اطلب اى وصفه على بالك .. تلاقيها قدامك

[se_ Elsyed]

ماشي يا بني آدمين ..

يعني في الأخر سين سين طلع محمود المليجي اللي في الفيلم والكل شايف إنه شرير ..

طب إيه رأيكوا بقى مافيش مطبخ بعد النهاردة .. والأكل هايبقى ( تيك آوي )

وأنا هاسمع نصيحة عم أبو فصاد وهانمشيها فول نابت وخضار سوتييه ..

أنا خايف على صحتكو يا جماعة من المتفجرات والمسبكات بتاعت بودا ..

يعني بكره رجالة زوجات المنتدى يدعوا علينا لما يلاقوا كل واحده بعد سنة بقت العرض عرضين من وصفات المحاشي والكوارع والصواني المفحفحه ..

في حين لو سمعتو كلامي وقفلنا المطبخ وفتحنا بداله قسم للدايت فووووود .. شكلكو هايبقى سمباتيك ولا نانسي عجرف .. ووزنكم هايبقى مثالي ولا حنان تُرك ( نفسي أعرف بنت الذين دي 45 ك إزاي ؟ دي ولا العيل اللي لسه ما أتفطمش )

شاوروا بعض وأنا عارف إنكم هاتقتنعوا ...

أخوكم ... المليجي

[tarek_almeghallawy]

bodda العزيز

رجاء ماتغمضش عنيك وتزم شفايفك وتقول ييييه

هوّا إيه اللي مدخله المطبخ عندنا تاني

بعد ما فضحنا وجرسنا في المحاورات كلها

والله أنا كان قصدي خير

عموما أنا جاي أباركلك على المطبخ الجديد وأروح على طول

ولك عندي أصالحك بقرصين مشبك لما أنزل أجازة

وآدي بوسة على راسك

بس ولو فيها غتاتة إيه الفرق بين الصيادية الاسكندراني والصيادية الدمياطي

[bodda]

العزيز طارق

حصل خير .. لان من الاصل مافيش عندنا مشاكل من جوه المطبخ

ولا يهمك .. ومنور المطبخ وماتحرمناش من وجودك معانا

:happy:

مفروض ان الصيادية زى ما شرحتها قبل كده هيه اكلة صيادين

علشان بيعملها على المركب وبالتالى مش عايز يستخدم اوانى كتير

وبالتالى بيعملها كلها فى حله واحده

وطبعا الصياديه الدمياطى او البورسعيدى هيه الاصل

يعنى شوربه حمرا مع رز أحمر وسمك مسلوق بالبصل الاحمر

لكن فى اسكندريه ساعات يطلقوا كلمة صيادية على صينية السمك بالبصل

وعلى العموم كله حلو وكله تغيير

و صباح الفل

:)

[حنين]

ميرسى خالص على ترحيبكم بى فى المطبخ بجد انا سعيده بوجودى معاكم وحاسه انى فى مصر على فكرة يابودا انا فتحت البسطرمه النهارده وطلعت جناااااااااااان بجد انضف من اللى برة الجاهزة ومضمونه ومعروف مصدرها منين انا عملتها بطريقتك وجميله خالص ياريت الكل يجربها وخصوصا المتغربين او العزاب مش صعبه هى عاوزة قلب جامد بس فى الاول على حتة اللحمه ياريت الواحد يعرف ييديكوا حته تذقوها اقولكم كل واحد يمد ايده وياخد اللى فيه النصيب بكرة هعمل صنية البطاطس باللحمه فى الفرن واكيد هتنفع مدام نفسكم معانا يلاه كفايا عليكم كده ونكمل بكرة :happy:

[شاعرالرومانسية]

يعني بكره رجالة زوجات المنتدى يدعوا علينا لما يلاقوا كل واحده بعد سنة بقت العرض عرضين من وصفات المحاشي والكوارع والصواني المفحفحه ..

<{POST_SNAPBACK}>

اية ياعمنا انت حتلبسنا تهمة نحن براااااااااااااء منها .. :wub: :D

هما جايينلنا كدة وحياتك ... :D

وبعدين ماانت كنت شايف الشغل ... يقولوا مش عارفين وملناش فى الطبخ..

ولما تقول وصفة تلقى الردود والاضافات والنصائح على ودنة :D

عشان بس تعرف انهن من ذوات المهارات المطبخية :happy:

فبلاش الكلام دة بقى .. لحسن يصدقوا .. ويقولوا انتوا السبب

ويرفعوا قضية علينا .. وعلى المنتدى كمان :)

اشوفكوا فى المطبخ بقى :D

[bodda]

ماتخافيش يا حنين وجمدى قلبك

دى مش وصفات نظريه ... دى متجربه و 100 %

صباح الفل

:happy:

[se_ Elsyed]

تم مسمرة الجزء الأول بمعرفتنا نحن سين سين وكيل نيابة قسم الدرب الأحمر .. وأقفل الموضوع في ساعته وتاريخه .

