اطلب اى وصفه على بالك .. تلاقيها قدامك

[حنين]

اوشا السقعانه: :blink:

انت ممكن تنقعى الرز وتسبيه ينشف وبعد كده تطحنيه انا بعمله كده وممكن تشترى من السوبر ماركت rice flour وده بيكون احسن عشان بيبقى انعم بس ميهمكيش بتاع البيت حلو برضه انا بعمله بيه

واذا كان على الدفا تعالى عندنا درجه الحرارة النهارد 40 :angry:

تصدقى اننا لما حطيت السحلب كنت عارفه ان انت اول واحده هتسالى عليه مش عشان حاجه بس عشان المتغربين اللى زى حالتنا هما اللى بيتنشقوا على اى حاجه تكون بديل للى كان فى مصر بس بجد السحلب ده احسن من بتاع مصر الجاهز ده فى البيت وكمان نضيف ومضمون انا مرة هنا جربت اللى فى العلب اللى جاى من مصر كان طعمه ليس له علاقه بالسحلب وبالهنا والشفا

تم تعديل 26 يناير 2006 بواسطة حنين

[bodda]

فلانه هانم

المفراك عباره عن ساق خشب طولها 40 سم

ومثبت فى نهايتها اربع صوابع خشب رفيعين عكس بعض

:sad:

تحطيها بين الكفين وتخلى الجزء اللى فيه الصوابع فى الحله

بعد كده نحرك الكفين عكس بعض نلاقى المفراك يدور بسرعه

يعنى خلاط يدوى صعيدى نوبى 100%

:blink:

مسلمة هانم

انا بحط نص كوباية ميه مع الجمبرى

علشان اطلع فى الاخر بكوباية شوربه خلاصة الجمبرى ودى حدوته لوحدها

:angry:

حنين هانم

انا كتبت قبل كده الطعمية المفترية المحشية

بس اكتبهالك تانى علشان خاطر استراليا واللى منها

اما السحلب فجميل طبعا ...بس فين السحلب نفسه ؟؟؟

انا بجيبه لوحده من عند العطار واطحنه واضيفه

بيدى طعم يجنن ويدى مطاطية للمشروب ...وهوه ده الاصل

:wub:

العزيز الاسكندرانى

طلباتك اوامر علشان اسكندريه وبحرى واللى منها

كتبت هنا كذا مره عن الفول والطعميه لكن اكتبهملك تانى

:angry:

صباح الفل

:D

تم تعديل 26 يناير 2006 بواسطة bodda

[bodda]

طلب خاص لحنين هانم والاسكندرانى باشا

الطعمية

كيلو فول مدشوش و حزمة كرات أو بصل اخضر

راس توم محترمه مفصصه أو نص كوب توم مفرى

ملعقة كبيره كسبره ناشفه و 2 ملعقة صغيرة ملح و نص ملعقة صغيرة شطه

هاننقع الفول المدشوش 24 ساعه أو فول صحيح يومين ويتفصص

بعد كده نفرم الفول مع باقى المكونات( عدا الملح ) مرتين تلاته

او نضربه فى الكبه حتى يكون ناعم

واخر شئ نضيفه الملح فى اخر فرمه

ممكن العجينه دى تستعمل فى الحال مع اضافة بيضه وخلطها قبل القلى

واهم حاجه الزيت يكون مقدوح وعميق

وممكن توضع فى اكياس فى الفريزر وتخزن

ولكن فى حالة العجينة المجمدة لما نطلعها وتفك

نحط نص ملعقة بيكربونات صوديوم و بيضه مضروبه

لان من غيرها هاتطلع طعميه مبلطه ومش حلوه

:wub:

الطعميه المفترية

بنشوح بصل لغاية ما يدبل ونحط عليه مفروم بقدونس وشبت

وملح وكسبرة ناشفه وشطه حسب الرغبه

وناخد حتة العجينة فى ايدك وندفس جواها حتة حشو من السابق

ونبططها وبالراحه تنزل الزيت العميق المقدوح

هاتعجبكوا اوى .. بس حضروا بعدها سفن اب أو اى مهضمات قوية

صباح الفل

وبعتذر عن اليومين الجايين لانى هامارس حياتى كأب

وانتوا عارفين وظيفة الاب ايه ؟؟؟؟

ايوه بالضبط.... سواق وممول

يومين وارجعلكم انشاء الله

مش عايز النار تنطفى ولا طلبات تتاخر عالزباين :blink:

اشوفكم بخير يا احلى عيله مطبخية

:angry:

تم تعديل 26 يناير 2006 بواسطة bodda

[مسلمة لله]

اوشا ولا يهمك اسألي زى ما انت عاوزة

الشوربة يا ستي انا جربتها بشوربة الفراخ

لان اللحمة هنا نادر ما بيكون ليها طعم وتطلعي منها شوربة

جربيها الاول بالشوربه ولما تحبيها ابقى مشيها ماجي

الندولز اقصد بيها الاندومي

كيس الخضار المشكل هو عبارة عن كيس فيه بسلة وجزر وفاصوليا وذرة صفراء مسكرة

مجمد طبعا باخد منه تقريبا ربع كوب

واي خدمة

حنين تسلم ايديك على السحلب وطبعا ما نسيتش الدقة وحطيت كمان على الرز شوية عدس اصفر بقي اطعم

وجربت البصل ابو دقيق فعلا طلع مقرمش

تسلم وصفاتك يا استاذ بودا وترجع للمطبخ ان شاء الله بالسلامة

فولاااااااااانة انت فيييييييييين

[حنين]

ريحة الطعمية مفحفه من مطبخ المنتدى ياجدعان تشكر ياعم بودا دى هتبقى احلى طعميه مفتريه

اما بالنسبه للسحلب طب قولى اجيب عطار منين اجيب منه سحلب الغربه بتخلينا نتصرف

بالهنا والشفا الكشرى يامسلمه بالله

[الاسكندرنى]

صباحه فلافل يا برنس ايه ده بس

فلافل فى بيتى احمدك يارب و الله ينور عليك بس قوللى انت شغال فين ولا ادورك على عقد احتراف

تعرف جاتنى فكره جنان انا حروح ادور على محل و اعمله مطعم مصرى فرعونى كده و حعمل فيه المنيو بتاعك

معلش حسرق مجهودك :blink: بس انت اللى غلطان فين حقوقك للملكيه الفكريه

[Osha]

صباح شريف هوانم وباشاوات مطبخ عظيم

شكرا يا مسلمة على الاقتراحات وانا برضه غاوية اختراعات يعني مش بعيد تلاقيني ضايفة حاجة جديدة من بنات وصبيان افكاري وحتلاقيني جايبة الفتوى طازة برضه

حنين - سؤال رخم اوي هي الحرارة 40 فهرنهايت والا مئوي? اصلهم هنا ممشينها فهرنهايت وانا بعد عذاب ومرار ابتديت افهم شوية يعني

40 لو فهرنهايت تبقى برد للمصريين اللي زي حالاتي ودفا للأمريكان

وعليه فقد وجب السحلب برضه

وحاجرب دقيق الرز كنوع من الكسل المصرح به قانونا

عمنا اللي بيغيظنا وبيروح يجيب من العطار حاروح ادعي عليه دعوة محترمه عشان السحلب يطلع مركون وريحته وحشة

خليه في السواقة والتمويل - ما أنا باعمل كده كل ويك اند فيها ايه يعني?

اسكندراني

انا عزمت اصحابي الامريكان على الطعمية وملحقاتها وكانت النتيجة ان كلهم كانوا عاوزين يشاركوني في افتتاح مطعم مصري هنا!!

بس لازم كلنا نحسب نسبة لعمنا وعم كل المطبخجية بودا الشديد أوي

[الاسكندرنى]

السلام عليكم

اختى Osha

لى طلب منك لو سمحتى انتى لو فتحتى المطعم حتسميه ايه علشان انا كمان حسميه نفس الاسم و تبقى اول سلسلة مطاعم حول العالم فى فرنسا و امريكا اما عن نسبه الشيف العظيم انا اوافق عليها بس تكون 00003, 0 %

و ديه حتكون نسبه كبيرة جدا نظرا للاقبال المتوقع للمطعم

فبعد ابحاث عميقه و تجربت معظم الوصفات شخصيا و باختيار حماتى الفرنسيه الاصيله اكدة تلك الابحاث ناجح متوقع

اشكر الشيف بوودا على تعاونه معنا فى سبيل اشاء مطاعم مصريه عالميه

[حنين]

صباح الفل يااوشا الحقيقه درجه الحراره 40 مئوى زى مصر يعنى حر موت احنا الحقيقه فى الصيف هنا عكس مصر وامريكا طبعا والشتا بتاعنا اطول من الصيف يعنى لما تبتدى الصيف تعرفى اننا هنبتدى الشتا والعكس mfb:

وشوفتى ياختى عمنا بودا اقوله استراليا يقولى عطار هو احنا لو طايلين حاجه كنا تعبنا نفسينا يلاه معلش احنا المتغربين اللى حاسين ببعض انا بكرة هعمل الباتون ساليه اللى ادانى طريقة بودا وابقى ابشركم بالنتيجه اسيبك واروح اكل ايس كريم خليكى انت مع السحلب :D

[حنين]

بودا انت فين انت قلت يومين مش كفايه وترجع لولادك الروحين المطبخين

نعلم (بضم النون) سيادتك ان الباتون ساليه تم عمله بسلام ونجحت العمليه متشكرين يا اجدع بودا وربنا يخليك لينا وللمتغربين المحتاسين

بس انا لى تعليق على الملح اظن ان 2 ملح احسن من اربعه عشان طلع حادق شويه بس جميل و تسلملنا :D

[bodda]

الاعزاء فى مطابخ الارض

اولا ده شرف لينا انشاء مطاعم فى سلسله عالمية

بس النسبه دى مش كتير شويه يا سكندرانى ؟؟؟

مش قلت لك انى حاسس انك دمياطى ؟؟؟

:lol:

يالله ولا يهمك افتح المطعم وكلنا معاك يا حمو

:lol:

وبالنسبة للملح يا حنين طبعا تضبطيه حسب رغبات الزباين

بالف هنا وشفا

:wub:

[abofasad]

اهلا بك يا شيف بودا

وحسب رغبات الزباين

ايه رأيك توصلنا حاجة حلوة

مثلا كنافة بالقشطة (وخصوصا عمل القشطة )

انا عارف اننا في رمضان اكلاناها كتير

ولكن تعمل ايه بقى

رغبات الزباين أقصد الفصايدة الأشقيا

[Osha]

اسكندراني

كده طمعت الراجل فينا - هونفسه مستكتر النسبة

المهم سمي انت المطاعم وانا وراك عدل

حنين

يابختك على درجة الحرارةالجميلة - عقبالنا يارب

بودا

ياترى ايه اصناف المقبلات اللي ممكن تمشي في سلسلة المطاعم العالمية اللي احنا بصدد انشائها?

يعني ياريت نعمل سلسلة وصفات خاصة بالمطعم تتضمن المقبلات والمحسنات - ثم الاطباق الرئيسية ومن بعد كده الحلويات والمشاريب

يالا يااسكندراني - حضر دراسة الجدوى ودفتر الشيكات وخلافه

معكم من سانت لويس

رشا

[حنين]

صباح الفل عليكم

المطبخ منور يابودا متباقاش تغيب علينا تانى كده المهم حمدلله على السلامه

بقى يااوشا احنا مولعين وتقولى يابختكوا طب تعالى نقسم البلد نصين نحط حرارتنا على ساقعتكم تبقى احلى جو ان شاء الله

انا النهارده عاوزة اقولكم على سلطه يمكن تكونوا عارفينها انا لما جيت هنا حماتى علمتهانى قالت لى دى كانت بتتعمل فى كنتاكى بس بطلوها بس طعمها جميل فعلا وهى :

بصله مقطعه صغير

علبه ذرة مسلوقه (تباع جاهزة فى السوبر ماركت )

علبة فاصوليا حمراء(kidny bean )

فصوليا خضراء مسلوقه ومقطعه على مقاس عقلة الصباع وممكن اكبر شويه حسب المظر يعنى ;)

نخلط كله مع بعض ونضيف معلقه صغيرة سكر ونضيف ملح حسب احتياج كل واحد وفلفل اسود وخل ونقلب كويس ونحطها فى التلاجه شويه ةتاكلوها بالهنا والشفا :wub:

[bodda]

منورين المطبخ وما حوله

اوشا هانم

موافق بس الشيك يجيلى مع كل وصفه والا ... ;)

:wub:

حلوه السلطة يا حنين هانم

هل ممكن يضاف لها صوص فرنسى ؟؟ ( زيت وليمون )

او مايونيز سائل شويه ؟؟؟

صباح الفل

:wub:

[حنين]

يا عمنا بودا مدام قلت نذيع اقصد نضيف يبقى نضيف ;) والاكل يحب التنويع برضه

فين اهل المطبخ ايه هو من اولها المشروع هيشغلكم عننا ولا انتم عاملين بيات شتوى :wub:

[bodda]

حنين هانم

متهيالى زعلوا من حكايه انكوا حرانين وهمه باردانين

مع انها تقسيمة ارزاق

بس بينى وبينك البرد ارحم ميت مره من الحر

:wub:

وبما انك فى استراليا

فهل فيه اكلات معينه خاصه بيهم ؟؟؟

ياريت تكتبيلنا عنها او عن عادات غذائيه معينه

او وصفة الكانجارو بالتخديعه

;)

صباح الفل

:wub:

[bodda]

للعزيز ابو فصاد

كبير الفصايده بالاندلس وضواحيها

كنافه بالقشطة

هانعمل كنافه بالكريمه عادى ولما تطلع من الفرن هانحط على وشها القشطة

تجهز كريمه عادى زى المهلبية او باستعمال الكاسترد بالسكر

ونسيبها تبرد شويه وتكون سايله عن المهلبيه برضه

;)

ونجيب الكنافه نهويها شويه وبعدين نقطعها او نقصصقصها بالمقص

لاصغر اجزاء ممكنه

وندهن صينية بالسمن ونحط طبقة كنافه تخانة الصباع ونضغطها شويه

ونرش عليها معلقتين سمن

ونحط طبقة الكاسترد ونفردها كويس

ونغطى بطبقة كنافه زى الاولانيه و نضغط عليها بالراحه من غير ما يبان الكاسترد

:wub:

بعد كده نرش عليها ييجى 5-6 معالق كبار سمن

وتدخل الفرن لغاية بداية احمرار الاطراف

نطلعها ونفرد على وشها كمية قشطة معتبرة وتدخل الفرن تانى

ولما تحمر نطلعها ونسقيها بالقطر ( عسل الكنافة ) بحيث يغطيها تماما

بعد شويه نصفى الزياده من العسل

وبالف هنا

مساء الفل

:wub:

[حنين]

ياسيدى على الكنافه وريحتها ابعتلى حته بقى ينوبك ثواب فى :D

بالنسبه للاكل الاسترالى اللى انا اعرفه انهم مشهورين ب sausage roll ,meat pie

لكن لحم الكانجرو ده متهيالى ده اكل الابروجينال اللى هما اساس البلد الاسترال الحقيقين وده يرجع لزمن احتلال انجلترا لقارة استراليا ووضع المساجين فيها كمنفى وحاصروا الابروجينال السكان الاصلين ووضعوهم فى منتصف القارة واصبح المنتصف للابروجينال والباقى للانجليز (الاسترال )حاليا

الابروجينال بقى دول بيكلوا كل حاجه من جانكرو وتماسيح وديدان وكله يعنى

الاسترال مع تتعدد الجنسيات الحقيقه ده اللى انا شايفاه انهم بيحبوا يجربوا كل حاجه وخصوصا الصينى (الستير فراى .السوشى ......

دى خبرتى هنا انا مش من زمان هنا هما يدوبك خمس سنين جواز وهجرة يعنى لسه بنتعلم عشان محدش يقولى قولى لنا وصفه انا اللى بعرفه وبجربه الاول طبعا بنقله لكم على طول وعليه اليكم طريقه عمل الفراخ بالكارى وعيش النان الهندى وهيكون بعد الفاصل (اكله حلوة لسه عملتها امبارح)

[حنين]

فراخ بالكارى

2_3صدر فراخ(مقطع قطع صغيرة)

2-3 ملاعق كبيرة زبادى

ملعقه كبيرة كارى باودر

عصير نصف ليمونه

1معلقة صلصه

2 ملعقه زيت

زبيب ولوز مجروش(اختارى)

ملح وفلفل

الطريقه:نخلط الصلصه مع الزيتمع الكارى فى وعاء عميق وضيف لهم الليمون والزبادى ونقلب كويس ثم نضيف الفراخ المقطعه ونتبلها بالمح والفلفل ونتركها لمده 30 دقيقه للتتبيل

نسخن على النار طاسه تيفال ونضع فيها الفراخ ونشوحهاعلى نار متوسطه الحرارة لغاية ماتستوى

وقبل مانطفى النار نضيف اللوز والزبيب لمده 3-4 دقائق ونغرف وناكل بعيش النان وسلطه خضراء وده طريقته جاية فى السكه وسع ياعم وسع

عيش النان

3ملاعق لبن دافئ

2ملاعق صغيرة خميرة

نص ملعقه سكر

كوب دقيق (200جم)

نصف معلقه صغير ملح

2ملعقه كمون (انا بحط حبة البركه وبتدى طعم جنان)

بيضه

زيت للدهن

3ملاعق كبيرة زبادى

الطريقه نخمر الخميرة فى3 ملاعق اللبن مع نص ملعقة السكر وعلى ماتخمر نحط الدقيق فى وعاء العجن مع الزبادى والبيضه ونحط بعد كده الخميرة ونعجن لغاية ماتتلم شويه نشيلها من الوعاء طبعا هتكون لسه لازقه فى اليد نحط دقيق على منضدة العجن ونحاوح نلمها شويه بشويه من ايدنا ونحطها تانى فى وعاء العجن ونتركها ساعه على ماتخمر وبعد الساعه ونطلعها نضغط عليها عشان نطلع الهواء ونقسمها كور صغيرة وبالنشابه مع دقيق على المنضده نفرد ونكون رشين الكمون او حبة البركه على الوجه عشان يثبت فيها نيجى بقى للسوى هو المفرض العيش ده احسن طريقه ليه تحت الشوايه بتاعة الفرن لكن لو مفيش نعمل الاتى نسخن الصنيه فى الفرن على درجه حرارة عاليه ولما تسخن ندهن وشين العيش بالزيت ونحط فى الصنيه وندخل على الرف الاخير 2دقيقه ليحمر الوجه وبعدين نقلبه على الوجه الاخير ونكمل حتى انتهاء الكميه وبالهنا والشفا :D

يارب يكون حد فهم حاجه :blink:اروح اريح بقى احسن تعبت دى عمايله اسهل من شرحه :blink: