اطلب اى وصفه على بالك .. تلاقيها قدامك

[hamiss]

مساء الخير ريهام ... :P

لا شكر ابدا حبيبتى ويارب تعجبك وبجد انشاء الله حتلاقيها سهلة وجميلة الطعم والف هنا وشفا .. :D

بس ماتعرفيش بودا وشاعر الرومانسية وفولانة اختفوا وراحوا فين ؟؟!! :P

انا عارفة ان اوشا بتعزل وربنا معاها وتستقر انشاء الله عشان نعرف نشوفها هنا .. :D

وسلام ريهام واى خدمة .. :P

[wagdi]

إيه ياخوانا...خير...

مش بعادة المطبخ يتقفل خمس ايام ورا بعض...

عل المانع يكون خير إن شاء الله...

[Osha]

شكلنا اتحسدنا يا وجدي ياخويا

انا برضه مصدومة

انا اصلي كنت معدية قلت افوت آخد الجمعية

المهم انا دخلت اقولكم اننا ماشيين خلاص والنت حيشتغل هناك من يوم 30 ديسمبر ان شاء الله

طبعا التأخير عشان احتفالات الكريسماس

وصباحه جميل عليكم كلكم واشوفكم جميعا على خير باذن الله

[hamiss]

مساء الخير يااهل الدار ... :wub:

الحقيقة محسودين وبقالى 5 ايام ادخل هنا ومالقيش غير ردى واقفل تانى .. :excl:

مش عارفة فيه إيه وفين الشيف بودا هو سافر تانى ولا إيه لبلاد تركب الافيال المرة دى ؟؟ :wub:

وباقى الاعضاء فين ؟؟؟؟؟؟؟ :sad:

وسلام الى اى احداث جديدة .. :excl:

[Reham]

ايه يااهل المطبخ

فيه ايه؟؟

؟؟؟ولا شامه ريحة صلصه ولا تقليه ولا تشويح ولا تحمير

محسودين من عنيهم :unsure: حتي اللقمه مش عارفين تكملوها

انتم فين؟؟؟طيب رشا ومعزله ...فين بقي بودا وفلانه والشاعروباقي رواد المطبخ

ده حتي هااااااااميس ياعيني شكلها طفش

ياله بقي تعالوا ولعوا المطبخ تاني ولا انتوا شفتلكوا مطابخ تانيه ولا ايييييييييييييه؟؟؟؟؟؟؟؟؟؟؟؟

؟؟

[Folana]

السلام عليكم ورحمة الله .............

دستور ياأخوانا ...مالكم مضلمين المكان ليه كده .....ريهام ...اصلك مش عارفة الموضوع ...اصل انبوبة البوتاجاز خلصت ومستنين نغيرها ....

هاميس ....تسلم ايدك على الوصفة الجميلة الخفيفة ....وعايزين المزيد انت كنت كل يوم تكتبى وصفة ...فين بقى !!!

الاخ الفاضل وجدى ...شكرا على سؤالك ..واحنا موجودين وانشاء الله ربنا يجيب خير دايما ....

شاعر الرومانسية ...انت بقى اللى فين بجد؟؟؟؟ مافيش اخبار عنك خالص ليه كده ..اوعى تكون لسه شايل منى علشان وصفة اللفت ...ماقلتش يعنى عملت فيها ايه ...والمدام الغالية رمت اللفت ولا عجبها ..طمنونى ياجماعة ....

اوشا العزيزة ...يارب تكونى مرتاحة فى مكانك الجديد ..وربنا يسعدك فيه انشاء الله ...

بالنسبة ياستى للسيمون الفريش (مش الفيميه يعنى )واللى هو لونه برتقالى ....انا حاكتب لك الوصفة اللى باعمله بها ...هو بالنسبة لى باحب اشويه ..جربته مرة واحدة فى الفرن ومش عجبنى قوى يعنى ..فخدى طريقة المشوى ...

السلمون المشوى

طبعا هو بيكون شرائح ..جزل يعنى ...حتلفى الاطراف الرفيعة للداخل علشان تبقى على شكل اسطوانى ..واقفيليها بعود خلة اة اى حاجة ...

جهزى بقى التتبيلة واللى هى عبارة عن عصير ليمون وتوم مدقوق ناعم وملح وفلفل وكمون وشوية زيت زيتون ...وادلقيها على السلمون وشيليه فى التلاجة ساعة ولا اتنين ....

جهزى الشواية وسخنيها جامد وبعدين ابدائى اشوى السلمون على الوشين ..كل وش ياخد معاك بتاع عشر دقايق او اقل ...وبعد كده فكى الخلة او الخيط اللى كنت رابطة به شريحة السيمون ...

لحد هنا عادى ...

بتكونى مجهزة بقى صلصة كده ..عبارة عن ...حزمة شبت ومعاها كام فص توم وشوية خل وعصير ليمون وملح وفلفل وشوية زيت زيتون ...(وممكن بدل زيت الزيتون تستخدمى زبدة )..(وممكن بدل الشبت تستخدمى بقدونس )..واضربى المكونات دى فى الخلاط جامد .....وممكن بعد ماتشيلى السلمون من على الشواية تدهنيه بالخلطة دى او تقديمها كصوص جنبه ....

وممكن تضيفى على الصوص ده صنوبر مطحون برضه او ذرة اللى هى سويت كورن ...وبالف هنا ...

مش معقول كل ده بتغير الانانبيب يابودا ...هم شوية ... :unsure:

[hamiss]

مساء الخير يااهل الدار :P

والله يافولانة انا جيت كتير هنا ودايما مش بلاقى اى رد او تواجد من احد !!!

فقلت ادخر ماعندى من وصفات لغاية ماتيجو كلكم تانى وتتجمعوا زى زمان ؟؟!!

وشكرا على رايك فى الوصفة السرعة للتورتة الباسكويت ويارب يكون حد فعلا جربها ويقولى رأيه فيها ..

اوشا ... حمد لله على السلامة ودايما منورة بيتك اى كان مكان البيت :D

بس عايزين وصفات منك انتى وفولانة وشاعر الرومانسية زى زمان !!

على رأى ثومة ـــــــ قول للزمان ارجع يازمان

ريهام .... اخبارك اية ؟؟

والله انا ماطفشتش ولا حاجة بس باجى هنا وبلاقينى لوحدى هنا بخاف وبمشى :blush:

بودااااا.. اين انت ؟؟

الشيف مش متواجد فى اى مكان على النت دورت عليه مالقتهوش !! :P

ياجماعة الشيف اختفى فى ظروف غامضة وخايفة تكون الفدية وصفات اكل ؟؟!!

ابدأوا فى تجميعها لغاية مايكلموا حد مننا !! :) :)

يارب يكون خير .. يمكن سافر ياجماعة ومارديش يقول لحد !!؟؟ :)

وسلام :D

تم تعديل 23 ديسمبر 2005 بواسطة hamiss

[شاعرالرومانسية]

الاخوة الاعزاء ...

هى ساعات كدة بتصادف ان الكل يجيلوا ظروف ومايتواجدتش خلال نفس الفترة

اولا بالنسبالى .. اخر العام وببقى مشغول جدا فى الميزانية وشغل اخر السنة ..( ماهو الاتكال على العزومة واللقب بتاع كبير مطبخى الشركة وحدها مش حينفع يا فولانة والا اية ;) )

اختنا اوشا .. وكما هو معلوم بتعزل .. وطبعا عزالها غير عزالنا .. احنا ممكن نعزل فى يومين تلاتة.. دة فى مصر

انما عزال ماما امريكا حاجة تانى طبعا :lol:

اما اخونا وشيفنا العزيز بودا .. فدا بقى امرة غريب .. لانى برضة مش لاقية خااالص ..عموما انا حعمل بحث ميدانى عنه واواليكم بالاخبار ان شاء الله :D

اما بخصوص اللفت يا ست فولالالالالالانة :lol:

مش عارف لية الاول كان لونة احمر وردى ...

بعد كدة بدا يفتح لحد ما بقى لونة ابيض مصفر كدة وميتى بيضا

( حتقولى زود البنجر .. انا حاطط اتنين وحياتك على 1.1/2 كيلو لفت )

اما طعمة بقى .......

هاااااااااااااااايل والله :D

بجد طعمة حلو ومحتفظ بتماسكة ومتهراش ....

عموما بالنسبة للون الوردى له ولميتة ..واللى راااح

انا بغمض عنيا واكله .. واتخيل اللون اللى انا بحبة :rolleyes:

شكرا يا ست الكل،،،،

اخواتنا الافاضل ...

هاميس .. وريهام .. " نينا " سلوى :)

لاتحرمونا من تواجدكم معنا حتى وان غبنا احنا ...

البركة فيكم،،،

ححضرلوكا وصفة شتوية ...( بس مش اكلة ...)

جربتها كذا مرة ... وعملتها للجماعة فى الشركة كمان ..

وطلعت مش بطالة

واترقينا من باشمطبخجى .. الى مدير عام مطابخ الشركة ... B)

بس برضة مطحون فى الميزانية والله :lol:

اشوفكوا بعد الفااااااااااااااااصل

[شاعرالرومانسية]

بمناسبة الشتا والسقعة .. وطبعا نحب نشرب حاجات سخنة لزوم التدفئة..

فممكن نشوف عمايل .... الحمام ...

اللى هو ... الحلبسة :lol:

اللى هو " حمص الشام "

انا جربت اكتر من نوع ولقيت افضلهم حمص " الضحى "

نجيب كيس حمص وننقعة فى المية من بالليل ( دة بيخلية يستوى بسرعة ويبقى احلى )

تانى يوم نحطة فى الحلة الغويطة ونغمرة بالمية ونسيبة يتسلق على النار ... غلوتين ونشيل الريم ( ان وجد ) ونحط بصة كبيرة مقطعة اربع وكام فص توم كبار صحاح :rolleyes:

وفى تللك الاثناء .. نجيب راس توم كبيرة وندقها مع كمون مطحون وملح ونشيل شوية على جنب لزوم الدقة .. ونحط الخلطة دى على الحمص قبل السوا بشوية ... بعد السوا ( ممكن نشيل البصل والتوم الفصوص ...عملوا اللى عليهم خلاص :lol: ) نقوم جايبن طمطماية كبيرة او اتنين ونبشرها على الحمص ومعاهاى كمان معلقتين كبار صلصة .. لزوم اللون الاحمر الحلو :)

ونسيبة غلوتين كمان ويبقى الحمص كدة استوى

الدقة بقى ناخد خليط التوم والكمون ونحط علية خل وليمون ونسيبة فيهم فترة ..

( ممكن نبتدى بيه قبل عمايل الحمص .. لان كل ما يقعد اكتر بيبقى طعمة احلى )

الشطة بقى .. اما نعملها ببعض الشطة الناشفة مع معلقتين مية من مية الحمص على النار لحد التسبيك ونخففها بمعلقتين خل بعد كدة

او نشترى زجاجة شطة ..( جوبر او هاينز )

ومن خلال البطانية ..

كان معكم اخوكم شاعر الرومانسية

وفى ايدة كوباية حمص مغلية....

:lol:

[Folana]

السلام عليكم ورحمة الله ......

اخوانى المطبخية .....منورين ...فضلنا نقول عايزين نحافظ على روح المطبخ لحد ماروحه طلعت من كتر المحافظة عليها ....ولله الامر من قبل ومن بعد ....

هاميس فى انتظار وصفاتك وماتخافيش لما تلاقى المطبخ ضلمة ...ادخلى بس انت وهو ينور لوحده واحنا نيجى على نورك ...(كلام كبير ده )

شاعر الرومانسية اخى العزيز حسن بيه ابو على حكمدار مطبخ الشركة ....يعنى ده كلام برضه ...انت مش عارف ان ده محل اكل عيش وبنسترزق منه ..تيجى انت كده فى وسط الزباين وتقولى اللفت طلع لونه ابيض ....

وبعدين ياسيدى الفاضل مادام كان احمر فى الاول وبعدين تحول الى الابيض ...تبقى مش غلطتى ولا خيبة وصفتى ...دى تبقى غلطتك انت ...كان لازم تفهم دوغرى ان اللفت اتخض فدمه هرب منه وبقى ابيض ...تلاقيك فتحت عليه البرطمان وهو نايم ياولداه فصحى مفزوع ....

او دمه نشف من البرد ....مش تقولى وصفتك بايظة ...حاشا وماشا وكلا وفلا ....

بس انا حاسامحك علشان وصفة حمص الشام دى ...ياسلام ده انا بأموت فيه ...تسلم ايدك ...وعايزين وصفات تانية لحد مااوشا وبودا يرجعوا بالسلامة ..ونكمل النصاب القانونى للمطبخ ونبدا الشغل بقى ...خصوصا الشتا بيحب الاكل ....يم يم يم ....

ونلتقى بعد شرب الحلبسة ....

نهاركم سعيد ................ :rolleyes:

[abofasad]

عاجل جــــــــــــــــــــــــــدا

أخي وحبيبي الشيف بودا

انا محتاجلك اوي

واليوم بالذات

ايه رأيك لو تقولنا على طريقة الديك الرومي وحشوته

وخصوصا ان بكرة العيد

وده حيكون الطبق الرئيسي

وانا بقول بودا لأنه الزعيم

ولكن هذا لا يمنع ان أي طباخ أو طباخة ماهرة يدلوا بدلوهم (حلوة دلوهم دي)

واللي حتعجبني وصفته حشيله منابه اللي هي "الزلمكة"

وكل عام وانتم بخير

[ام البنات]

السلام عليكم ورحمة الله وبركاته

ممكن اشترك معاكم

ومعنديش مانع ابدأ برص الصحون فى الغساله

معلهش مش بغسل صحون على ايدى

اه هانم ماشى

وممكن ارتب لكم الثلاجه وبعد كده نشوف ممكن اعمل ايه

يعنى مينفعش ابدأ ستيورت برستيجى ولا بليه

انا صاحبة مطبخ قد الدنيا فى احد المنتديات الشهير وكويس قوى

انى هابدأ برص الصحون

ربنا يخليكم اجى معاكم

عاوزه اتعلم مخليش الممبار يبقى مكبوس وهيفرقع

(صاحبة مطبخ) يادى الفشر

ما علينا ممكن

ولا اكسر الحلل والمعالق ويلا بقى

[Folana]

السلام عليكم ورحمة الله وبركاته ............

ست الستات وأم البنات ...اسمحى بالنيابة عن اخوانى واخواتى هنا فى المطبخ انى ارحب بك واقولك نورتينا ونتمنى انك تفضلى معانا على طول وتصبحى عضوة من اعضاء مطبخ الخطيرين .....ومن غير رص اطباق ولا حاجة انت تشاركينا على طول فى الوصفات ...وانشاء الله الاخوة كلهم لما يدخلو ا حيعرفوا يرحبوا بك احسن منى حاكم انا خيبة قوى فى المجاملات الاجتماعية دى ..ولو انها مش مجاملة انا فعلا سعيدة بوجودك معانا .......

الاخ الفاضل ابو فصاد......منور مطبخنا المتواضع وكنت اتمنى وجود الشيف بودا علشان يكتب لك وصفتك بس ماحدش عارف هو فين ...اسمحى انتهز فرصة غيابه واستعرض عليكم شوية قبل مايرجع بس ماحدش يبلغه ....

اولا ..انت كاثوليكى ولا عايش بره ؟....فى الحالتين احب اقولك كل سنة وانت طيب ......

بالنسبة للديك الرومى فالاخ بودا كاتب هنا اكتر من وصفة بس مش عارفة حتعرف تحصل عليهم ولا لأ ...عموما انا عايزاك تنسى خالص كلام شاعر الرومانسية عن وصفة اللفت ...علشان بس تثق فى كلامى ...نسيت؟..طب جميل خد عندك بقى ...الديك الرومى المحشى

حتحضر طبعا ديك رومى محترم ويتغسل كويس جدا وتسيبه يصفى ميته ...نجى بقى للحشو ...فيه اكتر من طريقة للحشو ...اول حاجة ....

حتحضر كوبيتن رز....بصلتين كبار مفرومين ....حوالى اربع او ست فصوص توم ...صنوبر محمر....جبنة رومى مبشورة او بارميزان .....صفار بيضتين .....شوية فلفل احمر بابريكا ...حزمة بقدونس ....ملح وفلفل وبهار ..فيه ناس كمان ممكن تضيف سوسيس على الحشوة دى زى ماتحب يعنى ...

حتغلى الرز فى الميه نص سوا يعنى كده ويتبل بالملح والفلف والبهار ويصفى من ميته

حنحمر البصل فى زيت زيتون او سمن زى ماتحب ....يصفر بس وبعد كده تضيف التوم والسوسيس لو حتحط سوسيس

لمدة عش دقايق ...بعد كده تضيف الصنوبر وتسيب الخليط ده يبرد شوية ...

حنرجع للرز ونضيف عليه الجبن المبشور والبابريكا والبقدونس وصفار البيض وبعدين تضيف كل ده للبصل والتوم وتسيب الخليط يبرد .....

نرجع للديك ....حتبدأ تجهزه بانك تفصل بين الجلد من عند الرقبة وبين الجلد ولحم الصدر على قد ماتقدر ...وتكون محضر زبدة وعصير ليمون حوالى اربع ليمونات او خمس ومعاهم زعتر وبشر ليمون وملح وفلفل وتدهن بالخليط ده الديك بين الجلد واللحم ومن الداخل ....

حنحشى الديك بخلطة الارز ونربط الرجلين طبعا علشان نحافظ على الخلطة ..وبعدين ندهن الديك من بره بباقى خلطة الزبدة

حنحضر صينية فرن كبيرة ونحط فيها بصل حلقات وكرفس وتوم مدقوق وجزر وبعدين نحط الديك وندخله الفرن ...مع مراعاة تغطيته بعد ساعة تقربا بورق الفويل ويترك لحد مايستوى

وكان بودا بيقول لما الانبوبة يبقى لونها احمر يبقى الديك استوى ...مااعرفش انت الديك بتاعك من ذوات الانانبيب ديك انابيب يعنى ولا ديك ضاربه السلك زى بتاعنا هنا عادى ......

وحاكتب لك وصفة تانية بعد الفاصل ...................

[Folana]

السلام عليكم ورحمة الله ......

الاخت الفاضلة ام البنات ...معلش سامحينى مااخدتش بالى من موضوع الممبار ده ...طبعا هاميس كتبت وصفة ممتازة هنا يمكن تكون فى صفحة 55 او 54 ...لكن علشان الممبار مايفرقعش منك ...طبعا ماتحشيهوش على الاخر ..يعنى حطى الخلطة وابداى اضغطى عليها بصوابعك ..يعنى يبقى مبطط خالص ..ولما تنزليه المية هو هيزيد لوحده وياخد الشكل الاسطوانى بتاعه ...

الاخ الفاضل ابو فصاد.....خلطة رقم 2...

الديك مافيش خلاف عليه ....نفس طريقة التحضير ...ولكن دى وصفة خلطة تانية ....

حتجيب لوز مقشر وزبيب وصنوبر وتحمر كل حاجة لوحدها ...وترفعها من السمن ....

حتجيب الرز ...تغسله وبعدين تصفيه من الميه ....وتجيب بصلتين كبار مبشورين وتصفرهم فى السمن على النار يعنى لونهم يبقى اصفر ...وتقلب عليهم الرز وتفضل تقلب وتقلب وتقلب ...يعنىى لحد مامية الرز تنشف ويبدأ ياخد لون مصفر شوية ....ضيف عليه شوية ميه او شوربة وسيبه ياخد غلوتين لحد مايتشرب وتوطى النار عليه يجى ربع ساعة كده ...وتضيف عليه المكسرات والملح والفلفل وقرفة لو حبيت وممكن مبشور زنجبيل ...وتقلب تقلبيتين وتطفى عليه ..حيكون هو تقريبا مستوى بس مش مستوى قوى ....

ولما يبرد ..حتحشى الديك بالطريقة السابقة وتبله من الخارج بروز مارى وورق لورا وممكن تضيف عليه عصير برتقال او عصير رمان ...وتدخله الفرن ..اما وانت مغطيه بالفويل او تضيف كوباية شوربة وكل شوية تاخد العصلرة اللى نزلت منه وتضيفها على الديك لحد مايستوى ....وممكن تضيف على الخلطة دى كبد فراخ او كبد الديك مقطعة حتت صغيرة

تخرجه من الفرن وتقطعه ترنشات فى مكانها طبعا فاهم قصدى .....ويجمل بقى فى طبق التقديم باللى انت عايزه ..يعنى ممكن ترنشات طماطم وترنشات ليمون ..ممكن خس ..ممكن خيار حلقات وجزلر ...

وممكن الديك على فكرة يتسلق وبعدين يتحمر ...ويتعمل جنبه رز بالخلطة عادى ....

ونلتقى بعد الفاصل ................

تم تعديل 24 ديسمبر 2005 بواسطة folana

[abofasad]

الأخت فلانة

انا كاثوليك وكمان عايش بره.. والنهاربة ليلة العيد وكل البيوت عندها الطبق الرئيسي الديك الرومي المحشي

على العموم الف شكر على وصفتك.. وام فصاد بدأت في تنفيذها .. وبكره اقولكم ايه الاخبار

كل سنة وانتم طيبين

جدو ابو فصاد

[شاعرالرومانسية]

اما بخصوص اللفت يا ست فولالالالالالانة :lol:

مش عارف لية الاول كان لونة احمر وردى ...

بعد كدة بدا يفتح لحد ما بقى لونة ابيض مصفر كدة وميتى بيضا

اما طعمة بقى .......

هاااااااااااااااايل والله  :D

بجد طعمة حلو ومحتفظ بتماسكة ومتهراش ....

شكرا يا ست الكل،،،،

<{POST_SNAPBACK}>

كدة برضة يافولانة ... :sad:

تطلعى عليا اوشاعة انى بقوللك اللفت بااااااز :unsure:

دا انا بقوللك طلع هااااااايل وطعمة يجنن ومتماسك لحد دلوقتى...

مع انه بقاله بتاع ثلاث اسابيع اهو...

ماعلينا ...

اختنا ام البنات ...

ازاى البنات صحيح ... :D

ربنا يباركلك فيهم ويخليهم ..

واهلا وسهلا بيكى فى مطبخنا العامر ... المختلف عن اى مطبخ تانى ( دة مش تعصب والله ... والتجربة خير دليل :excl: )

وبالنسبة للممبار اختنا فولانة قالتلك المختصر وانا ممكن اطبعلك الوصفة من ارشيف المطبخ ... وبالهنا :wub:

اتفضلى اهى ...

"نجيب الممبار وأهم حاجه غسيله عن طريق قلبه بسيخ يعنى يبقى الداخلى بتعه من بره ثم نقلبه تانى بعد التنضيف بعد كده نقطعه حتت حوالى شبر ( 20 سم ) ونشق 3 سم من الطرف من جهه واحده لتسهيل الحشو..

نركب خلطة الحشو من رز مغسول وبقدونس وشبت وبصل وتوم مفرى وممكن مفروم طماطمايه ، وطبعا ملح وفلفل وبهارات نقلب الرز مع باقى المكونات ونحشى القطع السابقة بحيث يكون الحشو مبطط جواها يعنى يملأ التلت فقط نجيب حلة فيها مية تغلى عالنار بالملح والفلفل وبصله ونسقط الممبار المحشى فى الماء المغلى هاتلاقى اطرافه تنكمش وتقفل عالحشو ويمكن يسقط بعضه عادى وياخد عالنار حوالى نص ساعه للسوى بعد كده نشيله من الميه ويبرد ثم يحمر فى الزيت "

الفاضل ابو فصادة .. ياريت فعلا تكون بدأت فى تتبيل الديك من بالليل .. لان اهم حاجة تتبيلة قبلها بفترة .. ولو يومين يبقى افضل عشان يشرب من التتبيلة ومايتأخرش فى السوا ( بالذات لو كبير )

انا بعملة خلطة من اليصل المقطع والطماطم المبشورة والكرفس المخرط والجزر المبشور وتفاح مقطع اربع او مبشور وطبعا ملح وفلفل وحبهان مطحون ونسيبة فى التتبيلة يومين تحت رف الفريزر فى حلى كبيرة ومغطى بكيس نايلون

ونطلعة يوم العزومة الصبح ندهنة من برا زبدة ونحط تحتة ورق فويل بالطول والعرض ... على شكل علامة زائد (متخيل معايا ) ونطبق اللى بالعرض كويس وبعدها اللى بالطول ومايبقاش باين من الديك حاجة

ونحطة فى صنية فرن ونحطة من تحت لمدة ثلاث ساعات مانشيلش الفويل وبعدين نرفع طرف الفويل ونسقى الديك من ميتة لحد مايكمل سواه وبعدين نرفعة فوق ونشيل الفويل خالص عشان ياخد طبقة الاحمرار... وماتنساش تحطة على فرشة البقدونس وتلف الفويل على نهاية عظمتى الارجل و....الزلموكة :rolleyes:

وياريت تبدأوا بيها .. عشان منابى يبقى من الطبلة ;)

وممكن بقى تعمل جنبة صوص من الحشو اللى جواه تاخدة ونضربة فى الخلاط وبعدين نجيب بصلة مبشورة ونقلبها فى معلقة زبدة وعليها معلقتين دقيق ونسقية شوية شوربة لحد قوامة مايتخن شوية ونزود بالخلطة اللى عملناها فى الخلاط تغلى ونحط معلقتين تلاتة كريمة لبانى وبعض حبات الفلفل الاسود الصحيح ... ونحطها جنب الديك بعد تقطيعة

وكل عام والجميع بخير بمناسبة العام الجديد :wub:

[ام البنات]

الأخت فلانة

انا كاثوليك وكمان عايش بره.. والنهاربة ليلة العيد وكل البيوت عندها الطبق الرئيسي الديك الرومي المحشي

على العموم الف شكر على وصفتك.. وام فصاد بدأت في تنفيذها .. وبكره اقولكم ايه الاخبار

كل سنة وانتم طيبين

جدو ابو فصاد

<{POST_SNAPBACK}>

الاستاذ الفاضل أبو الفصاد عيد سعيد وتهانينا لأم الفصاد الفاضله

هذه وصفة ديك رومى متجربه رائعه وهتجد ان شاء الله انها سلهله وكمان الديك هيكون رائع

ومش لازم تتبله قبلها بيوم دى وصفتى الخاصه وعن تجربه

الى الفاضله أم الفصاد

المقادير

معلقه كارى

معلقة قرفه

ليمونه

نص كوب خل

2 فص ليمون

بصله حسب حجم االديك الى هنسويه

ربع معلقة كمون

فلفل اخضر عادى او حراق حسب المزاج

بهارت ( مشكله)

قليل من البقدونس والكسبره الخضراء معلقتين صلصه

الطريقه

يغسل الديك بالملح والدقيق

وبعدين يشطف جيدا

ويدهن بالقرفه كويس ومن بره ومن جوه والملح مع القرفه

ويترك حتى تقومى بخلط جميع المكونات معا"

تجيبى شوية زبده صغييرين خالص تشوحى فيهم المستكه والحبهان ( الهيل)

وبعدين تحشى الديك بالخليط كله

ومتقلقش من الليمون والخل

ولا تقلق من ان ريحة الشوربه زى السمك ( علشان الكمون والتوم )

بس النتيجه مختلفه

وتضعيهم ااقصد الخليط داخل الديك وبعد التكتيف

يشوح فى النار وتضيفى الماء وتتركيه يستوى على راحته

( ملحوظه )

متعمليش زى وتستعجلى تروح الحله البريستو تفرقع فيك زى ما عملتها معاى

بس الحقيقه عرفت البطه كانت طعمها حلو لان كل حيطان المطبخ اكلتها معانا

بس الحمد لله قدر ولطف

المهم والله بيطلع طعمه رائع ومفيش زفاره

وحتى الوز بيبقى تقيل جربو الوصفه دى

وادعو لى ابو البنات يرضى نجيب حله بدل المدمره

"

[ام البنات]

السلام عليكم ورحمة الله وبركاته ............

ست الستات وأم البنات ...اسمحى بالنيابة عن اخوانى واخواتى هنا فى المطبخ انى ارحب بك واقولك نورتينا ونتمنى انك تفضلى معانا على طول وتصبحى عضوة من اعضاء مطبخ الخطيرين .....ومن غير رص اطباق ولا حاجة انت تشاركينا على طول فى الوصفات ...وانشاء الله الاخوة كلهم لما يدخلو ا حيعرفوا يرحبوا بك احسن منى حاكم انا خيبة قوى فى المجاملات الاجتماعية دى ..ولو انها مش مجاملة انا فعلا سعيدة بوجودك معانا .......

<{POST_SNAPBACK}>

السلام عليكم ورحمة الله وبركاته

أختى فلانه

اجمل حاجه فى اسمك انه واضح ومفيهوش غموض

جزاك الله خيرا على الترحيب

النور نوركم وانا لما بدخل هنا بحس انى سعيده جدا" ربنا يكرمكم ويسعدكم

والمطبه ده ريحته مفحفحه لغاية تورنتو

واحده صديقتى فى كندا عرفتنى بيكم وبمطبخكم العامر تسلم ايديكم

انت مش بتعرفى فى المجاملات

دا انت عسوله خالص

ربنا يخليك

ام البنات

[ام البنات]

ماعلينا ...

اختنا ام البنات ...

ازاى البنات صحيح ... :lol:

ربنا يباركلك فيهم ويخليهم ..

واهلا وسهلا بيكى فى مطبخنا العامر ... المختلف عن اى مطبخ تانى ( دة مش تعصب  والله ... والتجربة خير دليل :excl: )

وبالنسبة للممبار اختنا فولانة قالتلك المختصر وانا ممكن اطبعلك الوصفة من ارشيف المطبخ ... وبالهنا  :rolleyes:

اتفضلى اهى ...

وكل عام والجميع بخير بمناسبة العام الجديد :unsure:

<{POST_SNAPBACK}>

شكرأ يا شاعر الرمانسيه

البنات بخير والحمد لله بيبوسوا ايديكم

ربنا يبارك فى كل العيال يارب وبنتى تذاكر وتفلح ( أولى أبتدائى ) ومش مقتنعه بالتعليم

ما علينا اشكرك على وصفه الممبار

وان شاء الله انفذ واخبركم بالنتيجه

تم تعديل 24 ديسمبر 2005 بواسطة ام البنات

[bodda]

الف شكر لكل اللى سال عنى الفترة اللى فاتت

فعلا كنت مسافر على شوية ضغط شغل على اكل سوقى

:)

والحياه ليست ورديه كما كنت اعتقد دائما

لكن معلش اللى يعيش ياما يشوف ويتعلم و يفهم

;)

حبيت بس ارحب بالأصدقاء الجدد

أم البنات

وأبو فصاده ( كل سنه وانت طيب و لكل اللى فى عش الفصاد )

فعلا منورين المطبخ وواضح ان امكانيات ام البنات خطيره

بس خللى بالك هنا فيه اصدقاء يدعوا انهم على قد حالهم

ولكن الحقيقه انهم فى منتهى الخطورة المطبخية

:)

تحياتى لكل الاصدقاء

وربنا يسهل واقدر اتواجد بقدر المستطاع لظروف العمل الحالية

دعواتكم

وصباح الفل

:D

تم تعديل 26 ديسمبر 2005 بواسطة bodda