اطلب اى وصفه على بالك .. تلاقيها قدامك

[shawshank]

الأخوة الأفاضل شاعر الرومانسية ، bodda ، و folana

أشكركم جدا جدا على الوصفة البسيطة للأرز

عملته مرة سادة و مرة بالبسلة و طلع ممتاز الحمد لله

هذه ملاحظاتي على التجربة:

- لو الميه أد الرز ، الميه بتنشف بسرعة قبل ما يستوي (هتقولوا بعلي النار عليه ، لأ ... النار على أقل حاجة). أنا حطيت كوباية و نص ميه لكل كوباية رز و طلع كويس الحمد لله. و في المرة التانية حطيت كوبايتين و طلع أكوس :) ... أنا بستخدم الرز بتاع هنا.

- مبعرفش أعاير البسلة عشان بتكون مجمدة :D

- لو عايز احط بصل ، احطه امتا و ازاي ؟ أنا بحط ملح و فلفل بس.

- لو الكمية كبيرة (عايز أعمل عزومة ذي folana :D ) ، هل أزود السمن و الزيت ؟

إن شاء الله ناوي أجرب الرزة و رزة ... موجود في صفحة قبل كده ... ناوي أفضي نفسي يوم عشان أدور عليها :D

[Folana]

السلام عليكم ورحمة الله .....

اخى الفاضل شواشنك....(اسمك بدأ يعمل مشاكل فى المنتدى خلى بالك احسن تتخطف)....

الحمدلله اننا اطمئنينا على الرز ده انا كنت نسيت والله ....على العموم كل حاجة فى الاكل بتتظبط بالتجربة اكتر من الوصف والمقادير ....

انا الحقيقة زى ماانتم عرفتم عنى فهمى تقيل حبتين ..ومش عارفة يعنى تقصد ايه بموضوع البصل على الرز ...يعنى رز سمك؟..ولا عايز تحط بصل على البسلة وانت بتعمل الرز ولا ايه المطلوب بالظبط؟؟؟ :)

- الرز بتاع هنا ده اللى هو البسمتى يعنى او انكل سام؟...هو عموما بياخد ميه اكتر شوية من الرز العادى ..

- البسلة المتجمدة اخبطها جامد بالبونيه وهى فى الكيس تقوم تتقسم معاك وخد منها اللى انت عايزه

-شوف ياشواشنك انا باعتبرك زى اخويا الصغير وبانصحك ..ابعد عن سكة العزايم ياضنايا دى سكة واعرة وحتلاقى الناس طلعوا عليك من كل حدب وصوب ...لكن ان كان ولا بد علشان انا عارفة ان ماحدش بيسمع كلام اللى اكبر منه ...فطبعا كمية السمن او الزيت حتزوده شوية حسب كمية الرز ....

الرزة رزة بقى ...زى طريقة الرز العادى بس بتاخد شوية رز تحمرهم فى السمن الاول وبعدين تكمل الطريقة العادية بعد ماتضيف الرز الابيض ...

ايه رأيك لو تجرب الارز بالبشمايل ؟؟؟ مادام طالبة رز كده ...هه..موافق ؟...ايوه؟..طب خد الوصفة ....

الارز بالبشاميل

حتجيب كوباية رز من بتاع هنا مستوية :D ....وكمان نص كيس بسلة او ممكن الكيس كله لو حجم الكيس صغير زى هنا يعنى ...جزرتين لونهم اصفر كنارى ....

حتقشر الجزر وتقطعه مكعبات وتاخده غلوة على النار مع البسلة ..وتصفيهم من الميه وبعدين تقلب الرز المستوى على البسله والجزر ..وتضيف رشة فلفل اسود مطحون وتظبط الطعم ..ممكن كمان تخرط فلفل رومى مكعبات صغيرة عليه (اختيارى )....

تجهز بقى البشاميل ...يعنى تحمر ملعقتين دقيق فى السمن لحد اللون مايصفر وبعدين تضيف عليه كوباية ونص لبن وتفضل تقلب كويس علشان مايكلكعش ولو علكع ماتخافش ...ابقى اديله ضربة فى الخلاط وهو يتعدل ...خلاص كده ..قلنا حتفضل تقلب لحد القوام مايبقى سميك وتشيله من على النار وتظبط الطعم بالملح والفلفل ..ولما يبرد البشاميل اكسر فيه بيضاية وقلب كويس ..بس اما يبرد احسن البيضة تتقلى جواه:D

خد بقى شوية من البشاميل ده وقلبهم على الرز والبسلة والجزر ...وبعدين حط الخلطة دى فى صينية فرن ولو كان قالب زى بتاع الكيك المستطيل ده يبقى جميل ...

سوى الخليط وبعدين ضيف باقى البشاميل وساويه كويس على السطح وهات صفار بيضيتن ربهم وساويهم على البشاميل ...ولو عندك بقسماط مطحون بتاع البانيه ده ابقى رش على الوش رشة خفيفة ودخل الفرن ...لحد الوش مايحمر وخلاص على كده ..وقولى طعمه ايه علشان انا مااعرفش وباجرب فيكم الحقيقة :D

ممكن تعمل الطريقة دى لو عندك رز بايت يعنى بدل ماترميه واهى تبقى اكلة جديدة وممكن تضيف برضه عليه لحمة مفرومة معصجة ...وبالهنا والشفا

ملحوظة ..الرزة ورزة مكتوبة فى صفحة رقم اتنين (2)

ملحوظة كمان...الاخ النسر المصرى...انت فين وفين وصفاتك المتينة ..كنت عايزة اسأل برضه فى موضوع المنسف لانى لسه مش مرتاحة ...مادام الرقاق عجن منى ..هل ممكن استعمل البتَاو ..العيش الفلاحى يعنى ..تعرفه؟

[shawshank]

السلام عليكم ورحمة الله .....

..ومش عارفة يعنى تقصد ايه بموضوع البصل على الرز ...يعنى رز سمك؟..ولا عايز تحط بصل على البسلة وانت بتعمل الرز ولا ايه المطلوب بالظبط؟؟؟ :)

<{POST_SNAPBACK}>

و عليكم السلام و رحمة الله و بركاته

أنا لو أعرف أقوووووووووووووول

أنا مش عارف ... اهو أكيد فيه رز ببصل ... سميه بأه رز سمك ... رز حوت ... مش مهم

برضه مش عارف ... المفروض احط البصل على ايه و امتا ؟ :D

أنا جربت الرز بتاع هنا اللي مش بسمتي ... مكسل أروح أشتري بسمتي ... بس هجربه إن شاء الله.

الرز بالبشاميل هجربه إن شاء الله قريب ... بس ده محتاج قعدة طويلة و طباعة و بتاع :D (أنا طبعت وصفة الرز و حطيتها قدامي في المطبخ و اشتغلت منها :D )

متشكر جدا على صفحة 2 :D

و كمان أنا اسمي شاوشانك ، مش شواشنك ... فيه فرق كبير جدا :D

[hamiss]

صباح الخير فى الفجر.. :wub:

الاخت اوشا اشكرك مرة اخرى على ترحيبك لى وفعلا انا من زمااااااااااان اعرف شاعر الرومانسية والشيف بودا واصدقاء كتير اخرين لكن لاسباب خارجة عن ارادتنا اتفرقنا ودارت الايام ومرت الايام مابين هنا وخصام ...ايه دة انا دخلت كدة على اسطوانة ام كلثوم ..!! :o

معلش المهم بعد التدقيق والتساؤلات عرفت هُمَ هربوا فين قصدى حطوا مرساهم فين ..

وعلى فكرة الشيف بودا يعتبر اكبر شيفات النت , ده بعد الانتخابات الشيفية على النت وكان تاليه الشيف شاعر الرومانسية يعنى يعرفوا الكُفت على رأى المثل غير انهم اصدقاء حقا ولهم مناغاشات طيبة فى ردودهم وطبعا هذا واضح هنا .. :D

بالنسبة بقة للعزال انا موجودة اهوه بس انتى قشرى طبعا قشرى على تأشيرة اجيلك بيها

وبعدها حتلاقى العزال ده حصل من غير ماتحسى .. :blush:

اما الشيفة فولانة فمعلش شجرة الباباز مع انى عمرى ماأكلته ولا اعرف طعمه ايه بس كل اللى اعرفه انه فاكهه ..المهم ربنا يعوض عليكى بشجرة باباز تانية او حتى ماماز .. :blink:

وسلام لكل اهل الدار :wub:

[hamiss]

معلش ياجماعة انا رجعت على طول تانى قبل الفجر ماييجى وماظهرش تانى .. وقبل ظهور الشيف بودا لان كدة خلص الوقت والمفروض هوه على وصول انشاء الله ..

نسيت أرد على شاوشانك مع الاحتفاظ بالالقاب على الرز بالبصل او بمعنى آخر

أرز السمك ..

حنخلى المعيار عندنا كوب واحد ارز مصرى وبعد كدة تزود على حسب عدد الضيوف ..

وكوباية وربع ماء مغلى ..

ونجيب بصله كبيرة مبشورة بس مش ناعم اوى ..

وكمان واحدة طماطم (إما تعصرها بالخلاط او تبشرها بالمبشرة بتاعة البصل لغاية جلدة الطماطم وترمى الجلدة وعلى الفكرة الطريقة الاخيرة احسن واحلى فى الطعم )..

تجيب نصف فلفلاية خضرا وتقطعها قطع صغيرة ..

شوية زيت ذرة أد ربع كوباية كدة وليس عباد الشمس لان الاخير للتحمير فقط وليس للطبخ العادى ..

ملح وفلفل اسود ناعم ..

الطريقة بقة ..

نحط الزيت فى حلة ونسخنه كويس شوية وبعدها نحط مبشور البصل ونقلب كويس لغاية مايحمر البصل ويصبح لونه بنى وليس ذهبياً ..

نضع قطع الفلفل الاخضر ونقلبه مع البصل كويس لغاية ماتحس ان الون الاخضر دبل وبعدها تحط عصير الطماطم او مبشور الطماطم وتقلب الخلطة دى مع بعض شوية كدة قد 3 دقايق وبعدين تحط الميه المغلية وتسبها تغلى شوية قليلة ..

ندلق الرز المغسول كويس ومتصفى منه الميه جامد على الخليط السابق اللى على النار ونقلب الجميع تقليبة كويسة ..

ونحط الملح والفلفل الاسود لحد ماتظبط طعم الميه اللى انت بتحبه ..

تسيب القصة دى كلها على النار لغاية لما الميه تتشرب ( بمعنى لاترى مياه على الارز واضحة) وتقوم موطى النار خالص لغاية مايستوى الرز ..

بعد السوا تحط الرز فى طبق التقديم وهو سُخن ...

ممكن تجمل الطبق بوضع جمبرى صغير الحجم ومقلى على وش الرز ..

وبالف هنا وشفا...

[Folana]

السلام عليكم ورحمة الله .................

الاخ الفاضل شـ....شـ شششـ..شوو...شوشوشوووو...شااا....شااا......الاخ الفاضل اللى انت قلت عليه ده ..:wub:

كده انا اطمئنيت عليك ..هم بيدوروا على شواشنك مش شاوشانك ........عموما انا مش عارفة معنى اى واحدة منهم (مايخالف)......بس ده حتى اسم سهل ويتحفظ بسرعة (وش حسن فايق)...ودى حاجات معروفة وبنقولها كتير ..اللى انا مش قادرة افهمه فعلا الرز بتاع هنا ...هنا فين ؟..ولا ده اسم ماركة الرز ؟؟؟ :blink: (احيانا كده باحس انى فهمى عايز ظبط ..وبقى فهمى نظمى لمعى)

الاخت العزيزة هاآآآآآآآآآآ.....ميس.....(كنت حاعطس بس)....تسلم ايدك على الرز بالبصل ...انا ممكن اضيف عليه كمان جزرة مبشورة ...

وياستى سعيكم مشكور وماحدش يجى لك فى بابازة وحشة ...هى الشجرة دى ياحرام بابازها ومامازها اتكلوا ..يعنى كانت مقطوعة من شجرة ...وماتت فى ريعان شبابها ومالحقتش اشوف ثمارها ..يالا بقى يعوض علينا ربنا .....

متهيالى مفروض بودا يكون رجع كده ولا ايه ؟؟؟عايزين نعرف بس علشان نلحق نطبخ له طبخة قبل مايجى ويلاقينا عواطلية ويخصم مننا ....

صباح الفل :blush:

[bodda]

سوكو هاما ياما ماسا يامو تو باكاكا تى با هى لا لا

يعنى وحشتونى

:blink:

ونفهم من كده انى ماطلعتش منهم ولا بكلمه توحد ربنا

لكن بصراحه الموضوع كبير اوى اوى

واللى على على ... وربنا يتولانا برحمته

:wub: :o :D

ماعلينا

المهم فعلا وحشنى المطبخ وروايحه الحلوه

بس راجع على زنقة شغل يعلم بيها ربنا

وواضح ان العزيزه هاميس شديده زى باقى الاصدقاء

وربنا يقدرنا ونصمد قدام هذا الهجوم الكاسح

:blush:

وبما انى متخصص سمك اساسا بحكم المنشأ والهوايه

فاهكتب لكم وصفة الصيادية الاصلية

بس بعد شويه كده لما افوق

:wub:

صباح الفل

:wub:

[shawshank]

متشكر جدا للأخت hamiss على وصفة الرز

folana

"بتاع هنا" دي ماركة معروفة جدا للرز هنــــــــــــا :blush:

أنا قصدي اللي بيتباع هنا ... مش فاكر طبعا اسمه ايه ... بس هشوف و أقول لك.

[Folana]

السلام عليكم ورحمة الله ............

انا سمعت صوت تخبيط فى الحلل قلت ده لازم بودا وصل ...حمدلله على السلامة ياكبير ..والله ياريس من غيرك كنا ضاربين لخمة خالص ...والطلبات كانت نازلة ترف وترف لحد مامتنا خلالاص من التعب ...

ياما ماسا ..دى ..يعنى مية مسا عارفينها وبنقولها كتير .....احنا حنسيبك تستريح بس شوية صغننة نونو ..وبعدين تحكى لنا بقى عملت ايه فى بلاد تركب الهوا ....ماهو مافيش هناك افيال ....

حمد لله على سلامة الوصول ....ونشوفك قريب ....

[hamiss]

مساء الخير ياأهل الدار... :wub:

حمد لله على السلامة شيفنا الكريم بودا ... :D

اخيرا وصلت بالسلامة اصلنا جوعنا اوى من غيرك ومافيش حد ظهر من وقت غيابك عشان يقلنا اى اكله حتى ولو كانت جبنة وبطيخ .. :blink:

لاشكر على واجب شوشانك .. ده انا قلت ماعجبتكش الوصفة واستسهلت وجبت رز السمك من عند السماك وريحت نفسك .. :o

شكرا فولانة على الإضافة بتاعتك بوضع جزر كمان فى رز السمك .. :blush:

وسلاااااااااااام :wub:

[bodda]

العزيزه فلانه هانم

العزيزه هاميس

الف شكر .. قولوا لا شكر على واجب

:blink:

المطبخ منور بيكم وبكل الاصدقاء الحاضرين والغايبين

نقول بقى الصيادية وأصلها وبعد كده نخش على الاكل الاسيوى

صيادية السمك

اساسها سمك طازه جدا جدا ... المتلج والمجمد ماينفعش

:blush:

اسمها كده لان اللى ابتدعها الصيادين فى المراكب

لانهم بيستعملوا فيها حله واحده لا غير !!

نحط فى الحله نص كوباية زيت ومعاه بصله صغيرة مبشوره

نحمر البصله لغاية اللون البنى الغامق قوى ( شبه محروقه )

يروح منزل الحله من على النار وياخد البصله بره فى طبق

بعد ما البصل يبرد هايبقى هش وناشف .. يدعكه بالمعلقه ويطحنه خالص

تلاقى عندك عجينة البصله بقت سوده :wub:

يرجعها الحله تانى ويحط مثلا 4 كوبايات ميه ومعلقة ملح

لما الميه تغلى يسقط فيها جزل السمك او سمك مقطع حسب حجمه

ياخد غلوتين عالنار حوالى 5 دقايق هايستوى

:D

يشيل السمك بره الحله فى الطبق ويحط الرز فى الشوربه بتاعته

بس طبعا يضبط الرز على قد الميه عادى او ينقص الميه شويه

ولما يستوى الرز يتقلب فى طبق كبير ويتحط على وشه السمك

وممكن نعصر عليه لمونتين حلوين

وبكده يبقى كل اللى استعملناه حله... وطبق ومعلقه نقلب بيها

:wub: :wub: :o

ومساء الفل

:D

[Osha]

ايييييييييه

مييييييييييين

ازاااااااااااااااااي

بودا شخصيا هنا يا مرحبا يا مرحبا

منور يا باشا وألف الحمد لله على السلامة

فولانة

حابعتلك بيجو 7 راكب تجيبي هاميس وريهام في ايديك ومش عاوزة زوغان

الوقت ضيق يا ولاد ومش عارفة اعمل ايه

انا بس ليا طريقة غريبة شوية في عيار مية الرز

بعد ما باحط الرز المية لازم تكون علو عقلة الصباع فوق الرز

الطريقة دي لقيت انها اضمن واضبط طريقة على الاطلاق لضبط العيار بتاع الرز

ياريت اكون اضفت حاجة وماتكونش المعلومة قديمة

بودا

بوداااااااا فين السوشي والواسابي

[شاعرالرومانسية]

شاوشنك.... حمدالله على السلامة بعد رحلة عمل الارز

اظن بعد الوصفات بتاعة اخوانا هنا...وكدة انت عملت كتاب للأرز وعمايلة :D

وعلى فكرة مش لازم البصلة تتحط للأرز السمك بس .. انا ببشر بصلة واحمرها واحط عليها الجزرة المبشورة والبسلة وتقلبتين ثم الارز وتقلبتين ثم المياة والتوابل

هاميس .. تسلم ايدك على الارز و....

نلتقى عند الفجر دائما :D

فولانة .. ارز بالباشميل ..... سعت عنه كتير بس ماجربتوش

زكل اللى وصفهولى ... مجربوهوش برضة :D

بودااااااااااااااااااااااا ... حمدالله على السلامة ياريس ونورت مطبخك :)

فين هدايا اليابان اللى كنت مواصيك عليها .. العربية التويوتا بتاعتى والمتسوبيشى بتاعة الاولاد :blink:

و.... الحتة السوزكى ;)

عموما لما تريح وتفضلنا نبقى نتكلم...

يصوا ياجماعة ... انا مش بحب السبانج خالص ... بس مش عارف لية طلعت فى دماغى اكلها

فعاوز مااندمش على التجربة .. وعاوز طريقة من الاخر :D

[bodda]

منوره اوشا هانم

وممكن ورا البيجو اجيب حسن والرجاله فى نص نقل ونيجى برضه

ربنا معاكوا :)

تسلم يا بو على والمطبخ منور بيك وباهل الدار

فيه طريقة للسبانخ هاتعجبك

سبانخ بالجلاش

هاتجيب من الراجل كيلو سبانخ و بربع جنيه خضرة

تغسلهم كويس ثم تخريط رفيع اوى

تشوح بصله مفريه للون الذهبى

و تحط السبانخ والخضره مع التقليب السريع 5 دقايق

وتحط الملح ومكعب ماجى ومبشور نص جوزة طيب وتقفل الحله

وتسيب السبانخ تنزل ميتها منها فيها مع التقليب من وقت لاخر

هاتاخد بالكتير ربع ساعه وتكون استوت

تنزلها من على النار وتفتح الحله وتسيبها

تجيب لحم مسلوق او صدور فراخ مستويه وتقطعها حتت صغيرة

وتحطها وتقلبها مع السبانخ

تجيب جلاش طرى ( زى الزهار مثلا ) :blink:

ونجيب صينية فرن مش كبيره يعنى 20 - 25 سم ندهنها سمن

وتفرد الجلاش فيها بحيث اطرافه تكون بره

يعنى نص الجلاشه فى الصينية ونصها التانى بره من ناحية واحده

وندهنها سمن ونحط الجلاشة التانية فى اتجاه اخر مع دهن السمن

وهكذا حوالى 8 جلاشات

ونصفى السبانخ واللحم من باقى السائل

ونقلبها مع حوالى نص كوباية باشاميل عادىوندلقها جوه الجلاش فى الصينية

ونلم اطراف الجلاش تانى واحده واحده لقفل الصينية باحكام

وندهن الوش بالسمن :D

واحدفها عالفرن الحامى حوالى 10 - 15 دقيقة لغاية احمرار الجلاش

نطلعها ونسيبها تبرد شويه ونقلبها بحرص فى سيرفيس التقديم

وبالف هنا وشفا

صباح الفل

:D

[bodda]

معلش اسماء الوصفات ضاعت فى الزهايمر

لكن هاسميها باسماء مصرية تدل عليها

الصوص الاخضر للسمك

حزمة كرفس محترمة تسلق مع ورق بصل اخضر وملح فى اقل ميه ممكنه

نضربها بميتها فى الخلاط مع 3 فصوص توم ومعلقة مستردة

و معلقتين خل ومعلقتين صويا صوص

وتتصفى فى مصفاه سلك واسعه شويه

وده صوص بيكون سائل لحد ما :D

ومنه نفسه ممكن نرجعه بعد التصفيه فى حله على نار هادية

ونجيب كوباية نصها ميه بارده من تصفية الكرفس وعليها معلقتين نشا

وندوب النشا بالتقليب كويس ونصبها على الصوص الساخن عالنار مع التقليب

بيدى تخانه للصوص ونزودها للدرجة المطلوبه بزيادة النشا

ولو عايزينه حامى نستعمل شطة خضرا حامية تنضرب مع الكرفس فى المرحله الاولى

يعنى لا تستعمل الشطة الحمرا

ويبرد ويقدم مع أى حاجه طالعه من البحر ماعدا البيكينى

:)

كله اخضر فى اخضر

:blink:

وصباح الفل

:D

[Folana]

السلام عليكم ورحمة الله...............

الاخ العزيز شاعر الرومانسية ....بالنسبة للرز بالبشاميل ..انا جربته طبعا ...لانى لازم اجرب اى وصفة عرفتها انشالله لمرة واحدة فى الحياة ...وكنت اكلته مرة زمان وانا صغيرة قول من تمانين سنة كده ..وكان جديد بالنسبة لى وعجبنى ...بس الست اللى عملته كانت راقية بمعنى انها كانت عاملة طبقة رز وبعدين البسلة والجزر فى النص وبعدين طبقة رز تانية ...

انا لما ربنا فرجها على واتجوزت :D ..جربته بس قلبت كله على بعضه ..والله طعمه ظريف واكلة جديدة بس انا بقى مش من هواة اكل الرز ومادام حاعمل بشمايل يبقى ممكن اى حاجة تانية ...جربه وعلى ضمانتى ...

بالنسبة للسبانخ ....هى طبعا بتتعمل باللحمة بس انا مرة جربتها بالعكاوى كانت رائعة ...لو بتحب العكاوى اعملها بها ...بتديها طعم مسكر جميل ...

انت حتجيب عكاوى ...طبعا الكميات بقى اللى انت عايزاها ..وحتشطفها كويس وبعدين حتجيب بصلة كبيرة او اتنين تبشرهم وتحطهم يصفروا على النار بس مجرد مالونهم يفتح بسيط تروح ضايف العكاوى او اللحمة وتقلب شوية لحد مامية اللحمة تنشف وبعدين تضيف عصير الطماطم ..وتسيب الامور دى تستوى ..حتلاقى الطماطم اتسبكت قبل مااللحمة تستوى حتزود شوية مية ..ولما اللحمة او العكاوى تبدا تستوى حتضيف حمص طبيخ واللى انت كنت غاسله وناقعه شوية .. واثناء ما اللحمة تستوى ...تيجى انت على حزمة سبانخ او اتنين ..تنضفها كويس ..وتشيل الجدر بس مش كله يعنى سيب الجزر الاحمر فى الجدر لانه برضه بيدى طعم جميل ومسكر ...ابدا بقى خرط السبانخ دى فى طبق غويط كبير ...واغمرها بالمية وافضل خبط بايدك عليها علشان الرمل اللى فيها ينزل ...وبعد كده انشلها بايدك من المية والطريقة دى علشان تسيب الرمل والطين فى قاع الطبق الغويط ..وكرر العملية ..لحد ماتنضف ...وسيبها بقى تتصفى شوية لحد ماللحمة تستوى ...حترجع تانى للحلة اللى على النار وتبلها بالملح والفلفل وشوية بهار صفننة نونو ...وممكن تضيف قالب ماجى برضه مش حيخسر بس خلى بالك من الملح وانت سيد العارفين :D

لما اللحمة تستوى والطماطم تتسبك حتضيف السبانخ ..بس من غير مية لانها بتنزل مية كتير .(وطبعا حتزود المية لو محتاج )..ووطى على النار وخلى الحلة مكشوفة علشان اللون الاخضر مايبهتش ...

لما السبانخ بقى تدخل فى السوا وده مش بياخد وقت ...خرط عليهاحزمة شبت مع ربع حزمة كسبرة خضرا ....

غلوتين واطفى النار ...تعالى بقى للتقلية ...حتبشر بصلة كبيرة وتحمرها فى سمن تصفر بس ....وبعدين تضيف عليها التوم المدقوق مع شوية كسبرة ناشفة مع باقى حزمة الكسبرة الخضرا المفرومة برضه ...وقلب على النار لما الخليط ده يصفر ..خد جزء منه وضيفه على الحلة وبعد كده كمل تحمير التقلية ..زى الملوخية كده ..وبعدين ضيفها على السبانخ وغطى الحلة ...فهمت حاجة ؟؟؟؟؟؟؟؟؟؟؟؟ :blink:

انا علمت لك على المقادير علشان ماتهوش فى موضوع الانشا اللى كتبته ...

وفيه كمان سبانخ بالبشاميل ..حاكتب لك طريقتها بعد شوية احسن تعبت :D

صباحكم جميل ....... :)

[شاعرالرومانسية]

والله ياجماعة الاختراع اللى اسمة سبانخ دة طلع مش بطال...

انا كنت محرج على الاولاد يدخلوة البيت ... بس وصفة اختنا العزيزة فولانة شجعتنى ( اصل طول ما التوم موجود انا مابقلقش خااااااالص :rolleyes: )

اناجيت وقلتلهم مش نفسكوا فى السبانخ حهريكوا سبانخ بعد كدة عمكوا بودا وعمتكوا فولانة ادونا وصفتين عجب وابدتيت و جربت طريقة فولانة وطلعت - كالمعتاد - ملهاش حل تقريبا الحلة خلصت من اول اكلة

المرة الجاية ان شاء الله نديها جلاش بالسبانخ حسب طريقة عزيزنا بودازاكى

(اية الحكاية يا فولانة ... انتى تعبتى من الشرح والا اية !!!!فين السبانخ بالبشاميل ...عاوزين نكمل كتالوج السبانخ...)

[hamiss]

مساء الخير ياأهل الدار .. :wub:

تسلم ايدك بودا على الجلاش بالسبانخ وطبعا على الصيادية بس انا مش بحبها.. :sad:

والصوص الاخضر شكله كدة حلو ممكن يتعمل .. حنبقى نجربه .. :rolleyes:

تسلم ايدك فولانة على السبانخ بالعكاوى .. ;)

يوم الخميس اتعشيت برة وكان فيه سلطة الجمبرى والحقيقة كانت ممتازة ومش عارفة اذا كانت اتكتبت قبل كدة ولا لاءة بس حبيت تشاركونى فى اكلها .. :blush:

سلطة الجمبرى ..

نص كيلو جمبرى صغير الحجم..

خساية متقطعة صغير و جزاراية مبشورة ومعلقتين مايونيز و ومعلقتين كمان كتشب ومعلقة عصير برتقال..

الطريقة سهلة جداً..

نجيب الجمبرى ويتغسل كويس اوى وماتنسوش تشيلوا الخط الاسود الموجود فى الضهر وننقعه فى خل ودقيق وبعدين نشطفه ونسلقه فى ميه ..

نجيب الخساية المتقطعة حتت صغيرة ونحط عليها الجزر المبشور ونتبلهم بالملح والفلفل ..

نحط الكاتشب والمايونيز وعصير البرتقال ونقلبهم كويس اوى .. وبعدين ندلقهم على الخلطة السابقة ويتقلب كويس (كل ده على البارد طبعا يعنى فى طبق عادى )

وبعدين ندلق الجمبرى على المجموعة اللى فاتت ونقلبهم كويس..

نفرغ السلطة فى كاسات صغيرة او طبق واحد وممكن نجمل الاطباق بقطع صغيرة من قلب الخساية ..

وبالهنا والشفا ويارب تعجبكم .. :wub:

[bodda]

اولا العكاوى دى ملكة اى طواجن

سبانخ ..بامية ... بطاطس... اى خضار

:blush:

تسلم ايدك فلانة هانم

اما عمنا ابو على بالهنا والشفا اى سبانخ

بس نصيحه ماتكترش منها اوى

لانها تقيله فى الهضم شويه و تزود اليوريك اسيد والام المفاصل

للى عنده حاجه منهم :sad:

ووصفة السبانخ بالجلاش فيها بشماميل لتماسكها عند التقديم

ومستنيين وصفتها التانية بالباشاميل من فلانه

:rolleyes:

والعزيزه هاميس

طبعا وصفة سلطة الجمبرى هايله

وتتعمل بكذا طريقة

متهيألى كنت كتبت واحده منهم قبل كده للجمبرى بالخضروات والمايونيز

بس دى جديده بالكاتشب وعصير البرتقال

تسلم ايدك

واللى يتعشى لوحده ............... يشبع

:wub: :wub: ;)

صباح الفل

:wub:

[شاعرالرومانسية]

جميلة سلطة الجمبرى يا هاميس تسلم ايدك... ايوة كدة كترى من وصفاتك الشهية اللى تفتح تانفس دى :blush:

ماشى يا كبير الشيفات ... بلاش نكتر مها بدل ما نرجع نعيط :rolleyes:

بمناسبة بقى الاكلات المحتوية على الحديد اية رايكوا فى القرنبيط

انا عارف ان كتير مش بيحجبوا و0 زى كدة زمان ..)

بس حقولكوا وصفة هايلة جميلة ومحببة للأطفال جدا

القرنبيط بالفيجيتار

طبعا نسلق القرنبيط بعد ما نقطعة اجزاء ونسلقة فى ماء وملح لحد ما يستوى

الخلطه( ودى المهمة...)

نجيب فصين من الثوم ومعلقه كمون ومعلقه ملح وو حزمه من الشبت المفروم ناعم

ونحط 3بيضات ومعلقه من الفجيتار الحار

ونحمر قطع القرنبيط (بعد وضعه في الخلطة ) علي نارهادئه ونطلعه على بقدونس مفروم وعلى الوش كمان

ونكلة وهو سخن او لما يبرد

وبالهنا والشفا،،،