اطلب اى وصفه على بالك .. تلاقيها قدامك

[shawshank]

انا عندي نفس مشكلة أخونا وجدي

بلاش الكلام الصعب ده ... كنت عايز اطلب منكم فتح ركن للمبتدئين ، المبتدئين = قبل الحضانة :)

يعني مثلا يعني ايه تخديعة؟ تسبيكة؟ مش عارف ايه.

المهم ، أنا برضه هيطلعلي زعانف من السمك الفيليه ... بس انا بعمله في الفرن مش الميكرويف :D

نفسي اعمل أرز. بس نفسي في طريقة بسيطة جدا جدا و من غير تعقيدات الله يخليكوا :)

و لو ينفع أرز ببسلة ... عشان عندي كيس بسلة و مش عارف اعمل بيه ايه.

متشكرين جدا يا اخوانا.

تم تعديل 17 نوفمبر 2005 بواسطة shawshank

[Folana]

العزيزه فلانه

واضح انك من ضمن المختفيين برضه

ولا ايه ؟؟؟

والعزيز وجدى .... لا حس ولا خبر ؟؟؟

ياترى الوصفه نفعت ولا فرقعت ؟؟؟

صباح الفل

:)

<{POST_SNAPBACK}>

السلام عليكم ورحمة الله....

والله ياريس كنت واخدة مرضى ..وبعدين اخدت يومين عارضة ...اصل كان فيه عاركة كبيرة بين سى توفيق العياقة والواد صبى قهوة موسى عيسى ....

وانت عارف ياريس الحكومة بقى ..سين وسين ...قصدى سين وجيم ..لما تعبنا خالص خالص ...بس عدت على خير الحمد لله ..ابقى اشتغل اوفر تايم اعوض ....

الاخ العزيز شواشنك..اكتب اى اكلة نفسك فيها واحنا نقولك على طريقتها السهلة ...والارز مافيش اسهل منه ...

حيث انك واضح من كلامك انك عايش لوحدك فمش حتحتاج غير كوباية رز واحدة ..وتحط ملعقتين سمن فى الحلة وتقلب عليهم الرز بعد غسله وتصفيته من الماء ..تقلب شوية كده وبعدين تغطيه بالميه يعنى تضيف ميه عليه تغطيه بس مش قوى ...ولما تغلى المية توطى البوتاجاز ولما الميه تروح بس الرز يبقى لسه طرى وطى عين البوتاجاز على فوق كانك حتطفيه يعنى بس يبقى فيه شعلة ضعيفة ..نسيت اقولك تضيف الملح يعنى نص ملعقة صغيرة تقريبا وتظبط الطعم ...ولما الرز يستوى تطفى عليه ..

وممكن قبل ماتضيف الرز ...تضيف شوية بسلة من الكيس زى الكمية اللى تحبها ..وتقلبها فى السمن شوية وتضيف شوية فلفل اسود .وملح بس طبعا ماتكترش ..وبعدين تضيف الرز وتكمل زى ماقلت فى الاول...دى اسهلة طريقة لعمل الرز ...

الوصفة دى مؤقتا لحد بودا مايرد عليك بالمقادير ......(انا حاسة انى كتبت الكلام ده قبل كده!!)

[bodda]

العزيزه فلانه

الف سلامه والعود أحمد ... واحيانا هشام

:D

العزيز شاوشنكو

طبعا العزيزه فلانه قدمت وصفة الرز بس برضه انا حاسس انها مش للمبتدئين

:)

الرز السهل خالص

استعمل الرز المصرى لسهولته

هاتجيب كوباية رز ( نفس الكوبايه اللى هاتعاير بيها الميه بعد كده )

وتجيب حله تحط فيها معلقة سمن ومعلقة زيت ذره

ولما الزيت والسمن يسخن تحط عليهم كوباية ميه ومعلقة صغيرة ملح

تغسل الرز على ما تغلى الميه

تصفى الرز من الميه تماما وتضيفه للميه اللى بتغلى

وتغطى الحله :)

ولما يغلوا سوا ... توطى النار خالص ( على اصغر عين )

وتسيبه حوالى نص ساعه بعد كده وتختبر سواه بحبيتين فى بقك

كده خلاص بالهنا والشفا

لو عايز تضيف البسله المجمده

يبقى هاتحط نص كوباية بسله على السمن والزيت

وتقلبهم حوالى 5 دقايق قبل اضافة الميه ... وتكمل عادى

مساء الفل

:D

[شاعرالرومانسية]

ازيكوا ياشباب ...

معلش على الغيبة .. بس كان فية ظروف كدة ... مش عارف لية ناس تانية غايبة .. ( والله ما متفقين ولا حاجة :) )

المهم .. اهلا بالاخوة المنتضمين ( وجدى... اللى مابنشوفهوش الا لما يكون مزنوق :blink: وشاوشنكو ) حديثا لجوقة المطبخ :D

طبعا الاخوة قاموا بالواجب وزيادة ..

اضافة بس للارز بالبسلة للعزيز " شاوشنكو ".. ممكن تسلق البسلة نصف سليق وتسيح سمنة ومبشور جزراية وتقلبها وبعدين تحط المية وتتبلها بكل التوابل اللى تحبها ( ملح فلفل حبهان قرفة جوزة الطيب قرنفل مطحون .... ) وبعدين تحط الارز والبسلة وممكن معلقة صلصة تدى لون حلو وتخلى المية فوق كمية الارز يقراط ( صباع يعنى ياريس :) ) وتسيبها تغلى وبعدين توطى النارعلى الاخر لحد السوى

وبعدين يا جماعة على فكرة ... ممكن تفننوا برضة فى الاكلات التقليدية .. وتبتكر فيها وتحس انك بتطبخ ( لحد بس ما رجللك تاخد على المطبخ )

يعنى ممكن التونة مثلا...

تجيب علبة التونة وتصفيها وتقطع عليها ( طماطم و فلفل اخضر وبصل وجزر ) كا دة صغير جدا جدا وتهرسها بالشوكة مع ليمون وزيت زيتون .. وممكن تحط معلقة مايونيز كمان وتقلب وتعمل احلى سندوتش من سلطة التونة

ومكن كل الاضافات السابقة تضيفها للمكرونة المسلوقة ومعاها المايونيز والمسطردة والكاتشب .. وتبقى احلى سلطة مكرونة ..( وممكن تضيف قطع لانشون مكعبات كمان )

وحفكرلكوا فى حاجات تانية واجيلكم :D

عزيزى بودا ...

اللفت طلع يا زعيم .. وانت عارف اخوك بيموت فى حاجة اسمها مخلل ( خصوصا اللفت البيتى )

عاوز احلى طريقة لتخليل اللفت ابو ماية حمرا دة اللى تجنن ;)

[bodda]

العزيز الغالى شاعرنا الجميل

منور والف حمدالله بالسلامة

اللفت المخلل ابو ميه حمرا

اهم حاجه تنقى اللفت الصغير يعنى الكيلو 5-7 حبات

لان الكبير احيانا يكون شايخ بس الايام دى متهيالى كله بيكون حلو

لانه اول الموسم كل سنه وانتم طيبين

نقول 3كيلو لفت مثلا يحتاجوا حباية كبيرة بنجر احمر

وكل ما تزود البنجر يزيد الحمار ( بفتح الحاء )

:) :D :D

وتاخد اول 10 سم من الاعناق تحتفظ بيها

وتخرط اللفت بالطريقة اللى تعجبك وتقطع البنجر برضه معاه

وتحضر محلول ملحى 10 % ;)

وهى عبارة عن نص كيلو ملح على 5 لتر ميه

وطبعا ممكن حسب كمية المية انما نفس النسبة

يعنى ممكن 100 جرام على لتر ميه ... وهكذا

تحط اللفت المخرط والبنجر فى البرطمان الكبير بتاع المخلل

وتحط فوقه الاعناق اللى شيلناها فى الاول ( علشان يفضل اللفت مغمور )

وتصب عليه المحلول الملحى وتغطى البرطمان كويس

وبعد 3 ايام يفضل تصفية الميه ووضع محلول 10% جديد

لان الاولانى هايكون ملحه خف اوى :)

وممكن يتاكل بعد اسبوع من البدايه

مساء الفل

:blink:

[wagdi]

المهم .. اهلا بالاخوة المنتضمين ( وجدى... اللى مابنشوفهوش الا لما يكون مزنوق :D  وشاوشنكو ) حديثا لجوقة المطبخ  :)

<{POST_SNAPBACK}>

خلاص يا شاعرنا... أخوكم أتزنق وأتحشر خلاص وحبقى زبون مستديم بس المهم صدوركم تتسع لينا...

:)

العزيز بودا...صينية البطاطس حصلت... هي طلعت طعمها غريب حبتين بس المهم إن الكينونة الرئيسية بتدل إنها صينية بطاطس...(أنا مالاقتش سمنة حاطيط زبدة...يمكن ده السبب؟؟)

بالنسبة للرز انا باعمله زي ما بتقولوا بس دايماً بيطلع معجن وملزق في بعضه... (هو الرز إلى عندي هنا حبايته طويلة غير غلى باشوفه في مصر) يكونش ده السبب؟؟؟

أما عن موضوع اللفت وظبط الملح أنا شفت مرة والدتي بتظبطه بإنها بتحط بيضة في المية وتقعد تزود ملح لحد البيضة ما تقب وبكده بيقى تركيز الملح إتظبط...فهل يا ترى الطريقة دي لها أساس ولا أساطير الأولين..؟؟ أه وماكنتش بتحط بنجر...فهل ينفع برضه ولا إيه..

ودمتم زخراً للجوعى والمحرومين...

[bodda]

العزيز وجدى

الزبده مكان السمن لا تغير الطعم

لكن يمكن حطيت توابل تانيه او الكميه زادت حبتين

اسهل حاجه الصوانى فجرب تانى وتالت وتضبط معاك انشاء الله

لكن لو استعملت الرز المصرى وبالطريقه اللى قلت لك عليها مش هايعجن

وسبب التعجين ممكن كذا حاجه :D

اولهم زيادة كمية الميه عن المطلوب

جرب تحط كوباية ميه بس لكل كوباية رز

وان حلة طبخ الرز لازم تكون من الشكل القديم البومبيه .. عارفه ؟؟

لان دى احسن حله توزع الحرارة فى تسوية الرز

نيجى بقى لموضوع اللفت وضبط الملح

طبعا طريقة الوالده مضبوطه 100% :D

لكن تحتاج خبره وان البيضه تكون طازه اوى لوجود فراغ هوائى بها

ولما اقولها اخد تريقه عسل <_<

اللى يقولى طب تنفع تكون البيضه حمرا ولا لازم بيضه ؟؟

واللى يقولك ماينفعش الكتكوت ؟؟؟ :)

:wub:

بس هيه طريقه مظبوطه طبعا بس اللى وصفتهالك هنا بتكون اسهل وادق للمبتدئين

اما عدم استعمال البنجر فطبعا برضه ممكن وهايدى مية لفت لونها بمبه فاتح اوى

واستعمال شريحين بنجر ده لمجرد الحصول على اللون

وصباح الفل

:wub:

[Folana]

السلام عليكم ورحمة الله ....

ايوه كده ياجماعة ..ده المطبخ من غير ناس ماينداس ..فتحتوا نفسنا على الشغل ..

طريقة الارز جميلة ياابو على بس هو عايز طريقة سهلة ..يعنى عايز ينفخ فى كيس الرز يطلع منه طبق مستوى وعلى الاكل <_<...لكن برضه اهو ياخد فكرة يمكن يحب يجرب ...

الاخ وجدى ...فريق العمل هنا وعلى رأسنا الشيف الاعظم بودا بيسرنا ويبهجنا ويسعدنا اننا نلبى جميع الطلبات وخصوصا من الالضيوف الاعزاء اللى بيمروا مرور الكرام علينا تبعا للحاجة ..تقدر تقول عايزين نربى زبون يعنى ...

العزيز بودا ....انا لى تعليق صغنن صغنن نونو نونو خالص يعنى ممكن ماتاخدش بالك منه اصلا ..بالنسبة لطريقة اللفت المخلل ...متهيالى لو صفيت الميه وضفت ميه من اول وجديد يبقى انت كده بتضحى بطعم ميه اللفت الجميل ..لانه بيستوى بعد تلات ايام وبتكون ميته جاهز للشرب :D...ولا ايه رأيك ..انت طبعا ادرى منى ..انا خللته مرتين فى حياتى بس ...

بس عايزة اقول على اضافة برضه نونو جدا ....انا باضيف ملعقتين عسل اسود على المية بالملح وبعدين ادلقه على اللفت ...ليه العسل الاسود بقى ..لانه بيحافظ على اللفت حتى القضمة الاخيرة يعنى مش بيتهرى ....بيكون مستوى لكن قوامه زى الجزر المخلل كده ...جربوها وعلى فكرة طعم العسل مش بيبان خالص بعد كده ...وطبعا اللون اللى بيضيفه للميه (البنى)بيروح برضه بعد السوا لان البنجر لونه بيطغى وبيكون له لون احمر جميل ...اما اقوم اخلل شوية بقى ...

صباحكم جميل:D

[bodda]

العزيزه فلانه هانم

موضوع تغيير الميه بعد التخليل اساسى خاصة فى الزيتون

لانه بيشيل المراره فى الاول :D

وممكن تعمليه حتى تانى يوم كفايه لسرعة سوى اللفت

والفكره منه ان تركيز المحلول بيخف خلال يوم بالكتير

علشان كده بنغيره للحفاظ على التركيز

اما موضوع العسل الاسود .... فدى جديدة ونجربها على ضمانتك

<_<

وتسلم ايدك

مساء الفل

:D

[Osha]

انا جيت يا حلوين

وحشتوني جدا والله

بابا العزيز مسافر بكره وانا قلت ادخل من وراه اشوف اخباركم ايه

طبعا كل شئ عال العال

انا بس بامسي التماسي لغاية لما اجي بكره بعد مشوار المطار واجي بقى اسلم على الكل نفر نفر

[bodda]

يوصل بالف سلامه يا اوشا

وبكده يبقى اتفك حبسك الانفرادى ولازم تعوضى اللى عليكى

:ninja:

عليكى عدد من الاكلات تعويضا للغياب

والحكم للاصدقاء

صباح الفل

:wub:

[wagdi]

صباح شريف اهل المطبخ الكرام...

هيييي...؟؟؟ حاتأكالونا إيه النهاردة..., :wub:

عايزين وصفة من الحاجات العزابي الله يكرمكوا...

الواحد إبتدا يسخن على الطبيخ وإن شاء الله كلها اسبوع والا اتنين وناخد شهادة الملوخية الابتدائية...

وهمتكوا معانا...

أخوكوا الجعان.. :ninja:

[bodda]

للعزيز وجدى

البفتيك

طبعا أفضل شرائح البفتيك نحصل عليها من البتلو

وهو صغار الجاموس اللبنى

والجزار بيوضبها شرائح ويدقها خفيف بالساطور

المهم كل اللى عليك تتبلها وتحطها فى التلاجه على الاقل ساعتين

علشان تشرب التتبيله وترتاح الانسجة

المهم التتبيله تكون بعصير بصل وملح وفلفل

( عصير البصل = يقطع البصل وينعم فى الكبه ويعصر فى شاشة)

بعد ما يشرب اللحم التتبيله نقوم بتقليب الشريحه فى بيض مخفوق

ويقلب بعد ذلك فى بقسماط ناعم ثم يحمر فى خليط سمن وزيت ( ساخن جدا وغزير )

وأفضل زيوت التحمير هو زيت القطن يليه زيت عباد الشمس

بعد كده نطلعه على ورق يتشرب زيادة الزيت والسمن

ثم يجمل بالبقدونس ويقدم

وبالف هنا وشفا

مساء الفل

:ninja:

[wagdi]

عمو عمو أمي بتسلم عليك وبتقولك ماعندناش شرائح بفتيك....

أصل أنا باطخ مشوار كل أسبوع لجزارة اسلامية علشان اللحمة تكون حلال...والصراحة مافكرتش في موضوع اللحمة البفتيك دي..

بس أنا عندي لحمة مفرومة ولحمة مكعبات :wub:

مافيش إي حاجة تتعمل بيهم؟؟

ومعلش أنا عارف إنك حاتضربني بس الكبة دي إلى هيا شكلها عامل إزاي... :ninja:

ووشي منك في الأرض يا بدران...

[shawshank]

ايه يا جدعان ده ... دانا هعمل بحث في الرز بالبسلة :ninja:

متشكر جدا جدا للأخت فلانة و الشيف bodda و الشيف شاعر الرومانسية ... و شكر كبير للأخ وجدي انه فتح الموضوع.

هجرب و اقلكم على النتيجة إن شاء الله ... بس اذا مشيت معايا ، اوعى وشك :wub:

هبهدل الدنيا طبيخ بعد كده

[bodda]

العزيز وجدى

اولا بلاش كسوف ولا حاجه لان كلنا كنا كده

والكبه هاتلاقى جسمها شبه الخلاص بس من غير الدورق العلوى الشفاف

وهاتلاقى مكانه حاجه قطرها حوالى 15 سم و شفاف وجواها سلاحين

ممكن باللحم لمكعبات نعمل كباب حلة

كباب الحلة

هاتطلع طبعا اللحم .. ولو مجمد يبقى لازم تسيبه لما يفك من التجميد

وتجيب بصلتين وتقشرهم وتقطعهم ترانشات او اى شكل

وتحط على البصل معلقة ملح صغيرة وفلفل اسود

ولو فيه بهارات تحط نص معلقة صغيره

وتجيب حله وتحط فيها معلقة سمن كبيرة ومعلقة زيت وتحط البصل باللى عليه

وتضيف اللحم وتقلبه معاهم

وتحط الحله عالنار الهاديه لما يسخن الخليط هاتضيف نص كوباية ميه سخنه

وتعلى النار وسط وتغطى الحله

وكل ربع ساعه تشوفها لو نقصت الميه تزودها تانى بميه سخنه

لغاية ما اللحم يستوى

ولو اللحم صغير السن ياخد حوالى ساعه

وبالف هنا وشفا

:ninja:

[Folana]

السلام عليكم ورحمة الله ..........

سلام كبير قوى لاوشا ..طاخ ...طراخ ..بوم ...ايه يابنتى كل ده ؟...شكلك خلصتى على فلوس الوالد خلاص ... يرجع بالف سلامة وانت كمان ترجعى لنا بالف سلامة ..وتحكى لنا كنتى بتطبخى ايه واشتريتى ايه :wub:

العزيز بودا ...لا انا مش حاغير مية اللفت لانها مش بتمرر معايا :P ...انا ماحدش يجرؤ يمرر معايا اصلا ..لا اللفت ولا الزيتون ...الزيتون بقى انا بانقعه يوم كامل وادلق ميته تانى يوم وبعدين اخلله ...اما عن العسل الاسود جربه وانت مغمض عينيك فعلا بيخلى اللفت متماسك لفترة طويلة ..وقولى على النتيجة ....

الاخوة الضيوف الكرام ..منورين والله وعملتولنا حس فى المطبخ ...واللحمة المفرومة دى يتعمل بها حاجات كتيررررررررررررر ....بس حاسيب بودا بقى يشتغل شوية ...

نهاركم جميل .... :ninja:

[bodda]

فلانه هانم

بلاش زوغان وهروب من المسئوليات

الناس بيلجأوا لينا للوصفات السهله

فياريت بلاش تقولى يتعمل بالمفروم حاجات كتير وتجرى

:ninja:

ساعدونا يساعدكم ربنا

واللى عنده وصفه هنيه هاتكفى ميه

:wub:

مساء الفل

:P

[Folana]

السلام عليكم ورحمة الله ....

والله ياجنرال لا هروب ولا حاجة بس انا كتبت هنا وصفات كتير لللحمة المفرومة ..بس نكمل حاضر سعادتك ..احنا عايزين رضاك بس ...(والاوفر تايم بدل طبخ).....

ابنائنا فى الخارج ..هلموا ....

مكرونة اسباجتى باللحمة المفرومة ...

عصجوا اللحمة المفرومة وحطوها على المكرونة ................................................................................

......................اظن مافيش اسهل من كده ..... :wub:

بصوا معايا بقى ...حتجيبوا اللحمة المفرومة ...(حاضطر اقول بالمقادير كده)...

طيب بصوا تانى الناحية دى كده ....حنحضر نص كيلو لحمة مفرومة ...ونبشر عليها بصلة وندق فصين توم ...ونقلبه البصل مع التوم مع اللحمة وبعدين نسويها على النار ..ونقلبها بشوكة علشان تفرفر فى ايدينا ..قصدى تبقى فتافيت ...تبقى مفرومة زى ماهى يعنى وماتعملش كور ...طبعا لو اللحمة المفرومة فيها سمين ..حاجات لونها ابيض يعنى ..مافيش داعى تضيفوا سمن ولا زيت ..وان كانت حمرا ممكن تضيفوا ملعقتين سمن ...لحد هنا انا واضحة ؟

اما تستوى بقى او ميتها تنشف يعنى حنضيف عليها الاتى ؛....واحدة فلفل احمر وكمان واحدة فلفل اخضر متخرطين رفيع ..

وحنضيف طماطم متقطعة مكعبات صفيرة وملعقة صلصة طماطم (للمحترفين فقط)الباقى يمشوها طماطم صاحية ....وحنضيف نص فنجان خل ..وتبلوا بقى بالملح والفلفل والزعتر ولو فيه ريحان يبقى جميل ..وممكن مبشور جوزة الطيب ..وقلبوا كل ده مع اللحمة المفرومة على نار هادئة نقول لمدة 25 دقيقة

حنسلق المكرونة وده بيتم عن طريق غلى كميه مناسبة من الماء فى حلة ونضيف للمية دى شوية ملح وشوية زيت صغننة ....والزيت علشان المكرونة ماتلزقش فى بعضها ...ولما المية تغلى حنكسر المكرونة الاسباجتيى نصين او تلاتة علشان ماتبقاش طويلة بدون داعى ...

نكسرها اما واحنا بنضيفها للميه ..او وهى لسه فى الكيس تدوس على سن الرخامة فى نص الكيس لحد ما تتكسر منك وبعدين تسلقها واما تستوى تصفيها فى مصفاة وتشتطفها

ثم تغرف فى الطبق ويضاف عليها اللحم المفروم وممكن ترش عليها جبنة بارميزان مبشور او جبنة رومى مبشورة او تطنش .............

واللى مش فاهم حاجة يبقى يسال بودا وهو يوضح بخطه الجميل ....

مع تحيات ..فولانة القمحاوى ..(مش كان اسمه عبد البديع القمحاوى برضه ولا كان ايه :ninja: )

[shawshank]

والله ياجنرال لا هروب ولا حاجة بس انا كتبت هنا وصفات كتير لللحمة المفرومة ..بس نكمل حاضر سعادتك ..احنا عايزين رضاك بس ...(والاوفر تايم بدل طبخ).....

<{POST_SNAPBACK}>

طيب ايه رأيكم نعمل تبويب للموضوع ده ؟ يعني المحمر في ركن ... الخضار في ركن ... المشويات في ركن ، كده يعني. لأن الموضوع كبر أوي ما شاء الله.