عــضو جــــديد و موضوع جديــد

[TamerGTI]

السلام عليكم ورحمه الله

انا عضو جديد احب ان اعرف عن نفسي اولا .... مع انها ليست اول مشاركه لي

فقد اخذني الحماس (وليست منظمه حماس علشان ما اروحش في داهيه) من روعه المواضيع

واعرف عن نفسي في قسم العمل باعتباري باحث عن عمل

انا شاب مصري

معهد خاص((مهندس كمبيوترTamerGTIالاسم :

العنوان : مصر

المهنه : باحث عن عمل باستمرار

الانتماء:عربي

الديانه :لا اله الا الله محمد رسول الله

الهوايات : الكمبيوتر

..............................

وأحب ان ابدي اعجابي الشديد بالمنتدي الرااااااااائع . وانا متأكد انه حيكون مفيد لي .واتمني اني اكون مفيد ايضا

وبعد ما عرفت عن نفسي تسمحولي أن أبدأ المناقشات فورا بموضوع جديد

هو مش جديد اوي لاننا عايشينه كل يوم...بس انه بيجول في خاطري باستمرار وأحب ان اشارككم به

الموضوع هو :اشتغل اي حاجه

في شباب كتير بيبحث عن عمل منهم الدكاتره والمهندسون و التجاريون وغيرهم وغيرهم ....

كلهم يبحثون عن عمل في التخصص بتاعهم ونسبه ضئيله جدا هي الي تنجح في ذلك

ويبقو علي هذا الحال ربما سنوات من الاحباط والذي يمكن ان يتطور الي الامراض النفسيه التي كنا في غني عنها

..وطول مده البحث التي يـفــني فيها الـــشباب شبــابه في الركض وراء الحلم الجميل

تتعالي اصوات من حوله ب : ما تشتغل اي حاجه

وانا في رأيي الكلمه دي غلط جدا يا تري ايه وجهه نظري في كده

وجهه نظري حتكلم عليها من ناحيتين :

الاولي : من ناحيه الشاب او الشابه فــعمله في تخصصه له فوائد لا تحصي علي المدي القريب والبعيد

فهو يكون سعيد بأنه لم يضيع سنين عمره هباء في التعليم

ويكون لديه القدره علي أداء عمله بكفائه تامه لانه فاهم هو بيعمل ايه حتي لو ما كانش عنده الخبره الكافيه الا انه سيكتسبها بسرعه غير عاديه بالنسبه للذين يعملون عن طريق الخبره المكتسبه فقط .

وبسعيه لتطوير نفسه كعاده كل المصريين يكون قد قفز علي سنيــــن من الخبره التي تلزم من يعملون عن طريق الخبره المكتسبه ليصبحو في خبرته.

(اما لو اشتغل في كل شغلانه شويه سيظل باستمرار يبحث عن نفسه وفي الاخر ربما يرجع لبدئ عمل في تخصصه ويبدئ من البدايه بعد ضياع سنين طويله في المرمطه ... هو العمر في كام من السنين الضايعه دي)

اما الجانب الاخر : فهو الجانب الاقتصادي للدوله

انا بصراحه ما بفهمش في الاقتصاد ولكن اعتقد ان الاقتصاد يعتمد بصوره مباشره علي حجم العمل والعمل يعتمد بصوره مباشره علي الـشباب او ده المفروض ( بس الشباب قاعده علي الاهاوي..... ومش ذنبهم والله)المهم

انا قلت من شويه ان اصحاب الخبره المكتسبه بيضيعو شهور او سنين في محاوله لتنميه قدراتهم لأداء عملهم المكتسب بطريقه جيده . ودي نقطه أخري في غـــــــايه الاهميه ان في شباب كتير ممن يبحث عن فرصه للخبره المكتسبه

ما بـيـأدوش المهام بالشكل المطلوب وبالتالي يلجــــأ أصحاب العمل والـــشركات لرفع سقـــف الخبره المطلوبه للعمل

فنجد مطلوب خبره 5سنوات و10سنوات............. منـــــــــــــــــيـــــــــــــن طـــــــــــــــيــــــــــــــــــــب

وهو ده الي مخلي البلد دي متأخره سنيين عن الغرب ,لو حسبت السنين الضائعه من كل الشباب حتبقي أكتر من مليون سنه

يــعــنــي كــان زمــنا سابقيــــن الغرب كمان .

وأخيرا انا مش قصدي أعيب في أصحاب الخبره المكتسبه ولا حاجه بس قصدي انه كان من الممكن ان يتم الاستفاده القصوي منهم

بشكل أفضل بكتــــــــــير مما يعود عليهم وعلي المجتمع بالمنفعه.

وأخيرا وليس اّخــراًََ اتمني ان لا اكون قد اطلت عليكم

مع شكري وتقديري الشديد للقائمين علي هذا المنتدي

TamerGTI أخوكم :

[مصرى]

أهلا بك TamerGTI

كلامك معقول عن العمل فى مجال التخصص .. على قدر الإمكان .. ودعوتك فى محلها .. وعلى الآباء أن يخططوا لمستقبل أبناءهم على ضوء المعطيات الحالية .. فالحكومة لن تعين الخريجين .. والعمل الخاص يتطلب مؤهلات ينبغى غرسها فى النشىء قبل وقت طويل جداً من تخرجهم فى معاهد العلم على مختلف أنواعها

المهنه : باحث عن عمل باستمرار

أعتقد أنك بهذه الصفة لديك تجارب يمكن مناقشتها فى هذا الباب

[se_ Elsyed]

أولاً مرحباً بك يا تمور ... إسحب لك كرسي وتعالى عشان المشاريب نازلة دلوقت ( سكوربيون ... واحد عناب ساقع وتقل رجلك )

بص يا تامر ... بصراحة يجب أن نُفرق بين مجال دراسة مُعين الواحد ما ينفعش يشتغل غيره . وبين مجالات آخرى أصبحت عايمه وممكن الواحد يشتغل بعدها أي حاجة ...

هاضربلك مثل ... أنا شخصياً بيصعب عليه جداً ألاقي دكتور أو مهندس شغال مبرمج كمبيوتر مثلاً ( ده رأي شخصي ) لكن نييجي للواقع والذي يجب أن نُسلم به وهو إن لو الشخص نفسه مقتنع بعمله ده وناجح فيه وبيتقدم كمان يبقى خلاص إيه المانع يشتغل مبرمج او يشتغل في الأزرق حتى ؟.. مش أحسن ما يبقى دكتور فاشل وينسى ملاية سرير في بطن المريض أو مهندس نص كم ويبني عماير وكباري تقع تاني يوم ...

نيجي للتقيل بقى وهو التخصصات الـ All Size وأولها خريجي التجارة - إحم إحم - فدول ما شاء الله بتلاقيهم في كل نقره .. يعني محاسب تلاقي ... شئون قانونية تلاقي ... بيبي سيتر برضوا تلاقي .... لإن مجال دراسته بتفتح له أبواب كثير يستطيع أن يتخصص فيها ...

وبرضوا نرجع ونقول .. إن الدول الغربية إتقدمت عشان ما ربطوش مجال الدراسة بالعمل وما عندهمش تعقيدات الثانوية العامية ومكتب التنسيق - فينك يا شعنونه ؟ <_< - والكلام اللي بيخلي الطلبة يقطعوا الخلف ولا بينفعوا في مجال دراستهم ولا مجال عملهم لإن نوعية الدراسة والكم اللي درسوه لا يصلح إلا لتخريج عدم اللامؤخذه إسموا إيه ده ...

طب بلاش نتكلم عن دول الغرب عشان لا نقارن الثرى بالثريا ..

عندك الهند والسند وبلاد تركب الكتاكيت مثلاً ، بصراحة الهند دوله لا أمل إني أرفع لها القبعة لحد ما جالي برد من كتر من كاشف راسي عليهم فهم قد ضربوا عصفورين بحجر ..

العصفورة الأولانية هي القضاء على الكثير من المشاكل التي سببها عدد السكان المهول الذي تجاوز المليار ( مع إني لما بأتفرج على فيلم هدي ما بأشوفش غير 50 أو 60 واحد ونصهم بيموتوا في أخر الفيلم ) . :angry:

العصفورة الثانية : تخريج ناس مؤهلين والقضاء على تعقيدات الدراسة ..

فعملت إيه بقى ؟ فتحت معاهد خاصة ومعتمدة كثير جداً خصوصاً في مجال الحاسبات الآلية والمحاسبة والإنشاءات والإلكترونيات والكلام ده ... فتلاقي الواد الهندي من دول ياخد ثانوية أو إعدادية ويضرب كام شهر في المعهد مع شوية تدريب عملي ويبقى باشمهندز قد الدنيا وتتهافت عليه دول الخليج وييجي من بلدهم حاطط رجل على رجل ..

