انا مضطرة اخرج جري قبل ما بابا ييجي - لانه لو شافني قاعدة على الجهاز بيتضايق :D

اشوفكم لما اعرف اجي خلسة :)

سلام معشر المطبخ الأوفياء :D

[bodda]

متهيالى الخروج مع بابا فيه سبع فوايد

منهم سته لاوشا العزيزه وواحده لبابا

:D :D :D

صباح الفل

:wub:

[shahd]

يا اهل المطبخ الكرام ويا ايها الشيف الهمام

عايزة وصفت المجدره حد يلحقني بيها قبل ما ابوظ الدنيا واخترع اكله تانية :D

[Folana]

السلام عليكم ورحمة الله ...

والله المطبخ نور بوجودك ياشهد ..انا كنت معدية بس كده ولقيت اسمك منور قلت لا بقى لازم الواحد يعمل معاك الانسانية (على راى ريا)..وحاقول اللى عندى فى موضوع المجدرة دى الى ان يأتينا شيفنا ااعظيم بالخبر اليقين.....

بقى المجدرة دى احنا بنسميها فى مصر هنا كشرى ..ياترى انت تقصدى الكشرى؟ ولا قصدك المجدرة الحقيقية؟...على اى حال طريقة الكشرى موجودة هنا ولو مش لقيتها نعيدها تانى ...اما بالنسبة للـ......

المجدرة ...

حتحضرى عدس بجبة اللى هو لونه بنى ....وتغسليه وبعد كده تسلقيه فى ماء لحد مايبدأ يغلى ...

تروحى ضايفة عليه شوية برغل خشن ..يعنى كمية مساوية للعدس تقريبا ...وتسيبهم يغلوا وتضفى عليهم ملح وفلفل

تكونى بقى مجهزة بصلتين كبار شرائح وتحمريهم فى الزيت لغاية مايصفروا او يعنى يبقوا بنى فاتح جدا ..دهبى مثلا كده..

تاخدى نص الكمية تضيفها للعدس والبرغل وتقليبى ...طبعا لاحظى ان مافيش ميه دلوقت فى العدس والبرغل...بعد كده تغمقى لون باقى البصل شوية نونو ..وتصفيه على ورق المطبخ علشان تتخلصى من الزيت الزائد...وبعد الغرف بقى تزينى الطبق بالبصل المحمر ده ....

ممكن كمان تعمليها بالعدس الاصفر والارز وتتبلى بتوابل الكبسة وشوية قرفة نونو برضه ....

بس سيبك انت مافيش اجدع من الكشرى المصرى والدقة اللى عليه ...اعملى كشرى واكتبى عليه مجدرة ماحدش حياخد باله ......

[بودا العزيز اللذيذ[...انا حاسة انى خرفت خالص ياريت تدخل بقى وتنقذ مايمكن انقاذه احسن كده سمعة المطبخ فى خطر ....

مساء الفل ............. :D

ملحوظة هامة...طريقة عمل الكشرى المصرى ياشهد موجودة فى صفحة 15...من ايدين شاعرنا الجميل الشيف رومانسية ..انا دورت لك عليها علشان لو مستعجلة تلاقى طلبك ....

تم تعديل 12 نوفمبر 2005 بواسطة folana

[shahd]

السلام عليكم ورحمة الله ...

والله المطبخ نور بوجودك ياشهد ..انا كنت معدية بس كده ولقيت اسمك منور قلت لا بقى لازم الواحد يعمل معاك الانسانية (على راى ريا)..وحاقول اللى عندى فى موضوع المجدرة دى الى ان يأتينا شيفنا ااعظيم بالخبر اليقين.....

بقى المجدرة دى احنا بنسميها فى مصر هنا كشرى ..ياترى انت تقصدى الكشرى؟ ولا قصدك المجدرة الحقيقية؟...على اى حال طريقة الكشرى موجودة هنا ولو مش لقيتها نعيدها تانى ...اما بالنسبة للـ......

المجدرة ...

حتحضرى  عدس بجبة اللى هو لونه بنى ....وتغسليه وبعد كده تسلقيه فى ماء لحد مايبدأ يغلى ...

تروحى ضايفة عليه شوية برغل خشن ..يعنى كمية مساوية للعدس تقريبا ...وتسيبهم يغلوا وتضفى عليهم ملح وفلفل

تكونى بقى مجهزة بصلتين كبار شرائح وتحمريهم فى الزيت لغاية مايصفروا او يعنى يبقوا بنى فاتح جدا ..دهبى مثلا كده..

تاخدى نص الكمية تضيفها للعدس والبرغل وتقليبى ...طبعا لاحظى ان مافيش ميه دلوقت فى العدس والبرغل...بعد كده تغمقى لون باقى البصل شوية نونو ..وتصفيه على ورق المطبخ علشان تتخلصى من الزيت الزائد...وبعد الغرف بقى تزينى الطبق بالبصل المحمر ده ....

ممكن كمان تعمليها بالعدس الاصفر والارز وتتبلى بتوابل الكبسة وشوية قرفة نونو برضه ....

بس سيبك انت مافيش اجدع من الكشرى المصرى والدقة اللى عليه ...اعملى كشرى واكتبى عليه مجدرة ماحدش حياخد باله ......

[بودا العزيز اللذيذ[...انا حاسة انى خرفت خالص ياريت تدخل بقى وتنقذ مايمكن انقاذه احسن كده سمعة المطبخ فى خطر ....

مساء الفل ............. :D

ملحوظة هامة...طريقة عمل الكشرى المصرى ياشهد موجودة فى صفحة 15...من ايدين شاعرنا الجميل الشيف رومانسية ..انا دورت لك عليها علشان لو مستعجلة تلاقى طلبك ....

<{POST_SNAPBACK}>

ميرسي ياقمر كلك زوووووق ولو على وصفةالكشري فما تقلقيش اصل انا مجنونة كشري وعارفة الوصفة بس انا عايزة المجدرةالأصليه وتسلمي على وصفتك ياسكره

اعمل كشري واكتب عليها مجدره اممممم حيبقى نهاري فللللل :D هو ممكن اضحك بيها على ناس ما يعرفوهاش بس اهلها صعب :D

[bodda]

العزيزه شهد

المجدرة زى ما وصفتها العزيزه فلانه بالضبط

ولكن يمكن عملها بالارز او البرغل

كما يمكن فى حالة استعمال الارز ان يكون العدس اسمر او مجروش اصفر

لكن اساس المجدرة هو العدس الاسمر والبرغل والبصل

وكان زمان ينقعوا العدس ليلتين قبلها علشان يبدأ جذره يبان

زى الفول النابت

علشان كده سموها مجدرة :D

وممكن تؤكل مباشرة بالطريقة دى

وممكن يتعمل لها دمعه بالتوم ( صلصة طماطم على توم متشوح فى معلقة سمن )

وبالهنا والشفا

مساء الفل

:D

[bodda]

ماهو يا اما بطلتوا اكل ......... وده مش ممكن

:D

يا إما مالكوش نفس ...... وده ممكن

:)

لكن على الاقل لقمة بجبنة وزيتونتين وطماطماية ترانشات

وصباح الفل على كل الغايبين

:wub:

[wagdi]

الأخوة الاعزاء...

سافرت على مصر لقضاء رمضان...وعند العودة أعطتني زوجتي إستمارة تلاتاشر و قالتلى روح وأنا حابقى أحصلك.... وأنا دلوقتي قاعد في السقيع لوحدي وأجعص حاجة أعرف اعملها هي صينية بيض بالأومليت...

حاولت افر في الأكلات إلي بتقولوها هنا لقيتها مكلكعة أوي... وأنا بقالي أسبوع أهو عمال أكل في تونة وسمك من بتاع الميكروويف لما قرب يطلعلي زناعف... وذنبي في ربتقوا...وهنيالك يا صاحب الخير...

فلو يعني أي حد منكم عنده وصفة كدة سهلة...يقولهالي...وياريت لو أمكن بلاش المصطلحات الفيزيائية من عينة "أعمل تخديعة" وحاجات مندي...يعني لو أمكن كلموني كدة على رأي سلطان في العيال كبرت بالشعبي...بالهجايص...

ودمتم ودام مطبخكم العامر...

[bodda]

العزيز وجدى

ولا يهمك يا سيدى احنا معاك ومن غير كلكعه ولا تخديعه

ابسط انواع الطبخ هو عمل صينيه ونرميها فى الفرن نص ساعه مثلا

هانعمل صينية بطاطس

بس طبعا صغيره على قدك علشان ماتزهقش

هاتجيب كيلو لحم بتلو او صغير السن وده هانسلقه ونستعمله كذا يوم

يعنى ممكن الكيلو ده يكفيك 4 ايام

طبعا فيه طرق لسلق اللحم افضل بس هاقولك على اسهل واحده

هاتجيب حله وسط يعنى فتحتها حوالى 30 سم

وتحط فيها ميه لغاية نصها وتحطها على النار علشان تغلى

وفى اثناء انتظارك لغليان الميه قشر بصلايه واقطعها نصين من البوز للديل

وقطع اللحم للقطع المتوسطه اللى تحبها

ولما الميه تغلى حط البصلايه واللحم و نص معلقة صغيرة فلفل اسود

وبعد 45 دقيقه طلع حتة لحم واختبر سويها سواء باسنانك

او بمحاولة قطعها فى طبق بمعلقة اكل عادية

واذا كانت لسه ماوصلتش للسوا هانسيبها نص ساعه كمان وهكذا

بس فى الاخر هانحط معلقتين صغيرين ملح ونسيبها تغلى 5 دقايق بعد الملح

ونطفى بعد كده على الحله يبقى عندنا لحم مسلوق و شوربه طبعا

ممكن بقى نطلع نص كمية اللحم فى طبق علشان هانستعملها فى الصينية

نجيب صينية فرن عمقها حوالى 10 سم

ونجيب كيلو بطاطس نقشرها ونغسلها ونقطعها اى شكل مكعبات او ترانشات

ونجيب بصلاية نقشرها ونقطعها برضه اى شكل

ونجيب طماطمايتين نغسلهم ونقطعهم برضه اى شكل

ونلخبطهم على بعض مع اللحم اللى فى الطبق مع نص معلقة صغيره ملح

ونص معلقة صغيرة فلفل اسود ونص معلقة صغيره بهارات لحم

وبعد ما نقلب الحاجات دى كلها مع بعض ندلقها فى الصينية

ونحط على وشها معلقة سمن كبيرة متوزعه هنا وهناك

ونصب عليهم كوبايتين شوربه من اللى فى الحله

كده الصينية جاهزه ...

تولع الفرن وتسيبه يسخن 5 دقايق وبعدها تدخل الصينية

وبعد نص ساعه تفتح الفرن وبالمعلقة تشوف سوى البطاطس

ولما تلاقيها استوت تطلع الصينية وبالهن والشفا

طبعا انا كتبت وصف التفصيلى الممل فياريت اكون عرفت اوضح لك

وطبعا ممكن الاستغناء عن الصينية

وتعمل ده كله فى حله تانيه عالنار فوق البوتاجاز

ولو فيه اى استفسار تحت امرك

صباح الفل

:angry:

[wagdi]

العزيز جداً بودا...

ربنا يكرمك يارب... حلوة موضوع صينية البطاطس دي...حاجربها بكرة إن شاء الله...

بس أنا كان عندي إستفسار لو فيها رزالة مني...

أنا انهاردة أتعنترت فيها وقلت حاعمل صينية سمك في الفرن... حاطيط البطاطس شرايح وطماطم وليمون شرايح برضه و جبت السمكة المسكينة ودهنتها زيت وشبت وبقدونس وجوزة طيب وحدفتها على رأيك في الفرن...

إن البطاطس تستوي يا مؤمن أبداً..

عملت زي ما قلتوا قبل كدة... غطيتها بفويل وحطيتها في الرف التحتاني... وبعدين شلت الفويل وطلعتها فوق...

كان فاضل أخش الفرن معاها...

إن البطاطس تستوي...

المهم طلعتها في الأخر وأكلت السمكة (إلي طبعاً كانت ناقصة ملح لأني محطتش) والبطاطس عاملة زي الخيار....

فهل ياترى فيه سبب علمي للموضوع ده...؟؟؟

وياريت ماتسانيش برضه في كام وصفة تانية دة بالهجايص...

ربنا يسترك يا شيخ....روح إلاهي ما يقفلك مطبخ قادر ياكريم....

[bodda]

العزيز وجدى

طبعا صينية السمك كان ناقصها نص كوباية ميه ومعلقتين زيت

والا ايه اللى هايسوى البطاطس ؟؟؟؟

وطبعا توم وملح وكمون

لان جوزة الطيب يفضل استعمالها مع اللحوم والطيور

وتحت امرك لاى شئ تعوزه

وواجبنا ننصر الرجاله على المدعو المطبخ

:angry:

صباح الفل

:P

تم تعديل 16 نوفمبر 2005 بواسطة bodda

[Folana]

السلام عليكم ورحمة الله ...

ابــ..ســـ..طــــهـا يا بــــــــــــــــــاسط....

العزيز بودا ...نورت المطبخ وعملت له حس ..والله انا ماباحب ادخل المطبخ وانت مش موجود ...امال مين حيدفع لى ويأبجنى بالمعلوم ....

حمد الله على السلامة وعقبال مايتلم شملنا تانى ..أوشا الحبيبة وزوجها العزيز فنسر ...شاعر الرومانسية عايزين نطمئن عليك وعلى احوالك ....وجميع حبابينا اللى اختفوا فى ظروف غامضة ......

[bodda]

العزيزه فلانه

واضح انك من ضمن المختفيين برضه

ولا ايه ؟؟؟

والعزيز وجدى .... لا حس ولا خبر ؟؟؟

ياترى الوصفه نفعت ولا فرقعت ؟؟؟

صباح الفل

:)