اطلب اى وصفه على بالك .. تلاقيها قدامك

[abofasad]

يا ريت يا شيف بودا تكمل جميلك وتكتب لنا وصفة مربة الجزر

خصوصا اني بشرب كل يوم عصير جزر ويصعب على اني ارمي التفل بعد العصير واعرف انه ناس كتير بتعمل منه كيكة

يعني مطلوب منك مربة الجزر قبل العصير

ومطلوب كيكة الجزر بعد العصير

معلش طلباتي كتير

اعمل ايه "انت كريم واحنا نستاهل" (مثل سعودي)

[bodda]

طبعا فكره جميله يا حنين

والحلو فيها سهولتها وانها محبوبه من الشياطين الحمر... اقصد العيال

:lol:

وجربى مخلل الجزر بس بلاش نكتر من المخللات بصفة عامة

علشان الاملاح

وبالف هنا وشفا

:wub:

[bodda]

العزيز كبير الفصايده فى بلاد الاندلس

:wub:

تفتكر التفل المتخلف عن عصير الجزر فاضل فيه ايه ؟؟؟

ما انت اخدت كل الفايده فى العصير

:sad:

عامة انا هاقولك وصفة مربة الجزر وانت حر

ممكن تعملها بجزر سليم او بالباقى من العصير

بس طبعا هيه بالجزر السليم افيد و احلى

:lol:

مربة الجزر

نقول اتنين كيلو جزر واتنين كيلو سكر ومعلقة صغيرة قرفه

و نص معلقة صغيرة قرنفل وعصير ليمونتين

هانغسل الجزر كويس ونقطعه مكعبات او حلقات ... ماتفرقش

ونحطه فى حله ومعاه السكر و اربع كوبايات ميه

ونحط الحله عالنار ولما تغلى الميه بالمكونات نوطيها خالص علشان ماتلسعش

و نحافظ على نسبة ميه يادوب تغطى الجزر وكل ما تنقص نزود ميه بتغلى

وطبعا مع التقليب... وبعد مانلاقى الجزر استوى نحط القرفه والقرنفل و الليمون

وتغلى غلوتين حوالى 5 دقايق ونطفى عليها

ونكون مجهزين البرطمانات نضيفه وجافه ومحطوطه فى صينيه وحواليها ميه سخنه

ونصب المربه سخنه جوه البرطمانات الدافيه وبالتالى تبقى معقمه

ولما تبرد خالص نحطها فى التلاجه او براها ما تفرقش

وبالهنا

مساء الفل

:D

[abofasad]

شكرا شيف بودا على وصفة مربى الجزر

ودلوقت يا حلو ايه رأيك

لو تكتبلنا عن وصفة او اتنين تتعمل بالبرغل

لأن الفصايدة زهقوا من الرز

وخصوصا ان البرغل متوفر هنا في بلاد الأندلس

وعلى فكرة منتظرين زيارتك لهذه المنطقة من اسبانيا علشان تدوق اكلنا اللي هو من وصفاتك

احنا تلامذتك والعين ما تعلاش عن الحاجب

[Folana]

السلام عليكم ورحمة الله وبركاته ..........

........لولولوللللىىىىىىىىىى...لولولولولووووووووووولىىىىىىىىىىى

يا صلعنبى ..يا صلعنبى ...ياماشاء الله ..يا ماشاءالله ...ده الكلام جد بقى ياولاد ..وبودا اخد قرشين من المالك واخلى المطبخ الاولانى علشان الملاك ناويين يطلعوا مكانه برج ..وجه هنا عمل مطبخ جديد على احدث المواصفات ...ايشى حلل بتبرق ..وايشى اطباق جديدة ...وايه ده كمان ؟...ابو عيون زرقا؟؟؟ ياحلاوة ياحلاة ...

وسايبنى انا عمالة اتمرمط فى المحاكم ..ويحولونى على شئون المحاورات ..ويحولنى على قسم الدرب الاحمر ...اقابل حضرة البكباشى محمود المليجى ..ويلففنى كعب داير ..وفى الاخر انت هنا وهات ياشغل والاشية معدن ... :lol: .....(وش فلانة زند السبع )...

...اولا ..عايزة ابعت رسالة لاخواتى الحلويين وحبابيبى ...اللى بودا طنشهم

رشا :...المطبخ الجديد مضلم من غيرك فعلا ....فينك مادخلتيش ليه وكتبت لنا حاجة ..اوعى تكونى لسه زعلانة متهيألى كده حل كويس وادينا مع بعض زى ماحنا ..وماتخافيش انا مش حاروح بودا النهارد الا لما يقسم الفلوس علينا كلنا

اخى الفاضل فنسر ...ماعرفناش نرحب برجوعك بينا فى المطبخ الاولانى ..انت عارف بقى القضايا والمحاكم والحكومة بالها طويل ...عايزينك تشارك معانا بقى

ريهـــام ....الاخوة فى الله بيحبوا انهم يكونوا متجمعين دايما ومش ناقص منهم حد ..خصوصا اذا كان حد عزيز عليهم زيك ...

ام البنات ....................................................................

مكانك فاضى ومستنيكى ...وعلى فكرة ام البنات بترسل خالص سلامها وتحياتها الى رشا وريهام وبنت مصرية وشهد ...وبتبلغكم انها بتحبكم فى الله ..

ولن ازيد ..انتظارا لان تستكمل هى الكلمات ....

عايزة كمان ارحب بالاخت الجميلة المسلمة لله ..كلماتك اثرت فى جدا ..وانا باشكرك على كل حرف قلتيه ومنتظرة مشاركاتك معانا

حنين ...مرحبا بك بيننا اخت عزيزة ..وتسلم ايدك على وصفاتك ..

وبجد رب ضارة نافعة ..لاننا كسبنا اعضاء جديدة معانا ....

المرة دى مش حاطلب منك وصفة يابودا ......حاسيبك تفرح بالقرشين شوية بس خلى بالك اناا خالى بيشتغل فى مصلحة الضرايب ويتمنى يخدمنى

شاعر الرومانسية ....تسلم ايدك وباشكرك على مجهودك اللى قمت به ........

:wub:

تم تعديل 22 يناير 2006 بواسطة folana

[حنين]

يااااااه اخيرا فلانه ظهرت انت فين ده انا دخلت المطبخ ده عشان كلامك الجميل اللى بيحلى الطبخ انا قريت الموضوع اللى فات حله حله بس كان لى نصيب بقى ابقى فى الحلل الجديده اقصد فى الموضوع الجديد وعاوزين نفسك معانا بقى وياريت تعمللنا نشره وتنويه بالعوده الجديده عشان الكل يرجع ويشارك

والمطبخ نور تانى برجوعك :)

[حنين]

طبعا يا شيفنا هجرب مخلل الجزر وخصوصا انى بحب الحوادق اكتر من الحلويات يعنى لو عندى طبق مش وحتة بسبوسه اخد حته من البسبوسه عشان متزعلش بس واختم بالمش طبعاعلى فكرة الشياطين الحمر بتوعى لسه خضر مستوش صغيرين يعنى فبيبقوا ساعات محتاجين اكل مختلف عننا فى الشكل والطعم وخصوصا ان اكلنا المفروض يكون خفيف شويه بس هما لسه محتاجين الغذا فايدك بقى معانا عشلن نغذيهم :wub:

انا بقى نفسى فى باتون ساليه (بقسماط بالكمون ) كنت باكله فى مصر مع الشاى الصبح وكان يجنن فلو تدينى الطريقه فيبقى الف شكر وانا هكتبلكم طريقة العيش البلدى بعد الفاصل بس قولى لو فيها تعديل :)

[حنين]

العيش البلدى

4كوب دقيق

ملعقة ونصف كبيرة ردة

1 م ك خميرة

كوب وربع ماء

نصف ملعقة كبيرة ملح

تعحن المقادير السابقة مع بعضها ثم تترك لتختمر 45 ق ثم تقطع العجينة وتفرد على شكل اقراص دائرية توضع اقراص الخبز في صواني بها ردة وتترك لتخمر على ما الفرن يسخن

ثم توضع في فرن حرارته 250 د م لمدة 8 ق في الرف الاخير الاقرب الى النار او لو كهرباء ايضا الرف القريب للحرارة وياسلام لو عندكم الفرن بابه زجاج هتشوفوا العيش وهو بتنفخ وبالهنا والشفا انا عملته وطلع جميل بس لو فى تعديل من شيفنا يبقى زيادة الخير خيرين

[bodda]

منورين يا محبى المطبخ و روايحه

ومنتظرين الغايبين ينورونا زى ما قالت فلانه هانم

و كنت شايفك وانتى بيجروكى لحروب جانبيه

لكن كان غرضى الاساسى المحافظه على وجودنا وكياننا هنا

واعتقد كده اقرب الحلول الوسط وباقل الخسائر

ولا ايه .....؟

:)

نيجى بقى لوصفة العزيزه حنين للعيش البلدى

بصى بقى .. مادام جربتيها كده ونفعت يبقى تمام

وبلاش تغيرى حاجه

يمكن انا بحب اخلط الخميره الاول مع شوية ميه دافيه بسكر لتنشيط التخمر

انما الباقى كله زى الفل

تسلم ايدك

وصباح الفل

:wub:

[bodda]

العزيز زعيم الفصايده فى بلاد الاندلس

والله عندى اكتر من عزومه اجى اسبانيا

وشكلى كده هاعملها فى يوم من الايام واكيد هاقولك قبلها لو حصل

بالنسبه للبرغل فهو يعامل معاملة الرز بس بعد نقعه عدة ساعات او طول الليل فى ميه

واحلى استعمال له فى طواجن مع لحم بالبصل فى الفرن

طاجن البرغل باللحم

نقول كوبايتين برغل منقوعين فى ميه من بالليل ونصفيهم

و نص كيلو لحم بتلو مكعبات و ممكن كندوز صغير

وفى الحالتين افضل سلق اللحم اولا مع بصل وحبهان حتى السوى

ونبشر بصله كبيره ونقلب معاها ملح وفلفل ومبشور جوزة الطيب

ونقلب البصل ده مع البرغل كويس

ونحط نص الخلطة فى الطاجن او البيركس ونرص فوقه اللحم

وننغطيه بباقى الخلطة

مع كوبايتين شوربه من اللى سلقنا فيهم اللحم

ويدخل فرن حامى حوالى نص ساعه

و مع التجربه هاتعرف تضبط كمية الشوربه المضافه

بحيث يطلع من الفرن مفلفل

وبالف هنا وشفا

:)

[NoorJehan]

السلام عليكم إخوانى على الدرب المطبخى

بدايه أعتذر عن التأخير، ولكن أنا كنت مكسوفه أشارك لأنى حسيت إن وشى كان حلو عليكم جدا، أول ما شاركت من هنا والحرب الأهليه قامت بعدها ...ولكن دى سنه الحياه ومفيش قصه نجاح يا أولادى إتعملت بالساهل...حمدالله على سلامتكم وان شاءالله منكونش فقدنا أى ضحايا لأن لسه مشوفتش كل الأسماء مسجله فى الموضوع الجديد..

أنا معكم فى تنسيق الوصفات بدون المساس بتلقاءيه الموضوع الجميله...ولكن التنسيق فكره جيده لأنى بصراحه كنت محرجه أسأل عن وصفه تكون إتسأل عنها من قبل بالرغم من تصفح الموضوع من أوله والذى إستغرق أكثر من ساعه ومع ذلك لم أستكمله..

على العموم بارك الله فى مجهودكم وأشكركم على ترحيبكم الجميل...

بس محدش رد عليه فى أول طلب ذكرته عند أول مشاركه..

طعم السكالوب بانيه إزاى نكرره بالمنزل زى طعم المطعم؟؟؟

وألف شكر مقدما...

الأخ بودا

أشكرك على تعقيبك عن طرق طبخ الأرز

وبمناسبه الشيف أسامه اللى هو مش إنت كما أكدت :ninja:

أول برنامج له على قناه دبى، كان إسمه "مع أسامه أطيب"

ظننت إن إسم والده أطيب :D

وذلك لعدم إعتياد سماع صفه أطيب باللهجه المصريه :wub:

يلا، ألقاكم على طبخه جديده :)

[bodda]

العزيزه نور جيهان

ولا حرب اهلية ولا حاجه ..دى كانت صواريخ العيد

:wub:

بالنسبة للسكالوب بانيه

ممكن يتعمل بصدور الفراخ شرائح او باللحم البتلو

ولازم يتدق اللحم بالمطرقة الخشبية لتهتيك الالياف وسهولة التسوية

بعد كده نبشر بصله ونضيف للمبشور ملح وفلفل فقط

ونتبل اللحم بيها وندخله التلاجه ساعه على الاقل

ونعمل خلطة من دقيق وبقسماط ناعم

ونضرب بيضتين تلاته كويس و نقلب اللحم المتبل فيهم ثم فى البقسماط

ونحمر فى زيت غزير مخلوط بسمن

ونصفى من الزيت وبالهنا والشفا

:ninja:

[مسلمة لله]

مش عارفة ليه طاجن البرغل باللحم فكرني بطاجن انا باعمله وبيطلع حلو يارب يعجبكم

كاليماري(سبيط) بالفريك

بنجيب الفريك ونديله غلوتين كدا على النار لغاية لما يبقى نصف سوى

وبعدين بنجيب بصلتين ونصفرهم على النار مع زيت ذرة وعليهم طماطم مقطعة مكعبات صغيرة وفلفل اخضر وممكن برضه احمر واصفر يعني حسب الرغبة

بس المهم نحط واحد فلفل حراق وان ماكنش يبقى شوية شطة كويسين

نقلب الكلام دا تقلبتين تلاتة وبعدين نضيف كوب عصير طماطم

ونسيبهم شوية وبعدين يكون عندنا كسبرة خضراء متقطعة صغير نحطها برضه

في الوقت دا بنضيف الاكاليماري المتقطع بالطول رفيع ومتبل بالتوم والملح والكمون والليمون ونضيف معاه الفريك بعد تصفيته طبعا

ومن ثم على الفرن على طول لغاية لما كل حاجة تتسبك والكاليمارى والفريك يتموا سواهم

وبالف هنا وشفا

الف مبروك استقرار المطبخ من تاني

ومنورة يا فولانة ويارب وصفتي تعجبك

[Osha]

وحشتوني جدا يا جماعة

مبروك علينا وعليكم البيت الجديد

بس افتكر محتاج شوية ستار على موكيت على حبة صور على الحيطان

قريت كل الوصفات اللي فاتت وربنا على المفتري

على فكرة انا بقالي فترة عندي حالة ملل من الاكل والطبيخ والذي منه

وفي الاحوال دي الفول بيكون مسئول مسئولية كاملة ومطلقة عن تخفيف حالة الملل

يالا يا حلوين - ننمشيها فول وطواجن فول عشان خاطر الحبايب

وهنيالك يا فاعل الخير والثواب

وفرصة برضه نوفر شوية

صباحكم جميل

[حنين]

عندك حق يا بودا انا فعلا نسيت اقول ان الخميرة تتخمر بره الاول :P بس سيبك انت المفروض الواحد يسب الخبرة لاهل الخبره وبس الله ينور عليك

على فكرة واضح انك قريت رسالتى التانيه لانى فى الاولى طلبت منك طريقة الباتون ساليه معلش اصلى نفسى فيها

ومرحب بعودتك معانا يااوشا وربنا يفتح نفسك تانى للاكل عشان نشوفك على طول انا كتير بتحصلى حكاية الزهق من الاكل دى بس بتعدى على خير وياريت نشوفك على طول

[bodda]

العزيزه مسلمة بالله

طاجن السبيط يجنن تسلم ايدك

بس فيه تعليق بسيط لو اذنتى لى

:P

بفضل سلق السبيط الاول مع ميه وملح غلوتين عالنار وارمى الميه دى

لانها بتشيل الزفاره تماما

وتانى حاجه اضافة الليمون بعد الخروج من الفرن مباشرة بتدى طعم احلى

منوره وياريت ماتحرميناش من وصفاتك اللذيذة

صباح الفل

:angry:

[bodda]

اخيرا اوشا ظهرت يا رجاله

:P :)

حمدالله عالسلامه

وراجعالنا بطلب فول ؟؟؟؟ وماله

صينية الفول بالبيض

نجيب كمية فول متدمس محترمه ( يعنى ناتج تدميس نص كيلو مثلا )

ونحطه فى حله ونضيفله مفروم فصين توم

ومفروم حزمة شبت على بقدونس على كسبرة خضره

وطماطمايتين متقطعين مكعبات صغيرة قوى وملح وفلفل وكمون

ونص كوباية زيت ونغلى ده كله عالنار كويس وبعدين ندلقه فى صينية فرن

وعلى وش الصينيه نكسر حوالى 10 بيضات

ونرش عالوش جبنه رومى مبشوره

وعالفرن عدل تاخدلها عشر دقايق ولا ربع ساعه بالكتير

ويكون العيش الطازه جاهز وسلطة خضرا

وبالف هنا

:angry:

[bodda]

العزيزه حنين

تسلم ايدك واوعى تحرمينا من وصفاتك الجميله

والباتون ساليه جاهز بعد الفاصل

صباح الفل

:P

[Osha]

شكرا ياحنين على ترحيبك وماتقلقيش انا ساعات باتابع في صمت عشان اخد وصفات ببلاش

وشكرا يا عم بودا على الاكلة المفترية

والله يا جماعة انا عندي حالة ملل فعلا من كل اصناف الاكل

وقررت اني انزل منيو محصوصة كل الحبايب اللي تصيبهم احيانا هذه الحالة وعلاجها الوحيد في نظري - اكل قورديحي معبي توم

التوم يتغلغل في تلافيف المخيخ يطرد الملل ..وأي حاجة تانية ويصفر العداد :blink:

وتلاقي المخيخ على الزيرو :angry2:

المهم

بادئ ذي بدء

انها العزيزة الطعمية مقلية ومشطشطة

سلطة خضراء بها بصل وباتضايق جدا من اللي يقول مش باكل البصل صاحي

بطاطس محمرة

باذنجان بالخل والثوم مفتري

سلطة زبادي بالتوم والخيار المبشور

سلطة بطاطس مهروسة بالتوم والفلفل الحراق

طبق فول معمر من المتين وجنبه شوية بيض مسلوقين

البقاء لله يا جماعة والله يرحمكم جميعا بعد الاكله دي

بس فعلا دي مجربة تماما ونسبة نجاحها تفوق 115% بعد اضافة المستوى الخاص

بالاذن اروح اكل ساندويتش النابالم دا

المرحومة رشا

[حنين]

شكرا ياعمنا بودا على التشجيع وانا فى الانتظار :angry2:

الاخت اوشا

ده احسن اكل انت قلتيه بجد الواحد بعد اللحوم والاكل الدسم بيجيلوا نوع من الزهق من الاكل او(قرف) :blink: بس الاكل ده محدش يزهق منه انت جوعتينى على الصبح كده اعمل ايه انا هتخلينى اقوم انقع فول واعمل طعميه والذى منه هقولك على طريقه كمان هتعجبك طبعا عندك فى امريكا خرشوف انا عندى هنا فى استراليا لو مش بيتحبيه انا هخليكى بالطريقه دى تحبيه :blink: وعلى فكرة الخرشوف كله حديد

تيجيبى الخرشوف وتنضفيه كويس وتقسمى الواحده نصين وانت بتقشرى الواحده اللى تخلص تحطيها فى ماء وليمون عشان مش يتاكسد يعنى يسود مع الهواء لما تخلص تسلقيه نص سلقه وبعدين تتبليه زى السمك ملح وتوم وكمون وفلفل اسود ولو عاوزة فلفل حامى وسيبيه شويه عشان يشرب التتبيله وبعدين قلبيه فى الدقيق ومنه على الزيت السخن وطلعيه كليه مع العيش البلدى طبعا عندك مفيش يبقى مع اللبنانى مع سلطة طحينه بتاعة عمنا بودا وبالهنا والشفا طعمه بيبقى جنااااان بجد وقوليلى على النتيجه

اقوم بقى انقع الفول :huh: