حبل الغسيل

[عابر سبيل]

حبل الغسيل

أيه اللي هز حبل الغسيل ؟

عصفور بيندهني . .

ولا صرخة قتيل ؟

مواويل سامعها يبعتها النخيل

.. قبل ما يسافر

أنا مطاطي راسي ومربع أيديه

و جــــدى باله طويل

لما السحاب بيعدي , يغزني بحسرة

ويهز في الوش منديل ورا منديل

أيـاك يا نــيـــل

تبعت توابيتك بنقشة الحنة

اياك تشيع هواك عليل

الـنخـيــــل . .

.. انحني وع الأرض وطي

راس القتيل لسه بتتغطى

مكشوفة م الأطراف, والشعر بيهفهف

الشعر فاحم

زي قلب الأرامل

البنت لسه طرية الأنامل

واقفة تعيط وحامل

البنت باتت بجوعها

ورغيف على العتبة هناك

وجه اليتامي جميل

أيه هز حبل الغسيل

عاد بي ورج الحنين جوايا

وأيه بداية الحكاية ؟

فتلة من التيل شايطة , وزيتي

وتوب مطوي تلات طيات

فى بيتي

فايش وكاب في أخر رف

أنا عيني مش بترف

عيني بتدمع ومطروفة

مسنود على ذكريات قديمة

وحصان خشب هزني بالصهيل

اخواتي لبسوا القديم

لمع ازاز البيت في ساعة أصيل

عودي ماعدشى نحيل

ولا هزاري مع البنات بيحيني

الدم هرب من جوه شراييني

كون كأنه بلا طعم أو لون

كون زي قطر بيدهس القاعدين

ومهما تقرا الفاتحه

أو تسترجع سورة " يــــاسين "

تلقي جسدك مدعوك

وفي اللسان الشوك

تـــلــقــاك غريب

والوطن مش على كيفك

ومرارة الأيام

.. في طعم رغيفك

هل لأن الأصحاب اتفرقوا

والأعادي ــ ع القهوة اللى قصاد بيتك ــ اتجمعوا ؟

وسدوا بجزمهم كل الطرق والمسالك ؟

( ابن مالك ) ..

.. قرقض ضوافرة وعداك

شاور بالعباية تعدي له هناك

وانت واقف بحسرتك دايخ

هربوا المشايخ

وانفرطت حبات الكهرمان

طلع المؤذن على السلالم ما بان

نام الخليل علي وشه

وقلبــــه التيار

ده مش التتار

ولا الفرسان اللي هزمتهم دقات الحوافر

هو الشجر هاجر

والذكريات

قطر بتفر من الشبابيك عواميده

أنا شلت قهري وصرختي

اختفت , والدم انسفح في نفس مواعيده

أول شهور السنة بالخوص أجاني

هز راسه وحياني

فرش الكلام واتلف في المعني

الحرف كان قادر يجمعنا

لكنه أصبح هو اللي قضبان

والجسد مسجون

* * *

وداع للريح اللي حطنا وشالنا

وداع لسفرنا وترحالنا

أيه معنى أيام بلا أمجاد ..

.. ولا فيها حتى أنين

هل العدد في اللمون

شابت شعور السنين

القلب اتحجر ما عاد يرجه الحنين

التوب من تحت باطي شاط

وحبيبتي لم تبطل عياط

* * *

شريطين على كتف واحد

وأيد مضمومة ..

تتكرر الزومة

وغبار الميدان يلف نفس السرية

في الصبح أنوح بشويش

وبانزف فى المغربيـــة

يعلا للغصون الوارفة نحيب

توب مطوي في الكراكيب

صورة قديمة , وخط بالكوبيا

زهرة وصبرها صاحبها جوا كتاب

ندى الشباب

وكــحــة العواجيز

مشنة الكحك , والأيد مسنودة ع الافريز

هي ارتعاشات الموت , ولا انتظار النهاية

( لكل ظالم انتصار

ولكل مظلوم نهاية )

قاصد, ومتعمد , ومش خايف

أقلب الآيه ..

خمس صوابع مصلوبة ع الحيطة

خمس صوابع والجلود بتشف

عروق يجف الدم فيها , لا تهتم

مكتوب تموت الموته دي بالساهل

مكتوب : تلف , تروح , وتيجي

ترفع رايتها وتسلم .. قبل ما تقاتل

وآخر العمر تتباع في سوق النخاسة

إياك تنسى رقم النحاسة ..

إياك تنسى تمسى ع الصحاب الجداد

إياك تنسى تصبح

.. على وجه سلطان القطر المملوكي الجليل

ايه اللى مرغني فى الذكريات

وعتم الضى , وزرق القناديل

ايه اللي هز حبل الغسيل ؟

* * *

أحمد محمد سلطان

كلية التجارة بالإسماعيلية

الفرقة الرابعة