اطلب اى وصفه على بالك .. تلاقيها قدامك

[Osha]

نقعت الفول والا لسه?

انا اخيرا لقيت فول مدشوش في الولاية دي

بالنسبة للخرشوف :angry2:

أفتكر انه لو عمل بنفسه الخطوات السابقة دي كلها بما فيها انه يقلي نفسه في الزيت :blink: - صعب اني اتقبله :blink:

معلش يا حنين انت اصلك ماتعرفنيش انا الاكل اللي باكله يتعد على الصوابع :huh:

اقولك

محبة للنبي حاجرب الخرشوف عشانك يا حاجة :)

ماما زمان كانت بتعمله باللحمة المفرومة في الفرن.

بكره ناوية اقضيها كشري ان شاء الله

اصل كورس التوم لازم يبقى 3 ايام عشان الحسد

الكشري دا بقى تخصص اخونا حسن ربنا يكرمه

[bodda]

انتو قلبتوها فول وطعمية ؟؟؟

وماله .... بس بجد حلو الخرشوف المقلى ده يا حنين

وبعدين ما تجربى وصفة الكشرى السهله دى يا رشا

الكشرى

نقول كوبايتين رز و كوباية عدس بجبه ( اسود)

نسلق العدس فى تلات كوبايات ميه مع ملح ونصفيه وناخد ميته نطبخ فيها الرز

حلو كده ...؟ ;)

ونسلق مكرونه مشكله قصيرة على سباجيتى مكسر على شعريه

نفرم اربع فصوص توم كبار ونشوحهم فى معلقتين زيت

و قبل ما لونهم يصفر نحط عليهم عصير كوبايتين طماطم وملح وفلفل

ونسيب الصلصة تغلى ربع ساعه ... ودى هيه صلصة الكشرى

ونحضر الشطه بمغلى كوباية عصير طماطم ومعاها ملح ومعلقتين كبار شطه

ونحضر الدقه بمغلى كوباية خل وكوباية ميه و ملح و كمون

ومعاهم 5 فصوص توم مفرومين ...نى فى نى

ونحضر البصل بتحمير بصل مقطع نص حلقات ونتربه بالدقيق.. للقرمشه

جديده دى ...؟ ;)

ونقليه فى زيت عميق سخن اوى وينشل ويجفف

وبكده نخلط الرز والعدس والمكرونه فى طبق غويط

ونضيف لهم الصلصه والشطه والدقه زى ما نحب وعلى الوش نذوق بالبصل

وبالهنا والشفا

:wub:

[حنين]

ايوه يا اوشا نقعت الفول فول مدشوش وفول سليم اصلى بحب الطعميه مع الفول عشان احس انى فى مصر تانى بس طبعا مش هتيجى زى بتاعة مصر اللى كانت محشيه تقليه ولاشطه مش عارفه بس كانت جنان

على فكرة ماما كانت بتعملى

الخرشوف برضه باللحمه المفرومه والباشميل فى الفرن كانت تقسمها وتحط فى كل نص معصج اللحمه وعلى الوش بتاع كل نص تحط الباشاميل وتتحط فى الفرن وبطتلع حلوة بس صدقينى المقلى احلى على العموم الكشرى كمان حلو وخصوصا بطريقة بودا يلاه جربى واحكيلنا

ياعم بودا انت نسيتنى فى الباتون ساليه ولا ايه انا جهزت حاجتى وقاعده مستنيه :wub:

على العموم هاكل الفول والطعميه على ماتسال فى

شفت طول الانتظار هيخلينا نكتب اشعار على العموم براحتك لحسن تقول على زنانه ولا حاجه

[bodda]

العزيزه حنين

اسف للتاخير الخارج عن ارادتى

;)

الباتون ساليه

اتنين كيلو دقيق و اربع معالق كبيره سكر وزيهم ملح

ومعلقتين كمون وحتة خميره قد عين الجمل

و 3 كوبايات ميه و كوبايتين زيت ونص كيلو زبده مضروبه يعنى سايحه

هاناخد شوية ميه دافيه مع سكر وندوب الخميره ونسيبها 5 دقايق

وطبعا ممكن نستعمل كيس خميره جافه بنفس الطريقه

هانخلط السوائل مع بعضها الزيت والزبد والميه ثم السكر

ثم الملح والكمون ونضيف الدقيق حتى التفاف العجينه يعنى تسيب الايد

بعد كده هاناخد حته حته نبرمها عالرخامه المدهونه زيت لاى رفع نحبه

ونرص فى صاج الفرن.... وممكن قبل الرص نرش عليها كمون بسيط اضافى

وبعد الرص تدخل فرن حامى ماتاخدش ربع ساعه

وبالف هنا وشفا

:wub:

[Folana]

السلام عليكم ورحمة الله ............

اوشا ..حمدلله على سلامتك ..انا لما لاقيتك هنا نفسى اتفتحت تانى على المطبخ ...

حنين ..ماشاء الله عليك ..تسلم ايديك بجد باين عليك هايلة فى المطبخ ...تعرفى انا اول مرة اسمع عن الخرشوف المقلى ده ...بس المشكلة بقى ان الايد بتسود عند تقشيره ...وبناءا عليه انا مش بأقشره ..باعهد لهذه المهمة لاى حد من حبابيى ....ماعندكيش طريقة بقى لمنع سواد الايد ده ؟؟

مسلمة لله ....انت اللى نورتينا وياريت ماتنسيناش فى وصفاتك الجميلة دى على طول ....

بودا ..... ;) ....واضح ان الطلبات كتير عليك وماشية معاك ...غريبة حكاية اننا نقلب البصل فى الدقيق دى ...انت متأكد انه كده يقرمش ؟....عموما انا لى طلب صغنن نونو خالص خالص ..وياريت تفتكره ...ممكن تكتب لى طريقة عمل الخبيزة ؟....

صباحه جميل ......... :wub:

[bidawy]

السلام عليكم ورحمة الله وبركاته،،

ممكن وصفه حلوه للجمبري

[bodda]

اهلا بداوى واهل اسكندريه

بس متاكد انك من اسكندريه ؟؟؟

أصل أعرف عيلة البداوى من دمياط

:wub:

منور معانا وحاضر للجمبرى بعد الفاصل

صباح الفل

;)

[bodda]

صينية الجمبرى

تعتبر جمبرياجرا

;)

نجيب اتنين كيلو جمبرى وسط ونفصصه نى

بس ماليش دعوه بتمنه :wub:

ونخرط بصلتين محترمين انصاف حلقات ونفرم 10 فصوص توم

وبطاطسايه وسط مكعبات صغيرة وحزمتين كسبره خضرا ناعم

وطماطمايتين مكعبات صغيره وملح وفلفل وكمون وشطة

نقلب كل ده مع بعضه مع الجمبرى المفصص

وندلقهم فى صينية فرن او بايركس او طاجن فخار محترم

;)

وعلى وشهم نصب نص كوباية زيت و نص كوباية ميه

ويدخل الفرن الحامى اوى نص ساعه

ونقابلها وهيه خارجه بأيه ...؟؟؟؟

برافو..... بعصير تلات ليمونات مفتريين

وبالف هنا وشفا

mfb:

[bodda]

فلانه هانم

خبيزه

نجيب حزمتين خبيزه محترمين ونقطف ورقهم

وبعد كده فيه طريقتين :wub:

اما نخرطها زى الملوخيه ونكمل

او نحمص الورق فى سمن بلدى وبعد كده يتفتت بالمفراك لو متاح

خلينا فى التخريط الاسهل

;)

هانجيب شوربه شديده من بطه ولا لحمه

ونغليها ونسقط فيها الخبيزه المتخرطه ناعم اوى

او المتفتته فى السمن بالمفراك

وبعد ما تاخد غلوتين

نكون محضرين تقلية توم مفتريه فى معلقتين تلاته سمن بلدى ومعلقة كسبره ناشفه

ونطش التقليه على وش الحله ونغطيها تاخد غلوه واحده ونطفى عليها

وفيه يحبوها بالليمون او من غير

وبالف هنا وشفا

;)

تم تعديل 25 يناير 2006 بواسطة bodda

[مسلمة لله]

صباح الخير

واضح انه النهادة يوم الكشري العالمي

انا كمان صاحية مستحلفة وقايلة هو كشري يعني كشري ما فيش غيره

صباح الكشري

ساعات كمان باضيف على الوش مع البصل حمص مسلوق

وهاجرب النهاردة بقي البصل ابو دقيق

استاذنا بودا ملحوظتك في محلها بالنسبة للسبيط بس انا باغسلة كويس بالملح والخل والحمد لله مبيبقاش قيه زفارة

اما الجمبري بقى فانا باتعمد اعمله بقشره علشان يفضل اطول فترة ممكنة قدامك على السفرة وكان بيطلع حلو قوى

بس بقالة مرتين غدر معايا واعمله ما يبقاش عايز يتقشر

يعني تقشره بصعوبة مش عارفة ايه السبب

فان شاء الله اجرب بقى اقشره الاول وامري لله

اوشا بمناسبة التوم هاقولك على وصفة لشوربة البطاطس وان شاء الله تعجبك

حنين انا كمان باحب الباتون ساليه جدا ربنا يسهل ويبقى عندي وقت واجربه

فولانة فكرتيني بالخبيزة تعرفي انا ماكلتهاش يجي من عشر سنين يالا كوليهالي بقى وبالف هنا وشفا

اقوم بقى اجهز الكشري

تم تعديل 25 يناير 2006 بواسطة مسلمة لله

[Osha]

شكرا على الكشري الاكسبريس ياعمنا الكبير

علم وينفذ

حنين

ياسلام على الطعمية بتاعة فلفلة في وسط البلد وبتكون محشية التقلية حاجة كده تشفي من العلل والله يا بنتي

مش عارفة ليه سيرة الخرِِشوف برضه مش مريحاني - اقولك حاشوف سعره وبعدين اخد قراري ;)

فولانة

انا قلت العود احمد واعقلي يا بت مالكيش غير اصحابك المطبخجية ينفعوك

افتكر بمناسبة سودا الايد وقت تقطيع اي حاجة بتاخدي شوية ملح وعصرتين لمون تدعكي بيهم ايدك

انا ماجرتبش - روحي انت جربي وقولي - بس اوعي ايديك تكون متعورة ساعتها حتدعي عليا لما تقولي يا كفا mfb:

الا بالمناسبة محدش شاف حسن يا جماعة الخير? :wub:

مسلمة لله

مستنية على أحر من الجمر شوربة البطاطس وساهموا معنا في رفع حالة الملل الغذائي عن كاهل اخوانكم المغتربين - ينوبكم ثواب يعني ;)

بودا

تسمح لي بطلعة جمبري لو سمحت

انا باجيب الجمبري واشيل الراس بس مع تنظيف شديد عنيف بالملح والخل والذي منه

تقدح ملعتين زيت ذرة مع فص مستكة وحبهان في طاسة تيفال لا يلتصق بها الطعام

يقلب فيها بصلة مبشورة ومعها فلفل اسود لمدة 20 ثانية

يوضع الجمبري ويقلب حتى يتغير لونه تماما ويكون في الحالة الميه بتاعته خرجت كلها

يظل يقلب حتى يشرب مائه ثم توضع مكعبات طماطم وفلفل رومي مبشور وخضرة مفرية لمن يحب الخضرة والبهار طبعا ويغطى لتمام السوا

وكل عام وانتم بخير

اروح بقى اشتري جمبري واطنش الكشري

[bodda]

العزيزه مسلمه بالله

الجمبرى اللى مش بيتقشر بسهوله غالبا بيكون جمبرى لونه بمبى اصلا

واحسن انواع الجمبرى هو القزاز ولونه رمادى فاتح

او النوع التايجر بيكون لونه رمادى ومخطط بلون رمادى غامق

او لو اتساب يستوى اكتر من اللازم

;)

وموضوع الغسيل بالملح وغيره للسبيط متعب اوى

والاسهل وانفع منه الغليان دقيقتين مع ماء بالملح

:wub:

فلانه هانم

يعنى مش شامم ريحة الخبيزه ؟؟

;)

اوشا هانم

ايه الجمبرى ده اللى يتعمل فى طاسه تيفال ؟؟؟

انتوا بتشتروا ربع كيلو ؟؟؟؟

:P mfb: :lol:

طب بس جربى طريقتى للسلق اللى كتبتها قبل كده .. اهى :

جمبرى مسلوق

كيلو جمبرى يتشطف كويس وبس ;)

نحطه فى حله وعليه بصله ترانشات وخمس فصوص توم مفرومين

ومعلقة كمون و عودين كرفس وملح وشطه ونقلبه كله بخفة ودلع

ونحطه عالنار مع نص كوباية ميه ونغطيه

وبعد الغليان وظهور الريحه الجبارة نكشف الغطا ونقلبه تانى ونغطيه

وبعد خمس دقايق كمان تقليبه تانيه وخمس دقايق

يعنى الموضوع كله ربع ساعه ويطلع احلى جمبرى

ومعاه احلى كوباية شوربة جمبرى بنتخانق عليها فى البيت

مساء الفل

:wub:

تم تعديل 25 يناير 2006 بواسطة bodda

[Folana]

السلام عليكم ورحمة الله .........

بودا...... ;) ازاى مش شامم ريحة الخبيزة ..دى ريحتها واصلة لاعالى البحار ....بس ركز انت شوية .

تسلم ايدك طبعا ياشيفنا الهمام ...طلعت جميلة بس اصلى كنت طالبة فاعل خير علشان يخرطها وفين وفين على مالقيت متبرع ..بس برضه على فكرة دى تانى مرة تجيب سيرة المفركة وانا مااعرفش ايه هى ....ولا اسمها المفراك؟؟....برضه فى وصفة الرجلة فاكر؟كنت قلت لى عليها دى ..ممكن رسم توضيحى لو تكرمت علشان تنور المحكمة بس ...

اوشا...عندك حق ..فين حسن ياترى ..لعل المانع خير ويطمنا عليه قريب ان شاء الله ..اما من ناحية ايدى فهى متشرحة مش متعورة مش لسه خارجة من المحكمة يابنتى ....هى محتاجة لمونة فعلا ;)...بصى انا ريحت نفسى وتنضيف الخضار ده باتصرف فيه ربنا يخلى لنا اولاد الحلال ....

انا سعيدة جدا بالمجموعة الجديدة اللى معانا والله ...يارب كمان الناس حبايبنا اللى زاغوا مننا يرجعوا لنا تانى ...سامعينى ؟؟

والله ياجماعة انا باحب الناس جدا خصوصا الناس الطيبة اللى زيكم كده ..نادر لما نقابل ناس بتتعامل مع بعض من غير مصالح وبيحبوا بعض فى الله ...ربنا يديم المحبة ويبعد عننا شر الناس الوحشين الشررين mfb: مش عارفة طالبة معايا دراما ليه كده ...

ان شاء الله قريب حانزل بوصفات جديدة ...بس لما بودا يتعب ويقعد يرتاح شوية اقوم انا قاعدة مكانه بسرعة ..ماهو مش مدى فرصة :wub:

[مسلمة لله]

استاذ بودا

الجمبري كان لونه فعلا رصاصي وهو لما بيتحول الي البمبي انا باعرف انه كدا استوى

بس فعلا هو ممكن يكون استوى اكتر من اللازم

سؤال بقى: هو ليه حضرتك بتضيف ميه مع الجمبري انا باحط الحاجات دي وبتستوي مع بعضها منها فيها

شوربة البطاطس

بتجيبي يا اوشا فصين تلاتة توم وفي شوية زيت تاخديهم تقلبتين

وبعدين بتكوني مقطعة البطاطس مكعبات صغيرة وتضيفيها وبرضه تقلبتين وممكن تلاتة

وبعدين بتحطي الشوربة (هاتشمي ريحة ملوخية حلوة ما تخديش في بالك)

وبعدين تضيفي شوية نودلز معقولين مش كتير قوي وكمان ممكن شوية خضار مشكل يدوا الوان حلوة

وكمان غلوتين تلاتة وبالهنا والشفا

بتبقى حلوة في الساقعة

[Osha]

رد سريع على بوداعشان ورايا مشوار ولما ارجع نتفاهم :angry:

الطاسة التيفال يا باشا هنا حجم عائلي - اصلا انا مش لاقية واحدة صغيرة للبيت لانهم كل الاحجام الصغيرة بتبقى هدية على الحجم الكبير اوي :blink:

بس اسألك

انت عرفت منين حكاية الربع كيلو دي??? :wub:

اروح اجيب العيال من المدرسة وآجي اكمل رد يا حلوين

[حنين]

الله عليك يامطبخ ياجميل يابو ريحه حلوة للعاوز تعمير ( للبطون طبعا )

يعنى دى هى سواد الليل عندنا هنا اقوم الاقى كل ده حصل مشاء الله عليكم

بودا : ميرسى قوى قوى على الباتون ساليه فعلا مش عارفه اشكرك ازاى واول معمله لازم اوافيك بالاخبار بالنسبه لمواضيع الجمبرى دى انا كنت عاوزة اسال على حاجه ساعات هنا بجيب الجمبرى اللى بقشره ومستوى التيجر زوجى العزيز بيحبه بالمايونيز مفيش له طريقه تانيه احلى عشانى

فولانه : حمدلله على السلامه وحشتينا ياشيخه كده برضه انا جالى كده منام اللهم اجعله خير ايه ان ففولانه بتشارك فى مواضيع خارج المطبخ قلت فى منامى ومالوا بس اهم حاجه مش تسيب المطبخ يضرب يقلب وتيجى بسرعه تشوف اللى وراها وبعدين صحيت من النوم ولاقيتك خير خير ان شاء الله :angry: الحمدلله على رجوعك بالسلامه

بالنسبه لسواد الايدين دى حلها بسيط خااااالص ومفيش مشاكل وجربيها ومش هتلاقى اى سواد وهتدعيلى (اوعى العكس )

ياستى وانت بتنضفى الخرشوف او البتنجان ابقى البسى جوانتى مطبخ :blink: حلوة دى مش صعبه :wub: بس صدقينى الخرشوف يستاهل ولما هتجربيه هتحكمى بنفسك وبعدين خبيزة يافلانه دى كانت اكلتى اللى بحبها فى مصر اجيبها منين هنا فى استراليا

مسلمه لله:مدام ناويه على الكشرى متنسيش الدقه اللى هى توم وملح وخل وماء وكمون وتتعمل اول حاجه عشان تتركز فى بعضها وتبقى تمام متهيئلى شاعرنا الرومانسى برضه كان وصفها بس بتدى طعم جميل للكشرى زى المحلات وبالهنا والشفا

اوشا : اه طعمية فلفه ولا التابعى القرص بتاعه قد الطبق طب تفتكرى عمنا بودا عنده طريقة الطعمية المحشيه دى ومطنشنا انا بتكلم بس مش قاصدى حاجه لاسمح الله

[Osha]

عودة بعد الفاصل

مسلمة في الله

شكرا على الشوربة الحلوة انما عندي كده كام سؤال

هل الأفضل استخدام شوربة لحمة او فراخ والا امشيها ماجي ويبقى يادار ما دخلك شر?

النودلز اللي تقصديها اللي هي الاندومي يعني والا الشعرية قصدك?

معلش اتقل عليك واسألك اقتراحاتك في مسألة نوع الخضار عشان يلون مثلا زي الفلفل الرومي الملون والا خضرة شبت وبقدونس يعني?

[حنين]

انا قلت بقى اكيد انتوا فى الشتاء دلوقتى وساقعنين (انا حر خالص) قلت اديكم الوصفه دى تتدفوا بها وهى

السحلب

كوب بودرة حليب

كوب سكر مطحون (ممكن الاستغناء عنه والتحليه وقت التحضير )

كوب أرز (مصري) مطحون

3-4 ملاعق طعام نشا

كوب جوز الهند

علبة فانيليا بودرة

ملعقة صغييرة قرفة مطحونة

1/2 كوب سمسم محمص

مكسراتعلى حسب الذوق..لوز مجروش ...فول سوداني حب أو مجروش

تخلط جميع المقادير مع بعض وتوضع في وعاء محكم الإغلاق لحين الاستخدام..عند الاستخدام نضيف 1-3 ملاعق طعام من السحلب إلى كوب الحليب ويوضع على النار حتى يسمك للسماكة المطلوبة..ويشرب ساخن وبالهنا والشفا

[Osha]

ايه الكلام الكبير دا يا حنين

انا باموت في السحلب

بس معلش سؤال - معلش اصلك لسه ماتعرفيش ان محسوبتك بتدقق في كل حاجة :angry:

أنا كله عندي مفهوم - مشكلتي كانت في الرز المطحون - هل يمكن طحنه في الخلاط عادي? انا لما باطحنه عشان كفتة الرز باكون ناقعاه الاول عشان بيكون طري ويسهل طحنه

معلش شوية توضيح ينوبك فينا ثواب انا والعيال الجو برد اوي هنا :angry:

لدرجة ان الحرارة لما بتوصل 4 فوق الصفر الناس بتلبس نص كم وبيعتبروا الجو بقى دفا :wub: - ياسلام :blink:

[الاسكندرنى]

السلام عليكم

عم الشيف عمى و عم الكل هنا بعد ما قرات موضوع اطلب اى وصفه تلاقيها قدامك 2

الحمد لله الواحد اكل و شبع و حلى كمان و مشى من غير ما يدفع الحساب

اصل قالوا لى على خساب صاخب المخل

فانفسى ارجع المحل ليوم تانى بس القى فى المنيو الفول المدمس و الفلافل

اخوك مغترب و نفسى فى طبق فول ولا فلفليه هى اسمها كده فى اسكندريه