اطلب اى وصفه على بالك .. تلاقيها قدامك

[Folana]

السلام عليكم ورحمة الله .....

الاخوة فى الكفاح ..كل سنة وانتم طيبين جميعا بمناسبة عيد الاضحى ...واشوفكم بعد العيد ان شاء الله ...لانى راحلة .........

الاخ مصرى فى دبى ..ان شاء الله بودا حيكتب لك الوصفة ..وبالهنا والشفا مقدما ..

عيد سعيد ............

تم تعديل 5 يناير 2006 بواسطة folana

[bodda]

العزيزه فلانه

انا شفت فيلم انى راحله ده قبل كده ;)

بس كان ابيض واسود :wub:

ترجعى بالسلامه

العزيز مصرى فى دبى

بالنسبة للكباب فأحسن طريقة استعمال اللحم البتلو

لان الضانى لو ماكانش صغير اوى ( اوزى ) هايتحرق منك قبل السوى

والبتلو هو الافضل ومن الفخده

والتتبيله بتاعة الكباب

افضل شئ عصير البصل مع الملح والفلفل وعصير الليمون

ونفس التتبيله تستعملها مع الكفته

بس الكفته لازم يدخل مع اللحم الاحمر نسبة دهن 10-15 % على الاقل

وكمان اللحم لو فيه 20 % لحم جمل يبقى كفتة محترفين

لان لحم الجمل هوه الوحيد اللى يخلى صباع الكفته لا يقع وينفصل عن السيخ

والنيفه هى لحم الجدى الصغير وطبعا دى احلى طعم فى الشوى

واى خدمات ومنور مطبخنا الجميل

مساء الفل

:)

[bodda]

اوشا هانم

طبعا التارت ممكن ينفع بفاكهة مختلفة

موز شرائح - كمثرى - كنتالوب - بلح رطب ... الخ

المهم حاجه ماسكه نفسها وتصلح للتحمير

وطبعا الموز هو اغنى انواع الفاكهة بالبوتاسيوم

واهميته زى ما قالت فلانه وكمان منظم لضربات القلب

وله اهميه للشعر كمان

اما الكالسيوم فلا يعوضه اى مصدر غذائى خاصة للهوانم

:wub:

لان الهانم محتاجه 1200 مللجم كالسيوم يوميا

بينما كوباية اللبن فيها 120 مللجم

يعنى لو هاتهعتمد على اللبن كمصدر للكالسيوم يبقى عايزه بقرة فى المطبخ

:) ;) ;)

مساء الفل

:P

[Osha]

فولانة

ترجعي بالسلامة وسلام امانة لمديحة يسري وكل سنةوانت طيبة

بودا

احم احم

اولا انا خايفة انضرب النهارده - اصلا انا مش باكل فاكهة سعادتك وعشان كده باحاول اتحايل على روحي بأي وسيلة

الخلاصة يعني اللي كنت باسأل عليها - هل ممكن استخدم الفواكة الكمبوت بدل الفريش - اقله بيبقى لها طعم

بالنسبة للبوتاسيوم - انا اصل بقالي فترة باحس ان دق قلبي مش منتظم وسمعت نصيحة عن الموز وقلت أسأل أهل الخبرة برضه

المشكلة اني برضه مش باكل الموز!! انما ممكن اعمله موز باللبن وأمري لله

حكاية الكالسيوم بقى دي موتتني من الضحك انما تصدق ان فكرة البقرة في المطبخ مفيدة برضه - توفير بيني وبينك ممكن الواحد يعمل زبدة طبيعي ويلف على الجيران يبيع زي مصر - وياسلام بقى على جبنة قريش

واهو الواحد يبقى له البيزنس بتاعه برضه

طيب جنابك قلت المشكلة - فين الحل يعني ?

لو على افتراض ان الواحد - لا قدر الله - شرب كوباية لبن يبقى حيوفر عشر الكمية المطلوبة - نعمل ايه عظمتك في الباقي

يعني من الآخر اتصرف في التسع أعشار الفاضلين عشان نكمل الاحتياطي اليومي من الكالسيوم

ويجعله عامر

:wub:

[bodda]

اوشا هانم

طبعا الفاكهة الطبيعية لا يعلى عليها كمصدر للفيتامينات والاملاح

لكن طالما فيه عداء مزمن بينكم فلن يعوض الفاكهة الا الاجزخانه

:o

يعنى قرص بوتاسيوم على قرص كالسيوم على فيتامينات ...الخ

:wub:

بالنسبة للكالسيوم بالذات فلازم تاخدى الكمية اليومية عن طريق الحبوب

لان حضرات الهوانم معرضين بشدة لهشاشة العظام ابتداء من سن التلاتين

وانا عارف طبعا ان كلكم ماوصلتوش لسه للخمسة وعشرين

:)

بس قلت انبهكم بدرى شويه

ولا يمنع هشاشة العظام الا الامداد اليومى للجسم بـ 1200 مللجم كالسيوم

فلازم يكون اللبن ومنتجاته اساسى فى الغذاء + 1000 مللجم من الاجزخانه

بس فكرى فى موضوع البقره هاتلاقيه كله فوايد

و اهو العيال تركب وتتسلى ... وانتى تعملى بيزنس عالجيران

وحسام يرتاح منكم

;) :P ;)

احلى صباح

:P

[Osha]

صباحك فل يا عمنا ايه الروقان دا

بالنسبة للسن - انا مش حاكذب طبعا انما اناعندي 26 سنة مش خمسة وعشرين - انما كويس انك قررت تنبهنا بدري - احنا فيييييييين والتلاتين فييييييين يا عم

:blush:

وبرضه ماردتش عليا في حكاية الفواكة المعلبة

يعني انا امشي وراك بميكروفون عشان ماتنساش الطلبات والا ايه يعني???

:rolleyes:

على فكرة انا قررت اوصي على بقرة صغيرة عشان تتربي معانا وتاخد علينا وعلى القطة وماتحسش بالغربة لما تيجي - وبالتالي انتاجها من اللبن يزيد والخير يكتر ويعم

شفت الاستثمار اللي على المدى الطويل دا مش اي كلام

:lol:

سؤال يا باشا ولو اني عارفة ان الاجابة ممكن تتأخر عشان العيد انما برضه اسأل مايجراش حاجة

رقائق البيف باتسري او باستري مش عارفة ممكن تستخدم في عمل الجلاش الحلوة?

ولو ممكن عاوزة طريقة صريحة مرحة اعمل بيها الجلاش بالقشدة لو سمحت احسن خلاص روحي طلعت من الحلويات المعوقة بتاعتهم هنا!!

وعلى فكرة انا لقيت في المحل العربي هنا في الولاية الجديدة كنافة - وياريت برضه الكنافة بأي حاجة - ربنا يكفيك شر الحلويات الامريكاني واختراعاتها يارب

وكمان سؤال استغلالي لوسمحت - كنا اتكعبلنا مرة انا والولاد في محل في اتلانتا مش هنا بيبيع حاجة اسمها فانيل كيك funnel cake

وقلنا نجربه - والحقيقة طلع رائع وجميل جدا

انا استشفيت انه نوع من العجائن ومقلية في زيت غزير وعليها سكر بودرة

ولما جيت هنا سألت الناس أكدوا الكلام

بس المشكلة جنابك ان البتاع دا بيتعمل لما بيكون فيه مناسبة وبيتباع في الاكشاك المؤقتة الموجودة في ساحة الاحتفالات

ياريت بقى افتكاسة عشان العيال نفسهم فيه

ويجعله عامر يا فندم

[شاعرالرومانسية]

ترجعى بالف سلامة يا فولانة هانم...

واوعى تنسى نفسك فى العيد ونحيدى عن برنامج صحى ومفيد بتاعك :wub:

اية الحكاية يا اوشا ... دة انتى كدة داخلة على مشروع مستشفى بقى

الف سلامة عليكى وعلى القلب والفشة وجميع اجزاء الجسم :lol:

بصى فية حاجة ظريفة قوى ممكن تعمليها كل يوم بالليل ومفيدة جدا من جميع النواحى

موزتين عليهم معلقتين عسل ابيض وكوب زبادى ورشتين قرفة وتخلطى كله مع بعض

وبالمعلقة كدة زى اكل الاطفال الصغيرين...

اولا طعمة جنان .. ممكن تكتفى به كعشاء .. بيحافظ على عدم ظهور التجاعيد بدرى ( واخدين بالنا يا شباب ياللى عديتوا التلاتين ... طبعا محدش منهم هنا معانا خاااااالص :rolleyes: )

بالاضافة لفوائد الموز والعسل والزبادى ... اللى كلنا عارفينها :lol:

وربنا يبعد عننا كل الامراض،،،

بودا ... كان فين الرجيم بتاعك دة من زمان ياعمنا ..... تلاتين كيلو فى 45 يوم يا باشا ...

دةة ولا برنامج " الاجمل " اللى بيجى على Ch4 :wub:

نرجع بقى لوصفات ضار ولذيذ :blush:

وعشان خاطر اخونا المصرى نقول وصفة للفخدة الضانى بتاعة عزيزنا بودا... بس بطريقة تانية

فخدة ضانى بالبرتقال

فخدة اتنين كيلو مع عصير بصلتين كبار وملح وفلفل ونص كوباية عصير برتقال بلدى

للحشو : كوباية توست بايت مفرى ( او فتات عبش فينو بايت ) وتفاحتين مكعبات وبصلتين مفريتين وملح وتوابل وجوزة طيب

نجيب الفخدة ونخليها من العظم والشغت ( ولو معرفناش نخلى عمو الجزار بعدمايدبح وقبل ما يمشى يخليلنا فاخدة حلوة كدة )

نتبل الفخدة من جوة وبرة بعصير البصل وعصير البرتقال والملح والفلفل ونسيبها فى التلاجة تلت اربع ساعات

نحضر الحشو بتشويح البصل المفرى لحدمايبقى ذهبى اللون ونضيف فتات الخبز والتفاح ونتبله بالملح والفلفل وجوزة الطيب

نجيب الفخدة ونفردها ونفرد الحشو جواها بس نسيب قد 2سم من الاطراف من غير حشوونلف الفخدة على شكل اسطوانى ونلفها بورق زبدة ونحطها فى صنية وفى فرن حامى قد نص ساعة وبعدين نهدى النار بعد كدة لحد ماتستوى ونراعى اننا بعد السوى نرفع ورق الزبدة ونحطها تحت الشواية تاخد لون

وممكن نخرطها خرط دائرية ونجملها بالبقدونس ومع رقاق العيد الجميل (اللى بودا طبعا مش حينسى يقولهولنا :wub: ) او مع ارز باللخلطة وسلاطة خضرا ... وبالهنا والشفا :lol:

تم تعديل 7 يناير 2006 بواسطة شاعرالرومانسية

[Reham]

نهاركو ابيض ان شاء الله

انا جيت اهني بالعيد السعيد

كل عام وانتم بخير

وخللوا بالكوا من نفسكوا لحسن يجيلكوا تخمة من اكل اللحمة

اني كمان راحله

الي الارض المقدسة

الي اجمل مدن الله علي الارض

لأزور اكرم وأفضل خلق الله علي الارض

انا رايحه المدينة ياولاد :rolleyes: زغرطولي ياولاد

مش عايزين مني حاجه

من غير ماتقولوا ... :blush: .هدعيلكوا كلكوا

انا ماشيه النهارده بس حبيت أدخل امسي عليكوا

وأعيد عليكوا

وماتنسونيش في العيديه :lol:

علي فكره ياحسن ...رشا ممكن تدبحها قبل ماتأكلها الموز

اول مره اشوف حد مابيحبش الموز..مع انه جميل ومفيد جدا

لأ والاكتر من كده ابني الصغير كمان مابيحبوش

حاجه غريبة :lol:

اترككم في رعاية الله واواصل معكم الارسال بعد العيد ان شاء الله

[bodda]

ترجعى بالف سلامه يا ريهام

قلت الحقك الاول قبل السفر

و ماتنسيش الدعوات بجد وبلاش كروته

:rolleyes:

مساء الفل

:blush:

[bodda]

تسلم ايدك يا ابو على

الفخده ريحتها طالعه من دلوقت

:rolleyes:

بس وحياه الغاليه خالتى بتسلم عليك وبتقولك بلاش اللون ده فى الكتابه

نظرنا ضعيف وعدينا التلاتين بيومين

:blush:

وشايف بزمتك اوشا هانم طالبه كام حاجه ؟؟؟

وانت شايفهم وبترد ولا كأنك شفت حاجه !!!

ماكانش العشم ...

:lol:

اولا يا ست اوشا انا قلت لك لا يعلى على الفاكهه الطبيعية .. يبقى رديت

و ممكن بالكمبوت بس تفاح برضه

:lol:

والجلاش بالقشطة زى الجلاش العادى بس بدل الزبده تستعملى القشطة

لكن المهم انك تهرسى القشطة كويس مع معلقتين سمن معتبرين والا ها تتحرق

مساء الفل

:lol:

[شاعرالرومانسية]

بالسلامة يا حاجة ريهاااااااااام :wub:

الدعاء امانة والنبى...

ان شاء الله تروحى وترجعى بالف سلامة

وربنا يكتبهالنا وللجميع يارب :lol:

والله ياعم بودا انا غلبت مع اختنا اوشا ..

مابتكلش فاكهة

ومابتحبش التوم

ومابتشربش لبن

وعاوزة وصفات حلوة ..

طب عروستى :rolleyes:

بس على فكرة .. مش طناش منى والله

انا كنت بكتب الرد واتأخرت شوية وبصيت لقيتها سابقانى ومنزله لستة الطلبات

وهوب لقيت حضرتك رديت ..

مش ذنبى والله :blush: :lol:

وبالنسبة للون الخط غيرناه ياعم .. احنا تحت امر الست الغالية .. خالتك :wub: عموما برضة انت اللى زحلقتنى فى وصفة رقاق العيد :wub:

اخوانى الزباين واكلى اللحوم ( لحوم الخروف طبعا مش حاجة تانية :wub: )

اليكم تللك النصائح :

* نقدم مع اللحم الضانى كثير من البقدونس ( كفرشة او مع السلطة )

لانه بيقوم بمعادلة الدهون الموجودة فى اللحم ويساعد على الهضم

* عدم تقديم مخلالات حارة مع اللحم لانها تؤدى لعسر الهضم

( والحكاية مش ناقصة ..كفاية اللحمة السمينة )

* عدم تقديم الحلويات الدسمة بعد اكل اللحوم ونكتفى بالفاكهة وخاصة البرتقال واليوسفى

* شرب قليل من الشاى الاخضر بقليل من النعناع لما له من تأثير فى الهضم وسهولة هضم الدهون

وكل عام والجميع بخير وفى اسعد حال :lol:

تم تعديل 7 يناير 2006 بواسطة شاعرالرومانسية

[ام البنات]

السلام عليكم ورحمة الله وبركاته

كل سنه وانتم طيبين

ربنا يجعله عامر دائما"

هاقول لكم تجربه عملتها وطلعت حلوه وممكن تنفع فى العيد علشان ميكنش كله لحمه

طبعا فى فراخ بانيه وفراخ شيش عند الفرارجى

خلينا فى الشيش

وناخد الشيش ونضربه فى الكبه لما يبقى مفروم قوى

وبعدين نتعامل معاه زى اللحمه المفرومه

يعنى نشوح البصل لغاية ما يتبل وبعدين نضع الفراخ المفرومه وملح وفلفل إسود وفلفل رومى مقطع صغير وشوية قرفه نونو وانون منها جنزبيل(كميه صغيره ذرتين مش ذره واحده)

وتستوى على النار زى اللحمه المفرومه بالظبط وبعدين نستخدمها فى الرقاق

او فى المكرونه الباشاميل

وبالهنا والشفاء

استاذنا بودا ايه رأيك

المرة الجايه اكتب لكم التشوكليت كيك

ممممممممم ملهاش حل

هى دى سبب الزياره المتكرره لصفحة اخونا شاعر الرومانسيه علشان الاعشاب

ايامكم كلها اعياد

ريهام وانت فى المدينه بلغى الرسول الكريم صلى الله عليه وسلم سلامى

يارب انول الزياره

عيدكم سعيد

لاء عيد مبارك ونظيفو شريف وكله جمال ومفيهوش كمال

عيد من اخراج الحزب الوطنى

[bodda]

العزيزه ام البنات

مستنى وصفة الشوكلات كيك

ودى وصفه تانيه جربيها

كيكة الشيكولاتة

كوباية لبن وكوبايتين ونص دقيق وكوباية ونص سكر و كوباية زيت ذرة

و 6 بيضات ونص كوباية كاكاو وكيس بيكنج باودر و ذرة ملح

يخلط الدقيق والبيكنج باودر والملح

نضرب البيض كويس ثم نضيف السكر ونكمل ضرب لغاية مايبقى كريمى

يضاف الزيت أثناء الضرب ثم اللبن والدقيق المخلوط بالتبادل مع الكاكاو

حتى التجانس التام للخليط

ندهن صينية الكيك بالسمن ونرشها دقيق ونصب الخليط وندخلها فرن متوسط الحرارة

ولما تستوى هانطلعها ونسيبها تبرد قبل ما نكمل شغل

هانضرب كوباية سكر بودره مع كوباية زبده مع نص لبن مع ربع مبشور شيكولاته

ونشق الكيكه ونحشى نص الخلطة دى ونزوق بالباقى الوش والاجناب

وتدخل التلاجه للتماسك ثم تقدم

بالهنا والشفا

:rolleyes:

[bodda]

شاعرنا الجميل

معقول انا ماخدتش بالى من طلب صينية الرقاق؟؟؟

متأسفون وعلى الرقاق متجمعووووووووووون

صينية الرقاق

اول حاجه نجيب رقاق طرى من عند اى فطاطرى

ونستعمله فورا قبل ما ينشف :rolleyes:

يكون عندنا شوربة دسمة من لحم ضانى ( او كندوز )

وطبعا لحم معصج بالملح والفلفل

و ندهن صينية الفرن بالسمن ونفرد رقاقه ونشيل البواقى

و نحط عليها معلقتين شوربة ونحط الرقاقة التانية

ونفرد شوية عصاج خفيف :rolleyes:

و نعيد تانى رقاقتين بينهم شوربه ثم عصاج

ونكرر لغاية تخانة حوالى صباعين ( 3 سم تقريبا )

ونختم اخر رقاقه عليها معلقتين سمن

ونخرط الصينية مربعات بسكين حاد علشان ما نلخبطش الرقاق

:rolleyes:

بعد كده عالفرن الحامى لغاية السوى وبدء احمرار الوش

نطلع الصينية ونكون مجهزين كوباية لبن مضروب فيها صفار بيضتين

وندلقها على وش الصينية وتدخل الفرن تانى للتحمير النهائى

ويا سلام عليها جنب حته ضانى مستويه

:blush:

مش بقول لكم احلى حاجه الاكل لما يكون ..

ضار ولذيذ

:rolleyes:

[ام البنات]

السلام عليكم ورحمة الله وبركاته

استاذنا بودا

جزاك الله خيرا على الوصفه وساجربها ولكن لى تعليق واحد انا لا أفضل الزيت فى الكيك الا كيكة الذرة

واذا كانت على ضمانتك خلاص استعمل زيت الذرة

حتى التشوكليت كيك بتتعمل بالزيت بس انا افضل السمن

يعنى تقدر تقول اكل خفيف ويخلى الواحد رشيق

اجى بقى للاستفسار المهم

انا فعلا استخدم الرقاق الطرى واقسم الكميه الى صوانى واضعها فى الفريرزر وعندما ارغب فى استعمالها انزلها قبلها بساعه واتركها حتى تفك وتصير طريه مره أخرى

الاستفسار هو

حضرتك بتضع شوربه على كل رقاقه طريه او بين كل رقاقتين وبتضع اللحمه المفرومه فى الطبقات وليس فقط فى المنتصف

هل فى الآخر بتتطلع طريه ومقرمشه واللحمه فى كل قطعه

انا استخدم طريقه سهله شويه

اقوم بوضع الرقاق وعلى كل رقاقه شوية سمن صغيرين

وبعدين اللحمه فى النص واكمل وفى الآخر اضع كوب شوربه

على الرقاق قبل دخول الفرن

واحيانا لا أضع على الرقاق الا لما يتحمر ويخرج من الفرن

وفعلا بقسمه قبل الدخول فى الفرن

وبالنسبه لموضوع اللبن والبيض

انا اضع اللبن والبيض على الجلائش وادخله الفرن فى الوسط وبيطلع جميل

بس حكاية الرقاق هيبقى الرقاق مثل الجلاش

الرجاء سرعة الرد الوقفه بكره ان شاء الله

[Osha]

ريهام ياخاينة سافرت من غير ما تقولي

عامة مستنياك ما تتأخريش

حسن

حنتريق بقى على صحة عظمتي!!! السن بقى يا حسن ياخويا ما انت عارف الواحدة لما بتبقى 26 سنة الامراض بتكتر والعضم يبتدي يوجع

وبعدين ماهي ريهام قالت لك انك تدبحني اهون من اكل الموز - يعني اعمل ايه يعني

عامة انامن المناصرين تماما لحركة ضار ولذيذ

هو الواحد حيعيش كام مرة عشان يكل صحي ومفيد وماسخ كمان

لو عاوز تعمل ريجيم كل كل حاجة انما بنص الكمية

أم البنات

حلوة وصفة الجلاش بالفراخ المفرومة - انا جربتها قبل كده في الباشميل

انما الجلاش لسه لسبب بسيط اني مابعرفش اعمله بخلاف ان بلاد العم سام مافيهاش جلاش - ابعتي صينية على العيد وحادعيلك من هنا لعندكم

على فكرة الأكل بالسمن البلدي أصح من الزيت مهما قالوا عنها

بودا

صدقني - اخرتك معايا المحكمة لتأخرك في الوصفات

أنا مش سائلة على الفانيل كيك?

ومش سائلة على رقائق البيف باتسري ? انت قلت آه تنفع ووسكت :rolleyes: ياسلام ?

لا هو انا اصلا كنت باعرف الجلاش بيتعمل ازاي عشان لما تقول تنفع اروح جارية عاملاها !!!

من الآخر وبالذوق من غير خناق تقول اللي قلت عليه من غير نقاش

وماتقولش اللحمة كبست على مراوحي

افتكرني وانت بتاكل اللحمة الضاني عشان مالقتش منها هنا

[ام البنات]

اوشايا حبيبتى

كل سنه وانت طيبه

دانتى صغيورة خالص وبتقولى العظمه كبرت

طيب الى زينا يقول ايه العظمة باشت

ربنا يديك الصحه يا صغيوره

وبالنسبه للصينيه حاضر عيونى ومعها كمان فخده ضانى فى الفرن وطاجن رقبه بالفلفل الاخضر

وبصى فعلا لو حد من عندكم بينزل مصر أو حد بيجى تقدرى تطلبى منهم رقاق طرى ويتجمد فى الفريزر وده لما بيفك كأنك لسه شرياه

واكيد هتلاقه عند محلات الشوام واكيد فى فطاطرى مصرى هناك والا يبقى مفيش تبادل خبرات ولا ايه بس بتوع الكشرى والفول والطعميه

طيب ممكن الاخ بودا يجب لك طريقة عمله فى البيت ومعلهش هتتعبى شويه بس ولا الحوجه لولاد***** العم سام

الاستاذ العظيم بودا طلب طاجن العكاوى بيتعمل ازى وكمان اصلا بنقطع العكاوى ازاى

ابو البنات زنقنى فى مزنق

[bodda]

اوشا هانم

انا لم اطنش بتاتا البته

:blush:

وقلت ان عجينة الباتسرى تنفع نعاملها زى الجلاش

يعنى هاتفرديها على رشة دقيق عالرخامه لأرق درجه

ولو كانت العجينه اصلا عليها زيت يبقى تتفرد بالزيت

عندك نشابه لفرد العجين ؟؟؟ ممكن برضه حتة ماسوره نضيفه

:o

وبعدين تتعمل عادى وانا منزل هنا كذا وصفه للصينية دى

يبقى فين الطناش؟؟؟ :blink:

لكن الفانل كين فعلا مش عندى انما هاجيبه و التجربه عليكى

:lol:

ام البنات هانم

انا بفضل اوزع اللحم المعصج بين الطبقات

لان الطريقه العادية فى النص بتلاقى القطعه تفصل نصين

وباستعمل اللبن والبيض فى الرقاق زى مع الجلاش..عادى

والشوربه كانى بادهن بيها بين كل طبقة والتانية

مساء الفل

:wub:

[Osha]

ام البنات

اوعي تكوني صدقت حكاية الـ26 سنة دي - دا تموين عشان الخونة والجواسيس

انا سيادتك 35 سنةوكام شهر

حكاية المجمد دي ما تنفعش لان رحلة الطيران لغاية النصف الآخر من الكرة الأرضية بتاخد أقل حاجة 17 ساعة طيران

محلات الشوام هنا بتقدم الحاجات دي مستوية ومجمدة وما أدراك ما طعمها

ومستنية الوصفةالمتينة الشديدة

بودا

طيب بالراحة من غير خناق

الرقائق انا لقيتها هنا جاهزة انما متقطعة مربعات -حاحاول اجيبها وافتكس فيها بدل ما اطلب واسمع لي كلمتين

في انتظار الفانيل كيك يا باشمهندس

[Osha]

يوريكا يوريكا

افتكست الفانيل كيك وطلع جميل اوي اوي

انا لسه مادقتوش عشان صايمة لكن العيال عجبهم لانهم قالوا

أخيرا يا ماما فلحت تعملي حاجة حلوة

:wub:

عيال خونة

:lol:

المهم بقى مش عاوزة حد يقول ايه المقادير - لانها ببساطة دقيق وعليه ميه فقط يتقلبوا كويس لغاية لما الدقيق يختفي والقوام يكون سائل

حطيته في كوز وصبيته على دفعات في زيت غزير ساخن

لما احمر شوية طلعته على ورق ورشيت عليه حبه سكر بودرة انما افتكر لو شوية قرفة يبقى أحلى

ياسلام أخيرا فعلا فلحت في حاجة حلوة

:blush: :o :blink: