اطلب اى وصفه على بالك .. تلاقيها قدامك

[Folana]

الفاضلة فولانة هانم

أولاً أشكرك سعادتك على الوصفة بس هو فيه حاجة صغيرة.... أنا أتلخبط...أنا قصدي كشك بالجمبري.. :blink:

والعتب على الجهل المطبخي... وعلى حسب رواية زوجتنا المصون الكشك ده مش حاعرف ألاقيه هنا... فهل هذا صحيح... وبيتعمل إزاي ده؟؟

أما بالنوسبة للتبولة....هيا مش المفروض بيتحط فيها برغل؟؟؟  أنا باشوف اللبنانية كلهم بيعملوها فيها برغل...هي بس المشكلة في النسب...

<{POST_SNAPBACK}>

الاخ الكريم ....واضح انك قريت الوصفة وانت مستعجل ...لانى كاتبة فى اول سطر اننا حنجيب برغل ناعم ..ولو مش مصدقنى ارجع لاوراق القضية عاليه ....

التبولـــــــــــــــــــــــــــة...

حنجيب نصف كوب برغل ناعم ..نغسله كويس ونصفيه من اى مية زيادة عن طريق الضغط عليه فى مصفاة

بس مايخالف ....

بالنسبة للكشك ...ده اخر كلام يعنى ؟عايز الكشك فعلا ...ولا انت عايز اى وصفة يكون فيها جمبرى وحرف الكاف والشين؟؟؟ قول واحنا حنتصرف وكشك سعادتك اوامر................ :blink:

اظن ان المدام(واللى بنتمنى انضمامها لنا ومشاركتها معانا) تقصد الكشك الصعيدى لان ده هو اللى ممكن يتباع ...بس ده له طريقة مختلفة ...اما الكشك العادى فاحنا بنعمله فى البيت ...بالشوربة وشوية رز صغننة واللبن ..وفيه ناس بتعمله من غير رز .... على اى حال اليك وصفة

الكشك بالجمبرى

حنجيب كوباية زبادى وتقلب عليها ربع كوباية دقيق ..ونص كوباية لبن ...(مقاديرى قابلة للتعديل حسب الحالة قدامك لانى باشتغل بالبركة).....

حتسيب الخليط ده على جنب يجى ساعة يتخمر ....حتغسل كمية الجمبرى اللى انت عايزاه حنقول كيلو جمبرى قشر ...وتصفيه فى مصفاة يعنى تسيبه يصفى ميته

حتجيب فصين او تلاتة توم مدقوقين وتحمرهم فى شوية زيت صغيرة لحد مايصفروا وتروح دالق عليهم الجمبرى وتقلب شوية لحد المية ماتنشف بتاعته وبعدين تضيف كوباية عصير طماطم وتتبل بالملح والفلفل ..وتوطى النار لحد ما الامور تتسبك ....

تضيف بقى حوالى كوباية ونص او اتنين ميه ...وياحبذا لو انت عامل شوربة سمك يبقى تستخدم الشوربة بتاعة السمك بدل المية ...(بس مش شوربة فراخ )...وسيب الخليط يغلى حبتين ..وبعدين حتروح ضايف بقى الزبادى المتخمر مع اللبن والدقيق ...فاكره؟...اهو هو ده

وحتفضل تقلب بالراحة وخلى باللك ان النار واطية ....لحد ماالخليط يتخن زى المهلبية كده ....

وتغرف فى الاطباق ...وتزين وش الطبق اما ..بنعناع ناشف ...او تخرط بصلة وتحمرها فى الزيت ...وبعدين تصفيها على ورق مطبخ وتزين بها الوش

ممكن قبل ماتغرفه ..حتحمر البصلة ولما تصفر تاخد نصها مع شوية الزيت اللى بتتحمر فيهم وتدلقهم فى حلة الكشك وتقلب ..وبعدين تغرف وبعدين تحمر باقى البصلة تاخد لون دهبى يعنى وتزين بها الاطباق .....

باقولك ايه ...لو عندك شوية جمبرى محيارينك ...اقليهم على طول ..او ابعتهم لنا ينوبك ثواب :ph34r:

وبالف هنا وشفا ....راجع وصفة التبولة من اول السطر ....

[Salwa]

كيف حالكم اهل مطبخنا العامر ؟؟

ان شاء الله كلكم بخير ..

اليومين اللى فاتوا كنت مشغولة ....فارجو المعذرة للتأخير فى الرد.

بالنسبة للسمكة المدفونة فى الملح يانسرنا المصرى ..سوف اضع لك وصلة حتى ترى شكلها بعد ما تطلع من الفرن ..

http://www.afuegolento.com/recetas/tele/2783/

نحضر سمكة وزنها فى حدود كيلو ( سمكة دنيس مثلا ) ..ونحضر اتنين كيلو ملح خشن..

بالنسبة للصلصة اللى حانضيفها على السمكة بعد خروجها من الفرن .فهى مكونة من :

توم...زيت زيتون...بقدونس مفرى ...خل..ملح.

ننظف السمكة عن طريق الخياشيم حتى لا نفتحها بالطريقة التقليدية ..نحاول ان نحافظ على شكل السمكة بحيث لا يكون فيها اى قطع..

نحضر صينية ونضع فيها نصف الملح مفرود بمساعدة تبليل اليد او برشه بمياه خفيفة ..

ثم نضع السمكة ونغطيها بباقى الملح بحيث لا يظهر منها شئ ثم نرشها بنقاط من المياه ..

نضغها فى فرن درجة حرارته 240 لمدة تلاتة ارباع ساعة ...

الملح حايعمل طبقة صلبة بعض الشئ فيجب ان نكسرها باحتراس ..

ننظف السمكة من الملح ثم من الجلد ...ثم ننظفها من الشوك ونضعها فى طبق التقديم .

نحضر الصلصة بتحمير الثوم المقطع صغيرا جدا وعندما يكون لونه ذهبى نبعده عن النار ثم نضيف له البقدونس ( لأننا لايجب ان نحرق البقدونس ) ..وقليل من الملح وبضع نقاط من الخل ...يجب مزج الصلصة جيدا بشوكة ..

ثم نضع الصلصة فوق السمك ..

وبالهنا والشفا ...

على فكرة ...

السمكة المدفونة فى الملح من افضل واغلى الاطباق الموجودة هنا فى اى مطعم اسماك شهير .....وكما ترون طريقتها سهلة جدا جدا لكن يجب نحترس من دخول الملح فى حالة تنظيفها بعد خروجها من الفرن ..ولهذا ايضا نزيل جلد السمكة ..

سلام...

[Reham]

ياأهل المطبخ الكرام........

حرام عليكم حرام

وحياة عنيكم حرام

ده الضرب في الميت حرااااااااااااااااااام

الاكلات دي والوصفات دي خطيره جدا

ولكن ....مع الاسف مع الالم

انتوا كده بتعذبوني

لاني بعمل ريجيم ورا ريجيم

وهنعيش عليه عمرنا :blink:

يعني اعملوالكم قفله وخدوا اجازه من الوصفات الدسمه دي

ده انا لو مشيت وراكوا مش هقولكوا ممكن يحصل فيي ايه :ph34r:

كفايه :blink:

حرام B)

فولااااااااانه

اذيك يافولانه وحشاني جدا اخبار الاستمحانات بتاعتكوا ايه ؟؟؟

ربنا معكم ومعانا

وماتقلقيش من اختفائي .....مش مريب والله

واشكرك علي سؤالك وجزاكي الله كل الخيرات افنديم

[Reham]

السلام علي اهل المطبخ الكرام

لقد نسيت شيئا مهما للغايه في مشاركتي السابقه

الا وهي.....

لقد....تفتكت وعزمت بعض الاصدقاء علي اكله محبوبه للجميع :blink:

الا وهي

(كوارع وورق عنب وعكاوي ولسان وطحال )ولقد زنقوني في عمل ممبار :blink:

طبعا يعرفه الجميع

انا بقي جبت الممبار وهريته نظافه لغاية لما استغاث بشده وكيسته ووضعته في الفريزر

بسسسسسسسس

هو ده اللي اعرفه

حد يقولي يتعمل ازاي بقي

عايزه الطريقه الكامله من الخلطه لغاية القلي :ph34r:

وهل؟؟؟

اقليه في زيت غزير ولا قليل

ارجوكم..... انقذوني من هذه الورطه

قبل نهاية الاسبوع

اشكركم بشده

اشكركم بعنف

اشكركم الي ان تستغيثوا

مع تحياتي للجميع

[hamiss]

مساء الخير إلى أهل المطبخ الكرام.. :blink:

دى أول مشاركة لى هنا بس دايما انا بتابعكم واغش منكم الاكلات إللى مش بعرفها واكتبها دكاكينى من غير ماحد يعرف منكم .. :blink:

المهم انا حسيت ان مافيش حد بيجيى اليومين دول هنا والمكان فاضى والدنيا هس هس وخصوصا من قرآتى لمشاركاتكم السابقة فهمت ان الشيف الكبير بودا مش موجود ومسافر (يرجع بالسلامة انشاء الله) وان الشيفة الكبيرة فولانة أصبح تواجدها قليل ايضاً والباقى مش عارفة راحوا فين ؟؟ وبالتالى مش عارفة آخد منكم حاجة من وراكم .. :ph34r:

المهم طولت عليكم وقلت ابدأ بدخولى للمشاركة وانتم مش موجودين وانقذ ريهام فى الورطة الكبيرة اللى هيه فيها واكتبلها طريقة الممبار ويارب بالهنا والشفا ليها ولضيوفها .. :P

وأرجو قبولى معكم فى المطبخ ولو حتى اكون الصبى بلية اناول سكينة .. أقطع بصلة .. اعصر الطماطم .. آكل الأكله .. المهم اى حاجة اساعدكم بيها .. B)

ريهام انظرى الى المشاركة التالية وتجدى مايسرك ..قصدى تجدى ماينقذك انشاء الله :D

[Reham]

هااااااااااااااميييييييس

عودي هاااااااااااميس

اين انتي هاميس

آمون يناديكي

اهلا بيكي هاميس في اول مشاركاتك

وارجو ان تقبليني اختا لك في الله

واضح ان الجماعه نايمين شويه اليومين دول معلش الشتاء بقي والانكماش والبيات الشتوي بس هتلاقيهم هاللين دلوقتي علي طول

انقذيني ربنا يكرمك وما يوقعك في ضيقه ولا يأمر عليكي ضيف

شكلك كده بتحبي المطبخ :D

للاسف انا مش بحبه بس اللي موديني في 60 داهيه هي الشيكولاته لعنة الله علي مخترعها

انا مدمنة شيكولاته للاسف وبأعترف انني قدامها ماعنديش اي إراده ولا شخصيه

وبعترف كمان قدام الجميع انني بشتري الشيكولاته وبخبيها من عيالي عشان آكلها لوحدي ولوحدي

مش بقولك بعيد عنك وعن السامعين مرض ربنا يشفيني منه :rolleyes:

[Reham]

هااااااااااااااميييييييس

عودي هاااااااااااميس

اين انتي هاميس

آمون يناديكي

انتي روحتي فين كل ده بتكتبي في الوصفه

انتي بتكتبيها ولا بتعمليها :rolleyes:

عموما الف هنا وشفا :D

تم تعديل 2 ديسمبر 2005 بواسطة Reham

[hamiss]

فهمت منك ريهام انك غسلتى الممبار وده اهم حاجة بس المهم تقطيعه الى قطع طول كل قطعة حوالى 20 سم ..

الممبار

الخلطة

حنجيب كوباية ارز وطبعا المقدار ممكن يذيد حسب كمية الممبار اللى عندك

وبعدين نجيب2 بصلة كبيرة مبشورة

وربع حزمة بقدونس مغسولة ومقطعة قطع صغيرة

وعصير 1 طماطم مش اكتر من واحدة للمقادير ديه

ملح وفلفل وحبهان مدقوق وممكن شوية بهارات للى بيحب الشطة والقرفة

الطريقة

نحط كل المقادير السابقة مع بعضها ونخلطهم كويس جدا..

نبدأ فى حشو قطع الممبار وكل قطعة تتحشى لازم تسيبى فى كل من الطرفين مسافة 1ونصف سم بدون حشو خالص..

ونغلى مياه على النار مع قليل من الملح ولما تغلى كويس أوى ترمى قطعة ممبار واحدة حتلاقيها اتقفلت من الطرفين لوحدها عشان الرز مايدلقش منها ..

وبعد ما المياه تغلى تانى تحطى القطعة التانية وهكذا الى ان تنتهى كل القطع..

نترك الممبار يستوى فى المياه لمدة 20 دقيقة تقريبا اى بعد ماتحسى ان الرز استوى كويس..

نشيل قطع الممبار على مصفاة حتى تصفى تماماً من مياه السلق ..

نيجى بقه للتحمير لازم يكون الزيت غزيراً وساخن ونحط فيه قطع الممبار مع تقليبهم كل شوية فى الزيت عشان يتحمر من جميع الجهات ولما يكون لونه بقى ذهبى غامق شوية تشيلى قطع الممبار على ورق مطبخ ليمتص الزيت الزيادة ..

حطى قطع الممبار المحمرة المقرمشة فى طبق التقديم وانثرى قليل من البقدونس المقطع صغيرا على الممبار وده للتجميل ..

على فكرة الموضوع سهل جداً بس انا بوصف بالظبط بتعملى إيه علشان الطبق يطلع تمام ..

وبألف هنا وشفا ..

[hamiss]

معلش ريهام اتاخرت فى الرد عليكى بعد ماكتبتلك او مشاركة انتى عارفة اول ماواحد يقعد ويكتب لازم تلاقى التليفونات والابواب وكل الناس افتكروكى فجأة وبدأوا يسألوا

بس انا كتبتلك الوصفة ويارب تعجب الأكيلة قصدى الضيوف ..

طبعا ريهام لازم نكون اخوات فى الله وفى المنتدى كمان انشاء الله..

بالنسبة بقة لحكاية الطبيخ انا بطبخ الحمد لله أكتر الحاجات بس مش باكل كتير وده الحمد لله مخلينى كويسة ومش محتاجة رجيم خالص وبالنسبة للشيكولاتة بحبها جدا بس برضة مش بكلها كتير إلا بس وقت الإكتآب والضيق وبصراحة لقيت مفعولها جامد جداً..

المهم ربنا يسوق باقى الاعضاء وييجوا واكيد انشاء الله حييجوا على ريحة تحمير الممبار بس المهم تخبيه لحسن ماتلاقيش حاجة لضيوفك ..

بس المهم تعجبك الوصفة .. :rolleyes:

[bodda]

nawarty el matbakh ya hamiss

w teslam edek 3la el mombar

:rolleyes:

keda 7elw bs nsety aham 7aga

?

?

?

EL SHATA

de aham 7aga en el mombar ybka nar ya 7beby nar

:D :o :D

w smaket el mal7 hayla ya salwa teslam edek

wa7ashtony

hanet .... kolha 5 ayam w arga3 lkom w m3aya aklat ghareeeba

msaa' el fol

:D

[hamiss]

مساء الخير شيف المنتدى الكريم بودا.. :o

انت جيت على ريحة الممبار بتاع ريهام , وسبت هوتوكاما وسازوكى وبوكى بوكى

وكل أهل اليابان الطواااااااال :D

معلش والله انا جيت وكتبت الوصفة لريهام لانقاذ مايمكن انقاذه لها..

وطبعا شكرا على ابداء رايك الهام فى وصفى للممبار ..

والحقيقة انا مش بحب الشطة دى خالص ويمكن بيكون اكلى دلع شوية كمان لانى بحب احس بمذاق الاكلة نفسها وان الشطة او الملح الكتير مش بيدوا هذا المذاق خالص وبالرغم من ده انا فعلا كتبت اللى بيحب البهار زى الشطة والقرفة ممكن يحطهم ..

نرجوا رجوعك بالسلامة لان إظاهر الاعضاء هنا مش بيظهروا إلا فى وجودك.. :rolleyes:

ياترى اخبارك إيه ياريهام ؟؟؟ :D

تم تعديل 2 ديسمبر 2005 بواسطة hamiss

[Reham]

اخباري ان شاء الله زي الفل

ربنا يخليكي ياهااااااااااااامييييييييييس ولا يحرمكيش مني ابدا

وان شاء الله هقولكوا علي اخباري يوم الجمعه الجاي بعد ما الضيوف يمشوا بالسلامه

ربنا يرجعك بالسلامه يابودا وتنور لنا المطبخ تاني

دعواتكم ياجماعه

سلااااااام مستربع

[Folana]

السلام عليكم ورحمة الله.....................

الاخوة الاعزاء....أعضاء المطبخ الموقر ...والمطبخ سيد قراره زى ماانتم عارفين ..والله ياجماعة امبارح كان الجمعة يعنىىىى.. اجازة رسمية يعنىىىى.. مافيش كمبيوتر يعنىىىى... جوزى بيكهرب الكرسى علشان ماقعدش عليه(او يمكن علشان لما اقعد عليه) ...فنعتذر عن التأخير ......و.قبل كل شىء احب ارحب بالعضوة الجديدة الاخت هاميس (اسمك جميل ).....وتسلم ايديك على وصفة الممبار والى مزيد من المحشى والوصفات ..كلل الله خطاك بالنجاح....(انا باقول ايه ؟:D )

ريهام....والله انا باكون سعيدة لما بالاقيك حاضرة معانا ...وربنا معاك فى الرجيم ...مشيناها خطى كتبت علينا ..طول عمرنا ستات غلابة :rolleyes: ...حتى اللقمة محرومين منها ..(وش واحدة بتستعبط) :D ......

بس العزومة دى قوية جدا ....ومهلكة فى آن واحد ..شدى حيلك بقى ....بس انت حتقاوميها ازاى دى وماتاكليش منها ؟.....انا اتعزمت فى رمضان عند اسرة صديقة وكانت عاملة العزومة دى ...الست ياعينى كانت قاعدة تقريبا مغمى عليها من التعب ..وانا مش سائلة فى حد ودايسة على الرابع ...مع انى اول مرة اشرفها بانى اكل عندها :o

الاخت الحبيبة سلوى ..تسلم ايديك الوصفة هايلة وشكلها شهى ..انشاء الله حاعملها الجمعة القادمة....مليون سلام وتحية

بودا ...كو..تو..مو...تو......(مش دى يابانى برضه)..يعنى يالا بقى كفاية كده مؤتمرات وارجع احنا جعانين خالص...وانت مش سايب حاجة ..

تم تعديل 3 ديسمبر 2005 بواسطة folana

[hamiss]

مساء الخير ياأهل الكهف قصدى ياأهل المنتدى الأعزاء .. :wub:

اولا ياريهام انا تحت الطلب فى اى وصفة انتى عايزاها.. وبما إن الشيف بودا مش موجود اليومين دول ادينا بنحاول نسد مكانه مع انه طبعا من الظاهر انها عملية مستحيلة بدليل عدم تواجدكم الآن عشان هوه مش موجود .. :D

ثانيا يا فولانة , اشكرك على كلامك الجميل وكلك زوق.. ويارب مانتحرمش من وجودك ابدا لا فى الويك اند ولا غيره .. :D

اشكركم على استقبالكم لى فى المطبخ ولاتتحرموش منى ابداً قولوا اميـــــــــــــن ;)

[Osha]

خونة

:angry:

خاصة انت يا ريهام

محدش بيسأل عليا ويشوف الهم اللي انا فيه

عامة انا حاقولك اللي في ضميري عشان لو مت ابقى خالصة من ذنبك

مية الممبار بتاعة السليق حطي فيها بصلة حلقات وفلفل اسود عشان ريحة الزفارة

هاميس

منورة المطبخ

معلش انا مشغولة شوية في العزال وماليش اصحاب يشيلوا عني

المهم انك لما جبت سيرة الممبار ماقدرتش اسكت قلت لزما ولا بد اني اتحدث حيث ان الممبار من الاكلات المفضلة جداااااااااااااااا لدي

ريهام

يارب الريجيم يبوظ لغاية لما اشوفك ووقتها ربنا يسهل بقى

ماتختفيش كتير عاوزاكي

فولانة

حتى انت يا فولانة اهئ اهئ اهئ

محدش بيسأل عليا والا عاوزين تساعدوا في العزال

طيب ابقوا شوفوا مين حيعمل لكم عزومة لما ينزل مصر

[Reham]

:blink: ربنا يخليكوا ياجماعه علي النصائح الجميله دي وربنا يخليكي ياهاميسه علي وصفتك وان شاء الله هقولك عالاخبار

دعواتكم معايا ......العزومه دي علي فكره تعتبر اسهل عزومه بالنسبه لي بحس انها خفيفه وبتخلص بسرعه

ربنا ييسرها ان شاء الله اما بالنسبه للريجيم يافولانه فهو :rolleyes:

باااااااااااااااااااااااااااااااااااااااظ

الي غير رجعه ...انا مش عارفه ياختي الحرمان ده كله ليه اللي انا عاملاه في نفسي

مع انني وزني مش كتير بس بيني وبينك انا ببص لقبل الجواز :blink:

ياله بقي حسن الختام :angry2:

ماشي ياست رشا :blink:

وهو من امتي ياست انتي عزمتيني وانا في مصر خليني ساكته بقي وبلاش افضحك عالميا وتبقي فضيحتك بجلاجيل

انا هستخبي يومين وبعدين اطلعلكوا تاني

سلاااااااااااااااام موقت واراكم علي خير

[شاعرالرومانسية]

جميع الاخوة الافاضل ... سلام من الله عليكم ورحمة وبركاته،،،

من غير خناق ... والله ظروف قاهرية ( صعبة يعنى مش نسبة الى القاهرة mfb: ) هى اللى خلتنى مادخلش الفترة اللى فاتت... ومش عارف لية دايما الظروف دى بتصادف معانا كلنا .. بودا مسافر .. اوشا بتعزل .. فولانة ملخومة فى عزايم ... ...يلا .ربنا يجمعنا تانى على الخير يارب

المهم ..ان فية اخوة انضموا معانا وحافظوا على ريحة مطبخنا فى غيابنا..... :rolleyes:

الاخت العزيزة هاميس ...(ياترى انتى هاميس اللى انا اعرفها والا تشابه اسمااااااااااء :angry2: )

نولاتى مطبخك ... انا شميت ريحة الممبار وانا بقرأ وصفتك :) تسلم ايدك ويارب تفضلى منورانا كدة على طول مش زى نااااااااااس ...( ماتبصيش يا ريهام .. ماقصدكيش انتى طبعا :sad: )

ريهااااااااااااااااااام ... حمدالله على السلامة يا استاذة ...والله اوحشتينا

نورينا كدة على طول وبلاش الغيبة الطويلة

فولانة ... كفاية عزايم بقى ...كدة حتختفى يا فندم :o

اوشا ... كان الله فى عونك ..وربنا يقويكى على العزال ... ونحن معك دائما ( بالدعاااااااااااااء :blink: )

بودا ....... انت مش قلت قدامك خمس ايام وتيجى ... رحت فين ..اوعى تكون بتمشى جوة الجزمة الاوللللل :D

مدام سلوى ... كل وصفات تدرس فى اكادميات الطبخ يا ست الكل :blink:

اخوانى الاعزاء .. المرة الجاية ان شاء الله نلقاكم بوةصفة جديدة ..لحسن انا تعبت خالص

(بقالى بتاع اسبوع ما رغتش كدة :blink: )

[hamiss]

مساء الخير .. :blink:

شكرا اوشا على ترحيبك .. :blink:

طبعا شاعر الرومانسية هو انا هاميس اللى تعرفها من زمااااااااااااااااااااااااااااان

وجبنا درافها ؟؟!! هههههههههههههه :angry2:

انا دايما بشوفك هنا وباخد بالى من اكلكم الجميل انت وطبعا الغائب الحاضر ديما الشيف بودا العزيز صاحب الاكلات الجنان علشان تبقى من السُمان .. :rolleyes:

وارجو ان تكتب لنا تخصصك فى الاكلات الصحية لانها تهمنى جداأأأأ :sad:

شكرا على ترحيبك شاعر الرومانسية ومنتظرين اكلات جديدة مع انتظار الشيف بودا ووصوله بالسلامة وكمان الشيفات فولانة واوشا وسلوى وريهام .. mfb:

سلام :blink:

[Osha]

ريهام

مين قال يا روحي اني باعزمك في مصر والا حتى كان في السعودية

وبعدين انا باقولها ومش باخاف

ياجماعة الخير انا غالبا باعيش عالة على ريهام

بصراحة المكرونة بشاميل بتاعتها رهيبة خاصةوهي مرتبة كل مكروناية ورا التانية وبتخليهم كمان يقولوا القسم ويحيوا العلم :blink:

والمحشي بتاعها تحفة

الكشري زي العسل

وبعدين فيه اختراع كانت بتعمله ليا مخصوص ودلوقت بتاكل نصيبي ونصيبها سوا

والاختراع دا سميناه بسكوتينج وخلوها تقول عليه وكل ما تاكلوه افتكروا اعز اصدقاء ان شاء الله يديم ربنا عليهم الحب والمودة

اختنا هاميس التي لم تعد بعد عند الفجر

ياستي عاوزين ابتكارات من ايام اخوك اخيتاتون وعمك آمون (انا باقول شجرة العائلة طبقا لفيلم عروس النيل يعني )

وبعدين ما انت طلعت مصلحة قديمة مع حسن يعني اكيد ليك في كار المطبخ من زمان

بس قبل كل حاجة

ياريت تيجي تساعدي في العزال معايا

حسن

بودا يا سيدي بعد اليابان حيروح يتفسح مش عارف فين كده

ربنا يسعده ويهنيه وبعدين كل دا في الآخر لينا يا ولاد

يعني عمنا لما يرجع بالسلامة مبسوط اكيد حيقولنا كام وصفة تمام شداد من هناك

المشكلة اللي انا خايفة منها انه يكون نساهم الأكل الياباني وقلب المؤتمر طبيخ وعلمهم مصري

دي يبقى اسمها هجرة العقول الى الخارج :rolleyes:

فولانة

أين أنت أيتها الغاطسة في أعماق المطبخ تعزمين الغير ?

أظن محدش رغى زيي النهارده :angry2:

[Folana]

السلام عليكم ورحمة الله .....

شاعر الرومانسية ..حمدلله على السلامة ويارب الظروف تكون احسن دلوقت ..بندعيلك والله وماتحرمناش من وجودك....

اوشا الاشأوشة ....صدقينى ولا لك على حلفان الميكروباظ باظ ..ومن ساعتها وانا مستنية غيره ..بولوبيف ..بولوبيف ...(يعنى صدقنى بلغة اللمبى) :)

....بس انا جاية ..اصبرى ...

انا ياجماعة خلاص تبت الى الله وندمت على مافعلت ..يعنى مش بأعزم حد ..انتهينا ..من ساعة ماردوا لى العزومة بفول وطععمية وانا اتعلمت الادب خلاص ...كل الحكاية ان عندى شجرة باباز ماتت ..اهىء اهىء ...من فترة كده ..وكنت بأجرى على اوراق المعاش ..وانتم عارفين الحكومة بقى ...بس نقول ايه ربونا موجووووود (وش زكى رستم)

بودا..............طبعا ياسيدى فسح ومؤتمرات وما خفى كان افظع ..ومن لقى الكابوكى نسى اصحابه ...بس كله حيتسجل وحنحاسبك حساب عسير لما ترجع وانت مش جايب لنا معاك اى حاجة ...المطبخ مالوش طعم من غيرك تحس انه ناقصه توابل ومبشور زنجبيل ...........

لكم عندى وصفة هايلة انتظروهاااااااااااااا

نهاركم جميل ....

تم تعديل 7 ديسمبر 2005 بواسطة folana