اطلب اى وصفه على بالك .. تلاقيها قدامك

[bodda]

صباح الفل شاوشنكو

بصراحه احن مالناش فى موضوع التبويب والفهرسه والسوفت وير عامة

:D

لو تعرف تعملها ياريت

بس ياريت برضه يفضل الموضوع بتاعنا شغال زى ماهوه

لان زى مانت شايف هوه فيه صداقات وسط الطبخات

فلو يتعمل له تبويب فى اول صفحه مع بقاء الباقى

يعنى اللى يدوس على وصفه يتنقل لصفحتها مباشرة يبقى هايل

طبعا ماعرفش ازاى

:lol:

صباحك فل

:wub:

[Guest النسر المصري]

احم ..احم

احب اعرفكم بنفسي

انا ملك المطابخ العالمية ... مفيش حد «يستدرج» ابداً انه يقف قصادي

اصلي انا ترباية أونكل كوارع أبو كرش القرموطي ... واللي يرجع نسبه لابن «الرومي»

لكن بصراحة انا ماجيش جنب الامبراطور بودا الرهيب حاجة:wub:

اصل الامبراطور بودا دة ايده طارشة قوي في الطبخ :lol:

وعدين امبراطوريته دي كلها مطابخ جبارة تتعالى في البنيان

دة حتى مربي عنده جيش نينجا من الفراخ والبط والحاجات الملهلطة دي :D

عموما انا بحكم عزوبيتي العتيقة اللي تيجيلها اكتر من اتناشر سنة...آآ والله ياولاد الناس

اتناشر سنة عازب :sad: وحييييد في العالم....تاااايه بين البشر....

المهم اني بقيت عبقري في الأكلات الايطالية والمصرية والخليجية...وبعد كدة بقى لية مطبخي الخاص بيااا... مطبخ مية مية...اللحمة فيه حقيقية... مش فراخ جمعية..وحته ليك وعشرة لية

المهم انا مش هقولكم الاكل الايطالي ولا الخليجي ولا المصري لانه معروف مسبقاً واللي عايز يعرفه ممكن يعمل سيرش عالنت او يسألني

انما انا هاسرد ليكم بعض الاكلات التاريخية اللي لسة بتتداولها اسرتي الى اليوم ... حيث اني عرايشي...وعندنا اكلات عتيقة قيمة مابتتعملش إلا لولاد الأكابر ... وعملها صعب فعلاً

وبعدها هاسرد لكم اكلاتي واختراعاتي الشخصية

واتمنى انكم ترحبوا بي

وخصوصا الامبراطور بودا الرهيب

ويجعله عامر

تم تعديل 20 نوفمبر 2005 بواسطة النسر المصري

[shawshank]

صباح الفل شاوشنكو

بصراحه احن مالناش فى موضوع التبويب والفهرسه والسوفت وير عامة

:D

<{POST_SNAPBACK}>

يا شيف bodda ازاي بس

ماهو لازم الناحية الفنية ، يعني أنا هعرف منين الأبواب تكون ايه ؟ أو أنواع الأكلات ايه ؟

انت حط مثلا 5 أبواب عامة. و منها تتفرع أنواع الأكلات مثلا.

[Folana]

السلام عليكم ورحمة الله .....

ايفييت ..فالد نسر طيار ايفييت ...انت بتقول اكلات تخص اولاد اكابر ...يعنى انا ...انا اولاد اكابر اللى بتقول عليهم دول ...قد اصدرنا نحن فولانة هانم الاول ...احفاد اولاد اكابر ..فرمان هام هام وهو تعيين النسر المصرى فى مطبخ حظرتنا العمران ..لاختبار مدى صحة قواه المطبخية لتثبيته فى المستقبل القريب كمساعد شيف ....

بنرحب باخونا الجديد اللى جاى والخير معاه النسر المصرى ...بس قبل السلامات والطيبون لازم تعرف شىء مهم جدا ..احنا ماعندناش هنا حاجة اسمها ابحث عن القاتل ..قصدى ابحث على النت ولا حاجة اسمها اسمها اللى عايز حاجة يسألنى ...ولا حاجة اسمها ..فيه حد عنده سؤال ..فيه حد مشغول البال ...مع الاعتذار لليلى مراد ...

