اطلب اى وصفه على بالك .. تلاقيها قدامك

[bodda]

العزيز وجدى

انا فعلا اسف جدا لانى باكتب دايما الوصفه لاستعمال اسرة

معلش دى عندى .... :D

وبصفة عامة انا بعمل الوصفات تكفى اربع افراد

فممكن تستعمل نص الكمية تبقى لنفرين او لواحد ليومين

بس المهم انك عملت كشرى كويس

بالهنا والشفا

:D

[bodda]

العزيزه حنين

سلطه البطاطس بالمايونيز

نسلق بطاطس فى ماء وملح و معلقة خل ونقشرها ونقطعها مكعبات

خيار مخلل متوسط الملوحه مقطع صغير

مايونيز و فص ثوم مهروس مع الملح وعصير ليمونه

بياض بيضتين مخفوقين الى ان يبيض ويبقى زى الكريمه

نضرب المايونيز مع الثوم والخل واليمون وتضاف لبياض البيض المخفوق

وممكن نخفف الخليط باللبن الرايب

و آخر حاجه نضيف البطاطس المسلوقه والخيار ونقلب كويس

و نسيبها فى الثلاجه ساعه قبل الاكل

وبالف هنا

:D

[wagdi]

بس المهم انك عملت كشرى كويس

بالهنا والشفا

:D

<{POST_SNAPBACK}>

لا هو من ناحية كويس...فالصراحة طلع حكاية... وده أصابني بالغرور المطبخي ونزلت جبت ورق عنب من المجمد وسايبه يسيح...أنا طلعت وصفة لمحشي ورق العنب من الإنترنت...مش عارف إنتوا قلتوها هنا ولا لأة.. عامة أنا عندي سؤال... هما بيقولوا نحط تحت الورق العنب في الحلة شرائح بطاطس وجزر...ده لازم ولا إيه؟..حاجة تانية...بيقولوا الخلطة لحمة مفرومة ورز وحاجات تانية...السؤال بقى...الحمة المفرومة والرز يبقوا نييين ولا يطبخوا الأول قبل ما أحشي؟؟؟؟

[bodda]

العزيز وجدى

بنحط فى قاع الحله اللى هانرص فيها المحشى اى شئ يمنع لسع القاع

يعنى فى حالة العنب بنحط اعناق الاوراق... او بطاطساية شرائح

المهم يبقى فيه فاصل بين معدن قاع الحله وبين صوابع المحشى

:D

الرز بيكون نى و مغسول ومتصفى.... بس

واللحمه تكون متعصجه

يعنى متقلبه عالنار مع بصلاية مفرومه ومعلقتين سمن حوالى 10 دقايق

وشد حيلك .... انت كده دخلت عالتقيل

:D

مساء الفل

:D

تم تعديل 7 فبراير 2006 بواسطة bodda

[حنين]

متشكرين خالص يابودا على البطاطس هتبقى سلطة اليوم هعملها النهارده ربنا يسهل

[bodda]

بالهنا والشفا

:)

[Osha]

عودة بعد ان هدأت العاصفة والحمد لله

حنين البتاع اللي انت قلت عليه انا باشوفه في السوبر ماركت انما بصراحة الاكل بتاع اخوانا من الشرق الأقصى انا باخاف منه لله في لله

المهم بقى اناالنهارده قلت مش ممكن آجي وايدي فاضية

اصل عقبال كل الحريم هنا حسام عزمني على الفطار بره -شوربة وعيش انما مش اي شوربة

العيش كان باجيت عادي

انما الشوربة كانت شوربة كريمة بالبروكلي وصراحة يعني كانت مشبعة لدرجة اني اعتربتها غداء كمان

بس قلت لا ممكن اكل لوحدي من غير الشباب - فقدحت زناد فكري وقلت افتكس واعرض عليكم الافتكاس لربما يراه احد مشجعا على التجربة

قلت اعمل مكعب ماجي في مية وبعدين اسلق فيها شوية بروكلي متقطع صغير اوي وجزر مبشور ورشة فلفل اسود وبعدين احمر شوية دقيق في سمن او زبد وطبعا لازم الشوربة تكون بردت عشان اقدر اضيفها على الدقيق والزبد

اعتقد والله اعلم ان دي ممكن تكون الشوربة اللي شربتها النهارده

نهاركم سعيد يا ولاد

[حنين]

اهلا اوشا ليكى وحشه طبعا كلنا بيبقى لينا حرص من الاكل الاسيوى انا عن نفسى لازم اقرء المكونات بتاعة الحاجه كويس جدا واتاكد انها مصنعه هنا فى استراليا مش مستورد بيبقى مكتوب عليها product of australia اكيد انت كمان بتلاقى منتج امريكى وساعات بيبقى مكتوب عليه حلال

على فكرة بيعملوا كمان شوربة البروكلى باضافة بعض الكريم السايل وبتضرب ضرب سريع فى الخلاط عشان تبقى ناعمه او بالخلاط اليدوى وهى على النار فعلا طعمها بيبقى رائع

انا عملت سلطه البطاطس وكانت جميله قوى يسلم ايدك معانا يابودا على فكرة احنا تعبينك معانا طلبات طلبات مفيش مرة تطلب انت حاجه B) يعنى كباية شاى قهوة مظبوط يعنى مهو مش هينفع اكتر من كده ده انت الاسطى الكبير بجد ربنا يخليك للمصرين الغلابه B) حبه شحاته

<script>doPoetry()

[bodda]

اوشا هانم

منوره المطرح انتى وحسام

انما ايه العزومه اللى على شوربه دى ؟؟؟

وش مارى منيب B)

B)

حنين هانم

ولا شحاته ولا حاجه.. بالعكس انا بجرب وصفاتكم وتعديلاتكم

وكلنا مستفيدين ومتغذيين

وسلمى على اوشا وقوليلها عايزين حاجه دسمه ..الدنيا برد

صباح الفل

B)

[Folana]

السلام عليكم ورحمة الله .....

الوووووو يامركز ....ادينى البيه المأمور يسعدك ......

ايوه يافندى ..انا مش عارفة ادخل المنتدى خالص ..انا محجور على ولا ايه ..انا باتكلم من كمبيوتر البقال اللى تحت البيت ....اغيثونااااا اريد حلة ...قصدى حلالالالالالالا

حنين ....ماشاء الله عليك ...وصفاتك كلها هايلة ..ان شاء لما اعالج المشكلة اللى عندى ابقى ارد عليك بالتفصيل ...

بودا ...وصفاتك جديدة وجميلة بس لى تعليق على العدس حاكتبه لك بعدين

امال فين حسن ياجماعة مش بيكتب ليه ..يارب يكون بخير ....

ده سلام كده على الماشى لحد الامور ماتتظبط .....

صباحه جميل B)

[bodda]

فلانه هانم

حمدالله عالسلامه

عقبال باقى الغايبين حسن وريهام ووووووووو

انا كتبت اساسيات العدس بس

لكن طبعا له 100 طريقه بالشعريه وبالبصل وبالفراخ والعدس الاباظى

كتيييييييييييييييييييييييييير

صباح الفل

B)

[Osha]

فولانة جت

يا حلاوة يا ولاد - وكمان ماقالتش حاجة على وصفتي الرهيبة الرائعة لشوربة البروكلي - عقابك عزومة كاملة عشان التأخير

حنين

مافيش حاجة هنا عندنا حلال امريكاني خالص - كل الحلال بييجي من كندا ومش عارفة ليه - وبعدين اناباخاف من الاكل الاسيوي عشان هم ليهم اختراعات غريبة اوي تموع النفس

انما طالما انت قلت انه حلو يبقى تنزل المرة دي

بودا

انا ماقدرش اكل بره من غير العيال - وهم مش بياكلوا البروكلي ولا بيطيقوا اسمه قلت اضرب عصفورين بحجر عشان ماحسش بالذنب لو كلت من غيرهم.

كام سؤال في السمك ربنا يخليكوا ليا

لما جينا هنا لقيت السمك كله مزارع مش من البحر - قلت مش مشكله - بس بصراحة طلعت مشكلة

السمك طعمه ماسخ

صحيح الكلام دا والا انا عندي هلاوس?

والنوعين الموجودين بس هما التالابيا وافتكر دا البلطي - والكات فيش وانا مش عارفة ايه دا اصلا

وطبعا السلمون البرتقالي اللي انا مش عارفة دا مزارع والا لأ

ياريت بقى فتوى للسمك السلمون الفيليه تكون شديدة ومتينة

وفتوى لو فيه صرفه لسمك المزارع دا يخلي طعمه ارحم شوية

[bodda]

اوشا هانم

مافيش مشكله فى سمك المزارع سوى الآتى :

نسبة الاملاح فى اللحم اقل

عضلات اللحم انعم قليلا

والحل اننا لازم نزود الملح فى خلطة التتبيله مع التوم

والحاجه التانيه اننا نقرص عليه شويه فى السوا ..يعنى ننشفه حبه

:P

اما موضوع الكات فيش فهو القراميط ودى مانصحكش بيها

لان لحمها اصلا طرى وناعم ومن اردأ انواع الاسماك الا فى الضرورة القصوى

:D

مساء الفل

:D

[Osha]

عرفت لوحدي انها اسوأ أنواع السمك - جربتها وحسيت باني باكل شئ مالوش معالم :P

طيب يعني اتوكل على الله واجرب البلطي

وبرضه ماسمعتش حاجة عن السلمون يا باشا - دا هو آخر الآمال المنعقدة حاليا :D

[bodda]

اوشا هانم

السالمون من الاسماك ذات المحتوى العالى من الزيوت ( اوميجا3 )

ولذلك فلا يصلح للقلى

:P

واحسن استعمالاته فى صينية بالفرن

بس نفرش الصينية الاول بشرائح بطاطس غير سميكه لامتصاص الدهون

ثم نرص شرائح فيليه السالمون

ونحط على وشها خلطة زى السنجارى ( توم وكمون وملح وبصل وخضرة )

ونسوى الصينية فى الفرن و نحمر الوش

ونقابلها عند خروجها من الفرن بالليمون الكتير

وبالف هنا

:D

[Folana]

السلام عليكم ورحمة الله .......

أوشا ...صباح الفل ..انا رجعت فعلا بس يظهر تاتى الرياح بما لا تشتهى السفن -_-.....الكمبيوتر اللى باكتب منه بيشتغل بالمنفلة ...كل شوية يفصل واديله نفس زى الباجور كده ...اهو مؤقتا لحد الموقع مايفتح فى الجهاز بتاعى ...

سيادتك يافندم شوربتك هايلة كالعادة ..زى اى حاجة بتعمليها طبعا ...بس انا افتكر انى كتبت طريقة شوربة البوركلى فى المرحوم ...قصدى المطبخ القديم ..وكنت كتبت كمان طريقة لعمل السيمون ..بس يظهر بقى انت اللى مش واخدة بالك منى .. mfb:

حنين ..انت رحت فين ؟؟؟ انا جيت خليتك تمشى ولا ايه ..خلى بالك انت الاساس دلوقت ..انا باجى ..ظهورات كده وامشى تانى B)

الاخ وجدى ...سيادتك بيفرشوا فى قاع حلة المحشى بطاطس وجزر ..او طماطم ترنشات ..زى ماقال بودا كده ..علشان المحشى مايتلسعش ..بس ليه الحاجات دى تحديدا ..لان مفروض انك بتقلب حلة المحشى فى طبق اتقديم ..فيعنى يبقى الشكل جميل ومزين بالجزر والبطاطس لما يبقى فوق الوش ...

بودا ....عايزة اقول حاجة على شوربة العدس قبل ما اموت ...قصدى قبل ما اقفل ومش عارفة حاقدر ادخل تانى ولا لا ...ممكن تحقق لى وصيتى ...(وش الرجل اللى بيطلع ميت فى الافلام القديمة )...

انا لما باسلق العدس ...باضيف عليه ..تلات اربع جزرات مقطعة حلقات ..وعدد 2 حبة طماطم ..ونص راس توم متقشرة وطبعا بصلتين متقطعين .....وممكن لو حد حب يعنى يضيف عدد 2 ثمرة فلفل رومى اخضر وده اختيارى ...

واسيب الكل يهرى فى نفسه لحد ما الكل كليلة يستوى ..وكل ده من غير ملح ..

بعد كده اسيبه يبرد وبعدين اضربه فى الخلاط بالطريقة المفترية بتاعتك ....لحد مايقول حقى برقبتى ...ثم بعد زالوكا ..افضيه فى الحلة ..وعلى النار وتكون واطية ..يغلى له غلوتين ..طبعا حيكون سميك ...نخفه بالميه بقى زى مااحنا عايزين حسب التخانة اللى بنحبها ..ونضيف الملح والكمون لحد الطعم مايظبط معانا ...

كده بقى عندنا شوربة عدس سك ..بالكسرة تحت السين ....ممكن بقى نحمر شوية شعرية ونضيف عليها شوية شوربة ونوطىى النار لحد الشعرية ماتستوى ..ممكن نعمل فتة عدس ..يعنى نقطع عيش وممكن نحمره فى شوية سمن وبعدين نسقيه بالشوربة ..وبعد كده نعمل الخل والتوم زى الفنة ونرشه عليها ..وممكن زى ماقال بودا ..وممكن نشربه شوربه كده زى ماهو ونضيف حتة زبدة فوق الوش لو حد حب ....وبالهنا والشفا ....

تم تعديل 11 فبراير 2006 بواسطة folana

[bodda]

فلانه هانم

الف سلامه للمرحوم الكمبيوتر

mfb:

وطبعا اضافات العدس المذكوره هايله

والتنويع فيه مالوش حد

تسلم ايدك

عايزين وصفات شوربه سخنه كتير الايام دى

صباح الفل

-_-

[Folana]

السلام عليكم ورحمة الله ....

البقــــــــــــــــــــــــاء لله .....

نعزى أنفسنا ..ونتقدم بخالص العزاء للاخ العزيز حسن لوفاة السيدة الفاضلة والدته ...وان شاء الله تكون اخر الاحزان ...

ونأسف لعدم تمكنا من الوقوف بجواره فى محنته ولا يسعنا الا ان نشاركه احزانه هنا .............

[bodda]

شاعرنا الجميل

البقاء لله وحده

رجاء قراءة الفاتحه لها لكل من عرف

[حنين]

:closedeyes:

اقدم عزائى للاخ حسن ويارب تكون اخر الاحزان للجميع ان شاء الله