اطلب اى وصفه على بالك .. تلاقيها قدامك

[Folana]

السلام عليكم ورحمة الله ......

هاميس...تسلم ايديك ...طريقة جميلة اكيد ..وخصوصا ان عصير البرتقال بيديها طعم جميل ....

شاعر الرومانسية ....اتأخرت عليك فى السبانخ..سامحنى والله طول اليوم بره ورجعت نمت نوم عميق ولسه صاحية اهو حالا على المطبخ ...حاكتبها لك بس لو لقيتنى عاكسة الحروف ابقى رتب انت البازل وحاول تفهم.. علشان انا مش شايفة اصلا ....

تسلم ايديك على القرنبيط ..انا احيانا باعمله كده بالبقسماط يعنى مش لازم فيجيتار بس لما الخلطة بتخلص منى باكملها ببقسماط ....بس من غير خلطة ...حاجربه بالطريقة بتاعتك...

ايه ده انا لسه ماكتبتش الوصفة؟...طب حالا اهو ...

السبانخ بالبشاميل ....زيها زى اى حاجة فى الدنيا بالبشمايل ...يعنى محتاج لحمة مفرومة معصجة ومش حاكتب الطريقة تانى لانها قتلت بحثا ووصفا هنا ....ومحتاج بشاميل..انت طبعا عارفه واوشا كمان كانت كاتبة وصفته قريب ...

ومحتاج سبانخ بس كتير شوية يعنى اتنين كيلو مثلا ..ليه بقى لانها بتقل جدا لما بتستوى ...

ومحتاج بصلتين مقطعين شرائح رفيعة وممكن تستغنى عنهم ..

حتغسل السبانخ بالطريقة اللى علمتها لك :blush:...وبعدين ترفعها على النار مع شوية مية صغننة بس مش نونو ...وتضيف عليها ذرة ملح ...حتاخد غلوتين كده من خمس لعشر دقايق وبعدين تصفيها .....

هات بقى البصل وحمره فى ملعقتين سمن لحد مايصفر وضيف عليه السبانخ والتوابل ..ملح وفلفل وبهار واللى تحبه بقى من التوابل ...تقلبتين بس وتشيله من على النار ...

هات طبق الفرن وادهنه بالسمن ورش بقسماط مطحون .....وخد نص مقدار السبانخ قلب عليه شوية بشاميل وبعدين حطه فى طبق الفرن ...ثم اللحم المعصج ثم باقى المقدار ...وغطى الوش بالبشاميل وصفار البيض وشوية بقسماط مطحون وادلق على الفرن عدل ....ممكن بقى تضيف على صفار البيض وانت بتربه شوية سمن او زيت صغيرة وبعدين تدهن الوش ..وتستغنى عن البقسماط ...السمن ده بيخلى الوش يحمر بطريقة جميلة .....

بسيطة خالص مش كده ؟.....وتعمل جنبه شوية رز من بتاع هنا ....ولو مش عارف ايه هو الرز بتاع هنا اسال الاخ الفاضل شاوشانك....

مع السلاموعليكوا.......... :rolleyes:

[hamiss]

أهلا شاعر الرومانسية .. :wub:

اشكرك على ردك والحمد لله انها عجبتك وبصراحة السلطة دى سهلة جدا وقيمة فى شكلها وقيمتها الغذائية.. ;)

اشكرك بودا على مرورك .. :wub:

معايا كمان شيش طاووك للسمك والجمبرى ... :blush:

نص كيلو سمك فيلية ونص كيلو جمبرى ونص كيلو طماطم وتقريبا 3 بصلات

ونص كيلو فلفل مختلف الالوان (اصفر واخضر واحمر ) وطبعا ممكن يكونوا كلهم الفلفل الاخضر ولكن الالوان دى عشان الشكل الجمالى ..

تقريبا 5 فصوص توم مدقوقين مع شويه كمون..

نيجى للطريقة وهيه برضه سهلة جدا ً .. :rolleyes:

طبعا حنغسل السمك كويس ونقطعه قطع متوسطة ونتبله بالملح والتوم المدقوق ..

نغسل الجمبرى هوه كمان كويس ونقشره من الراس فقط يعنى نترك الذيل وطبعا بنشيل الخط الاسود اللى فى الضهر وبعد كدة نغسله بالخل والدقيق

نقطع الطماطم والبصل والفلفل قطع صغيرة ..

نجيب اسياخ خشب ودى موجودة فى اى سوبر ماركت زى مترو مثلاً .. وكل سيخ نحط فيه واحدة جمبرى ثم قطعة بصل ثم قطعة فلفل ثم قطعة طماطم ..

ونعمل القصة دى فى كل الاسياخ لحد مايخلص الجمبرى والسمك..

نشوى بعد كدة الاسياخ على شواية كهربا لو ممكن نحط الاسياخ فى صينية وندخلها الفرن ونفتح شواية الفرن مع التقليب المستمر فى الاسياخ ..

بعد مايستوى السمك والجمبرى نخليهم فى الاسياخ ويكون دى طريقة التقديم لكل طبق وهو وضع الاساخ زى ماهيه ..وطبعا لازم يقدم ساخن مع سلطة خضراء...

وبالف هنا وشفا .. :sad:

تم تعديل 10 ديسمبر 2005 بواسطة hamiss

[bodda]

اللهم كتر من اسماكنا وجمبرينا وكابوريتنا

قادر يا كريم

ايوه كده خشوا عالفوسفور اللذيذ

وياسلام عليه جنب قرنبيط ابو على المشطشط الجميل

الله ينور يا اهل الدار

صباح الفل

:blink:

[hamiss]

مساء الخير ياأهل الدار .. :)

اشكرك فولانة على مرورك فى سلطة الجمبرى بس ياترى رايك ايه فى الشيش طاووك يارب يعجبك لانى مجرباه وطعمه حلو جداً .. :blink:

شكرا بودا على مرورك ويارب الاكلات تعجبك يا شيفنا الهمام ..

اين انت شاعر الرومانسية ؟؟؟ mfb:

عندى انهاردة اكله جميله بس انا بعتبرها للعشاء اكتر منها للغدا وهى ..

رنجة بالصلصة...

نجيب 3 رنجات وربع كيلو طماطم وزيت ذرة ولمون وخس نجمل بيه الطبق ..

الطريقة ..

نقشر الرنجة باى طريقة اما ادخالها فى مايه سخنة جدا وحنلاقى القشرة اتفتحت ونشيلها وإما اننا نمسك الرنجة باليد على النار ونحركها على النار لغايه ماالقشرة تتفتح ونقشرها ...

حنبشر الطماطم على مبشرة البصل لغاية الجلدة ونرمى الجلدة ونجيب طاسة وندلق فيها مبشور الطماطم وعلى نار هادية مع الزيت حتى يغلوا...

بعد ماقشرنا الرنجة ننضفها ونخليها ونقطعها قطع صغيرة ونحطها على الطماطم اللى على النار ونسيبها تغلى لغاية مايتسبك كله مع بعض...

نحط الرنجة بالصلصة فى طبق ونجمل الطبق بقلب الخس ونقدم مع الرنجة سلطة طحينة

وبالهنا والشفا :D

[Folana]

السلام عليكم ورحمة الله ....

تسلم ايدك ياهاميس كل وصفاتك هايلة باين عليك استاذ ورئيس قسم التغذية ....انا بس كنت عايزة اسال عن حاجة ...انت قلت اننا حنقشر راس الجمبرى بس ...ده معناه اننا حنسيب القشرة الى على جسمه هى والديل ..ولا حنسيب الديل بس ...متهيالى الديل بس مش كده؟

[bodda]

سمك مشوى بالملح

دى طريقة الشوى الاسيوية بدل الرده المستعمله هنا

وبينتج عنها سمكه لونها بنى غامق وليس اسود

الحاجه التانيه تصلب الملح مع القشره بعد الشوى بيسهل التقشير

والطريقة ببساطة

هى فتح بطن السمكه من ناحية نهايتها فقط ... يعنى فتحه حوالى 2 سم

وليس كما نفعل بفتح البطن بالكامل

ويتم تنظيف البطن من هذة الفتحة سواء بعصر البطن أو باداه خاصة

ويوضع فى البطن اوراق البصل الاخضر أو الكرات

ويوضع فى الفم راس البصله أو الكراته

ثم بعد كده طبعا هاتروح عالشوايه العادية

أو على شبكة سلك عالفحم ... ودى احلى بكتير

ونقلب السمكه المبتله فى الملح ليغطيها بدل الرده

ويرص على الشبكة ....أو تتشوى عند الراجل عادى

وبعد الشوى تكون محضر صوص من توم مفروم مع ملح وعصير ليمون

ويتنقط بيه على السمكه بعد الشوى

وبالف هنا وشفا

مساء الفل

:blink:

تم تعديل 11 ديسمبر 2005 بواسطة bodda

[hamiss]

مساء الخير فولانة .. :D

مرسيى على كلماتك الجميلة وكلك زوق .. :P

معلش يمكن انا ماوضحتش اوى فى الطريقة ..

هو طبعا حنقشرها كلها ماعدا الذيل بس هو اللى يستنى عشان نمسك الجمبريايه من ذيلها وتاكلى باقى جسمها بالهنا والشفا ... :D

تسلم ايدك بودا على السمك المشوى بالملح وطبعا شكلها كدة طعمها يجنن زى البورى بس من غير مانفتح البطن .. :blink:

بس سؤالى بودا هو اى نوع من السمك ينفع بالطريقة دى ..؟؟ mfb:

إظاهر وصفات اليومين دول عن السمك وعلى رايك كله فوسفور .. يمكن ننور :)

[bodda]

العزيزه هاميس

الف شكر على المرور

وطبعا تنفع مع اسماك الشوى

زى البورى والبلطى والقاروص والمرجان مثلا

وشفتها مع الجمبرى الجامبو كمان

:blink:

مساء الفل

mfb:

[شاعرالرومانسية]

اية حكاية الفسفور ياولاد ... انتو ماصدقتوا والا اية :D

والا دة احتفالا ببودا اكمنوا راجع من عند شعب الفسفور كلة :P

تسلم ايدك يا هاميس على الرنجة المسبكة :D

بس على فكرة .. طريقة الشوى على النار ( والعهدة على الراوى .. اللى انا سمعته فى التليفزيون وكان طبية تغذية ) مضرة .. وبتركز الاملاح فى لحم الرنجة - على غير ماهو متعارف علية - وكمان بتنشط الميكروبات :)

الطريقة الاولى وهى استخدام الماء الساخن .. نصح بيها اخونا الطبيب وقال انها اصح واضمن

ربنا يستر علينا فى عاداتنا الغذائية :blink:

واستمرارا للفسفرة اللى ماشية فى المطبخ اليومين دول .. ولعدم الخروج عن منهج وميثاق مطبخنا العامر

اليكم وصفة رنجة .. انما حتعجبكم جدا .. وممكن نسميها سلطة رنجة

نجيب رنجة ونفصصها .. وبطاطس مسلوقة ونقطعها شرائح وحلقات جزر وحلقات فلفل رومى وشرائح بصل وزيت زيتون او ذرة وخل

نجيب شرائح الخضار ( البطاطس والجحزر والفلفل )ونخلطها بالزيت والخل ونفرشها بالتبادل مع شراح الرنجة الممزوجة بشرائح البصل طبقات حتى اخر طبقة من الخضار وذلك بعلبة ثلاجة ونرش على الوش باقى خليط الخل والزيت ونخليها ليلة فى التتبيلة وناكل منها تانى يوم ...

وعلى فكرة دى تعتبر وجبة فى حد ذاتها وممكن تهتبر سلطة بجانب اكل تانى ...

وربنا يسترها علينابعد كدة من كتر النوروالفسفور mfb:

[Osha]

الله يسامحكم كلكم

جايبين الوصفات دي كلها وانا بالم كل حاجة ومش فايقة اطبخ والا اعمل ايه حاجة

كسرتوا قلبي

بس حاشيلها لوقت عوزة طبعا

وعلى رأي واحد صاحبنا

سمك حبيبي سمك قلبي وسمك روحي

:blink:

واختنا هاميس طلعت شكلها اصلا كانت سمكة زمان

:blink:

اما فولانة فأثبتت انها طباخة بريمة

:D

بس الموضوع دا ليه ميزة يا ولاد

اني دايما بالاقي حاجة جديدة اخدها من اخوانا المحترفين زيكم

:blink:

انا بقى من يومين جبت شرائح سلمون واخترعت لها اختراع بس طلع جميل اوي

حطيتهافي صينية مدهونة زيت

وعليها شبت مفروم كم فوق واوراق بقدونس مجففة وشرائح ليمون وغطيتهم كلهم بشرائح بصل طبعا البهارات

وحطيتهم في الفرن

كان عاوزكم والله - سهل وبسيط جدا وجميل اوي

سؤالي الآن يا عمنا الكبير

السمك دا مكتوب على الكيس انه فيه اوميجا 3 - وانت لم تذكر السلمون فيما ذكرت - ولكن انا بعد ما اكلت نمت نوم عميق

فهل صحيح ان فيه المادة دي

اصل لو كده اروح اجيبه للعيال كل يوم - سهل وسريع ومغذي

ودمتم جميعا بخير

وطبعا انا في انتظار الجميع عشان المساعدة خاصة في السواقة دول 530 ميل يا ناس مش قليل

:D

حسام يرسل اليكم تحياته من سانت لويس وللأسف ماعندوش جهاز هناك عشان يشارك اللمة بتاعتنا

لما اسافر ان شاء الله يبقى له عودة

[bodda]

العزيز ابو على

العزيزه هاميس

والله عن نفسى بحب الرنجه كما هى

انما بشوف الناس بتحب الشوى ولاعلم لى بموضوع ضرر الشوى

الا اذا كان من باب حرق زيوت الرنجة المفيدة اصلا

انما وصفتك انت وهاميس لها كل التقدير ..و من الليمون العصير

:blink:

العزيزه اوشا

توصلوا بالف سلامه انشاء الله

وال500 ميل فى امريكا فركة كعب

:D

معلش علقة تفوت ولا واحده لابسة بوت

:blink:

اما بالنسبة للسالمون فطبعا من اهم افراد عائلة اوميجا 3 بتاعة اعادة الشباب

;) :blink: ;)

لكن لى تعليق بسيط على وصفتك السهلة اللذيذة

وهى عدم وضع شرائح الليمون اثناء الشوى فى الفرن

جربى تعصرى الليمون على الصينية عند خروجها من الفرن

لان شوى الليمون بيدى سنة مرارة ... الا اذا كانت مستحبة طبعا

mfb:

بس بلاش الغيبة الطويله دى ..اديكى شايفه الدنيا بتمطر سمك

وسلامى للعزيز الغالى حسام وتتجمعوا بسلامة انشاءالله

صباح الفل

:D

[hamiss]

مساء الخير يا اهل الدار .. :D

ازيك اوشا ومعلش هيه جت كدة وطرق الطبخ كترت فجأة وخصوصا السمك.. :D

اما حكاية انى اصلى سمكة زمان .. فده يمكن مش بقالى كتير فى الميه من ساعة مادلقونى فى النيل .. قصدى زقونى ونفسى اعرف مين اللى زقنى ده ؟؟ ;) :blink:

المهم انك تكونى بخير وتنقلى مكانك الجديد وانشاء الله تكونى سعيدة فيه وزى مابيقولوا ربنا يكفيكى شر المكان ويسعدك فيه ..قولوا انشالله ;)

شكرا بودا وشاعر الرومانسية على مروركم وردكم على وصفاتى المجربة ..

وبصراحة انا معاك شاعر الرومانسية على موضوع الشوى وان الميه السخنه احسن للصحة وبصراحة انا بعمل كدة بس برضه بكتب كل اللى اعرفة عشان ماكنش دكنت حاجة :D

أين انتى فولانة ؟؟!! :blink:

انشاء الله ردى الجاى حيبقى فيه حاجة جديدة تعجبكم .. :blink:

وسلام mfb:

[Folana]

السلام عليكم ورحمة الله ...........

العزيز بودا ...سامحنى والله رسالتك وصلتنى متأخر ومالحقتش ارد ..انشاء الله حابعت لك الموضوع اللى طلبته قريب ... :D

وبالمناسبة ...احنا اشترينا حاجة كده اسمها نورى ...اغلب الظن انها طحالب بس عاملة زى الورق ولونها اخضر زيتى غامق ..وريحتها زفرة ومكتوب عليها انها افخر انواع النورى :blink: وبتستخدم فى السوشى..كده بقى احنا عايزين طريقة السوشى قبل ماارمى البتاعة دى ...

هاميس ..انا متابعة بس احيانا كده بتلاقى مالكيش نفس تكتبى حاجة .....انا الحقيقة باقشر الرنجة على طول من غير لا مية سخنة ولا شوى ...ده الشوى ده بيزفر المنطقة كلها :blink: ...وفعلا بيركز الملح فى الرنجة ....

أوشا حبيبتى :D ربنا معاك والله فى موضوع العزال ده ..تصورى انا لما نقلت ماكنتش باعرف انام خالص ...ولما بارجع هنا فى الدراسة باحس انى كنت مسافرة ورجعت بيتى ...بس انشاء الله تكون نقلة خير عليكم وربنا يسعدك انت والاخ الفاضل حسام واولادك ....

دلوقت بقى ايه رأيكم نخرج من حلقة السمك ونكتب وصفة ملحمة شوية ....

انا كنت قريتها بس ماحبتش اكتبهالكم الا لما اجربها الاول ...وحيث ان ربنا وسع علينا واشترينا ربع كيلو لحمة مفرومة فجربتها وقلت اكتبهالكم برضه انتم اولادنا مش غرب ....

طيب معلش ياولاد ...جالى ضيفة مش عزيزة قوى على حأفسحها وبعدين ادخل اكمل لكم الوصفة .... :blink:

نلتقى بعد الفاصل .......................

[Folana]

عدنــــــــــــــــــــــــــــــــــا

يالا بقى حأكتب لكم الوصفة بسرعة بسرعة قبل الضيفة اللى عندى ماتفوق من البنج اللى شممتهولها :blink:

نجيب كيلو لحمة مفرومة ونضيف عليها بصلتين مفرومين وتلات او اربع فصوص توم مدقوق....وكمان ملعقة زنجبيل مبشور ..وملعقة كارى ....ولبابة عيش فينو ....نص حزمة كرفس ونص حزمة بقدونس مخرط رفيع جدا ....كوب زبادى .....2 بيضة مخفوقة ....ملح وفلفل وشوية بهار صغننةولو حد عايز يضيف قرفة مافيش مانع ..بس خدوا بالكم من الكميات .. ...وممكن فلفل رومى مخرط رفيع (اختيارى )....حنقلب كل المقادير دى فى طبق غويط ....

حنكون مسخنين الفرن من قبل كده ..ونرص الخليط ده فى صينية فرن مدورة وندخله الفرن .....لحد مايستوى ..بس من غير تقليب ..عايزين نحافظ على الشكل المستدير ده ..والعملية دى تاخد ساعة تقريبا او اكتر او اقل حسب حرارة الفرن ...

وهو بيستوى بقى ...حنجهز كيلو ونص او اتنين كيلو بطاطس ...نسلقها ونهرسها ونضيف عليها الملح (بسيط لاننا حاطين ملح فى اللحمة)...وفلفل ..وتتجهز بالطريقة المعروفة للبطاطس المهروسة بس خلوا فيها خشونة شوية يعنى ماتتضربش فى الخلاط .....

اللحمة استوت ..حنطلعها من الفرن ..ولما تبرد شوية صغيرة ننقلها فى صينية مدورة برضه بس اكبر من اللى كانت فيها ...ونضيف عليها البطاطس المهروسة ..بحيث تغطى الوش والجوانب تماما ...متخيلين الشكل ياترى ؟....

ندخلها بعد كده الفرن ولما تبدأ تصفر ..نخرجها ونكون مجهزين لوز مقشر ومقسوم اتنين ..ونوزع اللوز ده على الوش والجوانب لو كان فيه مكان فى الجوانب يعنى ..وندخلها الفرن تانى لحد اللوز ماياخد لون التحميص الدهبى ....نخرجها من الفرن ولما تهدا شوية نقطعها مثلثات زى التورتة...يعنى حيكون جوه لون بنى بتاع اللحمة وحواليه لون دهبى بتاع البطاطس واللوز ....

يارب تعجبكم...وبالف هنا............... :blink:

[Osha]

بــــــودا

شكرا على النصيحة ولو انك لو عرفت انا باحط شرائح الليمون ليه معاها في الفرن حتضحك عليا

بس حاقول برضه استبياع بقى

طبعا مش عشان انا باحب المرارة - الواحد مش ناقص كمان الأكل يبقى مر

ولكن دي ليها علاقة بعقدة قديمة من الأواني البايركس - وانا على فكرة لم أجد في البلد هنا سوى صواني فرن بايركس

العقدة دي تبدأ لما اتجوزت وماكنتش اعرف أ - ب مطبخ

وجالي هدية طقم حلل بايركس بالغطيان بتاعتهم

ومش حاقولك انهم طقوا كلهم في وشي بعد اقل من 3 شهور من استخدامهم

دا ان ماكانش 3 ايام

مرة احمر لسان عصفور وزي الشاطرة اطشه بالشوربة ساقعة

ومرة ثانية اطلع الحلة من الفرن - بعد محاولة فاشلة لاستخدامها كطاجن يعني وأحطها على رف عليه ميه

وطبعا بتوالي المفرقعات في وش حضرتي قررت الحرص والحذر تماما من التعامل مع مثل هذه المخلوقات الشريرة

ودا يوضح سبب خوفي من اضافة عصيرالليمون الى السمك المفترش أرضية الصينية البايركس

:blink:

كمان سؤال بعد اذنك

هل السالمون البرتقالي الفريش اللي في السوبر ماركت - وطبعا اكيد انت عارفه - يتم التعامل معاه بنفس الكيفية والا له طريقة أخرى ياريت تقولها طبعا

:wub:

هاميس

انا عارفة مين اللي زقك طبعا - لكن يا بنتي صدقيني كله لمصلحة الشعب

في انتظار المشاركة الجاية وياريت اكل في السريع عشان العيال المسمومين

:mellow:

فولانة

ايه الحاجات الشديدة دي يا بنتي - الحمد لله ان حسام مش بيفتح المنتدى دلوقت والا كان تمرد على وضعه

بس فعلا شكلها يستحق التجربة بفظاعة

:D

سلام ياحلوين

[شاعرالرومانسية]

بودا

على رايك ياشيف ...

احنا لسة حنسلق او نشوى ...

ماهى الرنجة كدة جميلة وزى الفل ..

شوية زيت وفص ليمون وبصلاية وبالهنا والشف ;)

فولالالالالالالالالالالالالالالانة ...

ساعتين عشان توزعى زبونة ...

وكمان دمها مش خفيف على قلبك ..

( امال لو كان خفيف كنتى قعدتى اد اية :wub: )

بس تورتة هايلة والله ... بس فين الشمع

تسلم ايدك :blink:

هاااااااااااااميس

شوفلنا صنف تاني .. عشان نبتدى نعمل فيها كونسلتو :D

أأأ...........

بس خلاص ،،،،

:mellow:

[Reham]

السلام علي من اتبع السلام

اهل المطبخ الكرام

انا جيت اوام :blink:

حلو السجع ده :wub:

اخص بالشكر الاستاذه هااااااااااااااااااااااميس

عشان طريقة الممبار اللي انا ماعملتوش بس طلع تحفه والله

انا الحقيقه رميته ....علي سلفتي وقولتلها انا عملت اللي عليا ونضفته

وهي كملت الباقي اظن كده عداني العيب ومشي ......

انا دخلت لقيت ريحة المطبخ سمك وجمبري ورنجه قولت اكيد الزعيم وصل

حمد الله عالسلامه يابودا وياتري جبتلنا معاك من هناك ايه

ايه ياعم شاعر الرومانسيه ايه فيه ايه

انا شميت كده يريحة تلقيح كلام

قصدك ايه يعني؟؟؟؟؟ :D

ماكانش العشم

بقولكوا ايه ياجماعه

انتم ماعندكوش غير الزفر

عايزين تعمل حاجات حلوه مبتكره زي اكلاتكم الجميله دي

شوفولنا اي حاجه جديده الواحد يجربها

لحسن الواحد زهق من كل الحاجات وانا بصراحه مابحبش اطبخ وافنن لكن بحب الحلويات اوي :mellow: انا هاخد غطس وارجع الاقي كام حاجه حلوه

شدوا حيلكوا يابنات

ياله يافوووولااااانه عايزاكي تتجدعني معايا والنبي

ماشي ياشباب اي خدمات

سلاااااااااااااااااام موقت

[hamiss]

مساء الخير يا اهل الدار... ;)

ريهام .. الحمد لله ان العزومة عدت زى ماكنتى عايزة والف هنا وشفا وعلى العموم خليى طريقة الممبار عندك لحسن يجى يوم تعملى عزومة وسلفتك ماتكونش موجودة ... :D

وانشاء الله حكتبلك حاجات كويسة فى الحلو وحيكون سهل العمايل .. :wub:

اوشا ..فداكى مليون طبق بيركس وفى الاخر كان تمنهم انك بقيتى طباخة ماهرة B)

شاعر الرومانسية .. خللى الشمع عليا بس ليه هوه حد عيد ميلاده قرب ؟؟ :)

فلانة .. تسلم ايدك على الطبخة الحلوة بس انتى ماكتبتيش اسمها عشان نعرفه ..

وعندك حق ساعات الواحد بيبقى ملوش نفس يكتب بس ممكن ساعتها تشاورى إحنا كلنا بنحب اراء الاخرين فى الصنف وطريقة الطبخ وعلى رأى شاعر الرومانسية

اننا نبتدى نعمل فيها كنسولتو.. :blink:

بودا .. عندك طبعا حق الليمون بيعطى طعم جميل مع كل أكلات الأسماك البحرية .. :mellow:

وسلام الى الوصفة القادمة:wub:

[hamiss]

مساء الخير .. :wub:

ريهام .. معايا طريقة حلوة وسهلة وماتخدش معاكى ربع ساعة فى العمايل هى طريقة للحلو اللى طلبتيه وممكن تكونى عارفاه وهى .. :excl:

تورتة البسكوت ..

نجيب باكو زبدة اللى وزنه 250 جرام

6 معلقة كبيرة سكر بودرة ــــ و6 معلقة كبيرة كاكاو _ 4 بيضات ــ ربع معلقة صغيرة فانليا ــ2 باكو بسكوت مارى ( تقريبا 40 قطعة بسكوته ) ـــ ورقة فويل متوسطة المساحة ..

الطريقة اسهل مايمكن .. وكلها على البارد.. :blush:

نكسر حتت البسكوت لقطع صغيرة ..

حنضرب البيض و الذبدة كويس اوى فى الخلاط وبعدين نحط السكر والكاكاو ونضرب الخلطة دى كويس اوى فى الخلاط وفى الاخر نحط الفانليا ونضرب بالخلاط حبه صغيرين ..

ندلق قطع البسكوت على الخلطة دى ونقلب بمعلقة خشب يعنى مش فى الخلاط ..

نفرد ورقة الفويل ونكُب الخلطة علية فى منتصف الورقة ونشكله على هيئة اسطوانة ونلف عليه ورقة الفويل ونقفلها كويس من الجانبين ..

ناخد الاسطوانة الفويل دى ونحطها فى التلاجة لغاية ماتجمد ..

بعد ماتجمد نفك الفويل ونقطع البسكوت ترانشات ونحطها فى طبق التقديم والباقى يتلف تانى فى الفويل ونحطه فى التلاجة ..

على فكرة ممكن مع البسكوت لو حبيتوا نكسر فسدق فى وسط الخلطة ..

طريقة سهلة وكلها على البارد ..

والف هنا وشفا .. :wub:

[Reham]

الف مليون شكر ياهاااااااميس علي اهتمامك

جزاكي الله خيرا ....الوصفه جميله وسهله وانا هجربها يوم الخميس ان شاء الله واقولك عالاخبار ياجميل

الوصفه سهله :blush:

الوصفه هايله :excl:

مع السلامه..........

........... :wub: