وما أدراك ما يوم الجمارك !!

[ابو خليل]

قرب نزولى للمحروسة مصر ..

وها انا ذا اجهز رزم من فئات مختلفة من العملات المصرية ..

لماذا ؟

علشان كل خطوة منذ دخولي لمصر لازم أدفع فيها ..

ويمثل لي يوم (الجمرك ) اسوا يوم في السنة ..

تخيل عربة من باب الجمرك للأتوبيس احمل عليها حقائبي بـ 100 جنية !

وغيره ..

دخان يا بيه

عربية يا باشا ..

حتي لو وقفت علي الرصيف استني واحد صاحبي مثلا بياخذوا أجرة رصيف !!

مرة واحد قال لي : عايز دخان يا باشا ..

لقيت ضابط مار نديت عليه ويا ريتني ما نديت ..

- يا حضرة الضابط الواد ده عايز مني فلوس

رد الضابط بكل برود :

وماله .. اديله !!

اه دي تقسيمة بقي !!

وفي مرة كان اخويا في الجمرك - وهو بالمناسبة مثلي يتمتع بالطيبة المفرطة ! _ المهم لا حظ ان كل واحد بيمر علي الجمارك بيضع في جواز السفر 20 جنية .. ومأمور الجمرك بياخذ الجواز ويزرف العشرين جنية .. ويرجع الجواز بسرعة ..

قام حاطط العشرينايه ..

المهم المأمور اخذ الجواز بتاعه وبص له بغضب :

يا استاذ احنا مش بناخذ فلوس ..

يا استاذ احترام نفسك ..

المهم الجمرك كله اتلم وكلمة من هنا .. كلمة من هناك الراجل هدئ ..

اخويا مشي ..

لقى واحد كان جالس جنب مأمور الجمرك بيجري وراه ..

يا استاذ يا استاذ :

نعم :

عايزين العشرين جنية !

اخويا اداله 5 جنية ..

وقال له : ما كنتم أخذتوها من الاول من غير هيصة .

باقي ثلاث أسابيع علي مذبحة الجمرك ..

دعواتكم

مفيش مخرج من حركات الجمرك دي ؟

[yasser6666]

استاذي ابو خليل

عن أي جمرك تتحدث مش فاهم؟؟

مانا نازل طالع من مصر وعمر حاجة من اللي بتحكي عليها دي حصلت معايا الحمدلله....

ظابط ايه اللي بياخد عشرين جنيه في الجواز ده؟؟

وليه عربيه من المطار لمحطة الاتوبيس ب 100 جنيه

انت بتتكلم علي بلد تانية والا اية انا مش فاهم

ياريت توضح أي مطار وانت جاي منين بالضبط

صحيح الفساد للركب لكن بيستوا عليك شوية لما تخش البلد

وصحيح نظام الشحاته علني من اللي واقف علي باب التواليت في المطار للي بيشيل لك الشنط ولكن انت وذوقك تدفع أو لا

انما القصص دي جديدة عليا فياريت توضح

[mnman]

اعتقد والله اعلم ان الاخ ابوخليل بيتكلم عن المنفذ البري!!!

علي الرغم اني عمري مانزلت بري بس استطيع ان اتخيل الحال!!

[yasovinas]

فعلا قد تجد سؤ معامله او جليطه في التعامل لكن فلوس مع جماعة الجمارك لا اظن

انا لي 14 سنه خارج مصر وتقريبا بنزل ثلاث مرات في السنه لم يحدث معي هذا لا في المطار الجديد ولا القديم ولا مطار برج العرب ولا مطار النزهه

العربانه اللي بتحط عليها الشنط ب2 جنيه ممكن الموظف يتلاكع في باقي الخمسه جنيه لكن لو وقفت له وطلبتها بيعطيهالك

في واحد بييجي يقف جنبك على سير الشنط يعرض خدماته لو رفضت بيمشي على طول

سواقين التاكسي خارج صالة الوصول واقفيا يدوروا على الزبون اللي عايز يسافر او الي مش معاه سيارة يعني حاجات عاديه بس اللي قلته يا ابو خليل ما شفتهوش

[ابو خليل]

فعلا انا أعني الفئة "البائسة " المكتوب عليها ان تنزل مصر بري !

نويبع

الغردقة

سفاجا!

وما ادراك ما البري ..

!!

وربنا يوعدنا ويسعدنا نصبح يوما من الأيام من أصحاب المطارات !!

جتنا نيلة في حظنا الهباب !!!