محمد الفايد..،الشعب يرشحه رئيساً لمصر

[Guest النسر المصري]

هل فكر احدكم يوما لماذا لم نختار رئيسا بديلا حتى الآن

والشروط ان يكون معتزا بمصريته..ناجحا في عمله...له حنكة سياسية

لا شك ان محمد الفايد تنطبق عليه هذه المواصفات

المعروف ان الفايد يعتبر محلات هارودز هى درة امبراطوريته الماليه التى تضم ايضا فندق الريتس الملكى فى باريس ونادى فولهام الانجليزى وبعض مناجم الذهب فى منغوليا كما انه يمتلك عقد التنقيب عن النفطفى فى كولومبيا وتبلغ ثروته حوالى خمسة مليارات دولار

والرجل هو الذي صنع مدينة دبي الاماراتية وجعلها قبلة المستثمرين في العالم

وماذا ايضا

انه مازال يملك الجنسية المصرية فقط

نعم ورغم نجاحة في برطانيا الا انه الوحيد الاجنبي الذي حقق كل ذلك النجاح

وعوضا عن ذلك رفضه ان يعمل تحت ظل الحكوومة الفاسدة

اذا هو المطلوب لرئاسة مصر والعبور بها الى بر الامان الاقتصادي والسياسي

لان له قوة خارجية وسياسية وكل ذلك بمصريته

ولذلك...قمت أنا النسر المصري بتأسيس حزب اسمه حزب مصر الأول

بيان من حزب مصر

نعلن بمساندة الملياردير المصري محمد الفايد لترشيحه الى رئاسة جمهورية مصر العربية

تتضمن اهداف الحزب في تكوين حزب وطني موحد

على الراغبين في الاستفتاء على ذلك الترشيح تسجيل موافقتهم مع سبب الموافقة

على الرافضين تسجل سبب الرفض مع ترشيح البديل وسبب ترشيحه

اخيرا اتمنى تثبيت المشاركة لضمان اكبر عدد من المرشحين

وتعيش مصر سالمة لابنائها الاوفياء

والله اكبر على الظالمين

[وليد صفوت]

جميـــــــــــــل ,...... رااااااااااااائــــــــــــــــــــــع !!

أنا أعلن رفضى التام لترشيح ( أى واحد معروف و خلاص ) لرئاسة الجمهورية المصرية ,........

قالوا عمرو خالد

و قالوا عمرو موسى ,....

و قالوا جمال مبارك ,...

و قالوا سيد لوبية ,... :D

فاضل ميييييييييييين ؟؟؟

آآآآآه ! .... نسينا الراجل اللى طفش من مصر بقاله سنين ده ! الملياردير الفايد اللى نسى اللهجة المصرية , و حتى اللغة العربية ده !

ايه المهزلة دى ؟؟؟

هى البلد ناقصة ؟؟

حد يقولى يطلع مين الفايد عشان يرأس بلدنا ؟؟؟

يفهم ايه فى العلاقات الدولية و السياسية ؟؟؟

طب يعرف حاجة عن القانون الدولى ؟؟

طب أيه برنامجه الإنتخابى ؟؟

طب يعرف منين يحل مشكلة البطالة ؟؟

طب إزاى يخلص مصر من الفساد ؟؟؟

طب هل عنده النية انه يعدل الدستور ؟؟

و هل عنده برنامج إصلاحى للبرلمان ؟؟

ايه رأيه فى القطاع العام ؟؟؟

ثم هل سألته إذا كان عايز يرشح نفسه أصلاً و لا لأ ؟؟؟

شوف الإيموشن ده ------------------->>> :D

و سلملى على الفايد ,....... :blink:

[wagdi]

انسي ساويرس أغنى من فايد... ودماغه أنضف... وزيادة ابن بلد وعايش طول عمره فيها ومشغل فلوسه فيها....

ولا اقولك... إيه رأيك في مبارك... أغنى منهم هما الـاتنين...و بنى نفسه من الصفر... ودماغه ملبسة 70 مليون مواطن طرح... وهو بقى مش عمل دبي الي انتو شايفينها... لأ ده بعبقريته عمل توشكى الي ماحدش عارف هيا فين أصلاً...

[مصرى]

يا عم نسر هى ناقصة ؟!

ده نسى اللغة العربية .. وعايش بالجنسية المصرية على مضض لأن الانجليز رفضوا يدوله جنسيتهم .. ولا يعرف فى مصر إلا سمير رجب !!

طيب قول سامح عاشور .. نقيب المحامين

أو الدكتور زكريا جاد نقيب الصيادلة ورئيس جماعة الإدارة العليا فى مصر

أو الدكتور أسامة الغزالى حرب الذى تولى رئاسة تحرير مجلة السياسة الدولية بعد الدكتور بطرس غالى

أو المستشار زكريا عبدالعزيز رئيس نادى القضاة

أو المستشار محمود خضيرى رئيس نادى قضاة الإسكندرية

نقول كمان

[Alshiekh]

مش عارف احنا مصرين ننتخب واحد مارشحش نفسه ليه؟

تماما كما فعل اجدادنا لما راحوا لمحمد على واختاروه بدل مايختاروا واحد منهم.

نشوف اولا مين عنده استعداد للترشح وبعدين نفكر

مش كده والا ايه؟

[Guest النسر المصري]

العزيز فيولين كينج

الاستاذ وجدي

العم المصري

والاستاذ محمد

انا ماتوقعتش انه الناس هاترفض بالشكل دة

اولا ازاي محمد الفاسيد بتقول نسي اللهجة المصرية والعربية وهو كان في حوار من اربع ساعات في الفضائية المصرية عمال بيتكلم عن سيرته الذاتية كازنه واحد من سكان شبرا

يراجل اتقي الله..اول حاجة ابحث واقرأ واستفسر وبعدين ابدي رأيك...أنا لما اتكلمت عن ترشيحه وجدت انه واحد مصري معتز بمصريته ... وقدر بذكائه انه يبني اغنى مدينة لجذب الاستثمارات..وهي مدينة دبي...ثم انه هو رفض العمل تحت ظل الحكومة المصرية الحرامية...وحاول في تلات محاولات انه يعمل اكبر تلات مشاريع في مصر...لكن حسني والحاشية رفضوا الا لما يكوننوا شركاء معاه...

ععندكم فكرة ان مشروع مدينة دبي دة عرضوا محمد الفايد على مبارك انه يعملوا في مدينة بور فؤاد...وافق مبارك لكن بشروط اللي على مزاجه....ورفض محمد الفايد العمل بالاسلوب دة...وقاله الانجليز نفسهم ماحاولوش يعملوا معايا الابتزاز دة ..تقوم انت اللي تقف فيها..وطبعا طار المشروع على دبي وفي ظرف خمس سنين كانت دبي من أفضل مدن جذب الاستثمار.. والآن أصبحت الامارات ودبي مقصد كبار المستثمرين في العالم... ودة كله بسبب مشاريع محمد الفايد...

طيب وماذا بعد؟...هاتقولي اية خصوا في السياسة....وهاقولك انه يكفي انك تعرف انه الاجنبي الوحيد اللي في برطانيا اللي الحكومة بتعملوا الف حساب ...وعارفه انه كاشفهم..وتوني بلير نفسه مش قادر يعمل اي ابتزاز ليه لانه كاشف فضايحه....وهو الوحيد اللي بيتخذ برأيه في القرارات الاقتصادية والمحلية...وطبعا حاولوا عبثا بان يتهموا بمساعدة تنظيم القاعدة والعراقيين

وله انشطة سياسية مع دول افريقيا ...وله تاريخ كبير من التعاون مع رفيق الحريري

وماتنسوش ...ان رفيق الحريري كان رجل اعمال ملياردير...وقدر انه يبني لبنان من جديد...بل ويهديء من الثورة الشعبية الطائفية...وسيطر على القرارات المحلية بارادة شعبه...رغم ابتعادة عن الحكم اكثر من مرة....

ياناس ياعالم مصر محتاجة تطوير سياسي اقتصادي..واحد يكون فاهم دماغ الغرب شغاله ازاي ...بفكروا في اية...واحد يكون كاشفهم ...عشان يبقى عارف ازاي يسيطر عليهم...مش يسيطروا عليه ويتحكموا فينا بالشكل المخزي اللي احنا فيه دة.....ووااحد يكون عارف ازاي يشغل ثروات البلد...وماتنسوش مص تملك اغنى ثروات ..بل مصر انى دولة في العالم...بقالها ثمانتلاف سنة بتتسرق ولسة عايشة...واحد يرد كرامتنا وعروبتنا...ومش هنقدر نرد كرامتنا الا لما نكون قوة سياسية...ومش هنكون قوة سياسية إلا لما نكون قوة اقتصادية...ومش هيحصل دة الا لما نكون على علم بخباثة وصهيونية الغرب ونكون على مستوى ذكاء يسمح بان نسبقهم في التفكير..اذا ماحاولوا التآمر علينا...نحن نريد حماية اانفسنا لا أذية الآخرين...

فكروا كويس مين بقى اللي يقدر يكون دماغة اقتصادية وفاهم سياسة دولية..ويكون فاهم ازاي الغرب بيفكروا...واحد قاعد في شبرا...وقرفان حاله...وبيقول ياشعب انتخبوني انا اكتر واحد حاسس بيكم...طب ياعمي انت عارف امريكا واناس دي...قالوا همال ايييية...انا بشوفهم في التلفسيون...وعلى رأي المثل تعرف فلان قالوا آآآآ ..قالوا عاشرته..قالوا لاااأ....قالوا تبقى ماتعرفهوش...ولا ايه رأيكم ياجماعة

وعموما كل واحد في حضراتكم رشح مجموعة اسماء...طب قولولي تاريخهم ايه زي ماانا شرحت تاريخ محمد الفايد

وفي الآخر سنتفق على الافضل لاشك

لانه يهمنا مصلحة مصر والشعب باي حال من الاحوال.....مع خالص تحياتي وتقديري لمشاركتكم

[سقراط المصري]

QUOTE(النسر المصري @ May 26 2005, 12:31 PM)

ياجماعة ساندو معايا ترشيح محمد الفايد في رئاسة مصر

مصري وطني أصيل الحكومة الانجليزية بكل قدرتها مش قادرة علية

راجل اعمال ناجح وهيخلي مصر خلية نحل متحركة

وسيضعها بمعونة الله في صف الدول المتقدمة

وماتنسوش...انه راجل شبعان...وماتسوش هو اللي عمل مدينة دبي اللي بتنافس افضل مدن العالم تجاريا

؟؟؟؟؟؟؟؟؟؟؟؟؟؟؟؟؟؟

ليه ، هو محمد الفايد كان عاش في مصر قد إيه. والناس اللي بتنضرب وبتتبهدل في مصر وحاسه بالبلد ومشاكلها راحوا فين.

والفايد يعرف هموم المواطن العادي المطحون المنجد قفاه منين. والفايد قرأ عن مشاكل مصر ولاشافها فيديو.

الفايد كرجل اعمال اهلاً وسهلاً

الفايد كرئيس .......معلش مصر لسه فيها رجاله.

سقراط

.........................

ما سبق كان رأيك في ترشيح الفايد وردي عليه(تحت موضوع : خسرنا الاستفتاء .. ما هي خطوتنا الجديدة ؟! ) الذي تم تجاهله او بسب انشغالك عن الرد......ماعلينا

أنا لما اتكلمت عن ترشيحه وجدت انه واحد مصري معتز بمصريته............ياناس ياعالم مصر محتاجة تطوير سياسي اقتصادي..واحد يكون فاهم دماغ الغرب شغاله ازاي .........ووااحد يكون عارف ازاي يشغل ثروات البلد............

ويكون فاهم ازاي الغرب بيفكروا...واحد قاعد في شبرا...وقرفان حاله...وبيقول ياشعب انتخبوني انا اكتر واحد حاسس بيكم...طب ياعمي انت عارف امريكا واناس دي...قالوا همال ايييية...انا بشوفهم في التلفسيون

شوف يا أخ نسر وانت اخ فاضل وانا متأكد من حسن نيتك وحبك لمصر:

الكلام مستفز ، انت بتعتبر المصريين وخصوصا بتوع شبرا :sad: فلاحين او مبيفهوش، اخرهم نشره الاخبار. ودي فرضيه خطأ. وكمان بتعتبر ان الفايد - وهو الوحيد القادر على فهم الغرب او من الاقليه اللي فاهمه الغرب.

بصراحه المداخله والفكره كلها نرفزتني

اهي الفكره عمله زي فكره اسناد المطارات المصريه للخبراء الاجانب لإدارتها........فكره عقيمه ، او مايطلق عليه فكره موثقه وموقعه على ان بلادنا مفهاش حد بيفهم.....غباء في غباء.

مصر فيها بدل الشخص المناسب الف شخص مناسب للرياسه.

جميع الاسماء المشهوره والمتوافره على الساحه لاتصلح.

مصر محتاجه واحد مصري اصيل

كفايه كده بدل ما تقلب المداخله بغم.

تحياتي

سقراط

تم تعديل 27 مايو 2005 بواسطة سقراط المصري

[Salwa]

ياجماعة بلاش عصبية ونرفزة ..

السيد / النسر المصرى كان اكيد بيهزر...

ممكن نتقابل على صفحات المحاورات بعد عشر سنين ؟؟؟؟؟؟؟؟؟؟؟؟؟؟؟؟؟؟

يكون عمرك زاد عشر سنين .............وتكون بقيت اقل انفعالا وتصديقا لكل ما تسمعه ؟؟

وتكون الرؤية بقت عندك اوضح يعنى ...................

زمانننننننننننننننننننن..........ايام الزلزال ...سنة 92..

الفايد بيه اتبرع بالفتات ..(( بالنسبة لما يمتلكه )) .......بيتهيألى مليون جنيه ...ده لأن عنده او كان عنده شركة شحن فى مصر ..(( واتبرع بهذا المبلغ على اساس انه يقتطع من الضرائب )) ...يعنى المبلغ مش حايروح عليه ...يعنى حاسبها بالعقل مش بالقلب ....

فى نفس الوقت اتبرع لحضانة انجليزية ((( حضانة مش مدرسة ))) ..باتنين مليون استرلينى ...لأنها تقريبا كانت حضانة لاطفال معاقين ..مش فاكرة بالضبط ..

الفايد حنين قوى قوى وقلبه ضعيف ..........على اى مخلوق بيتكلم انجليزى ..

ومسألة الجنسية الانجليزية ..(( هم اللى رفضوها )) ...

هو كان حايموت على الجنسية الانجليزية .....بس بقى ده ثار بايت بينه وبين الملكة ..

مسألة فلوسه !!!!!!!!!!!!!!!!!!!!!!!!!!!!!!!!!!

اولا.........تجارة السلاح مع خاشوقجى ثم زواجه من اخت خاشوقجى ..وهى ام دودى (( الله يرحمه )) ..اللى ابوه بيفتخر وينفخ اوداجه ان ديانا كانت حامل من ابنه وحفيده حايكون اخ للملك المنتظر ...ثم تعامله مع الأثرياء العرب ...(( دى بقى متاهات لوحدها ))

بلاش تهريج وفضايح ....

مش هو ده الفايد (( الهايف )) اللى راح لبس فرعون واتصور وهو سعيد عند افتتاح محلاته وبقى يوزع الذهب وغيره ويعمل حفلات خرافية علشان يلم حواليه كل نجوم المجتمع ؟؟

كان فين هو .........؟؟؟...مسمعش عن سكان المقابر ؟؟؟ معملش ليه اى مشروع ولو مشروع عبيط ........لتحسين دخل ولو (( حى فقير )) من احياء مصر ؟؟؟

طيب آهو الفايد ده اساسا من حى الجمرك فى اسكندرية .........طيب عمل ايه لحى الجمرك ؟؟؟

كل رجال الاعمال فى الاسكندرية قدموا حاجات جميلة رائعة لاسكندرية ........

كان فين الفايد كل السنين دى ؟؟؟

ده حتى (( بيتبرأ من اسمه )) ...وهو مفيش فى اسمه ..ال...

هو اسمه محمد فايد ...

بس بما ان العائلات المعروفة فى مصر كانت القابها فيها ..ال..

وايضا العائلات المعروفة فى الخليج تسمى كمجموعة آل ...

هو كمان عمل له اسم ...

ياعمنا متوجعش قلبنا .....

انا لو بايدى .......

اسحب منه الجنسية المصرية لأنه لايستحقها ...

وبيفتخر انه عمل دبى ؟؟؟؟؟؟؟؟؟؟؟؟؟؟؟؟؟؟؟

يافرحتى .................

شفت بقى ؟؟؟ صدقت ؟؟؟؟ ده ملهوش اى خير فى بلده .......

وفى دى بالذات بقى .............انسى مبارك ...

بجد بجد بجد .....طيب والسادات ؟؟؟؟ (( الله يرحمهههههههههههه؟؟؟؟))

وتانىىىىىىىىىىىىىىىىى!!!!!!!!!!!!!!!

بتختار واحد زوجته فنلندية ؟؟؟؟؟؟؟؟؟؟؟؟؟؟

هو مفيش فايدة ؟؟؟؟؟؟؟؟؟؟؟؟؟؟؟

من نفسنا يحكمنا واحد مصرى وزوجته مصرية مائة فى المائة ....

الله يسامحكم ...

قصدى يسامحك لوحدك يانسر يامصرى لأن باقى المجموعة بترفض كلامك كله عله ...

[Aladino]

أنا معاك يا أيها النسر المصري

ودة مش علشان تأييدي لمحمد الفايد

لكن لاقتراحك الجري بمرشح للرئاسة له من اسباب القوة والنفوذ الكثير

لاننا بجد معنداش حد المعارضة مجتمعة عليه وده يعتبر من أسباب الضعف اللي بنا

فياريت اللي مش عاجبه الفايد يقترح لنا احد تاني لان مفيش وقت والانتخابات على الابواب

ولو عايزين تبقى لنل كلمة بجد لازم نكون متحدين .... متحدين وبس.......

[Shams100]

التغيير مطلوب ولن يكون الحال يوما اسوا مما عليه الان لانه لا يوجد اسوا من حال البلد الان

وماذا فعل مبارك لساكنى القبور او اى فقراء مصر الا انهم اذادوا فقرا

ولماذا نقول ماذا فعل لمصر ولماذا لا نقول ماذا فعلت مصر لاى انسان ناجح ماذا فعلت لدكتور زويل الذى ذهب لقطر بعد فشله مع البيروقراطيه واصطدامه باعداء النجاح

ماذا فعلت مصر مع الدكتور احمد مستجير الخبير الزراعى الذى نجح فى زراعه القمح باستخدام ماء البحر فى الوقت الذى كان يوسف والى كل اعتماده على التعامل مع المبيدات الاسرائيليه والتى حصر مبارك مشكله القمح فى زياده السكان

اين عمر خالد اين عمر موسي

التغيير مطلوب باى شكل لكى نري مصرمر بدون الثلاثى المعجزه الذين يتحركوا من منصب الى منصب ولعبوا ادوراهم بكل مهاره التغيير مطلوب باى شكل لكى نري مصر بدون الاستاذ امعجزه سمير رجب الامثله كثيره

مرحبا باى مرشح واتمني ان يكون غنى حتى لا نقضي فتره زمنيه اخري لكى يؤمن بها مستقبله ومستقبل احفاده

ومن يسال عن البرنامج الانتخابى وهل نحن علمنا عن برنامج مبارك

[Shams100]

فياريت اللي مش عاجبه الفايد يقترح لنا احد تاني لان مفيش وقت والانتخابات على الابواب

عمر موسي

[Guest النسر المصري]

أولا آنا آسف على التأخير في الرد لاني كنت في المستشفى بقالي ثلاثة ايام

ثانيا ياجماعة أنا اعتذر لكم جميعا اذا كنت تعتقدوا اني احاول الاستفزاز بكلامي عن ترشيحي للفايد..ولا أقصد اي اهانة لاهل شبرا او مصر...فانا تلاتة ارباع اصدقائي من شبرا...بل وهي موطن اعز اصدقائي...

ولكن انا لست مصرا على الفايد....انا اريد شخصا داهية ومحترم...شخص مصري يدرك خبايا الغرب ..ويسبقهم في التفكير والرد...ولكن يجب ان تكون أخلاقة كريمة... الاخلاق الراقية هي اساس تكوين مجتمع محترم...

اتذكر الاستاذ وهيب المحترم العزيز عندما كنا نتحاور معا عن اهداف فيلم كينج اوف هيفين...والذي يتكلم عن الحرب الصليبية...ووصلنا لنتيجة ان الحاكم المحترم ذو الاخلاق الراقية..والذي يكون داهية في التفكير هو الشخص المناسب لتغير حالة الشعب الى الافضل وفي مدة زمنية قصيرة..

وهل نسينا الشيخ زايد الذي وحد الامارات وجعل الشعوب الاماراتية تقول انا اماراتي بدلا من انا من دبي او الشارقة او او....

ثم جعلها باخلاقة وداهية تفكيرة في مصاف الدول المتقدمة التي لات عتمد على البترول بل وعلى التجارة الثرية...

ومن قبله الكثير من هؤلاء الشخصيات والذين بهرونا باسلوبهم الراقي في الحكم

لقد اجبر عمر بن عبدالعزيز وصلاح الدين والشيخ زايد وغيرهم الكثير في فرض الاحترام على العالم..وجعل العالم يرفع لهم القبعة احتراما لهم...

الفايد قد يكون ليس متدينا مثل هؤلاء لكرام...وقد يكون ليس داهية مثلهم...ولكن من هذا الذي نود ان يكون حاكمنا والذي لابد ان يكون مثلهم

من هو؟؟؟؟

واين هو؟؟؟

واذا وجد لابد ان يبيدوه ابادة قبل ان نسمع عنه....

ولن ينجو الا اذا كان له حاشية من القوات....

انا أؤيد الرجل الذي يكون تاريخة وعقله واخلاقة تجبرنا على ترشيحه

وليس أن نجبر على أخلاق وعقل وتاريخ الرجل المرشح

وفي نهاية المطاف...ارد الى بداية كلامي وحواري

من يرى شخصا آخرا مناسبا للترشيح فليرشحه لنا هنا الآن

وليتكلم عنه وعن تاريخه وشخصه

ليس بان نرفض المرشح الذي لايعجبنا بان نذبحه بسلبياته

بل بان نواجهه بمرشح افضل منه

وهنا بيت القصيد

فاذا حدث ذلك

ستجتمع الآراء على شخص واحد

انا بدأت بالفايد

وانتم؟؟؟

[وليد صفوت]

أود أن ألفت النظر الى شيئ هام جداً

الواقعية ,...

يجب أن نكون واقعيين ,.....

لسنا نحن من نختار المرشح ,....

و لسنا نحن من نقول فلان يستحق أن يكون الرئيس ,.....

و لكن الشخص نفسه من يتقدم بطلب الترشيح ,....

لذلك يجب أن نكون واقعيين , و نُقدم أشخاص لهم الرغبة أصلاً فى الترشيح للرئاسة ,...

تحياتى,......

[فنكوش]

د/احمد جويلي

[yasser6666]

طيب آهو الفايد ده اساسا من حى الجمرك فى اسكندرية .........طيب عمل ايه لحى الجمرك ؟؟؟

كل رجال الاعمال فى الاسكندرية قدموا حاجات جميلة رائعة لاسكندرية ........

انا مش حنتكلم علي صلاحية محمد الفايد كرئيس لمصر أم لا...لأن ده موضوع غريب وشكلنا كده بندور علي قشة لتخلصنا من مبارك وسنينه السودا

لكن انا حارد علي مدام سلوي هو ليه معملش حاجة للأسكندرية أو لأي فقير في مصر بصراحة لأنني لو مكانه وكان عندي مشروع مفيد لمصر وأجد ان اكبر راس في البلد عايزه تبلعني وتشترط عليا أن ابنه يشاركني والا اشوفلي بلد تانية بصراحة حتجيلي حالة قرف من البلد كلها وعمري ما افكر في اي مشروع صغير او كبير فيها

هو فعلا ممكن يعمل حاجة لمصر ولكن الظروف لازم تتغير الأول

طب ما كان دكتور زويل عنده مشروع مفيد للبلد ولكن برضه طلع اوهام والراجل خلع وبطل يتكلم فيه تاني ربما لأنه مش مشروع استثماري وعلاء ماينفعش يدخل كشريك فيه بالعافية ولن يدر ربحا لانه عبارة عن مشروع تعليمي وجامعة وكلام من اللي مش بيأكل عيش ده برضوا قالوا له لأ

دول عالم عايزة البلد خربانة ومتعمدين وعمرهم ما بصوا علي الصالح العام

امال احنا بقينا كده ليه علي كل المستويات

مصر عايزة حد يحبها والله لكن للاسف مبارك وعصابته بيكرهوها جدا وبيكرهوا شعبها اكتر

[deeppurple]

اعتقد ان انسب شخصية لقيادة مصر هو المشير عبد الحليم ابو غز الة وزير الدفاع السابق حيث ان هذا الرجل كان له من الشخصية القوية والطموحة ما كان ليؤهله لقيادة هذا البلد ولولا الغدر به وتهميشه والصاق التهم به من غير ادلة مقنعة لكان ازاح الطاغية منذ زمن بعيد

[Guest النسر المصري]

محدش كويس هيطلع يرشح نفسه ياجماعة لازم تعرفوا كدة

لابد من الاتفاق على شخص بعينه ومناداته بترشيح نفسه

ذلك لأن الطاغية وحاشيته قاموا بتعجيز الناخب مبكرا بقوانينهم التعجيزية لمادة النكسة ?? والتي كانت السبب المباشر في احباط المرشحين

لابد من مناداة الشعب لمرشح بعينه

ونراه صادقا خلوقا وذكيا

فاذا قامت المظاهرات بمناداة شخص ..بدلا من اضطهاد الطاغية وحاشيته...فسيكون لها الأثر القوي في تقوية قلب ذلك الرجل واستطاعته على مواجهة تلك الحكومة الخسيسة

[fares8]

وفي ظل الوضع الراهن يجب ان يستمر الرئيس في مكانه ولا يجب الخروج علي الحاكم واذا خرج احدهم وكما يقولون رشح نفسه للرياسه فهو اول من نقول له انت بالذات لا لانه كما قال الرسول لا نولي هذا العمل احدا ساله

فانت لك اطماع شخصيه وطبعا انت لست نبيا لانك بتتكلم في الحكم والنبياء بيتكلموا في التوحيد

اذا أنت تؤيد أن نقول للرئيس : لا ، لأنه ينوي ترشيح نفسه للمرة المليون !

ولكن من الممكن والآمن تماما ان يولي هو احدا غيره ولكن ليس ابنه الاخ جمال لأن ذلك يضر بالمصلحه الأخرويه له فهل يرضي اب بأن يحاسب فردان في نفس العائله علي كل هذه الناس  وبالاخص الفرد الثاني هو ابنه

ولكن الرئيس هو وحده الذي يستطيع ان يختار من يخلفه فهو يري الناس بعين مختلفه لا يعرفها الا من كان رئيسا

ما هو الشئ الأمن في الموضوع من وجهة نظرك !!

أنا شخصيا أؤيد ترشيح د/ أحمد الجويلي

و لا أمانع في ترشيح محمد الفايد ، فهو عقلية اقتصادية قوية ، و الصراحة أنا لو مكانه و خرجت من البلاد خاسرا أموالي بسببها ، ثم وجدت نظاما يحاول استغلال أموالي لحساب المسؤولين بدلا من الاستفادة من المشروعات لحساب البلد فلن أفكر أن أعمل شيئا في هذا البلد

و في أسوأ الأحوال فالرجل شبعان ، لن ينظر الى نقود الغلابة ليسرقها أو يداري على اللصوص في النظام الحاكم

بعدين مزعلين نفسكم ليه ، انتم شايفين الفايد هيموت على الرئاسة في مصر ، يكفيه ما لديه من مال و نفوذ فهو في الخارج أقوى من رئيس مصر نفسه

تم تعديل 7 يونيو 2005 بواسطة fares8