اطلب اى وصفه على بالك .. تلاقيها قدامك

[Reham]

انا جيـــــــــــــــــــــــــــــــــــــــــــــــــــــت

نورت ا لبيـــــــــــــــــــــــــــــــــــــــــــــــت

مساء الخير ياحلوين ياطعمين ياأحلي صحاب

انا جيت من المدينة

من أرض الرسول عليه الصلاة والسلام

وحشتوني وحشتوني وحشتوني :lol:

ها بتعملوا أكل ايه النهارده :D

[ام البنات]

ريهام

حمد الله على السلام

انا قلقت عليك

عموما حمد الله على السلام ونورتينا وربنا يقبل منك صالح الاعمال

اخبار الدنيا عندك ايه

وصحيح الدنيا برد قوووووووووووووىىىىىىىىىى

نورتى المطبخ

[ام البنات]

أنا حاسه إنى عثرت على كنز بهذا الموضوع الرائع  :D

بل كلمه رأئع أقل ما يستحق..ما شاء الله.

أرجو أن تقبلونى بينكم لائجه وجعلكم الله ذخرا لأزواجنا وأمعائهم  B)

الأخ بودا، هل إسمك الحقيقى أسامه السيد، الشيف اللامع على الفضائيات؟  :D

أسامه كنت أم بودا، هذه الدرر الطعاميه هى الأهم...وإسعادنا نحن متوسطو الخبرات المطبخيه  :blush:

بارك الله فيك على مجهودك ..

الأخوه شكلهم أخدوا حقهم وزياده.. فإعطونى فرصه بحكم إنى مستجده  :lol:

الأخ بودا..

إننى من عشاق السكالوب بانيه كما يحضر فى المطاعم ككورتجيانو مثلا..

إزاى نستحضر نفس هذا الطعم بالبيت؟؟؟؟

فى البيت بحس إنه مش هو نفسه  :D

ما سر ذلك؟؟

<{POST_SNAPBACK}>

نور جيهان

هو ده اسم مركب ولا وصفه لنور جيهان

ما علينا مش هاطول

نورتينا وانستينا وعاوزين شرح لانى اختك ام البنات مش بتخرج من الدار الا فى اضيق الحدود

وفى كلام مطرطش كده عن كورتيجانو ومش عارفه ايه

طيب ااقولك فاتح جابنا محل لبيع المطابخ اسمه ارتيجانو يبقى قريب الى بتقولى عليه

ربنا ما يغلب لك جيانو ده عبارة عن ايه

[bodda]

والله ما عارف اقولكم ايه يا جماعه

:lol:

الف مبروك لينا كلنا زيادة مشاركات موضوعنا عن الألف

:D

وزيادة الزيارات عن 21000 زيارة

:blush:

فعلا شئ جميل ان مجموعه صغيره تستمر فى عمل جميل بالشكل ده

واعتقد ان عدد المستفيدين أضعاف المشاركين

ونجاح الموضوع تم بوجود مجموعه أصدقاء حقيقية جمعها الهوايه

واتمنى من الله ان نصل للمشاركات 2000 وزيارات 40000

لكسر حواجز وتحقيق ارقام قياسية جميله

تحياتى لكل الاصدقاء الشداد والجداد واللى لسه ها ينضم

صباح الفل

B)

[Fencer]

كل اعضاء المطبخ

مبروك لموضوع الوصفات الشديدة اللي تلاقيها جاهزة و شديدة تعديها المشاركات الالف وهذا ان دل على شئ انما يدل على نجاح جميل لكل الاعضاء المشاركين في الموضوع بدليل الناس بتغيب و ترجع و الموضوع ماشي :blush: و ناس تسافر و ناس تنقل من بلد لبلد :lol: و ناس تروح تحج و ناس تغيب بالشهر و الاتنين زي حالاتي :D و الموضوع ماشي،دي حاجة تفرح

موضوع جميل و مفيد و ناجح و ربنا يخلي قاعة المطبخ بمشرفتها و يخلي لنا عم بودا مبتدأ الموضوع

و عايزين وصفة لتورتة الاحتفالية الالفية يا عم بودا B)

[bodda]

حمدا لله عالسلامه ريهام هانم

فين التمر وعسل النحل ؟؟؟

:lol:

ومنوره يا نور جيهان

وما تقلقيش من تحيات الاصدقاء ..همه كده ... والموضوع كده

مطبخنا جميل بابتساماته وقفشاته و منتجاته

وللعزيز ابو فصاد

شوربة البصل

تلات بصلات مبشورين ومعلقتين زبده كبار

و نص كوباية دقيق و 3 - 4 كوبايات شوربة وكوباية مبشور جبنه صفرا

وشرائح عيش توست محمص و ملح وفلفل وجنزبيل

(ممكن الشوربه ميه تغلى مع ماجى )

هاندوب الزبده ونضيف الدقيق ونقلب عالنار حتى اللون الذهبى الفاتح

نحط البصل تقليبتين ووراه الشوربه السخنه ونقلب

ونسيبه عالنار حوالى 45 دقيقه وبعدين نحط الملح و الفلفل وسنة جنزبيل

نجيب بقى شرائح التوست المحمص السخنه ونرش عليها الجبنه المبشورة

ونحط توستايه فى قاع طبق الشوربه ونصبها عليه

نلاقى الجبن ساح وبقى طبق شوربه شتوى يجنن

:D

وبالف هنا

صباح الفل

:blush:

تم تعديل 16 يناير 2006 بواسطة bodda

[Folana]

الــــــــــــــــــــــــــى رشــــــــــــــــــــــــــــــــــــــــــــــــــــــا

السلام عليكم ورحمة الله .....

انا اهو رميت السلام ..علشان يبقى لولا سلامى سبق كلامى لكلتى لحمى قبل عضامى ..انا عارفة ....

طبعا ياجميلة الواحد لما مايتكلمش عن القمر ده مش معناه ابدا ان القمر مش موجود ...لكن بيكون معناه ان اللى نسى عنده حول او بيعانى من امراض الشيخوخة ..ودى حالتى ...

كل سنة وانت طيبة ..تهنئة خاصة من القلب لك انت لوحدك ....انا كنت باكتب على عجل ..والعجلة نامت منى فمعرفتش اكمل ....

اذا كنت زعلتك فى حاجة ولا شايلة منى فى محتاجة ..فانا باطلب منك العفو والسماح ومش حاعمل كده تانى ....وسامحى بقى فى ال 50% دول احسن ده انا هاه اوى :lol:

وانا من هذا المنبر الحر ..باشهد الله ..والناس الحلوة اللى معانا دى انى احبك فى الله

كل سنة وانت طيبة مرة تالتة ..انت و حسام واولادك ويارب ايامك كلها اعياد يا اشؤشة..

تم تعديل 16 يناير 2006 بواسطة folana

[Folana]

السلام عليكم ورحمة الله ....

حمد لله على السلامة اخى الفاضل فينسر ..نورت بيتك :D...كل سنة وانت طيب وربنا يسعدك ويوفقك فى مكانك الجديد واكيد ان شاء حتتوفق طالما وراك اوشا ..لان وراء كل عظيم امراءة تساعده على التوفيق .....

(اظن كده يارشا بقى مالكيش حجة تزعلى ) :blush:

بودا ...كل سنة وانت طيب ..ويارب تفضل معانا لحد مانبقى مليون ..انا قريت زيادة ردود وزيادة قراءة ..قلت يمكن الاقى زيادة مرتبات ..بس ماحصلش ..مش فى الحالات اللى زى دى بيوزعوا حوافز واشياء من هذا القبيل ؟..ماتفكها شوية علينا بقى :lol:

جميلة شوربة البصل ..ولوان انا لى كلام تانى مع العزيز ابو فصاد فى باب صحى ومفيد بس بعد الامتحانات ...

انا الحقيقة باحمر البصل شوية الاول يعنى ياخد لون اصفر غامق كده شوية ...وبعدين ممكن اضيف الشوربة غلوتين ثم الدقيق المحمر ..او الدقيق المحملر ثم الشوربة ...

هى بتبقى جميلة بس دسمة حبتين ..واحيانا بقى اما اكون راضية عنهم باغرفها فى اطباق الشوربة وهى ممكن تدخل الفرن واحط التوست ده وعليه الجبنة المبشورة ..تقوم تسيح فى الفرن وتبقى رائعة ..وهو فعلا طبق شتوى دافى لذيذ

وبالهنا والشفا ...

تم تعديل 16 يناير 2006 بواسطة folana

[Folana]

فلانه هانم العزيزه المحترمه

ايه حكاية السلطنه والمسائل العثمنليه والباب العالى

طيب اذا كان ولا بد نظره ولا حسنه ولا اى حاجه تذكار يعنى ده الغرض

نيجى للحكاية بتاعة العزايم

بلاش تفردى قوى اصلى لازقه وممكن اعملك عبيطه واتصل

بيك الحقينى يا فلانه اصلى نسيت شنطتى فى الميكروباص

انا دلوقتى قاعده فى قدورة مش عارفه ادفع ازاى

وان شاء الله فى الخاص ابقى ااقول ساكنه فين

علشان وقت اللزوم نبقى نستنجدوا بيك على رأى الاسكندرنيه

وحمد الله على السلام مطبخ ضار ولذيذ كان مفتقدك

معلومه صغيره انا ركبت الميكروباص مرة واحده وله معى ذكريات اليمه

عادى بدخله زى ما بدخل العربيه واذا بى اشعر انى ارى نجوم ودوائلر حمراء

راسى لبست فى الباب من فوق له عتبه كده غريبه

ومن ساعتها لا الميكروباص ولا المينى باص ولا أى باص

يا العربيه

او اقعد متستته فى البيت

تحياتى لك

<{POST_SNAPBACK}>

السلام عليكم ورحمة الله .....

ام البنات ياحبيبة ......ياستى انت تقشرى والله ...بس واضح انك من اسكندرية الحمد لله B) ..ولا تقصدى قدورة اللى فى المهندسين ؟

وبعدين قدورة ده راحت عليه خلاص انا حابعت لك قايمة مطاعم اسماك من اللى هى انا جوزى اصله سمكاوى وواخد المطاعم دى كعب داير كلها ...

بمناسبة الميكروباصات دى ..انا ركبت اتوبيس مرة واحدة فى حياتى ايام الجامعة ..كنت عايزة اتروشن يعنى واعمل فيها صايعة وعنتر وحاجات كده ..وحياتك قضيت المسافة على الارض ..كل الاتوبيس مايقف فى محطة ويجى يمشى الاقينى وقعت على وشى ..واميل على ورا ..وامسك فى ده وازق ده ..لدرجة انهم افتكرونى قاصدة :lol:..ومن يومها مااعرفش الاتوبيس ده شكله ايه

يالا ذكريات :D

بالنسبة لموضوع السلطنة ...دى كانت سلطانية قديمة كده واتبرعت بها للاخوة هنا فى المطبخ ...........:blush:

[Folana]

[شرح لانى اختك ام البنات مش بتخرج من الدار الا فى اضيق الحدود

وفى كلام مطرطش كده عن كورتيجانو ومش عارفه ايه

طيب ااقولك فاتح جابنا محل لبيع المطابخ اسمه ارتيجانو يبقى قريب الى بتقولى عليه

ربنا ما يغلب لك جيانو ده عبارة عن ايه

<{POST_SNAPBACK}>

السلام عليكم ورحمة الله .....

يااااااااا أوووم البنات ...ياااااااااااااااااااااااااااااا أوووووووووووووووووم البنات ...

معايا شوية كده الله يخليك .... بقى انت مش عارفة كورتيجانو؟؟؟.....يعنى ده كلام ؟؟

كورتيجيانو يابنتى ..كوررررر- تيجججججججج- ياااااااااا-نوووووووووووووو

هه ؟؟؟عرفتيه ولا لسه ؟؟؟؟ :blush:

ده بقى ياستى وانت خارجة من المنتدى كده تلاقيه واقف ومعاه سبت سميط سخن من اللى فاض من اخونا سكوب ايام قضية سى السيد ..فاكرة ؟ولا كنت لسه مش معانا.؟...المهم يعنى الحاج كورتيجانو ده هو اللى بيبيع السميط على ناصية المنتدى ..ومالوش دعوى بارتيجانو ولا اردغانو دول ...دول واقعين فى بعض وكل واحد اشتغل لوحده من زمان ....

طب زى بعضه انا حاقولك ...ده مطعم ايطالى بيقدم المأكولات الايطالية ..وفيه منه فرع فى المهندسين جنب محل لو كرنفال بتاع الحلويات ..وفيه فرع فى ارض الجولف ..ورا كلية البنات ..بعد مسجد حفصة .....اى خدمة ..وربنا مايدوخلنا لا كورتيجيانو ..ولا انو شخصيا ...

[bodda]

ايوه كده

عايزين الكل يرجع يشارك ونسمع صوت الحلل

:blush:

طبخه متكامله سريعه خفيفه ولذيذة

من مجموعة ضار ولذيذ العالمية

:lol:

الرز البخارى

نحط ربع كوباية زيت ومعلقتين سمن فى حله عالنار حتى الغليان

ونحط فصين مستكه ووراهم نص كيلو لحم مكعبات ونغطى الحله دقيقتين

وبعدها بصله كبيره مقطعه شرائح والتقليب خمس دقايق

ونضيف حبايتين طماطم مقطعه مكعبات صغيره وكوبايتين ميه سخنه

ونسيبها تغلى على نار هاديه حتى سوى اللحم

نضيف الملح والفلفل ومطحون حبهان وجوزة الطيب وجزرايه مكعبات صغيره

ووراهم الرز البسمتى ونضبط الميه باستعمال ماء يغلى يغطى الرز بصباعين

ونوطى النار مع تغطية الحله حتى السوى

بالهنا و الشفا

صباح الفل

:wub:

[وائل ثابت عبد الرحمن]

السلام عليكم

( طريقة عمل فنجان القهوة ) !!!!!!! :D

الحاجة اللى بعرف اعملها :blush:

1 - الكنكة .

2- معلقتين قهوة صغيرتين فى الكنكة .

3- إضافة السكر أو عدمه حسب المطلوب , برضو فى الكنكة .

4- إضافة الماء , و ميكنش كتير , فى الكنكة .

5- التقليب المستمر حتى زوبان الثلاثة مع بعضهم .

6-وضع الكنكة على نار هادئة جدا .

7- عند ظهور فقاقيع صغيرة ترفع الكنكة و يقلب ما بداخلها , علشان الوش :wub:

8- توضع الكنكة مرة اخرى على النار الهادئة .

9- قبل غليانها ترفع و تصب .

10- تشرب القهوة و ارمى الكنكة خلاص . :lol:

شكرا

[bodda]

العزيز وائل

نورت المطبخ و أول مره تتكتب وصفة القهوه

تسلم ايدك بس خليها كوباية قهوه احلى

مساء الفل

:wub:

[Reham]

مساااااااااااااااااااء الخير علي عيونكم

تصوروا ياجماعه انني مابعرفش اعمل القهوة لغاية دلوقتي وانا في السن ده مع انني مدمنة....

شاي بلبن

وأذكر فيما أذكر زمان وانا صغيرة في الاعدادية خالتي قالت لي اعمل لها فنجان قهوه وأديتني الطريقة بالضبط روحت انا بشطارتي طبعا المعهوده اتشمللت وعملتها زي ماقالت بالضبط وبعدين لقيت علي وشها حاجة غريبة كدة قولت أكيد ده الريم اللي زي ماما بتشيله من علي اللحمه والفراخ لما تسلقها ....

وروحت شايلاه ياشباب :wub:

وعملت بنت ناس وحطيتها في صينية وكوباية مية

وقدمتلها القهوة ولما شافتها سألتني علي وشها ....قولتلها شيلته ورميته مش ده ريم القهوه؟؟؟؟؟ B)

تفتكروا عملت ايه فيه ؟؟؟؟

مش هقول

[Folana]

السلام عليكم ورحمة الله ..........

خير ياجماعة ان شاء الله !!!!....موضوع القهوة وموضوع الرز البخارى كانوا ضمن الباب ده يعنى انا قريتهم الصبح فى اطلب اى وصفة على بالك تلاقيها قدامك ...

انعزلوا ليه عن الموضوع ياترى ؟؟!!!.....هى وزارة الصحة كانت بتمر ولاقت فيهم حاجة :wub:

لا بجد ...خير مش فاهمة ؟...ولا انا باعانى من هلاوس سمعية وبصرية وكان متهيالى انهم هنا ؟؟ياريت حد يدلنى قبل الحالة ماتيجى لى تانى ...

[مصرية الهوى]

كنكة ..

يعني ايه كنكة :D

[bodda]

انا كتبت رد لما حدث فى باب شئون المحاورات

واتمنى ان تعيد الادارة النظر فيما حدث

تلبية لرأى مجموعه جمعتها الهوايه لخدمة باقى الاصدقاء فى هذا الموقع المتميز

مساء الفل

[Osha]

للمجموعة القريبة جدا من قلبي

أتابع ما يحدث وفي انتظار القرار النهائي

وان كان عندي اقتراح

بعد كل عشر صفحات يقوم المشرف بوضع فهرش للعشر صفحات السابقة

وهكذا فما على اي متصفح سوى الذهاب الى ص10 او ص20 ...

أشعر أن قرار الغلق والتثبيت سيقلل من حماس البعض لبدء ما قد بدأنا به بالفعل

لا أعلم ولكن لن أطيل وكفى بالقلب ما جرى ...سابقا

[bodda]

احنا منتظرين هايعملوا ايه

:blush:

[Folana]

السلام عليكم ورحمة الله ....

الاخوة الاحباء فى الله .....والله ياجماعة انا حزينة ومكتئبة جدا ...وحانضم لك فى صمتك يارشا ..لان احيانا بتلاقى ان الكلام مالهوش فايدة ....

وانا شايفة اننا نوقف كتابة الوصفات شوية وناخد هدنة كده مع نفسنا لحد مانشوف الامور حتمشى ازاى وبعدين نقرر حنعمل ايه ...

بودا ... عجبتنى كلمة لامساس اللى كتبتها فى شئون المحاورات فكرتنى بموال الحكومة المشروخ بتاع زمان ..

لا مساس ولا مساس ولا مسااااااس

كمان افتكرت لما كانوا - الحكومة برضه - عايزة ترجع الصف السادس الابتدائى ..وراحت عاملة استفتاء ..واحنا فى صفحات الجرايد عمالين نصرخ ونقول لا لا لا لا والصفحة الاولى بتتكلم عن ان مجلس الوزرا بيضع الخطة النهائية لعودة سنة سادسة ....وفى الاخر رأى ال 150 مواطن هو اللى مشى علينا ورجعت سنة سادسة ...اظن ممكن يكون فيه هنا 150 عضو برضه يوافق على قفل الموضوع وتعليقه على باب زويلة ...قصدى المطبخ ...

اللى حصل ده عامل كده زى مايكون فيه مجموعة قاعدة مع بعض بتضحك ومبسوطة ..راحوا جايين دلقوا عليهم ميه وقالولهم يالا يابنى انت وهو من هنا كفاية عليكم انبساط كده ....

لما يوصولوا لحل ياجماعة ابقوا بلغونى .........

والله المستعان ....