اطلب اى وصفه على بالك .. تلاقيها قدامك

[bodda]

تمشيا مع حرب الطيور اللى مالهاش لازمه

دجاج بالكارى

صدور فراخ مقطعه مكعبات صغيره

ونقدح ملعقة سمن على ملعقة زيت ذره

ونحط عليهم ملعقة كبيرة كارى هندى

وحزمة شبت مفرية ناعم

وتقليبه سريعه ثم نحط الفراخ المقطعة مع الملح

وتقليب مستمر 10 دقايق

وبس

ممكن جنبها رز أو عيش سخن مع سلطه خضرا

و بالف هنا ومن غير خوف

مساء الفل

:blush:

[مصريه بالكويت]

السلام عليكوا

صباحكوا والله زى العسل خصوصا الاستاذ اللى حزر كل حاجه خاصه بالطيور

دا على كده اى واحد غنى (متريش يعنى)ممكن يمسكوه

على العموم انا بفضل البلطى لانى جلربت غيره وهو اللى عاجبنى بس امى بتعمله بحاجات كتير منها السمك البورى وكمان فيه القرموط(بس طبعا بعد د مصطفى محمود الناس قرفت منه)وفيه انواع سمك كتير وبمناسبة الاسماك انا عايشه فى الكويت والله ما دوقت زى سمك مصر اصل سمك النيل والبحر بتاعنا غير ميه مصر غير ولو حبين تسمعوا انطباعى عن غربتى ممكن بس مش عاوزه اطول عليكوا :blush:

[حنين]

وحشتونى اوى يا اهل المطبخ الكرام معلش غيبت عنكم غصب عنى وان شاء الله مش تكرر تانى وسلامة طيور مصر من البرد ايه اللى حصلهم بس معلش عين وصابتهم معلش محنه وهتعدى ومدام معانا الشيف بوداهيلحقوا باكلات بديله للفراخ عشان محدش يضايق

ولا ايه ياعمنا بودا انت اديت نصايحك ومعلومات قيمه عن انفلونزا الفراخ تمام عليك بقى بالاكلات البديله واحنا من عندنا هنعمل مشاركه ومش هناكل فراخ

اهلا بيكى يامصريه بالكويت فعلا الصياديه بتاعتك جميله وتستاهل ان الواحد يعملها واذا كان على الغربه واكل الغربه فانا مجرباه وعارفه ان مفيش احسن من الاكل اللى اتعودنا عليه بس هنعمل ايه الواحد لازم يتكيف مع الوضع اللى هو فيه والا مش هياكل خالص وربنا معانا كلنا مع المتغربين

يافولانه بقولك ايه خدى اول اتوبيس رايح على استراليا وتعالى اكتبىمن على الكمبيوتر اللى عندى وسيبك من البقال والكمبيوتر بتاعك بس متحرميناش منك ومن كلامك الجميل

اوشا معلش انا قطعت فجاة بس ان شاء الله هكون معاكم على طول ونكمل بقيت اكلاتنا الجميله ومتشكرة قوى على تذكيرك لعمنا بودا على الشكلمه ولانكشير انا لسه مستيه بقول يمكن بس زحمة مواصلات

[حنين]

يا جماعه الخبر ده لسه واصلنى وحاولوا تحذروا كل اللى تقدروا عليه

فيه عصابة بتعدي على البيوت و بيقولوا انهم بيقدموا علاج ومصل لمرض انفلونزا الطيور.

و هم في الحقيقة بيدوا مخدر و يحقنوا الناس بيه وتخيل ماذا من الممكن أن يحدث لك ولبيتك و لأخواتك فالموضوع خطير جدا !!!!!!!!!!!

و الخبر ده مؤكد و قامت الحكومة بالتحذير منه في الراديو أرجو من كل شخص يقرأ هذا الايميل أن يحذر كل من يعرفهم و يحاول نشره قدر المستطاع في اسرع وقت فربما يجعلنا الله سبب لنجاة أحد الأشخاص الأبرياء

[bodda]

العزيزه مصرية

العزيزه حنين

والله الهلع الفراخى ده اخد اكتر من حجمه

وانا نزلت هنا حقيقة الفيروس والتعامل معاه لكن الناس برضه مرعوبه

وده بياكد كلامى ان السمك الذ شئ فى الدنيا

بس بعد اذنك يا مصريه انا بتكلم عن سمك البحر المالح

:)

وليس اسماك الميه الحلوه زى النيل

:sad:

وحاضر هاكتب اللانكشير

مساء الفل

B)

[bodda]

بسكويت لانكشير

كوباية دقيق وكوباية نشا كورن فلاور ونص كوباية سمن ونص كوباية سكر

بيضتين و كيس بيكنج باودر وكيس فانيليا

نضرب البيض ونضيف السمن ثم السكر والنشا والبيكنج باودر والفانيليا

ثم الدقيق شويه شويه لضبط العجين لامكانية التشكيل

نعمل منه اقراص صغيره او اى اشكال

ويخبز فى فرن حار حتى تلونه باللون الذهبى من الناحيتين

ولما يبرد ممكن نلصق كل اتنين بالمربه المرغوبه

وممكن نزوق الاجناب بالشيكولاته الفورماسيل هاتلزق فى بواقى المربه

وبالف هنا

:sad:

[bodda]

شكلمة جديده هاتعجبكم

كيلو بطاطا ونسلقها كويس ونقشرها ونهرسها

نص كوباية عسل نحل ومعلقتين كبار جوز هند ناعم وبيضتين ونص معلقة قرفة صغيره

B)

هانضرب البيض ونضيف العسل والقرفة وجوز الهند بعد كده البطاطا

ونعجن كويس .... يمكن هنا مش هاتنفع العجانه ونستعمل معلقة خشبية افضل

نعمل كور صغيره ونرص فى صاج ونخبز فى فرن متوسط الحرارة حتى التلوين

ونطلعها تبرد وبالهنا والشفا

طبعا الشكلمه الاصلية بتكون جوز هند بس ....

:sad:

جربوا دى وقولولى

مساء الفل

:)

تم تعديل 26 فبراير 2006 بواسطة bodda

[Osha]

وحشتوني حنين وفولانة جدا جدا

وشكرا ليك يا بودا على حرقة الدم بتاعة السمك - وانت عارف ان السمك هنا كله مزارع ومافيش فيه ريحة البحر

على فكرة يا جماعة حسن مش عارف يدخل الموقع خالص - لو تتصل بيه يا بودا وتشوف ايه المشكلة يكون افضل

جربت من يومين شوربة كريمة بالجمبري - بس كانت جميلة اوي وكان فيها لون وردي مش عارفة جه منين

ياريت حد يفتكس لينا الموضوع دا خلينا نجرب ونشوف

شكل الشكلمة بتاعة البطاطا دي حلوة بس انا بافكر اشيل منها جوز الهند بعد اذن حنين انا مش عارفة هي بتحب البتاع دا ليه?

اختنا مصرية بالكويت

اهلا بيكي وسطنا وصدقيني انا لما باجي هنا مش باحس بغربة خالص - انا كمان وحشني السمك في مصر بس مش النيلي بصراحة - سمك البحر الاحمر لا يعلى عليه

وحاجرب ان شاء الله الصيادية بتاعتك - بس لما الاقي سمك مش مزراع وعليك خير

فولانة

استراليا حر اليومين دول - تعالي عندنا نلعب في التلج وتشاركي في المنتدى وترجعي تلحقي الغدا للعيال بعد المدرسة

[Osha]

الفراخ بالكاري بتاعتي احلى من بتاعة بودا وأجري على الله :sad:

مكعبات صدور فراخ مسلوقة نحضرها

نحمر ملعقة دقيق في شوية سمن بلدي معتبر وبعدين نضيف معلقة كاري ونقلب شوية وبعدين نسقيهم بالشوربة او ماجي

ونضيف مكعبات الفراخ المسلوقة بمنتهى الحنية وناخدها غلوة لغاية لما تشرب الصوص وبعدين نكون محضرين رز ابيض جميل

في سلطانية نحط شوية صدور فراخ ومعاها الصوص المتين وفوقهم الرز الابيض الجميل ونساوي السطح ونقلبهم في طبق

ياسلام على الجمال والطعم - خاصة لو الطعم ملوث بالفيروس يبقى أحلى كلام

[حنين]

بودا

انا متشكرة خالص على الشكلمه ولانكشير وهعمل فى الاول اللانكشير واقولك على النتيجه بس معلش ولو فيها غلاسه معلش انا كنت عاوزة كمان لانكشير من غير بطاطا اصلى نفسى فى الاصلى من زمان مش كلته فاكل الاصلى الاول وبعدين اعمل التانى وبعدين احنا عندنا جوز هند كتير ولا زم نستغله معلش يااوشا

اوشا

جميله فراخ بالكارى وياسلام لو الخلطه دى تتعمل بعلبة كريم جوز الهند بتبقى جميله انا مش قصدى حاجه انا بس مستغربه ليه العدواة مع جوز هند ده راجل كويس

ايه رايكم بودا قال مفيش احسن من السمك صدقنى عندك حق انا هقولكم على كفتة سمك جميله يارب تعجبكم

2سمك ماكريل

شبت وبقدونس

بقسماط

2بيض

ملح وفلفل

بصله

فصين توم كبار

ننضف السمك كويس ونسلقه فى مياه فيها بصله وملح وورق لورى عشان الريحه خلى بالك مش بياخد وقت كبير فى السلق ممكن خمس دقائق فى مياه بتغلى نطلعه ولما ييبرد ننضف من الشوك

نضرب فى الكبه (خلاط اللحمه) بصله والتوم والشبت والبقدونس وبعدين نحط السمك ونضرب ونحط البيض والملح والفلفل وبعدين نطلع الخليط فى طبق غويط ونضيف البقسماط المطحون لغاية ماتتماسك ونقدر نصبع العجينه زى الكفته ونحط فى الزيت المقدوح وتتاكل مع سلطه خضراء وبالهنا والشفا

[bodda]

فعلا يا اوشا انا مش عارف كراهية جوز هند هانم كده ليه ؟

:D

وعلى فكره سمك المزارع لو صاحى وطازه اوى يتعمل بيه اى حاجه برضه

اما الفراخ بالكارى بتاعتك فطبعا جميله وكله تنويع

اما حنين هانم

اى اوامر فى الحلويات

والبطاطا فى الشكلمة مش اللانكشير

B)

فمعلش .... انا مش متصور الماكريل فى الكفته

هوه الماكريل سمكه جميله وانا بحبها

ومليانه اوميجا 3 ... لكن مش فى الكفته

:P

تنفع مشوى وسنجارى 100%

اما كفتة السمك فنفرم لحم سمك وهوه نى مع الخلطة وبعد كده يتصبع بالزيت

عامة هاكتب لكم كفتة الجمبرى والسمك

و صباح الفل

:o

تم تعديل 27 فبراير 2006 بواسطة bodda

[حنين]

بودا معلش انت عارف الاخطاء المطبعيه والحول :) انا طبعا كنت عاوزة اقول الشكلمه

بس بالنسبه للسمك انا جربت الماكريل وكان جميل وحاولت هنا اجرب سمك تانى وطلعت الكفته ملهاش طعم طبعا ده بيعتمد على نوع السمك وهل موجود عندنا ولا لا انا جربت مرة سمك اسمه بلوجرانديور والحقيقه طلع ماسخ هو كان اسهل عشان فيليه على العموم اكتبلنا طريقتك مع نوع السمك ويارب نلاقيه انت عارف مشاكل الغربه

(عندى سمك اسمه باسا فيليه ينفع؟) :D

تم تعديل 27 فبراير 2006 بواسطة حنين

[bodda]

العزيزه حنين

انا طبعا مش عارف مسميات الاسماك اللى بتقولى عليها

لكن الباسا ده ... هل هوه سمك موسى المبطط ووش ابيض ووش اسود ؟؟؟

لو هوه يبقى طبعا ممتاز للفيليه والكفته

وهاقولك طريقة افتة السمك او الجمبرى بتاعتنا وجربيها

كفتة الجمبرى او السمك

نجيب كيلو لحم جمبرى من النوع الابيض او الرمادى

او كيلو لحم سمك بحرى

وبصله متخرطة وراس توم متقشره وشبت وبقدونس وكسبره خضرا

وكوباية رز مغسوله ونسيبها شويه مبلوله لسهولة الطحن

وطبعا ملح وكمون وكسبرة ناشفه وشطة

نفرم ده كله مع بعضه بالمفرمة او بالكبه

هاتلاقى عجينه لونها اخضر وتلزق فى الايد

هانجيب طبق غويط ونحط فيه نص كوباية زيت

ونبدأ ندهن ايدينا الاتنين بالزيت ونصبع من العجينه صوابع قد الصباع

:D

ونرص فى صينيه كبيره .. لان مش هانلحق نصبع ونحمر فى نفس الوقت

ويكون عالنار زيت عميق ساخن ونبدأ ننزل الصوابع ونحمرها فى الزيت

ونطلعها باللون الذهبى او البنى الفاتح

ممكن تتاكل كده

والاحلى اننا بعد التحمير نجهز دمعه بالتوم

نفرم 5 فصوص توم ونشوحهم فى شوية زيت

وندلق عليهم عصير 2 كيلو طماطم مع ملح وتتسبك شويه

بعد كده نحط على الدمعه الكفته اللى حمرناها ونسيبها عالنار تغلى 10 دقايق

مع رز ابيض يجنن....... وقوليلى النتيجة

وبالف هنا

:)

[حنين]

جميله وريحتها مفحفه يابودا انا هجرب الجمبرى لانه مضمون عن السمك الباسا لانى اعتقد ان الباسا نوع تانى من الاسماك مش سمك موسى لانه مش بحرى ده بيجى من نهر فى فيتنام وبعدين بيجيلنا فيليه فمش عارفه شكله الاصلى ايه على العموم اعمل الجمبرى واتمزج منه وابدء فى بعض التجارب مع الاسماك حتى اصل للنوع المناسب والف شكر :blink:

فين اوشا غايبه عننا ليه ولا فولانه عملتها راحتلك امريكا وقاعدين تلعبوا فى التلج وسايبنا :blink: مش وقت لعب يلا على المطبخ

[حنين]

ايه ياجماعه انتم فين ايه اللى حصل باين على المطبخ انه محسود

انا عملت كفتة الجمبرى وطلعت فعلا خطيرة فعلا الدمعه اديتها دعم جنان الله ينور عليك يابودا بس انت فين مش عوايدك تغيب عننا طمنا عليك

فينك ياواشا وفولانه والناس الحلوة كلهم المكان مضلم من غيركم :D

[Osha]

السلام عليكم ياأهل المطبخ الكرام

انا لم أكن مختفية ولا بالعب بالتلج والله يا بيه

انما الحكاية وما فيها ان درجة الحرارة - حابس حابس - بقالها كام يوم بتلعب في العشرينات والشمس طالعة وطبعا كان لازم حتما ولابد من الخروج يوميا بعد حبسة طويلة اجبارية مثلجة في البيت.

بخصوص جوز الهند سامحوني لو عمل ايه مش باحبه ولا لو اتخفى في صورة جوز اي حد تاني حاقرب له

في معرض الحديث الشيق عن الجمبري واخوانه اتذكر فيما اتذكر اني قد ذكرت شوربة كريمة بالجمبري وقلت نشوف نقدر نفتكسها ازاي دي والغريبة ان كان لونها سيمون فاتح اوي مع مبشور جزر وبعض الجمبري اللي محتاج نظارة عشان يتشاف أصلا.

ريحة الكفتة يا عم ضاربة في كل ارجاء المطبخ وهي اللي جابتني رغما عني

صباحكم حلو كلكم ومنورين وعقبال الطيور المهاجرة ماترجع وحسن يعرف يحل المشكلة التقنية بتاعته

[bodda]

العزيزه حنين

والله موجود بس مافيش ولا عرض وصفات ولا طلبات

يظهر الناس صايمه اليومين دول

:D

وادى اوشا منوره اهى بعد الحبس فى التلاجه

وطبعا وصفة الشوربه السيمون دى من لون صبغات الجزر

بس برضه لذيذه فى الشتا

بس فعلا عدم التواجد غريب شويه

ومنظرها كده هاتقلب هجره تانى

:D

وصباح الفل

:excl:

[حنين]

اوشا طبعا يافندم من حقك تتفسحى وربنا يخلى الجو حلو على طول بس ابقى طلى علينا طله كده للاطمئنان

ويااستاذنا بودا احنا عاوزينك دايما معانا حتى لو مطلبناش شجعناانت واكتبلنا اى حاجه حلوة من حاجاتك تكون مش اتطلبت قبل كده ساعات الواحد بتجيله حالة زهق من الاكل والطبخ انت بقى تشوقنا باكلاتك او نعمل قسم للاختراعات ايه رايك ......... على فكرة اعتقد ان اوشا كانت قصدها من شوربة كريمة بالجمبري انها عاوزة الطريقه ابتدى بطريقتها والحقنا باكلات غير تقليديه وتشجعنا على الاكل تانى فى اليومين الحر دول

وادعوا معايا ان ربنا يرجعلنا اهل المطبخ تانى

[Osha]

خافي على روحك من الحسد يا حنين عشان الجو هنا برد تاني :)

ربنا يقرب البعيد بقى

وصح كان عندك حق اني عاوزة الشوربة من اول ما يصطادوا الجمبري من البحر !! بس بودا ساعات بيضطهدني عامدا متعمدا

حسن مازالت عنده المشكلة الفنية ووصله ايميل من الموقع بالحل بس مانفعش معاه ومش عارفة اعمل ايه بصراحة

انا كلمت ماما النهارده وقالت لي ان تكا مفتوح ياعم يابتاع الاشاعات انت

وكمان اللي بيروح ياكل بيدوله هدايا :D

وقالت لي ان كيلو اللحم النظيف بيترواح ما بين 50-70 جم على حسب الجزار والقطعية mfb:

ياريت بقى نمشيها اورديحي وبلاش لحمة ولا فراخ من اصله

ويجعله عامر

[bodda]

صباح الاوشاعات يا اوشا

واضح ان الست الوالده مصريه حقيقيه برضه

:)

لانها بتروج برضه اوشاعات

انا امبارح شارى لحمه من جزار معتبر فى المنيل بـ32 جنيه

ولحمه كندوز صغيره تتاكل نيه

mfb: :D :D

صباح الفل

:D