[abofasad]

عاجبك كده يا شيف بودا

جبتلنا الكلام

وصفة الرز بالجمبري طلعت هايلة واكلوا صوابعهم وراها

وطبعا ام فصاد والأفصدة (جمع فصاد) الصغيرين قرروا ان يكون الطبق الاول كل يوم من اختصاصي بابا اللي هو انا

يعني انت دبستني كده

طيب منين اجيب كل يوم وصفة للطبق الأول

الحق اخوك الكبير (في السن) وما تحرجناش مع الجماعة على اخر الزمن

[شاعرالرومانسية]

كدة برضة يابودااااااااااااااااااا :blink:

انت كل مرة تعمل الافتتاح من غيرى :excl:

بس معلش يا شيف .. عندى دى المرة دى .. B) ;)

انا اللى مقصر.. كان عندى ظروف كدة ..

وكمان النت عندى كان فظيع اليومين اللى فاتوا وكان بعافية

شكله اتعدى منا وجالة زهايمر ;)

اخونا ابو فصاد

الرز بالجمبرى ( الاحمر) يجنن وريحة الفسفور بتندهلى يا باشا ;)

تسلم الايادى وبالف هنا والشفا على جميع الافصدة ( اللى هى جمع فصاد :) )

ومرحبا بالجميع :wub:

[bodda]

العزيز ابو فصاد

بالهنا والشفا انت و الفصايده كلهم

( زى الدهاشنه كده :wub: )

واى اوامر وقلب فى اللى فات مليان اطباق

ولو عايز جديد برضه تحت امر الفصايده

;)

وخد الصنف ده مصرى اوى و تنام بعده نومه عسل

:blink:

اللحم بالدمعه

نسيح معلقتين سمن محترمين عالنار و نحط كيلو لحم مقطع مكعبات صغيرة

ومعاه فصين مستكه ونقلب 5 دقايق تشويح

ونحط بصله كبيره متخرطه انصاف حلقات ومفروم 4 فصوص توم

وملح وشطه ومعلقة كمون كبيره وكوبايتين عصير طماطم

ولما تغلى نوطى النار والحله متغطيه ونسيبها لسوى اللحم

ولو نقص السائل نعوض بماء مغلى

وعلى ما تستوى نكون طبخنا الرز الابيض ابو قلب زى البفته

ونملا منه طبق كبير وندلق اللحمه بالدمعه عليه

واللى يلحق

:excl:

[bodda]

العزيز ابو فصاد

بالهنا والشفا انت و الفصايده كلهم

( زى الدهاشنه كده :wub: )

واى اوامر وقلب فى اللى فات مليان اطباق

ولو عايز جديد برضه تحت امر الفصايده

;)

وخد الصنف ده مصرى اوى و تنام بعده نومه عسل

:blink:

اللحم بالدمعه

نسيح معلقتين سمن محترمين عالنار و نحط كيلو لحم مقطع مكعبات صغيرة

ومعاه فصين مستكه ونقلب 5 دقايق تشويح

ونحط بصله كبيره متخرطه انصاف حلقات ومفروم 4 فصوص توم

وملح وشطه ومعلقة كمون كبيره وكوبايتين عصير طماطم

ولما تغلى نوطى النار والحله متغطيه ونسيبها لسوى اللحم

ولو نقص السائل نعوض بماء مغلى

وعلى ما تستوى نكون طبخنا الرز الابيض ابو قلب زى البفته

ونملا منه طبق كبير وندلق اللحمه بالدمعه عليه

واللى يلحق

:excl:

[bodda]

اسف للتكرار اللى حصل بدون قصد

مساء الفل

;)

تم تعديل 21 يناير 2006 بواسطة bodda

[bodda]

الشيف الكبير وشاعرنا الجميل

ربنا معاك واكيد انت مش ممكن تتاخر عننا الا لسبب جامد

;)

وتسلم ايدك على عمليات فصل الموضوعات

اكيد هاتسهل القراءه والبحث للاصدقاء

وكمان الصديق ملك الكمان عامل مجهود ممتاز

تسلم ايديكم

مساء الفل

:blink:

[abofasad]

الحق يا جدع وصفة خطيرة من عند ابو فصاد

"الكفتة بالدمعة"

يعني بدل اللحم نعجن كفتة ونسقطها في الدمعة

ايه رأي يا شيف.. مش تلميذك برضه

والفصايدة او الأفصدة (على رأي سيبويه) عندي بيطلبوها من امهم باسم "داوود باشا"

[bodda]

طبعا الكفته بالدمعه جميله ومنها صنف داوود باشا

بس اللحم بالدمعه برضه طعم تانى

المهم تكون لحمه كندوز صغيره وتتقطع حتت صغيره برضه

وكنت باطلب من الجزار يقطعها بالساطور ويفتتها اوى

والدمعه بتاعتنا اساسها التوم و كل ما تكتره تحلو اكتر

مش بقولك وراها نوووووووم ؟؟؟

مانت طلعت معلم اهو يا ابو فصاد

;)

مساء الفل

:blink:

تم تعديل 21 يناير 2006 بواسطة bodda

[abofasad]

مانت طلعت معلم اهو يا ابو فصاد

هو الكوليسترول جالي من شوية يا شيف

[حنين]

يا مساء الفل عليكم اخباركم ايه انا عملت صنية البطاطس وطلعت جميله قوى اصلى معملتهاش من زمان ولما حبيت اعملها كانت درجة حرارة الجو 43 يعنى نار برة ونار جوه بس كله يهون مع الطعم الجميل وزوجنا العزيز والاطفال كلهم ناموا ياترى ايه السبب ;)

انا عندى اكله حلوة بعملها للاولاد وبتعجبهم سهله وبتفكرهم باكل برة وحلوة للكبار كمان

sausage roll

عجينة الباف بسترى

لحمه مفرومه

جبنه مبشورة

نعصج اللحمه بالطريقه المعروفه ونزلها من على النار ونضيف الجبنه المبشورة وقطع الباف بسترى لمربعات زنحط من اللحم والجبن فى المربع ونلف زى السجاير لو السجق ونرص فى الصنيه وبعد مانخلص ندهن الوش ببيضه وندخل الفرن ونخرج اول ماتحمر وهتلاقوها خلصت قبل ماتبرد وبالهنا والشفا :blink:

تم تعديل 22 يناير 2006 بواسطة حنين

[bodda]

تسلم ايدك يا حنين

دى وصفه سهله و مفتريه للعشا

ومتهيالى هاتشبه شويه الكانيلونى بس مع اختلاف العجينه

وكنت احيانا اشترى من الفرن الافرنجى عجينة عيش فينو نيه

واخد كل حته واحط وسطها صباع سجق والفها عليه

واخبزها فى الفرن بس لازم يكون حامى اوى

;)

وبالف هنا

صباح الفل

:blink:

[bodda]

يظهر محتاجين فاتح شهيه

:lol:

الجزر المخلل

القاعده العامة فى التخليل للخضروات هو تجهيز محلول ملحى تركيز 10%

وهو ببساطه عبارة عن إذابة كيلو ملح فى عشره لتر ماء

أو أى كميه اقل او اكتر بس بنفس النسبه نص كيلو ملح فى خمسه لتر وهكذا..

نيجى بقى للجزر .. لازم يتم تخليله صحيحا حتى لا يهترئ فى التخليل

ويوضع فوقه أى ثقل حتى يكون غطسان فى المحلول

وبعد ثلاثة ايام من التخليل نتخلص من المحلول لان لو تم قياسه لن يزيد عن 7%

بسبب امتصاص الجزر لنسبة من الملح

ويتم وضع محلول جديد 10% مره اخرى مع اضافة فنجان خل

ويترك فى المحلول لمدة اسبوعين

بعد كده ممكن نطلع الجزر ويقطع بسكين مشرشر او عادى

حسب الرغبه والاشكال المطلوبه

ويحفظ فى نفس المحلول

وسلم لى على سدة النفس

صباح الفل

:wub:

تم تعديل 22 يناير 2006 بواسطة bodda

[حنين]

يا سلام عليك يا عمنا بودا انت ومخللاتك الرائعه فعلا تمشى حلو قوى مع الوصفه على فكرة انا كنت بحط ساعات بدل اللحمه المفرومه هوت دوج وبتبقى روعه على فكرة هى مش ثقيله ده يمكن حسب العجينه اللى عندى هنا او اللى بستعملها كويسه وعلى فكرة كمان بعمل بيها الجلاش وطرقتى زيك باللبن والبيض فى نهاية السوى وبتطلع روعه بس طبعا تبقى احل وهى بتتاكل بالجزر المخلل بتاعك والف هنا وشفا :lol: