محاورات المصريين في عيون الصحفيين

[se_ Elsyed]

أخوكم س س بقى عامل زي مجاذيب الحُسين وأي حد جاي من مصر يطلب منه - مش لحمه - يطلب منه أي أعداد لجريدة الدستور أو المصري اليوم التي تنشر مواضيع من منتدانا المحاورات وهايد بارك تكاد تكون بشكل منتظم ..

ووصلني إمبارح نفحة مش بطالة من هاتين الجريدتين وفوجئت بجريدة المصري اليوم ناشرين موضوع " ماذا نحن فاعلون يوم 25/5 " بالنص يوم 23/5 .... وأخويا موديست بيحمي الموضوع وهاننشره كمان شويه ..

كمان قرأت موضوع في هايد بارك إنهم نشروا في عدد أعتقد 22/5 موضوع عمنا أخناتون ربنا يقومه بالسلامه " مش كفاية أنا هانجد قفايا " وموضوع أخر لأبو خليل بعنوان " الماسورة ياريس "

خلاص يا رجالة إحنا وصلنا .

إنتظرونا بعد الفاصل

[se_ Elsyed]

[se_ Elsyed]

شكر خاص للفنان موديست رجل المهام لصعبة ..

وحيث إني بقيت كاتب صحفي يشار إليه بالبنانه فقد عينته مسئول أول الأعمال الفنية في حركة س س الإصلاحية ... وحيث إن العبد لله بقى كادر سياسي مرموق فلازم أعمل لنفسي بريستيج يعني من هنا ورايح ما أتكلمش مع الناس كده بكل بساطة ، بل لازم يكون عندي سكرتارية وناس يتكلموا عني وأنا أتفرج ( إشمعنى أيمن نور .. إذا كان هو زعيم حزب الغد اللي ما بيجيش ... فأنا زعيم حزب الغلابه ) لذا فقد عينت إبني الغالي " سقراط المصري " متحدثاً رسميا بإسم الحركة الإصلاحية ( مش إصلاحية يعني أحداث ؟ ) يعني أي ردود أو أي حد عايز يوجه لي كلام يبعته لسقراطيس الأول يفلتره وبعدين سقراط يعرضه عليه وأنا أبقى أبعت الرد عن طريق سقراط ..

بس أنا زعلان من جريدة المصري اليوم أو الدستور .. طب يا عم شارل فؤاد مش تفوت لأخوك س س بريزة ولا حاجة ثمن مجهوده

على العموم كله فداءً للوطن

[seastar44]

مبروك عليك ياسى السيد .. زعامة حزب الغلابه ..

الحقيقة أنت تستحقها وأكثر .. نظرا لما تمتعنا به فى الموقع من مشاركات رائعة ..

وعقبال مانشوف جريدة حزب الغلابه ... إنشالله حتى تكون مطبوعه على ورق لحمه ..

تحياتى..

[haivi]

قلبي معاك يا س س

وربنا يحميك من طواريء مبارك ناصرنا ومناصرنا

ويحميك من أمن دولة مباركه مبتعرفش ربنا غير بالإشاره

ويبعد عنك مباحث النت وبراغيت الست

ده إنت إتفضحت فضيحه !! ربنا ما يورطك في معتقل آمين

ويبعد عنك الإعلاميين المحلاسيين

أقولك أحسن حاجه تعملها إيه ؟

رشح نفسك لرئاسة الدوله تقوم خازي العين وباعد عنك الحاشيه المالكه لجمهورية الكنانه (بكسر الكاف مش بضمها)

وأهو على رأي المثل

حيسخطوك يا سين سين !!

حيعملوني إيه يخي ؟ رئيس

ولو إعتقلوك !! يعني هي حتفرق ؟

مهي مصر من أربعه وعشرين سنه وهي معتقل كبير .

سوق وعلى بركة الله لغاية ما عزرائيل ما يخلف علينا برئيس جديد

مهو عزرائيل الوحيد اللي كلمته تخش صندوق الإقتراع والريس ينصاع !

ممنون وكلي أسى ع الهم اللي يضحك والهم اللي يبكي :ph34r:

[se_ Elsyed]

نعم نعم .. إنتوا عمالين تواسوني وكإني هشيل الليلة لوحدي ؟

مش إنتوا اللي كنتوا شايليني في المظاهرات ؟

بقى من أول قلم تقوموا رمييني على الأرض وطالعين تجروا ؟

عامة أنا عامل حسابي وعينت سقراط متحدث سمي عشان يلبس هو أي حاجة وأبقى أنا في الناشف  :blink:

[haivi]

إسمه أول قفا يا س س مش أول كف

بعيد عن السامعين ده كف مباحث مبارك قد الفرئله

أنا مكنتش شايلك أنا كنت وسط جماهير عظيمه بتلوح وتشوح وتقول

يعيش الرئيس علي حَسَن سَلُوكه

وتحيا جمهورية الشرم المباركه

مش عاوزين تلبيس مصايب ع الصبح أنا معرفكش :blink: