wagdi بتاريخ: 28 مايو 2005 تقديم بلاغ مشاركة بتاريخ: 28 مايو 2005 الديب ماينفعشي يحكم أسود… مستحيل… حتى لو الاسود مريضة… حتى لو متكسحة… مستحيل… لكن ممكن يحكم غنم… وشوية الديابة الي ماسكين البلد لوكانوا لقوا فيها اسود مكانوش قدروا يقعدوا فيها كل ده… يبقى معنى كدة إيه؟ معناه إن إحنا غنم… و لو هجنا مرة واحدة وطردنا الديابة حنلاقى نفسنا قدام حلين… يا ندور على ديب تاني يحكمنا… يا ننقي خاروف حلو مننا يحكمنا…والخاروف ده يا حايتحول لديب…يا حايجي ديب تاني ياكله… وفي كل الحالات حنبقى معملناش حاجة… طب و الحل إيه؟؟ الحل إن إحنا نبقى أسود… ينفع؟؟ ينفع… سهلة؟ لأة صعبة أوي… بس هوة ده الحل الوحيد… طب إزاي؟؟ هو ده إلي المفروض نفكرفيه… هو ده يبقى مشروعنا القومى… الي مش لازم يطلع في التلفزيون ولا يتكتب عليه في الجرنان… لكن نناقشه هنا… وفي كل مكان نقدرنقول فيه كلمة حرة… و في القهاوي… وفي الشغل… ولصحابنا… ولعيالنا… نحاول نشوف إيه عيوبنا… ونصلحها… نشوف إيه إلي مخلينا غنم…وإيه إلي ممكن يخلينا أسود… الشجرة دايماً لها أصل واحد … بس كترالفروع والورق والورد بيخلي كتير من الناس متبصش له… وشجرة مصر جزعها لا هو مبارك ولا غيره…الجزع ده هو المصريين…هوأصل الأصل…لو السوس ضرب فيه ولاميت رئيس جمهورية حيعرفوا يعملوله حاجة… لازم نصلح الأصل… وعلشان نصلح حاجة لازم نبقى مقتنعين الأول إن فيه حاجة غلط… فمن أشد البلاء أن يخفى على المرء عيبه… لازم نقتنع إننا غنم… كلمة تجيبهم وعصاية تفرقهم… وده من إيه؟ من الفقر؟ باكستان وبنجلاديش أفقر منا بس أسود… من المرض؟ جنوب أفريقيا نصها عندهم إيدز بس أسود… خيخة مش جدعان؟ مكناش بنينا هرم وحفرنا قناة… أمال إيه؟ الجهل احنا شعب جاهل… جاهل حتى بتاريخه… والي ميعرفش تاريخه ميعرفش مستقبله… والجهل مش جهل مدارس وبس… ياريت... كانت تبقى سهلة… الجهل جهل ثقافة وذوق واحترام وكرامة… الخواجة زي ما بيشجع ماتش كورة بيفتح قصة ولاكتاب يقرا فيه… وزي ما عنده MTV عنده DISCOVERY ومع إنه مطنش الدين لكن عنده البني أدم له حرمة وخصوصية وحقوق وكرامة لازم تتصان... إحنا بقى عندنا إيه... عندناالناس تقعد طول اليل تتكلم عن الكورة و أجعص مبيعات كتاب في مصرسنة 2004 كانت 9000 نسخة... عندنا مزيكا وميلودي وبس... معاندناش حتى فيلم تسجيلي واحد محترم عن حرب أكتوبر و شباب قاعد بيشتري في موبايلات و ينزل نغمات وزيرو تسعومية تكسب يا اكسلانس... اما احترامنا لأدمية بعضنا فده بقى مش محتاج كلام... طيب... هو مبارك الي مانعنا نقرا كتب والرئيس الجديد هو الي حيخلينا نقرا؟ ولا مبارك إلي بيقولنا نتف في الشارع... ولا هوة الي بيقولنا نربي عيالنا ازاي... ولا نعامل بعضنا ازاي... مافيش في الدنيا بلد فيها فوضى في الشوارع زينا مع إننا البلد الوحيدة إلى فيها عند كل إشارة عسكري... الرئيس الجديد هوالي حيخلينا نحترم المرور... طب بلاش... البواب إلي في عمارة والدتي في مصرعنده 11 عيل و ساكن في منورالعمارة...مجنون؟هو شايف نفسه صح... الرئيس الجديد حيعمل إيه... يعمل زي الصين و يقول كل واحد له طفل واحد بس... الناس حاتهيج... طب الي جايب 11 ده بيدخل عياله المدارس ببلاش...طب مش يبقى كده واخد حق واحد تاني جايب طفل أوطفلين... طيب هو برضه معقول إن الدولة تدعم الرغيف للمليونير زي ما بتدعمه للي مشلاقي ياكل... طب مش يبقى الغني كدة خد حق الفقير... طب الرئيس الجديد حيعمل إيه حيلغي الدعم؟؟ الناس حاتهيج... طب حيعمل زي الخواجة ويبقى الدعم فقط للييستحق الدعم... حيحتاج على الأقل 10 سنين لأن ده محتاج حكومة إلكترونية...ولو قال نعمل حكومة اكترونية حيتريقوا عليه... ياخوانا إحنا هانت علينا نفسنا فهنّا وحانهون على اي حد حيحكمنا... طب والحل... أنا رأيي..لازم نصلح نفسنا الأول...نبقى أسود...وده لو حصل كل حاجة حتبقى سهلة بعد كدة...أما لو فضلنا على حالنا يبقى مبارك برضه حيفضل،ولو مش هوا أي يبقى ديب تاني... طب إزاي؟ بالثقافة..بالفكر...بالأخلاق... العادات السيئة معدية... والعادات الكويسة برضه معدية... الجهلة واشباه المتعلمين كتير...والمثقفين برضه كتير... الصيّع كتير والمحترمين كتير... والمليان لازم يكب على الفاضي... نبقى قدوة لبعض...نتواصى بالمعروف ونتناهى عن المنكر... نعلم أولادنا في البيوت تاريخ مصر إلي مابيعلموهوش في المدارس... نعلمهم يعني إيه وطنية...ويعني إيه ديموقراطية...ويعنى إيه أحترام الأخر... يمكن وإحنا بنعلمهم نتعلم إحنا كمان... نعامل الي اقل منا زي ما بنعامل الي أعلى منا... ونقف في إشارات المرور... ونبطل نسلك أمورنا بالفلوس...حتى لو اتعصلجت...واهو اعتبروه جهاد في سبيل الوطن... مليون حاجة نقدرنعملها بنفسنا من غير ماحد يقدر يمنعنا... ثورة فكرية...ثورة اجتماعية... نشمرعن ساعد الجد ونشتغل...والي مش عارف مين فيهم ساعد الجد يشمر الاتنين...المهم يشتغل... شوفوا الأخت شانا...ربنا يقوم والدها بالسلامة يا رب.... بنت جدعة...دكتورة ونزلت تقف في محل خضار... دماغ نضيفة... ضربت مثل حلو...طب لو كل واحد فينا يضرب مثل حلو؟ حتفرق كتييير... ده رأيي... انتو رأيكم إيه؟؟ فكأننا والماء من حولنا... قوم جلوس وحولهم ماء... رابط هذا التعليق شارك المزيد من خيارات المشاركة
se_ Elsyed بتاريخ: 28 مايو 2005 تقديم بلاغ مشاركة بتاريخ: 28 مايو 2005 أستاذ وجدي ... أرجو إختيار عنوان أخف وطأه من الذي أستخدمته .. فمهما كان برضوا إحنا شعب عريق وفيه الخير إلى يوم القيامة ... ولا تتوقع يا سيدي من شعب مقهور لمدة تزيد عن نصف قرن أن ينتفض في يوم وليلة ... المسألة محتاجة وقت .. وشكراً الأحـــرار يؤمنون بمن معه الحق .. و العبيــد يؤمنون بمن معه القوة .. فلا تعجب من دفاع الأحرار عن الضحية دائماً .. و دفاع العبيد عن الجلاد دائماً رابط هذا التعليق شارك المزيد من خيارات المشاركة
مندوب القِلة المندسة بتاريخ: 28 مايو 2005 تقديم بلاغ مشاركة بتاريخ: 28 مايو 2005 أنا شايف إن الحرية هي أصل أي تقدم .. لما يبقى في حرية هايبقى في كرامة و هايبقى في نقد و حساب و عقاب و مراجعة للذات و كشف للعيوب و الأخطاء و بالتالي نقدر نحل كل مشاكلنا .. المهم نبقى أحرار إزاي ؟ .. بالقوة ( قوة الشعب ) لازم ندفع تمن حريتنا و ناخدها بنفسنا لا يجيبهالنا ظباط ولا قوى خارجية .. لو خدنا حريتنا بنفسنا مش هانفرط فيها تاني روح يا قمر الليل و نام .. ده السكوت زي الكلام رابط هذا التعليق شارك المزيد من خيارات المشاركة
seastar44 بتاريخ: 30 مايو 2005 تقديم بلاغ مشاركة بتاريخ: 30 مايو 2005 يا أخ وجدى ... أنت تشكوا تراكمات وتداعيات حكم ونظام حكم طال الى خمسة وعشرون عاما .. ووصل بنا فى النهاية الى ما نحن فيه خاليا من فساد وكساد وسوء أحوال ومآل ... ولكنك تأثرت كثيرا بفيلم الملك الاسد وكتاب كليله ودمنه ... ياعزيزى الاغنام خلقها الله أغناما .. والاسود أسودا .. والضباع ضباعا .. ولكن لن يصبح القرد غزالا .... إلا في عين أمه ... إصلاح ما فسد فى 25 عاما يحتاج الى 50 عاما ... وعلى الله فليتوكل .. المصلحون .. رابط هذا التعليق شارك المزيد من خيارات المشاركة
Recommended Posts
انشئ حساب جديد أو قم بتسجيل دخولك لتتمكن من إضافة تعليق جديد
يجب ان تكون عضوا لدينا لتتمكن من التعليق
انشئ حساب جديد
سجل حسابك الجديد لدينا في الموقع بمنتهي السهوله .
سجل حساب جديدتسجيل دخول
هل تمتلك حساب بالفعل؟ سجل دخولك من هنا.
سجل دخولك الان