اطلب اى وصفه على بالك .. تلاقيها قدامك

[Folana]

السلام عليكم ورحمة الله ....

حمدلله على السلامة يازعيم ..وان شاء الله الحياة تبقى وردى دايما ...(بس اللون ده اتلغى من ايام سعاد حسنى واستبدلوه بالبمبى )

وعقبال مانطمئن على اوشا كمان ...اهى هانت كلها كام يوم والنت يشتغل ونطمئن عليها .....

دلوقت ياولاد انا معايا وصفتين مش بطالين ..كل واحد يجهز سلطانية ويجى ياخد اللى فيه القسمة ....

صينية البطاطس فى الفرن

المقادير ...حنحضر اتنين كيلو بطاطس نغسلها كويس جدا ..ونسلقها بقشرها .......حنحضر كوباية ونص لبن ..وورقة زبدة مش مملحة ...4 بيضات مخفوقة ....فصين توم مطحونين ...كوباية جبنة بارميزان مبشورة ويفضل اانا نبشرها فى التو واللحظة ....كمان نجيب اما 6 شرائح سلامى او رومى مدخن ......شوية مكعبات جبنة موزاريلا .....لبابة عيش فينو ...حوالى اربعة ارغفة مثلا او حسب الكمية ...زعتر اخضر (الورق بتاعه بس ...مغسول ومخرط)وكمان ورق بقدونس برضه مخرط ....ملح وفلفل طبعا ...

الطريقة ...حنسخن الفرن قبل مانحضر الوصفة ...بعد كده حناخد جزء من الزبدة مع اللبن ونسخنها على نار هادئة ..لحد ما الزبدة تسيح واللبن طبعا يبقى دافى بس ...حنقشر البطاطس ونقطعها مكعبات فى طبق غويط ونضيف عليها اللبن والزبدة ..ونبدأ نقلب الخليط لحد مايتجانس والبطاطس طبعا تتهرس معانا ....بس مش قوى خلوها خشنة شوية ...وممكن على فكرة نبشرها ......ونضيف باقى المقادير كلها على البطاطس ونقلب

حنجيب طينية فرن وندهنها زبدة ونبطنها باللبابة دى واللى نسيت اقولكم اننا ممكن نستخدم توست بايت مع قطع الاطراف الناشفة وده يكون افضل من اللبابة ...حندلق بقى خليط الطاطس ده ...ونسوى السطح وندهنه بباقى الزبدة وصفار بيضة ونرشه بشوية بقسماط مطحون او ممكن نفتت اللبابة ونرشها على الوش ونضغط على الوش بشويش ..وندخل الفرن ولما الوش يبقى دهبى نطلعها من الفرن ونسبها تبرد ونقلبها فى طبق تقديم ...ويزين بشرائح الطماطم والخيار ...

الوصفة التانية بعد الفاصل .........

[ام البنات]

الشيف الكبيرحمد الله على السلامه

وميغركش دى فنجرة بق على راى البورسعيديه

داحنا يادوب بنعرف نسلق البيض بس منظره وخلاص

شكرا على الترحيب

اختى فلانه جربتى تحطى كسبره خضراء على صينية البطاطس ومعها فصين توم نيين

اعمليها وادعى لى

جزاك الله خيرا على البطاطس فين الارز الابيض ؟

[bodda]

ايه يا ام البنات ؟؟؟؟

من بورسعيد وبتسالى عالرز الابيض ؟؟؟

ده بورسعيد بلد الرز كله

لكن عالعموم فنجان زيت يتقدح ويتطش بكوبايتين ميه

ونحط الملح ولما تغلى الميه نحط كوبايتين رز مغسول ونسيبه يغلى دقيقه

وبعدين نوطى النار خالص للسوى

وبالطريقة البورسعيدية .... :)

نغلى كوبايتين الميه مع الملح ونحط الرز المغسول

ولما يستوى نقدح فنجان الزيت فى طاسه ونطشه على وش الرز

ونغطيه خمس دقايق وبالهنا والشفا

صباح الفل

:D

[Folana]

السلام عليكم ورحمة الله ...........

ام البنات ...ايه ده هم البورسعيدية فنجرية بق؟؟ :) :P اوعى يكون حد هنا بورسعيدى ياجماعة الله يخليكم ..

جميلة تكملة الوصفة اللى قلتيها ...بس انت بتسالى عن طريقة الارز الابيض المتوسط ..ولا بتقدمى جنب البطاطس رز ؟...انا الحقيقة باعملها كده لوحدها كفاية عليهم ..ولو حاعمل حاجة جنبها زيادة بيكون سكالوب مثلا وسلطة وحلو قوى كده ....

لكم فى ذمتى وصفة بس استنوا لما اجربها الاول علشان اعرف انا باقول ايه ...

وكلنا لنا عند بودا خمسين وصفة وهو مطنش ياريت يشد حيله بقى ويبدأ يرد علينا ....

صباحكم جميل :D

[Guest النسر المصري]

واااااك ...واااااااااااك

النسر المصري رجع لكم من جديد

تحياتي لكل أصدقائي الأفاضل

انا بعتذر ياجماعه عن غيابي لاني كنت في محاولة خطوبة وفشلت الصراحة...

وحزنت جدا لانها كانت بنت رائعة ..لكن النصيب نقول ايه يقي!!

المهم تحياتي لامبراطور المطبخ الرهيب بوذا..ووحشتوني جدا ياجماعه والله

واهلا باصداقئنا الجدد

انا جايلكم النهارده بوصفه كدة تسد الرمق من الاكلات الغريبة اللي بشتهر بيها في مصر

النهارده هاقدم لكم وصفة (المــــــــسخن)

المسخن دي اكلة فلسطينية لذيذة بشكل فوق الوصف

المقادير

دجاجة مقسومه نصفين

رقاق طري(فطير يعني) والاصل هو بدلا من الخبز الايراني

سماق وحب بركة وزيت زيتون وكاري وصنوبر ولحم مفروم وبصل وزعفران

طريقة العمل

نشوح البصل المفروم مع المستكة وفلفل الاسود والملح ثم نضع معلقة بهارات كاري وزعفران

ثم نضع نصفين الدجاج ونشوحهم لدرجة الاحمرار مع بعض

ونضيف الماء ونتركها تلت ساعة للسلق

في طاسة عميقة نقوم بتحضير خلطة المسخن السرية

نحمر بزيت الزيتون بصلة كبيرة ثم نضيف الصنوبر والكثير منه بالذات ثم السماق الكثير ايضا ثم اللحم المفروم وفلفل اسود وملح لحد لما يلبسوا في بعض كويس

نفرد الرقاق ونفرد عليها الخلطة ثم نضع نصف الدجاجة ونرشها تاني ببعض من الخلطة

ثم نلف الدجاجة بالرقاق كانك بتلفي المولود بالبطانيةبنفس الطريقة

حتى اننا بنسيب راس الدجاجة باين فوق وملفوف بالرقاقة من كل ناحيه

وتشيليه ودلعي والنوغة النوغة اسم الله عليها تحطيها على صينيه فرن مدهونه بزيت زيتون

بنفس الطريقة نص الدجاجة التانية والتالته والرابعة لوعايزين لان كل واحد له نص

وفي الفرن ابعتوها

وعالنار ساووها

وربع ساعة كدة حمروها

وبعدين طلعوها

ياعيني مش هتلاقوها

لانكم خلاص اكلتوها

ويجعلو عامر

تم تعديل 27 ديسمبر 2005 بواسطة النسر المصري

[bodda]

بلاش تشنيع يا فولانه على ام البنات

:D

نسرنا العزيز العائد من تجربة الاصرار عالنكد المستدام

يابنى النصيحه مش بتنفع الايام دى والا كنت نصحتك

ما علينا.... :)

وصفة المسخنه هايله جدا وعلى فكره ممكن تتعمل باللحم البتلو

وممكن باللحم الضانى بس بعد سلقه وتحميره

لكن الجزء المهم هو العيش المستخدم

وبالتجربة فافضل شئ هو الرقاق الطرى بتاعنا

وده يتجاب من عند اى فطاطرى تقف عنده بأدب واحترام

وتعمل فيها ابو العريف

وتقوله تعرف تعمل رقاق طرى ؟؟؟

طبعا سيبك من النظرة الشديده اللى هايبص لك بيها

:)

لكن هاتلاقيه قالك انا معلم فطاطرى من كذا مليون سنه

وهاتلاقيه عملك احلى رقاق طرى يصلح للوصفة دى

وتسلم ايدك يا نسر

:D

[bodda]

بمناسبة قرب الاعياد وكل سنه وانتم طيبين

الفخده الضانى فى الفرن

نجيب فخده ضانى صغيرة السن تلاقى وزنها من 2 لاتنين ونص كيلو

ونشق بالسكين فى اللحم بطول العظم من كل الجهات

وبلاش الشق عكس العضم و الا يكش اللحم

ونحضر خلطة التتبيله من :

مبشور بصلتين كبار ومعلقة ملح كبيره ومعلقة بهار لحم كبيره ومعلقة فلفل صغيرة

ومبشور جوزة الطيب ... ويتقلبوا مع بعض كويس

نحضر خلطة الفرشة من :

من حبايتين بطاطس وبصلتين وجزرتين شرائح وملح وفلفل ومبشور جوزة الطيب

نتبل اللحم كويس بحشو الشقوق بالتتبيله ونسيبها فى التلاجه ساعه عالاقل

نحط الفرشه بعد خلطها فى صينية فرن كبيره ونحط عليها الفخده المتبله

نحط كوباية ميه فى الصينية ونغطيها بالمونيوم فويل كويس

ونحطها فى فرن حامى حوالى ساعه ونص

ونكشف على السوى بالشوكه ..اذا استوت نشيل الفويل

وناخد من الصوص اللى فى الصينية ونصب عالفخده ونسيبها تتحمر ربع ساعه

اذا كانت لسه ماستوتش نسيبها تكمل سوى كمان نص ساعه تحت الفويل

وبعد التحمير ولونها يبقى احمر جميل تقدم مع الرز بالشعريه والسلاطة

او جنب فتة معتبرة

مساء الفل

:)

[ام البنات]

ايه يا ام البنات ؟؟؟؟

من بورسعيد وبتسالى عالرز الابيض ؟؟؟

ده بورسعيد بلد الرز كله

لكن عالعموم فنجان زيت يتقدح ويتطش بكوبايتين ميه

ونحط الملح ولما تغلى الميه نحط كوبايتين رز مغسول ونسيبه يغلى دقيقه

وبعدين نوطى النار خالص للسوى

وبالطريقة البورسعيدية .... :)

نغلى كوبايتين الميه مع الملح ونحط الرز المغسول

ولما يستوى نقدح فنجان الزيت فى طاسه ونطشه على وش الرز

ونغطيه خمس دقايق وبالهنا والشفا

صباح الفل

mfb:

<{POST_SNAPBACK}>

سيادة الريس والشيف الكبير بودا

انا يا حضرة الشيف مش قصدى انى بورسعيدسه انا قصدى بفنجر فى الكلام وعمله شيف كبير وانا يا دوب اطبخ على قدى

وبعدين انا من القاهره وياريت كنت فى بورسعيد اهلها مهم خفيف

والله من بوء واحده بورسعيديه المنشأ قالت لى

واحد بورسعيد بيقول للتانى اتصور اشتريت اتنين كيلو سمك لقيت فيهم اربع كيلو بطارخ

من هنا جت فنجرة البوء

نيجى للمهم

انا اقصد فى موضوع الارز انه بيبقى جميل جنب البطاطس

برئ يا ريس والحمد لله حلة الرز بتوصل لسفره بسلامه من غير حروق

[ام البنات]

السلام عليكم ورحمة الله ...........

ام البنات ...ايه ده هم البورسعيدية فنجرية بق؟؟  :)  :wub: اوعى يكون حد هنا بورسعيدى ياجماعة الله يخليكم ..

جميلة تكملة الوصفة اللى قلتيها ...بس انت بتسالى عن طريقة الارز الابيض المتوسط ..ولا بتقدمى جنب البطاطس رز ؟...انا الحقيقة باعملها كده لوحدها كفاية عليهم ..ولو حاعمل حاجة جنبها زيادة بيكون سكالوب مثلا وسلطة وحلو قوى كده ....

لكم فى ذمتى وصفة بس استنوا لما اجربها الاول علشان اعرف انا باقول ايه ...

وكلنا لنا عند بودا خمسن وصفة وهو مطنش ياريت يشد حيله بقى ويبدأ يرد علينا ....

صباحكم جميل  mfb:

<{POST_SNAPBACK}>

ياختى فلانه

هو ده الى بسمعه منهم هما نفسهم

انا بحط ارز ابيض جنب ال البطاطس

بس البطاطس بتاعتك متاكمله لا تحتاج الى شئ اخر

تسلم ايدك

ومستنين الوصفه

واخبار الثانويه العامه ايه

[Folana]

السلام عليكم ورحمة الله ..........

النهاردة ياجماعة عيد ميلاد الريس متقال ...قصدى الريس بودا ...وكنا عايزين من شيف الرومانسية يألف لنا حتة كده على ذوقه نغنيها فى عيد ميلاد الريس ...(ماحدش يفهمنى غلط)..انا قصدى الريس بودا ...

كل سنة وانت طيب يابودا وكل سنة وانت حياتك وردى ....مش قادرة افهم طالبة معاك وردى ليه كده ....

وبالمناسبة السعيدة دى كان الاخ الفاضل ابو فصاد له طلب عن سعادتك ارجو الا ترده ..كان متعشم يعنى فى كام وصفة كده خفيفة من غير دسم ..وكان بيأمل برضه ان الوصفات الصحية دى تكون فى باب لوحدها علشان مايخطلتش الحابل بالنابل ...وتفضلو بقبول وافر التحية :blink:

اختى العزيزة ام البنات .....الوصفة جاية فى الطريق بس عايزة اطبخ انا الاول :blink: ..وبعدين ثانوية عامة ايه ؟....انا مااخدتش الثانوية العامة انا وقفت لحد الماجستير ومن منازلهم كمان ...وماحبتش بقى اكمل علامى لحد الثانوية دى ...اما لو تقصدى اولادى ..فدول لسه بدرى عليهم ..ماعنديش ثانوية عامة يعنى ...بس يارب ياخدوا الثانوية علشان اجوزهم حاكم انا حالفة براس ابويا الباشا انى اجوزهم بعد الثانوية ويكملوا دراسة فى بيوتهم ..انا زهقت بقى ... :mellow: mfb:

صباحكم جميل ........... :blush:

[bodda]

العزيزه ام البنات

البورسعيدية اجدع ناس وعندهم احلى وصفات سمك كمان

اما من ناحية فنجرة البق فاسمها عندهم ( الهنجراوية )

يعنى حكايات ابو العربى اللى تجنن

:mellow:

العزيزه فلانه

كل سنه وانتم كلكم طيبين ودايما سباقين للخير

عايز بقى تورتة ميلفى بالايس كريم ماحصلتش

:blink:

اما طلب العزيز ابو فصاد فى الاكل الصحى

فدى تبع شاعرنا الجميل

لان انا اكلى كله مسبك ومشطشط وتوابل

وماليش فى الصحى ومفيد ده خالص

:blink:

وكل سنه انتم طيبين والخروف على الابواب

صباح الفل

:blush:

تم تعديل 29 ديسمبر 2005 بواسطة bodda

[bodda]

المسقعة المفترية

نجيب باذنجان وننقى الحبات البيضاوية وليست الكروية

لانها بتكون فيها بذور اقل بكتير :mellow:

ونقشرها وتقطع نصفين ثم تقطع ترانشات 1 سم

ونكون محضرين حاجه غويطه فيها ميه وملح ونرمى فيها الترانشات 10 دقايق

ده بيقلل الميه جواها ويقلل زمن التحمير كمان

بعد كده نصفيها وننشفها على قماش نظيف و نحمرها فى زيت غزير

وتطلع على مصفاه او ورق يتشرب

نحضر الخلطة :blush:

نعصج لحم عادى بالبصل والملح والفلفل ونضيف له فى اخر التعصيج الآتى

كبشة بندق ولوز مجروش خشن نص كبشة سودانى مجروش زيهم

وكبشة زبيب ..بس الزبيب يتقلب معاهم بعد نزول الخلطة من على النار وتتتغطى

نيجى بقى لصينية الفرن العميقة أو الاحلى بايركس غويط

وندهن بالسمن البلدى ونرص طبقتين باذنجان وطبقة من الخلطة

ونكررها تانى وتالت المهم نختم آخر طبقه بالباذنجان

ونكون محضرين صاصة طماطم متصفيه ومتملحه ومغلية 10 دقايق عالنار

ونصبها على الباذنجان بالراحه ونسيبا تتشرب براحتها

ونحضر بندق ولوز مفرى ناعم

ونرشه على الوش ونخلطه بشوكه بالراحه مع صلصة الطماطم السطحية

ونحدفها على فرن حار تاخدلها حوالى نص ساعه و نحمر الوش

وبالف هنا وشفا مع رز بالشعريه معتبر

صباح الفل

:blink:

[Folana]

السلام عليكم ورحمة الله ....

مافيش صحى ومفيد؟؟؟طب نتصرف احنا علشان خاطر طلبات الاخ الفاضل ابو فصاد غالية علينا ....عايزين منك بقى ياشيفنا العزيز ....تكتب لنا وصفة للريش ..تكون ماحصلتش وتبهر الغلمان .....

وكنت عايزك اسالك ياترى جربت تحط لحمة مفرومة بالصوص الاحمر على الفتة ؟...جربها انا دقتها عند ناس كانت جميلة جدا ..

كنت حاكتب وصفة جديدة دلوقت بس عندى ظروف كده :mellow:

نلتقى بعد الظروف ماتمشى ..........

[ام البنات]

صباحكم فل وجميل ووردى

عندى وصفه صحيه للاخ ابو الفصاده

بس على راى فلانه ورياه حاجه اخلصها وارجع

وعلى راى بتوع المزيكا نحتايه ونخلص

سلام

[Folana]

السلام عليكم ورحمة الله ....

حاقدم لكم النهاردة طريقة عمل شوربة البروكلى بالكريمة ....جاهزين ؟؟طب يالا ..

حنحضر كيلو بركلى مثلا ..وننضفه زى القرنبيط ....وبعدين نقطعه حتت صغيرة ..

حنجهز كمان شوية زيت زيتون ....بصلة مخرطة....جوزة الطيب (شوية على طرف الملعقة يعنى )...شوربة فراخ ...حوالى اربع كوبايات ...نص كوباية شوفان ..ملح وفلفل للتتبيل ...

الطريقة ...نسخن الزيت على نار متوسطة ..ونضيف البصلة ونقلب لحد مالونها يبقى شفاف ...يعنى نقول حوالى خمس دقايق..ونضيف جوزة الطيب الناعمة طبعا ..ونقلب شوية ...حوالى نص دقيقة ..حنضيف باقى المقادير ..الشوربة والبروكلى ولما البروكلى يبدا يطرى شوية ويدخل على السوا يعنى نضيف الشوفان ونوطى النار لحد مايستوى ..ونتبل بالملح والفلفل ...وبعدين نبعد الخليط عن النار ونضربه فى الخلاط

ونرجع تانى نحطه على النار ونقلب لحد ماياخد غلوة كده ...ونظبط الطعم ....ونظبط التخانة بتاعة الشوربة يعنى لو طلعت سميكو زيادة نزود شوربة او شوية مية لو الشوربة خلصت ....

وبالف هنا ... :blush:

الاخ الفاضل ابو فصاد ...متهيالى ممكن تجرب الشوربة دى مافيهاش دهون عالية يعنى زيت الزيتون صحى وكذلك البروكلى وايضا الشوفان ....ومتهيالى ان الاكل مش هو المتهم الوحيد فى موضوع الكوليسترول ده ....عموما لو فيه وصفات صحية اكتر حنبقى نكتبها فى موضوع صحى ومفيد وارجو من الاخوة المساعدة ..يعنى مش عايزة طناش ..انا عصبية :mellow: :blink:

[شاعرالرومانسية]

حمدالله على السلامة يا شيييييييف :)

جيت فى وقتك بالظبط ..

الاعياد على الابواب وكنا حنحتاس انا وفولانة مع طلبات الزباين.... :blush:

بس والله واضح ان معظم الزباين مطبخجية قرارى ..

اخونا النسر جابلنا وصفة فلسطينية شكلها هايل .. كنت بسمع عنها ومجربتهاش ..طبعا اولى جولاتى المطبخية القادمة حتكون الوصفة دى ... تسلم ايدك يا نسرنا الكريم :blink:

وكمان اختنا ام البنات بتقول حتقول وصفة بس بعد الظروف اللى جت ..

انا بقالى يومين بسمع عن وصفاتها .. من غير ما اشوف حاجة .. ( واضح انها فعلا بتروح بورسعيد كتير :D )

المهم .. بقى كلنا حنطبخ وناكل اكل بعض فى الاخر :D

اما بالنسبة لطلب اخونا ابو فصادة .. انا كنت منزل موضوع عن الاكلات الصحية .. بس الطلب مكنش علية كتير .. انتم عارفين طبعا شعبنا مالوش فى الاكل الصحى دة :mellow:

عموما نجدد الموضوع تانى وربنا ما يقطعلنا زباين :blink:

وبعدين نسيبنا من دة كله بقى ونشوف حكاية عيد الميلاد دة ياولاد .. محدش جاب فته ... قصدى تورتة

ودستين ممبار كدة ..يووووة قصدى شمع

دة عيد ميلاد كبير الشيفات ( مش جمعها كدة برضة :o )

وبالنسبة لأغنية يا ست فولانة .. طبعا .. احنا عندنا كام بودا ..

حضرى الالاتية وتعالى ورايا .. نقول

بودا يابودا يااجمل شيف

أكلك حلو..على المعدة خفيف

لحمة وسمكة.. رز وفرخة

مش حتقولى بيضة ورغيف

بودا يابودا ياأجمل شيف

وصفاتك دايما فى الجون

بتحبشها بزيت ولمون

ايها وصفة تطلب منك

بتقدمها لكل زبون

عيدك عيدنا ياعم الكل

بس علينا بص وطل

نتمنالك سنوات جاية

تبقى سعيدة وزى الفل

وكل عام وانت فى وسطنا يا شيفنا العزيز،،، mfb:

تم تعديل 29 ديسمبر 2005 بواسطة شاعرالرومانسية

[Folana]

السلام عليكم ورحمة الله.........

الفيليه المشوى مع صوص البصل بالكراميل

المقادير ....حنحضر كيلو لحم فيليه للشوى ...(على فكرة ياجماعة مالكوش دعوة بالمقادير قوى ..يعنى انا باحط نسب تقريبية وانتم بقى تظبطوا وانتم بتشتغلوا )....حنحضر كمان حوالى تلات او اربع ملاعق مستردة ...شوية صويا صوص ...حزمة زعتر اخضر ناخد الزهرة بتاعته بس ...او ممكن روز مارى ..ونخرطها ..طبعا قصدى على الاوراق ...فصين او تلاتة توم مطحونين ..شوية زيت زيتون ...ملح وفلفل ..وطبعا معروف ان الفلفل الاسود بيفضل طحنه فى الحال اثناء الاستخدام علشان يكون محتفظ بنكهته....

حنخلط كل المقادير دى مع بعضها ونشيلها فى التلاجة ممكن قبلها بيوم ...بعد كده حنسخن الشواية كويس جدا وندهنا بشوية زيت نونو خالص ...ونبدأ نشوى اللحمة ..على كل وش لحد ماتاخد لون بنى يعنى تقريبا تلات او خمس دقايق لكل وش ...

حنسخن الفرن ونرص اللحمة فى صينية وندخلها الفرن تستوى تقريبا نص ساعة ...نخرجها من الفرن ونسيبها تهدأ.....

للصوص

حنحضر زبدة ...وحوالى سبع او عشر روس بصل اخضر بس الرأس البيضا فقط ونقطعها حلق رفيع ...ملعقة سكر ...نص كوباية عصير عنب او رومان بدون سكر طبعا ...شوية خل صغننة ...شوية شوربة لحمة نقول كوبيتين او حسب ماانتم شايفين ..ملح وفلفل

حناخد جزء من الزبدة نسحيه على النار ونضيف البصل ونسويه تقلبيتين كده لحد مايبقى اللون شفاف ...يطرى ويبدأ ياخد لون خفيف ...حوالى اربع او خمس دقايق ...نضيف السكر ونقلب شوية لحد السكر مايسيح نضيف عصير العنب (وده ممكن يتباع فى السوبر ماركت )..او عصير الرومان ...ونضيف الخل ....

نهدى النار شوية ونقلب شوية لحد عصير العنب ماكميته تقل ..تقريبا عشر دقايق ياجماعة او برضه حسب اللى قدامكم ...لحد مايتشرب يعنى وبعدين نضيف الشوربة ونسيبها بقى على النار لحد برضه ماالكمية تقل للنصف تقريبا ...حوالى ربع ساعة ...

نشيلها من على النار ونضيف باقى كمية الزبدة ونقلب لحد الصوص ما يبقى سميك معانا ...وتتقدم جنب اللحمة وممكن كمان نقدم معاها خضروات مشوية ...او سوتيه او بطاطس ....

[bodda]

مش ممكن يا ابو على

:blink:

تسلم ايدك على القصيدة الطعمة اللذيذة المسبكة دى

:mellow: :blink: :blush:

ومش هاعلق على الوصفات بتاعتكم المره دى

و سيبونى استطعم الشعر الجميل ده

مساء الفل

وكل سنه واحنا متجمعين فى مطبخنا العامر

mfb:

تم تعديل 29 ديسمبر 2005 بواسطة bodda

[abofasad]

يا شاعر الرومانسية يا رايق

اسمك يجبرني اقولك يا رايق

اشكرك على انك حتجدد موضوع الوجبات الصحية

واسمحلي أقول ان كل الوجبات صحية

ولكن العواجيز اللي زيي عاوزين اكلات خفيفة على المعدة وتقلل من الكولسترول وتساعد على تخفيض ضغط الدم

ويا ريت يكون التجديد في موضوع جديد وبلاش يمر على مطبخكم العامر ذو الروايح الحلوة اللي تفتح النفس

[bodda]

شوربة البروكلى يا فلانه جميله جدا

ومنورنا يا ابو فصاد الجميل

ونيجى بقى للفيلية المشوى :)

طبعا الطريقه سهله وممتازه وجايه عالعيد تمام

بس انا باخلط مع الزبد حتة سمن ومعلقة زيت وده بيمنع احتراق الزبد

ويديله فرصه عالنار أكتر لتسوية اللحم وتنفع مع البتلو برضه

بس يكون متقطع سميك :)

وباعمل الصوص بالمتبقى من التحمير وأضيف له فنجان صغير لبن

وبعدين نص كوباية عصير عنب ( فى الأصل مفروض نبيت ويولع )

و من غير شوربه بس طبعا الملح والتوابل عادى

تسلم الايادى

صباح الفل

:)

تم تعديل 30 ديسمبر 2005 بواسطة bodda