عن المراقبين الجويين أتحدث من صحف مصر

[عادل أبوزيد]

مشكلة المراقبين الجويين أكثر قسوة و إظلاما مما نتصور .... رغم أنى فى موضوع آخر شبهت فكر الإدارة بذلك الذى قادنا لنكسة 67.

أمس و أول أمس فى جريدة المصرى اليوم و جريدة صوت الأمة موضوع مختصر يوضح أبعاد المشكلة و كيف سيصعدها المراقبين الجويين هذا أول أمس

و بالأمس فى جريدة صوت الأمة نقلت الجريدة أحداث إجتماع لوزير الطيران جاء فيه قوله

"أنا صايع قوى و أنتم حشاشين ... إلخ"

قمت اليوم بشراء سكانر خصيصا لأتمكن من نقل بعض ما تنقله الصحف هنا فى مصر لأعضاء محاورات المصريين لكن العملية شاقة.

أتعشم أن أن أرى تعليقاتكم المسألة مأساة فعلا

[wagdi]

أنا لا أدافع عن الوزير، ويمكن يكون هو الي حشاش وأقرع...أنا حتى مشفتوش قبل كده، بس لو فكرنا فيها ان المطار ده كان قطاع خاص، أو ملك شخصي لأي واحد فينا، و ناس خسرتك ملايين حتقعد ساكت أو حتضبط أعصابك وتتناقش معاهم بالذوق... يا جدعان في أي بلد محترم في الدنيا العامل يستقيل وقت ما يحب و صاحب العمل يقيل العامل وقت ما يحب، إلا في مصر... العامل يمشي وقت ما يحب أما لو خربلك الدنيا ما تقدرش تمشيه إلا بتحقيق ولجنة ثلاثية ولا خماسية ومكتب عمل وتعقيدات وممكن يروح هو يجيبلك محامي من إياهم يطلعك إنت الي غلط علشان ما بعتلوش تلات جوابات إنذار في مدة مش عارف إيه ويجيب عليك تعويض...

يا خوانا لو كان الوزير ده معملش كده كنت حتلاقي نفس الجرنان بيشتم فيه لإن سمعة مصر إتهزت والمطار سايب وشركات الطيران رافعة علينا تعويضات وكان المانشيت حيبقى "بالمستندات... وزير الطيران نائم في العسل والمصريون يدفعون التعويضات"

"السيد عادل أبو زيد... أحييك على مجهودك في نقل ما تكتبه الصحف في مصر للمغتربين أمثالي.."

[achnaton]

النهارده عندنا اجازة رسمية ..- عيد من الأعياد الدينية - .. والمستشفى ماشية هنا النهارده بالدفع الذاتى .. والروتين اليومى رغم غياب الكثيرين وبالذت الأساتذه ورؤساء الاقسام .. والساعة 6 صباحا بالدقيقة زق باب الحجرة اثنين من الممرضات المنتدبين .. وخلال دقائق كان الغرفه مرتبه ونظيفه وملايات للسرير نظيفه – بتتغير كل يوم – وشويه هزار وتعليقات بتهون على الجميع .. والساعة سابعة وصلت صينية الافطار وقبل ما امد ايدى دخل على الدكتور شاب صغير منتدب من قسم ثانى ..بص على لوحة البينات .. وراجع بنفسة الضغط .. وكشف بالسماعه .. وتمنى لى يوم جميل .. وقبل ان يرحل سألنى .. حضرتك من فين .. وقلت بعزة وفخر .. انا اصلا من مصر .. فقال وانا من العراق والعيله كلها من زمان فى انجلترا بس أنا درست الطب هنا .. ولسه مخلص بقالى 3 سنين .. وكانت مدخلا لحديث طويل إنتهى بكذبة بيضاء منى .. وحا اقولكم عليها .. هو ما يعرفش قرار حرمانى من الكمبيوتروالتلفزيون .. فانا اشتهبلت وقلت له عاوز ابعت إيه ميل لأمى فى مصر .. أطمئنها على حالى .. لأنى متعود ابعت لها كل يوم رساله .. وسأل فى دهشه .. هى لسه عايشه ؟؟ قلت له أما عندنا الناس عمرها طويل .. عشان الشمس ومية النيل .. فقال لى .. أنا معايا " اللوب توب " الخاص بتاعى .. وكمان عليه برنامج الدعم العربى .. يعنى ممكن تبعت الرساله بالعربى .. حا اجيبه لك .. حتى انتهى من المرور ابعت آخده .. فشكرته .. فقلت بيتى وبين نفسى يا فرج الله ..!! لازم فيه حاجه مهمه فى الحوارات .. ربنا رايد لى انى اشوفها .. وفعلا كان توقعى مضبوط .. وقريت موضوع الأستاذ عادل .. وتعليق الأستاذ وجدى عليه ..!! وتحركت اصابعى لأكتب اور مرحبا بالزميل الجديد .. واضيف الى ماقاله الآتى ..

الفاضل الأستاذ وجدى ..

عندما يتدنى الحوار بين مسئول ايا كان مركزه والعاملين معه الى هذا المستوى المتدنى جدا .. والتهديد السافر لموظف تحت قيادته انه سيخرب بيته .. ويشتت عيلته .. ويحولهم الى شحاتين ؟؟ فان القلم يعجز عن وصفه ويخجل من التعقيب عليه ..

ده يا معالى الفريق الطيار الوزير .. الرئيس مبارك نفسه معملهاش .. لا وهو نائب ولا اثناء رئاسته .. لم نسمع أنه تناقش مع معارض له .. – وما اكثرهم – ووصفه بالخيانه .. أو الكفر ..إنها تهمه ثقيله يا معالى الفريق .. ومن واحد مسئول زيك تودى على حبل المشنقه على طول .. كما ان إتهام واحد بأنه كافر .. هو الكفر بعينه .. لإنها ليست زلة لسان فى وقت الغضب .. ولكنه إصرار وتقرير .. من وزير .. يعنى من ولى أمر .. يسوجب رجم المتهم !! وياليته متهم واحد .. ولكن معالى الفريق الطيار الوزير بيتهم فئه كاملة من موظفيه بالكفر والخيانه .. وفاضل يعلق مشانق فوق برج المطار لينفذ حد الله فى الكفره .. !!

ولن اكرر ما قلته فى موضوعين آخرين فى نفس هذا الباب وهم بالتحديد :

" أسراب الغربان .. فى مصر للطيران " http://www.egyptiantalks.org/invb/index.php?showtopic=14097

والثانى " عن مشكلة المراقبين الجويين أتحدث " http://www.egyptiantalks.org/invb/index.php?showtopic=15361

ولكنى أسأل معالى الفريق الطيار وزير الطيران المدنى .. الذى حول الوزارة .. وبمعنى ادق واشمل " عزبة المرحوم ريان " المعروفة باسم " مصر للطيران " الى نادى للرديف من ضباط القوات الجوية يتشمس فيه الساده المحالين للأستيداع او المعاش .. وبمرتب .. ومكافأة كمان .. ؟؟ على آى أساس .. مئات اللواءات يحتلوا الشركه باشرافك وبتعليماتك .. وبمرتبات ومكافاءات تفوق الخيال .. وان لم تكن يا سيدى تدرى عما يدور فى العزبه ميراث معاليك فهذه فى الحقيقة مصيبة .. وإذا كنت سمعت بها وعملت ودن من طين والأخرى من عجين .. فالمصيبه أنيل .. والفين فى المائه وصلتك مطالب ضباط المراقبة الجوية منذ زمن بعيد .. ولكنك تصورت أن هؤلاء عبيد فى العزبة لا يحق لهم الشكوى أو مطالبه بحقوق .. زى ماكان بيعمل " السلطان برقوق " والكرباج موجود .. لا .. يامعالى الوزير .. الزمن ده راح من زمان .. واختصارا للوقت دعنى الخص لك بعض مطالبهم .. :

1- الرجوع الى الحق .. واعاده من فصلتهم بدون حق .. ورفع الجزاءات عن الباقى

2- زيادى الرواتب بنسبة 100% .. وهذا حقهم فى تقدير جهدهم .. ومن حق المختصين فى الشركة مناقشتهم .. والوصول الى حل يرضى كل الأطراف .. وليسوا هم أو من يعتصم أو يضرب عن العمل .. ولن يكونوا آخرهم .. وفى برلين منذ أيام فشلت مفاوضات الحكومه المحلية مع موظفى وعمال النقل العام ( اتوبيسات ومترو وترام ) فخرجوا الى الشوارع .. يطالبوا بحقوقهم .. وتوقف الحياه فى برلين اكثر من 6 ساعات .. لم يعترض المسيرات أمن مركزى .. ولم يتهمهم الوزير بالكفر أو بالخيانة أو يحط من قدرهم .. بداية بعامل النظافه .. حتى اقطاب تلك المرافق .. وأسأل معاليك .. فى آى دوله تختارها .. هل من يعتصم للحصول على حق يتصوره خائن لبلده .. أو كافر ؟؟

3- تثبيت أصحاب العقود الموقته الذين امضوا ثلاث سنوات فى الخدمه .. الحركة البايخه التى تتحايل بها معاليك لقطع استمرار مده العمل – شرحنا ذلك فى الموضوعات الأخرى – لا تنطلى على احد .. وسيحكم له القضاء العادل بالتثبيت رغم العنجهية التركى .. ورغم تعينات الرديف اللى معاليك مستقطبهم فى الشركات

4- تعديل الهيكل الأدارى بالشركه .. الذى افسدتموه معاليكم بتعيين رديف القوات الجوية فى المناصب القيادية ..

ولن استرسل فى سرد باقى المطالبات فانتم على ما اعتقد ادرى بها ..

معالى الوزير .. اقولك الحق ومتزعلشى .. إنت غلطان .. واقل حاجة ممكن تعملها ان تنفد بجلدك .. وتحزم أمتعتك .. وتاخد البابفى إيدك – يعنى تقفله وراك ولا تعود – حتى لا تتصور انى باوصيك ان تأخد الباب لبيتك مثل الماهية والمكافآت ..

واادكتور باعت عاوز الكمبيوتر بتاعه .. وأعدك عندما أخرج أن اعيد وازيد .. فانا أكره الظلم فى كل أشكاله .

[مصرى]

عمنا اخناتون الغالى .. حمدا لله على سلامتك :blink:

الأخ وجدى .. أهلا بك :D

أستاذ عادل .. مبروك السكانر

يا جدعان في أي بلد محترم في الدنيا العامل يستقيل وقت ما يحب و صاحب العمل يقيل العامل وقت ما يحب، إلا في مصر

هناك قوانين للعمل وضمانات للعامل تحميه من الفصل التعسفى فى أكثر الأنظمة ليبرالية

[achnaton]

شئ غريب لما يخطر فى بالى تصرفات معالى الفريق طيار وزير الطيران المدنى .. وقائد أسراب الرديف - على رأى استاذنا عادل ابو زيد - فى عزبه مصر للطيران التى ورثها معاليه ضمن ميراثه الغالى .. عن دادى ..

ولولا ضيق الوقت .. وقرب عودة المدام من السوق .. وهى بتعاملنى آخر ذوق .. مش عاوز افاجئها بأنى قاعد اما الشاشه .. بابحث عن البغاشه .. اللى ساعات ما بتكون مليان سموم .. وتشيلنى جنب مرضى اثقل هموم .. ومن الهموم دى .. اللى بيعمله قراقوش القرن الحادى والعشرين .. فى موظفى مصر للطيران المدنيين .. فكرنى بمعاليه عدم وصول جرائد اليوم اللى انا مشترك فيها .. واتصلت بالجرايد بالتلفون .. فين الجرنال .. ردو علي ان امبارح بعد الظهر العاملين بالؤسسة عملوا إضراب .. وتأخرنا فى الطباعة .. والجرنال يجى لك كمان ساعه .. وممكن تشتريه من بائع الجرائد اللى جنبك وعلى حسابنا .. حنخصم التمن وتعويض بسيط من الأشتراك .. ودى مؤسسه اهليه .. يعنى لها صاحب حيخسر الآلاف مالم يكن الملايين إذا رجع عليه أصحاب الإعلانات بطلب التعويض .. لا سمعنا ان صاحب دار النشر فصل عامل او موظف .. او انهم حد بالخيانه .. أو بالأسلام .. - مش عاوز أقول بالكفر لأن الكلمه صعبه ولا يملك قولها الا الخالق سبحانه وتعالى وكثيرا ما يعفو ويغفر - صاحبنا قراقوش هذا الذى لم يكتفى بسب موظفيه علنا .. بل وهدد .. واوعد وازبد .. حيخلى رئيس الرابطه شحات .. وزمياله يلموا له من فائض المرتبات .. عشان بس يعرف يأكل عياه .. وماله .. مادام معالى الفريق .. عارف الطريق .. وهو اللى بيعطى ويمنع أستغفر الله العظيم ..

ولما وصلت الجريده وبأتصفحها .. لقيت ناس تانية ناوية الأضراب .. مثلا البنك الألمانى .. آه يانى .. نقول مين كمان .. ولا كده كفايه .. السنة اللى فاتت شفت العجب يا معالى الوزير .. شفت رجال الشرطه انفسهم مضربين .. وفى الشوارع ماشيين والصغاره بين الشفايف .. ووزيرهم واقف يتفرج عليهم وشايف .. ولما لقوه بيقول ندرس الموضوع .. ضربوبه بالبيض والطماطم .. !!

ومن كام سنه مش بعيد .. جه لبرلين المستشار القديم .. الهر كول .. طبعا عارفه .. وعارف اللى عمله لبلده .. جه يصالح اهل المانيا الشرقيه ويعدهم بريادة المرتبات والماهيه لأنهم بيقبضوا اقل من زملائهم فى الغرب .. وبمجرد ما قال حندبر بند من الميزانية .. نزلوا فيه ضرب .. رغم الحرس اللى حواليه .. قلع الجاكت بالتالى ودخل مع اللى بيضربه فى خناقه .. وده بقى مش زى معاليك قائد عزبه .. لأ .. ده زعيم دوله .. لا حد اتحبس .. ولا هو اتهمهم بالخيانه والتحشيش .. ولا انهم من بيئة واطيه ؟؟!!

وقبله بكام سنه .. فى عهد رئيس الدول قبل الاسبق .. راحت له مظاهره عند قصر الرئاسه عارمه .. وخرخ يخطب فيهم .. ويهديهم .. كلامه ما عجبش واحده من اعضاء حزب كفايه .. دخلت عليه ببوكيه ورد فى ايدها .. الحرس سابوها توصل له .. ومد إيده يأخد الورد منها .. اتمتطعت ولزقته قلم تمام .. وهى تصرخ كفايه انت فاكرنا نيام .. وحياتك يا معالى الفريق .. قبض عليها الحرس .. والنيابه حققت معاها .. وقيدتها قيضه وبعد شهرور صدر الحكم بالحبس ثلاثة شهور !!

ما تيجى تمسك العزبه اللى هنا .. وتسبك من عزبه ريان .. لم مهماتك .. وغربان سلاحك القديم .. وتوكل على الفتاح العليم .. كفايه ..

[عادل أبوزيد]

المسألة ذات شقين

أولهما التعامل العنترى فى مسألة المراقبين الجويين و الطيارين و ربما غيرهم و يتلخص ذلك الشق فى التعامل بصبغة عسكرية لها سلطة الأمر النهائى الغير قابل للنقاش و لها سلطة التعيين و إعادة الهيكلة أو قل بمعنى أدق "تفكيك" كيان إقتصادى ناجح و مستقر يحتاج إلى تحسين و دعم و ليس إلى تفكيك و ربما تخريد (من جعل الشئ " خردة").

و الشق الآخر و هو الأهم و الأخطر و هو إتخاذ قرارات ذات صبغة مقدسة فى مجال أكثر خطورة من حجرة العمليات الجراحية هذا المجال الذى فى العالم كله يتم التعامل فيه بدقة جراحية ...عندنا آل أمره إلى مجموعة لا تعرف الدقة و المسئولية المطلوبة فيما تولوا إدارته من أعمال و حتى لا يتهمنى أحد بالتجنى على الرجل ...

بماذا تسمى تخريج دفعة مستعجلة من معهد المراقبيين الجويين بعد دراسة تسعة أشهر و يعهد إليهم عمل المراقبين الجويين الذين قضوا سنوات طويلة فى التدريب سواء دراسيا أو تشغيليا.

هذه الرجل لا يدرك خطورة إحتمال سقوط طائرة حتى لو كان عليها راكب واحد .... هذا الرجل مثل مدير المستشفى الذين يستعين بالتمورجية لإجراء العمليات الجراحية أو الذى يقرر الإستغناء عن عمليات التعقيم قبل إجراء الجراحة.

و يجرنا هذا الحوار إلى مسألة أكبر و أعم و هى "عسكرة" المناصب القيادية فى البلاد و التى يترتب عليها نفس المخاطر السابقة و لكنها تعمل لفترة بقوة الدفع الذاتى ... و لكن النتائج هى النتائج بعد فترة وجيزة ... و يتكفل الإعلام بإخفاء كل شئ

الفاضل إخناتون

الحديث ذو شجون ... أرجو ألا تحمل نفسك فوق طاقتها أما ما يجرى فأتعشم أن يتحمل الشباب دورة فى كشف المستور و فرض الإصلاح

تحياتى لأسرتك الكريمة

[achnaton]

مش عارف إذا كان معالى الفريق بيعانى من الحشاشين .. البيئة الواطيه اللى بيعموا بالشركة من سنين .. رافعين شعار الخيانه والكفر التى قام معاليه بتصويرهم من الجو .. يبقوا إيه المراقبون الطليان .. اللى مخليين عيشة شركة " آل ابطاليا " فطران .. النهارده أضربو عن العمل لتحسين احوالهم .. اربع ساعات فقط .. !! تم الغاء 116 رحلة دوله أثنائها .. ده غير الرحلات الداخليه 80 رحله .. وسارع المسئولون باعداد صاله للمفاوضات معاهم .. بأدب واحترام .. ولم نسمع لا من وزير ولا من غفير أن الناس دول " خمورجيه " .. فإذا كانوا اللى عندنا حشاشيين ومعالى الوزير عارف الغرز اللى بيحششوا فيها .. يبقى بالمرة يكسب ثواب .. وبقول للحكومه الإيطالية الجماعه بتةعهم بيسكروا فين .. إنت عارف يا استاذ عادل مشكله المراقبين الجويين فى مطار روما عمرها كام سنه .. ؟؟ وبيحاولوا كل سنه .. ويأخذوا جزء من حقوقهم .. ويكتفوا بنص فى الاتفاق أن مناقشة باقى المطالب اتفق الطرفان على بحثها العام التالى .. ويحل العام التا لى .. وتبدأ المفاوضات .. وتبدأ الأضرابات .. سنه 2004 كلف اصرابهم الشركه اكثر من 800 مليون يورو .. ولم نسمع تهديدات التشريد والوعد والوعيد زى بتاعه الوزير الشديد .. بتاعنا .. ياريت يخطف رجفه ويروح روما يشوف بيحلوا المسائل ازاى .. وانا لو من الرابطه .. لما ترددت من رفع قضية على الوزير اللى مقطع السمكة وديلها واتهمه بالسب العلنى ..

من نشرة الاخبار اللألمانية :

Alitalia streicht wegen Streik 200 Flüge

Fluglotsen fordern sichere Arbeitsbedingungen

Wegen eines Fluglotsenstreiks streicht die staatliche italienische Fluggesellschaft Alitalia am Samstag 196 Flüge. Betroffen seien 116 internationale Verbindungen sowie 80 Inlandsflüge, teilte die Airline mit. Auch die Lufthansa habe sechs Flüge annulliert, ihre italienische Partnergesellschaft Air One 16 Verbindungen, berichtete das italienische Fernsehen.

28.05.2005