اطلب اى وصفه على بالك .. تلاقيها قدامك

[bodda]

حنين هانم

تسلم الايادى

وطبعا مفهومه وسهله اكيد ... ولازم تتجرب

عيش النان ده اللى جديد وهاقولك عالنتيجة فور التنفيذ وقبل الاعدام

:)

صباح الفل

:)

[bodda]

الموقع كان فعلا مش بيفتح من امبارح

لكن الحمد لله فتح النهارده

انتم فين يا أعضاء المطبخ ؟؟؟؟

:)

لعل المانع خير

:)

مساء الفل

:rolleyes:

[MZohairy]

من فضلك يابودا

شوربة العدس المصري الأصيل

ياريت المكونات بالتفصيل والطريقه

ولو فيها رزاله ياريت الكشك :)

شكرا

[وليد صفوت]

عمى و شيف المحاورات الأول بودا B)

من فضلك يا بودا عاوز أعرف أعمل المكرونة بالبشاميل لوحدى ( علماً بأنى معرفش أعمل غير بيض مسلوق وبيض أومليت ) :)

و ربنا يجازيك كل خير :) :rolleyes: :unsure:

[bodda]

الصديق الجديد mzohairy

منور المطبخ وخليك معانا تشبع

:)

شوربة العدس المصرى

نقول نص كيلو عدس اصفر نغسله كويس ونصفيه من الميه

ونحضر حله فيها 2 لتر ميه وبصله مقشره ومقطعه نصين

ونحط معلقة ملح كبيره ونص معلقة صغيرة فلفل اسود

ونحطها عالنار ولما تغلى نسقط العدس فيها ونغطى نص تغطية

ونسيبها تغلى لغاية سوى العدس ( حوالى نص ساعه )

بعد كده ننزلها تبرد شويه ثم ناخد العدس بشوربته عالخلاط ضربا مبرحا

:)

وندلق من الخلاط على مصفاه سلك لحجز اى شوائب

كده بقى عندنا اساس الشوربه متصفى و 100%

نجيب حله ونحط فيها معلقتين سمن بلدى معتبر ومبشور بصله وسط

ونقلب عالنار لغاية اصفرار البصله وندلق عليها الشوربه

و نسيبها تغلى مع التقليب كل شويه لما تتخن الشوربه للتخانه المطلوبه

وبالف هنا وشفا

:rolleyes:

[bodda]

الصديق العزيز ملك الكمان

هيه سهله جدا وتابع التفاصيل

وهاقولك ابسط طريقه ولما تتمكن منها نقولك على التحسينات

:blush:

مكرونه فرن بالباشاميل

هاتجيب نص كيلو مكرونه اقلام صغيره وتسلقها فى 2 لتر ميه ومعلقة ملح كبيره

لغاية ما تختبر مكرونايه تلاقيها استوت وتقدر تاكلها

وماتسيبهاش اكتر من كده احسن تتهرى خالص

:blush:

ونصفيها فى مصفاه و ممكن نشطفها كمان بميه بارده عالحنفيه فى المصفاه برضه

نحضر العصاج بريع كيلو لحم مفروم مع مبشور بصلايه محترمه

نحطهم فى طاسه مع معلقة ملح صغيرة ونص فلفل وسنة بهارات لحم

ونقلب عالنار لغاية مالون اللحم يتغير للبنى وينزل ميته ويشربها تانى

اوك ؟؟ ;)

كده بقى عندك المكرونه مسلوقه ومتصفيه وكمان طاسة فيها العصاج جاهز

نحضر الباشاميل

هاتجهز طبق فيه تلات بيضات مكسورين وكمان كوباية لبن فيها نص معلقة ملح

هاتحط معلقتين سمن فى طاسه غويطه شويه عالنار ونحط 3 معالق كبيره دقيق

مع التقليب لغاية بداية تغير اللون الابيض للدقيق الى اللون الاصفر الخفيف

هاننزل الطاسه من على النار ويكون معاك مضرب سلك

وتبدأ تصب كوباية اللبن بالراحه عالدقيق مع التقليب السريع للتجانس

بعد التجانس التام هانصب البيض عليهم ونستمر فى الضرب برضه للتجانس

نرجع الطاسه عالنار مع التقليب دقيقتين بالكتير

نجيب صينية فرن وندهنها سمن ونحط نص المكرونه ونفردها كويس

ونوزع العصاج عليها ثم نحط النص التانى من المكرونه

واخيرا نصب الباشاميل على الصينية كلها

ويكون الفرن مولع بقاله 5 دقايق على الاقل على حرارة 400

ندخل الصينية هاتاخد حوالى نص ساعه على الرف بس يكون على اول درجه

ونسيبها لغاية وشها ما يحمر

وبالف هنا

:wub:

[حنين]

:wub: فينكم ياجماعه ايه اللى حصل الحمدلله انك بخير يابودا دى اول مرة تغيب من غير اسباب مسبقه بس كويس رجعتلنا باكلتين حلوين على فكرة انا بعمل العدس بنفس الطريقه بس مع البصل بحمر كمان شوية شعريه بتحلى الطعم

جرب النا ن وهيعجبك قوى خصوصا لو عملته بحبة البركه وبالهنا والشفا

هما فين باقى المطبخية اوشا وفولانه اللى اظاهر من ساعة ما انا سجلت دخول فى المطبخ هى سابته :blush: يافولانه هانم ليكى واحشه فعلا بجد نفسك فى الكلام بيحلى المطبخ ;)

يااوشا مش معقوله الساقعه عملت فيكى كده رحت فين :blush:

[وليد صفوت]

شيفنا الرائع بودا ,....

ميرسى خالص على الوصفة و الله انا كنت فاكرها أصعب من كده ;)

عموماً أنا هجربها ( بس مايكونش حد فى البيت منعاً لأى خسائر محتملة فى الأرواح :blush: ) ... و هقولك ...

و بالنسبة للبشاميل , ينفع أستغنى عنه بأكياس البشاميل الجاهزة اللى بتتباع فى السوق ؟ و لو ينفع أحط كام كيس على الصينية :blush: ( محدش يضحك عليا انا سنة أولى حضانة طبيخ :sad: ) ,...

و ميرسى كمان مرة :wub: ...

[bodda]

حنين هانم

انا ماغبتش المره دى ولا يوم بس مش لاقى حد خالص

يظهر الساقعه على رأيك عملت لهم بيات شتوى

:blush:

العزيز ملك الكمان

والله انا عن نفسى ماعرفش الباشاميل الجاهز ده يطلع ايه

بس اكيد هايديك باشاميل مش حاجه تانيه

:blush:

جربه واعمله زى ما همه كاتبين عالكيس او العلبه بالضبط

يعنى اتبع الكاتالوج

:wub:

وبالف هنا وشفا

;)

[Osha]

معلش حقكم عليا جميعا

والله ملبوخة في خناقة كده على الماشي وبودا عارف اللي فيها :blush:

حنين

الجو بقى 12 الحمد لله والعيال صيفت :blush:

بالنسبة للبشاميل

الاكياس الجاهزة دي فشل تام وفيها نكهة غريبة - اصل واحدة جربتها فيا وانا في مصر

ملك الكمنجة

امشي على التعليمات حتضبط معاك ولعلمك لما تعمله بايدك احساسك ناحيته بيكون مختلف تماما عن الاكياس الجاهزة

بودا

مش عارفة اروح من جمايلك فين ? بافكر اهرب على فلوريدا عشان جمايلك غرقتني يمكن انسى

النهارده اصلا صاحية عمالة اطارد في حسام في كل مكان عشان يقترح عليا اكل النهارده ايه

ولما فتحت دلوقت لقيت العدس - قلت يا سلام سلم على الحلاوة

عدس النهارده يا اولاد

بمناسبة العدس

حد جرب العدس ابو جبه لما يتدمس?

رائع واكتر من رائع

ميه بتغلي فيها فص توم شرائح ويتحط العدس فيها وبعدين النار تهدى

لما يخرج بالسلامة يتغرف في طبق يتبل كويس بالملح والفلفل والكمون ورشة كزبرة ناشفة مايجراش حاجة

وبعدين يتعمل جواه حفرة ونقدح معلقتين سمن محترمين ونطشهم على الوش

حاجة تشفي من العلل

[abofasad]

اعتقد يا شيف بودا .. انه بقى عندنا حصيلة كبيرة من الوصفات اللذيذة ، ولكن الملاحظ انها كلها تصلح للغدا.. ولكن ماذا عندك للعشاء .. يعني اكلات خفيفة او ساندويتشات

فما رأيك في طريقة عمل ساندوتش خفيف للعشاء

[حنين]

اوشا خير اى خناقه احنا معاكى ولا يهمك كام طاسه على حله وكله تمام :blush:

فعلا انا بحب العدس ابو جبه وممكن كمان لو مش بالسمنه يبقى زيت وكمون وليمون وبصل اخضر ونطلع على الخناقه كل يغمى عليه مش احنا هما طبعا بعد البصل

صحيح ايه حكاية الباشميل الجاهز ده انا الحقيقه ماسمعتش عنه بس اظاهر ان مصر تطورت والستات بقوا كسالى لدرجة انى سمعت دلوقتى ان فى فى السوبر ماركت اكلات جاهزة زى محشى وشاورما كله فى الفريزر حتى سمعت ان فى ستات بيعملوا مشاريع خدمة طبخ اى حاجة انت عاوزاها والتوصيل للمنازل طب لو جاهز انا عن نفسى مش بحب كده طعم المواد الحافظه فظيع مفيش احلى من الفريش وشغل الطباخين والدليفرى ومين يضمن بيطبخوا ازاى والنضافه دى فى بيوتهم يعنى مفيش لجنة مراقبه للصحه (يعنى كسل ولا نقول بنات اليوم) :blush:

صحيح يابودا متشوف لنا حكاية السندوتشات والعشا دى الله ينور عليك يا ابو فصاد الواحد برضه بيحب النقنقه والتسالى وانا من عندى واحد تسليه ...........

فى فى محلات الصنين باسترى مربعه بتباع كميه فى الكيس بتاعة الديمسيم لو تعرفوه مش عارفه وصل مصر ولا لا المهم نجيب البسترى دى ونعمل الاتى

(الديمسيم السريع)

نص كيلو لحم مفروم

1بصل اخضر

بصله كبيرة

1جزر مبشور

جزء من كرنبه قد كف اليد (وكل واحد على قد كفه)

بهارات ملح وفلفل رشة كسبرة ناشفه وكارى ان وجد

فى مضرب اللحمه نضرب البصل مع الكرنب ضربه سريعه للتقطيع عشان مش يتهرى وينزل ميه

نخلط كل المقادير فوق اللحمه ونقلب كويس وبعدين نجيب الباسترى هى مربعه قد كف اليد من غير الصوابع طبعا ورقيقه نحط اللحمه فى المنتصف ولف ونلزق اطرافها بمسحة مياه خفيفه وبعد مانخلص الكمية نقلى فى الزيت المقدوح ومع التوماتو صوص(الكاتشب) طعمها بيبقى جنان ممكن الاول قبل القلى تتعمل استيم على بخار الماء وتتقلى او تتاكل استيم بس

انا بقلى واكل على طول وبالهنا والشفا

تم تعديل 5 فبراير 2006 بواسطة حنين

[MZohairy]

شكرا يا بدبوود على العدس

بس انت نسيت الكشك! :D

و بكره انشاء الله حخلي مراتي توصفلكم أكله تونسيه اسمها كفتاجي

من اروع ماأكلت

شكرا

[bodda]

يادى الهنا يادى النور

ايوه كده متجمعين وحلوين

وهيه الخناقات دى يا اوشا مش هاتخلص ؟؟؟

ما قلت لك من زمان دى ديتها شوية اكياس سوده وساطور حلو كده

:D :D :D

حاضر يا زعيم الفصايده بالاندلس

هافكر فى موضوع الساندوتشات ده .... مع انه مش تبع ضار و لذيذ

;)

وحاضر للصديق الزهيرى نقول الكشك تانى

:D

الكشك

كوباية زبادى كبيره ( حوالى ربع كيلو )

3 معالق كبيره دقيق

عصير نص ليمونه

نخلط الدقيق بالزبادى ونقلبه كويس لغاية ما علامة التقليب ماتروحش

فاهمين ؟؟؟

وبعدين نعصر نص ليمونه ونقلبها معاهم كويس ونسيبه ساعه

نجيب بصلتين ونفريهم ناعم اوى ونحطهم على معلقتين سمن فى الطاسه

ونقلبهم لغايه الاحمرار الغامق

ونشيل نص البصل النتحمر على جنب لتزويق الاطباق بعد الغرف

نحط العجينه السابقه على باقى البصل والسمن فى حله ونحطهم عالنار

ونقلب مع اضافة شوربه محترمه لغاية تخانة معقوله ( زى المهلبية أو أخف)

ده ياخد حوالى 10 دقايق لغاية ما الخلطة تستوى

وتغرف فى أطباق وتزين بالبصل المحمر اللى شيلناه على جنب

وطبعا ممكن نحط فى الخلطة حتت من صدر فرخه مسلوقه ( مكعبات صغيره جدا )

وطبعا ماتنسوش الملح والفلفل

وبالف هنا وشفا

:wub:

[Osha]

اديني قاعدة بقالي كام يوم مش باتعشا مستنية العشا الخفيف :blush:

وكمان مستنية الاكلة التونسي :D

مش ممكن يا جماعة ايه الكسل دا

حنين

بالنسبة للبشاميل - انا شايفة انه اسهل حاجة في الدنيا لكن الكسل خلى الستات تعتبره شئ صعب وقاتل وبيمشوها استسهال

بالنسبة لمشروعات الاكل الجاهز - انا جربت اني اعتمد عليهم لماكنت في مصر وباشتغل - كان فيه ايام فعلا ماكنتش ابقى فاضية عشان اعمل ورق عنب - وعشان اروح اشتريه من فايف ستارز يبقى محتاجة ميزانية

بس والحق يقال اني كنت اعرف الست اللي عاملة المشروع معرفة شخصية عائلية عشان كده كنت ضامنة النظافة الشخصية وكمان بصراحة هي كان اكلها يجنن وكحك العيد والبيتيفور كان مالهومش حل

انا الكحك وخلافه من كل انواع الحلويات فاشلة تماما فيهم - اي حاجة اعملها بتضبط أول مرة وبعد كده عينك ماتشوف الا النور

وعلى ايه الطيب احسن

[bodda]

اهلا اوشا هانم

حمدالله عالسلامه وعقبال باقى المختفين

والله الايام دى يظهر لا نافع معاكم اكل تقيل ولا خفيف

انا ملاحظ اختفاء تام

وبصراحه الحالة النفسية كمان سيئه من موضوع الدانمارك وموضوع العبارة

يعنى فعلا حاجه تسد النفس ...

معلش ها كتب وصفة بسيطة للى نفسهم مسدوده زى حالاتى اليومين دول

بطاطس بالزيت والليمون

كيلو بطاطس بلية ( بيكون حجمه صغير اوى قد الليمونه البلدى)

فى حله نغطى البطاطس بالميه ومعاها معلقة ملح ونحطها عالنار

لما تستوى نبردها فى ميه ساقعه شويه ونقشرها

ممكن نسيبها زى ما هيه او نقطعها انصاف

ونحضر صوص من عصير 4 ليمونات حلوين ومعلقتين زيت زيتون

ومعاهم ملح وفلفل وحزمة بقدونس مفريه ناعم

نضرب ده كله فى الخلاط يدينا صوص جميل لونه مخضر

نصبه عالبطاطس ونقلبهم كويس

وبالهنا والشفا ساندوتشات او تلقيط قدام التليفزيون

:blush:

تم تعديل 5 فبراير 2006 بواسطة bodda

[حنين]

اخيرا نورتم المطبخ وهنشتغل تانى ايه الكسل ده يلا مفيش وقت

اوشا

على فكرة صنية المكرونه بالباشميل دى اسهل حلجه عندى دى انا بعملها دايما للاولاد لما نكون هنقضى يوم برة طويا مش معقول طول النهار يكلوا من برة اعملها قبليها بيوم وتانى يوم الصبح قبل مانخرج احط فى الفرن وبعد كده فى علبه وعلى الحديقه انت عارفه الاطفال كلهم بيحبوا المكرونات وخصوصا اللى بالكريمه

بودا

على فكرة انا بعمل الكشك زيك بالضبط بس بضيف مع الشوربه معلقة صلصه عشان اللون البمبى او السيمون وبيبقى جنان انا بحب الكشك قوى وحلو سلطه البطاطس على فكرة كان فى زمان فى كنتاكى مصر سلطة بطاطس بالمايونيز بس بطلوها من مده من قبل ماسافر وكنت بحبها ياترى عندك فكرة بطريقتها

على فكرة انا كنت حطيت طريقة الديمسيم عشان الاكلات العشاء والنقنقه بس اظاهر انىخطى وحش ومحدش قراءها وقالى تعليق وحشه حلوة :sad: اظاهر فترة قطع النور فى المطبخ مخليتش احد ياخد باله

[bodda]

العزيزه حنين

شكرا لردك .. وانا شفت الدمسيس بس متهيالى مش سهل يتعمل فى البيت

ولا ايه رايك ؟

:sad:

[حنين]

العزيز بودا هو يعتمد على وجود الباسترى لو موجوده او لو فى بديل ليها تبقى مفيش مشاكل دى سهله خالص وطعم الخلطه هو اللى محليها انا مش عارفه اذا كانت موجوده فى مصر ولا لا بس انت سيد الشيفات كلها وممكن تشوف لها بديل هى رقيقه ومربعه قد الكف من غير الصوابع ومش بتاخد ثوانى فى السوى هى اتخن شويه من الجلاش ومرنه وبيبقوا رشين عليها دقيق بين الوحدات عشان مش تلزق وعلى العموم لو صعبه انسوها وادعولى انزل اشوف اهلى وانا اجيب معايا واعزم مصر كلها :D اهم حاجه نكسب الدعوة وبعدين ربنا يسهل فى العزومه :D

ياريت لو فى طريقه البطاطس اللى بالمايونيز اللى كانت بتتعمل فى كنتاكى زمان

[wagdi]

أهل المطبخ الكرام...

السلام عليكم ورحمة الله...

أنا عارف أنا كل شوية أنطلكوا كده زي عفريت العلبة أطلب طلب سخيف...

معلش بس والله عشمي فيكوا كبير...:D

هو لو مافيهاش رزالة لو ممكن يعني لو مع الوصفة تحددوا كدة بالتقريب الكميات والمقادير إلى في الوصفة تكفي كام شخص...

هو يمكن الموضوع يبقى سهل للبعض بس أنا بالنسبة لي صعب حبتين... ومن أسبوع كدة عملت وصفة الكشري بتاعة الأخ بودا بالمقادير إلى كتبها...طلعت تحفة.... بس الكمية طلعت كبيرة أوي ...بقالي أسبوع بافطر وباتغدى وباتعشى كشري..:D

وربنا يكرمكم ويجعله عامر...