جالى عقد عمل فى السعودية

[محمد حجاج]

السلام عليكم ورحمة الله

انا جالى عقد عمل فى شركة الوفاق للصناعة الغذائية

مقر الشركة السعودية - جدة

وصل لى منهم العرض الخاص بالعمل مخطط مخازن

محدد في الاساسى 2500 ريال

وبدل المسكن 645 ريال

وبدل الانتقال 325 ريال

وتذاكر الطيران عليهم رايح وجاى و30 يوم اجازة باجر وتامين بس المشكلة انهم مش محددين مكان العمل وقالو فى اى مكان بالمملكة

هل العقد يستاهل الغربة ولا لا ,,,,,

كنت عايز اعرف هل البدلات تكفية للمعيشة فى سكن عائلى ام و2 طفل وما هى المصروفات بالتفصيل الممل

وممكن اعمل زيارة لزوجتى واطفالى لفترة قصيرة فقط لاغير بدل للاستقدام

ظروف النت وفرش السكن والكهرباء والمياه والغاز والباقى بقا

ولكم تحياتى

تم تعديل 5 أبريل 2014 بواسطة محمد حجاج

[AbuZeyad]

بالنسبة لسؤالك هل العقد يستاهل الغربة ولا لأ

خليني استعرض معاك باقي الاسئلة واسيب لك انت الرد في الآخر

بالنسبة للسكن وعلى فرض انك هاتعيش في جدة أقل شقة صعب جدا انك تلاقي شقة باقل من 1000 ريال شهريا ودا على فرض انك هاتعيش في بيت شعبي في حارة وغالبا هاتكون شقة حالتها رديئة

ممكن تلاقي سكن عزاب يعني غرفة وحمام فقط بدون مطبخ في حدود 800 الى 1000 ريال ويكون ادمي ممكن تعيش فيه وممكن تعمل بحث على جوجل عن شقق للايجار في جدة علشان تاخد فكرة بنفسك

بالنسبة لتذاكر الطيران ليك لوحدك ولا للأسرة كذلك؟؟ ونفس الحال بالنسبة للتأمين الصحي لازم تعرف مستوي التأمين الصحي يعني هل التأمين يصلح لدخول المستشفيات المحترمة ولا مجرد مستوصفات؟ لان العيا بدون تأمين محترم فعلا مر وهتلاقي تكاليف مهولة للكشف والعلاج والتحاليل لو احتجت لها.

تكاليف المعيشة بالنسبة لاسرة من طفلين طبعا بتختلف من واحد لاخر وحسب عمر الأطفال بس لو اتكلمنا بس عن تكاليف المعيشة يعني بس الأكل من غير فسح ولا خروج متقلش عن 1500 – 2000 ريال شهريا ولو هاتعيش لوحد في حدود 1000 ريال شهريا

النت مش مشكلة ممكن في حدود 100 ريال شهريا يكون معاك نت حسب المنطقة اللي هاتعيش فيها والخدمات المتاحة فيها للنت

فرش السكن مش مشكلة لو ممكن تعيش على فرش مستعمل ممكن تلاقي حاجات معقولة بأسعار رخيصة يعني الفرش ممكن يكلفك في حدود 5000 ريال طبعا حسب الحالة والنظافة

الغاز الانبوبة ب15 ريال تكفيك من شهر لشهر ونص

المياه على حسب منطقة السكن يعني فيه مناطق مفيهاش شبكة مياه فبتضطر تشتري عربيات مياه وفي الغالب بتدفع مبلغ في حدود 1000 ريال سنويا وصاحب البيت يوفر لك المياه دا بالنسبة لمياه البيت يعني للغسيل مش للشرب مياه الشرب بتشتريها من السوبرماركت بحوال 5 ريال للعبوة الكبيرة (حوالي 24 لتر)

الكهرباءفي حدود 50 – 60 ريال في الشهر حسب الاستخدام

المواصلات التاكسي يبدا من 10 ريال وحسب المشوار بس مش اقل من 10 ريال الا لو مشوار قصير جدا

ممكن تعمل زيارة للأسرة بدل الاستقدام بس في حالة الزيارة او الاستقدام الموضوع متوقف على مهنتك في التأشيرة يعني لو مهنتك عامل او سائق مثلا في الغالب الطلب بيترفض لازم تكون مهنتك عليا يعني مدرس – محاسب ..... علشان تعرف تعمل زيارة او استقدام

لو قبلت العرض دا يبقى تعمل حسابك انت هاتعيش حياه مشتركة في كل شئ مع آخرين علشان تعرف تحوش يعني تسكن مع زملائك في الشغل في سكن مشترك وتركبوا التاكسي او تشتروا سيارة مع بعض و تروحوا السوبرماركت مع بعض وهكذا وصعب جدا انك تعيش بأسرة بالمبلغ دا وتحوش انت بالكتير ممكن تعيش وتغطي مصاريفك مش اكتر من كدا ودا بشئ كبير من الجهد وضبط المصاريف

راي الشخصي انك لو بتعرف تجييب مصاريفك في مصر وعايش من غير ديون خليك في مصر احسن من العرض دا وتابع مع الشركات والاعلانات وتلاقي عرض احسن ان شاء الله

ولا انت رأيك ايه؟

[محمد حجاج]

فعلا اكتر من صديق قال الكلام دة بس كنت بتاكد من حد فى جدة او يعرف حاجة عن الشركة

شكرا يا اخى