احنا كلنا بنقول اللى عندنا ...كده غلاسة من غير ماحد يسألنا ..وزى ماانت شايف وزى بودا ماقال ..احنا بتجمعنا علاقة مودة واحترام وصداقة اهم من كونا بنكتب وصفات اكل ..يعنى ممكن نكتب حاجات كل الناس عارفاها اصلا ..بس بنحب نكتب لبعض ونقرا لبعض .....ياريت بقى تكتب لنا كام وصفة عرايشى كده بس بعيد عن الزلوط .....

مرحبا بك مرة اخرى ومستنين افتكاساتك ...

الاخ العزيز شواشانك ...فكرتك جميلة جدا فعلا ...لكن برضه احنا عايزين الروح اللى بيمتاز بها المطبخ تفضل زى ماهى ....انت فكر لنا لنا ممكن التبويب ده يتم ازاى واحنا نساعدك برضه ......بس اعتقد ان لو الواحد كتب الكلمة اللى عايزاها فى البحث بيطلع له كل الموضوعات اللى بتتكلم عن النقطة دى ...يعنى لو كتبت جزر مثلا :D حتلاقى كل اللى يخص الجزر ظهر .........

صباحه جميل .. :lol:

[shawshank]

الاخ العزيز شواشانك ...فكرتك جميلة جدا فعلا ...لكن برضه احنا عايزين الروح اللى بيمتاز بها المطبخ تفضل زى ماهى

<{POST_SNAPBACK}>

ممكن التبويب يكون في موضوع مستقل مثلا بالتوازي مع هذا الموضوع ، فلا يتم تغيير أي شئ في الأخير.

هي مجرد فكرة. الأخ المشرف ممكن يشوف لنا حل.

[Salwa]

عمروووووووو.

قصدى ....النسر المصرى .

الف حمدلله على السلامة .

نورت المكان .

ياجماعة الخير ...

النسر المصرى انسان ممتاز وكان من حسن حظى ان اتعرف عليه شخصيا فى زيارتى الاخيرة لمصر وهو ككل ابناءنا صاحب واجب وشهامة ..

وعلى ضمانتى .....ممكن نعتمد عليه فى كام طريقة حلوة ...هو لا يكذب ..

له فى المطبخ ( والله اعلم ) ..

فى انتظار وصفاتك ياعمرو ...جرب فى اهل المحاورات لحد ما ربنا يكرمك ببنت الحلال ..

صباح سعيد عليكم جميعا .......

[bodda]

ايه الهنا اللى احنا فيه ده

:lol:

شاوشنك والنسر المصرى والعزيزه سلوى

والله منورين ومستنيين الوصفات العرايشية الجميله يا نسر

فيهم اكله تشبه الكبسه بس ناسى اسمها عندكم بس اكلتها تجنن

:wub:

وموافق فلانه هانم زعيمة حزب الاكابر فى المطبخ

مع انها عزيزة الظهور وكثيرة الاختفاء

:D

صباح الفل

:sad:

[Guest النسر المصري]

انا انكشفففتتت يارجاااالة:lol: :wub: :sad: :o

انكشف واللي كان كان

مدام سلوى مابيعديش عليها ولا حتى الهوى

حتى مابيفوتش عليها قطر(واخدة بالك يامدام سلوى)

والله ليكي وحشة خاصة يامدام سلوى ووالله انا جايب في سيرتك ليل نهار

(طبعا كحيتي لما قلتي يابس):D

وطبعا اجتماع المحاورات الاخير كان شرف لي اني احضره مع حضرتك وابن حضرتك

تصدقي انا ماتجوزتش لسة لحد دلوقتي

اصل انا خاااايب :D

وربنا يديم علينا المحاورات يارب

ومن دلوقتي ورايح هبقى شريك غلس ورزل ودائم للمحاورات

عموما النسر الطائر قادم لكم بما تحمله يداي من مأكولات باشاوات وأكابر

لافيها حركات ولا زلوط فتكات (واخدة بالك يافلانة)

وانا الصراحة مستحي من كلان السيدة العظيمة فلانة وكلامها الجميل وربنا يقدرني واقدر ارضيكم جميعا

استنوا اما اجيب العدة بقى عشان اتكلم براحتي

الفللللـــككككة والمنشاااااار يلا يا بلية

سمينا بسم الله

ياااامسهل

[Guest النسر المصري]

المقلوبة بالفر (بالسمان يعني)

نشأت اسم المقلوبة في عام ???? على يد جدي الأكبر بوشناق ترك

وسماها كدة عشان بعد مابيطبخها كان بيقلبها على صينية وتبقى شكلها زي التورتة

المكونات:

رز بسمتي طويل من النوع الغالي اوي-ااربعتاشر سمانة ماينقصوش فرد-شرايح بصل امريكي منيل- تلات حبات بندورة او طماطم-شرايح فلفل رومي اصفر واخضر واحمر-حمص حب مسلوق-صنوبر ومكسرات-شرايح باذنجان مقلي مدورة مش مستطيلة كبيرة- بهارات كاري وكركم وورق لورا وسماق وزعفران هندي-حلتين متوسطة الحجم قائمة الزاوية بحدة بدون يد ولو ليها يد اكسريها وجبسيها بعدين (يعني مش مثلثة)

حشوة السمان: رز عادي محمر نص مسلوق بالكاري والزبيب والصنوبر والكبد والكلاوي

طريقة العمل

الحلة عالنار متوسطة زي مانتو شايفين ومعلقتين زيت زتون اخضر عتيق يسخن قوووم نركمي حبة مستكة وبعدين بصلة صغيرة مفرومة باليد تسخن شوية واضيف نص معلقة صغيرة فلفل اسود وكركم ومعلقتين صغيرين كاري ورشتين زعفران وشوية سماق ونص معلقة صلصة وحمرهم ثلاث دقايق

اضيف السمان متنظف ومحشي واضيفة في الحلة واقعد اقلبهم عشر دقايق وشويتين

أضيف الميه وومعلقتين ملح كبار واسيبة يتسلق من نص ساعة الى ساعة الا ربع

اشيك انه استوى باني اغرس سكينة رفيعة اوي بشكل خيفي في صدر اي سمانه لو غرست بهولة شويتين تبقى استوت - وبعدين اطلعهم من الحلة واسيب الشوربة سخنة

اجيب الحلة التانية وادهن معلقتين زيت زتون

وارص السمان جنب بعضه شريطة ان الصدر يكون في قعر الحلة يعني السمانة تبقى نايمة على وشها وارش عليهم شوية بهارات كاري وكركم وزعفران

احمر حمص حب وصنوبر ومكسرات وزبيب مع بعضة في طاسة وارشهم على السمان

وابدأ أرص طبقة شرايح البندورة المدورة

أرص طبقة شرايح البصل المدورة

أرص طبقة شرايح الفلفل الرومي المدورة الحمرة والصفرة والخضرا عالتوالي

أرص رشة صنوبر تاني

ثم اضيف ثلاث كوبايات الارز البسمتى(يفضل الامريكي المنيل) واضيف اربع كوبايت من الشوربة بتاعت السمان عليهم بس لازم تحطوا معلقة ملح كبيرة كمان عشان الرز

او حسب مزاجك في الملح

واغطي الحلة على نار واطية واخليه تلت ساعة وشويتين زيادة

والافضل اننا نشيك باننا ندوووق

نطفي النار وناملي الحوض ميه ونغطس الحلة فييها عشان تبرد شوية صغيرة وتعرق من جوه بدون مانفتح الغطا نهائي---بس مش تغطوسوها كلها يعني ماتدخلوش ميه جوه الحلة من برة بس فااااهمممييين :D

نطلعها ونسيب الحلة تبرد ربع ساعة عشان الرز يمسك في بعضه وتكون الحلة متغطية زي ماهي بردو بس طبعا هي هتفض سخنه

نجيب صينية مدورة اكبر من دائرية الحلية

ونفتح الغطا بتاع الحلة ونضغط على الرز من فوق ضغط خفيف بايديكي عشان الرز يمسك في بعضة اكتر

ونغطي الصينية بالحلة ونمسك ايد فوق الحلة وايد تحت تحت الحلة ونقلب الحلة

تبقى الصينية تحت والحلة مقلوبة على وشها

تبقى الصينية تحت والحلة مقلوبه على وشها كانها مغطية الكل

يتحسن تلبسوا جونتيات قطن وحتيتين قماش عشان ايديكوا ماتتلسعش

تجيبوا معلقة خشب وتقعدوا تضربوا بيها ضرب جامد شوية على الحلة ومن جنبها عشان تفك

وبعدين تمسكوا الحلة من الجنبين وتحركوها يمين وشمال

وتنقلوا الصينية والحلة متغطية زيي ماهي على السفرة

وتشيلوا الحلة بشوييييييش خاااااالص

وتكوها بضرب خفيف من فوق وانتم بتشيلوها

لححححححد لما تطلع الحلة

هتلاقوا المنظر جبار في الجمال

الرز واخد شكل تورتة والشرايح بتاعت الفلفل عاملة منظر والسمان مرصوص رص جنب بعضه

وحااااجة اييية

وبعدين رصوا قطع طماطم على شكل مركب حاولين الحلة

وبالهنا والشفا

[Folana]

السلام عليكم ورحمة الله .........

وبيقولولنا ان احنا اللى بنشجع الدروس الخصوصية .....يعنى احنا كنا فهمنا وخدنا دروس !!...النسر المصرى ..انت بتدى دروس خصوصية فين علشان فيه جزء مش قادرة افهمه فى وصفتك.....

مبدئيا شكلها شهى ...بس انا لى استفسار ...هو السمان بيتحشى؟....انا عمرى ماحشيته بصراحة لانى مش شايفة مكان ممكن احشيه فيه ..وباعمله طواجن او يتشوى ..

انا باعمل المقلوبة بس مش بالسمان ..باعملها باللحمة ...يعنى باقطع اللحمة مكعبات واسلقها والباقى بقى زى ماقلت تقريبا ...هى دى اكلة من العريش؟...اصل احنا لما بنطلع الساحل الشمالى نغير عملة ..قصدى نغير جو بنروح الحمام ...لا قصدى مدينة الحمام وهناك بقى بنشترى السمان البرى والرجل بيعمله فى الرز ..بس مش بيكون محشى ...

وهل بفرض اننا حشينا السمان لما نيجى بقى نعمل المقلوبة بنكون مسويين السمان ولا بنحطه نىء كانه طاجن يعنى وفى الحالة دى بيستوى فى الفرن؟...معلش انا بسال كتير لانى باحب اجرب اى وصفة جديدة على ..ومش عايزة فلوس سى الاستاذ يعنى تروح عليه ....

عموما بداية موفقة لكن حننتظر برضه رأى خبير المفرقعات الريس بودا ..وفى انتظار المزيد............

[Folana]

خلاص ..خلاص...فهمت فى الاعادة ..احنا بنسلق السمان الاول...اصل انا بافهم فى القراءة الثالثة للموضوع ..بكرة تتعود على طريقتى ... :D

[bodda]

النسر العزيز

حلوة جدا طريقة المقلوبه بالسمان

بس ياريت تقولى بقى طريقة المنسف بتاعتكم

متهيالى تشبه الكبسه السعودى .... مستنى الوصف التفصيلى

العزيزه فلانه

طبعا الاصل فى السمان هو المحشى :D

وبيتحشى مرته... والمرته عبارة عن بصل مبشور وملح وفلفل اسود وبس

وبيكون تنضيف السمان من حجره زى الحمام

وبيتحشى عادى تلتين الفراغ

وبعدين نعمل للحجر غرزتين تلاته واسعين للسماح بتبادل السوائل

ثم يتسلق فى ميه وحبهان والذى منه :sad:

وبعد السلق والسوى نطلعه يبرد شويه ويصفى السوائل الزياده

وبعدين يتحمر فى زيت غزير وبعدها نرش عليه ملح وفلفل خفيف

بالنسبه لى احلى وأشبع من المشوى بكتييييييير

:lol:

مساء الفل

:wub:

[Guest النسر المصري]

الامبراطور بودا الرهيييب

اشكرك جدا على مداخلتك وعلى فكرتك اللذيذة لعمل السمان

وربنا يقدرني وانجح في مدرسة سيادتكم

واتمنى حتى لو اكون فراش مطبخ سعادتك

بس احنا حضرتك مابنعملش المنسف وهي في الاساس اكله اردنية فلسطينية في غاية الطعامة والروعة والجمال

وهاقلوكم عليها

وربنا يديم المعروف

اليدة فلانة العظيمه

ربنا يخليكي الصراحة انا محرج من كلامك الجميل وطبعا الامبراطور اجاب على سؤالك

وماعدش لي كلاكم

ولا انت عايزة توديني في داهية

نعم

بتقولي اية

آآآآ بفتكر

طبعا داهية تاخدني همال انا خايب من ساهل

ودلوقتي هشرحلكم المنسف ولو انها مش اكله عرايشي

بس انا عملتها مرتين قبل كدة

الآن الفاصل

ابقوا معنا

[Guest النسر المصري]

المنسف

اكلة اردنية فلسطينية اخترعها ابو العبد عام الف وحاجتين تلاتة كدة-وسميت بالاسم دة عشان كانت قبل ماتتحط على المائدة كانت بتتنسف نسفا مدمرا شاملاً وربنا يحمينا من بوش واعدائنا لايفتكرونا بنحضر اسلحة دمار شامل

وبعد مابياكلها البني آدم دماغة دي بتتنسف وببيبقى عايز ينام و يحلم طول اليوم

المهم خلينا في المهم....سمع ههههسسسس....اكشن

المكونات:

اتنين كيلوا رز صنوايت مصري فاخر

تلاتة كيلوا لحمة بلدي بعظمها ويفضل تكون من الصدر(ريش يعني) او هبر للي بيحب بس ماينفعش كندوز ولا بقري

نص كوباية سمن بلدي اصييل

بصلتين مبشورين

حبة توم

لوز وفستق وصنوبر متحمرين مع كبد وكلاوي وقلوب وبقدونس عشان الرشة

بهارات كاري وكركم وملح وفلفل اسود

رقاق ناشف ودة بديل للخبز الاردني اللي اسمه شراك

نص كيلو جبنة جميد او كشك وهي دي المشكلة اللي هتواجهكو ان مفيش في مصر جبن جميد

وهو جبن تركي الاصل ناشف زي الحجر وحادق

لكن احنا ممكمن نستبدلة بلبن خاثر

ودة موجود في المراكز التجارية الفخمة زي ABC او مترو بس مش تجيبوا لبن رايب عشان ماينفعش

واذا مافيش يبقى لبن خالي الدسم ويتغلي ويضاف ليه ملح

طريقة العمل :

حلة نظيفة متوسطة الحجم على نار متوسطة هي كمان لمنع التميييز والمساواة ونحط معلقتين سمن ومستكة ومعلقتين كاري ونص كركم وملح وفلف اسود والبصل والتوم ونحمرهم لما يبقوا لونهم دهبي وابقوا قولولي هتعرفوا ازاي

نضيف المية واللحمة وتتسلق نص ساعه وشويتين لحد لما يستوي

نصفي اللحمة على جنب

في الوقت اللي كنا بنعمل اللحمة فيه بنكون بوشنا الجبنة الجميد تبويش في مية منقوع فيها الجبن

ومن ثم نغلية بميته مع التقليب المستمر في حلة بدون مانغطيها مع اضافة ملح وكركم لحد لما يبقى مية خالص

واذا مفيش جميد يبقى نغلي لبن خالي الدسم مع الملح والكركم ويفضل اللبن الخاثر اللي قلتلكم عليه

وبعد كدة بنضيف كوبايتين شوربة لحمة للبن ونضيف اللحمة ليها ونخليهم يغلوا سوا سوا مع بعض شويتين تلاتة كدة مع التقليب المستمر ونطفي النار ونغطيها

في حلة تانية نحط معلقتين سمن بلدي تانيين ونضيف الرز مغسولا مصفى ناشفا ونقلبهم على نار متوسطة لحد لما الرز يفرط من بعضه يعني يبقى مفلفل وبعدين نحط نص معلقة كركم ونضيف لهم كوبايتين من اللبن بتاع اللحمة والباقي مية عادية وملح حسب الرغبة وعلى نار هادية وخليها تستوي

نجيب بقى صينية مدورة كبيرة ونرص الرقاق زي ماهو مدور (حوالي تلات ابع رقاقات) ونسقيهم خفيف باللبن بتاع اللحمة

ونضيف الرز عليه ونفرشه لحد لما يملي الصينية

وبعدين نسقيه سقيه بشوية لبن اللي في اللحمه

ثم نرش عليهم الرشة بتاعت المكسرات مع الكبد والكلاوي

وبعدين نرص اللحمة فوقيهم

وباقي اللبن نحطة في طباق شوربة صغيرة عشان اللي عايز يسقى ناحيته بلبن اكتر

اصل سر الاكله دي في اللبن بتاع الجبنة الجميد دة

وكلوا اشهى اكله غير مصرية تاريخية في الطعم والجمال

وعلى راي الاردنيين .. صحتين وعافييي

ويجعله عامر

تم تعديل 20 نوفمبر 2005 بواسطة النسر المصري

[Folana]

منسف؟؟؟؟؟؟؟؟ مش باقولكم خبير مرفقعات ....قال منسف قال ..وعجبى ....طب نقرها ازاى دى بقى ؟ بالضمة ولا بالفتحة ولا بالكسرة ولا بالدمعة؟..ولا نى فى نى ؟؟؟.....

على العموم انا فعلا سعيدة بانضمام النسر معانا لانه حيعرفنا على اكلات جديدة وشهية ...بس الفاصل طويل جدا كده ليه ..كل دى اعلانات ؟؟؟

منتظرين المزيد وتأكد ان كل وصفاتك انا حاجربها ..بس ربنا يفرجها من ناحتين اولا الحالة المادبة احسن دى هاه اوى ...تانى حاجة ربنا يشفى طيورنا المهاجرة من الانفلونزا علشان زوجى العزيز يرفع عنا الحظر ويسمح لنا بتناول الطيور .....

مساء الخير ..(صورة عماد حمتشى)

[Folana]

معلش انا ردى جه بعد ماانت كتبت الوصفة السماح بقى اصلى بطيئة فى الكتابة شوية زى الفهم بالظبط ...وصفة لذيذة ...بس الجبنة الجميد دى مش ممكن تتباع هنا فى السوبر ماركت او اى جبنة بديلة زى الحالوم يعنى ..اللى هى جبنة لبن الماعز بتبقى ضفاير كده وناشفة برضه وبتتنقع فى ميه ....

على العموم اذا كانت فى تركيا بس فكده خالص اعتبروها فى جيبكم انا حاشد مكتوب لخالتى ام ابراهيم باشا تبعت لنا قد وقييتين نمشى بهم الحال ...

تسلم ايدك فعلا ..

[Guest النسر المصري]

:D

طيووور :wub:

طيور مين يا فولانة العزيزة

المنسف بفتح الميم وتسكين النون وفتح السين مرة تانية وبعدين تسكين الفاء آخر مرة وربنا

المنسف دة يا فولانة هانم

باللححححححمةةةةةةةةة

مش بالطييوور :sad:

عموما وكمان المقلوبة زي ماتفضل الامبراطور بودا الرهيب ممكن ان احنا نعملها باللحمة

بس في الحالة دي تبقى اكلة شامي مش عرايشي

والفاصل طول لاني متنيل على عيني بخلص شغل للمدير

:lol: واااااء

وقاعد لوحدي وجعااااان

واااااء

تم تعديل 20 نوفمبر 2005 بواسطة النسر المصري

[Guest النسر المصري]

على فكرة يافولانة هانم

احنا لازم ناخد راحتنا في الرد اصل انا رديت بسرعة على ردك الاول واعتذر بشدة وبعنف

اصلي افتكرت انك رديتي على بعد ماقريتي الوصفة

آسف جدا ف :D

لكن عموما البديل للجبن الجميد بديله زي مقلت لبن خاثر

لكن الافضل هو نفسة

اما الحلوم فهي بعد النقع والسلق واحينا ممكن نشويها هي في الآخر جبن بتمط ولا تذوب في الماء

الا اذا كن قصدك على جبنة تانية

ويجعلة عامر

[Guest النسر المصري]

مدام سلوى العزيزة الغالية

السيدة فولانة الرائعة الفاضلة

الامبراطور بودا الرهيب العجيب

الأخوة والأخوات اعضاء مطبخ المنتدى

حبيت بس أصبح على حضراتكم

وأقولكم جاهزيين للقنبلة المدوية المطبخية الجديدة

ربنا يدينا الصحة بس ونرضيكم

بس ابقوا قولولي عملتم اية في الأكلات اللي فاتت

ويجعله عامر

[bodda]

والله منورنا يا احلى نسر محلق فى سماء مطبخنا الغالى

:P

وتسلم ايدك عالوصفه الجميله للمنسف

وانا اكلتها فى العريش ييجى من 5 -10 عشرين سنه كده

:wub:

وساعتها فهمونى انها اكله عرايشى

والغريب اعمى ولو كان بنضاره زى مانت عارف

:)

بالنسبه للبن المتخثر فأنا باعمله بلبن دافى ومعلقة ملح وعصير ليمونه

بعد ساعه هاتلاقيه متخثر و 100%

ويمكن استعماله زى مانت قلت :sad:

وممكن تصفيه فى شاشه وتعصرها كويس وبعد كده تاخد كتلة الجبن الناتج

وترشها ملح وتسيبها فى مكان هاوى على ضهر مصفاه ( مش جواها)

بعد كام يوم هاتلاقى الجبن الجميد اللى عايزه

:D

بس بصراحه المنسف جميل وياريت تجربوه بس قبل يوم اجازه

علشان النوم سلطان

:D