خسرنا الاستفتاء .. ما هي خطوتنا الجديدة ؟!

[هادي]

حسناً أيها السادة

خسرنا معركة الاستفتاء

ثم ؟!

سؤال عاجل يطرح نفسه

أفيدونا أفادكم الله ؟

ماذا بعد ..

خلاص كده

خلصت

وكل واحد يروح ينام ف بيته ومش عاوزين لمه ..

ولا نولعها

ولا نرجع لأيام الشقاوة من تاني

على طريقة محمد هنيدي : " وربنا .. لانيمك م المغرب يا صين "

http://www.aljazeera.net/NR/exeres/291EADE...9B1BA2D66FB.htm

صور وفيلم الجزيرة يغني عن الكلام

ولكن

يظل السؤال

ماذا بعد ؟

أنتظر الايجابية وخطوات فاعلة وحلول عملية ..

وسلامتكم

[مصرى]

النتيجة متوقعة .. لكن لا أتصور أن الأوضاع السياسية ومستوى الوعى العام سيمضى اليوم وغداً مثلما كان بالأمس .. قطعاً هناك تغيير حدث وسيكون أمام الحزب الوطنى الحكومة محاذير وفعاليات تحسب لها حسابا فى أى خطوات قادمة .. حتى إن حاول المسئولون إظهار عدم الإكتراث أو القدرة عل السيطرة الكاملة على زمام الأمور

القادم أكثر سخونة وخطورة وأهمية

هناك قانون جديد للانتخابات يجرى طبخه .. هل ستكون الانتخابات بالقائمة النسبية أم سيظل فرديا .. وهل سيجرى تعديل على تعريف العامل والفلاح والفئات ؟!

والإعلان الرسمى للترشيح على منصب رئيس الجمهورية (وطنى ومعارضة) وما يتبع ذلك من حملة انتخابية يفترض فيها عدالة استخدام وسائل الاعلام القومية وحياد أجهزة الدولة

وقانون السلطة القضائية .. وقانون الصحافة .. ومناقشة الموازنة العامة الجديدة الأكبر والأكثر عجزاً فى تاريخ مصر (برضه منذ عهد مينا)

والكلام لسه هيحلو

[wagdi]

العجلة دارت... ومادام دارت يبقى خلاص... المسألة وقت ليس إلا... و العجلة إلي بقالها ربع قرن ماتحركتش ابتدت تتدحرج وحتفضل تتدحرج لحد ما حتاخد في وشها كل الي واقفين قدامها... بس الصبر...

السؤال ما يبقاش حنعمل إيه دلوقت...أي كان... مظاهرات ... مقاطعة... حتى لو وقفنا على راسنا مافيش فايدة المرة دي، خلينا واقعيين، لو مبارك قال مش لاعب قولولي اسم ممكن المصريين يتفقوا عليه دلوقتي... مافيش... الشطارة بقى إننا نستغل شوية الحريات الي حصلنا عليها دي و ننميها في الست سنين الجايين... ونتفق على اسمين ثلاثة ممكن فعلاً يمسكوا البلد... مش عايزين بطل حرب أو ثورة، ولا سياسي لافف الدنيا وخابزها، ولا جهبز من بتوع الإقتصاد الي جايبنا ورا دول... عايزين واحد منظم...بس... واحد يعرف يحط SYSTEM ... إحنا عندنا في مصر عقول نضيفة قوي في كل حاجة، وعندهم حلول عملية لكل حاجة، بس لإن النظام خربان يا بيطفشوا ويروحوا أي بلد تانية تقدرهم، يا عقولهم بتصدي من الجري ورا لقمة العيش... لو عرفنا فعلاً نحط نظام ونمشي كلنا عليه وبروح أكتوبر و روح 56 و روح 1919وعليهم روح قلبي، ممكن نقدر نتغير ونبقى دولة محترمة بعد عشرة خمستاشر سنة على الأقل.

فحتى لا نزيد من الإكتئاب والإحباط اللي جوانا تعالوا نفكرفي مين أو إزاي نلاقي بديل مبارك بدلاً من ان نفكر في كيف نتخلص من مبارك...

الموضوع حيبقى أسهل كتير لو ان هناك اسم نهتف به... فعندما يهتف بلطجية النظام :"مبارك مبارك" نهتف أمامهم "فلان فلان" بدلاً من مجرد "لا لمبارك"....

[Guest النسر المصري]

ياجماعة ساندو معايا ترشيح محمد الفايد في رئاسة مصر

مصري وطني أصيل الحكومة الانجليزية بكل قدرتها مش قادرة علية

راجل اعمال ناجح وهيخلي مصر خلية نحل متحركة

وسيضعها بمعونة الله في صف الدول المتقدمة

وماتنسوش...انه راجل شبعان...وماتسوش هو اللي عمل مدينة دبي اللي بتنافس افضل مدن العالم تجاريا

[سقراط المصري]

ياجماعة ساندو معايا ترشيح محمد الفايد في رئاسة مصر

مصري وطني أصيل الحكومة الانجليزية بكل قدرتها مش قادرة علية

راجل اعمال ناجح وهيخلي مصر خلية نحل متحركة

وسيضعها بمعونة الله في صف الدول المتقدمة

وماتنسوش...انه راجل شبعان...وماتسوش هو اللي عمل مدينة دبي اللي بتنافس افضل مدن العالم تجاريا

<{POST_SNAPBACK}>

:D :D :blink: :D :o mfb:

ليه ، هو محمد الفايد كان عاش في مصر قد إيه. والناس اللي بتنضرب وبتتبهدل في مصر وحاسه بالبلد ومشاكلها راحوا فين.

والفايد يعرف هموم المواطن العادي المطحون المنجد قفاه منين. والفايد قرأ عن مشاكل مصر ولاشافها فيديو.

الفايد كرجل اعمال اهلاً وسهلاً

الفايد كرئيس .......معلش مصر لسه فيها رجاله.

سقراط

[New]

يا جماعة انا مش شايف ان موضوع الاستفتاء ده عبارة عن خطوة على طريق الوصول للهدف. الحكومة عارفة ان الاستفتاء ده لعب عيال.

الموقف الحالى ما بين الحكومة والشعب عامل زى ما يكون مندوب مبيعات غتت وعايزك تشترى منه بضاعة فاسدة ومضروبة انت مجربها لمدة 24 سنة وعارف انها غير صالحة للاستخدام. فى الاول حتقول له سيادتك شكرا مش عايز. ولان المندوب ده غتت ومصمم على بيع البضاعة دى اسلوبك حيبدأ يتغير وتزداد حدته مرة بعد الاخرى لغاية ما يحس ان مفيش فايدة ويحل عنك ويسيبك.

الشعب عمره ما كان ضد الحكومة زى ما هو دلوقت والشعب زهق خلااااص وما هى الا مسئلة وقت علشان صوته يعلى واسلوبه يزداد حده وساعتها الحكومة حتعرف ان مفيش فايدة ومفيش حد حيشترى كلامها المعسول وبضاعتها الفاسدة و يحلوا عنا.

فبما ان الاستفتاء الحكومة ما فهمتهوش او بالاصح لفقته يبقى نعلى صوتنا شوية كمان (طبعا بما لا يضر بمصلحة البلد) وانا شايف ان وجود مظاهرات واحتجاجات سلمية بشكل اكبر حيكون فعال.

الاخ وجدى كلامك نظريا معقول مية فى المية بس هل تعتقد ان الحكومة حتعطى فرصة لحد من المعارضة ان صوته يعلى او يبقى ليه شأن والناس تلتف حوله؟؟؟ طبعا لا. ده استحالة وطبعا عدم وجود بديل جاهز المفروض مايكونش سبب لعدم التغيير.

تحياتى

[Sherief AbdelWahab]

فيه أسئلة محيراني بصفتي منعتني ظروفي من التصويت:

كان فيه إقبال ولا لأ؟

الاستفتاء دة كان على التعديل ولا على الجناح الجديد للحزب الوطني ولا على القديم؟

الناس العادية حست بفايدة من اللي حصل امبارح ولا لأ؟

تقديري إن إجابة السؤالين الأول والتالت لأ.. قولولي إجاباتكم عليها الله يخليكم..

خلص الكلام

[هادي]

أخي العزيز : مصري

(( والكلام لسه هيحلو ))

ما هو عشان يحلو

يبقى لازم نقول حاجه

نقترح حاجه

:blink:

ويكون كلام موزون

قصدي ممكن

ممكن تطبيقه الصبح

كلام بيمشي على رجلين يعني

مش كلام إنشا ، شبع الناس منه

فيكفروا بالمثقف

زي ما كفروا بالنظام من قبل

ولا إيه الكلام ؟

[هادي]

أخي الكريم وجدي

((السؤال ما يبقاش حنعمل إيه دلوقت...أي كان... مظاهرات ... مقاطعة... حتى لو وقفنا على راسنا مافيش فايدة المرة دي، خلينا واقعيين، لو مبارك قال مش لاعب قولولي اسم ممكن المصريين يتفقوا عليه دلوقتي... مافيش... الشطارة بقى إننا نستغل شوية الحريات الي حصلنا عليها دي و ننميها في الست سنين الجايين... ونتفق على اسمين ثلاثة ممكن فعلاً يمسكوا البلد))

المرة دي لسه مخلصتش ياوجدي

ما هو الانتخابات ف اكتوبر

ومن مايو لاكتوبر ، ربك يحيي عباد وممالك وأمم

وبعدين لو مبارك قال مش لاعب يبقى خير وبركه

هتلاقي غيره

صدقني هتلاقي وقتها 10 غيره

وساعتها لكل مقام مقال

لكني أرى ان الاتفاق حاليا على اسم بعينه هو من الترف السياسي

فنحن سنكون بنعزف خارج المقطوعة الهباب بتاعة الوطني

الذي جعلها مستحيلة ومقفوله زي الدومينو

سأفترض جدلاً أننا اتفقنا على اسم

طب وبعدين

هنلزقه بالعافية على اعلانات السيما

ما هو برضه هيفضل مجرد كلام وامنيات

أنا فاهم قصدك من توحيد كلمتنا على رجل واحد

لكن قصدي نقطتين

الاحزاب لن تتفق على شخص واحد

وبالتالي الشعب .. سيكون هناك 75 مليون ترشيح واسم ..

سأقول لك رأيي في آخر الجلسة

[هادي]

أخي الكريم : النسر المصري

((ياجماعة ساندو معايا ترشيح محمد الفايد في رئاسة مصر))

يا استاذي

لو سألت عشرين واحد ف الشارع

تعرف محمد آل فايد

ولقيت منهم اربعة يعرفوه

هاعتبر ده اجماع

وساعتها فقط

سأعطي له صوتي ، لأنه أصبح إجماع

ثم أرجو ألا يكون رأيك – الذي احترمه طبعا –

مبني على أساس انه مصري

فهو لم يصبح مصري

ونسي الحدوته من زمان

أو إنه (شبعان)

طب ما هو الاسطى حنفي بتاعنا كلها كلها لواحده

يعني جاته له تخمه

وعدى مرحلة الشبع

هوه وكل رجالته كمان

يبقى نرو نبايعه بقى احسن

ونلبس الكسرولة بتاعة اخي (سي السيد)

ويجعله عامر

[هادي]

أخي الكريم : جديد – نيو يعني -

((يبقى نعلى صوتنا شوية كمان (طبعا بما لا يضر بمصلحة البلد) وانا شايف ان وجود مظاهرات واحتجاجات سلمية بشكل اكبر حيكون فعال))

يا استاذي

رائع كلامك

نعلي صوتنا شوية كمان

ده يفترض أن يكون هناك وقود للثورة

قصدي للمظاهرات

وكل يوم سنرمي بمزيد من الجنود الى المحرقة

قصدي الى السجون والمعتقلات

نظرياً

اتفق معك

لكن مع الأخذ في الاعتبار أنه عملياً سيكون من الصعب تطبيق هذا الحل

لسببين

سيقل الوقود تدريجياً .. بالاغراء مرة وبالقهر مرة أخرى

وصدقني لو جربت السجن والمعتقل

حتعرف إنه بيلغي كرامة المصرى

وبيخرجة – غالبا – مستأنس

عشان يحافظ على البقية الباقية من كرامته الانسانية

وعقلة

لو لسه موجود

السبب الثاني

ان ده بيفترض ان الحكومة مستمرة في الضغط على الناس بغباء

وهم ليسوا بهذا الغباء

لكن بيفتحوا غطى الحلة كلما زاد فوران الغضب والسخط

حتى لاتصل الامور لمرحلة الانفجار

ولعلك تراجع كيف استوعبوا درس الامن المركزي

فحسنوا اوضاعهم – نسبياً – وكمان أنشأوا جهاز مخابرات خاص بالامن المركزي !!

لكن سيظل ما طرحته

في رأيي المتواضع

من أفضل الحلو المطروحة

التصعيد السلمي

[هادي]

في انتظار اجابة الاستاذ شريف على أسألته ممن حضر الاقتراع

لاني لم احضر

وجدت أنه من المناسب أن نسأل الجميع (فضلاً لا أمراً )

أن يقولوا لنا هل قمت بالتصويت أم لا

و من ذهب له مطلق الحرية أن يقول لنا كيف اعطى صوته

وملاحظاته على يوم الاستفتاء نفسه

ونظرته للحل أو الخطوة القادمة

ثم لو اذنتم لي

أدلي بوجهة نظري المتواضعة ورأيي الشخصي

أرى أننا تكلمنا كثيرا في السابق عن العصيان المدني

وطالبنا الناس أن تلزم بيوتها

والعمال ألا تذهب للمصانع ، والموظفين تتغيب عن مكاتبها

والفلاح عن أرضه، والتاجر عن دكانه.. وهكذا

طبعا الدعوة فشلت فشل ذريع

للفقر الشديد الذي يعانيه شعب مصر ، فلايمكن أن يقطع لقمته بايده

فما رأيكم لو بدأت الأحزاب التي بادرت بالمقاطعة

لو أخذت خطوة أراها قوية و ذات مضمون

هذه الخطوة تتلخص في التالي

يقدم كل ممثلي تلك الأحزاب استقالتهم

نعم

استقالة جماعية من مجلس الشعب

أو المجالس المحلية ، أو مجلس الشورى ، أو المجالس القومية المتخصصة

لماذا

لأن عضو مجلس الشعب قادر على أن يعول اسرته ماديا من خارج مجلس الشعب

فلا تقنعني مثلا انه ينتظر بدل حضور الجلسات عشان يدفع دروس العيال

وبالتالي

فهو مستقل اقتصاديا عن الدولة ومرتبها

فلو ضرب للناس والشعب مثل ، هيكون بيحقق مكاسب هامة جداً

أبسطها المصداقية

ان الناس ترجع تصدق من تاني

تؤمن من جديد

تصدق ان فيه قدوة

تصدق ان فيه ناس اشراف مستعده تنفذ اللي بتقوله

وتدافع عما تؤمن به حتى النهاية

اعذروني فيما يلي

لكن شهيد الإخوان الذي مات تحت التعذيب ، لم يشعر به الناس

وكذلك كل المعتقلين

وكذلك من مات أو جرح في مئات المظاهرات

لم يشعر الشعب بهؤلاء

لم يحس بأي منهم سوى أقاربه واسرته واولاده الذين تركهم

إذن نحن بحاجة لخطوة جبارة

ناهيك أن تلك الخطوة

ستكون بمثابة صفعة قوية للنظام البلطجي

سيقول له الجميع

مش لاعبين

العب لوحدك

سنعريه أمام الداخل والخارج

بدلا من اسباغ الشرعية عليه عندما تظل أحزاب المعارضة داخل اللعبه

لكن بخروجها بهذا الشكل

هي تقول

اشبع بيها لوحدك

سيتم اغلاق مقر الاحزاب لمدة اسبوع

ستمتنع كل جرايد المعارضة عن الظهور اسبوع كامل

سيتوقف الجميع عن الكلام

سنقاطع البلطجي

ونسقط عنه ورقة التوت التي يسميها ممارسة ديموقراطية

سيعرف العالم انه ليس هناك أية سياسة أو حريات ف بلدنا

في هذا الاسبوع

ستظل قادة وهياكل تلك الاحزاب وجماعات الضغط في اجتماع مفتوحة

وتمد يدها لكل شخصية عامة وطنية نزيهة وتدعوها الى الاجتماع

ويكون هدفهم الوحيد هو

الخروج بميثاق وطني يملي فيه الشعب ارادته على الحاكم وحاشيته

ستكون ثورة يوليو جديدة

لكن بشكل مدني

وليس بشكل عسكري

فما رأيكم

أدام الله عزكم ؟

[wagdi]

الأخ الفاضل/ هادي

" وبعدين لو مبارك قال مش لاعب يبقى خير وبركه

هتلاقي غيره

صدقني هتلاقي وقتها 10 غيره"

صح...ايام ناصرقالوا مين حايجي مكانه وجه السادات وايام السادات قالوا مين وجه مبارك... و لو السر الإلهي طلع حتلاقي غيره...بس مش حيكون باختيارنا... مرة واحدة حتلاقى واحد مسكها ماتعرلفلوش ملة وتبت فيها... وحيقولك جم واتحايلو عليا وقالولي تعالى امسك قبل ما البلد تضيع... ومتنساش إن فيه أمريكا... وماتقوليش ساعتها حيبقى كلام تاني لأن عمرما بيبقى فيه كلام تاني... طب الاستفتاء و أطبخ ...فين الكلام؟ و الانتخابات برضه حتطبخ...ومش حيبقى فيه كلام...

لاحظ انك بتحارب جوه نظام ارهابي و برة نظام مايهموش إلا مصلحته...

" سأفترض جدلاً أننا اتفقنا على اسم

طب وبعدين

هنلزقه بالعافية على اعلانات السيما

ما هو برضه هيفضل مجرد كلام وامنيات"

اه...حنلزقه... فرق لما تحارب علشان حاجة ملموسة واقعية وانك تحارب عشان مبدأ نظري...

الناس لما خرجت سنة 1919 كانت بتهتف سعد... وساعتها بريطانيا العظمى ما قدرتش إلا انها توافق على مطالبالشعب...

يا سيدي بلاش اسم بعينه.... الأحزاب وحركات الاصلاح في مصر تتلم و تشكل لجنة من كام نفرمحترم... تبقى اللجنة دى كيان في مواجهة النظام...

" ستكون بمثابة صفعة قوية للنظام البلطجي

سيقول له الجميع

مش لاعبين

العب لوحدك"

دحنا نبقى قدمنالهم مصرعلى طبق من دهب...

و الكلام ده حصل ايام السادات مع الفارق الكبيرطبعاً في الظروف والادوار، ساعتها السادات لم يفقد شرعيته، بل بالعكس قال كلمته المشهورة: "دول المفروض يتحاكموا بتهمة الغباء السياسي" وفعلاً... لأنهم سابوله الملعب فاضي... و لو عالشرعية تاني يوم حتلاقي مظاهرات تسد عين الشمس تهتف بحياة النظام وتشتم في الخونة الذين تخلوا عن دورهم...والتاريخ هما الي بيكتبوه...

"سنعريه أمام الداخل والخارج"

الداخل مش محتاج يتعرى قدامه لأنه متعري فعلاً...أما الخارج، فالشعوب ولاتعرف عنا حاجة... زي مانتا كده ما تعرفش حاجة عن نبض الشارع في دولة تشاد، أما الحكومات فهما عارفين من قبل محنا نعرف والمعلومات بتوصلهم قبل ما توصلنا وميهمهاش الشعب ده إن شالله يولع المهم مصالحهم...

المواضيع عايزة وقت...عايزة صبر... بس مش صبرسلبي زي العشرين سنة الي فاتوا... لأ...صبر ننظم فيه حالنا ونوحد فيه صفوفنا و نتفق على كلمة واحدة...

والله أعلم...

[Alshiekh]

انا شايف ان الموضوع من الآخر لن تصلح معه الاساليب المعتادة فى الدول المحترمة مش لاننا غير محترمين ولكن لاننا محكومين باناس غير محترمين لايعرفون كيف ومتى يحترمون انفسهم، اناس لايقرأون التاريخ ليعرفوا انهم يقتربون من النهاية، الحل هو الثورة وفقط الثورة لازاحتم من المقاعد التى التصقت بمؤخراتهم فخافوا ان يتركوها حتى لاتظهر عوراتهم.

المشكلة مش مبارك وحده، العصابة اللى حطينوه طرطور ويلعبون فى الخفاء، لا اظن ان مبارك يمكنه ان يفعل كل ذلك وحده،

لو كان اعضاء مجلس الشعب شرفاء، ما حدث هذا، ولكن واضح انهم كلهم جميعا لهم مصلحة فى استمراره كما هو الحال بالنسبة لمبارك.

[محمد حافظ]

أرجوا من السادة الأخوة مساعدتي في الآتي:

1- إيجاد وصلات باللغة الإنجليزية أو العربية تفيد أن إسم حركة كفاية لها علاقة بكلام محاضير محمد في مكتبة الإسكندرية شهر سبتمبر الماضي .

2- إيجاد وصلات تخص التعديل الحادث اليوم في المادة 76 باللغة الإنجليزية

3- إيجاد وصلات تحدد تماما كيف تم تفصيل التعديل للتماشي مع مبارك وحاشيته

4- وصلة باللغة الإنجليزية تؤكد الإنتهاكات التي حدثت أمس في الإستفتاء

5- بعض الصور من مصادر غربية لأحداث العنف أمس .

6- تحليل سياسي أجنبي يكشف ألاعيب مبارك في مصر

الهدف من هذه الوصلات أنني وبمساعدة صديق لي هنا .. سنبدأ فضيحة إعلامية بجرائد شرق آسيا لما يحدث اليوم في مصر ..

أرجوا المساعدة

وسلام

[Alshiekh]

الاخ محمد حافظ

اليك لعض الصلات، لعلها تساعدك

http://news.search.yahoo.com/search/news/?...8&c=news_photos

http://www.washingtonpost.com/wp-dyn/conte...5052500404.html

http://www.alquds.co.uk/

http://www.aljazeera.com/cgi-bin/news_serv...service_id=8395

http://news.bbc.co.uk/1/hi/world/middle_east/4582469.stm

http://news.bbc.co.uk/1/hi/world/middle_east/4577201.stm

http://www.guardian.co.uk/international/st...1492229,00.html

http://news.ft.com/cms/s/ab850d5a-cd82-11d...000e2511c8.html

http://news.independent.co.uk/world/fisk/s...sp?story=641438

[Sherief AbdelWahab]

بدأت أشعر بنفس الشعور الذي شعرت به بعد هلال ذي الحجة الشهير..أعراض لسع على القفا..

أشعر أن سبعين مليون مصري تعرضوا لعملية نصب دعائي وإعلامي من بعض المعارضين والتليفزيون الحكومي ، حاولوا خداع الناس قائلين لهم أن كل شيء سيتغير بمجرد ما تتغير الطريقة التي يختار بها الرئيس ، وكأن النظام الديمقراطي كله متوقف على شخص واحد وهذا يتعارض مع الحد الأدنى للديمقراطية شكلاً ومضموناً.. الديمقراطية التي يفترض بها أن يختار فيها الناس أشخاصاً يقومون بدور رقابي وتشريعي ..

كلنا انضحك علينا..

خلص الكلام

[haivi]

آراء الموضوع ده كلها حكمه وثقافه وهدوء ملحوظ

والمحصله التي قد تفيد بما قرأت هنا من ردود قد تجدونها في توقيعي وإيماني الوثيق بتوقيعي

شكراً لمبارك الذي أثبت لنا أننا أولاً وأخيراً (خرساء)

فالعمل أجدر من الكلام !

[محمد حافظ]

شكرا يا أخ محمد على هذه الوصلات .. جميعها مفيدة جدا .. أنتظر قريبا نص الرسالة التي سأساعد فينشرها بإعلام جنوب شرق آسيا بخصوص أحداث الإستفتاء هذا وبلطجة مبارك وأعوانه

وسلام

[هادي]

أخي العزيز مصري

أوافقك الرأي كما تقول (ظروف السادات تختلف عن الآن)

فمصر كلها تغيرت

وهناك أجيال جديدة ظهرت

وكذلك العالم كله قد تغير

هنا عندما أقول نعلق الممارسة السياسية وتتوقف الجرايد والاحزاب عن ممارسة النشاط ، بل وتنسحب من الحياة السياسية في المجالس ، إنما أقول ذلك لننزع عنه ورقة التوت الدمقراطية التي يتشدق بها ..

وكما يقول أخي شريف عبد الوهاب

كلنا انضحك علينا