اطلب اى وصفه على بالك .. تلاقيها قدامك

[شاعرالرومانسية]

الله يسلمك يا شيف

كل سنة ومطبخك عامر ومنور بينا :D

جرب الطريقة دى وعلى مسئوليتى الشخصية

واللى مابيحبش الكبدة الضانى .. ممكن يعملها بالبتلو

( كبدة العجل النونو يعنى ;) )

وكل عام والجميع فى اسعد حال :D

[bodda]

يظهر الناس تقلت اوى فى اللحمه

ايه يا جماعة ؟؟؟ كل ده أكل ونوم ؟؟؟

:D

حتى اوشا هانم اللى جت وعملت زيطه وخبطت فى الحلل

ولا حس ولا خبر

:D

تعالوا شوفوا كبدة ابو على المتينه ... تاكلها وتمدد فى التراسينا

التراسينا = البلكونه ....بس بلغة زمان

B)

صباح الفل

;)

[ام البنات]

السلام عليكم ورحمة الله وبركاته

كل سنه وانتم طيبين

عيد مبارك وان شاء الله نكون من عتقاء يم عرفات

استاذنا بودا

طلب غريب فى شهر اللحمة والعيد لسه مخلصيش

اكلت امبارح شورة سمك جميله

نفسى اعملها بس بالسبيط( السيبا) ( كلمارى)

والسمك وممكن الجمبرى الصغير بس أجيب بقلاويز وكابوريا مش سهله يعنى

معلهش هى شوربة تفصيل بس اهم حاجه تكون حلوة زى الى أكلتها امبارح

كان نفسى تيجوا معانا وتنبسطوا وتدفعولنا الفاتوره يلا عيد كل سنه وانتم طيبين

ودكتورة فلانه مش موجوده كان ممكن ندبسها فى الفاتوره اهى جارتنا برضه الجار للجار

استاذنا شاعر الرمانسيه

سنقوم بتجربة الكبده ويارب تطلع ناجحه

وسؤال صغير هى بنحط معاها الكلاوى ولا لاء

عيد سعيد

أوشا اخبار العيد عندكم ايه

وياريت تطمنينا على ريهام يارب تكون بأحسن حال

[abofasad]

كفاية خروف .. وكفاية لحمة ..

ايه رأيكم في طعمية سخنة مقرمشة ومعاها شوية تحابيش يعني سلطات خضرة وطحينة

مين عنده الطريقة

[bodda]

منوره يا ام البنات هانم

شوربة السمك

اهم حاجه ان السمك يكون طازه جدا ومش مجمد ولا متلج حتى

واحسن انواعه للشوربه القاروص يليه الوقار ثم البورى و الدنيس

ويتنضف ويتغسل ويتقطع ترانشات محترمه

نحط معلقتين زيت دره ومعاهم فصين تلاته مستكه فى حله عالنار

ولما يسيحوا نحط اربع كوبايات ميه ومعاهم بصله مشققه وفصين حبهان

ولما الميه تغلى نحط الملح والفلفل واربع عيدان كرفس بلدى أخضر

ونسقط ترانشات السمك ونقفل الحله تغلى 10 دقايق بس

وننزلها من على النار ونحط ربع كيلو لحم جمبرى صغير

بس من اللى لونه رمادى ;)

الجمبرى الاحمر ما ينفعش :D

ونقفل الحله يستوى الجمبرى على حرارتها .. بعد كده ننشل السمك والجمبرى

ونضرب الشوربه بالحبهان والبصل والكرفس فى الخلاط ونصفيها

ولو هانضيف سبيط يبقى يتنضف ويتسلق كويس فى ميه وملح وتترمى ميته

وناخده بعد السوى نقطعه زى ما نحب ونضيفه للشوربه مع السمك والجمبرى

ويتحطوا عالنار غلوه واحده وخلاص

وطبعا الشوربه تحتاج ليمون كتير بس ساعة الاكل مش قبل كده

وبالف هنا وشفا مع رز ابيض جميل

:D

[Osha]

انا موجودة والله يا بودا باشا

انما كنت مشغولة في خناقة صغيرة على ما قسم كده على صفحات النت

حسن

كبده ...وكمان ضاني

حرام عليك

طيب قول سجق وانا فيها للصبح

ام البنات

العيد كان عادي زي اي يوم تاني بس اخدنا العيال اجازةمن المدرسة

وصلينا في الجامع وبس خلاص

ريهام كويسة ورجعت بيتها بالسلامة

احنا لسه ماتكلمناش - انما وصلني ميل من عندهم

ابوالفصاد

بودا قال لي على وصفة طعمية تشفي من العلل

انا مش حاقولها عشان حقوق النشر والذي منه

لكن احب اقولك ان اصدقائي الامريكان لما اكلوها عندي كانوا حيعملوا ثورة غذائية وتمرد على أكلهم

[bodda]

شكرا اوشا هانم

وسيبك من خناقات النت مافيش وراها غير حرق الاعصاب

و للعزيز ابو فصاده وصفة الطعمية كلاكيت تانى مره

الطعمية

كيلو فول مدشوش

حزمة كرات أو بصل اخضر

راس توم محترمه مفصصه أو نص كوب توم مفرى

ملعقة كبيره كسبره ناشفه ومعلقة صغيره كمون

2 ملعقة صغيرة ملح

نص ملعقة صغيرة شطه ;)

و ننقع الفول المدشوش 24 ساعه

بعد كده نفرم الفول مع باقى المكونات( عدا الملح ) مرتين تلاته

او نضربه فى الكبه حتى يكون ناعم جدا

واخر شئ نضيفه الملح :rolleyes:

ممكن العجينه دى تستعمل فى الحال مع اضافة بيضه وخلطها قبل القلى

وممكن توضع فى اكياس فى الفريزر وتخزن

ولكن فى حالة العجينة المجمدة لما نطلعها وتفك نحط نص ملعقة بيكربونات صوديوم

لان من غيرها هاتطلع طعميه مبلطه ومش حلوه

و أهم حاجه نقلى العجينه فى زيت عميق mfb:

وصباح الفل

:wub:

تم تعديل 14 يناير 2006 بواسطة bodda

[NoorJehan]

أنا حاسه إنى عثرت على كنز بهذا الموضوع الرائع :excl:

بل كلمه رأئع أقل ما يستحق..ما شاء الله.

أرجو أن تقبلونى بينكم لائجه وجعلكم الله ذخرا لأزواجنا وأمعائهم ;)

الأخ بودا، هل إسمك الحقيقى أسامه السيد، الشيف اللامع على الفضائيات؟ :wub:

أسامه كنت أم بودا، هذه الدرر الطعاميه هى الأهم...وإسعادنا نحن متوسطو الخبرات المطبخيه mfb:

بارك الله فيك على مجهودك ..

الأخوه شكلهم أخدوا حقهم وزياده.. فإعطونى فرصه بحكم إنى مستجده :rolleyes:

الأخ بودا..

إننى من عشاق السكالوب بانيه كما يحضر فى المطاعم ككورتجيانو مثلا..

إزاى نستحضر نفس هذا الطعم بالبيت؟؟؟؟

فى البيت بحس إنه مش هو نفسه :sad:

ما سر ذلك؟؟

[NoorJehan]

نغسل الرز مرتين تلاته كويس ويتصفى

ولما الميه تغلى نسقط الرز وتقليبتين بالمعلقة ونغطيه

اول ما الميه تغلى تانى بالرز كويس ..نوطى النار خالص ونسيبه نص ساعه

:rolleyes: :wub:

(1) هو ليه لازم نغسل الأرز؟ إيه الحكمه؟أصلى بحطه كده على طول..

(2)إيه الحكمه من غلى الميه الأول قبل إضافه الأرز؟

أنا بضيف الرز على السمنه على طول وبعده الماء وأتركه يغلى قبل التهدئه...

هل طريقه أفضل من أخرى لسبب ما أم حسب سلو المطبخ mfb:

[abofasad]

الشيف المحترم والمحترف بودا

شكرا على وصفة الطعمية

حجربها بكره الأح لأنه لازم ننقع الفول

وقد لاحظت عدم وجود الحمص

وما هي الطريقة حتى تكون مقرمشة هل نضيف عيش مثل المطاعم ام برغل مثل الشوام ام نعجنها بالحمص فقط مثل الفلسطينيين

رأيك سيكون هو الرأي الصواب

الفول الموجود في السوق في اسبانيا يباع عند بائعي اطعمة الأحصنة وهو فول حجمه كبير. هل يؤثر على الوصفة

وبالمناسبة انا اسمي ابو فصاد

اما فصادة فهي بنتي وانا افضل ان تناديني باسم ابني

[شاعرالرومانسية]

والله ياجماعة احنا عملنا اللى علينا وقولنلنا وصفتين

الباقى بقى على المجربين .. اللى يقولولنا اخبارها اية mfb:

العزيزة اوشا ...

يعنى ضحكتوا على الولاد وماخرجتوهمش ...

اهات اخر زمن صحيح ..انا عارف ابهات ايةبتوع اليومين دول :rolleyes:

( نفس الكلام اكيد قالوة ولادى ..لاننا ماخرجناش برضة :wub: )

عزيزتى ام البنات

انتوا افتكرتوا اننا فى العيد الصغير والا اية ...عموما بالهنا والشفا السمك برضة

التغيير حلو برضة ( وعشان كمان ماتبقوش زى الناس الوحشين اللى بكلو الخروف المسكين )

وبخصوص الكلاوى على الكبدة .. انا عن نفسى ماجربتهاش

ياريت تجربيها انتى وتبقى تقوليلى اية الاخبار

اما بقى عن شوربة السمك... انا بعملها بطريقة تانية غير طريقة عزيزى بودا،

حقولهالك وتبقى عندك الوصفتين...

وممكن تخلطى بينهم وتطلعى بوصفة تالتة وتسجليها باسمك :sad:

لو مفيش قاروص او دنيس .. انا جربتها بسمك تانى لذيذ وتمنة مش غالى كمان .. اسمة " شعور "

ودة بيبقى زى البلطى كدة بس بعد السلق بيبقى ابيض وجزل متماسكة وفصوص كدة زى التونة ( ملفوف جوة بعضة..) ... ومعاه طبعا ممكن البكلويز والجميرى والكابوريا

بجيب فصين مستكة واسيحهم فى حبة سمنة او زيت ذرة او الاتنين ( ومحدش يقول سمنة ازاى مع شوربة السمك ...وحياتكوا مجربها :excl: )... واحط كمية من الصل المكعبات وفصين تلاتة توم صحاح ومكعبات عيدان كرفس افرنجى واقلب تقلبتين واحط معلقتين دقيق ومن غير ماياخد لون اقلب واحط السمك المقطع ( والروس معاه لوحدها طبعا ) وكمان البكلويز واقلبهم شوية وبعدين احط المية على البارد كدة تبدا تغلى مع السمك من الاول ( ودة يخلى الشوربة محتفظة بفوائد السمك .. ;) ) وبعد كدة اكون اخدت الكابوريا والجمبرى غلوة برة واضيفهم على المية بعد ما اقسم الكابوريا نصفين مع ورقتين تلاتة لورى .. واشيل الريم ان وجد

لحد سوا السمك اللى مش بياخد وقت اصلا ..

بعد كدة بصفى الشوربة .. واغرفها فى اطباق ..بيبقى لونها ابيض وسميكة بعض الشىء بفضل الدقيق

وافصص جزلة سمك من الشوك ومعاها كام جمبريايا ... مع الليمون والعيش المحمص وربنا يديكى الصحة بقى

وفى طبق تانى بحط باقى القشريات من جمبرى وبكلويز وكابوريا والروس .. ودة لهواة القزقزة

وبالهنا والشفا يافندم ;)

الوافدة الجديدة NoorJehan

نورتينا وكترتينا..

بس اية داخلة بايدك فاضية كدة ..

مفيش وصفتين تلاتة معاكى والا حاجة

عموما اهلا بيك فى مطبخنا العامر ..

وبالنسبة للأرز وغسلة ... فدة عشان ما ينشيش وتتخلصى من النشا الزايد اللى فية

اما انك بتحطية على السمنة الاول .. فدة انا بعملة برضة كتير وبقلبة تقلبتين مع السمنة ياخد لون ..واحط عليها البهار وبعدين المية .. بس دة مع الارز المبهر

اما الارز الابيض فطريقة عزيزنا بودا بتبقى افضل

اهلا بيك مرة كمان ومنتظرين وصفاتك وجوالاتك المطبخية ;)

[Folana]

السلام عليكم ورحمة الله ..........

كل سنة وانتم طيبين ياجماعة وان شاء الله تكونوا قضيتم عيد جميل ...

باحب بس ارحب بضيفتنا الجديدة نور جيهان ...اسمك جميل يانو ر ...ده تركى ده مش كده ؟..على كده بقى تعرفى خالتى ام ابراهيم باشا ؟ :wub: ...

عموما نورتى المنتدى ونورتى المطبخ وزى ماقال شاعرنا الجميل عايزين ندوق حاجة من ايديك بداية تعارف يعنى .....

شاعر الرومانسية :...مرسى على الحاجات الجميلة اللى بعتها لنا ...بس كتير كده والله ..كان كفاية العكاوى بس :excl:

ام البنات ...ياستى ده انا اعزمك عندى مش ادفع الفاتورة بس ..وانا فى العزايم بقى اوعى ..اسالى الاخوة عنى وهم يقولولك ...وبعدين هو انت جارتى بجد ؟ياررررررريت ...على الاقل الاقى حد باحبه فى المنطشقة

ريهام :...حمدلله على السلامة وزيارة مقبولة ان شاء الله يارب تكونى افتكرتينا فى الدعاء

انا عايزة اقول لهاميس كل سنة وانت طيبة ويارب نرجع نشوفك تانى ..

بودا ..سيبتك للاخر علشان التحلية ..;)

كل سنة وانت طيب يامعلمى ..تسلم ايديك على كل الوصفات الجميلة اللى كتبتها ..ولى عودة معاك انشاء الله ..بس عندنا امتحانات بقى ادعولنا ...

جدو ابو فصاد ...وبعدين بقى انت حتبوظ النظام الصحى ولا ايه :rolleyes:

طعمية ايه بقى اليومين دول ؟....بقى انا عمالة اقرأ لك فى كتب صحية وانت تقول طعمية ؟

بس عايز الحق هى تستاهل نولع فى الاكل الصحى كمان مش نبوظه بس ...بالف هنا وشفا .....

عايزة اقول بس ان لو حتشيل الطعمية فى الفريزر لوقت الحاجة يبقى خلى الملح كمان لوقت الحاجة دى ..يعنى تملح قبل القلية على طول افضل ..اما باقى الاسئلة بقى يرد عليك بودا احسن ...

ايوه كنت حانسى ... الاخ الفاضل س.ٍٍس كل سنة وانت طيب ومنور مطبخنا ..بس مستشفى الامراض النفسية بالعباسية مابقاش اسمها كده خاااااالص ..اسالنى انااااا(وش عبد المنعم ابراهيم وهو بياكل ودن زينات صدقى ) ..اسمها دلوقت نقابة العقلاء اللطفاء ...ونلاحظ ان اللطفاء هنا بتيجى يااما بتكون جمع لطيف ....او جمع اللى عندهم لُطف ..لذا لزم التنوية ..........

كل سنة وكلكم ...كلكم طيبيـــــــــــــــــــــــــن...وابقى اشوفكم كلما تيسر نظرا لبدء امتحانات التيرم ...........

mfb:

[bodda]

نور جيهان

نورتى المطبخ بنورك :wub:

سيبك من معاكسات اصحابنا انتى بس تطلبى وكلنا جاهزين

بالنسبة للرز

فكلامك مضبوط طبعا ممكن نقلب الرز فى الزيت او السمن ثم نحط الميه السخنه

وممكن نقلب نص الرز حتى يتلون باللون الذهبى ثم نضيف النص التانى

وده يدى الرز لونين وبيكون جميل جدا

يعنى الرز له طرق عديده المهم ما يعجنش ويطلع مفلفل

ووالله العظيم ما انا اسامه السيد

ده انا يادوب غاوى مش أكتر والف شكر لذوقك

مساء الفل

:rolleyes:

[bodda]

شاعرنا الجميل

طبعا الشعور هايل فى شوربة السمك

ولو انه جلده تخين ولازم يتسلخ لانه من اسماك البحر الأحمر

بس فصوصه طبعا متماسكه ..بس المشكله نلاقيه طازه صعب اوى

وعلى فكره :rolleyes:

ممكن كمان نفصص جزء من السمك المسلوق وينضرب فى الخلاط

مع الشوربه وبطاطسايه مسلوقه بيدى طعم جنان مع الليمون

تسلم ايدك

مساء الفل

:wub:

[bodda]

العزيز أبو فصاد ( وبس من غير تاء مربوطه )

الطعميه بالحمص طعم تانى خالص ودى وصفة اخوانا فى سوريا

والفول اللى عندك ينفع طبعا لان كله اسمه ( Hourse been )

بس يتنقع فى الميه تلات ايام مع تغيير الميه كل يوم

هايبقى فول نابت تقشره وتكمل عادى

اما القرمشه فبتيجى من عمل الطعميه بعد الطحن مباشرة

و فى زيت غزير وبيغلى جدا

لكن لو حطيت العجينه فى زيت مش مقدوح اوى هاتبلط وماتقرمش

mfb:

فلانه هانم

حمدا لله عالسلامه

فين الهدايا فين العطايا فين السلطانيه ( وش مرزوق العتقى )

:rolleyes:

مستنيين الوصفات الجديده

مساء الفل

:wub:

تم تعديل 14 يناير 2006 بواسطة bodda

[Fencer]

الحبيب الغالي بودا

عودة سريعة على سيرة السمك و احب اقولك انك واحشني و الله و المطبخ واحشني بكل اعضاءه و اسماكه و طبعا انا معاك في اي وصفة سمكية تكتب و لكن انا باحب السمك المتحبش و اللي عليه خلطة من البهارات و الخضرة و التوم و اللذي منه و السمك الاسيوي انا ما جربتوش بس باحس ان الاسيوين اكلهم بتاع مستشفيات

انما سيبك انت ليك و حشة

هنا في سان لويس العمليه فلاي فيشينج اكتر من الرمي و التسقيط و الجر

تحياتي و منتظرين الوصفات المحبشة :blush:

[bodda]

الف حمدا لله عالسلامه كابتن فنسر

والله انت اللى لك وحشه :lol:

وسايبنا للستات يقطعوا فينا ومحتاجين سيوفك المسنونه

:) :blush: :D

وهنيالك يا عم الصيد الجديد لان اسلوب الفلاينج مش موجود هنا

وبالنسبه لتحبيش السمك بالخلطة المحبشه

يبقى عليك وعلى السنجارى بأنواعه بس المهم تكون اسماك كبيره ودسمة

:D

ماتحرمناش من وجودك

صباح الفل

:lol:

[Osha]

مبروك علينا كلنا وصول الموضوع بتاعنا للألف مشاركة

وكانت من نصيب عمنا بودا ربنا يخليه لينا ومايحرمناش من وصفاته الحلوة اللي منورة مطبخنا

ياجماعة بأقولها حقيقي ومن قلبي

المكان دا بقى عامل زي الواحة - لما تتعب من النت ومشاكله وخناقاته تيجي هنا تريح اعصابك وسط الصحبة الجميلة دي

بس خليكم شاهدين على فولانة أوغلو - عيدت على الكل وطنشتني

متخيلة انها بكده حتوفر العيدية بتاعتي - ابدا يافولانة هانم

كده حاربط عليك غرامة مقدارها 50% من العيدية المطلوبة

ارحب بالعزيزة نورجيهان وعلى فكرة انا كمان مش باغسل الرز لاني اكتشفت مؤخرا اني لما باغسله بيعجن

حســـــــــــن

مين دول اللي ماخرجوش يا حسن?

ولادي?

اولا احنا أخدنا لهم اجازة من المدرسة ورحنا صلينا العيد

وبعدين رحنا فطرنا بره

وبعدين رحنا جنينة الحيوانات وماكانش فيه غيرنا لانه في وسط الأسبوع دا غير ان الحرارة تقريبا كانت 3!!

مش عارفة عيال ايه دول :blush:

محدش شاف ام البنات يا جماعة الخير?

[abofasad]

عفارف عليك يا شيف بودا

الطعمية طلعت تجنن واطعم من طعمية التابعي

ودلوقت الحقنا بشوربة البصل .. الدنيا برد

وكمان شوربة النابت خلينا نستفيد من الفول المنقوع من يومين

صدقوني ده اكل صحي ومفيد

واحسن من خطر ولذيذ (مع احترامي للشيف بودا)

[ام البنات]

عزيزتى ام البنات

انتوا افتكرتوا اننا فى العيد الصغير والا اية ...عموما بالهنا والشفا السمك برضة

التغيير حلو برضة ( وعشان كمان ماتبقوش زى الناس الوحشين اللى بكلو الخروف المسكين )

استاذنا شاعر الرمانسيه

الحقيقه نتيجة يوم العيد والطبخ من أول النهار

حصل للواحده حاله من الرفض للبروتين الحيوانى

رفض مؤقت وليس دائم

احنا منقدرش نستغنى

وكانت فكرة السمك فكره كويسه تغيير

وبعدين فى العيد الصغير انا باكل فسيخ ورنجه

وابقى ااقول لكم طريقتى فى تخليص الفسيخ والرنجه

من هم الملوحه والريحه النت

ومش هاكمل هيبان من الوزن

ام البنات ...ياستى ده انا اعزمك عندى مش ادفع الفاتورة بس ..وانا فى العزايم بقى اوعى ..اسالى الاخوة عنى وهم يقولولك ...وبعدين هو انت جارتى بجد ؟ياررررررريت ...على الاقل الاقى حد باحبه فى المنطشقة

فلانه هانم العزيزه المحترمه

ايه حكاية السلطنه والمسائل العثمنليه والباب العالى

طيب اذا كان ولا بد نظره ولا حسنه ولا اى حاجه تذكار يعنى ده الغرض

نيجى للحكاية بتاعة العزايم

بلاش تفردى قوى اصلى لازقه وممكن اعملك عبيطه واتصل

بيك الحقينى يا فلانه اصلى نسيت شنطتى فى الميكروباص

انا دلوقتى قاعده فى قدورة مش عارفه ادفع ازاى

وان شاء الله فى الخاص ابقى ااقول ساكنه فين

علشان وقت اللزوم نبقى نستنجدوا بيك على رأى الاسكندرنيه

وحمد الله على السلام مطبخ ضار ولذيذ كان مفتقدك

معلومه صغيره انا ركبت الميكروباص مرة واحده وله معى ذكريات اليمه

عادى بدخله زى ما بدخل العربيه واذا بى اشعر انى ارى نجوم ودوائلر حمراء

راسى لبست فى الباب من فوق له عتبه كده غريبه

ومن ساعتها لا الميكروباص ولا المينى باص ولا أى باص

يا العربيه

او اقعد متستته فى البيت

تحياتى لك