يبقى الهنادوة إتخلصوا منه وطردوه بره الهند عشان يسيب شوية هوا لغيره يتنفسهم .. وفي نفس الوقت بقى عندها ناس مؤهله تنفع بلدها وعشان كده بقوا من أوائل الدول على العالم في مجال البرمجيات والحاسب الآلي .. وبرضوا أمنوا مصدر ومواسير دائمة تضخ لهم عمله صعبة من كل نوع دولار فرنسي ، ين أمريكي ، سحتوت خليجي ...

أما أحنا فلسه عايشين بعقلية خليل باشا أغا وزير المعارف في عهد الخديوي توفيق في أواسط القرن السابع عشر قبل الميلاد ... وعشان كده جايبين مارش دير وبننطلق بسرعة الصاروخ للخلف .. وغيرنا ماشي بخطى ثابته للأمام وعمال يبص علينا ويضحك كمان ...

وسلم لي على وزير التعليم اللي مش عارف إسمه أساساً بعد جدو حسين كامل بهاء الدين اللي لسه بيكلم نفسه بعد الفصل اللي عملوا فيه مبارك في التعديل الوزاري الأخراني ..

[بنت شعنونة]

مين بينده :angry:

بص يا تامر.. انت جيتلي ع الوجيعه..

بس ها اقولك وجهة نظري الخاصة جدا :angry:

لو انت درست الحاجا اللي بتحبها يبقى كلامك تمام لآنك ها "تبببببببببببدع" فيها

لو ما درستش الحاجا اللي بتحبها.. يبقى حاجا من 2

يا تعلق الشهادة لوقت لزوم وتشتغل اللي تحبه وتجرب..

يا تكمل بقى وامرك لله بالشهادة زي ما 78647826874645% من الشعب عامل وادينا احسسسسسسسسسسسسسسن شعب الصراحا يعني <_<

بس عندي تعليق

مافيش حاجا اسمها حرام العمر اللي عدى..

خلي بالك انك ها تُسأل عن عملك دا ف لو ما كنتش متقنه يبقى دور على غيره واتقنه

ها تضيع قد ايه يعني؟

سنة؟ اتنين؟ مش مهم المهم النتيجة...

ف واحد قالي مرة لازم يبقالك هدف عشان تنجحي..

بيني وبينك بقالي 29 سنة بحاول الاقيلي هدف ومش لاقية!

لكن اكتشفت اكتشاف خطيييييييير اخر سنتين

انه لالالالالالالالازم يكون لك حــــــــــــــــــــــافز عشان تنجح

مش مهم الهدف

المهم الحافز

الهدف لو راح ها تلاقي الف غيره

انما الحافز لو راح

ها تبقى محلك سر..

شوفلك حافز وتمسك بيه وبعدين حدد هل انت مغامر والا ان فاتك الميري؟

[TamerGTI]

اولا اشكر الجميع علي الترحيب بي

ثانيا براحه علي شويه يا سي السيد بيه ده انا بحبك والله

وباعتبار ان الاختلاف في الرأي لا يفسد للود قضيه فـــــــاٍسمحلي اختلف معاك

مع اني متفق مع بنت شعنونه في ان الواحد لو ما بيدرس الحاجه الي بيحبها

فـــدي هـــي كل المـــشكـــله .........

نيجي بقي لنقطه التعليم ودي حاجه عايزه مواضيع كتير بل منتدي كامل وانا ما كنتش

عايز اتطرق ليها الصراحه في موضوعي وكان تركيزي علي تخصص العمل

وانا اتفق معاك تماما في ان التعليم عندنا .... مش عايز اقول علشان الرقابه.

بس لوفرقنا مجالات الدراسه زي ما تفضلت ... يبقي حنرجع لنقطه البدايه تاني

ونسيب الشباب يطبشو في البركه الي هما فيها.

الدول الغربيه بالتأكيد ربطو مجال العمل بالدراسه ودي نقطه اخري اختلف معاك فيها

والا ما كانوش وصلو للمستوي ده من الاختراعات وعلوم الذره والفلك

هل يمكن ان تتخيل ان حد ما عندهوش العلم الكافي انه يخترع قمر صناعي عسكري ولا حتي

قمر اتصالات , قطعا كان له دراسه متخصصه جدا ...................

حوضح لسعادتك حاله باختصار جدا , انا اتعرفت مره علي شخص من بلد غربي

وكان مجال دراسته هي هي مجال دراستي , وكان تخصصه وكل دراسته في جزئيه

داخل جزئيه في لغه برمجيه , واللغه دي كانت واحده من عده لغات الي انا كنت بدرسها

بشكل عام طوال 4سنوات.

وهو ده الي بيعمله الغرب , تخصص دقيق جدا وبعد كده بيجمعو الناس دي بهدف بناء مصفوفه

متكامله يكون كل جزئ منها يكمل الاخر ويؤدي مهمته علي أكمل وجه , بحيث تطلع المصفوفه

كـــاملـــه ..... والكمال لله وحده..... امال هما طلعو القمر والمريخ وعايزين يزورو بقيت الكواكب ازاي.

لكن انا هنا بتكلم علي التخصص الي علي قدنا مناسبه للمرحله العقليه الي البلد فيها.

انا معاك ان موضوع الثانويه العامه والكم الي بيدرسوه الطلبه , كان المفروض نتكلم علي الموضوع ده قبل موضوع التخصص ...وان المفروض كل طالب يختار الدراسه الي بيحبها مش التنسيق الي يختار علي مزاجه.

بس لازم نعترف

عمرنا ما حنتقدم الي لو كان كل واحد متخصص في وظيفته

واعتبر العنــــاب وصل خلاص <_< 

تحياتي للجميع

[بنت شعنونة]

انت قلت لب الموضوع بكلمة مصفوفة دي

مرة حضرت ندوة لواحد مصري معررررررررررررررووووووووف جدا برا لكن مجهوووووووول تماما عندنا في مصر

قال كلمة حكمة

قالك ان الدول الغربية بتعلم الناس باسلوب الجماعة

انما العربية بتعلمهم باسلوب الفرد

بمعنى

برا بيعلموهم اننا بنكمل بعض... بدليل ان كل النشاطات بتكون جماعية البروجكتس كلها جماعية.. حتى الصفوف جماعية

عندنا

اضرب اللي جنبك وقب انت

اوعا تقول معلومة لحد خليها لنفسك!!

مع ان دينا بيحاسب اللي يعرف معلومة وما علمهاش لغيره

دي الخلالالالالالالالالالاصة فعلا

اقولك

تعالى اشترك معانا في حملة لا للتنسسسسيييييق <_<

[TamerGTI]

:angry: :D :D

اد كده شايله في قلبك من ناحيه التنسيق

وبصراحه هو التنسيق يستاهل . دا ياما عــــذب ناس

وهو بصراحه انا كمان مبطوووووح منه مش ملسوع بس

ويا رب حمله لا للتنسيق تجيب نتيجه .... :angry: :angry: <_<

[حسـام المصـري]

و الله يا تامر يا خويا انت اخترت موضوع ممتاز. اولا هرحب بيك معانا لاني باعتبر نفسي قديم هنا. انا سجلت قبلك بكام يوم :wub: . و فعلا يا عزيزي المنتدى هنا متميز جدا جدا. و اهم ميزه فيه هم اعضاؤه. الناس هنا عارفه بتتكلم في ايه. مواضيعهم لها لازمة و مناقشاتهم لها نتايج. الحقيقة انا لفيت كتير في المنتديات و كله خيابه و اغاني و كلام فاضي. يمكن برده لان اغلب المنتديات خليجية. و بدون حساسية يعني بتبقى حاجه على اد دماغهم. المنتدى هنا احد الادله ان مصر ممتش. و ان في امل تقف تاني بس لما يغور الغراب :excl:. افتكر كدا قضيناها مجامله و دلعتكم على الاخر. نخش بأه في الموضوع..

انا موافق على كل اللي اتقال. و موافق اكتر على كلام اختنا شعنونه لما اتكلمت عن مكتب التنسيق. ولو انها يادوب "جابت سيرته". الحقيقة انا شايف ان دا من اهم النقط على الاطلاق. صحيح ان نظام التعليم فاشل تماما من الحضانه و لحد الجامعة. لكن اهم نقطة في نظري هي التنسيق. اوكي محتاجين نغير المناهج و نطور المدارس و نريح المدرس و كووووول دا و اكتر منه كمان.. جميل جدا. لكن....

انا معرفش النظام في الغرب شكله ايه. يا دوب باسمع من الناس. لكن الحقيقة انا متعود مصدقش الكلام المرسل دا. برده ما علينا- مش عارف ايه كريزة الرغي اللي جاتلي النهارده دي-

اول نقطة.. ازاي يا سادة يا كرام نبقى بنقول الحد الادنى للمجموع و هو بيوصل تمانين في المية و بيعديها لحد تمنة و تسعين؟ انا موافق تماما انه لازم يكون في حد ادنى للمجموع، لكن يكون فعلا ادنى.

النقطة التانية.. احنا عددنا كبير و مفيش اماكن كفاية في الجامعات. و دا بيخلي الدولة تعالج الموضوع بنظام التوزيع الجغرافي و استيعاب المدرجات و الكلام اياه اللي انتو عارفينه.

النقطة التالتة.. طبعا محدش في مصر- لا الدولة ولا الجماهير الغفيرة- بترحب او تحترم التعليم الفني. على الرغم من اهميته القصوى في تنمية الصناعات الحرفية و الخدمات المنزلية- اقصد السباك و الكهربائي اللي بتروح تجيبه من محل او قهوة.

بناء على ما تقدم- حلوة دي :D - انا شايف جزء من الحل هو..

اولا.. مكتب التنسيق يتلغي تماما. المفروض ان كل جامعة بتحدد نظامها الخاص، بما يتناسب مع ظروف محافظتها و المهن اللي السوق في المحافظة دي طالبها، و الكثافة السكانية و حاجات كتير تانية انا معرفهاش. بالتالي.. لو انا جبت الحد الادنى للمجموع اللي يسمحلي اقدم في الكلية الفولانية، لازم هدخل بعد كدا امتحان قدرات، و مفيش مانع ابدا اني ادخل مقابلة شخصية كمان. لازم نكون متأكدين ان الناس دي عندها الاستعداد و مؤهلة بالفعل للمجال اللي هيدرسوه و يشتغلو فيه بعد كدا. لازم كمان نكون متأكدين اننا كجامعة هنوفرلهم بيئة و نظام مش بس يسهل مهمتهم، لكن كمان يخرج اقصى طاقة عندهم. لازم نكون حريصين ان الولاد دول لما يتخرجو هيقدرو بالفعل يقدمو للسوق، و الاهم للبلد، اللي هي محتاجاه منهم. ساعتها مش هتبقى هيصة زي دلوقتي. ساعتها خريج تجارة هيبقاله لازمة. اولا مهماش زي الرز، زي دلوقتي. و ثانيا هيبقى فاهم بيعمل ايه لانه اتعلم بجد مش بيحضر السكاشن المهمة و بس و معندوش حاجه اسمها محاضرات نتيجة الزحمة و قرف الدكاترة منه و من ابوه و اللي جابوه.

ثانيا.. ندي التعليم الفني الاهتمام اللي يستحقه. الصنايعية اللي مطلعين روحنا علطول و شغلهم وحش و مفيهوش اي زوق او جمال او حتى ذرة علم، مظلومين. اذا في تعليم فني حقيقي هتبقى كلمة صنايعي دي تاريخ. و هتبقى كل الصفات السيئة اللي بنفتكرها لما نسمعها برده تاريخ. هيبقى عندنا فنيين مش صنايعية. طيب هو دا مهم؟ طبعا.. اولا هنرفع مستوى الطبقة دي و نخليهم بالفعل يستحقو الاحترام. ثانيا.. هناخد منهم شغل على اسس علمية سليمة. نتايجهم هتبقى عملية و دايمة- مش كل شوية الجهاز يعطل تاني- و كمان- و دي متقلش اهمية- جميلة متئذيش العين. ثالثا.. و دا اللي يخص موضوعنا هنا.. هنخفف الضغط على الجامعات اللي بالفعل محتاجه استثمارات ضخمة علشان تغطي الارانب اللي بنخلفها كل ساعة.

اعتقد- و العلم عند الله- ان بالشكل دا الامور هتتغير كتييييير اوي. و كمان هتتحل المشكلة االي اتكلمت عليها شعنونة بخصوص الدافع. الموضوع مش انك تحب شغلتك. انا كنت واخد المقلب دا برده. من تجربتي- انا صغير في السن و الله- لقيت انك هتحب شغلك اذا قدرت تحقق ذاتك فيه. لما تنجح في مجال، حتى لو مكنتش بتفكر فيه خالص قبل كدا، هتحبه. اصل خلي بالكم انك من خلاله بتثبت ذاتك و تحقق طموحك. طيب و النجاح هييجي منين اذا الواحد درس حاجه مينفعش فيها، و اشتغل شغل قرفان منه بس هو دا الموجود، و بياخد مرتب تعبان ميأكلش كنافة بالقشطة، و عايش في علبة كبريت؟ مستحيل هتلاقي دافع في وضع مأندل بالشكل دا.

انا مخلصتش بس بصراحة تعبت :D . ابقى اكمل في الرد على تعقيباتكم :blush:

ياللا.. سلااااام عليكم يا اهل مصر

تم تعديل 14 يونيو 2005 بواسطة حسـام المصـري

[ENG. BEHAIRY]

مرحبًا بك يا تمير :rolleyes: .. ومرحبًا بسواعدك الفتية :) ، .. وآرائك الندية :) ، ومرحبًا بك بين أهلك ومحبيك من أساتذة ومحاسبين ومهندسين وعواطلية :D ، واليوم عناب :D ، وغدًا تسعد بالمهلبية :D ..

وما شاء الله ، أنا شايف حفاوة الترحيب ، .. وسرعة وصول الطلبات، ... وجما ل الاستقبال ، .. واستقبال عن استقبال يفرق ،... وجمال عن جمال يفرق ..

وناس تانية قالوا : الســـــــــــلام عليكم ، ودخلوا برجلهم اليمين ولغاية دلوقتى مفيش ترحيب .. و لا عناب ...ولا حتى كباية ميه ... ومازال عشـــمهم كبـــــير ، وأملهم أكـــــــبر ، ولولا الأمل لمات الإنسان ، وماشين بالحكمة القائلة : أعظم الدلاء أبطؤها : أي الدلو ( الإناء) الذي تنزله في البئر لإخراج الماء ويتأخر ويصعب حمله فهو الأكثر امتلاءً . ..ويبدو كذلك أننا جيت وقت امتحانات على المستوى الشخصى والاقليمى ، بعديها لقيت الجماعة مش فتحين أبوابهم ، دول فتحين قلوبهم .... عمومًا ستجد في المنتدى نوعيات جميلة ورائعة ، وثقافات متنوعة ومتفتحة ، وستشعر بإنسانيتك ، وبكرامتك ، وبطموحك ..فأهلاً ومرحبًا بك ..

عودًا إلى عربيتنا ، وإشارة إلى ما ذكرته ونظرًا لتكرر نفس الاستفسارات في مواضيع مشابهة ، فلعلي أجد من المناسب مناقشة الموضوع من خلال ثلاثة محاور حتى يحظى بما يستحق من الاهتمام ، وهي :

المحور الأول : وضعك وظروفك الشخصية ، والآمال والآلام المحيطة بك.

المحور الثاني : التعليم والخريجون وفرص العمل المتاحة.

المحور الثالث : أثر ذلك على البلد.

وسأقتصر الآن على المحور الأول ، ونكمل البقية تباعًا ، فنبدأ بتهنئتك على التخرج أولاً ، فألف ..ألف .. مبروك :D :D :D ... ، وأشكر الإخوة الأفاضل على جميل مداخلاتهم ، فالكل هنا يسعد بأنه مجند لخدمة الكل ، والمرء كثير بإخوانه ، راجيًا منك اعتبار النقاط التالية قدر المستطاع :

= هناك فرق شديد بين الحياة التعليمية والعملية رغم ما بينهما من ترابط قد ندركه أو لا ندركه..

= أحبذ أولاً أن يكون عملك في مجال تخصصك قدر المستطاع.

= مجال الكمبيوتر الذي هو تخصصك من المجالات التي يزداد عليها الطلب يومًا بعد آخر ، وهذه أحد العناصر القوية معك.

= مجال الشبكات ( networking) من المجالات التي يكثر الطلب عليها داخليًا وخارجيًا.

= صاحب أي عمل لا يوظف إلا من يرى ضرورة وفائدة من وجوده.

= إذن كي تعمل يجب أن تغطي جانب الاحتياج والندرة أو التميز أو هما معًا وهو الأفضل.

= التميز يأتي من الكفاءة الفنية ومن السمات الشخصية.

= هنا يوجد مفترق طرق تتصرف فيه وفقًا لوضعك المادي ، فإن كان وضعك المادي والأسري يسمح بأخذ بعض الدورات فابحث من خلال من سبقوك عن المجالات الأنسب واتجه إليها حتى تتعدى حاجز عدم توفر الخبرة بما جنيته من دورات..

أما إن كان الوضع المادي لا يسمح فحاول جاهدًا البحث عن أي مجال مناسب يدر لك دخلا أفضل تدخر منه جزءً لتحسين قدراتك سواءً بشراء بعض الكتب التخصصية أو بأخذ بعض الدورات الفنية ، أو بالتدريب من خلال بعض الزملاء.

= مهما كانت المعوقات حولك إلا أنك في السن المثالية لاكتساب الخبرات والمهارات المتنوعة فلا تضيع هذه الفترة الذهبية التي لن تتكرر.

= حاول باستمرار الموازنة بين الظروف المادية للوظيفة والخبرات التي تكتسبها ، فمثلاً لا تترد في ظروف مادية أقل إن كانت ستحقق لك خبرات أفضل.

= كن ذا هدف في حياتك ، اجتهد في البحث والسعي واحرص على كل شيء يعود عليك بالنفع في أولاك وأخراك ، يقول حبيبنا المصطفى عليه الصلاة والسلام ( احرص على ما ينفعك واستعن بالله).

= هناك فرق كبير بين أن تؤدي وظيفتك كأي موظف عادي لا طموح له ، وبين أن تنمي مواهبك وطموحك وتحب عملك وتتفنن فيه .

= حبك لعملك وتفننك في إجادته يمنحك طاقة داخلية جبارة تعينك في اكتساب الخبرات في زمن أقصر من غيرك ، وستجعلك أكثر قوة وحماسًا في مواجهة الصعاب والتغلب عليها .

= واجتهد في تحقيق قوله تعالى (وَاتَّقُواْ اللّهَ وَيُعَلِّمُكُمُ اللّهُ وَاللّهُ بِكُلِّ شَيْءٍ عَلِيمٌ }البقرة282

= اجعل عملك عنوانًا عليك ، وتذكر قوله عليه الصلاة والسلام ( إن الله يحب إذا عمل أحدكم عملاً أن يتقنه).

= عليك بالسؤال ولا تتكبر في البحث عنه ، يقول الله تعالى (فَاسْأَلُواْ أَهْلَ الذِّكْرِ إِن كُنتُمْ لاَ تَعْلَمُونَ }النحل43.

= لا تجب إلا بما تعرف..فهذا أحد أركان الشخصية القوية.

= أنصحك بمراجعة مشرفتنا الفاضلة ( البنت المصرية ) بالمنتدى عن البركة ، ففيها أيضَا أسباب ومفاتيح الرزق.

= الحوار والمشورة من نعم الله علينا ، فلا تتردد في طرح ما يعن لك من أمور بيننا أو عند من تثق بخبرته وأمانته.

والآن أظن وقت الغداء قد حان ، وضيافة المنتدى على أحر من الجمر ، وأرى الأصناف الشهية للسيد بودا ، وها هو أخونا سي السيد يبتسم ، ويشير بكلتا يديه : تفضل تفضل يا تمور .... ( متنساش تقوله إن فى واحد معاك ...)

تم تعديل 18 يونيو 2005 بواسطة ENG. BEHAIRY

[ممنوع من الدخول]

السلام عليكم ورحمة الله

محظوظ الاخ كاتب هذا الموضوع. حقيقى انه بيدور على شغل والحكاية ده فعلا مشكلة . لكن محظوظ انه صاحب تخصص . وان شاء الله ح يلاقى العمل اللى بيدور عليه . ومع شوية صبر و ممارسة عملية ح يبق حاجة انشاء الله.

لكن الكارثة الحقيقية فى الالاف او مئات الالاف من الخريجيين عديمى التخصص. ح يعملوا ايهو يروحوا فين . بعد سنين من الدراسة ح يلاقوا نفسهم غير مميزين فى اى شئ .

وبالتالى اللى عنده عزيمة و امكانيات ح يبدأ من جديد ويدور على اى مجال تخصص يتقنه. يعنى معظم التعليم فى مصر ملهوش لزمة و زى قلته.

التعليم فى مصر مقلوب الحال (وده فى راى الشخصى ومن واقع تجربتى).

الطالب يتخرج من الكلية او المعهد ينفع يكون مدير المكان اللى ح يشتغل فيه. ده لو اشتغل يعنى. لكن ما ينفعش يفيد مكان عمله كمنتج مبتدأ.

فى نظريات الادارة الحديثة هناك نظرية بتقول ان العامل كلما تقدم فى الخبرة و التدرج فى المناصب منحنى احتياجه للفنيات يقل و يزداد منحنى احتياجه للدراسة النظرية لادارة عمله بنجاح.

لكن فى مصر مفيش الكلام ده . فين التدريب الفنى . فين المعامل . فين الاجهزة ووسائل التدريب. للتخريج منتج.

ومن جهة اخرى فين الدورات التدريبية للادارة بعد سنين العمل الطويلة بعد ما يكون نسى النظريات اللى درسها.

يعنى الحال مقلوب راسه فوق و رجله تحت.

الكلام ده قديم ومعاد بس مافيش تصحيح ولا محاولة تعديل.

و النتيجة ان اى خريج فى مصر لا عنده كفاءة انتاجية . ولا لاقى مكان يدربه. حتى القطاع العام اللى كنا بنقول عليه مدرسة . خلاص راح. يبق ح يتعلموا فين.

الفرق بينا و بين دول شرق اسيا ان الدول ده بتخرج فنين انتجوا و ساهموا فى الاقتصاد.وسرقوا اسواق العمل والانتاج العالمية مننا.

لكن احنا بنخرج مديريين عموم و ووكلاء وزارة . لاينفعوا برة ولا جوة.

و عرفين مشروع د/ زويل اللى كان عايز يصلح فيه حال التعليم والتدريب فى مصر بيتطبق فين دلوقت. فى تونس !!!!!

حرام ولا حلال الكلام ده . وليه كده ؟

وشكرا

[إثار]

السلام عليكم ورحمة الله وبركاته

:  فــعمله في تخصصه له فوائد لا تحصي

يكون سعيد بأنه لم يضيع سنين عمره هباء في التعليم

ويكون لديه القدره علي أداء عمله بكفائه تامه ..........

الجانب الاخر : فهو الجانب الاقتصادي للدوله...................................

اكيد ان زيادة الدراسه في تخصص معين والاجتهاد فيه سيزيد من قوة مهارة وكفاءة الشاب في عمله وهيكون منتج في تخصصه بجوده ودقه عاليه افضل من اصحاب الخبره المكتسبه

ولكن للاسف المشكله فعلا ان المطلوب دائما لشغل وظيفه معينه لازم يكون صاحب خبره :D حتى لو جايب امتياز في شهادة تخرجه لكن عيبه انه ماعندوش خبره :blink:

يعنى اللي يتخرج من الكليه جديد يتركن على جنب ويشوفله اي شغلانه يعمل لنفسه خبره وهنا الخبره طبعا مش بالمعنى الحقيقي هي مجرد كلمه تعني مرور الوقت( وانت بتشتغل ) على شهادة التخرج

.. لو انا جبت الحد الادنى للمجموع اللي يسمحلي اقدم في الكلية الفولانية، لازم هدخل بعد كدا امتحان قدرات.................

كلام جميل

بالطريقه دي كل شخص بيحب كليه معينه هيكون متوجه ليها لاداء اختبارات القدرات ويتحدد مدى ملاءمة قدرة الشخص للمجال اللذي اختاره

في الحاله دي هيكون كل طالب خلص من مرحلة الثانويه بغض النظر عن تقديره بقى لكن باخذ رغبته وتفوقه في نقطه معينه في الاعتبار

يعني لو كل واحد دخل الكليه اللي بيحبها واشتغل في المجال اللي بيحبه اكيد هيحقق نجاح وينجز في مجاله لاقصى درجه وطبعا ده هيعود بالنفع للبلد

ولذلك فان مكتب التنسيق نظام فاشل

يعني ممكن طالب يجيب اعلى الدرجات في الثانويه ويضطر لدخول كلية الطب ليس حبا فيها ولكن (مستخسر) المجموع الكبير (شبح) بينما هو يتمنى دخول التربيه او التجاره ا.....

والعكس صحيح

هناك فرق كبير بين أن تؤدي وظيفتك كأي موظف عادي لا طموح له ، وبين أن تنمي مواهبك وطموحك وتحب عملك وتتفنن فيه .

حتى لو الشخص لا يحب مجال عمله !؟

يعنى لو محاسب لا يحب المحاسبه ولكنه موهوب في مجال تاني هل تنصحه انه يزيد من دراسته وتنميه قدراته في المحاسبه ولا انه يسيبها ويروح يبدا من جديد في مجال بيحبه ؟!

المهم لازم نكون متفائلين مهما حصل وكل واحد يعمل اللي قادر عليه ويجتهد ويتوكل على الله وان شاء الله يحصل كل خير ربنا مابينساش حد ومهما ضاقت مسيرها تفرج