اطلب اى وصفه على بالك .. تلاقيها قدامك

[حنين]

اسفه على التاخير والرد على كلامكم الجميل خصوصا مجاملات فولانه الرقيقه انا والبيت كده جمله يعنى عندنا دور برد شديد فواخدهاجازة مرضيه من المطبخ بعد اذنكم عشان مش عاوزة اعيدكم ولا حاجه ولنا لقاء بعد اخذ قرصين بنادول وكوب شاى بالليمون

[Osha]

انا لله وانا اليه راجعون

ربنا يرحمها ويغفر لها ويثبتها عند السؤال

[Fencer]

الاخ العزيز حسن

البقاء لله

اللهم ارحمها و ووسع مدخلها و اغفر لها و نقها من الذنوب كما ينقى الثوب الابيض من الدنس

أخوك حسام

[bodda]

صباح الفل يا احلى عيله

صباح الحب اللى مودينا فى داهية

كل سنه وانتم طيبين بعيد الحب و سنينه

:angry: :wub: :wub:

:o :D

:D

[حنين]

كل سنه وانت طيب يابودا

وكل المطبخيه واهل المنتدى كلهم بخير والحب يكون مجمعنا كده على طول على الاكلات الجميله بتاعتك

ياريت بقى اكله حلوة كده تناسب اليوم الجميل ده :angry:

تم تعديل 14 فبراير 2006 بواسطة حنين

[bodda]

وانتى بالف صحة وسعادة حنين هانم

البسيمة

نص كيلو سميط بسبوسه ( سميط بدون اى اضافات )

نص كيلو جوز هند مبشور ناعم و كيلو الا ربع سكر خشن عادى

200 جرام سمن بلدى معتبر و 100 جرام بندق مجروش كبير

يتقلبوا مع بعض كويس اوى

وبعدين نظبط العجينه وتخانتها بنص كيلو لبن دافى

ندهن الصينية بالسمن ونصب العجينه و المهم ماتزيدش تخانتها عن 2 سم

وممكن نزوق الوش بأنصاف البندق واللوز والفستق

ونحدفها عالفرن 300 درجة لغاية بدء احمرار الاطراف

حوالى 20 دقيقة

بعد كده نطلعها للرف العلوى لغاية اللون الوردى

وتطلع من الفرن تتسقى بالشربات زى الكنافه

وبالف هنا وشفا

:angry: :wub: :wub:

:o :D

:D

[MZohairy]

بودا حبيبنا

الله يخليك ممكن ....

الحواوشي؟

بس يكون زي بتاع الشارع

يعني مش الافرانكا ومالوش طعم

بالتفصيل الله يخليك

عشان نوصل للشارع اقصد طعم الشارع

شكرااااااا

[bodda]

العزيز mzohairy

كل سنه وانت طيب

الحواوشى

نقول كيلو لحم مفروم مره واحده يعنى مش ناعم

وبصلتين كبار متخرطين انصاف حلقات وفلفلتين كبار شرحه

:wub:

و خمس فصوص توم كبار مفرومين وطماطمايه مكعبات صغيره

وحزمة بقدونس على حزمة كسبره خضرا مفرومين ناعم

نقلب كل اللى فات مع ملح وفلفل وشطه وبهارات

ونجيب عيش بلدى اسمر ( الكميه دى تعمل 10 ارغفه عجب )

ونشقه من الجنب ونحشى كل رغيف بكمية قد كبشة ايد كبيره

ونبططه بخفة ودلع ونلفه فى ورق ابيض باحكام أو فى المونيوم فويل

ونرص الارغفه فى صاج فرن ويدخل فرن حامى حوالى 40 دقيقه

وعلى ما يطلع نكون عملنا سلطة طحينه بالخل والتوم مفتريه

وبالف هنا وشفا

ونار يا حبيبى نار

:angry:

[MZohairy]

جبار يا أخي!!

الريحه طالعه من اللاب توب

اموت انا

الواحد مش عارف يرد جمايلك دي ازاي

[MZohairy]

جبار يا أخي!!

الريحه طالعه من اللاب توب

اموت انا

الواحد مش عارف يرد جمايلك دي ازاي

[bodda]

العزيز زهيرى

اى طلبات ... المهم تطمنى عالنتائج

مساء الفل

:)

[Osha]

عيد حب !!!!!!!!!

بيبيعوا فيه ايه دا

mfb:

نهايته

كل سنة وانت طيب وكل المطبخية بخير ودايما عامر بحسك معانا

سؤال غبي معلش mfb:

هل البسيمة مجرد تسمية أخرى للشكلمة والا حاجة تانية خالص

معلش انا اصلا ماليش في جوز الهند ومش عاوزة تريقة من حد :blink:

تم تعديل 15 فبراير 2006 بواسطة Osha

[Osha]

طيب انا ماعنديش عيش اسمر اعمل ايه ان شاء الله mfb:

اقولك

انا حابص لكم في العيش mfb:

بس انا ليا اضافة غير صحية mfb:

انا كنت باحبه في ورق الجرايد خاصة الجمهورية كان مذاق الورق بتاعها حاجة تانية خالص :blink:

[حنين]

تكمله لسؤالك يااوشا

هى البسيمه دلع البسبوسه ولا دى حاجه تانيه عشان شبها فى المقادير

بس اكيد مش دى الشكلمه (ياريت بقى يابودا توضحلنا العمليه) اصلى بحب جوز الهند (معلش اوشا هنعمل ايه الحب بهدله)

وياريت طريقة الشكلمه ولانكشير

[MZohairy]

فعلا يا أوشا الجمهوريه كان بيدي للحواوشي طعم خاص

غير الأهرام خالص اللي كان بيخليه محجر وناشف شويه :blink:

[bodda]

انتوا قلبتوا على طعم الجرايد ؟؟؟

طب لعلمكوا بقى احلى حووشى بيكون فى ورق الكتاب المدرسى

لان حبره خفيف وما يتقريش

:blink: mfb: mfb:

وطبعا الشكلمه غير البسيمه

لان الشكلمه مابتاخدش ربع كمية السمن وبتكون هشه و منفوشه

لكن البسيمه بتكون زى البسبوسه ولكن جوز الهند اساسى فيها

ونفسى اعرف يا اوشا انتى بتاكلى ايه بالضبط ؟؟؟

ده كل حاجه نقولها تقولى مالكيش فيها ؟؟؟

خلاص هابعتلك وصفة الزلاطية بالطماطم

صباح الفل

mfb:

[Osha]

العزيز زهيري

انا بصراحة ماجربتش الاهرام انما ورق الاخبار ماكانش له نفس الطعم

ورق الكتب بقى ماجربتوش خالص انما مايجراش حاجة نجرب عادي B)

حنين

انا جوز الهند مش باحبه في صورته الاساسية انما باحبه لو زيت على الشعر

حاقولك على طريقة عرفتها في السعودية عجيبة اوي انما لطيفة

المقادير

1 كوب جوز هند

1 كوب سكر

1 كوب حليب مجفف

2/3 كوب زيت

3 بيضات

التزيين

1/2 كوب سكر

علبة قشدة

المقادير كلها تنضرب في الخلاط لغاية لما يطلع عينها وبعدين تتصب في صينية ويكون ارتفاعها في الصينية حوالي عقلة الاصبع (دا عشان تختاري المقاس المناسب) تتحط في الفرن لغاية لما تحطي فيها السكينة تطلع نظيفة

التزيين

تكرملي نصف كوب السكر على النار وبعدين تحطي القشدة وتقلبي كتير - احتمال تكلكع طنشي وكملي تقليب لغاية لما تلاقي قوام زي قوام التوفي او الكراميل وتروحي فرشاها فوق وش الصينية

بودا

هو انا مش قلت مش عاوزة تريقة :)

عامة في انتظار الزلاطية بالطماطم - على الله ماتحطهاش -_-

[bodda]

للعزيزه اوشا

Special requist

زلاطيه بالطماطم

هاتجيبى كيلو طماطم ناشفه وجامده مظلطه

:blink:

وتتقطع مكعبات صغيره

وكيلو بصل مقطع انصاف حلقات ونحمره لغاية اللون الذهبى

ونحط مكعبات الطماطم مع التقليب

ونضيف له علبتين تونه كبار متصفيين

وحزمة شبت على بقدونس متخرطين ناعم اوى

ونقلب ونسيبه على نار هاديه ربع ساعه

ومع عيش طرى

وسلميلى عالوجبات الخفيفة

صباح الفل

:wub:

تم تعديل 17 فبراير 2006 بواسطة bodda

[م الغزالى]

أخى العزيز الشف الكبير بودا

تحياتى وخالص الشكر على مجهودك الرائع

الحقيقة انا هوايتى الطبخ و اقدر اقول انى بالمقارنة لرجال و نساء كثيرين باطبخ كويس وطبخات ليسن من السهلة 5 نجوم يعنى لكن فيه حاجة بقى لها 15 سنة مش راضية تظبط معايا فى المانيا ألا وهى البسبوسة لدرجة انها تمثل لى عقدة مش عارف ليه و يطلت أحاول ..... تفتكر هو فيه إيه و هل ممكن تحصل مع شف كبير زيك

تقبل تحياتى

[حنين]

اوشا :

متشكرين على على طريقه جوز الهند دى دى زى الكستر بس هجربها وهقولك على النتيجه اصل انا بحب التجارب ماهو الواحد لازم يغير والا هتزهقى على فكرة انا عندى طريقه شبها كده هبقى اشوفها واكتبهلكم مش فاكرة الاسم حاجه من اختراعات الاجانب انا عملتها سهله وحلوة مش وحشه هبقى اكتبها بعدين احسن الوقت اتاخر دلوقتى

بس صحيح ده بودا صدق وطلع فى اكله بالاسم العجيب ده( زلاطيه بالطماطم) ولا تفتكرى عملك اكله وهو اللى سماها كده يلاه بالهنا والشفا على فكرة بتفكرنى بالشكشوكه بس دى من غير بيض

بودا برافو عليك اسم على مسمى (بس صحيح فين الزلاطيه فى الموضوع ده وهى ايه الزلاطيه اساسا) :wub:

انا فى انتظار طريقة الشكلمه ولانكشير