اطلب اى وصفه على بالك .. تلاقيها قدامك

[Osha]

الله يسلمك يا حسن

والله التأخير مش بمزاجي - الشركةاتأخرت في تركيب النت في الشقة - وكنت عاملة زي فقراء الهنود بانام الساعة عشرة بالكتير - مافيش نت ولا مسنجر ولا منتدى ولا أي حاجة خالص

الولاية الجديدة زي الولاية القديمة مافيش فيها نمط معين للاكل

انما ربك والحق يا حسن انا اتعزمت في حفلة وكانوا عاملين سلطة بلسان العصفور وعليه شوية فلفل اخضر على فلفل اصفر على الوان وبصل وحاجات كتيرة

وانا عندي نية اني اعرف بتتعمل ازاي لانها كانت حلوة اوي

انما لو بودا قبل التدبيسة دي وقرر يوفر عليا مذلة السؤال يبقى خير وبركة

كلاكيت تاني مرة تدبيس

[Reham]

ايييييييييييييييييييييييه.........دنيا

انا هنا ياجماعه من زمان انتوا اللي مش واخدين بالكوا مني

وبعدين انا ماشوفتش رشا من السنه اللي فاتت زيي زيكم

وقال ايه..بتقولي ماينفعش ننزل مصر السنه دي

طب اعمل معاها ايه المودام دي؟؟؟؟

ده انا قضيت الصيف اللي فات اجازة مايعلم بيها إلا ربونا

شكرا بودا علي التراحيب

وكل سنه ونت طيب ياراجل ياطيب

بقي عندك كام سنة بقييييييييييي

قول وماتتكسفش

اذيك يافولانه يابنتي

ليكي وحشه والله ياشيخة

الله يبارك فيكي انا دبست وجدي في الطقم ده حلو مش كده

اتفضليه والله بجد مايغلاش عليكي

بس تدبيسة حلوة وياريت كانت بجد :D

ليكي والحق ....انا فقرية علي رأي ناس كتير انني مش بحب الذهب ولا المجوهرات

احسن :D

بالنسبه للقهوة العربي.... :D ...شوفي ياستي

لوكانت مطحونه جاهزة...خدي قيمة معلقتين كبار علي كوبايتين ميه

وحطيهم علي نار هاديه شويه لغاية لما يغلوا وبعدين سيبيهم يغلوا دقيقتين وانتي واقفة جنبها عشان بتفور

وبعدين امسكيها وصفيها في مصفاة ضيقه عشان مايبقاش فيها رواسب وانتي بتشربيها

وحطيها في ترمس شاي وكل شويه خديلك فنجان زي مابيعملوا اخواننا السعودين....

اما بقي لو ماكانتش مطحونه :D

فخديها واطحنيها عند اي واحد بتاع بن وريحي نفسك لانك لو طحنتيها في البيت مش هتطلع ناعمة ابدا

وبألف هنا وشفا

حسسسسسسسسسسسن :D

يابني انا هنا من زمان خللينا بس تحت النظر :)

كلا كيت خامس مره"برده"

[bodda]

حرام عليكى يا ريهام

بقى القهوه السعودى العربى عبارة عن بن مطحون وخلاص ؟؟؟؟

ده التلتين بن والتلت حبهان ( هيل )

ولازم يكون البن متحمص نص تحميصه كده

ولازم جنب القهوه دى تاكلى بلح وتمر مسكر

:D

اوشا هانم

تدبيسة ايه بس هوه انا فهمت حاجه ؟؟؟

لا بهذر ولا يهمك جاهز برضه

صباح الفل

:D

[مصرى فى دبى]

:D

الاخت ام البنات

ارجو من سيادتكم معرفه وصفه النجرسكو

وشكرا

[Folana]

السلام عليكم ورحمة الله ...

ريهام...ربنا يكرمك ويرضى عنك يارب ..والله انا كنت منحرجة شويتين انى اخد منك الطقم الماس لفة كده على الماشى ..اصلك ماتعرفيش ..انا فى موقف لا احسد عليه

اقولك ...

بقى انا رحت اجتماع لمقابلة السادة مدرسين بنتى اللى فى الاى جى ..على اساس نفهم يعنى الزفة جاية منين وكدهوت ...انا رحت بقى ودخلت عليهم بالحنجل والمنجل والصلاتو على النبى ..شفت بقى منظر الستات اولياء الامور حاجة كده زى اللى بنشوفهم فى مجلة الشبكة :D...رجعت ورا خطوة ..المهم بدانا نتكلم مع السادة الدكاترة دول ..ويابنتى كل مااجى اسال على بنتى الاقيك واحدة صفراء الشعر .. خضراء العدسات ..قصدى العيون ..حمراء الخدود والشفايف ..ورابطة كف ايدها اليمين ...(فهمت بعد كده بذكاوتى انها مش عايزة تتلوث بالسلام على عامة الشعب امثالى )...وايدها التانية فيها موبيل من ابو ست الاف جنيه ..وماسكة عليه سبحة السلسلة بتاعتها دهب والحبات بتاعتها كهرمان ..ولابسة فى صوابعها خاتمين الماظ من الصنف بتاع وجدى كده ...كنت باقول كل مااجى اسال سؤال ..تروح رافعة ايديها المحملة دى فى وشى وتقولى بدرروووووم

وعينى تزغلل بقى من بريق الماس ..واشهق وارجع بصدرى كده لورا من الخضة ..وتروح متكلمة هى ...اروح لدكتور تانى واقوله انا سعادتك والدة ..ولسه حأكمل ..الاقى الكف اياه قدام عينى وصوت بيرن فى ودانى جاى من ورايا ..بدرررروم يامدام ..وتروح متكلمة هى ...

انا انهرت بصراحة ...اصلى مش قايلة لحد انى ساكنة فى بدروم يعنى ..ولا عاملة جمعية علشان اسدد مصاريف الاى جى ...عرفت منين بنت الناس الطيبة دى انى ساكنة بدروم ؟..ما اعرفش ..وبتهددنى بقى ..انها تجرسنى وكده امام علية القوم ...وكل مااجى اتكلم تفكرنى بالبدروم وترفع الالماظ والكهرمان والدهب والموبيلات فى وشى علشان اعرف مقامى ..فقلت بقى استلف منك طقم الالماظ ده لحد ماانزل الموسكى اتصرف ....المهم مسكت بنتى بقى ولسه حاكلها ..وقلت لها انا مش منبهة عليك ماتجبيش سيرة البدروم ده ...قالت يامامى ...الست بتتكلم فرنساوى ..وبتقولك بردون ..يعنى لامؤاخذة ..

[Folana]

:D

الاخت ام البنات

ارجو من سيادتكم معرفه وصفه النجرسكو

وشكرا

<{POST_SNAPBACK}>

السلام عليكم ورحمة الله ...

مصرى فى دبى ..مرحبا بك فى مطبخنا العامر بقيادة ام البنات :D ...ايوه هى القائد بتاعنا هنا ..وحتكتب لك احلى وصفة نجرسكو غير اللى باظت منها :D

طبعا ده طلب خاص لام البنات ..بس احنا مالناش دعوة ...الاخت العزيزة ام البنات حتتكفل بالرد والوصف ...وانشاء الله ترفع راسنا عالية وتكيد العوازل ....

مرحبا بك ضيف عزيز مرة اخرى

صباحك جميل ..............

تم تعديل 3 يناير 2006 بواسطة folana

[Folana]

السلام عليكم ورحمة الله .....

أوشا ..ينفع انا اقول وصفة اللسان دى بدل بودا؟.....(بدروم ياريس بودا يعنى )...

ولا مش عجبتك يبقى بودا يصلح ....

سلطة لسان العصفور

حنجيب شوية لسان عصفور ...ونحمصهم شوية صغننة وبعدين نسلقهم ...حنحمصهم باننا نحطهم فى صينية وندخلهم الفرن ..بدون زيت او سمن ...وحنحمصهم برضه لاننا لو سلقناهم كده حيبقوا معجنين ...ولو عايزينهم مسلوقين بس مايضرش ...

حنجيب كمان فلفل رومى الوان (احمر واخضر واصفر وبرتقالى ...ونقطعهم شرائح رفيعة او مكعبات ونضيف عليهم ذرة صفرا ....سويت كورن يعنى

وحنكون محضرين فاصوليا حمرا مسلوقة او فاصوليا سودا مسلوقة برضه ...ودول بيتباعوا معلبات فى السوبر ماركت (اختيارى )

بس طبعا ناخدها شطفة كده قبل مانضيفها على المحتويات بتاعتنا ..

نقلب المقادير مع لسان العصفور (بعد تصفيته من المية طبعا )...ونجهز خليط من الخل وزيت الزيتون وفص توم مدقوق ناعم جدا (اختيارى)..ونتبل بالملح والليمون ..وممكن على فكرة نضرب ورق شبت او ورق بقدونس ...ونقلب كل ده على بعضه ..وتوضع فى التلاجة .....

وبالهنا والشفا ...

(بودا ...برجاء المراجعة الدقيقة وتصحيح مايلزم ).................

[ام البنات]

:D

الاخت ام البنات

ارجو من سيادتكم معرفه وصفه النجرسكو

وشكرا

<{POST_SNAPBACK}>

السلام عليكم

استاذنا بودا يا بنات من أول فلانه لغايه اوشا وريهام وحتى الاستاذ الشاعر

الحقونى :D :D

ملقوش الا اخيب واحده ويسالوها

تمام :D

حضرتك النيجرسكو عاوز تعرف الطريقه على بفيلم آه من حواء هى دى الطريقه السليمه ميه فى الميه :D

ريس بودا حرمت اخر مره اعمل طباخه الحقونىىىىىىىىىىىىىىى

فاصل ونواصل بعد يجى يومين :D

[ام البنات]

:D

الاخت ام البنات

ارجو من سيادتكم معرفه وصفه النجرسكو

وشكرا

<{POST_SNAPBACK}>

السلام عليكم ورحمة الله ...

مصرى فى دبى ..مرحبا بك فى مطبخنا العامر بقيادة ام البنات :P ...ايوه هى القائد بتاعنا هنا ..وحتكتب لك احلى وصفة نجرسكو غير اللى باظت منها :D

طبعا ده طلب خاص لام البنات ..بس احنا مالناش دعوة ...الاخت العزيزة ام البنات حتتكفل بالرد والوصف ...وانشاء الله ترفع راسنا عالية وتكيد العوازل ....

مرحبا بك ضيف عزيز مرة اخرى

صباحك جميل ..............

<{POST_SNAPBACK}>

أختى فلانه :wub: :D

احنا فينا من كده :D

ليه بس حرام :D

خلى الطابق مستور :D

اخونا مصرى فى دبى ميعرفش انى مستجده ويادبوك بغسل الصحون واكنس الارض

ويعنى شوية سلطه ميمنعش

فلانه استرى على :D :D

[bodda]

اى اوامر للعزيز المصرى فى دبى

ولا يهمك يا ام البنات

وعلى فكره انا كتبتها قبل كده هنا لكن ننزلها تانى

مكرونه نجرسكو

تجيب نص كيلو صدور فراخ مخلية وتقطعها مكعبات

وتشوحهم عالنار مع معلقتين سمن أو زبده كبار

وبعدين تشيل الفراخ نص سوا :D

وتحط عالسمن معلقتين كبار دقيق وتتقلب بسرعه

مع ملح وفلفل ويا حبذا مبشور نص جوزة الطيب

وننزلها من عالنار

ونحط كوبايتين لبن حليب ونقلب بسرعه ( باشاميل يعنى )

ونحط قطع الفراخ ونقلب :D

المهم القوام يكون متوسط ونتحكم فيه باللبن والدقيق

ونجيب مكرونه سباجيتى او شرايط مسلوقه ومتصفيه

نقلبها مع الخلطة السابقة وندلقها فى صينيه فرن

وممكن نضرب بيضتين كويس ونمسح بيهم وش الصينية

ونرش على وشها تلات معالق كبيرة مبشور جبن رومى

ولما تطلع من الفرن اقفل الاوضه كويس قبل الاكل منعا للحسد

:D

وبالف هنا وشفا

مساء الفل

:D

[bodda]

مستنيين وصفة لسان العصفور من فلانه هانم

علشان نشوف وصفة جديده

مساء الفل

:D

[Osha]

بودا العزيز

انا لما كنت في السعودية حاولت اشرب القهوة العربي دي كتييييييير انما ماقدرتش لسببين اولا اني مش باشرب قهوة اصلا والسبب التاني عشان الحبهان لان ريحته فيها زاعقة جدا

وعشان كده لما قريت وصفة ريهان استغربت عشان ماكنش فيها حبهان

لكن ماقدرش اقول غير ان وصفتها عشرة على عشرة طبعا :D

ثم تعال هنا لو سمحت ادي التمام الأول وبعدين نتفاهم

قلت انها مش تدبيسة قلنا ماشي

وقلت ان الحاجة جاهزة وبرضه قلنا ماشي

فين بقى الوصفات الله يرضى عليك :D

تارت القرع العسلي كان جميل اوي اوي

وطبعا انت عارف ان التارت هنا بيتباع جاهز على الخلطة - يعني ممكن لو تارت التفاح كمان يبقى ميت فل وخمستاشر

وياريت فيه تارت بتعمل بعين الجمل غريب اوي اكلته وقت عيد الشكر برضه لو تعرفه - واكيد انت تعرفه طبعا - ابقى فوته في السريع

أم البنات

أنا ماعرفتش - طال عمرك - وصفة النجرسكو غير لما اتعرفت معرفة الخير على بودا - وهو برضه الخير والبركة ولا يفتى ومالك في المدينة

فولانة

أوووووووووووووووووووووووووووووووووت

شكل الوصفة مش هي هي :D

أنا أصلي قبل العشا عنيا اتكعبلت في صاحبة البيت وهي بتشوح الخضار على النار

وبعدين معلش لم افهم ازاي اللسان العصفور يتشوح في الفرن?

ولا كان فيها ذرة صفرا

وكمان كان فيه ريحة جبنة معدية وزيت زيتون

على فكرة حاسلط ريهام ماتدكيش الطقم الالماظ ولو اني مش فاهمة الموضوع

اتصرف يا بودا

حسام عامل لي مشكلة وعاوزها وانت عارف اليومين دول صيام ولازم أكل كل يوم :D

[bodda]

أوشا هانم

طبعا وصفة فلانه هانم صح وتمام بس انتى مش واخده بالك

:P

لان لسان العصفور فى اى حاله لازم يتشوح عالسريع قبل السلق

وبعد كده ممكن تشوحى خضروات مختلفة بالطريقة الصينى

يعنى معلقتين زيت يتقدحوا اوى ونرمى الخضار بسله/جزر/فاصوليا خضرا

وممكن برضه زى ما قالت الفاصوليا الناشفه بس بعد سلقها تتشوح برضه

بعد كده بنخلط كل الحاجات مع بعض عالبارد ونضيف فرافيت جبن رومى مبشور

وخلطة زيت الزيتون مع عصير الليمون أو الخل

وطبعا الملح والفلفل

:)

معلش فلانه هانم ماشوفتش الوصفه قبل الرد اللى فات والعتب عالزهايمر

صباح الفل

:wub:

تم تعديل 4 يناير 2006 بواسطة bodda

[bodda]

تارت التفاح

3 معالق كورن فلاور و نص كوباية لبن و معلقة صغيرة فانيليا

نص كيس بيكنج باودر و 4 معالق كبيره سكر وكوبايه ونص دقيق

و ربع كيلو زبده هاناخد نصه للعجينه ونصه فى الحشو

نخلط اللى فات ده كله فى العجانه حتى التجانس التام ونضبط باللبن

ونسيب العجينه ترتاح نص ساعه ( المهم تكون مش ناشفه ولا ناعمه اوى)

بين البينين :P

نيجى بقى للحشو... :)

كيلو تفاح أخضر نقشره ونقطعه نصين وربعين وتمنين

يعنى التفاحه تطلع 8 قطع شكل الهلال

نحط باقى الزبد فى صينية التارت عالنار ( بتكون بحافه متعرجه )

ولما تظهر رغوتها نحط عليها تلتين كوباية سكر ونقلب بسرعه وننزلها من النار

نرص قطع التفاح بحيث تملا الصينيه ونحطها تانى عالنار الهادية

لغاية ما يحصل كرمله للسكر ويتلون التفاح شويه ننزلها تانى من على النار

ونفرد العجينه ونغطى بيها التفاح تماما ونحشر العجينة حول التفاح من الاطراف

وندخلها فرن حامى لغاية احمرار الوش

نطلعها من الفرن ونسيبها تهدا شويه ونغطيها بطبق التقديم ونقلبها

هايبقى التارت من تحت والتفاح بصوص الكراميل من فوق

وممكن نعمل كراميل بزبده تانى ونصبه عليها كمان لو بتحبوا كراميل كتير

وبالهنا والشفا

:wub:

تم تعديل 4 يناير 2006 بواسطة bodda

[Reham]

فولانه ...

اتفضليه طبعا دا مايغلاش عليكي ابدا

وانا عندي يعني كام فولانه ...هي واحده بس والله

وخللي رشا تتغاظ عشان هي بتذلني وبتقولي يمكن ماتقدرش تنزل مصر السنة دي

خللي الست ماما امريكا تنفعها :)

اما بالنسبه للقهوه العربي ياعمنا ياكبير

انا بحسبها عندها كل المكونات بتاعتها علي بعض

عموما هي زي ماسيادة معاليك قولت سابقا بالإضافه اننا بنحط عليها زعفران بيخللي ريحتها تطلع حلوة

انا بروح المحمصة هنا واقوله عايزه قهوة سعودي وهو بيعمل الباقي

وانا بشربها ...وياحلاوتها وجنبها التمر ولا شوية شيكولاته بتبقي عجب العجاب

بيقولوا عليها بتخسس....آل صحيح بتخسس

حد يرد عليا ياعالم عشان لو كان كده انام وأصحي عليها

[bodda]

ريهام هانم

طبعا القهوه السعودى بتخسس

بشرط يكون معاها تمر معسل أو شيكولاته كتيييييييييير

:) :P :wub:

صباح الفل

:wub:

[Folana]

السلام عليكم ورحمة الله .....

بودا العزيز ,,,, :P ....تسلم ايديك على التارت ..كان نفسى اتعلمه من زمان والله ...ان شاء الله اعمله فى العيد ..(اصلنا مش حندبح ) :wub: ...

تعرف يابودا بالنسبة لوصفة اللسان ..انا واخدها من اسامة السيد ...بس متهيالى ممكن تتعمل بكذا طريقة برضه ...مرسى على ذوقك ..هو ده العشم برضه .. :wub:

كنت عايزة اقولك كمان ..عمرك سمعت عن الارنب المحشى ؟؟؟..انا سمعت بقى وحاكتب لك طريقته ..قصدى حانقلك طريقته انا ماجربتهوش طبعا لانى مااطيقش الارانب دى خالص ...بس حاكتبها لك بعد شوية ....وقولى رأيك

ريهام ....ربنا مايحرمنى منك ولا من ذوقك وكرم اخلاقك ....انا ازودهولك انت تستاهلى اكتر من كده ..ده كفاية لسانك اللى بينقط سكر ...ربنا يبركلك يارب ..

متشكرة جدا على القهوة ..انا اضيف لها بقى حبهان لانها من غير فعلا ...وكمان زعفران ...واقولك على النتيجة ...انا باشربها كده من غير حاجة جنبها ..يادوب شاندوشت كفتة وخلاص ...

اشوفكم بعد الفاصل ..... :)

تم تعديل 4 يناير 2006 بواسطة folana

[Osha]

أسعدتيني انك مش بتحبي الارانب يا فولانة هانم

اصل الواحد بيحس انه بياكل قطة

طبعا بودا مش حيعجبه الكلام دا

عامة بالنسبة للسان العصفور اناشكلي حاسأل الست - لانه يبدو اني ماعرفتش اوصل القصد والنية

ويبدو انها اصلا ماكانت سلطة

ريهام القهوة بتخسس طبعا - حتى اسالي حسام وهو يقولك

وبعدين حاتغاظ ليه ياروحي - انت بس مدي ايدك في جيبك وهاتي تمن التذاكر - طبعا الاقامة حتبقى عندك والاكل عليكي طبعا

بودا

تارت التفاح ينفع اعمله بفواكه مشكله اصلي مش باحب التفاح

ثم انا قلت لك ان التارت جاهز على السوا - يعني دلوقت اسوي التارت ازاي

انت عارف اني لخمة في المعجنات وبلاش فضايح

سؤال كمان عشان عاوزة استشارة غذائية

هل فعلا الموز له علاقة بالبوتاسيوم في الجسم?

وماهو تأثير نقص البوتاسيوم على الجسم وهل له علاقة بالضغط?

ودمتم جميعا سالمين وبخير

وربنا يبعد عنكم الضغط الواطي والعالي

[Folana]

السلام عليكم ورحمة الله .........

اوشا ...الارانب دى يوم مااطبخها مش بأكل اصلا ..ولا اعرف طعمها ايه ..بس زوجى العزيز بقى بيحبها جدا وانا مااقدرش ازعله ..(طبعا عارفين ليه :rolleyes: )...لكن حاكتب وصفة الارنب المحشى ده ..للى بيحب الارانب ولو انى مش متخيلة يعنى بيتعمل ازاى ...

سؤالك عن الموز بقى ..اسمحى انزل سبتى ..لا ..لا ..مش دى ....ايوه ..خلاص ..اسمحى لى ادلو بدلوى ...هه هى دى ولا حاجة تانية ؟...

طبعا الموز بيحتوى على البوتاسيوم ...لكن البوتاسيوم موجود فى حاجات تانية منها :...

حنقول الموز طبعا ...الفاكهة ..الفاكهة المجففة ....التمر ..عصير البرتقال ....الخضروات عموما ...السبانخ والمشروم خصوصا ...القهوة ...اللبن ومشتقاته ..اللحوم

فائدته ووظيفته ...

ايجاد التوازن بين مختلف الاملاح والمياه بالجسم ...عدم ترهل انسجة الجسم ....تنشيط عمل الانزيمات ..تحسين قيام العضلات بوظائفها وخاصة عضلة القلب

..وبالنسبة لعلاقته بضغط الدم ..هو فعلا بيقلل من مخاطر ارتفاع ضغط الدم ...يعنى بيوطى الضغط ....

الاثار المترتبة على نقصه :...

هبوط فى النشاط العام للجسم ...اضطرابات فى وظائف الاعصاب والقلب والعضلات وفى عمليات هضم الطعام

احتياجات الجسم اليومية :...

للبالغين : 2 جرام

للاطفال : 1.4 جرام

ويكفى غذاء متوازن متكامل من المواد الغذائية المذكورة لامداد الجسم بما يحتاجه .

معكم من فرن البوتاجاز ..د\ فلانة ...

تم تعديل 5 يناير 2006 بواسطة folana

[مصرى فى دبى]

الاخوات الاعزاء

بمناسبة العيد الاضحى كل سنه وانتم طيبين

ممكن عايزين وصفه الكباب المصرى المشوى زاى بتاع المحلات

كمان وصفه وخلطة الكفته المشوية المفحفحة

كمان وصفه النيفة

معلش حنتعبكم معنا بس عيد بقى وكل عام وانتم بخير

اخوكم

مصرى فى دبى :rolleyes: